𑐮𑑀𑐎𑐎𑐵𑐳𑐵

𑐎𑐵𑐳𑐵 𑐰𑐶𑐱𑑂𑐰𑐫𑐵 𑐴𑐬𑐾𑐎 𑐡𑐾𑐱𑐫𑑂 𑐠𑑅 𑐠𑑅𑐐𑐸 𑐴𑐾 𑐎𑐠𑑄𑐫𑐵 𑐡𑐸 𑑋 𑐎𑐵𑐳𑐵𑐫𑐵 𑐖𑑂𑐫𑐵 𑐩𑐣𑐫𑐵𑐟 𑐫𑐵𑐄𑑃𑐎𑐾𑐐𑐸𑐖𑐎 𑐩𑐏𑐳𑐾𑑄 𑐣𑑂𑐫𑐵𑐂𑐥𑐸𑐎𑑂𑐎 𑐣𑑂𑐴𑐶 𑐕𑑂𑐫𑐵𑐫𑑂𑐟, 𑐧𑑁𑐡𑑂𑐢𑐶𑐎𑐳𑑂𑐟𑐬 𑐧𑐺𑐡𑑂𑐢𑐶 𑐫𑐵𑐫𑑂𑐟 𑐰 𑐱𑐵𑐬𑐷𑐬𑐶𑐎 𑐎𑑂𑐲𑐩𑐟𑐵 𑐀𑐥𑑂𑐰𑐫𑑂𑐎𑐾𑐟 𑐣𑑄 𑐁𑐰𑐱𑑂𑐫𑐎 𑑋 𑐣𑐾𑐰𑐵𑑅𑐟𑐫𑑂 𑐡𑐠𑑂𑐰𑐷 𑐣𑑄 𑐠𑑅𑐐𑐸 𑐴𑐾 𑐎𑐠𑑄𑐫𑐵 𑐎𑐵𑐳𑐵𑐫𑐵 𑐰𑐶𑐎𑐵𑐳 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑑑 𑐩𑑂𑐴𑐳𑐷𑐎𑐵

𑐳𑑄𑐳𑐵𑐬𑐫𑑂 𑐦𑐸𑐎𑑂𑐎 𑐡𑐾𑐳𑐫𑑂 𑐠𑑅𑐐𑐸 𑐡𑐾 𑐎𑐠𑑄𑐫𑐵 𑐎𑐵𑐳𑐵𑐟 𑐡𑐸 𑐠𑐾𑑄 𑐣𑐾𑐰𑐵𑑅𑐟𑐫𑑂 𑐣𑑄 𑐠𑑅𑐐𑐸 𑐴𑐾 𑐩𑑁𑐮𑐶𑐎 𑐎𑐵𑐳𑐵𑐟 𑐡𑐸 𑑋 𑐴𑐬𑐾𑐎 𑐡𑐾𑐫𑐵 𑐠𑑅𑐐𑐸 𑐁𑐬𑑂𑐠𑐶𑐎, 𑐳𑐵𑐩𑐵𑐖𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎 𑐥𑐴𑐶𑐔𑐵𑐣 𑐄𑐐𑐸 𑐡𑐾𑐫𑐵 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐎𑐵𑐳𑐵𑐥𑐵𑐏𑐾𑑄 𑐧𑐶𑐫𑐵𑐔𑑂𑐰𑐣𑐷 𑐠𑐾𑑄 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵𑐫𑐵𑐟 𑐣𑑄 𑐄𑐐𑐸 𑐠𑐵𑐳𑐫𑑂 𑐩𑑂𑐴𑐶𑐟𑐷𑐐𑐸 𑐥𑐬𑐩𑑂𑐥𑐬𑐵𑐐𑐟 𑐎𑐵𑐳𑐵𑐥𑐵𑐏𑐾𑑄 𑐳𑑂𑐥𑐲𑑂𑐚 𑐖𑐸𑐂 𑑋 𑐎𑐵𑐳𑐵 𑐢𑐵𑐮𑐎𑐶 𑐩𑐣𑐫𑐵𑐟 𑐣𑑂𑐴𑑂𑐫𑐵𑐂𑐥𑐸𑐎𑐾𑐟 𑐎𑐵𑐫𑑂𑐐𑐸 𑐰𑐵 𑐕𑑂𑐫𑐵𑐫𑑂𑐐𑐸 𑐳𑐵𑐢𑐣 𑐎𑐠𑑄 𑐥𑐬𑐶𑐨𑐵𑐲𑐶𑐟 𑐫𑐵 𑐕𑑄 𑑋 𑐐𑐠𑐾 𑐮𑐵𑐳𑐵 𑐢𑐵𑐮𑐎𑐶 𑐮𑐵𑐫𑑂𑐐𑐸 𑐳𑐵𑐢𑐣 𑐢𑐿𑐐𑐸 𑐳𑐷𑐡𑐸 𑑋 𑐀𑐠𑐾 𑐴𑐾 𑐎𑐵𑐳𑐵 𑐢𑐵𑐫𑑂𑐧𑐮𑐫𑑂 𑐎𑐵𑐫𑑂𑐐𑐸 𑐎𑐫𑐵𑑅 𑐩𑑂𑐴𑐶𑐟𑐾𑐐𑐸 𑐏𑑅 𑑋

𑐳𑐵𑐩𑐵𑐣𑑂𑐫𑐟𑐫𑐵 𑐎𑐵𑐳𑐵𑐫𑐵 𑐣𑐵𑑄 𑐠𑐵𑐫𑑂𑐫𑐵 𑐣𑐵𑑄 𑐎𑐠𑑄, 𑐄𑐐𑐸 𑐎𑐵𑐳𑐵𑐫𑑂 𑐴𑐵𑐮𑐷𑐐𑐸 𑐩𑑂𑐫𑐾𑐫𑐵 𑐣𑑂𑐴𑑂𑐫𑑀𑐣𑐾𑐫𑐵 𑐗𑑂𑐰𑑅𑐥𑐵𑐏𑐾𑑄, 𑐰𑐳𑑂𑐟𑐸𑐫𑐵 𑐣𑐵𑑄 𑐎𑐠𑑄 𑐟𑐫𑐵𑑅 𑐟𑑅𑐐𑐸 𑐏𑐣𑐾𑐡𑐸 𑑋 𑐥𑐬𑐩𑑂𑐥𑐬𑐵𑐐𑐟 𑐎𑐵𑐳𑐵𑐫𑐵 𑐰𑐶𑐱𑐾𑐲𑐟𑐵 𑐢𑐿𑐐𑐸 𑐴𑐾 𑐢𑑂𑐫𑐧𑐵 𑐟𑑂𑐫𑐵𑐎𑐾 𑐧𑐸𑐎𑐾𑐐𑐸 𑐳𑐶𑐧𑐾𑑄 𑐣𑑄 𑐣𑑂𑐴𑑂𑐫𑐵𑐂𑐥𑐸 𑐕𑑂𑐫𑐵𑐫𑑂𑐐𑐸, 𑐖𑐷𑐰𑐣𑐫𑐵𑐟 𑐩𑐔𑐵𑐫𑑂𑐎 𑐣𑑂𑐴𑑂𑐫𑑀𑐣𑐾 𑐕𑑂𑐰𑐫𑑂𑐐𑐸 𑐏𑑅 𑑋 𑐠𑑅𑐐𑐸 𑐠𑐵𑐳𑐫𑑂 𑐴𑐾 𑐄𑐥𑐮𑐧𑑂𑐢 𑐖𑐹𑐐𑐸 𑐳𑐵𑐩𑐵𑐣𑐫𑐵𑐟 𑐎𑐵𑐳𑐵𑐫𑐵 𑐩𑐵𑐢𑑂𑐫𑐩 𑐡𑐫𑐾𑐎𑐾𑐐𑐸 𑐏𑑅 𑑋 𑐳𑑂𑐠𑐵𑐣𑐷𑐎𑐬𑐞 𑐫𑐵𑐣𑐵𑑅 𑐫𑑄𑐎𑐾𑐐𑐸 𑐴𑐾 𑐣𑐾𑐰𑐵𑑅 𑐎𑐵𑐳𑐵𑐫𑐵 𑐰𑐶𑐱𑐾𑐲𑐟𑐵 𑐖𑐸𑐐𑐸𑐮𑐶𑑄 𑐠𑐵𑐫𑑂 𑐎𑐠𑑄 𑐰 𑐴𑐾 𑐕𑐐𑐹 𑐎𑐵𑐳𑐵𑐫𑐵 𑐣𑐵𑑄 𑐥𑐵𑐣𑐵𑑅 𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋

𑐳𑐵𑐩𑐵𑐣𑑂𑐫𑐟𑐫𑐵 𑐎𑐵𑐳𑐵 𑐢𑐵𑐫𑑂𑐧𑐮𑐫𑑂 𑐎𑐵𑐳𑐵𑐫𑑂 𑐣𑐶𑐱𑑂𑐔𑐶𑐟 𑐣𑐶𑐫𑐩 𑐡𑐫𑑂𑐩𑐵𑑅 𑑋 𑐎𑐵𑐳𑐵𑐫𑑂 𑐃 𑐰 𑐠𑐵𑐫𑑂 𑐣𑐶𑐱𑑂𑐔𑐶𑐟 𑐖𑐸𑐂𑐩𑐵𑑅 𑑋 𑐎𑐵𑐳𑐵𑐥𑐵𑐏𑐾𑑄 𑐎𑐵𑐳𑐵𑐩𑐶𑐟𑐫𑑂𑐳𑑄 𑐣𑑂𑐴𑑂𑐫𑐵𑐂𑐥𑐸𑐎𑐹𑐐𑐸 𑐖𑐸𑐂𑐩𑐵𑑅 𑑋 𑐎𑐵𑐳𑐵𑑄 𑐱𑐵𑐬𑐷𑐬𑐶𑐎, 𑐩𑐵𑐣𑐳𑐶𑐎, 𑐧𑑁𑐡𑑂𑐢𑐶𑐎 𑐕𑐸𑑄 𑐰𑐶𑐎𑐵𑐳𑐫𑐵 𑐣𑐶𑐟𑐶𑑄 𑐐𑑂𑐰𑐴𑐵𑐮𑐶 𑐫𑐵𑑅𑐐𑐸 𑐖𑐸𑐂𑐩𑐵𑑅 𑑋 𑐃 𑐩𑐔𑐵𑐫𑑂𑐎 𑐕𑑂𑐫𑐵𑐎𑐾𑐐𑐸 𑐎𑐵𑐳𑐵𑐫𑐵 𑐩𑐹 𑐰𑐶𑐱𑐾𑐲𑐟𑐵 𑐏𑑅 𑑋 𑐎𑐵𑐳𑐵𑐫𑐵 𑐱𑐸𑐬𑐸𑐰𑐵𑐟 𑐳𑐩𑑂𑐧𑐣𑑂𑐢𑐷 𑐮𑐶𑐏𑐶𑐟 𑐥𑑂𑐬𑐩𑐵𑐞 𑐩𑐡𑐸𑐳 𑐀𑐣𑐸𑐩𑐵𑐣 𑐎𑐠𑑄 𑐩𑐵𑐣𑐫𑐫𑐵𑐎𑐾 𑐔𑐾𑐟𑐣𑐵𑐫𑐵 𑐰𑐶𑐎𑐵𑐳 𑐣𑐵𑐥𑑄 𑐎𑐵𑐳𑐵𑐫𑐵 𑐣𑑄 𑐥𑑂𑐬𑐔𑐮𑐣 𑐰𑐮 𑐖𑐸𑐂𑐩𑐵𑑅 𑑋

𑑑.𑑒 𑐎𑐵𑐳𑐵𑐫𑐵 𑐰𑐬𑑂𑐐𑐷𑐎𑐬𑐞

𑐎𑐵𑐳𑐵 𑐣𑑂𑐴𑑂𑐫𑐵𑐂𑐥𑐸𑐎𑐾𑐐𑐸 𑐮𑐵𑐐𑐷, 𑐩𑐔𑐵𑐫𑑂𑐎 𑐡𑐶𑑄 𑐕𑑂𑐰𑐫𑑂𑐐𑐸 𑐮𑐵𑐐𑐷 𑐕𑑂𑐫𑐮𑐷𑐐𑐸 𑐖𑐸𑐐𑐸𑐮𑐶𑑄 𑐄𑐥𑐫𑐸𑐎𑑂𑐟 𑐃 𑐠𑐵𑐫𑑂, 𑐩𑑁𑐳𑐩, 𑐄𑐩𑐾𑐬, 𑐮𑐶𑐒𑑂𑐐𑐫𑐵 𑐁𑐢𑐵𑐬𑑄 𑐰𑐶𑐨𑐶𑐣𑑂𑐣 𑐎𑐠𑑄 𑐎𑐵𑐳𑐵𑐫𑐵𑐟 𑐧𑑂𑐰𑐠𑐮𑐾 𑐕𑐶𑑄 𑑋

𑑑.𑑒.𑑑 𑐮𑐶𑐒𑑂𑐐𑐫𑐵 𑐁𑐢𑐵𑐬𑐫𑑂 𑐎𑐵𑐳𑐵𑐫𑐵 𑐧𑑂𑐰𑐠𑐮𑐵

𑐎𑐵𑐳𑐵 𑐦𑐸𑐎𑑂𑐎𑐳𑐶𑐫𑐵 𑐮𑐵𑐐𑐷 𑐰𑐬𑐵𑐰𑐬 𑐏𑑅 𑑋 𑐀𑐠𑐾𑐏𑑅𑐳𑐵𑑄 𑐎𑐵𑐳𑐵 𑐩𑑂𑐴𑐶𑐟𑐹𑐐𑐸 𑐁𑐢𑐵𑐬𑑄 𑐰𑐵 𑐎𑐵𑐳𑐵𑐫𑐵 𑐁𑐢𑐵𑐬𑑄 𑐩𑐶𑐳𑐵 𑐰 𑐩𑐶𑐖𑑄𑐫𑐵𑐟 𑐧𑑂𑐰𑐠𑐮𑐾𑐐𑐸 𑐎𑐵𑐳𑐵𑐟 𑐣𑑄 𑐥𑐬𑐩𑑂𑐥𑐬𑐵𑐐𑐟 𑐮𑑀𑐎 𑐎𑐵𑐳𑐵𑐫𑑂 𑐡𑐸 𑑋 𑐠𑑁𑑄𑐎𑐣𑑂𑐴𑐫𑑂 𑐩𑐶𑐳𑐵 𑐰 𑐩𑐶𑐖𑑄 𑐳𑐩𑐵𑐣 𑐢𑐵𑑅𑐳𑐵𑑄 𑐱𑐵𑐬𑐷𑐬𑐶𑐎 𑐬𑐸𑐥𑑄 𑐳𑐩𑐵𑐣 𑐏𑐣𑐾𑐩𑐡𑐸 𑑋 𑐥𑑂𑐬𑐎𑐺𑐟𑐶𑑄 𑐴𑐾 𑐩𑐶𑐳𑐵𑐥𑐶𑑄 𑐩𑐶𑐖𑑄𑐳𑐶𑐧𑐾𑑄 𑐩𑐶𑐳𑐵 𑐎𑐩𑐖𑑀𑐬 𑐏𑐣𑐾𑐡𑐸 𑑋 𑐟𑐬 𑐣𑑂𑐴𑐵𑐥𑐵𑐫𑐵 𑐳𑐩𑐵𑐖𑐫𑑂 𑐩𑐶𑐳𑐵𑐥𑐶𑑄 𑐕𑐾𑑃𑐫𑐵 𑐖𑑂𑐫𑐵𑐫𑑂, 𑐨𑐸𑐟𑐹 𑐖𑑂𑐫𑐵𑐫𑑂 𑐧𑑂𑐫𑐳𑑂𑐟 𑐖𑐸𑐂𑐥𑐶𑑄, 𑐩𑐶𑐖𑑄𑐟 𑐱𑐵𑐬𑐷𑐬𑐶𑐎 𑐧𑐮𑐫𑐵 𑐖𑑂𑐫𑐵 𑐫𑐵𑐂𑐥𑐶𑑄 𑐎𑐠𑑄 𑐩𑑂𑐴𑐳𑐷𑐫𑐵 𑐔𑑂𑐰𑑄𑐥𑐶𑑄 𑐏𑑅𑑋 𑐠𑐠𑐾𑐴𑐾 𑐥𑐬𑐩𑑂𑐥𑐬𑐵𑐐𑐟 𑐎𑐵𑐳𑐵𑐫𑑂 𑐣𑑄 𑐩𑐶𑐳𑐵𑐟 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐰 𑐩𑐶𑐖𑑄𑐟 𑐩𑑂𑐴𑐶𑐟𑐷 𑐎𑐵𑐳𑐵 𑐎𑐠𑑄 𑐧𑑂𑐰𑐠𑐮𑐵 𑐟𑑅𑐐𑐸 𑐡𑐸 𑑋 𑐄𑐎𑐶𑑄 𑐳𑐵𑐩𑐵𑐣𑑂𑐫𑐟𑐫𑐵 𑐩𑐶𑐳𑐵𑐟 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐩𑐶𑐖𑑄𑐟 𑐩𑑂𑐴𑐶𑐟𑐷 𑐩𑐏𑐸𑐳𑐵, 𑐩𑐶𑐖𑑄𑐟 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐩𑐶𑐳𑐵𑐥𑐶𑑄 𑐩𑑂𑐴𑐶𑐟𑐷 𑐩𑐏𑐸 𑑋 𑐩𑑂𑐴𑑀𑐖𑐎 𑐎𑐵𑐳𑐵 𑐩𑐶𑐳𑐵 𑐰 𑐩𑐶𑐖𑑄 𑐧𑑂𑐰𑐠𑐮𑐾𑐐𑐸 𑐡𑐸𑐳𑐵, 𑐳𑐵𑐩𑐵𑐣𑑂𑐫𑐟𑐫𑐵 𑐩𑐾𑐐𑐸 𑐎𑐵𑐳𑐵𑐟 𑐦𑐸𑐎𑑂𑐎 𑐴𑐾 𑐧𑐶𑐣𑐵 𑐮𑐶𑐒𑑂𑐐𑐫𑐵 𑐨𑐾𑐡𑐨𑐵𑐰 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐩𑐶𑐖𑑄𑐟 𑐖𑐎 𑐩𑑂𑐴𑐶𑐟𑐷𑐐𑐸 𑐰𑐵 𑐩𑐶𑐳𑐵𑐟 𑐖𑐎 𑐩𑑂𑐴𑐶𑐟𑐷𑐐𑐸 𑐢𑐎𑐵𑑅 𑐩𑑂𑐴𑐶𑐟𑐾 𑐴𑐾 𑐩𑐖𑑂𑐫𑐹 𑐢𑐿𑐐𑐸 𑐩𑐏𑐸 𑑋 𑐀𑐥𑑂𑐰𑑅𑐫𑐵𑐣𑐵𑑅 𑐖𑐎 𑐩𑑂𑐴𑐶𑐟𑐷 𑐩𑐏𑐹𑐐𑐸 𑐏𑑅 𑑋

𑐃 𑐕𑑂𑐫𑐵𑐫𑑂𑐐𑐸 𑐮𑐵𑐐𑐷 𑐟𑑅 𑐥𑐸𑐮𑐾 𑐢𑐸𑑄𑐎𑐹𑐥𑐶𑑄, 𑐧𑐵𑐖𑑂𑐫𑑅 𑐰𑐣𑐾 𑐢𑐸𑑄𑐥𑐶𑑄 𑐧𑐸𑐝𑐵𑐟 𑐣𑑄 𑐣𑑂𑐴𑐵𑐂𑐥𑐸 𑐕𑑂𑐫𑐵𑐫𑑂𑐐𑐸 𑐮𑐵𑐐𑐷 𑐎𑐵𑐳𑐵𑐟 𑐩𑑂𑐴𑐶𑐟𑐾𑐐𑐸 𑐫𑐵𑑅 𑐐𑐠𑐾 𑐥𑐔𑐶𑐳 𑐰𑐵 𑐠𑐬𑑂𑐎𑐶 𑐩𑑂𑐴𑐶𑐟𑐾𑐐𑐸, 𑐣𑐏𑑅𑐔𑐏𑑅 𑐰𑐮𑐎𑐶 𑐖𑐹 𑐩𑑂𑐴𑐶𑐟𑐾𑐐𑐸, 𑐥𑐵𑐳𑐵 𑐩𑑂𑐴𑐶𑐟𑐾𑐐𑐸, 𑐟𑐵𑐳 𑐩𑑂𑐴𑐶𑐟𑐾𑐐𑐸 𑐁𑐡𑐶 𑑋 𑐐𑐸𑐐𑐸𑑄 𑐎𑐵𑐳𑐵𑐟 𑐩𑐔𑐵 𑐄𑐩𑐾𑐬𑐫𑑂 𑐩𑑂𑐴𑐶𑐟𑐾𑐐𑐸 𑐩𑐫𑐵𑑅 𑑋 𑐟𑐵𑐳 𑐩𑑂𑐴𑐶𑐟𑐾𑐐𑐸 𑐢𑐵𑑅𑐳𑐵 𑐩𑐔𑐵𑐟 𑐣𑑄 𑐩𑑂𑐴𑐶𑐟𑐾𑐐𑐸 𑐫𑐵𑑅 𑑋 𑐐𑐧𑐮𑐾𑑄 𑐐𑐰𑐮𑐾𑑄 𑐠𑑁𑑄𑐎𑐣𑑂𑐴𑐾 𑐩𑐶𑐳𑐵𑐟 𑐣𑑄 𑐩𑑂𑐴𑐶𑐟𑐾𑐐𑐸 𑐫𑐵𑑅𑐳𑐵𑑄 𑐣𑑂𑐴𑐵𑐥𑐵𑐫𑐵𑐥𑐶𑑄 𑐩𑐶𑐳𑐵𑐩𑐔𑐵𑐟 𑐢𑐵𑑅𑐳𑐵 𑐟𑐵𑐳 𑐩𑑂𑐴𑐶𑐟𑐾𑐐𑐸 𑐫𑐵𑑅𑐐𑐸 𑐏𑐣𑐾𑐩𑐡𑐸 𑑋 𑐠𑐸𑐎𑐠𑑄 𑐮𑐶𑐒𑑂𑐐, 𑐄𑐩𑐾𑐬𑐫𑐵 𑐁𑐢𑐵𑐬𑑄 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐟 𑐧𑑂𑐰𑐠𑐮𑐾 𑐕𑐶𑑄 𑑋 𑐠𑐸𑐐𑐸 𑐎𑐠𑑄 𑐩𑐶𑐖𑑄𑐟 𑐩𑑂𑐴𑐶𑐟𑐷𑐐𑐸, 𑐩𑐶𑐳𑐵𑐟 𑐩𑑂𑐴𑐶𑐟𑐷𑐐𑐸 𑐰 𑐩𑐔𑐵𑐟 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐡𑐳𑐸𑐫𑐵 𑐬𑐸𑐥𑐫𑑂 𑐳𑐵𑐩𑐵𑐣𑑂𑐫 𑐩𑑂𑐴𑐳𑐷𑐎𑐵 𑐠𑐸𑐎𑐠𑑄 𑐡𑐸 𑑋

𑑑.𑑒.𑑑.𑑑 𑐩𑐶𑐖𑑄 𑐎𑐵𑐳𑐵

𑐧𑐮 𑐰𑐵 𑐨𑐎𑐸𑑄𑐐𑑂𑐰𑐵𑐬𑐵, 𑐐𑐸𑐔𑑂𑐔𑐵, 𑐩𑐵𑐎𑑅 𑐥𑐸𑐮𑐵 𑐎𑐵𑐳𑐵, 𑐏𑑂𑐫𑐵𑑅𑐐𑑂𑐰𑐵𑐬𑐵, 𑐡𑐾𑐐𑑅 𑐎𑐵𑐳𑐵, 𑐎𑐧𑐬𑑂𑐡𑐶, 𑐎𑐠𑐶 𑐎𑐵𑐳𑐵, 𑐳𑐮 𑐎𑐵𑐳𑐵, 𑐐𑑂𑐰𑑄𑐐𑑅 𑐎𑐵𑐳𑐵, 𑐖𑐸𑐖𑐸 𑐎𑐵𑐳𑐵, 𑐥𑐵𑐣𑐡𑐱 𑐰𑐵 𑐟𑐎𑐸𑐩𑐮𑐸 𑐎𑐵𑐳𑐵 𑐁𑐡𑐶𑐫𑐵𑐟 𑐰𑐶𑐱𑐸𑐡𑑂𑐢 𑐩𑐶𑐖𑑄 𑐎𑐵𑐳𑐵𑐫𑐵 𑐬𑐸𑐥𑐫𑑂 𑐎𑐵𑐕𑐶𑑄 𑑋 𑐩𑐶𑐖𑑄𑐟 𑐖𑐎 𑐴𑐾 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵𑐟 𑐩𑐢𑑂𑐫𑐾 𑐡𑐳𑐸𑐫𑐵 𑐬𑐸𑐥𑐫𑑂 𑐎𑑂𑐰𑐫𑑂 𑐧𑐶𑐫𑐵𑐐𑐸 𑐡𑐸 𑑋

𑑑.𑑒.𑑑.𑑑.𑑑 𑐏𑐶𑐥𑑅 𑐳𑐵𑐮𑐵 : 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵

𑐏𑑂𑐫𑐮𑐫𑑂 𑐥𑐶𑐣𑐾 𑐔𑑂𑐫𑐵𑐩𑑂𑐴 𑐗𑐶𑐩𑑂𑐴 𑐳𑐶𑐰𑐾𑑄 𑐀𑐥𑑂𑐰𑑅 𑐩𑐣𑐹𑐟 𑐔𑑂𑐰𑐣𑐵𑑅 𑐣𑐶𑐐𑐹 𑐥𑐸𑐔𑑅 𑐡𑐫𑑂𑐎𑐷, 𑐧𑐬𑐵𑐧𑐬 𑐮𑑂𑐫𑐵𑐏𑑄 𑐎𑐵𑐳𑐵𑐩𑐶𑐟 𑐂𑐣𑐵: 𑐎𑐵𑐂 𑑋 𑐠𑐸𑐐𑐸 𑐎𑐵𑐳𑐵𑐫𑐵 𑐮𑐵𑐐𑐷 𑐧𑐮𑑂𑐮𑐵𑐐𑐸 𑐕𑐥𑐸 𑐎𑑂𑐰𑐵𑐟𑐸𑐐𑐸 𑐏𑐶𑐥𑑅 𑐡𑐿 𑑋 𑐄𑐐𑐸 𑐏𑐶𑐥𑑅𑐫𑐵 𑐡𑐠𑐸𑐂 𑐕𑐐𑐹 𑐔𑐶𑑄 𑐟𑐫𑐵𑐟𑑅𑐐𑐸 𑐡𑐿 𑑋 𑐣𑐶𑐠𑑂𑐰𑑅 𑐩𑐣𑐹𑐟𑐫𑑂𑐳𑑄 𑐄𑐐𑐸 𑐏𑐶𑐥𑑅𑐫𑐵𑐟 𑐠𑑅𑐠𑑅𑐐𑐸 𑐠𑐵𑐳𑐫𑑂 𑐳𑐵𑐮𑐾𑐐𑐸 𑐎𑐸𑐟𑑅 𑐫𑐵𑐂 𑑋 𑐐𑐸𑐐𑐸 𑐥𑐸𑐔𑐮𑑄 𑐳𑐵𑐮𑐵𑑅 𑐠𑑅𑐐𑐸𑐥𑐵𑐏𑐾 𑐎𑐵𑐫𑑂𑐐𑐸 𑐫𑐵𑐂 𑑋 𑐔𑐶𑑄𑐫𑐵𑐟 𑐁𑐢𑐵𑐬 𑐡𑐫𑐎𑐵 𑐔𑐶𑑄 𑐣𑑄 𑐥𑐶𑐣𑐾 𑐠𑑂𑐫𑑄𑐎 𑐳𑐵𑐮𑐵𑑅 𑐎𑐵𑐫𑑂𑐦𑐹𑐐𑐸 𑐥𑐸𑐔𑑅 𑐟𑑂𑐫𑐵𑑅𑐐𑐸 𑐖𑐸𑐂 𑑋 𑐠𑑂𑐰 𑐎𑐵𑐳𑐵 𑐣𑐶𑐟𑐵𑐣𑑂𑐟 𑐱𑐵𑐬𑐷𑐬𑐶𑐎 𑐧𑐮𑐣𑐵𑐥 𑐳𑑂𑐰𑐵𑐥𑐹 𑐡𑐹𑐐𑐸 𑐎𑐵𑐳𑐵 𑐏𑑅 𑑋

𑑑.𑑒.𑑑.𑑑.𑑒 𑐐𑑂𑐰𑑄𑐐𑑅 𑐎𑐵𑐳𑐵

𑐠𑑂𑐰 𑐳𑐵𑐩𑐵𑐣𑑂𑐫𑐟𑐫𑐵 𑐫𑐾𑑃𑐫𑐵𑐫𑐵 𑐖𑑅𑐏𑑅 𑐩𑑂𑐴𑐶𑐟𑐷𑐐𑐸, 𑐰𑐣𑑄 𑐩𑐶𑐖𑑄𑐟𑐫𑑂 𑐡𑐠𑐸𑐂 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐏𑑅 𑑋 𑐠𑐸𑐎𑐷 𑐕𑐩𑑂𑐴 𑐩𑐵𑐏𑐵 𑐡𑐿 𑐄𑐩𑑂𑐴 𑐩𑐵𑐏𑐵𑐫𑐵𑐟 𑐕𑐔𑐵𑐏𑐾𑐬𑑄 𑐐𑑂𑐰𑑄𑐐𑑅𑐟 𑐰𑐫𑐵𑑅 𑐐𑐫𑑂𑐟 𑐟𑐫𑐵𑐬 𑐖𑐸𑐫𑐵𑑅 𑐔𑑂𑐰𑐣𑐷 𑑋 𑐩𑐵𑐏𑐵𑐫𑐵𑐟 𑐥𑐵𑑅 𑐔𑑂𑐰𑐣𑐵𑑅 𑐔𑑂𑐰𑐣𑐷𑐩𑑂𑐴 𑐡𑐿 𑑋 𑐄𑐩𑑂𑐴 𑐥𑐵𑑅 𑐔𑑂𑐰𑐣𑐵𑑅 𑐔𑑂𑐰𑐣𑐷𑐩𑑂𑐴𑐾𑐳𑐶𑐣𑑄 𑐩𑐏𑑄𑐎 𑐩𑐾𑐥𑐶𑑄 𑐐𑑂𑐰𑑄𑐐𑑅𑐟 𑐰𑐫𑐵𑑅 𑐩𑐵𑐏𑐵𑐫𑐵𑐟 𑐐𑐫𑐵: 𑐰𑐣𑐷 𑑋 𑐄𑐐𑐸 𑐴𑐾 𑐂𑐮𑐫𑑂 𑐩𑐵𑐏𑐵 𑐥𑐵𑑅 𑐔𑑂𑐰𑐣𑐵𑑅𑐔𑑂𑐰𑐣𑐷𑐩𑑂𑐴𑐾𑐳𑐶𑐣𑑄 𑐠𑐷 𑐦𑐟 𑐢𑐵𑑅𑐳𑐵 𑐄𑐩𑑂𑐴 𑐐𑑂𑐰𑑄𑐐𑑅 𑐩𑐵𑐏𑐵 𑐖𑐸𑐂 𑑋 𑐠𑐸𑐎𑐠𑑄 𑐩𑐵𑐏𑐵 𑐰 𑐐𑑂𑐰𑑄𑐐𑑅 𑐖𑐸𑐫𑐵𑑅 𑐩𑑂𑐴𑐶𑐟𑐾 𑐩𑐵𑑅𑐐𑐸 𑐰𑐵 𑐨𑐔𑑂𑐔𑐵 𑐀𑐱𑑂𑐮𑐶𑐮 𑐠𑐾𑑄 𑐟𑐵𑐂𑐐𑐸𑐮𑐶𑑄 𑐩𑐶𑐳𑐵𑐟 𑐠𑐸𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂𑐩𑐏𑐸 𑑋

𑐀𑐠𑐾 𑐴𑐾 𑐐𑑂𑐰𑑄𑐐𑑅 𑐎𑐵𑐳𑐵𑐫𑐵𑐟 𑐎𑐎𑑂 𑐦𑐵𑐂𑐚 𑐣𑑄 𑐢𑐵𑐫𑑂𑐐𑐸 𑐫𑐵𑑅 𑑋 𑐐𑑂𑐰𑑄𑐐𑑅𑐟 𑐮𑑂𑐰𑐵𑐂𑐧𑐮𑐫𑑂 𑐐𑐠𑐾 𑐮𑑂𑐰𑐵𑐣𑐵𑑅 𑐴𑐶 𑐴𑐾 𑐰𑑅𑐳𑐵𑑄 𑐟𑑂𑐰𑐟𑐷 𑐩𑐏𑐸 𑑋 𑐀𑐠𑐾 𑐴𑐾 𑐩𑐧𑐹𑐟𑐮𑐾 𑐴𑐾 𑐐𑑂𑐰𑑄𑐐𑑅 𑐮𑑂𑐰𑐵𑐫𑑂 𑐠𑐾𑑄 𑐮𑑂𑐰𑐵𑐂𑐐𑐸 𑐖𑐸𑐐𑐸𑐮𑐶𑑄 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐐𑑂𑐰𑑄𑐐𑑅 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐮𑐵𑐐𑐷 𑐕𑐎𑐹 𑐏𑑂𑐫𑑅 𑐩𑐵𑑅 𑑋 𑐩𑐶𑐖𑑄𑐟 𑐖𑐎 𑐩𑑂𑐴𑐶𑐟𑐷𑐐𑐸 𑐠𑐸𑐐𑐸 𑐎𑐵𑐳𑐵𑐫𑑂 𑐥𑑂𑐬𑐟𑑂𑐫𑐾𑐎 𑐎𑐵𑐳𑐵𑐩𑐶𑐥𑐶𑑄 𑐕𑐔𑐵𑑅 𑐏𑑂𑐫𑐬𑑄 𑐔𑑂𑐰𑐣𑐷 𑑋 𑐕𑐥𑐵 𑐟𑐸𑐟𑐶𑑄 𑐔𑐸𑐫𑐵𑑅 𑐕𑐥𑐵 𑐟𑐸𑐟𑐶 𑐠𑐎𑐫𑐵𑑅 𑐄𑐐𑐸 𑐟𑐸𑐟𑐶𑐫𑐵𑐟 𑐕𑐥𑐵 𑐮𑑂𑐴𑐵𑑅 𑐟𑑄 𑐖𑑂𑐰𑐣𑐷 𑑋 𑐩𑐾𑐐𑐸 𑐕𑐥𑐵 𑐮𑑂𑐴𑐵𑑅𑐟𑑄 𑐩𑐾𑐐𑐸 𑐮𑑂𑐴𑐵𑑅𑐫𑐵 𑐮𑐥𑑂𑐥𑐵𑐫𑑂 𑐖𑑂𑐰𑐣𑐷 𑑋 𑐡𑐎𑑂𑐰𑐳𑐶𑐣𑑄 𑐠𑑅𑐠𑑅𑐐𑐸 𑐠𑐵𑐳𑐫𑑂 𑐔𑑂𑐰𑐣𑐵𑑅 𑐟𑐫𑐵𑐬 𑐖𑐸𑐂𑐰𑑄 𑐎𑐵𑐳𑐵 𑐱𑐸𑐬𑐸 𑐖𑐸𑐂 𑑋 𑐎𑐵𑐳𑐵 𑐱𑐸𑐬𑐸 𑐖𑐸𑐂𑐰𑑄 𑐕𑐩𑑂𑐴𑐾𑐳𑐶𑐣𑑄 𑐩𑐾𑐩𑑂𑐴𑐾𑐳𑐶𑐟𑑅 𑐧𑑂𑐰𑐴𑐮𑑄 𑐑𑑂𑐰𑐵𑐫𑑂𑐐𑐸 𑐫𑐵𑐂 𑑋 𑐮𑐥𑑂𑐥𑐵𑐫𑑂 𑐖𑑂𑐰𑐣𑐵𑑅 𑐟𑑅𑐐𑐸 𑐮𑑂𑐴𑐵𑑅 𑐳𑑄𑐎𑐵𑑅 𑐩𑐾𑐩𑑂𑐴 𑐎𑐵𑐳𑐵𑐩𑐶𑐫𑐵𑐟 𑐐𑑂𑐰𑑄𑐐𑑅 𑐣𑑄 𑐥𑐵𑑄 𑐡𑐵𑐫𑑂 𑐠𑐾𑑄 𑐩𑐾𑐩𑑂𑐴 𑐎𑐵𑐳𑐵𑐩𑐶𑐫𑐵𑐟 𑐡𑐵𑐂 𑑋 𑐠𑐠𑐾 𑐡𑐵𑐫𑑂𑐰𑑄 𑐎𑐵𑐳𑐵𑐩𑐶 𑐐𑑂𑐰𑐟𑐸𑐮𑐾𑐐𑐸 𑐣𑑄 𑐖𑐸𑐂 𑑋 𑐀𑐠𑐾 𑐖𑐹𑐳𑐵𑑄 𑐟𑐸𑐟𑐶 𑐖𑑂𑐰𑐣𑐵𑑅 𑐟𑑅𑐐𑐸 𑐮𑑂𑐴𑐵𑑅 𑐟𑑂𑐰𑑅 𑐩𑐦𑐷𑐟 𑐢𑐵𑑅𑐳𑐵 𑐧𑐹𑐐𑐸 𑐖𑐸𑐂𑐩𑐏𑐸 𑑋 𑐑𑑂𑐰𑐵𑐟𑑂𑐟𑐸 𑐑𑑂𑐰𑐵𑐂𑐧𑐮𑐫𑑂 𑐧𑐮𑑂𑐮𑐵𑑅 𑐩𑑂𑐴𑐾𑐳𑐶𑐣𑑄 𑐧𑑅 𑐩𑐮𑐵𑑅 𑐩𑑂𑐴𑐾𑐳𑐶𑐟 𑐫𑐎𑑂𑐰 𑐳𑐵𑐳𑑂𑐟𑐶 𑐫𑐵𑐫𑑂𑐐𑐸 𑐫𑐵𑐂 𑑋 𑐎𑐵𑐳𑐵𑐫𑐵 𑐀𑐣𑑂𑐟𑐫𑑂 𑐎𑐵𑐳𑐵𑐩𑐶𑑄 𑐩𑐾𑐥𑐶𑑄 𑐎𑐵𑐳𑐵𑐩𑐶𑐫𑐵 𑐮𑑂𑐴𑐵𑑅 𑐟𑑂𑐰𑑅𑐦𑐷𑐎 𑐦𑐸𑐎𑑂𑐎𑐳𑐶𑐟 𑐑𑑂𑐰𑐵𑐫𑑂 𑐦𑐟 𑐢𑐵𑑅𑐳𑐵 𑐄𑐩𑑂𑐴 𑐎𑐵𑐳𑐵𑐩𑐶 𑐟𑑂𑐫𑐵𑑅𑐐𑐸 𑐖𑐸𑐂 𑑋

𑑑.𑑒.𑑒.𑑒 𑐩𑐶𑐳𑐵 𑐎𑐵𑐳𑐵

𑐕𑐾𑐮𑐶𑐧𑐵𑐎𑐸𑑄, 𑐑𑑂𑐰𑐵𑐂𑑃 𑐎𑐵𑐳𑐵, 𑐫𑐎𑑄 𑐢𑐵𑐮𑐵, 𑐳𑐵𑐂𑑃 𑐎𑐵𑐳𑐵, 𑐏𑐶𑐥𑑅 𑐎𑐵𑐳𑐵 𑐁𑐡𑐶𑐫𑐵𑐟 𑐰𑐶𑐱𑐸𑐡𑑂𑐢 𑐩𑐶𑐳𑐵 𑐎𑐵𑐳𑐵 𑐎𑐠𑑄 𑐎𑐵𑐕𑐶𑑄 𑑋 𑐩𑐶𑐳𑐵𑐟 𑐖𑐎 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵𑐫𑐵𑐟 𑐡𑐳𑐸𑐫𑐵 𑐬𑐸𑐥𑐫𑑂 𑐎𑑂𑐰𑐫𑑂 𑐣𑑂𑐴𑑂𑐫𑐧𑑂𑐰𑐫𑐵𑐐𑐸 𑐡𑐸 𑑋

𑑑.𑑒.𑑒.𑑒.𑑑 𑐏𑐶𑐥𑑅𑐎𑐵𑐳𑐵

𑐏𑐶𑐥𑑅 𑐎𑐵𑐳𑐵 𑐫𑐵𑐎𑑅𑐔𑐵𑑄𑐣𑐶𑐳𑐾𑑄 𑐣𑑂𑐫𑐵𑐩𑑂𑐴, 𑐏𑐸𑐩𑑂𑐴 𑐣𑑂𑐫𑐵𑐎𑑂𑐰 𑐣𑑄 𑐩𑑂𑐴𑐶𑐟𑐾𑐖𑑂𑐫𑐹 𑑋 𑐏𑐶𑐥𑑅𑐫𑐵 𑐐𑑂𑐰𑐴𑐵𑐮𑐶 𑐎𑐫𑐵𑑅 𑐏𑐶𑐥𑑅 𑐣𑐶𑐥𑐵 𑐮𑑂𑐴𑐵𑑅 𑐟𑑄 𑐳𑑄𑐎𑐵𑑅 𑐳𑑄𑐎𑐸𑐐𑐸 𑐏𑐶𑐥𑑅 𑐫𑐵 𑐟𑐵𑐮𑐫𑑂 𑐟𑐸𑐟𑐶 𑐮𑑂𑐴𑑂𑐰𑐣𑐵𑑅 𑐡𑐸𑐴𑐵𑑃 𑐰𑐣𑐾𑐐𑐸 𑐫𑐵𑐂 𑑋 𑐏𑐶𑐥𑑅𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐖𑐸𑐐𑐸𑐮𑐶𑑄 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐏𑐶𑐥𑑅 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋 𑐮𑑂𑐴𑐵𑑅 𑐔𑑂𑐰𑑅𑐮𑐶𑐳𑐾 𑐟𑐸𑐟𑐶 𑐮𑑂𑐴𑑂𑐰𑐣𑐾𑐐𑐸 𑐣𑑄 𑐔𑑂𑐰𑐫𑑂𑐎𑐵𑑅 𑐏𑐶𑐥𑑅 𑐡𑐸𑐣𑐾 𑐏𑐶𑐥𑐟𑑄 𑐩𑐠𑐷𑐎 𑐩𑑂𑐴 𑐡𑐸𑐣𑐾 𑐫𑑄𑐎𑐾𑐐𑐸 𑐫𑐵𑐂 𑑋 𑐠𑐸𑐎𑐠𑑄 𑐩𑐡𑑂𑐡𑐶𑐎𑑂𑐎 𑐟𑐵𑑅 𑐃 𑐟𑐎 𑐫𑐵𑐎𑑅 𑐔𑐵 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳𑐫𑐵 𑐮𑐵𑐐 𑐣𑐵𑐥𑑄 𑐣𑑂𑐴𑑂𑐫𑐵𑐂𑐥𑐸𑐎𑐾𑐐𑐸 𑐮𑐵𑐐𑐷 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐣𑐶𑐩𑑂𑐴 𑐖𑐹𑐳𑐵 𑐥𑐵𑐮𑑄𑐥𑐵𑑅 𑐫𑐵𑐂 𑑋 𑐏𑐶𑐥𑑅 𑐩𑑂𑐴𑐶𑐟𑐷 𑐩𑑂𑐴𑐾𑐳𑐶𑐫𑐵 𑐟𑐸𑐟𑐷 𑐏𑐶𑐥𑑅 𑐰𑑅𑐠𑐾 𑐴𑐵𑐔𑐵𑑄 𑐐𑐵𑐫𑐵𑑅 𑐕𑑂𑐰𑐫𑑂 𑐩𑐦𑐫𑑂𑐰𑑄 𑐩𑐾𑐩𑑂𑐴 𑐎𑐵𑐳𑐵𑐩𑐶𑐫𑐵 𑐩𑑂𑐴𑐶𑐟𑐾𑐐𑐸 𑐥𑐵𑑅 𑐖𑐸𑐂 𑑋

𑑑.𑑒.𑑒.𑑒.𑑒 𑐑𑑂𑐰𑐵𑑃𑐂 𑐎𑐵𑐳𑐵

𑐠𑐸𑐐𑐸 𑐎𑐵𑐳𑐵𑐫𑐵𑐟 𑐧𑐵𑐎𑐹 𑐎𑐵𑐳𑐵, 𑐕𑐾𑐮𑐶 𑐧𑐵𑐎𑐸𑑄 𑐎𑐵𑐳𑐵, 𑐑𑑂𑐰𑐵𑐂𑑃 𑐎𑐵𑐳𑐵 𑐣𑑄 𑐢𑐵𑐫𑐐𑐸 𑐫𑐵𑑅 𑑋 𑐰𑐵𑐣𑑂𑐕𑑀𑐫𑐟 𑐕𑑂𑐫𑐮𑐷𑐐𑐸 𑐧𑐵𑐎𑐸𑐔𑐶𑐟 𑐑𑑂𑐰𑐵𑑃𑐃 𑐢𑐵𑐃 𑑋 𑐕𑑃𑐫𑐵 𑐥𑐶𑐣𑐾 𑐥𑐵𑐳𑐵𑐥𑐶𑑄 𑐣𑐵𑐥 𑐩𑐶𑐮𑐾𑐖𑐸𑐫𑐵𑑅 𑐔𑐵𑐐𑐮𑑄 𑐳𑐷 𑐡𑐫𑑂𑐎 𑐎𑑂𑐰𑐠𑐵 𑐎𑑂𑐰𑐠𑐵 𑐔𑑂𑐰𑐫𑑂𑐐𑐸 𑐫𑐵𑐂 𑑋 𑐄𑐐𑐸 𑐎𑑂𑐰𑐠𑐵𑐫𑐵𑐟 𑐕𑐾𑐮𑐶, 𑐣𑐶𑐰𑐵, 𑐳𑑂𑐰𑐰𑐵, 𑐥𑑂𑐫𑐰𑐵 𑐫𑐵𑐣𑐵𑑅 𑐧𑐿𑐐𑑅 𑐟𑐎 𑐔𑑂𑐰𑐫𑑂𑐐𑐸 𑐫𑐵𑐂 𑑋 𑐠𑐸𑐎𑐶𑐫𑐵𑐟 𑐕𑐾𑐮𑐶, 𑐩𑐵𑐟𑑄, 𑐔𑑂𑐰𑐟, 𑐧𑐿𑐐𑑅 𑐢𑐎𑐵𑑅 𑐣𑐵𑑄 𑐟𑐫𑐵𑑅 𑐔𑑂𑐰𑐫𑑂𑐐𑐸 𑐣𑑄 𑐫𑐵𑐂 𑑋 𑐠𑐸𑐎𑐠𑑄 𑐟𑐵𑑅 𑐴𑐵𑐎𑑅 𑐖𑐸𑐂𑐎 𑐥𑑂𑐫𑐎𑐹𑐣𑐶𑐳𑐾𑑄 𑐎𑐫𑐵𑑅 𑐣𑑂𑐫𑐵𑐎𑐹, 𑐏𑐸𑐎𑐹 𑐎𑑂𑐰𑐠𑐵 𑐔𑑂𑐰𑐫𑑂𑐐𑐸 𑐣𑑄 𑐫𑐵𑐂 𑑋 𑐠𑐸𑐎𑐶𑐂 𑐣𑐶𑐩𑑂𑐴 𑐣𑐶𑐩𑑂𑐴 𑐥𑐵 𑐡𑐫𑑂𑐎𑐵𑑅 𑐣𑑄 𑐩𑑂𑐴𑐶𑐟𑐾𑐐𑐸 𑐫𑐵𑐂𑐳𑐵 𑐫𑐵𑐎𑑅 𑐫𑐵𑐎𑑅 𑐣𑑄 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐣𑑂𑐴𑐵𑐥𑐵𑐮𑐵𑐎 𑐳𑐸𑐫𑐵𑐐𑐸 𑐥𑐵𑑅 𑐢𑐎𑐵𑑅 𑐮𑑂𑐫𑐫𑑂𑐐𑐸 𑐮𑐵𑐐𑐶 𑐐𑑂𑐰𑐩𑑂𑐴 𑐎𑐵𑐳𑐵𑐩𑐶 𑐡𑐸𑐐𑐸 𑐏𑑅 𑐄𑐩𑑂𑐴𑐾𑐳𑐶𑐫𑐵 𑐡𑐠𑐸𑐂 𑐮𑑂𑐴𑐵𑑅 𑐳𑑄𑐎𑐵𑑅 𑐠𑑅𑐐𑐸 𑐏𑑅𑐐𑐸 𑐮𑑂𑐴𑐵𑑅𑐫𑐵 𑐡𑑂𑐫𑑅𑐣𑐾 𑐩𑐾𑐐𑐸 𑐮𑑂𑐴𑐵𑑅 𑐥𑐵𑑅𑐮𑐵𑐎 𑐠𑐥𑐸𑐂𑐎𑐾𑐐𑐸 𑐰 𑐎𑑂𑐰𑐥𑐸𑐂𑐎𑐾𑐐𑐸 𑐫𑐵𑐂 𑑋 𑐥𑑂𑐫𑐩𑑂𑐴 𑐡𑐸𑐐𑐸 𑐏𑑅𑐳𑐵 𑐳𑑂𑐰𑐩𑑂𑐴𑐾𑐳𑐶𑐣𑑄 𑐠𑐥𑐸𑐂𑐎𑐮 𑐕𑐩𑑂𑐴𑐾𑐳𑐶𑐣𑑄 𑐎𑑂𑐰𑐥𑐸𑐂𑐎𑐮 𑐢𑐵𑑅𑐳𑐵 𑐎𑑂𑐰𑐥𑐸𑐂𑐎𑐹𑐩𑑂𑐴𑐾𑐳𑐶𑐫𑐵 𑐣𑑂𑐴𑐵𑐥𑐵𑐮𑐵𑐎 𑐥𑐵𑑅 𑐖𑐸𑐂 𑑋 𑐩𑐾𑐥𑐶𑑄 𑐳𑑂𑐰𑐩𑑂𑐴𑐾𑐳𑐶𑐫𑐵 𑐡𑐠𑐸𑐂 𑐣𑑄 𑐄𑐎𑐠𑑄 𑐴𑐾 𑐴𑐵𑐎𑐣𑑄 𑐮𑑂𑐴𑐵𑑅 𑐠𑐥𑐸𑐂𑐎𑐾𑐐𑐸 𑐰 𑐎𑑂𑐰𑐥𑐸𑐂𑐎𑐾𑐐𑐸 𑐫𑐵𑐂 𑑋 𑐠𑐸𑐎𑐠𑑄 𑐣𑑂𑐴𑐵𑐥, 𑐮𑑂𑐫𑐹 𑐰 𑐮𑐶𑐫𑐵𑑄𑐮𑑂𑐫𑐹 𑐮𑑂𑐫𑐫𑑂𑐐𑐸 𑐫𑐵𑐂 𑑋

𑑑.𑑒.𑑒.𑑓 𑐩𑐔𑐵 𑐎𑐵𑐳𑐵

𑐕𑑄 𑐨𑑁 𑐎𑐵𑐳𑐵, 𑐬𑐸𑐩𑐵𑐮 𑐎𑐵𑐳𑐵, 𑐡𑐵𑐒𑑂𑐐𑐡𑐸𑐒𑑂𑐐 𑐎𑐵𑐳𑐵, 𑐳𑑁𑐥𑐵 𑐟𑐶𑐎𑐾 𑐎𑐵𑐳𑐵, 𑐳𑐸𑐮𑐵𑐎𑐵𑐳𑐵, 𑐟𑐾𑐮𑐎𑐵𑐳𑐵, 𑐳𑐶𑑃𑐎𑐵𑐳𑐵, 𑐏𑐵𑑅𑐎𑐵𑐳𑐵 𑐣𑐵𑐐𑑅 𑐥𑐸𑐏𑐹 𑐎𑐵𑐳𑐵 𑐁𑐡𑐶 𑐩𑐔𑐵𑐟 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵𑐟 𑐏𑑅 𑑋 𑐩𑐔𑐵 𑐎𑐵𑐳𑐵𑐟 𑐡𑐳𑐸𑐫𑐵 𑐬𑐸𑐥𑐫𑑂 𑐠𑐣 𑐣𑑂𑐴𑑂𑐫𑐧𑑂𑐰𑐫𑐵𑐐𑐸 𑐡𑐸 𑑋

𑑒.𑑒.𑑓.𑑑 𑐕𑐾𑑃 𑐎𑐵𑐳𑐵

𑐕𑐾𑑃𑐫𑐵 𑐡𑐸𑐣𑐾 𑐨𑐔𑐵 𑐟𑐎𑐹𑐐𑐸 𑐎𑑂𑐰𑐠𑐵𑐫𑑂 𑐕𑐾𑑃 𑐖𑐸𑐫𑐵𑑅 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐖𑐸𑐫𑐵𑑅 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐕𑐾𑑃 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐎𑐵𑐳𑐵𑐫𑑂 𑐩𑐶𑐳𑐵 𑐰 𑐩𑐶𑐖𑑄 𑐣𑐶𑐏𑐮𑑅 𑐣𑑄 𑐩𑑂𑐴𑐶𑐟𑐾𑐖𑑂𑐫𑐹 𑑋 𑐠𑐸𑐎𑐶𑐫𑐵 𑐮𑐵𑐐𑐷 𑐕𑐥𑐸 𑐐𑐵 𑐰𑐵 𑐧𑑀𑐬𑐵 𑐕𑐥𑐵𑑅 𑐩𑐵𑑅 𑑋 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐧𑑀𑐬𑐵 𑐰𑐵 𑐐𑐵 𑐧𑑃𑐫𑑂 𑐮𑐵𑐂 𑑋 𑐄𑐐𑐸 𑐮𑐵𑐫𑐵𑑅𑐟𑑅𑐐𑐸 𑐧𑑀𑐬𑐵 𑐰𑐵 𑐐𑐵𑐫𑑂 𑐕𑐩𑑂𑐴 𑐡𑐸𑐩 𑐖𑐹𑐩𑑂𑐴 𑐩𑐣𑐹 𑐕𑐩𑑂𑐴 𑐠𑐳𑑅 𑐥𑐵𑐫𑐵𑑅 𑐡𑑂𑐫𑐣𑐷 𑑋 𑐧𑑀𑐬𑐵 𑐰𑐵 𑐐𑐵𑐫𑐵𑐟 𑐔𑑂𑐰𑐎𑐵𑐫𑑂 𑐮𑑅𑐠𑑂𑐫𑐵𑐣𑐵𑑅 𑐔𑑂𑐰𑐵𑐩𑐸𑐳𑐾 𑐔𑑂𑐰𑑄𑐎𑐷 𑑋 𑐰𑐫𑐵𑑄 𑐮𑐶𑐥𑐵 𑐕𑑄 𑐖𑐹𑐩𑑂𑐴 𑐩𑐣𑐹 𑐑𑑂𑐰𑑄𑐳𑑂𑐫𑐵𑐂 𑐄𑐩𑑂𑐴 𑐕𑑂𑐫𑐵 𑐕𑑂𑐫𑑄 𑐡𑐸𑐣𑐾 𑐮𑐵𑐂𑐐𑐸𑐮𑐶𑑄 𑐩𑐾𑐥𑐶𑑄 𑐎𑐵𑐳𑐵𑐩𑐶𑐫𑐵𑐟 𑐏𑑄𑐎𑐾 𑐦𑐿𑐩𑐏𑐸 𑑋 𑐮𑑂𑐴𑐵𑑅 𑐫𑐵 𑐔𑐸𑐮𑑂𑐫𑐵 𑐰 𑐟𑐸𑐟𑐶𑐫𑐵 𑐥𑐸𑐮𑐶𑑄 𑐔𑐸𑐫𑐵𑑅 𑐣𑑂𑐴𑐫𑐵 𑐣𑑂𑐴𑑂𑐫𑐵𑑄 𑐰𑐣𑐾𑐐𑐸 𑐫𑐵𑐂 𑑋 𑐕𑑄 𑐖𑐹𑐩𑑂𑐴 𑐔𑐸𑐂𑑃 𑐔𑐸𑐂𑑃 𑐴𑐵𑐮𑐵𑑅 𑐔𑑂𑐰𑐣𑐷𑐳𑐵 𑐩𑐾𑐥𑐶𑑄 𑐎𑐵𑐳𑐵𑐩𑐶𑐟𑐫𑑂𑐳𑑄 𑐕𑑄𑐫𑐵𑐟 𑐴𑐵𑐫𑑂𑐎𑐵𑑅 𑐔𑑂𑐰𑐣𑐷 𑑋 𑐴𑐵𑐫𑑂𑐎𑐵𑑅 𑐔𑑂𑐰𑑄𑐐𑐸 𑐳𑑅𑐫𑐵 𑐁𑐢𑐵𑐬𑑄 𑐕𑑄 𑐠𑐷𑐟 𑐮𑑂𑐴𑑂𑐫𑐫𑐵𑑅 𑐩𑐵𑑅 𑐖𑐸𑐂 𑑋 𑐎𑐵𑐳𑐵𑐩𑐶𑐟 𑐄𑐏𑐾𑑄𑐠𑐸𑐏𑐾𑑄 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐖𑐸𑐫𑐵𑐔𑑂𑐰𑐣𑐷 𑑋 𑐠𑐸𑐎𑐠𑑄 𑐥𑐵𑐮𑑄𑐥𑐵𑑅 𑐟𑐵𑐄𑐟𑐎 𑐠𑐸𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐕𑑄 𑐠𑐷 𑐩𑐦𑐸𑐟𑐮𑐾 𑐄𑐩𑑂𑐴 𑐴𑐾 𑐡𑐸𑐩 𑐖𑐸𑐂𑐳𑐵 𑐠𑐶𑐮𑐎𑐶 𑐩𑐾𑐩𑑂𑐴 𑐎𑐵𑐳𑐵𑐩𑐶𑐫𑐵 𑐥𑐵𑑅 𑐖𑐸𑐂 𑑋

𑑑.𑑒.𑑒.𑑓.𑑒 𑐕𑐸𑑄𑐨𑑁 𑐎𑐵𑐳𑐵

𑐕𑐸𑑄 𑐨𑑁 𑐣𑐶𑐩𑑂𑐴 𑐡𑐸𑐩 𑐖𑐸𑐫𑐵𑑅 𑐨𑑁 𑐣𑑄 𑐕𑐸𑑄𑐫𑐵𑐟 𑐩𑐵𑐮𑐵𑑅 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐖𑐸𑐫𑐵𑑅 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐕𑐸𑑄 𑐨𑑁 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐎𑐵𑐳𑐵 𑐕𑐿𑑄𑐫𑐵 𑐥𑐶𑐣𑐾 𑐫𑐎𑑂𑐰 𑐥𑐵𑐳𑐵𑐥𑐶𑐣𑐶 𑐡𑐠𑐸𑐂 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐠𑐸𑐎𑐷 𑐩𑐸𑐏𑑂𑐫 𑐕𑐸𑑄 𑐰 𑐨𑑁𑐫𑐵 𑐨𑐹𑐩𑐶𑐎𑐵 𑐖𑐸𑐂 𑑋 𑐕𑐸𑑄 𑐖𑐸𑐂𑐩𑑂𑐴 𑐰 𑐨𑑁 𑐖𑐸𑐂𑐩𑑂𑐴 𑐣𑐶𑐩𑑂𑐴 𑐎𑐵𑐳𑐵𑐩𑐶𑐫𑐵 𑐡𑐠𑐸𑐂 𑐮𑑂𑐫𑐂 𑑋 𑐩𑐾𑐥𑐶𑑄 𑐎𑐵𑐳𑐵𑐩𑐶 𑐦𑐸𑐎𑑂𑐎 𑐕𑐐𑐹 𑐠𑐵𑐳𑐫𑑂 𑐔𑐵𑑅 𑐴𑐶𑐂𑐎 𑐑𑐾𑐬𑐵 𑐡𑐫𑑂𑐎𑐵𑑅 𑐕𑑄 𑐰 𑐨𑑁 𑐥𑐶𑐣𑐾 𑐥𑑂𑐫𑐴𑐵𑑃 𑐰𑐣𑐾 𑐩𑐖𑐷𑐎 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐥𑐣𑐵𑑅 𑐧𑐷 𑑋 𑐕𑑄 𑐖𑐹𑐩𑑂𑐴 𑐰 𑐨𑑁 𑐖𑐹𑐩𑑂𑐴 𑐣𑐶𑐩𑑂𑐴 𑐎𑐵𑐳𑐵𑐩𑐶𑐫𑐵𑐟 𑐎𑐵𑐳𑐵𑐩𑐶 𑐩𑐢𑑂𑐫𑐾 𑐕𑐩𑑂𑐴𑐾𑐳𑐶𑐣𑑄 𑐩𑐶𑐏𑐵𑐫𑑂 𑐕𑑄 𑐣𑑄 𑐏𑐣𑐾 𑐩𑐡𑐫𑑂𑐎 𑐎𑐵𑐥𑑅 𑐬𑐸𑐩𑐵𑐮𑑄 𑐔𑐶𑐣𑐵𑑅 𑐕𑐸𑑄𑐫𑐵𑐟 𑐰 𑐨𑑁𑐫𑐵𑐟 𑐕𑐐𑐹 𑐕𑐐𑐹 𑐠𑐵𑐳𑐫𑑂 𑐀𑐮𑐐 𑐫𑐵𑐣𑐵𑑅 𑐟𑑂𑐰𑑅𑐟𑐵 𑐧𑐶𑐂 𑑋 𑐎𑐵𑐳𑐵 𑐱𑐸𑐬𑐸 𑐖𑐸𑐂𑐰 𑐨𑑁 𑐣𑑄 𑐩𑑂𑐫𑐵𑐄 𑐩𑑂𑐫𑐵𑐄 𑐢𑐵𑐂𑐳𑐵 𑐕𑑄 𑐔𑐸𑐂𑑃 𑐔𑐸𑐂𑑃 𑐢𑐎𑐵𑑅 𑐴𑐵𑐮𑐾𑐐𑐸 𑐫𑐵𑐂 𑑋 𑐴𑐵𑑅𑐐𑐸 𑐳𑑅𑐫𑐵 𑐁𑐢𑐵𑐬𑐫𑑂 𑐨𑑁 𑐣𑑄 𑐕𑐸𑐫𑐵𑐟 𑐖𑑂𑐰𑐣𑐾𑐟 𑐮𑑂𑐴𑐵𑑅 𑐧𑑂𑐰𑐫𑑂𑐎𑐵𑑅 𑐩𑐵𑑅 𑐖𑐸𑐂 𑑋 𑐨𑑁𑐫𑐵 𑐣𑑂𑐴𑑂𑐫𑑀𑐣𑐾 𑐮𑐵𑐫𑑂𑐰𑑄 𑐕𑑄 𑐴𑐵𑐮𑐾𑐐𑐸 𑐟𑑂𑐰𑑅𑐟𑐷 𑐕𑐸 𑐨𑑁𑐥𑐵𑐏𑐾𑑄 𑐟𑐵𑐟𑐵𑐥𑐵𑐎 𑐧𑐶𑐳𑑂𑐫𑐸𑑄 𑐰𑐣𑐾𑐐𑐸 𑐫𑐵𑐂 𑑋 𑐕𑑄 𑐰 𑐨𑑁 𑐑𑐾𑐬𑐵𑑄 𑐥𑐶𑐴𑐵𑑄 𑐰𑐣𑐾 𑐟𑑂𑐫𑐣𑐎𑐶 𑐩𑐾𑐥𑐶𑑄 𑐎𑐵𑐳𑐵𑐩𑐶𑐟𑐫𑑂𑐳𑑄 𑐥𑐣𑐾𑐐𑐸 𑐫𑐵𑐂 𑑋 𑐦𑐸𑐎𑑂𑐎 𑐎𑐵𑐳𑐵𑐩𑐶𑐟𑐫𑑂𑐳𑑄 𑐕𑑄𑐫𑐵𑐟 𑐳𑐵𑐠 𑐧𑐶𑐫𑐵𑑅 𑐔𑑂𑐰𑐣𑐷 𑑋 𑐨𑑁 𑐣𑑄 𑐕𑐸𑐫𑐵𑐟 𑐠𑐷𑐟 𑐳𑐣𑐾𑐰𑑄 𑐎𑐵𑐳𑐵𑐩𑐶𑐟𑐫𑑂𑐳𑑄 𑐴𑐵𑑅 𑐴𑐵𑑅 𑐢𑐎𑐵𑑅 𑐮𑐵𑐫𑑂 𑐧𑐸𑐫𑐵𑑅 𑐔𑑂𑐰𑐣𑐷 𑑋 𑐨𑑁 𑐣𑑄 𑐕𑐸𑐫𑐵𑐟 𑐮𑐵𑐫𑑂𑐰𑑄 𑐥𑐣𑐵𑑅 𑐔𑑂𑐰𑑄𑐥𑐶𑑄 𑐎𑐵𑐳𑐵𑐩𑐶𑑄 𑐴𑐵𑑅 𑐫𑐵𑐣𑐵𑑅 𑐮𑐵𑐥𑐵 𑐠𑐵𑐫𑑂𑐐𑐸 𑐫𑐵𑐂 𑑋 𑐨𑑁 𑐣𑑄 𑐕𑑄 𑐖𑑂𑐰𑐣𑐾𑐰𑑄 𑐎𑐵𑐳𑐵 𑐎𑑂𑐰𑐔𑐵𑐐𑐸 𑐖𑐸𑐂 𑑋 𑐴𑐵𑐎𑐣𑑄 𑐂𑐥𑐶𑑄 𑐣𑐶𑐩𑑂𑐴 𑐧𑐵𑐴𑐾𑐎 𑐩𑐾𑐥𑐶𑑄 𑐣𑐶𑐩𑑂𑐴 𑐕𑑄 𑐰 𑐨𑑁 𑐖𑐸𑐫𑐵𑑅 𑐴𑐵𑐎𑐣𑑄 𑐎𑐵𑐳𑐵 𑐣𑑂𑐴𑑂𑐫𑐵𑐎𑐷 𑑋 𑐠𑐸𑐎𑐠𑑄 𑐎𑐵𑐳𑐵 𑐥𑐵𑐮𑑄𑐥𑐵𑑅 𑐫𑐵𑐣𑐵𑑅 𑐟𑐵𑐄𑐟𑐎 𑐩𑑂𑐴𑐶𑐟𑐾𑐐𑐸 𑐫𑐵𑐂𑑋 𑐳𑐵𑐩𑐵𑐣𑑂𑐫𑐟𑐫𑐵 𑐎𑐵𑐳𑐵 𑐢𑐿𑐐𑐸 𑐩𑐔𑐵𑐟 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐩𑐔𑐵𑐟𑐫𑑂 𑐡𑐠𑐸𑐂 𑐩𑐶𑐳𑐵 𑐩𑐶𑐖𑐫𑐵 𑐨𑐾𑐡𑐨𑐵𑐰 𑐩𑐡𑐸𑐐𑐸𑐮𑐶𑑄 𑐩𑐶𑐳𑐵 𑐩𑐶𑐖𑑄 𑐣𑐶𑐠𑑂𑐰𑑅 𑐣𑑄 𑐠𑐸𑐥𑐶𑑄 𑐎𑐵𑐳𑐵𑐟 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋

𑑑.𑑒.𑑒.𑑔 𑐕𑐾𑑃 𑐡𑐸𑐣𑐾 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵

𑐎𑐟𑐵𑑄𑐩𑐴𑑂𑐬𑐶 𑐎𑐵𑐳𑐵, 𑐎𑐵𑐣𑐵𑐎𑐵𑐣𑐵 𑐥𑐶𑐔𑑂𑐕𑐵, 𑐎𑑂𑐰𑐵𑑅 𑐎𑐵𑐳𑐵, 𑐏𑐵𑑅 𑐎𑐵𑐳𑐵, 𑐑𑑅 𑐕𑑂𑐫𑐵𑐫𑑂 𑐎𑐵𑐳𑐵, 𑐔𑐶𑑄 𑐔𑐶𑑄 𑐩𑐸𑐳𑑂𑐫𑐵 𑐰𑐵 𑐔𑐸𑐂𑑃 𑐔𑐸𑑃𑐂 𑐧𑐾𑐮𑐵, 𑐕𑐸𑑄 𑐎𑐵𑐳𑐵, 𑐚𑐶 𑐰 𑐥𑐶 𑐥𑑄𑐏𑐵, 𑐠𑐵𑐖𑑂𑐫𑐵 𑐎𑐵𑐳𑐵, 𑐢𑐸𑑃 𑐎𑐵𑐳𑐵, 𑐣𑑂𑐫𑐵𑐮𑐮 𑐧𑑂𑐫𑐵𑑄 𑐎𑐵𑐳𑐵, 𑐥𑐸𑐮𑐷 𑐡𑐵𑐫𑐵 𑐎𑐵𑐳𑐵, 𑐥𑑂𑐫𑐵𑑅 𑐳𑑂𑐫𑐵𑐮𑐮𑐵 𑐥𑐷 𑐳𑑂𑐫𑐵𑐮𑐮𑐵, 𑐨𑑂𑐰𑐫𑑂 𑐎𑐵𑐳𑐵, 𑐫𑐎𑑄 𑐢𑐵𑐮𑐵𑐎𑐵𑐳𑐵, 𑐮𑐿𑑄𑐔𑐵 𑐎𑐵𑐳𑐵, 𑐮𑑀𑑄 𑐡𑐵𑐫𑐵 𑐏𑑁 𑐡𑐵𑐫𑐵, 𑐳𑐮𑐶𑑄𑐔𑐵 𑐫𑐮𑐵 𑐫𑐮𑐵 𑐎𑐵𑐳𑐵, 𑐳𑐵𑐂𑑃 𑐎𑐵𑐳𑐵, 𑐴𑐵𑐦𑑀 𑐔𑐶𑐣𑐵 𑐎𑐵𑐳𑐵 𑐁𑐡𑐶 𑐕𑐾𑑄 𑐡𑐸𑐣𑐾 𑐩𑑂𑐴𑐶𑐟𑐾 𑐖𑑂𑐫𑐹𑐐𑐸 𑐎𑐵𑐳𑐵𑐟 𑐏𑑅 𑑋 𑐠𑐸𑐐𑐸 𑐎𑐵𑐳𑐵𑐟 𑐱𑐵𑐬𑐷𑐬𑐶𑐎 𑐧𑑂𑐫𑐵𑐫𑐵𑐩𑐫𑐵 𑐁𑐰𑐱𑑂𑐫𑐎𑐟𑐵 𑐩𑐖𑐹𑐐𑐸, 𑐧𑑁𑐡𑑂𑐢𑐶𑐎 𑐰 𑐩𑐵𑐣𑐳𑐶𑐎 𑐧𑐶𑐎𑐵𑐳𑐫𑐵 𑐮𑐵𑐐𑐷 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵𑐟 𑐏𑑅 𑑋 𑐕𑑃𑐫𑐵 𑐡𑐸𑐣𑐾 𑐩𑑂𑐴𑐶𑐟𑐾𑐖𑑂𑐫𑐹𑐐𑐸 𑐎𑐵𑐳𑐵𑐟 𑐦𑐸𑐎𑑂𑐎 𑐕𑐿𑑄𑐫𑐵 𑐥𑐶𑐣𑐾 𑐣𑑄 𑐩𑑂𑐴𑐶𑐟𑐾𑐖𑑂𑐫𑐹 𑑋 𑐧𑐬𑐸 𑐕𑐿𑑄𑐫𑐵 𑐥𑐶𑐣𑐾 𑐖𑐎 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵𑐟 𑐕𑑃𑐫𑐵 𑐡𑐸𑐣𑐾 𑐩𑑂𑐴𑐶𑐟𑐾 𑐩𑐖𑑂𑐫𑐹 𑐰𑐵 𑐖𑑂𑐫𑐵 𑐕𑐶𑐣𑐷 𑐩𑐏𑐸 𑑋 𑐕𑐾𑑃𑐫𑐵 𑐥𑐶𑐣𑐾 𑐣𑑄 𑐡𑐸𑐣𑐾 𑐣𑑄 𑐩𑑂𑐴𑐶𑐟𑐾 𑐖𑑂𑐫𑐹𑐐𑐸 𑐎𑐵𑐳𑐵𑐫𑑂 𑐕𑐾𑑃𑐫𑑂 𑐡𑐸𑐣𑐾 𑐩𑑂𑐴𑐶𑐟𑐾𑐐𑐸 𑐦𑐸𑐎𑑂𑐎 𑐮𑐵𑑅 𑑋 𑐐𑐸𑐮𑐶𑐳𑐶𑐫𑐵𑑄 𑐕𑐾𑑄 𑐟𑑅𑐎𑐹 𑐖𑐸𑐂𑐦𑐸 𑐐𑐸𑐮𑐶𑐳𑐶𑐫𑐵𑑄 𑐔𑐷𑐎𑐸𑐐𑐸 𑐖𑐸𑐂𑐦𑐸 𑑋 𑐫𑐡𑐶 𑐕𑐾𑑄 𑐟𑑅 𑐖𑐸𑐮 𑐢𑐵𑑅𑐳𑐵 𑐎𑐵𑐣𑐵 𑐎𑐵𑐣𑐵 𑐥𑐶𑐔𑑂𑐔𑐵 𑐠𑐾𑑄 𑐖𑐵𑐐𑐸 𑐎𑐵𑐳𑐵𑐟 𑐣𑑄 𑐕𑐾𑑃𑐫𑐵 𑐡𑐸𑐣𑐾 𑐩𑑂𑐴𑐶𑐟𑐾𑐐𑐸 𑐫𑐵𑑅 𑑋 𑐕𑐾𑑃𑐫𑐵 𑐥𑑂𑐬𑐎𑐺𑐟𑐶 𑐳𑑂𑐰𑐫𑐵𑑅 𑐎𑐵𑐳𑐵𑐟 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐐𑐠𑐾𑐎𑐶-

𑑑.𑑒.𑑒.𑑔.𑑑 𑐎𑑂𑐰𑐵: 𑐎𑐵𑐳𑐵

𑐠𑑂𑐰 𑐕𑐐𑐹 𑐎𑐠𑑄 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵 𑐏𑑅 𑑋 𑐱𑐵𑐬𑐷𑐬𑐶𑐎 𑐧𑐮 𑐩𑑂𑐰𑐵𑑅𑐐𑐸 𑐩𑐵𑐣𑐳𑐶𑐎 𑐧𑐸𑐡𑑂𑐢𑐶 𑐕𑑂𑐫𑐮𑐾 𑐩𑐵𑑅𑐐𑐸 𑐎𑐵𑐳𑐵 𑐏𑑅 𑑋 𑐩𑐔𑐵𑑄𑐣𑐶𑐳𑐾𑑄 𑐧𑐸𑐬𑐷𑐟𑐎 𑐣𑑄 𑐎𑑂𑐰𑐠𑐵𑐫𑑂 𑐔𑑂𑐰𑐣𑐵𑑅 𑐩𑑂𑐴𑐶𑐟𑐾𑐖𑑂𑐫𑐹𑐐𑐸 𑐠𑐸𑐐𑐸 𑐎𑐵𑐳𑐵𑐫𑑂 𑐩𑐶𑐳𑐵 𑐩𑐶𑐖𑑄 𑐣𑐶𑐠𑑂𑐰𑑅 𑐣𑑄 𑐩𑑂𑐴𑐶𑐟𑐾𑐖𑑂𑐫𑐹 𑑋 𑐀𑐥𑑂𑐰𑑅 𑐣𑐏𑑅𑐔𑐏𑑅𑐧𑐮𑐫𑑂 𑐠𑑅𑐠𑐶𑐟𑐶𑐥𑐶𑑄 𑐰𑐫𑐵𑑅 𑐐𑑅𑐐𑑅 𑐖𑐸𑐫𑐵𑑅 𑐩𑐔𑐵𑐟 𑐰𑐵𑐮𑑂𑐮 𑐖𑐸𑐫𑐵𑑅 𑐔𑑂𑐰𑐣𑐷𑐐𑐸 𑐂𑐮𑐫𑑂 𑐠𑐸𑐖𑐵𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋

𑐠𑐸𑐐𑐸 𑐎𑐵𑐳𑐵𑐫𑑂 𑐕𑐩𑑂𑐴𑐾𑐳𑐶𑐣𑑄 𑐣𑑂𑐫𑐣𑐾𑐐𑐸 𑐰 𑐩𑐾𑐥𑐶𑑄 𑐦𑐸𑐎𑑂𑐎𑐳𑐶𑐣𑑄 𑐳𑐸𑐣𑐵𑑄 𑐳𑐸𑐣𑐵𑑅 𑐮𑐶𑐳𑑅 𑐧𑐶𑐂𑐦𑐸 𑐰𑑄 𑐮𑐶𑐳𑑅 𑐧𑐶𑐂𑐐𑐸 𑐫𑐵𑐂 𑑋 𑐠𑐠𑐾 𑐳𑐸𑐫𑐵𑐎𑐾 𑐳𑐸𑐫𑐵𑐎𑐾 𑐎𑑂𑐰𑐵𑑅 𑐰𑑅 𑐂𑐩𑐶𑐳𑑄 𑐥𑐵𑐮𑑄𑐥𑐵𑑅 𑐣𑑂𑐫𑐣𑐾𑐐𑐸 𑐫𑐵𑐂𑐳𑐵 𑐎𑑂𑐰𑐵𑑅 𑐩𑐰𑑅𑐥𑐶𑑄 𑐣𑑄 𑐳𑐸𑐩𑑂𑐎 𑐔𑑂𑐰𑐣𑐵𑑅 𑐕𑐸 𑐕𑐸 𑐢𑐵𑐂 𑐣𑑂𑐫𑐣𑐵𑑅 𑐔𑑂𑐰𑐣𑐾𑐐𑐸 𑐫𑐵𑐂 𑑋 𑐎𑑂𑐰𑐵𑑅 𑐣𑑂𑐫𑐣𑐷𑐧𑐮𑐫𑑂 𑐨𑐔𑑂𑐔𑐵 𑐧𑐸𑐡𑑂𑐢𑐶 𑐕𑑂𑐫𑐮𑐾 𑐩𑐵𑑅𑐐𑐸, 𑐀𑐖𑐶𑐰𑐐𑐸 𑐣𑑂𑐫𑐣𑐷𑐐𑐸𑐮𑐶𑑄 𑐦𑐸𑐎𑑂𑐎 𑐕𑐎𑑅 𑐕𑐎𑑅 𑐴𑐬𑑂𑐬 𑐣𑑂𑐴𑐶𑐮𑐾𑐐𑐸 𑐫𑐵𑐂 𑑋 𑐐𑐠𑐾𑐎𑐶 𑐣𑐶𑐩𑑂𑐴 𑐧𑐵𑐐𑑅 𑐔𑐶𑐫𑐵 𑐕𑐐𑑅 𑐟𑐥𑐸𑐮𑐶 𑐕𑐸 ? 𑐩𑐸𑐳𑑂𑐫𑐵 𑑋 𑐥𑐵𑐕𑐶 𑐖𑐹𑐳𑐵 𑐥𑐵𑐕𑐶 𑐖𑐹 𑑋

𑐥𑐵𑐫𑑂𑐕𑐶 𑐩𑐖𑐹𑐳𑐵 𑐩𑐖𑐹 𑐢𑐫𑐵𑑅 𑐠𑐩𑑂𑐴𑑄 𑐴𑐾 𑐮𑐶𑐳𑑅 𑐧𑐶𑐫𑐾𑐐𑐸 𑐫𑐵𑐂 𑐰𑐵 𑐩𑐡𑐸𑐩𑑂𑐴 𑐧𑐸𑐬𑐷𑐫𑐵 𑐳𑐸 𑐥𑑂𑐰𑐵𑑅 𑐥𑑂𑐰𑐵𑑅 𑐣𑐫𑑂𑐫𑑅 𑐕𑐸 ? 𑐨𑐸𑐟𑐹 𑑋 𑐥𑐵𑐕𑐶 𑐢𑐎𑐵𑑅 𑐢𑐵𑐫𑑂𑐐𑐸 𑐫𑐵𑐂 𑑋 𑐠𑐸𑐎𑐠𑑄 𑐠𑑅 𑐎𑐾 𑐠𑐸𑐮𑐶 𑐎𑑂𑐰𑐵𑑅 𑐰𑑅 𑐄𑐮𑐶 𑐣𑑂𑐫𑐣𑐾𑐐𑐸 𑐎𑐣𑐾𑐐𑐸 𑐫𑐵𑐂 𑑋 𑐀𑐥𑑂𑐰𑑅 𑐫𑐵𑐣𑐵𑑅 𑐎𑑅𑐩𑑂𑐴𑑄 𑐠𑑅 𑐳𑐶𑐧𑐾𑑄 𑐠𑐎𑐵𑐮𑐶 𑐰𑐵 𑐩𑐾𑐥𑐶𑐣𑑂𑐳𑑄 𑐢𑐫𑐵𑑅 𑐟𑑅𑐐𑐸 𑐣𑑂𑐫𑐣𑐵𑑅 𑐠𑑅 𑐩𑑂𑐴𑑄 𑐣𑑄 𑐣𑑂𑐫𑐣𑐾𑐐𑐸 𑐫𑐵𑐂 𑑋 𑐐𑐸𑐮𑐶𑑄 𑐐𑐸𑐮𑐶𑑄 𑐨𑐔𑑂𑐔𑐵 𑐧𑐶𑐔𑐵𑑅 𑐫𑐵𑐫𑑂 𑐦𑐸𑐥𑐶𑐣𑑂𑐳𑑄 𑐎𑑂𑐰𑐵𑑅 𑐡𑐫𑑂𑐎𑐵𑑅 𑐣𑑂𑐫𑐣𑐾𑐐𑐸 𑐣𑑄 𑐫𑐵𑑅 𑑋

𑑑.𑑒.𑑒.𑑕 𑐕𑐾𑑃 𑐥𑐶𑐣𑐾 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵

𑐏𑑃 𑐳𑑂𑐫𑐣𑐵, 𑐀𑐥𑑂𑐥𑐵 𑐥𑑃 𑐔𑐶𑐣𑐾 𑐎𑐵𑐳𑐵, 𑐂𑐣𑑂𑐟𑐸𑐧𑐶𑐣𑑂𑐟𑐸 𑐎𑐵𑐳𑐵, 𑐎𑐠𑐶 𑐎𑐵𑐳𑐵, 𑐎𑐧𑐬𑑂𑐡𑐶 𑐎𑐵𑐳𑐵, 𑐎𑐸𑑄 𑐎𑐵𑐳𑐵, 𑐎𑐸𑐟𑐶 𑐎𑐵𑐳𑐵, 𑐎𑐸𑐮𑐶 𑐎𑐵𑐳𑐵, 𑐎𑐸𑐳𑑂𑐫𑐵𑐫𑑂 𑐕𑐸 𑐩𑐸𑐳𑑂𑐫𑐵𑐫𑑂 𑐕𑐸 𑐎𑐵𑐳𑐵, 𑐎𑑂𑐰𑐵𑑅 𑐎𑑂𑐰𑐵𑑅𑐕𑐶 𑐎𑐵𑐳𑐵, 𑐎𑐵𑐳𑐵, 𑐏𑐶𑐥𑑅 𑐎𑐵𑐳𑐵, 𑐏𑐸𑑄 𑐎𑐵𑐳𑐵, 𑐏𑐸𑐟𑑂𑐫𑐵𑑄 𑐎𑐵𑐳𑐵, 𑐏𑑃 𑐎𑐵𑐳𑐵, 𑐏𑑂𑐫𑐵𑑅 𑐐𑑂𑐰𑐵𑐬𑐵 𑐎𑐵𑐳𑐵, 𑐐𑐸𑑃𑐎𑐵𑐳𑐵, 𑐐𑐸𑐔𑑂𑐔𑐵 𑐎𑐵𑐳𑐵, 𑐐𑑁𑐔𑐵 𑐡𑐵𑐫𑐵 𑐎𑐵𑐳𑐵, 𑐐𑑂𑐰𑑄𑐐𑑅 𑐎𑐵𑐳𑐵, 𑐑𑑅 𑐕𑑂𑐫𑐵𑐫𑑂 𑐎𑐵𑐳𑐵, 𑐑𑑅𑐮𑑂𑐰𑑄 𑐎𑐵𑐳𑐵, 𑐑𑑅𑐔𑐵𑑅 𑐎𑐵𑐳𑐵, 𑐑𑑂𑐰𑐵𑑃𑐃 𑐎𑐵𑐳𑐵, 𑐔.𑐮𑐶 𑐎𑐵𑐳𑐵, 𑐔𑐏𑑃 𑐎𑐵𑐳𑐵, 𑐔𑐵𑐎𑑅 𑐮𑐶 𑐥𑐵𑑃𑐥𑐵𑑃, 𑐔𑐶𑑄 𑐎𑐵𑐳𑐵, 𑐔𑑂𑐫𑐵𑐩𑑂𑐥𑐟𑐶 𑐎𑐵𑐳𑐵, 𑐕𑐸𑑄 𑐎𑐵𑐳𑐵, 𑐢𑐸𑑃 𑐨𑑁 𑐎𑐵𑐳𑐵, 𑐖𑐵𑐟𑐶𑑄 𑐎𑐸𑐮𑐸𑐮𑐸 𑐎𑐵𑐳𑐵, 𑐖𑐸𑐖𑐸 𑐎𑐵𑐳𑐵, 𑐗𑐰𑐵𑑅 𑐎𑐵𑐳𑐵, 𑐟𑐔𑐵𑐩𑐵𑐎𑐸 𑐎𑐵𑐳𑐵, 𑐟𑐥𑐸𑐮𑐶 𑐎𑐵𑐳𑐵, 𑐟𑐵. 𑐟𑐶𑑄 𑐐𑑂𑐰𑑅𑐖𑐵 𑐎𑐵𑐳𑐵, 𑐟𑐵𑑅 𑐎𑐵𑐳𑐵, 𑐟𑐵𑑅𑐔𑐵 𑐎𑐵𑐳𑐵, 𑐟𑐵𑐴𑐵 𑐎𑐵𑐳𑐵, 𑐟𑐾𑐮 𑐎𑐵𑐳𑐵, 𑐡𑑀𑐴𑑃 𑐎𑐵𑐳𑐵, 𑐢𑐸𑐎 𑐢𑐸𑐎 𑐎𑐵𑐳𑐵, 𑐢𑑂𑐰𑐵𑐏𑐵 𑐎𑐵𑐳𑐵, 𑐣𑐵𑑄 𑐎𑐵𑐳𑐵 𑐰𑐵 𑐏𑑃 𑐳𑑂𑐫𑐣𑐵 𑐎𑐵𑐳𑐵, 𑐣𑐵𑐐𑐫𑐵 𑐥𑐸𑐏𑐸𑐮𑐷 𑐢𑑂𑐰𑐵𑑃𑐥𑐸𑑄𑐎 𑐎𑐵𑐳𑐵, 𑐥𑐟𑐸𑐥𑐟𑐸 𑐮𑐵 𑐎𑐵𑐳𑐵 𑐰𑐵 𑐥𑐱𑐸𑐮𑐵 𑐎𑐵𑐳𑐵, 𑐥𑐵𑐳𑐵 𑐎𑐵𑐳𑐵, 𑐦𑐳𑐶 𑐎𑐵𑐳𑐵, 𑐧𑐳𑐸𑑃 𑐎𑐵𑐳𑐵, 𑐧𑐵𑐎𑐸𑑄 𑐎𑐵𑐳𑐵, 𑐧𑐷𑐬 𑐎𑐵𑐳𑐵, 𑐨𑐎𑐸𑑄𑐐𑑂𑐰𑐵𑐬𑐵 𑐎𑐵𑐳𑐵, 𑐨𑐸𑐟𑐶𑐩𑐵𑐮𑐶 𑐎𑐵𑐳𑐵, 𑐨𑑁 𑐎𑐵𑐳𑐵, 𑐩𑐣𑑂𑐡𑐮𑐶 𑐎𑐵𑐳𑐵, 𑐩𑐵𑐎𑑅 𑐥𑐸𑐮𑐵 𑐎𑐵𑐳𑐵, 𑐩𑐵𑐫𑑂 𑐡𑐵𑐫𑐵 𑐎𑐵𑐳𑐵, 𑐫𑐎𑑅 𑐬𑐵 𑐟𑐾𑐮𑐎𑐵𑐳𑐵, 𑐫𑐩𑑂𑐧𑐵 𑐡𑑂𑐫𑑅 𑐎𑐵𑐳𑐵, 𑐬𑐸𑐩𑐵𑐮 𑐎𑐵𑐳𑐵, 𑐮𑐸𑐎𑐸𑑄 𑐎𑐵𑐳𑐵, 𑐳𑐏𑐬𑐷 𑐧𑐏𑐬𑐷 𑐎𑐵𑐳𑐵,𑐳𑐮𑐶𑑄𑐔𑐵 𑐫𑐮𑐵 𑐫𑐮𑐵 𑐎𑐵𑐳𑐵, 𑐳𑐸𑐮𑐵 𑐎𑐵𑐳𑐵, 𑐳𑐶𑑃 𑐎𑐵𑐳𑐵, 𑐳𑐸𑐮𑑂𑐮 𑐥𑑂𑐫𑐵𑐔𑑂𑐔 𑐎𑐵𑐳𑐵, 𑐴𑐵𑑅 𑐥𑐵𑐮𑐸 𑐎𑐵𑐳𑐵, 𑐴𑐸𑐳𑐸𑐮𑐸, 𑐴𑑂𑐰𑐵𑐐𑑂𑐬𑐵 𑐎𑐵𑐳𑐵 𑐁𑐡𑐶 𑐕𑑃𑐫𑐵 𑐥𑐶𑐣𑐾 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐏𑑅 𑑋

𑐀𑐥𑑂𑐰𑑅𑐫𑐵𑐣𑐵𑑅 𑐥𑐶𑐣𑐾 𑐩𑑂𑐴𑐶𑐟𑐾𑐐𑐸 𑐎𑐵𑐳𑐵 𑐱𑐬𑐷𑐬 𑐰 𑐱𑐬𑐷𑐬𑑄 𑐥𑐶𑐎𑐵𑐫𑑂 𑐩𑐵𑑅𑐐𑐸 𑐧𑐮 𑐣𑐵𑐥 𑐳𑑂𑐰𑐵𑐥𑐹 𑐡𑐸 𑑋 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳 𑐰 𑐱𑐵𑐬𑐷𑐬𑐶𑐎 𑐀𑐨𑑂𑐫𑐵𑐳𑐫𑐵 𑐮𑐵𑐐𑐷 𑐠𑐸𑐖𑐵𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐩𑐔𑐵𑐟𑐫𑑂𑐟 𑐣𑑂𑐫𑐵𑐂𑐥𑐸𑐎 𑐩𑐔𑐵𑐫𑐎 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳𑐫𑐵 𑐮𑐵𑐐𑐷 𑐠𑐸𑐖𑐵𑐐𑐸 𑐎𑐵𑐳𑐵𑐥𑐵𑐏𑐾𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑑑.𑑒.𑑒.𑑕.𑑑 𑐀𑐥𑑂𑐥𑐵 𑐥𑑃𑐔𑐶𑐣𑐵: 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵

𑐐𑐸𑐎𑐶𑐫𑐵𑐟 𑐀𑑄𑐐𑑂𑐬𑐾𑐖𑐷 𑐨𑐵𑐲𑑄 𑐐𑐾𑐩 𑐧𑐮 𑐢𑐵𑐫𑑂𑐐𑐸 𑐫𑐵𑐂 𑑋 𑐣𑐾𑐰𑐵𑑅 𑐨𑐵𑐲𑐵𑑄 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐀𑐥𑑂𑐥𑐵 𑐥𑑃 𑐔𑐶𑐣𑐾 𑐎𑐵𑐳𑐵 𑐰𑐵 𑐡𑐾𑐐𑑅 𑐎𑐵𑐳𑐵 𑐣𑑄 𑐢𑐵𑐫𑑂𑐐𑐸 𑐫𑐵𑑅 𑑋 𑐀𑐥𑑂𑐥𑐵𑐫𑐵 𑐡𑑂𑐫𑑀𑐣𑐾 𑐀𑐥𑑂𑐥𑐵 𑐟𑐫𑐵𑑅 𑐩𑑂𑐴𑐶𑐟𑐾𑐐𑐸 𑐰𑐵 𑐡𑐾𑐐𑑅 𑐠𑐾𑑄 𑐔𑑂𑐰𑐵𑐩𑐸𑐳𑐾 𑐔𑑂𑐰𑑄𑐎 𑐡𑐾𑐐𑑅 𑐡𑐫𑑂𑐎𑐾 𑐠𑐾𑑄 𑐫𑐵𑐣𑐵𑑅 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐖𑐸𑐐𑐸𑐮𑐶𑑄 𑐡𑐾𑐐𑑅 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐎𑐵𑐳𑐵𑐫𑐵 𑐮𑐵𑐐𑐶 𑐣𑐶𑐠𑑂𑐰𑑅 𑐩𑐣𑐹𑐟 𑐩𑐵𑑅 𑑋 𑐣𑐶𑐐𑐹 𑐠𑑂𑐰𑐮𑐫𑑂 𑐣𑑄 𑐧𑐬𑐵𑐰𑐬 𑐩𑐣𑐹𑐟 𑐔𑑂𑐰𑐣𑐾𑐐𑐸 𑐫𑐵𑐂 𑑋 𑐔𑑂𑐫𑐵𑐩𑑂𑐴, 𑐗𑐶𑐩𑑂𑐴 𑐰𑐵 𑐠𑑂𑐰𑐳𑐶𑐧𑐾𑑄 𑐀𑐥𑑂𑐰𑑅 𑐩𑐣𑐹 𑐔𑑂𑐰𑐣𑐵𑑅 𑐩𑑂𑐴𑐶𑐟𑐾 𑐖𑑂𑐫𑐹𑐐𑐸 𑐠𑐸𑐐𑐸 𑐎𑐵𑐳𑐵𑐫𑐵 𑐮𑐵𑐐𑐶 𑐧𑐮 𑐕𑐐𑑅 𑐣𑑄 𑐁𑐰𑐱𑑂𑐫𑐎 𑐖𑐹 𑑋 𑐣𑐶𑐐𑐹 𑐠𑑂𑐰𑑅 𑐩𑐢𑑂𑐫𑐾 𑐕𑐐𑐹 𑐠𑑂𑐰𑑅 𑐧𑐮 𑐎𑐫𑑂𑐎𑐷𑐥𑐶𑑄 𑐰 𑐩𑐾𑐐𑐸 𑐠𑑂𑐰𑑅 𑐀𑐥𑑂𑐥𑐵 𑐰𑐵 𑐔𑐵𑐐𑑅 𑐩𑐶𑐮𑐾 𑐫𑐵𑐂𑐥𑐶𑑄 𑐖𑐸𑐂 𑑋

𑐕𑐾𑑃𑐫𑐵 𑐥𑐶𑐣𑐾 𑐕𑐐𑐹 𑐏𑐸𑐮𑑂𑐮𑐵 𑐏𑑂𑐫𑐮𑐫𑑂 𑐩𑑂𑐴𑐶𑐟𑐷𑐐𑐸 𑐠𑐸𑐐𑐸 𑐎𑐵𑐳𑐵𑐫𑐵 𑐮𑐵𑐐𑐷 𑐣𑐶𑐱𑑂𑐔𑐶𑐟 𑐮𑐵𑐐𑐵 𑐎𑑂𑐰𑑅𑐕𑐶𑐣𑐵𑑅 𑐟𑑅𑐐𑐸 𑐡𑐿 𑑋 𑐄𑐐𑐸 𑐮𑐵𑐐𑐵𑐫𑐵𑐥𑐶𑐣𑐾 𑐎𑐵𑐳𑐵𑐩𑐶𑐟 𑐰𑐣𑐾 𑐡𑐿𑐩𑐏𑐸 𑑋 𑐣𑐶𑐐𑐹 𑐠𑑂𑐰𑑅 𑐡𑐫𑑂𑐎𑐾 𑐢𑐸𑑄𑐎𑐵𑑅 𑐔𑐵𑐐𑑅 𑐰𑐵 𑐀𑐥𑑂𑐥𑐵 𑐣𑑂𑐴𑐫𑑂𑐐𑑅 𑐰𑐵 𑐔𑑂𑐫𑐵𑐐𑑅 𑐡𑑂𑐫𑑀𑐣𑐾 𑐟𑐫𑐵𑑅 𑐢𑑄𑐎𑐾 𑐢𑐸𑑄𑐎𑐵𑑅 𑐨𑐔𑑂𑐔𑐵 𑐟𑐵𑐥𑐵𑐎 𑐥𑐵𑐮𑑄𑐥𑐵𑑅 𑐎𑐵𑐳𑐵𑐩𑐶𑐥𑐶𑐣𑑂𑐳𑑄 𑐢𑑄𑐎𑐵𑑅 𑐟𑑅𑐐𑐸 𑐀𑐥𑑂𑐥𑐵𑐫𑑂 𑐧𑐮𑑄 𑐎𑐫𑑂𑐎𑐾𑐐𑐸 𑐫𑐵𑐂 𑑋 𑐧𑐮𑑄 𑐳𑐸𑐣𑐵𑑄 𑐎𑐫𑑂𑐎𑐾 𑐦𑐟 𑐂𑐩𑐶𑐳𑑄 𑐴𑐾 𑐴𑐵𑐎𑐣𑑄 𑐄𑐐𑐸 𑐀𑐥𑑂𑐥𑐵 𑐢𑑄𑐎𑐾𑐐𑐸 𑐫𑐵𑐂𑐳𑐵 𑐀𑐥𑑂𑐥𑐵𑑄 𑐎𑐫𑑂𑐎𑐾 𑐩𑐦𑐸𑐐𑐸 𑐥𑐸𑐔𑐮𑑄 𑐧𑐮𑑄 𑐩𑐾𑐐𑐸 𑐠𑑂𑐰𑑅𑐫𑐵𑐟 𑐎𑐫𑑂𑐎𑐾𑐐𑐸 𑐫𑐵𑐂𑐳𑐵 𑐩𑐾𑐐𑐸 𑐠𑑂𑐰𑑅 𑐧𑐮𑑄 𑐎𑐫𑑂𑐎𑐷𑐐𑐸 𑐥𑐵𑐏𑐾𑑄 𑐟𑐵𑐥𑐵𑐎 𑐰𑐶𑐳𑑂𑐫𑐸𑑄 𑐰𑐣𑐾𑐐𑐸 𑐫𑐵𑐂 𑑋 𑐦𑑅𑐳𑐵 𑐎𑐫𑑂𑐎𑐵𑑅 𑐴𑑅𑐐𑐸 𑐧𑐮𑐫𑐵𑐟 𑐖𑑂𑐰𑐣𑐵𑑅 𑐩𑐣𑐹 𑐩𑐡𑐹𑐐𑐸 𑐠𑐵𑐳𑐫𑑂 𑐡𑐵𑐫𑐵𑑅 𑐕𑑂𑐰𑐫𑐾𑐐𑐸 𑐫𑐵𑐂, 𑐰𑐵 𑐠𑑅 𑐥𑐸𑐔𑑅 𑐫𑐵 𑐥𑐵𑐳𑐵𑐫𑐵𑐟 𑐧𑐮 𑐥𑐵𑐳 𑐧𑐷𑐐𑐸 𑐫𑐵𑐂 𑑋 𑐡𑐵𑐫𑑂 𑐢𑐸𑑄𑐎𑐵𑑅 𑐀𑐥𑑂𑐥𑐵 𑐡𑐸𑐐𑐸 𑐠𑐵𑐳𑐫𑑂 𑐐𑑂𑐰𑑅𑐟𑐸𑐐𑐸 𑐀𑐥𑑂𑐥𑐵𑐫𑐵𑐟 𑐡𑑂𑐫𑐟𑐣𑐵𑑅 𑐩𑐶𑐮𑐾𑐫𑐵𑐂𑐐𑐸 𑐫𑐵𑐂 𑑋 𑐧𑐮𑐫𑐵𑐟 𑐠𑑅𑐐𑐸 𑐥𑐸𑐔𑐮𑐫𑑂 𑐔𑐵𑑅 𑐔𑐵𑑅 𑐴𑐷𑐎𑐾𑐐𑐸 𑐫𑐵𑐂 𑑋 𑐥𑐵𑐳 𑐰𑐶𑐫𑐵𑑅 𑐠𑑅𑐐𑐸 𑐣𑑂𑐴𑑂𑐫𑑀𑐣𑐾 𑐔𑑂𑐰𑑄𑐥𑐶𑐣𑑂𑐟 𑐧𑐮𑑄 𑐎𑐫𑑂𑐎𑐾𑐐𑐸 𑐎𑐸𑐟𑑅 𑐫𑐵𑐣𑐵𑑅 𑐔𑑂𑐰𑐣𑐷𑐳𑐵, 𑐀𑐥𑑂𑐥𑐵 𑐩𑐶𑐮𑐾 𑐫𑐵𑐂𑐥𑐶𑐣𑐶𑐐𑐸 𑐥𑐸𑐔𑐮𑑄 𑐧𑐮𑑄 𑐎𑐫𑑂𑐎𑐾𑐐𑐸𑐥𑐵𑐏𑐾𑑄 𑐧𑐔𑐾 𑐖𑐸𑐫𑐵𑑅 𑐔𑑂𑐰𑐣𑐷 𑑋 𑐫𑐡𑐶 𑐧𑐮𑑄 𑐎𑐫𑐹𑐎𑐾 𑐦𑐟 𑐢𑐵𑑅𑐳𑐵 𑐄𑐩𑑂𑐴 𑐎𑐵𑐳𑐵𑐩𑐶 𑐎𑐵𑐳𑐵𑐥𑐵𑐏𑐾𑑄 𑐮𑐶𑐴𑐵𑑄 𑐰𑐣𑐷 𑑋 𑐎𑐫𑑂𑐎𑐷𑐐𑐸 𑐥𑐸𑐔𑐮𑑄 𑐕𑐩𑑂𑐴 𑐕𑐩𑑂𑐴 𑐫𑐵𑐣𑐵𑑅 𑐎𑐵𑐳𑐵𑐥𑐵𑐏𑐾𑑄 𑐮𑐶𑐎𑐵𑐫𑐾𑐟 𑐳𑑂𑐰𑐫𑐵𑑅 𑐔𑑂𑐰𑐣𑐷𑐳𑐵 𑐀𑐥𑑂𑐥𑐵 𑐩𑐶𑐮𑐾 𑐫𑐵𑐂𑐐𑐸 𑐥𑐸𑐔𑐮𑑄 𑐧𑐮𑐫𑐵𑐟 𑐟𑐵𑐟𑐵𑐥𑐵𑐎 𑐡𑐵𑐫𑐵𑑅 𑐕𑑂𑐰𑐫𑐵𑑅 𑐧𑑂𑐰𑐵𑑃𑐫𑑂 𑐰𑐫𑐵𑑅 𑐀𑐥𑑂𑐥𑐵 𑐩𑐶𑐮𑐾 𑐫𑐵𑐫𑑂𑐐𑐸 𑐎𑐸𑐟𑑅 𑐫𑐵𑐣𑐵𑑅 𑐔𑑂𑐰𑐣𑐷 𑑋 𑐦𑐸𑐎𑑂𑐎 𑐎𑐵𑐳𑐵𑐩𑐶𑐫𑐵𑐟 𑐧𑐮𑑄 𑐎𑐫𑑂𑐎𑐾 𑐣𑑂𑐴𑑂𑐫𑑀 𑐫𑐡𑐶 𑐀𑐥𑑂𑐥𑐵 𑐢𑑄𑐎𑐾 𑐦𑐟 𑐢𑐵𑑅𑐳𑐵 𑐄𑐐𑐸 𑐀𑐥𑑂𑐥𑐵 𑐩𑐶𑐮𑐾 𑐫𑐵𑐂𑐥𑐶𑐣𑐶𑐐𑐸 𑐥𑐸𑐔𑑅 𑐟𑑂𑐫𑐵𑑅𑐐𑐸 𑐖𑐸𑐂 𑑋 𑐠𑐸𑐐𑐸 𑐎𑐵𑐳𑐵 𑐩𑐶𑐳𑐵𑐥𑐶𑑄𑐳𑐶𑐧𑐾𑑄 𑐩𑐶𑐖𑑄𑐥𑐶𑑄 𑐖𑐎 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐠𑐸𑐐𑐸 𑐎𑐵𑐳𑐵𑐫𑑂 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐖𑐸𑐫𑐵𑑅 𑐩𑑂𑐴𑐶𑐟𑐾 𑐩𑐵𑑅𑐐𑐸𑐮𑐶𑑄 𑐱𑐵𑐬𑐷𑐬𑐶𑐎 𑐟𑐣𑑂𑐡𑐹𑐬𑐸𑐳𑑂𑐟𑐶𑐫𑐵 𑐁𑐰𑐱𑑂𑐫𑐎 𑐖𑐹 𑑋

𑑑.𑑒.𑑒.𑑖 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳𑐫𑐵 𑐣𑐶𑐟𑐶𑑄 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵

𑐢𑑂𑐰𑐵𑐏𑐵 𑐎𑐵𑐳𑐵, 𑐨𑑁 𑐎𑐵𑐳𑐵, 𑐔𑐵𑐎𑑅 𑐮𑐶 𑐥𑐵𑑃𑐥𑐵𑑃 𑐎𑐵𑐳𑐵, 𑐟𑐵𑐴𑐵 𑐰𑐵 𑐂𑐩𑐵 𑐎𑐵𑐳𑐵, 𑐟𑐾𑐮 𑐎𑐵𑐳𑐵, 𑐎𑐠𑐶 𑐎𑐵𑐳𑐵, 𑐳𑐸𑐮𑐵𑐎𑐵𑐳𑐵, 𑐖𑐵𑐟𑐶𑑄 𑐎𑐸𑐮𑐸𑐮𑐸 𑐎𑐵𑐳𑐵, 𑐏𑐶𑐥𑑅 𑐎𑐵𑐳𑐵, 𑐑𑑅𑐔𑐵𑑅 𑐎𑐵𑐳𑐵, 𑐧𑐏𑐸𑑄 𑐎𑐵𑐳𑐵, 𑐎𑐰𑐬𑑂𑐡𑐶 𑐎𑐵𑐳𑐵, 𑐳𑐸𑐮𑐵 𑐎𑐵𑐳𑐵, 𑐕𑐸 𑐨𑑁 𑐎𑐵𑐳𑐵, 𑐏𑐸𑑄 𑐎𑐵𑐳𑐵, 𑐣𑐵𑐐𑐫𑐵 𑐥𑐸𑐏𑐸𑐮𑐷 𑐢𑑂𑐰𑐵𑑃𑐥𑐸𑑄𑐎 𑐎𑐵𑐳𑐵, 𑐮𑐸𑐎𑐸𑑄 𑐎𑐵𑐳𑐵, 𑐟𑐾𑐮 𑐎𑐵𑐳𑐵, 𑐴𑐸𑐳𑐸𑐮𑐸𑑄 𑐎𑐵𑐳𑐵, 𑐏𑑂𑐫𑐵𑑅 𑐐𑑂𑐰𑐵𑐬𑐵 𑐎𑐵𑐳𑐵, 𑐕𑐸 𑐎𑐵𑐳𑐵, 𑐨𑐎𑐸𑑄𑐐𑑂𑐰𑐵𑐬𑐵 𑐎𑐵𑐳𑐵, 𑐩𑐵𑐎𑑅 𑐥𑐸𑐮𑐵 𑐎𑐵𑐳𑐵, 𑐡𑑀𑐴𑑃 𑐎𑐵𑐳𑐵 𑐁𑐡𑐶 𑐎𑐵𑐳𑐵𑐟 𑐐𑐸𑐐𑐸 𑐎𑐵𑐳𑐵𑐟 𑐕𑑃𑐫𑐵 𑐥𑐶𑐣𑐾 𑐩𑑂𑐴𑐶𑐟𑐾𑐐𑐸 𑐫𑐵𑐂 𑐄𑐐𑐸 𑐎𑐵𑐳𑐵𑐟 𑐀𑐥𑑂𑐰𑑅 𑐢𑐿𑐠𑐾𑑄 𑐰𑑂𑐫𑐵𑐫𑐵𑐩 𑐰𑐵 𑐱𑐬𑐷𑐬 𑐰𑐶𑐎𑐵𑐳 𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸 𑐖𑐸𑐂 𑑋 𑐧𑑂𑐰𑐵𑑃𑐫𑑂 𑐰𑐣𑐵𑑅 𑐩𑑂𑐴𑐶𑐟𑐾𑐐𑐸, 𑐟𑐶𑑄𑐣𑑂𑐴𑐸𑐫𑐵𑑅 𑐩𑑂𑐴𑐶𑐟𑐾𑐐𑐸, 𑐳𑐵𑐮𑐵𑑅 𑐩𑑂𑐴𑐶𑐟𑐾𑐐𑐸, 𑐮𑑂𑐰𑐵𑐣𑐵𑑅 𑐩𑑂𑐴𑐶𑐟𑐾𑐐𑐸, 𑐡𑐵𑐫𑐵𑑅 𑐩𑑂𑐴𑐶𑐟𑐾𑐐𑐸, 𑐠𑐠𑐾 𑐩𑑂𑐴𑐶𑐟𑐷𑐧𑐮𑐫𑑂 𑐟𑑂𑐫𑐵𑐣𑐸𑐳𑐾 𑐔𑑂𑐰𑐣𑐷𑐐𑐸, 𑐔𑑅 𑐟𑐶 𑐳𑑂𑐰𑑅𑐳𑑂𑐰𑑅 𑐰𑐂𑐐𑐸 𑐁𑐡𑐶𑐫𑐵 𑐎𑐵𑐬𑐞𑑄 𑐱𑐬𑐷𑐬 𑐰𑐶𑐎𑐵𑐳𑐫𑐵 𑐳𑐣𑑂𑐟𑐸𑐮𑐣𑐫𑐵 𑐮𑐵𑐐𑐷 𑐐𑑂𑐰𑐵𑐴𑐵𑐮𑐶 𑐖𑐸𑐫𑐵𑑅 𑐔𑑂𑐰𑐣𑐷 𑑋 𑐐𑐠𑐾𑐎𑐶 –

𑑑.𑑒.𑑒.𑑖.𑑑 𑐏𑐶𑐥𑑅 𑐎𑐵𑐳𑐵

𑐏𑐶𑐥𑑅 𑐎𑐵𑐳𑐵 𑐫𑐵𑐎𑑅𑐔𑐵𑑄𑐣𑐶𑐳𑐾𑑄 𑐣𑑂𑐫𑐵𑐩𑑂𑐴, 𑐏𑐸𑐩𑑂𑐴 𑐣𑑂𑐴𑑂𑐫𑐵𑐎𑑂𑐰 𑐣𑑄 𑐩𑑂𑐴𑐶𑐟𑐾𑐖𑑂𑐫𑐹 𑑋 𑐏𑐶𑐥𑑅𑐫𑐵 𑐐𑑂𑐰𑐴𑐵𑐮𑐶 𑐎𑐫𑐵𑑅 𑐏𑐶𑐥𑑅 𑐣𑐶𑐥𑐵 𑐮𑑂𑐴𑐵𑑅 𑐟𑑄 𑐳𑑄𑐎𑐵𑑅 𑐳𑑄𑐎𑐸𑐐𑐸 𑐏𑐶𑐥𑑅 𑐫𑐵 𑐟𑐵𑐮𑐫𑑂 𑐟𑐸𑐟𑐶 𑐮𑑂𑐰𑐣𑐵𑑅 𑐡𑐸𑐴𑐵𑑃 𑐰𑐣𑐾𑐐𑐸 𑐫𑐵𑐂 𑑋 𑐏𑐶𑐥𑑅𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐖𑐹𑐐𑐸𑐮𑐶𑑄 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐏𑐶𑐥𑑅 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋 𑐮𑑂𑐴𑐵𑑅 𑐔𑑂𑐰𑑅𑐮𑐶𑐳𑐾 𑐟𑐸𑐟𑐶 𑐮𑑂𑐴𑑂𑐰𑐣𑐾𑐐𑐸 𑐣𑑄 𑐔𑑂𑐰𑐫𑑂𑐎𑐵𑑅 𑐏𑐶𑐥𑑅 𑐡𑐸𑐣𑐾 𑐏𑐶𑐥𑐟𑑄 𑐩𑐠𑐷𑐎 𑐩𑑂𑐴 𑐡𑐸𑐣𑐾 𑐫𑑄𑐎𑐾𑐐𑐸 𑐫𑐵𑐂 𑑋 𑐠𑐸𑐎𑐠𑑄 𑐩𑐡𑑂𑐡𑐶𑐎𑑂𑐎 𑐟𑐵𑐃 𑐟𑐎 𑐫𑐵𑐎𑑅𑐔𑐵 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳 𑐰 𑐣𑑂𑐴𑑂𑐫𑐵𑐂𑐥𑐸𑐎𑐾𑐐𑐸 𑐮𑐵𑐐𑐷 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐣𑐶𑐩𑑂𑐴 𑐖𑐹𑐳𑐵 𑐥𑐵𑐮𑑄𑐥𑐵𑑅 𑐫𑐵𑐂 𑑋 𑐏𑐶𑐥𑑅 𑐩𑑂𑐴𑐶𑐟𑐷𑐩𑑂𑐴𑐾𑐳𑐶𑐫𑐵 𑐟𑐸𑐟𑐶 𑐏𑐶𑐥𑑅 𑐰𑑅𑐠𑐾 𑐴𑐵𑐔𑐵𑑄 𑐐𑐵𑐫𑐵𑑅 𑐕𑑂𑐰𑐫𑑂 𑐩𑐦𑐫𑑂𑐰𑑄 𑐩𑐾𑐩𑑂𑐴 𑐎𑐵𑐳𑐵𑐩𑐶𑐫𑐵 𑐥𑐵𑑅 𑐖𑐸𑐂 𑑋

𑐀𑐠𑐾 𑐴𑐾 𑐳𑑂𑐰𑐩𑑂𑐴 𑐥𑑂𑐫𑐩𑑂𑐴 𑐥𑐵𑐳𑐵𑐥𑐶𑑄 𑐡𑐸𑐳𑐵 𑐣𑐶𑐩𑑂𑐴𑐾𑐳𑐶𑐣𑑄 𑐏𑐶𑐥𑑅𑐫𑐵 𑐔𑑂𑐰𑑅 𑐖𑑂𑐰𑐣𑐵𑑅 𑐕𑐏𑐾𑑄 𑐥𑐵𑑅𑐮𑐵𑐎 𑐔𑐵𑑅𑐴𑐷𑐎𑐵𑑅 𑐳𑑄𑐎𑐾𑐐𑐸 𑐫𑐵𑐂 𑑋 𑐄𑐐𑐸 𑐏𑐶𑐥𑑅 𑐔𑐵𑑅 𑐴𑐶𑐂𑐎𑐸𑐐𑐸 𑐥𑐵𑑅 𑐮𑐵𑐎𑐵𑑅 𑐩𑐾𑐥𑐶𑑄 𑐎𑐵𑐳𑐵𑐩𑐶𑐥𑐶𑑄 𑐏𑐶𑐥𑐟𑐫𑑂 𑐡𑐸𑐣𑐾 𑐐𑐣𑑄 𑐩𑐠𑐷𑐎 𑐟𑐶𑐟𑐶𑑄 𑐣𑑂𑐴𑐸𑐫𑐵𑑅 𑐏𑐶𑐥𑐟𑐫𑑂 𑐡𑐸𑐴𑐵𑑃 𑐰𑐣𑐾𑐐𑐸 𑐫𑐵𑐂 𑑋 𑐏𑐶𑐥𑑄 𑐳𑑄𑐎𑐷𑐥𑐶𑐣𑑂𑐳𑑄 𑐄𑐐𑐸 𑐴𑐾 𑐮𑐳𑐫𑑂 𑐳𑑄𑐎𑐵𑑅 𑐔𑑂𑐰𑐣𑐷 𑑋 𑐏𑐶𑐥𑐟𑑄 𑐟𑐸𑐟𑐶 𑐟𑑅𑐎𑑂𑐫𑐣𑐾𑐰𑑄 𑐩𑐾𑐥𑐶𑑄 𑐥𑐵𑐳𑐵𑐥𑐶𑑄 𑐰𑐵 𑐎𑐵𑐳𑐵𑐩𑐶𑐫𑐵 𑐥𑐵𑑅 𑐖𑐸𑐂 𑑋 𑐠𑐸𑐎𑐠𑑄 𑐏𑐶𑐥𑑅 𑐕𑐥𑐸𑐫𑐵 𑐁𑐢𑐵𑐬𑐫𑑂 𑐏𑑂𑐫𑐮𑐫𑑂 𑐥𑐵𑐳𑐵𑐥𑐶𑐣𑐶 𑐡𑐠𑐸𑐂 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳𑐫𑐵 𑐮𑐵𑐐𑐶 𑐠𑐸𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋

𑑑.𑑒.𑑒.𑑗 𑐩𑐵𑐣𑐳𑐶𑐎 𑐟𑐠𑐵 𑐧𑑁𑐡𑑂𑐢𑐶𑐎 𑐰𑐶𑐎𑐵𑐳𑐫𑐵 𑐣𑐶𑐟𑐶𑑄 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵

𑐕𑐾𑑃𑐫𑐵 𑐡𑐸𑐣𑐾 𑐩𑑂𑐴𑐶𑐟𑐷𑐐𑐸 𑐀𑐥𑑂𑐰𑑅 𑐢𑐿 𑐠𑐾𑑄 𑐎𑐵𑐳𑐵𑐟 𑐩𑐵𑐣𑐳𑐶𑐎 𑐟𑐠𑐵 𑐧𑑁𑐡𑑂𑐢𑐶𑐎 𑐰𑐶𑐎𑐵𑐳 𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸 𑐎𑐵𑐳𑐵 𑐏𑑅 𑑋 𑐎𑐵𑐳𑐵𑐫𑑂 𑐟𑑂𑐫𑐵𑐎𑐾𑐐𑐸 𑐮𑐵𑐐𑐷 𑐐𑐸𑐎𑐠𑑄 𑐖𑑂𑐫𑐵 𑐫𑐵𑐫𑑂 𑐩𑐵𑐮𑐷 𑐢𑐿𑐐𑐸 𑐰𑐶𑐔𑐵𑐬𑐫𑐵 𑐁𑐰𑐱𑑂𑐫𑐎 𑐖𑐸𑐂𑑋 𑐩𑐣𑐫𑐵𑐟 𑐊𑐎 𑐔𑐶𑐟𑑂𑐟 𑐩𑐫𑐵𑐟 𑐢𑐵𑑅𑐳𑐵 𑐟𑑂𑐫𑐵𑐎𑐾 𑐦𑐿𑐩𑐏𑐸 𑐣𑐵𑐥𑑄 𑐎𑐵𑐳𑐵 𑐴𑐾 𑐣𑑂𑐴𑑂𑐫𑐵𑐂𑐥𑐸𑐂 𑐩𑐏𑐸 𑑋 𑐣𑐶𑐩𑑂𑐴𑑄 𑐄𑐮𑐶 𑐴𑐾 𑐔𑐮𑐵𑐏 𑐰 𑐰𑐶𑐔𑐵𑑅 𑐫𑐵𑐫𑑂𑐦𑐸𑐩𑑂𑐴 𑐖𑐸𑐮𑐢𑐵𑑅𑐳𑐵 𑐎𑐵𑐳𑐵 𑐥𑑂𑐬𑐟𑐶𑐳𑑂𑐥𑐬𑑂𑐢𑐵 𑐖𑐸𑐂 𑐐𑐸𑐎𑐶𑑄 𑐁: 𑐕𑐸 𑐖𑐸𑐂 𑐢𑐿𑐐𑐸 𑐖𑐶𑐖𑑂𑐘𑐵𑐳𑐵 𑐧𑑂𑐰𑐮𑐣𑐵 𑐔𑑂𑐰𑐣𑐷 𑑋 𑐐𑐸𑐎𑐶𑑄 𑐩𑐔𑐵𑐫𑑂𑐎 𑐣𑑂𑐴𑑂𑐫𑐵𑐂𑐥𑐸𑐳𑐾 𑐔𑑂𑐰𑐣𑐵𑐔𑑂𑐰𑐣𑐷 𑑋 𑐠𑐸𑐖𑑂𑐰𑑅𑐐𑐸 𑐎𑐵𑐳𑐵𑐟-

𑐢𑐸𑑃 𑐎𑐵𑐳𑐵,
𑐣𑑂𑐫𑐵𑐮𑐮….𑐰𑑂𑐫𑐵𑑄 𑐎𑐵𑐳𑐵,
𑐎𑑂𑐰𑐵𑑅 𑐎𑐵𑐳𑐵,
𑐥𑑂𑐰𑐵𑑅 𑐳𑑂𑐫𑐵𑐮𑑂𑐮𑐮𑐵 𑐥𑐷 𑐳𑑂𑐫𑐵𑐮𑐮𑐵 𑐎𑐵𑐳𑐵, 𑐔𑐾𑐳,
𑐴𑐵𑐦𑑀 𑐔𑐶𑐣𑐵 𑐎𑐵𑐳𑐵,
𑐮𑑁𑑄 𑐡𑐵𑐫𑐵 𑐏𑑁 𑐡𑐵𑐫𑐵,
𑐚𑐶 𑐰 𑐥𑐶 𑐥𑑄𑐏𑐵,
𑐏𑐸𑑄 𑐎𑐵𑐳𑐵 𑐁𑐡𑐶 𑑋 𑐐𑐠𑐾𑐎𑐶-

𑑑.𑑒.𑑒.𑑗.𑑑 𑐢𑐸𑑃 𑐎𑐵𑐳𑐵

𑐕𑑃𑐫𑐵 𑐡𑐸𑐣𑐾 𑐰𑐵 𑐥𑐶𑐣𑐾 𑐨𑑂𑐰𑐟𑐫𑑂 𑐰𑐵 𑐧𑑃𑐫𑑂 𑐎𑑂𑐰𑐠𑐵 𑐡𑐫𑑂𑐎𑐵𑑅 𑐣𑐶𑐩𑑂𑐴 𑐎𑐵𑐳𑐵𑐩𑐶𑐫𑐵 𑐡𑐠𑐸𑐂 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐏𑑅 𑑋 𑐠𑐸𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐮𑐵𑐐𑐷 𑐣𑐶𑐩𑑂𑐴 𑐎𑐵𑐳𑐵𑐩𑐶 𑐡𑐫𑑂𑐰𑑄 𑐐𑐵𑑅 𑑋 𑐕𑐩𑑂𑐴 𑐢𑐸𑑃𑐫𑐵 𑐥𑐎𑑂𑐲 𑐰 𑐩𑐾𑐩𑑂𑐴 𑐔𑑂𑐰𑐮𑐫𑑂𑐫𑐵 𑐥𑐎𑑂𑐲 𑐖𑐸𑐫𑐵𑑅 𑐔𑑂𑐰𑐮𑐾 𑐣𑑄 𑐢𑐸𑑃𑐫𑐵𑐟 𑐩𑐎𑐸𑐣𑐾𑐟 𑐳𑑂𑐰𑐿𑐳𑐵 𑐢𑐸𑑄 𑐔𑑂𑐰𑐮𑐫𑑂𑐫𑐵𑐟 𑐣𑐫𑐵𑑅 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵 𑐖𑐸𑐐𑐸𑐮𑐶𑑄 𑐠𑐸𑐐𑐸 𑐎𑐵𑐳𑐵𑐫𑐵𑐟 𑐢𑐸𑑃 𑐎𑐵𑐳𑐵 𑐢𑐵𑑅𑐐𑐸 𑐏𑑅 𑑋

𑐀𑐥𑑂𑐰𑑅𑐫𑐵𑐣𑐵𑑅 𑐩𑐶𑐖𑑄𑐟 𑐩𑑂𑐴𑐶𑐟𑐷𑐐𑐸 𑐠𑐸𑐐𑐸 𑐎𑐵𑐳𑐵 𑐧𑑁𑐡𑑂𑐢𑐶𑐎 𑐧𑐶𑐎𑐵𑐳𑐫𑐵 𑐮𑐵𑐐𑐷 𑐩𑑂𑐴𑐶𑐟𑐾𑐐𑐸 𑐫𑐵𑐂𑑋 𑐠𑐸𑐐𑐸 𑐎𑐵𑐳𑐵𑐫𑐵 𑐮𑐵𑐐𑐷 𑐕𑐎𑐹 𑐎𑑂𑐰𑐠𑐵 𑐡𑐫𑑂𑐎𑐷 𑑋 𑐄𑐐𑐸 𑐎𑑂𑐰𑐠𑐵 𑐣𑑂𑐴𑐵𑐥𑐵𑑄 𑐰𑐬𑑂𑐐𑐵𑐎𑐵𑐬 𑐫𑐵𑐂 𑑋 𑐰𑐬𑑂𑐐𑐵𑐎𑐵𑐬 𑐎𑑂𑐰𑐠𑐵𑐫𑑂 𑐎𑐸𑑄 𑐎𑐸𑑄 𑐮𑑂𑐰𑐵𑐎𑐵𑑅 𑐣𑐷𑐖𑑂𑐫𑐵𑐎𑐹 𑐎𑑂𑐰𑐠𑐵 𑐡𑐫𑑂𑐎𑐷 | 𑐄𑐎𑐷 𑐩𑐢𑑂𑐫𑐫𑑂 𑐥𑑂𑐫𑐐𑐹 𑐎𑐸𑐣𑐫𑑂 𑐥𑑂𑐫𑐩𑑂𑐴 𑐢𑐸𑑃 𑐔𑑂𑐰𑐣𑐷 𑑋 𑐩𑐾𑐐𑐸 𑐠𑐵𑐳𑐫𑑂 𑐣𑐷𑐩𑑂𑐴 𑐔𑑂𑐰𑐮𑐫𑑂 𑐔𑑂𑐰𑐣𑐵𑑅 𑐢𑐸𑑃 𑐰𑐣𑐾𑐐𑐸 𑐠𑐵𑐫𑑂 𑐩𑐡𑐫𑑂𑐎𑐵𑑅 𑐧𑐷𑐐𑐸 𑐫𑐵𑐂 𑑋 𑐡𑐎𑐮𑐾 𑐣𑑂𑐴𑐵𑐥𑐵𑑄 𑐥𑑂𑐫𑐩𑑂𑐴 𑐢𑐸𑑄 𑐣𑑂𑐴𑐵𑐥𑐵𑑄 𑐴𑐾 𑐡𑐿 𑑋 𑐔𑑂𑐰𑐮𑐫𑑂 𑐖𑐹𑐩𑑂𑐴𑑄 𑐣𑑂𑐴𑐵𑐥𑐵𑑄 𑐔𑐵𑐐𑑅 𑐰𑐵 𑐔𑑂𑐰𑐮𑐫𑑂𑐫𑐵 𑐬𑐸𑐥𑐫𑑂 𑐕𑐎𑐹 𑐕𑐐𑐹 𑐎𑑂𑐰𑐠𑐵𑐫𑑂 𑐟𑐿 𑑋 𑐢𑐸𑑃𑐫𑐵 𑐥𑐎𑑂𑐲𑐫𑑂𑐫𑐵 𑐎𑐵𑐳𑐵𑐩𑐶𑑄 𑐔𑑂𑐰𑐮𑐫𑑂𑐫𑐵𑐟 𑐣𑐫𑑂𑐟 𑐕𑐎𑐹 𑐎𑑂𑐰𑐠𑐵 𑐴𑐵𑐔 𑐐𑐵𑐫𑐵𑑅 𑐣𑐫𑑂𑐐𑐸 𑐫𑐵𑐫𑑂𑐩𑐵𑑅 𑑋 𑐰𑐴𑐾 𑐎𑐠𑑄 𑐴𑐵𑐔𑐵𑑄 𑐐𑐵𑐫𑐵𑑅 𑐣𑐫𑑂𑐐𑐸 𑐮𑐵𑐐𑐷 𑐔𑐵𑐮 𑐩𑑂𑐴𑐶𑐟𑐷 𑑋 𑐔𑑂𑐰𑐮𑐫𑑂 𑐣𑑄 𑐴𑐵𑐔𑐵𑑄 𑐐𑐵𑐂 𑐠𑐾𑑄 𑐔𑑂𑐰𑑄𑐐𑐸 𑐠𑐵𑐳𑐫𑑂 𑐴𑐵𑐔𑐵𑑄 𑐐𑐵𑐫𑐾 𑐩𑐦𑐫𑐾𑐎 𑐔𑐵𑐐𑑅 𑐟𑐫𑐵𑑅 𑐧𑐶𑐂 𑑋 𑐢𑐸𑑃 𑐰𑐵 𑐔𑑂𑐰𑐮𑐫𑑂 𑐢𑐎𑐵𑑅 𑐔𑐵𑐐𑑅𑐫𑐵𑐟 𑐴𑐾 𑐕𑑂𑐫𑐮𑐾𑐐𑐸 𑐫𑐵𑐂 𑑋 𑐔𑑂𑐰𑐮𑐫𑑂 𑐎𑐵𑑅𑐩𑑂𑐴𑐾𑐳𑐶𑐣𑑄 𑐩𑐣𑐎𑐾𑐐𑐸 𑐮𑐵𑐐𑐷 𑐏𑐵𑐮𑐶 𑐩𑐡𑐫𑑂𑐎 𑐔𑐵𑐐𑑅 𑐟 𑐟𑐫𑐵𑑅𑐫𑑄𑐎𑐷𑐳𑐵 𑐢𑐸𑑃 𑐖𑐹𑐩𑑂𑐴𑐾𑐳𑐶𑐣𑑄 𑐣𑐫𑑂𑐐𑐸 𑐮𑐵𑐐𑐷 𑐏𑐵𑐮𑐶 𑐫𑐵𑐫𑑂 𑐩𑐵𑐫𑑂𑐎 𑐔𑐵𑐮 𑐩𑑂𑐴𑐶𑐟𑐵𑑅 𑐔𑑂𑐰𑐣𑐷 𑑋 𑐠𑐸𑐎𑐠𑑄 𑐩𑑂𑐴𑐶𑐟𑐷𑐧𑐮𑐫𑑂 𑐣𑐷𑐣𑑂𑐫𑐵𑐐𑐹 𑐩𑐢𑑂𑐫𑐾 𑐕𑐐𑐹 𑐖𑐎 𑐎𑑂𑐰𑐠𑐵 𑐏𑐵𑐮𑐶 𑐖𑐸𑐂 𑑋 𑐦𑐸𑐎𑑂𑐎 𑐎𑑂𑐰𑐠𑐵 𑐔𑑂𑐰𑐮𑐾 𑐣𑑄 𑐖𑐵𑐫𑐾𑐎𑐾 𑐢𑐸𑑄𑐎𑐵𑑅 𑐢𑐸𑑃 𑐳𑐣𑐾𑐐𑐸 𑐴𑐾 𑐠𑐵𑐫𑑂 𑐩𑐣𑑂𑐟 𑐢𑐵𑑅𑐳𑐵 𑐔𑑂𑐰𑐮𑐾 𑐟𑑂𑐫𑐵𑑅𑐐𑐸 𑐖𑐸𑐂𑐳𑐵, 𑐢𑐸𑑃 𑐣𑐫𑑂𑐐𑐸 𑐀𑐥𑑂𑐰𑑅 𑐖𑐸𑐮 𑐢𑐵𑑅𑐳𑐵 𑐢𑐸𑑃 𑐟𑑂𑐫𑐵𑑅𑐐𑐸 𑐖𑐸𑐂 𑑋 𑐠𑐸𑐎𑐠𑑄 𑐧𑑁𑐡𑑂𑐢𑐶𑐎 𑐥𑐬𑐶𑐎𑑂𑐲𑐞 𑐫𑐵𑐫𑑂𑐐𑐸 𑐮𑐵𑐐𑐷 𑐠𑐸𑐐𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋

 

𑐢𑐸𑑃 𑐎𑐵𑐳𑐵
𑐣𑑂𑐫𑐵𑐮𑐮….𑐰𑑂𑐫𑐵𑑄 𑐎𑐵𑐳𑐵,
𑐎𑑂𑐰𑐵𑑅 𑐎𑐵𑐳𑐵,
𑐥𑑂𑐰𑐵𑑅 𑐳𑑂𑐫𑐵𑐮𑑂𑐮𑐮𑐵 𑐥𑐷 𑐳𑑂𑐫𑐵𑐮𑐮𑐵 𑐎𑐵𑐳𑐵,
𑐔𑐾𑐳,
𑐴𑐵𑐦𑑀 𑐔𑐶𑐣𑐵 𑐎𑐵𑐳𑐵,
𑐮𑑁𑑄 𑐡𑐵𑐫𑐵 𑐏𑑁 𑐡𑐵𑐫𑐵,
𑐚𑐶 𑐰 𑐥𑐶 𑐥𑑄𑐏𑐵,
𑐏𑐸𑑄 𑐎𑐵𑐳𑐵

𑐱𑐵𑐬𑐷𑐬𑐶𑐎 𑐰𑐶𑐎𑐵𑐳𑐫𑐵 𑐣𑐶𑐟𑐶𑑄 𑐩𑑂𑐴𑐶𑐟𑐷𑐐𑐸 𑐎𑐵𑐳𑐵
𑐢𑑂𑐰𑐵𑐏𑐵 𑐎𑐵𑐳𑐵,
𑐨𑑁 𑐎𑐵𑐳𑐵,
𑐔𑐵𑐎𑑅 𑐮𑐶 𑐥𑐵𑑃𑐥𑐵𑑃 𑐎𑐵𑐳𑐵,
𑐟𑐵𑐴𑐵 𑐰𑐵 𑐂𑐩𑐵 𑐎𑐵𑐳𑐵,
𑐟𑐾𑐮 𑐎𑐵𑐳𑐵,
𑐎𑐠𑐶 𑐎𑐵𑐳𑐵,
𑐳𑐸𑐮𑐵𑐎𑐵𑐳𑐵,
𑐖𑐵𑐟𑐶𑑄 𑐎𑐸𑐮𑐸𑐮𑐸 𑐎𑐵𑐳𑐵,
𑐏𑐶𑐥𑑅 𑐎𑐵𑐳𑐵,
𑐑𑑅𑐔𑐵𑑅 𑐎𑐵𑐳𑐵,
𑐧𑐏𑐸𑑄 𑐎𑐵𑐳𑐵,
𑐎𑐰𑐬𑑂𑐡𑐶 𑐎𑐵𑐳𑐵,
𑐳𑐸𑐮𑐵 𑐎𑐵𑐳𑐵,
𑐕𑐸 𑐨𑑁 𑐎𑐵𑐳𑐵,
𑐏𑐸𑑄 𑐎𑐵𑐳𑐵,
𑐣𑐵𑐐𑐫𑐵 𑐥𑐸𑐏𑐸𑐮𑐷 𑐢𑑂𑐰𑐵𑑃𑐥𑐸𑑄𑐎 𑐎𑐵𑐳𑐵,
𑐮𑐸𑐎𑐸𑑄 𑐎𑐵𑐳𑐵,
𑐟𑐾𑐮 𑐎𑐵𑐳𑐵,
𑐴𑐸𑐳𑐸𑐮𑐸𑑄 𑐎𑐵𑐳𑐵,
𑐏𑑂𑐫𑐵𑑅 𑐐𑑂𑐰𑐵𑐬𑐵 𑐎𑐵𑐳𑐵,
𑐕𑐸 𑐎𑐵𑐳𑐵,
𑐨𑐎𑐸𑑄𑐐𑑂𑐰𑐵𑐬𑐵 𑐎𑐵𑐳𑐵,
𑐩𑐵𑐎𑑅 𑐥𑐸𑐮𑐵 𑐎𑐵𑐳𑐵,
𑐡𑑀𑐴𑑃 𑐎𑐵𑐳𑐵

𑐎𑐵𑐳𑐵 𑐢𑐮:
𑐮𑑂𑐫𑐵: 𑐎𑐵𑐳𑐵 𑐢𑐮: 𑐮𑑂𑐫𑐵: 𑐎𑐵𑐳𑐵 𑐢𑐮:
𑑑 𑐳𑑁𑐥𑐵 𑐟𑐶𑐎𑐾 𑐎𑐵𑐳𑐵, 𑑔𑑙 𑐔𑐶𑑄 𑐎𑐵𑐳𑐵,
𑑒 𑐳𑐵𑐂𑑃 𑐎𑐵𑐳𑐵, 𑑕𑑐 𑐏𑐶𑐥𑑅 𑐎𑐵𑐳𑐵,
𑑓 𑐳𑐮𑐶𑑄𑐔𑐵 𑐫𑐮𑐵 𑐫𑐮𑐵 𑐎𑐵𑐳𑐵, 𑑕𑑑 𑐮𑐿𑑄𑐔𑐵 𑐎𑐵𑐳𑐵,
𑑔 𑐳𑐮 𑐎𑐵𑐳𑐵, 𑑕𑑒 𑐮𑑀𑑄 𑐡𑐵𑐫𑐵 𑐏𑑁 𑐡𑐵𑐫𑐵,
𑑕 𑐳𑐸𑐮𑑂𑐮 𑐥𑑂𑐫𑐵𑐔𑑂𑐔 𑐎𑐵𑐳𑐵, 𑑕𑑓 𑐮𑐸𑐎𑐸𑑄 𑐎𑐵𑐳𑐵,
𑑖 𑐳𑐸𑐮𑐵 𑐎𑐵𑐳𑐵, 𑑕𑑔 𑐫𑐩𑑂𑐧𑐵 𑐡𑑂𑐫𑑅 𑐎𑐵𑐳𑐵,
𑑗 𑐳𑐏𑐬𑐷 𑐧𑐏𑐬𑐷 𑐎𑐵𑐳𑐵, 𑑕𑑕 𑐂𑐣𑑂𑐟𑐸𑐧𑐶𑐣𑑂𑐟𑐸 𑐎𑐵𑐳𑐵,
𑑘 𑐬𑐸𑐩𑐵𑐮 𑐎𑐵𑐳𑐵, 𑑕𑑖 𑐫𑐎𑑄 𑐢𑐵𑐮𑐵𑐎𑐵𑐳𑐵,
𑑙 𑐑𑑂𑐰𑐵𑑃𑐃 𑐎𑐵𑐳𑐵, 𑑕𑑗 𑐫𑐎𑑅 𑐬𑐵 𑐟𑐾𑐮𑐎𑐵𑐳𑐵,
𑑑𑑐 𑐑𑑅𑐔𑐵𑑅 𑐎𑐵𑐳𑐵, 𑑕𑑘 𑐔.𑐮𑐶 𑐎𑐵𑐳𑐵,
𑑑𑑑 𑐑𑑅 𑐕𑑂𑐫𑐵𑐫𑑂 𑐎𑐵𑐳𑐵, 𑑕𑑙 𑐔𑐵𑐎𑑅 𑐮𑐶 𑐥𑐵𑑃𑐥𑐵𑑃,
𑑑𑑒 𑐑𑑅𑐮𑑂𑐰𑑄 𑐎𑐵𑐳𑐵, 𑑖𑑐 𑐔𑑂𑐫𑐵𑐩𑑂𑐥𑐟𑐶 𑐎𑐵𑐳𑐵,
𑑑𑑓 𑐕𑐾𑐮𑐶𑐧𑐵𑐎𑐸𑑄, 𑑖𑑑 𑐔𑐏𑑃 𑐎𑐵𑐳𑐵,
𑑑𑑔 𑐕𑑄 𑐨𑑁 𑐎𑐵𑐳𑐵, 𑑖𑑒 𑐎𑐸𑐳𑑂𑐫𑐵𑐫𑑂 𑐕𑐸 𑐩𑐸𑐳𑑂𑐫𑐵𑐫𑑂 𑐕𑐸 𑐎𑐵𑐳𑐵,
𑑑𑑕 𑐕𑐸𑑄 𑐎𑐵𑐳𑐵, 𑑖𑑓 𑐎𑐸𑑄 𑐎𑐵𑐳𑐵,
𑑑𑑖 𑐧𑐳𑐸𑑃 𑐎𑐵𑐳𑐵, 𑑖𑑔 𑐎𑐧𑐬𑑂𑐡𑐶 𑐎𑐵𑐳𑐵,
𑑑𑑗 𑐧𑐵𑐎𑐸𑑄 𑐎𑐵𑐳𑐵, 𑑖𑑕 𑐎𑐵𑐣𑐵𑐎𑐵𑐣𑐵 𑐥𑐶𑐔𑑂𑐕𑐵,
𑑑𑑘 𑐧𑐷𑐬 𑐎𑐵𑐳𑐵, 𑑖𑑖 𑐎𑑂𑐰𑐵𑑅 𑐎𑐵𑐳𑐵,
𑑑𑑙 𑐧𑐮 𑐰𑐵 𑐨𑐎𑐸𑑄𑐐𑑂𑐰𑐵𑐬𑐵, 𑑖𑑗 𑐎𑑂𑐰𑐵𑑅 𑐎𑑂𑐰𑐵𑑅𑐕𑐶 𑐎𑐵𑐳𑐵,
𑑒𑑐 𑐡𑐾𑐐𑑅 𑐎𑐵𑐳𑐵, 𑑖𑑘 𑐎𑐠𑐶 𑐎𑐵𑐳𑐵,
𑑒𑑑 𑐡𑑀𑐴𑑃 𑐎𑐵𑐳𑐵, 𑑖𑑙 𑐎𑐟𑐵𑑄𑐩𑐴𑑂𑐬𑐶 𑐎𑐵𑐳𑐵,
𑑒𑑒 𑐡𑐵𑐒𑑂𑐐𑐡𑐸𑐒𑑂𑐐 𑐎𑐵𑐳𑐵, 𑑗𑑐 𑐟𑐾𑐮 𑐎𑐵𑐳𑐵,
𑑒𑑓 𑐀𑐥𑑂𑐥𑐵 𑐥𑑃 𑐔𑐶𑐣𑐾 𑐎𑐵𑐳𑐵, 𑑗𑑑 𑐟𑐵. 𑐟𑐶𑑄 𑐐𑑂𑐰𑑅𑐖𑐵 𑐎𑐵𑐳𑐵,
𑑒𑑔 𑐩𑐵𑐫𑑂 𑐡𑐵𑐫𑐵 𑐎𑐵𑐳𑐵, 𑑗𑑒 𑐟𑐵𑑅 𑐎𑐵𑐳𑐵,
𑑒𑑕 𑐩𑐵𑐎𑑅 𑐥𑐸𑐮𑐵 𑐎𑐵𑐳𑐵, 𑑗𑑓 𑐟𑐵𑑅𑐔𑐵 𑐎𑐵𑐳𑐵,
𑑒𑑖 𑐩𑐣𑑂𑐡𑐮𑐶 𑐎𑐵𑐳𑐵, 𑑗𑑔 𑐟𑐵𑐴𑐵 𑐎𑐵𑐳𑐵,
𑑒𑑗 𑐨𑑁 𑐎𑐵𑐳𑐵, 𑑗𑑕 𑐟𑐥𑐸𑐮𑐶 𑐎𑐵𑐳𑐵,
𑑒𑑘 𑐨𑑂𑐰𑐫𑑂 𑐎𑐵𑐳𑐵, 𑑗𑑖 𑐟𑐔𑐵𑐩𑐵𑐎𑐸 𑐎𑐵𑐳𑐵,
𑑒𑑙 𑐨𑐸𑐟𑐶𑐩𑐵𑐮𑐶 𑐎𑐵𑐳𑐵, 𑑗𑑗 𑐟𑐎𑐸𑐩𑐮𑐸 𑐎𑐵𑐳𑐵
𑑓𑑐 𑐗𑐰𑐵𑑅 𑐎𑐵𑐳𑐵, 𑑗𑑘 𑐐𑑁𑐔𑐵 𑐡𑐵𑐫𑐵 𑐎𑐵𑐳𑐵,
𑑓𑑑 𑐨𑐎𑐸𑑄𑐐𑑂𑐰𑐵𑐬𑐵 𑐎𑐵𑐳𑐵, 𑑗𑑙 𑐐𑐸𑑃𑐎𑐵𑐳𑐵,
𑑓𑑒 𑐣𑐵𑑄 𑐎𑐵𑐳𑐵 𑐰𑐵 𑐏𑑃 𑐳𑑂𑐫𑐣𑐵 𑐎𑐵𑐳𑐵, 𑑘𑑐 𑐐𑑂𑐰𑑄𑐐𑑅 𑐎𑐵𑐳𑐵,
𑑓𑑓 𑐣𑐵𑐐𑑅 𑐥𑐸𑐏𑐹 𑐎𑐵𑐳𑐵 𑑘𑑑 𑐐𑐸𑐔𑑂𑐔𑐵 𑐎𑐵𑐳𑐵,
𑑓𑑔 𑐣𑐵𑐐𑐫𑐵 𑐥𑐸𑐏𑐸𑐮𑐷 𑐢𑑂𑐰𑐵𑑃𑐥𑐸𑑄𑐎 𑐎𑐵𑐳𑐵, 𑑘𑑒 𑐏𑐸𑑄 𑐎𑐵𑐳𑐵,
𑑓𑑕 𑐣𑑂𑐫𑐵𑐮𑐮 𑐧𑑂𑐫𑐵𑑄 𑐎𑐵𑐳𑐵, 𑑘𑑓 𑐏𑑃 𑐎𑐵𑐳𑐵,
𑑓𑑖 𑐖𑐵𑐟𑐶𑑄 𑐎𑐸𑐮𑐸𑐮𑐸 𑐎𑐵𑐳𑐵, 𑑘𑑔 𑐏𑐵𑑅𑐎𑐵𑐳𑐵
𑑓𑑗 𑐖𑐸𑐖𑐸 𑐎𑐵𑐳𑐵, 𑑘𑑕 𑐏𑑂𑐫𑐵𑑅 𑐐𑑂𑐰𑐵𑐬𑐵 𑐎𑐵𑐳𑐵,
𑑓𑑘 𑐥𑐵𑐳𑐵 𑐎𑐵𑐳𑐵, 𑑘𑑖 𑐏𑑂𑐫𑐵𑑅𑐐𑑂𑐰𑐵𑐬𑐵,
𑑓𑑙 𑐥𑐵𑐣𑐡𑐱 𑑘𑑗 𑐏𑐸𑐟𑑂𑐫𑐵𑑄 𑐎𑐵𑐳𑐵,
𑑔𑑐 𑐦𑐳𑐶 𑐎𑐵𑐳𑐵, 𑑘𑑘 𑐢𑐸𑑃 𑐨𑑁 𑐎𑐵𑐳𑐵,
𑑔𑑑 𑐥𑐸𑐮𑐷 𑐡𑐵𑐫𑐵 𑐎𑐵𑐳𑐵, 𑑘𑑙 𑐢𑐸𑑃 𑐎𑐵𑐳𑐵,
𑑔𑑒 𑐥𑑂𑐫𑐵𑑅 𑐳𑑂𑐫𑐵𑐮𑐮𑐵 𑐥𑐷 𑐳𑑂𑐫𑐵𑐮𑐮𑐵, 𑑙𑑐 𑐢𑑂𑐰𑐵𑐏𑐵 𑐎𑐵𑐳𑐵,
𑑔𑑓 𑐥𑐟𑐸𑐥𑐟𑐸 𑐮𑐵 𑐎𑐵𑐳𑐵 𑑙𑑑 𑐢𑐸𑐎 𑐢𑐸𑐎 𑐎𑐵𑐳𑐵,
𑑔𑑔 𑐥𑐱𑐸𑐮𑐵 𑐎𑐵𑐳𑐵, 𑑙𑑒 𑐴𑐸𑐳𑐸𑐮𑐸,
𑑔𑑕 𑐳𑐶𑑃 𑐎𑐵𑐳𑐵, 𑑙𑑓 𑐴𑐵𑐦𑑀 𑐔𑐶𑐣𑐵 𑐎𑐵𑐳𑐵
𑑔𑑖 𑐚𑐶 𑐰 𑐥𑐶 𑐥𑑄𑐏𑐵, 𑑙𑑔 𑐴𑐵𑑅 𑐥𑐵𑐮𑐸 𑐎𑐵𑐳𑐵,
𑑔𑑗 𑐔𑐶𑑄 𑐔𑐶𑑄 𑐩𑐸𑐳𑑂𑐫𑐵 𑑙𑑕 𑐴𑑂𑐰𑐵𑐐𑑂𑐬𑐵 𑐎𑐵𑐳𑐵
𑑔𑑘 𑐔𑐸𑐂𑑃 𑐔𑐸𑑃𑐂 𑐧𑐾𑐮𑐵, 𑑙𑑖 𑐠𑐵𑐖𑑂𑐫𑐵 𑐎𑐵𑐳𑐵,