𑐫𑐾𑑃 𑐩𑐴𑐵𑐣𑐐𑐬𑑄 ‘𑐳𑑂𑐰𑐣𑐶𑐐𑑅 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫’ 𑐔𑐵𑐫𑐾𑐎𑐷𑐐𑐸

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑑂𑐰𑐣𑐶𑐐𑑅 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐔𑐵𑐫𑐾𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐎𑐵𑐬𑑂𑐫𑐰𑐵𑐴𑐎 𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐁𑐂𑐟𑐰𑐵𑑅 𑐣𑑂𑐴𑑂𑐫𑐧𑑂𑐰𑑅𑐐𑐸 𑐁𑐬𑑂𑐠𑐶𑐎 𑐡𑑃 𑑒𑑐𑑘𑑓/𑑘𑑔 𑐫𑐵 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐳𑑂𑐰𑐣𑐶𑐐𑑅 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐔𑐵𑐫𑐾𑐎𑐾𑐐𑐸 𑐏𑑃 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐥𑐬𑑂𑐫𑐚𑐣 𑐳𑐩𑑂𑐧𑐣𑑂𑐢𑐷 𑐰𑐶𑐱𑐾𑐲𑐖𑑂𑐘 𑐖𑐣𑐱𑐎𑑂𑐟𑐶 𑐄𑐟𑑂𑐥𑐵𑐡𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑑂𑐰𑐣𑐶𑐐𑑅 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐔𑐵𑐫𑐾𑐎𑐾𑐐𑐸 𑐏𑑃 𑐢𑐫𑐵𑐟𑑅𑐐𑐸 𑐡𑐸 𑑋

𑐀𑐠𑐾𑐴𑐾 𑐫𑐾𑑃 𑐩𑐴𑐵𑐣𑐐𑐬𑐫𑐵𑐟 𑐏𑐸𑐮𑐵 𑐰 𑐖𑐷𑐰𑐣𑑂𑐟 𑐳𑑄𑐐𑑂𑐬𑐴𑐵𑐮𑐫 𑐰 𑐬 𑐔𑐣𑐵𑐟𑑂𑐩𑐎 𑐳𑐴𑐬 𑐎𑐠𑑄 𑐰𑐶𑐎𑐵𑐳 𑐫𑐵𑐫𑐾 𑐐𑐸 𑐏𑑃 𑐣𑑄 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐋𑐟𑐶𑐴𑐵𑐳𑐶𑐎 𑐢𑐵𑐬𑑂𑐩𑐶𑐎, 𑐥𑐸𑐬𑐵𑐟𑐵𑐟𑑂𑐰𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎, 𑐳𑐵𑐩𑐵𑐖𑐶𑐎 𑐩𑐴𑐟𑑂𑐰𑐫𑐵 𑐡𑐾𑐐𑑅, 𑐔𑐿𑐟𑑂𑐫, 𑐡𑑂𑐫𑑅𑐕𑐾𑑃, 𑐧𑐴𑐵𑑅𑐧𑐴𑐷, 𑐴𑐶𑐟𑐶, 𑐥𑐸𑐏𑐹, 𑐐𑐸𑐩𑑂𑐧𑐵, 𑐳𑑂𑐟𑐸𑐥𑐵, 𑐔𑐸𑐎, 𑐣𑐣𑐶, 𑐡𑐧𑐹, 𑐦𑐮𑑂𑐔𑐵 𑐮𑐐𑐵𑐫𑐟𑐫𑐵 𑐳𑑄𑐬𑐔𑐣𑐵 𑐰 𑐳𑐩𑑂𑐥𑐡𑐵 𑐳𑑂𑐠𑐮𑐫𑐵 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐜𑐶𑐖𑐶𑐚𑐮 𑐀𑐨𑐶𑐮𑐾𑐏𑐷𑐎𑐬𑐞 𑐫𑐵𑐫𑐾𑐐𑐸, 𑐩𑑁𑐮𑐶𑐎 𑐣𑐵𑐩𑐵𑐎𑐬𑐞, 𑐣𑐎𑑂𑐳𑐵𑑄𑐎𑐣, 𑐖𑐶𑐬𑑂𑐞𑑀𑐡𑑂𑐢𑐬 , 𑐥𑐸𑐣𑐬𑑂𑐣𑐶𑐬𑑂𑐩𑐵𑐞 𑐫𑐵𑐣𑐵𑑅 𑐳𑑄𑐬𑐎𑑂𑐲𑐞 𑐳𑐩𑑂𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾 𑐐𑐸 𑐏𑑃 𑐢𑐫𑐵𑐟𑑅𑐐𑐸 𑐡𑐸 𑑋

𑐣𑐷𑐟𑐶 𑐟𑐠𑐵 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐧𑑂𑐰𑐳𑐾𑑄 𑐫𑐾𑑃 𑐩𑐣𑐥𑐵𑐫𑐵 𑐎𑐵𑐬𑑂𑐫𑐵𑐰𑐵𑐴𑐎 𑐩𑐾𑐫𑐬 𑐜𑑄𑐐𑑀𑐮𑑄 𑐫𑐾𑑃𑐫𑐵, 𑐋𑐟𑐶𑐴𑐵𑐳𑐶𑐎𑐟𑐵, 𑐳𑐵𑑄𑐳𑑂𑐎𑐺𑐟𑐶𑐎 𑐳𑐩𑑂𑐥𑐡𑐵, 𑐨𑑁𑐟𑐶𑐎 𑐰 𑐁𑐢𑐸𑐣𑐶𑐎 𑐱𑐴𑐬𑐷 𑐳𑐨𑑂𑐫𑐟𑐵𑐫𑐵𑐟 𑐩𑐹 𑐁𑐢𑐵𑐬 𑐡𑐫𑐾𑐎𑐵𑑅 𑐰𑐂𑐐𑐸 𑐡𑑃𑐫𑐵 𑐫𑑀𑐖𑐣𑐵 𑐟𑐬𑑂𑐖𑐸𑐩𑐵 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐫𑐾𑑃𑐫𑐵𑐟 𑐳𑐩𑐵𑐰𑐾𑐱𑐷, 𑐳𑐸𑐱𑐵𑐳𑐣𑐫𑐸𑐎𑑂𑐟, 𑐥𑑂𑐬𑐰𑐶𑐢𑐶𑐩𑐿𑐟𑑂𑐬𑐷, 𑐳𑐸𑐬𑐎𑑂𑐲𑐶𑐟, 𑐳𑑂𑐰𑐔𑑂𑐕, 𑐳𑑂𑐰𑐳𑑂𑐠, 𑐴𑐬𑐶𑐟 𑐰 𑐣𑐰𑐥𑑂𑐬𑐰𑐬𑑂𑐟𑐣𑐩𑐸𑐏𑐷 𑐳𑑂𑐩𑐵𑐬𑑂𑐚 𑐳𑐴𑐬𑐫𑐵 𑐬𑐸𑐥𑐫𑑂 𑐬𑐸𑐥𑐵𑐣𑑂𑐟𑐬𑐞 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐡𑐷𑐬𑑂𑐑𑐎𑐵𑐮𑐶𑐣 𑐳𑑀𑐔 𑐡𑐸𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐏𑑅𑑋

𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐫𑐾𑑃𑐫𑐵𑑅𑐧𑐮𑐫𑑂 𑐖𑐵𑐟𑑂𑐬𑐵 𑐫𑐵𑐫𑐾 𑐩𑐵𑑅𑐥𑐶𑑄 𑐖𑐷𑐰𑐶𑐟 𑐡𑑂𑐫𑑅 𑐐𑐞𑐾𑐱 𑐰 𑐨𑐿𑐬𑐰 𑐔𑑂𑐰𑐣𑐾𑐐𑐸 𑐣𑐶𑑄𑐟𑐶𑑄 𑐣𑑄 𑐕𑐾𑑃𑐫𑑂 𑐡𑐫𑐾𑐎𑐾𑐐𑐸 𑐏𑑃 𑐣𑑄 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐬𑐸𑐥𑑄 𑐮𑑀𑐎𑑄𑐴𑑂𑐰𑐵𑑅𑐐𑐸 𑐫𑐾𑑃𑐫𑐵𑑅 𑐖𑐵𑐟𑑂𑐬𑐵𑐧𑐮𑐫𑑂 𑐬𑐠𑐫𑐵𑐟𑑂𑐬𑐵 𑐫𑐵𑐫𑐾𑐩𑐵𑑅𑐥𑐶𑑄 𑐩𑐹 𑐡𑑂𑐫𑑅𑐐𑐞 𑐱𑑂𑐬𑐷 𑐐𑐞𑐾𑐱 𑐰 𑐱𑑂𑐬𑐷 𑐨𑐿𑐬𑐰𑐫𑐵 𑐣𑐶𑐰𑐵𑐳 𑐡𑐫𑐾𑐎𑐾𑐟 𑐁𑐰𑐱𑑂𑐫𑐎 𑐰𑑂𑐫𑐰𑐳𑑂𑐠𑐵 𑐩𑐶𑐮𑐾 𑐫𑐵𑐫𑐾𑐐𑐸 𑐏𑑃 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐏𑑅 𑑋

𑐀𑐠𑐾𑐴𑐾 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑐰𑐵𑐬𑐷 𑐥𑐵𑐬𑑂𑐎𑐶𑐒 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾 𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋 𑐣𑑂𑐴𑐹 𑐳𑐟𑐎 𑐎𑑂𑐲𑐾𑐟𑑂𑐬 𑐰 𑐠𑐸𑐎𑐶𑐫𑐵 𑐖𑑅𑐏𑑅 𑐎𑑂𑐲𑐾𑐟𑑂𑐬𑐫𑐵 𑐥𑐵𑐬𑑂𑐎𑐶𑐒 𑐳𑐩𑐳𑑂𑐫𑐵 𑐖𑑂𑐫𑑄𑐎𑐾 𑐐𑐸 𑐣𑐶𑑄𑐟𑐶𑑄 𑐣𑑂𑐫𑐹𑐬𑑀𑐜 𑐐𑐾𑐚 𑐮𑐶𑐎𑑂𑐎 𑐔𑑂𑐰𑑄𑐐𑐸 𑐣𑐾𑐥𑐵𑐮 𑐰𑐵𑐫𑐸𑐳𑐾𑐰𑐵 𑐣𑐶𑐐𑐩𑐫𑐵 𑐕𑐾𑑃 𑐰 𑐖𑐐𑑂𑐐𑐵𑐫𑑂 𑐧𑐴𑐸𑐟𑐮𑐾 𑐥𑐵𑐬𑑂𑐎𑐶𑐒 𑐨𑐰𑐣 𑐡𑐫𑐾𑐎𑐾𑐟 𑐣𑐾𑐥𑐵𑑅 𑐳𑐬𑐎𑐵𑐬 𑐩𑐵𑐬𑑂𑐦𑐟 𑐥𑐴𑐮 𑐫𑐵𑐫𑐾𑐐𑐸 𑐏𑑃 𑐣𑑄 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐢𑐫𑐵𑐟𑑅𑐐𑐸 𑐡𑐸 𑑋 𑐩𑐴𑐵𑐣𑐐𑐬𑑄 𑐠𑑅𑐐𑐸 𑐧𑐶𑐳𑑂𑐎𑑄 𑐴𑐾 𑐩𑐴𑐵𑐣𑐐𑐬 𑐀𑐳𑑂𑐥𑐟𑐵𑐮 𑐡𑐫𑐾𑐎𑐾𑐐𑐸 𑐏𑑃 𑐣𑑄 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐣𑑂𑐴𑑂𑐫𑐠𑑃𑐐𑐸 𑐡𑐸 𑑋 𑐩𑐴𑐵𑐣𑐐𑐬𑐰𑐵𑐳𑐷𑐟𑐫𑑂𑐟 𑐐𑐸𑐞𑐳𑑂𑐟𑐬𑐷𑐫 𑐰 𑐰𑐶𑐱𑐶𑐲𑑂𑐚 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵 𑐧𑐷𑐟 𑐩𑐴𑐵𑐣𑐐𑐬 𑐀𑐳𑑂𑐥𑐟𑐵𑐮 𑐡𑐫𑐾𑐎𑐾𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐩𑐴𑐵𑐣𑐐𑐬𑑄 𑐩𑐶𑐳𑐵, 𑐀𑐥𑐵𑑄𑐐𑐟𑐵 𑐡𑐸𑐥𑐶𑑄 𑐰 𑐖𑑂𑐫𑐾𑐲𑑂𑐛 𑐣𑐵𑐐𑐬𑐶𑐎𑐫𑐵 𑐣𑐵𑐩𑐫𑑂 𑐁𑐰𑐵𑐳𑐶𑐫 𑐨𑐰𑐣 𑐡𑐫𑐾𑐎𑐮 𑐢𑐵𑑅𑐳𑐵 𑐣𑐎𑑂𑐳𑐵 𑐥𑐵𑐳𑐫𑑂 𑑒𑑐 𑐥𑑂𑐬𑐟𑐶𑐱𑐟 𑐕𑐸𑐚 𑐧𑐷𑐐𑐸 𑐖𑐹𑐐𑐸 𑐡𑐸 𑑋 𑐀𑐠𑐾𑐴𑐾 𑐧𑐵𑐮𑑄 𑐧𑐶𑐫𑐵𑐟𑑅𑐐𑐸 𑐕𑐾𑑃, 𑐖𑐐𑑂𑐐𑐵, 𑐩𑐾𑐩𑐾 𑐐𑐸 𑐳𑑄𑐬𑐔𑐣𑐵 𑐀𑐣𑐶𑐰𑐵𑐬𑑂𑐫 𑐡𑐬𑑂𑐟𑐵 𑐫𑐵𑐫𑐾 𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐮𑐵𑐐𑐸 𑐫𑐵𑐫𑐾𑐐𑐸 𑐏𑑃 𑐣𑑄 𑐩𑐴𑐵𑐣𑐐𑐬𑐫𑐵 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐥𑑂𑐬𑐵𑐔𑐷𑐣 𑐧𑐳𑑂𑐟𑐷 𑐡𑐸𑐐𑐸 𑐣𑐐𑐬 𑐡𑐸𑐣𑐾 𑐴𑑀𑐩𑐳𑑂𑐚𑐾 𑐳𑑄𑐔𑐵𑐮𑐣𑐫𑑂 𑐥𑑂𑐬𑑀𑐟𑑂𑐳𑐵𑐴𑐣 𑐧𑐷𑐐𑐸, 𑐎𑐸𑐩𑐵𑐬𑐷, 𑐖𑐣𑐧𑐴𑐵𑑅𑐡𑑂𑐫𑑅 𑐬 𑐠 𑐳𑐵𑐮𑐷𑐐𑐸 𑐬𑐸𑐚 𑐮𑐶𑐳𑐾𑑄 𑐩𑐾𑐩𑐾𑐐𑐸 𑐋𑐟𑐶𑐴𑐵𑐳𑐶𑐎 𑐖𑐵𑐟𑑂𑐬𑐵 𑐖𑐸𑐂𑐐𑐸 𑐮𑑃𑐥𑐸𑐂 𑐳𑐩𑑂𑐥𑐡𑐵𑐩𑐿𑐟𑑂𑐬𑐷 𑐨𑐰𑐣 𑐡𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐥𑑂𑐬𑑀𑐟𑑂𑐳𑐵𑐴𑐣 𑐧𑐷𑐐𑐸 𑐏𑑃 𑐣𑑄 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐢𑐫𑐵𑐟𑑅𑐐𑐸 𑐡𑐸 𑑋