𑐮𑐞𑑂𑐜𑐣𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶

𑐧𑐾𑐮𑐵𑐫𑐟𑐫𑑂 𑐣𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐐𑐹 𑐳𑐸𑐣𑑂𑐡𑐬 𑐮𑐶𑐥𑐶 𑐎𑐠𑑄 𑐣𑐵𑑄𑐖𑐵𑑅𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐫𑐵𑐫𑐾𑐐𑐸 𑐰 𑐠𑐸𑐎𑐶𑐫𑐵 𑐳𑐵𑐩𑐵𑐣𑑂𑐫 𑐖𑑂𑐘𑐵𑐣 𑐧𑐷𑐟 𑐧𑐾𑐮𑐵𑐫𑐟𑐫𑐵 𑐮𑐞𑑂𑐜𑐣𑐫𑑂 𑐣𑐎𑐟𑐶𑐣𑐶 𑐕𑐐𑐹 𑐎𑐵𑐬𑑂‍𑐫𑐱𑐵𑐮𑐵 𑐐𑑀𑐲𑑂𑐛𑐷 𑐖𑐹𑐐𑐸 𑐏𑑅 𑑋 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 (𑐜𑐧𑑂𑐮𑐸𑐊𑐣𑐌) 𑐫𑐸𑐎𑐾 𑐔𑑂𑐫𑐵𑐥𑑂𑐚𑐬𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐐𑐸 𑐎𑐵𑐬𑑂‍𑐫𑐱𑐵𑐮𑐵𑐫𑑂 𑐣𑐾𑐥𑐵𑑅𑐩𑐶 𑐳𑑂𑐰𑐫𑐵𑑄 𑐣𑑄 𑐧𑐾𑐮𑐵𑐫𑐟𑐷𑐟𑐫𑑂𑐳𑑄 𑐀𑐥𑑂𑐰𑑅 𑐬𑐸𑐔𑐷 𑐎𑑂𑐫𑑄𑐐𑐸 𑐏𑑅 𑑋
𑐜𑐧𑑂𑐮𑐸𑐊𑐣𑐌 𑐫𑐸𑐎𑐾𑐫𑐵 𑐎𑐖𑐶 𑐳𑑄𑐫𑐸𑐎𑑂𑐟 𑐱𑑂𑐬𑐾𑐲𑑂𑐛𑑄 𑐣𑐶𑐑𑑁 𑐎𑐎𑑂𑐲𑐵 𑐎𑐫𑐵𑑅 𑐬𑐘𑑂𑐖𑐣𑐵 𑐮𑐶𑐥𑐶 𑐔𑑂𑐰𑐫𑐾𑐐𑐸 𑐰𑐶𑐢𑐶 𑐳𑑂𑐫𑐣𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐳𑐴𑐨𑐵𑐐𑐷𑐟𑐫𑑂𑐳𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐐𑐬𑐶𑐩𑐵 𑐰 𑐂𑐟𑐶𑐴𑐵𑐳 𑐧𑐵𑐬𑐾 𑐳𑐷𑐎𑐾𑐐𑐸 𑐮𑐶𑐳𑐾𑑄 𑐠𑑂𑐰 𑐮𑐶𑐥𑐶𑑄 𑐠𑑅𑐠𑑅𑐐𑐸 𑐣𑐵𑑄 𑐔𑑂𑐰𑐫𑐾 𑐳𑐫𑐾𑐎𑐹𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐎𑐮𑐵𑐟𑑂𑐩𑐎 𑐝𑑄𑐐𑑄 𑐔𑑂𑐰𑐫𑐵𑐟𑑅𑐐𑐸 𑐎𑑂𑐫𑐵𑐮𑐶𑐐𑑂𑐬𑐵𑐦𑐷𑐫𑐵 𑐠𑐷𑐠𑐷 𑐎𑐶𑐥𑐵 𑐣𑑄 𑐎𑑂𑐫𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐄𑐎𑐷 𑐏𑐵𑐳 𑐫𑐵𑐣𑐵𑑅 𑐣𑐾𑐥𑐵𑑅𑐫𑐵 𑐎𑐮𑐵𑐎𑐵𑐬𑐥𑐶𑑄 𑐳𑐩𑐬𑐡𑐶𑐥, 𑐁𑐣𑐣𑑂𑐡 𑐩𑐴𑐬𑑂‍𑐖𑐣 𑐰 𑐰𑐶𑐩𑐮 𑐧𑑀𑐮𑐵𑐏𑐾𑐥𑐶𑑄𑐳𑑄 𑐔𑑂𑐰𑐫𑐵𑐟𑑅𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐎𑑂𑐫𑐵𑐮𑐶𑐐𑑂𑐬𑐵𑐦𑐷𑐫𑐵 𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐳𑐴𑐨𑐵𑐐𑐷𑐥𑐶𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐐𑐬𑐶𑐩𑐵 𑐣𑑂𑐫𑐣𑐾𑐢𑐸𑑄𑐎𑐵𑑅 𑐄𑐐𑐸 𑐴𑐾 𑐮𑐶𑐥𑐶𑑄 𑐠𑑅𑐠𑑅𑐐𑐸 𑐣𑐵𑑄 𑐔𑑂𑐰𑐫𑐾 𑐳𑑅𑐐𑐸𑐮𑐶𑑄 𑐀𑐟𑐶𑐎𑑄 𑐄𑐟𑑂𑐳𑐵𑐴𑐶𑐟 𑐖𑐹𑐐𑐸 𑐏𑑅 𑑋
𑐏𑐸𑐐𑐹𑐐𑐸 𑐣𑐶𑐳𑐾𑑄 𑐤𑐫𑑂𑐐𑐹𑐐𑐸 𑐱𑐟𑐵𑐧𑑂𑐡𑐷𑐥𑐵𑐏𑐾 𑐣𑐾𑐥𑐵𑐮𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐫𑐵 𑐐𑑂𑐬𑐣𑑂𑐠 𑐔𑑂𑐰𑐫𑐾𑐐𑐸 𑐮𑐵𑐐𑐶𑑄 𑐕𑑂𑐫𑐮𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐮𑐶𑐥𑐶𑑄 𑐂𑐟𑐶𑐴𑐵𑐳𑐫𑑂 𑐫𑐎𑑂𑐰 𑐴𑐾 𑐠𑐠𑑂𑐫𑐵𑑅𑐎𑑂𑐰𑐠𑑂𑐫𑐵𑑅𑐫𑐵 𑐳𑐵𑐩𑐣𑐵 𑐫𑐵𑐫𑐾 𑐩𑐵𑑅𑐐𑐸 𑐏𑑅𑐳𑐵𑑄 𑐠𑑁𑑄𑐎𑐤𑐫𑑂 𑐢𑐵𑑅𑐳𑐵 𑐮𑑂𑐫𑐵𑐫𑑂𑐪 𑐥𑐸𑐳𑑂𑐟𑐵𑐫𑐵 𑐡𑐠𑐸𑐂 𑐠𑑂𑐰 𑐮𑐶𑐥𑐶𑐥𑑂𑐬𑐟𑐶 𑐴𑐵𑐣𑑄 𑐖𑐵𑐐𑐬𑐞 𑐧𑑂𑐰𑐮𑐣𑐵 𑐰𑑅𑐐𑐸 𑐡𑐸 𑑋
𑐠𑑂𑐰𑐴𑐾 𑐰𑐂𑐐𑐸 𑐩𑐵𑐬𑑂‍𑐔 𑑓𑑑 𑐟𑐵𑐬𑐶𑐏 𑐎𑐸𑐤𑐸 𑐣𑐾𑐥𑐵𑐮𑐫𑑂 𑐖𑐸𑐂𑐐𑐸 𑐤𑐵𑐥𑐵𑑄𑐐𑐸 ‘𑐰𑐶𑐱𑑂𑐰 𑐣𑐾𑐰𑐵𑑅 𑐡𑐶𑐰𑐳’ 𑐫𑐵 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐧𑐾𑐮𑐵𑐫𑐟𑐫𑑂 𑐠𑑂𑐰 𑐮𑐶𑐥𑐶 𑐳𑑂𑐫𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾𑐟 𑐖𑐹𑐐𑐸 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐫𑐸𑐬𑑀𑐥𑐫𑑂 𑐴𑐾 𑐤𑐵𑐥𑐵𑑄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 ‘𑐩𑐟𑐶𑐣𑐵’ 𑐥𑐶𑐠𑐣𑐵𑐫𑐵 𑐩𑐹 𑐳𑐩𑑂𑐥𑐵𑐡𑐎 𑐱𑐱𑐶 𑐩𑐴𑐵𑐖𑐸 𑐩𑐹𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐏𑑅 𑑋 𑐫𑐎𑑂𑐰𑐳𑑂𑐫𑐵𑑄 𑐬𑐸𑐔𑐷 𑐟𑑅𑐐𑐸 𑐖𑐸𑐫𑐵𑑅 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅
𑐮𑐶𑐥𑐵 𑐴𑐵𑐣𑑄 𑐫𑐵𑐫𑐾𑐐𑐸 𑐧𑐔𑑄 𑐐𑑂𑐰𑐳𑐵𑑅 𑐏𑐮𑐎𑑄 𑐧𑐶𑐄𑐐𑐸 𑐡𑐸 𑑋 𑐮𑐞𑑂𑐜𑐣𑐫𑐵 𑐁𑐬𑑂‍𑐚 𑐥𑐾𑐨𑐾𑐮𑐶𑐫𑑀𑐣𑑂𑐳𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵𑐟 𑐫𑐣𑑂𑐟𑑂𑐬𑐎𑐮𑐵, 𑐁𑐬𑑂‍𑐚 𑐎𑑂𑐫𑐵𑐔𑐬 𑐰 𑐚𑐵𑐰𑐬 𑐴𑑂𑐫𑐵𑐩𑑂𑐮𑐾𑐚 𑐎𑐵𑐄𑐣𑑂𑐳𑐶𑐮 𑐀𑐦 𑐮𑐞𑑂𑐜𑐣 𑐮𑐶𑐄 𑐐𑑂𑐰𑐳𑐵𑑅𑐏𑐮𑑅 𑐖𑐸𑐫𑐵𑑅 𑐟𑐵𑑅𑐮𑐵𑐎𑐹𑐐𑐸 𑐏𑑅 𑑋