𑐮𑐶𑐥𑐶 𑐐𑐸𑐠𑐶 𑐣𑑂𑐴𑐹𑐢𑐵𑑅

𑐫𑐾𑑃 – 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐗𑐶𑑄𑐣𑑂𑐴𑐫𑑂𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵 𑐐𑐸𑐠𑐶𑐫𑐵 𑐠𑑅𑐐𑐸 𑐴𑐾 𑐖𑑂𑐫𑐵𑐎𑐹 𑐳𑐵𑑅𑐣𑐣𑐶 𑐟𑑂𑐫𑑅𑐬𑐫𑑂 𑐖𑐸𑐮 𑑋 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐧𑑅𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐟𑑅𑐩𑐸𑑃𑐖𑑂𑐫𑐵𑐫𑑂 𑐕𑑂𑐫𑐵𑐖𑑂𑐫𑐾 𑐥𑐰𑐶𑐟𑑂𑐬 𑐎𑐳𑐵𑑄 𑐰𑐵𑐬𑑂𑐲𑐶𑐎 𑐥𑑂𑐬𑐟𑐶𑐰𑐾𑐡𑐣 𑐰 𑐡𑐵𑑄𑐨𑐬𑐶𑑄 𑐄𑐟𑑂𑐟𑐩 𑐳𑐵𑐫𑑂𑐩𑐶𑑄 𑐁𑐬𑑂𑐠𑐶𑐎 𑐮𑑂𑐫𑐵𑑅𑐔𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐣𑑂𑐰𑐎𑐸 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐐𑐸𑐠𑐶𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵𑐗𑑂𑐰𑑅 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐰𑐫𑐵𑑄 𑐮𑐶𑐥𑐵 𑐣𑐶𑐐𑐹𑐐𑐸 𑐳𑐟𑑂𑐬𑐫𑑂 𑐐𑐸𑐠𑐶𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐮𑑂𑐫𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑐮𑐫𑑂 𑐣𑐶𑐬𑐘𑑂𑐖𑐣 𑐟𑐧𑑅𑐫𑐵𑐟 𑐴𑐾 𑐴𑐵𑐎𑐣𑑄 𑐣𑐵𑐫𑑅 𑐮𑑂𑐫𑑅𑐐𑐸 𑐡𑐸𑐳𑐵 𑐀𑐣𑐶𑐮 𑐳𑑂𑐠𑐵𑐥𑐶𑐟, 𑐥𑐰𑐶𑐟𑑂𑐬 𑐎𑐳𑐵𑑅 𑐰 𑐄𑐟𑑂𑐟𑐩 𑐳𑐵𑐫𑑂𑐩𑐶𑐫𑐵𑐟 𑐕𑐳𑐶𑐎𑐠𑑄 𑐣𑑂𑐰𑐎𑐸, 𑐕𑑂𑐫𑐵𑑄𑐖𑑂𑐫𑐾 𑐰 𑐡𑐵𑑄𑐨𑐬𑐶𑑄 𑐮𑑂𑐫𑑅𑐐𑐸 𑐡𑐸 𑑋 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐡𑐸𑐖𑐮𑐫𑑂 𑐬𑐩𑐾𑐱𑐩𑐵𑐣 𑐥𑐶𑐫𑐵, 𑐎𑐩𑐮𑐟𑐵𑐬𑐵 𑐟𑐸𑐮𑐵𑐢𑐬, 𑐰𑐶𑐎𑑂𑐎𑐶 𑐰𑐖𑑂𑐬𑐵𑐔𑐵𑐬𑑂𑐫, 𑐮𑐸𑐩𑐶𑐣 𑐟𑐵𑐩𑑂𑐬𑐵𑐎𑐵𑐬, 𑐖𑐐𑐟 𑐥𑐵𑐟𑑂𑐫𑐵, 𑐰𑐶𑐩𑐮𑐵 𑐩𑐵𑐣𑐣𑑂𑐢𑐬 𑐰 𑐄𑐡𑐾𑐣 𑐣𑑂𑐴𑐹𑐳𑐵𑐫𑑂𑐩𑐶 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋

𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐣𑐵𑐫𑑅 𑐟𑐧𑑅𑐣𑑄 𑐐𑐸𑐠𑐶𑐫𑐵 𑐰𑐶𑐢𑐵𑐣 𑐳𑑄𑐱𑑀𑐢𑐣 𑐫𑐵𑐫𑐾𑐐𑐸 𑐣𑐵𑐥𑑄 𑐰𑐂𑐐𑐸 𑐎𑐵𑐬𑑂𑐫𑐎𑐵𑐮𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐣𑑂𑐴𑐹 𑐎𑐠𑑄𑐫𑐵 𑐖𑑂𑐫𑐵 𑐴𑐫𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋𑐐𑐸𑐠𑐶𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐖𑑂𑐫𑐵𑐫𑐵 𑐣𑐶𑑄𑐟𑐶𑑄 𑐎𑐶𑐬𑐞 𑐱𑐵𑐎𑑂𑐫 𑐳𑑄𑐫𑑀𑐖𑐎 𑐰 𑐐𑐸𑐠𑐶𑐫𑐵 𑐥𑑂𑐬𑐵𑐖𑑂𑐘𑐥𑐶𑑄 𑐥𑑂𑐬𑐖𑑂𑐘𑐵𑐩𑐵𑐣 𑐱𑐵𑐎𑑂𑐫 𑐰 𑐬𑐵𑐖𑐾𑐣𑑂𑐡𑑂𑐬 𑐱𑐵𑐎𑑂𑐫 𑐡𑐸𑐖𑑅 𑐖𑐸𑐫𑐵𑐡𑐷𑐐𑐸 𑐣𑐶𑐬𑑂𑐰𑐵𑐔𑐣 𑐎𑐩𑐶𑐚𑐷 𑐐𑐛𑐣 𑐫𑐵𑑅𑐐𑐸 𑐏𑑅 𑑋