𑐫𑐾𑑃 𑐩𑐴𑐵𑐣𑐐𑐬𑐫𑐵 𑐳𑑂𑐎𑐹𑐮𑐫𑑂 𑐣𑐾𑐥𑐵𑐮𑐨𑐵𑐲𑐵

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐀𑐣𑑂𑐟𑐬𑑂𑐐𑐟𑐫𑐵 𑐳𑑂𑐎𑐹𑐮𑐫𑑂 𑐁𑑅 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐬𑐸𑐥𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐵𑑅 𑐮𑐵𑐐𑐹 𑐫𑐵𑐫𑐾𑐐𑐸 𑐥𑑂𑐬𑐳𑑂𑐟𑐵𑐰 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑑂𑐴𑑂𑐫𑑅𑐣𑐾 𑐴𑑅𑐐𑐸 𑐏𑑅 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐁𑐬𑑂𑐠𑐶𑐎 𑐰𑐬𑑂𑐲 𑑒𑑐𑑗𑑗-𑑗𑑘 𑐫𑐵 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩 𑐥𑑂𑐬𑐳𑑂𑐟𑐸𑐟 𑐫𑐵𑐳𑐾𑑄 𑐩𑐴𑐵𑐣𑐐𑐬 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐱𑐶𑐎𑑂𑐲𑐵 𑐳𑐩𑑂𑐧𑐣𑑂𑐢𑐷 𑐣𑐷𑐟𑐶𑐂 𑐠𑑂𑐰 𑐏𑑃 𑐥𑑂𑐬𑐳𑑂𑐟𑐵𑐰 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐱𑐶𑐎𑑂𑐲𑐵 𑐳𑐩𑑂𑐧𑐣𑑂𑐢𑐷 𑐣𑑂𑐴𑐹𑐐𑐸 𑐳𑐬𑐎𑐵𑐬𑐷𑐣𑐶𑐫𑐩𑐎𑐠𑑄 𑐁𑑅 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐫𑑂 𑐳𑑂𑐠𑐵𑐣𑐷𑐫 𑐨𑐵𑐲𑐵, 𑐮𑐶𑐥𑐶, 𑐠𑐵𑐫𑑂𑐧𑐵𑐫𑑂, 𑐳𑐩𑑂𑐥𑐡𑐵, 𑐳𑑄𑐳𑑂𑐎𑐺𑐟𑐶 𑐳𑐩𑑂𑐧𑐣𑑂𑐢𑐷 𑐖𑑂𑐘𑐵𑐣 𑐧𑐷𑐐𑐸 𑐮𑐵𑐐𑐶𑑄 𑑑𑑐𑑐 𑐥𑐹𑐬𑑂𑐞𑐵𑐒𑑂𑐎𑐫𑐵 𑐕𑐐𑐹 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐧𑑂𑐰𑑄𑐎𑐾𑐩𑐵𑑅 𑑋 𑐄𑐐𑐸 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐥𑐵𑐛𑑂𑐫𑐳𑐵𑐩𑐐𑑂𑐬𑐷 𑐣𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐟𑐫𑑂𑐳𑑄 𑐴𑐾 𑐣𑐶𑐬𑑂𑐩𑐵𑐞 𑐫𑐵𑐂 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐄𑐐𑐸 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐣𑐾𑐥𑐵𑐮𑐨𑐵𑐲𑐵𑑄 𑐴𑐾 𑐧𑑂𑐰𑑄𑐎𑐾𑐐𑐸 𑐥𑑂𑐬𑐳𑑂𑐟𑐵𑐰 𑐣𑑂𑐴𑑂𑐫𑑅𑐣𑐾 𑐴𑑅𑐐𑐸 𑐏𑑅 𑑋 𑐥𑑂𑐬𑐩𑐸𑐏 𑐱𑐵𑐎𑑂𑐫𑑄 𑐥𑐾𑐱 𑐫𑐵𑐣𑐵𑐡𑐷𑐐𑐸 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩𑐫𑑂 𑐠𑑂𑐰 𑐳𑐩𑑂𑐧𑐣𑑂𑐢𑐷 𑐧𑐸𑑃𑐡𑐵𑐫𑑂 𑐢𑐫𑐵𑐟𑑅𑐐𑐸 𑐡𑐸, ‘𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐵𑑅 𑐮𑐵𑐐𑐹 𑐫𑐵𑐫𑐾𑐐𑐸 𑐖𑐵𑐂 𑑋 𑐠𑐸𑐎𑐠𑑄 𑐣𑐶𑐬𑑂𑐩𑐵𑐞 𑐖𑐸𑐂𑐐𑐸 𑐥𑐵𑐛𑑂𑐫𑐎𑑂𑐬𑐩𑐫𑑂 𑐳𑑂𑐰𑐣𑐶𑐐𑑅𑐫𑐵 𑐨𑐵𑐲𑐵, 𑐬𑐴𑐣𑐳𑐴𑐣, 𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵 𑐮𑐐𑐵𑐫𑐟 𑐣𑐿𑐟𑐶𑐎 𑐱𑐶𑐎𑑂𑐲𑐵𑐫𑐵𑐟 𑐳𑐩𑐾𑐟 𑐎𑑅𑐑𑐵𑐣𑐵𑐟𑑅𑐐𑐸 𑐡𑐂 𑑋’

𑐳𑐬𑐎𑐵𑐬𑑄 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐢𑐎𑐵𑑅 𑐕𑐸𑐚𑐾 𑐫𑐵𑐣𑐵𑐟𑑅𑐐𑐸 𑐄𑐐𑐸 𑐰𑐶𑐲𑐫 𑐠𑐷𑐠𑐷 𑐳𑑂𑐎𑐹𑐮𑐟𑐫𑑂𑐳𑑄 𑐠𑑅 𑐫𑑅𑐫𑑅𑐠𑐾 𑐧𑑂𑐰𑑄𑐎𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐕𑐸𑑄 𑐕𑐸𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐟𑐫𑑂𑐳𑑄 𑐄𑐐𑐸 𑐥𑐵𑐛𑑂𑐫𑐎𑑂𑐬𑐩𑐫𑐵 𑐰𑐶𑐲𑐫𑐰𑐳𑑂𑐟𑐸 𑐦𑐸𑐎𑑂𑐎 𑐳𑑂𑐠𑐵𑐣𑐷𑐫 𑐖𑐣𑐖𑐷𑐰𑐣 𑐧𑐵𑐬𑐾 𑐟𑑅𑐳𑐵𑑄 𑐧𑑂𑐰𑑄𑐎𑐾𑐐𑐸 𑐩𑐵𑐢𑑂𑐫𑐩 𑐢𑐵𑑅𑐳𑐵 𑐏𑐳 𑐣𑐾𑐥𑐵𑐮𑐷 𑐨𑐵𑐲𑐵 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐁𑑅 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐢𑐵𑑅𑐳𑐵 𑐄𑐐𑐸 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐩𑐵𑐢𑑂𑐫𑐩 𑐳𑐩𑐾𑐟 𑐣𑐾𑐥𑐵𑐮𑐨𑐵𑐲𑐵 𑐴𑐾 𑐫𑐵𑐫𑐾𑐐𑐸 𑐢𑐎𑐵𑑅 𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩𑐫𑑂 𑐳𑐩𑐵𑐰𑐾𑐱 𑐫𑐵𑑅𑐐𑐸 𑐏𑑅 𑑋

𑐣𑐷𑐟𑐶 𑐟𑐠𑐵 𑐎𑐵𑐬𑑂𑐫𑐎𑑂𑐬𑐩 𑐥𑐵𑐬𑐶𑐟 𑐖𑐸𑐂𑐰𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐀𑐣𑑂𑐟𑐬𑑂𑐐𑐟 𑐮𑐵𑑅𑐐𑐸 𑐣𑐶𑐖𑐷 𑐰 𑐳𑐵𑐩𑐸𑐡𑐵𑐫𑐶𑐎 𑐦𑐸𑐎𑑂𑐎𑑄 𑐳𑑂𑐎𑐹𑐮𑐫𑑂 𑐠𑑂𑐰 𑐕𑐐𑐹 𑐰𑐶𑐲𑐫 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑑄𑐎𑐾𑐩𑐵𑑅𑐐𑐸 𑐖𑐸𑐂 𑑋 𑐩𑐴𑐵𑐣𑐐𑐬 𑐥𑐵𑐮𑐶𑐎𑐵𑑄 𑐠𑑂𑐰 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐥𑐵𑐛𑑂𑐫𑐎𑑂𑐬𑐩 𑐣𑐾𑐰𑐵𑑅 𑐨𑐵𑐳𑑄 𑐟𑐫𑐵𑐬 𑐣𑑄 𑐫𑐵𑐣𑐵 𑐟𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐁𑑅𑐫𑐵𑐟 𑐠𑑂𑐰 𑐰𑐶𑐲𑐫 𑑑 𑐟𑐐𑐶𑑄𑐣𑐶𑐳𑐾𑑄 𑑘 𑐟𑐐𑐶𑑄 𑐟𑐎 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐖𑐸𑐂 𑑋