𑐫𑐾𑑃 𑐩𑐴𑐵𑐣𑐐𑐬𑐫𑐵 𑐣𑐩𑐹𑐣𑐵 𑐰𑐶𑐡𑑂𑐫𑐵𑐮𑐫𑐫𑑂 𑐳𑐩𑑂𑐥𑐡𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞 𑐰 𑐳𑐴𑐬𑐷 𑐎𑐺𑐲𑐶 𑐧𑑂𑐰𑑄𑐎𑐷𑐐𑐸

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐣𑐩𑐸𑐣𑐵 𑐧𑑂𑐰𑐣𑐾𑐎𑐸𑐠𑐶 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐰𑐶𑐣𑐶𑐫𑐩𑐵𑐰𑐮𑐷 𑐟𑐫𑐵𑐬𑐷𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐋𑐟𑐶𑐴𑐵𑐳𑐶𑐎 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐴𑐬𑐷 𑐎𑐺𑐲𑐶𑐫𑐵𑐟 𑐀𑐢𑑂𑐫𑐫𑐣𑐫𑐵 𑐰𑐶𑐲𑐫 𑐡𑐫𑐾𑐎𑐾𑐐𑐸 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐫𑑀𑐖𑐣𑐵 𑐡𑐸 𑑋 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐣𑑂𑐴𑐹𑐐𑐸 𑐰𑐶𑐣𑐶𑐫𑐩𑐵𑐰𑐮𑐷 𑐁𑐰𑐱𑑂𑐫𑐎 𑐖𑐸𑐂𑐐𑐸𑐮𑐶𑑄 𑐰 𑐴𑐾 𑐎𑐠𑑄 𑐖𑑂𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐢𑐵𑑅𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬 𑐡𑐸𑐣𑐾 𑐡𑐸𑐐𑐸 𑑘𑑙 𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫 𑐩𑐢𑑂𑐫𑐾 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐋𑐟𑐶𑐴𑐵𑐳𑐶𑐎 𑐡𑐬𑐧𑐵𑐬 𑐴𑐵𑐂𑐳𑑂𑐎𑐸𑐮, 𑐨𑐵𑐣𑐸, 𑐳𑑄𑐳𑑂𑐎𑐺𑐟 𑐰 𑐎𑐣𑑂𑐫𑐵 𑐩𑐵𑐰𑐶𑐫𑐵𑐟 𑐣𑐩𑐹𑐣𑐵 𑐰𑐶𑐡𑑂𑐫𑐵𑐮𑐫 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐔𑐵𑐮𑐸 𑐁𑐬𑑂𑐠𑐶𑐎 𑐡𑑃𑐫𑐵 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐴𑐾 𑐠𑑂𑐰 𑐰𑐶𑐡𑑂𑐫𑐵𑐮𑐟𑐫𑑂𑐟 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐰𑐶𑐡𑑂𑐫𑐵𑐮𑐫𑐫𑐵𑐟 𑐠𑐥 𑐐𑐸𑐞𑐳𑑂𑐟𑐬 𑐰 𑐩𑐾𑐩𑐾𑐐𑐸 𑐰𑐶𑐡𑑂𑐫𑐵𑐮𑐫𑐫𑑂 𑐳𑑂𑐰𑐫𑐵𑑄 𑐠𑐥 𑐎𑐵𑐬𑑂𑐫𑐎𑑂𑐬𑐩 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐠𑑂𑐰 𑐡𑑃𑐫𑑂 𑑑 𑐎𑐬𑑀𑐜 𑐧𑐖𑐾𑐚 𑐦𑑂𑐫𑐵𑑅𑐐𑐸 𑐡𑐸 𑑋 𑐑𑑀𑐲𑐞𑐵 𑐫𑐵𑑅𑐐𑐸 𑐠𑐸𑐥𑐶𑑄 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐋𑐟𑐶𑐴𑐵𑐳𑐶𑐎 𑐳𑐩𑑂𑐥𑐡𑐵, 𑐳𑐴𑐬𑐷 𑐎𑐺𑐲𑐶 𑐰 𑐎𑐮𑐵𑐫𑐵 𑐁𑐰𑐱𑑂𑐫𑐎𑐟𑐵 𑐰 𑐩𑐴𑐟𑑂𑐰𑐫𑐵 𑐧𑐵𑐬𑐾 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐀𑐟𑐶𑐬𑐶𑐎𑑂𑐟 𑐃 𑐩𑐶𑐮𑐾 𑐫𑐵𑐣𑐵𑑅 𑐧𑑂𑐰𑑄𑐎𑐷𑐐𑐸 𑐏𑑃 𑐎𑐵𑐩𑐥𑐵𑐫𑐵 𑐱𑐶𑐎𑑂𑐲𑐵 𑐳𑐮𑑂𑐮𑐵𑐴𑐎𑐵𑐬 𑐬𑐾𑐱𑐸 𑐀𑐬𑑂𑐫𑐵𑐮𑑄 𑐎𑐣𑐵𑐡𑐶𑐮 𑑋

𑐳𑐮𑑂𑐮𑐵𑐴𑐎𑐵𑐬 𑐀𑐬𑑂𑐫𑐵𑐮𑑄 𑐢𑐫𑐵𑐡𑐷, ‘𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫 𑐖𑐸𑐂𑐰𑑄 𑐄𑐐𑐸 𑐰𑐶𑐡𑑂𑐫𑐵𑐮𑐫𑐫𑑂 𑐩𑐾𑐩𑐾𑐐𑐸𑐮𑐶𑑄 𑐳𑑂𑐰𑐫𑐵𑑄 𑐦𑐬𑐎 𑐰 𑐐𑐸𑐞𑐳𑑂𑐟𑐬𑐷𑐫 𑐖𑐸𑐂 𑐁𑐰𑐱𑑂𑐫𑐎 𑐖𑐸𑐂 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 ’
𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫𑐫𑑂 𑐕𑐸 𑐧𑑂𑐰𑑄𑐎𑐷 ?

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫𑐫𑑂 𑐋𑐟𑐶𑐴𑐵𑐳𑐶𑐎 𑐳𑐩𑑂𑐥𑐡𑐵, 𑐎𑐺𑐲𑐶 𑐰 𑐎𑐮𑐵𑐧𑐵𑐬𑐾 𑐧𑑂𑐰𑑄𑐎𑐾𑐐𑐸 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐫𑑀𑐖𑐣𑐵 𑐡𑐸 𑑋 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫 𑐀𑐣𑑂𑐟𑐬𑑂𑐐𑐟 𑐎𑐣𑑂𑐫𑐵 𑐩𑐵𑐰𑐶𑐂 𑐋𑐟𑐶𑐴𑐵𑐳𑐶𑐎 𑐳𑐩𑑂𑐥𑐡𑐵 𑐰 𑐰𑐵𑐟𑐵𑐰𑐬𑐞 𑐳𑑄𑐬𑐎𑑂𑐲𑐞 𑐐𑐸𑐎𑐠𑑄 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐖𑑂𑐘𑐵𑐣 𑐧𑐷 𑑋 𑐋𑐟𑐶𑐴𑐵𑐳𑐶𑐎 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞𑑄 𑐳𑐩𑐵𑐖 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐣𑐶𑑄𑐟𑐶𑑄 𑐐𑐸𑐎𑐠𑑄 𑐐𑑂𑐰𑐵𑐴𑐵𑐮𑐶 𑐖𑐸𑐂, 𑐡𑐿𑐣𑐶𑐎 𑐖𑐷𑐰𑐣𑐫𑑂 𑐥𑑂𑐬𑐵𑐎𑐺𑐟𑐶𑐎 𑐳𑐩𑑂𑐥𑐡𑐵𑐫𑐵 𑐳𑑂𑐬𑑀𑐟𑑄 𑐐𑐸𑐎𑐠𑑄 𑐥𑑂𑐬𑐨𑐵𑐰 𑐮𑐵𑐎𑐷, 𑐄𑐎𑐶𑐫𑐵𑐟 𑐕𑐵𑐫𑑂 𑐮𑑂𑐫𑑄𑐎𑐵 𑐟𑐫𑐾𑐩𑐵𑑅 𑐢𑐫𑐵𑐐𑐸 𑐀𑐢𑑂𑐫𑐵𑐥𑐣 𑐫𑐵𑐎𑐷 𑑋

𑐀𑐠𑐾𑐴𑐾 𑐳𑑄𑐳𑑂𑐎𑐺𑐟 𑐰𑐶𑐡𑑂𑐫𑐵𑐮𑐫𑐫𑑂 𑐳𑐴𑐬𑐷 𑐎𑐺𑐲𑐶 𑐎𑐵𑐬𑑂𑐫𑐎𑑂𑐬𑐩𑐫𑐵𑐟 𑐐𑐸𑐎𑐠𑑄 𑐥𑑂𑐬𑐨𑐵𑐰𑐎𑐵𑐬𑐷 𑐫𑐵𑐫𑐾𑐦𑐂, 𑐐𑐸𑐐𑐸 𑐗𑐷𑐐𑐸 𑐣𑑂𑐴𑐶𑐫𑐵𑐣𑑂𑐴𑐶𑐠𑑄𑐫𑐵 𑐖𑐷𑐰𑐣𑐫𑑂 𑐄𑐥𑐫𑑀𑐐𑐷 𑐖𑐸𑐂 𑑋 𑐳𑐴𑐬𑐫𑑂 𑐎𑐸𑐐𑐵𑐎𑑂𑐎 𑐏𑐸𑐮𑐵 𑐠𑐵𑐫𑑂 𑐩𑐡𑐸, 𑐄𑐎𑐶𑑄 𑐩𑑂𑐴𑑀𑐔𑐵 𑐖𑐐𑑂𑐐𑐵𑐫𑑂 𑐐𑐸𑐎𑐠𑑄 𑐎𑐺𑐲𑐶 𑐫𑐵𑐫𑐾𑐦𑐂 𑐢𑐫𑐵𑐐𑐸 𑐳𑑂𑐫𑐣𑐷 𑑋

𑐀𑐠𑐾𑐴𑐾 𑐨𑐵𑐣𑐸 𑐩𑐵𑐰𑐶𑐂 𑐢𑐵𑑅𑐳𑐵 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐲𑐫𑐫𑑂 𑐥𑐛𑐣𑐥𑐵𑐛𑐣 𑐫𑐵𑐎𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐎𑐮𑐵𑐫𑐵 𑐁𑐰𑐱𑑂𑐫𑐎𑐟𑐵, 𑐠𑐸𑐎𑐶𑐫𑐵 𑐳𑑄𑐬𑐎𑑂𑐲𑐞 𑐠𑐾𑑄𑐖𑑂𑐫𑐵𑑅𑐐𑐸 𑐰𑐶𑐲𑐫 𑐠𑐸𑐎𑐷 𑐡𑐸𑐠𑑂𑐫𑐵𑐎𑐷𑐐𑐸 𑐖𑐸𑐂 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐮𑐮𑐶𑐟𑐎𑐮𑐵𑐮𑐶𑐳𑐾 𑐳𑐩𑐣𑑂𑐰𑐫 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐎𑐵𑐩𑐥𑐵𑐫𑐵 𑐫𑑀𑐖𑐣𑐵 𑐡𑐸 𑑋

𑐳𑑂𑐰𑐫𑐾𑐧𑐮𑐫𑑂 𑐳𑐵𑐩𑐵𑐣𑑂𑐫 𑐠𑐾𑑄 𑐟𑐵𑑅𑐳𑐵𑑄 𑐠𑑂𑐰 𑐳𑑂𑐰𑑄𑐐𑐸𑐮𑐶𑑄 𑐰𑐶𑐡𑑂𑐫𑐵𑐮𑐫𑐫𑑂 𑐥𑐛𑐣𑐥𑐵𑐛𑐣 𑐫𑐵𑐎𑐷𑐐𑐸 𑐱𑐶𑐎𑑂𑐲𑐵 𑐰𑑂𑐫𑐵𑐰𑐴𑐵𑐬𑐶𑐎 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐡𑐸 𑑋 𑐠𑐸𑐐𑐸 𑐱𑐶𑐎𑑂𑐲𑐵 𑐠𑐥 𑐂𑐮𑐫𑑂 𑐧𑑂𑐰𑑄𑐎𑐾𑐐𑐸 𑐫𑐵𑐂 𑑋

𑐐𑐖𑑂𑐫𑐵𑑅𑐐𑐸 𑐖𑐸𑐂𑐩𑐵𑑅 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫
𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫 𑐩𑐾𑐩𑐾𑐐𑐸 𑐰𑐶𑐡𑑂𑐫𑐵𑐮𑐫 𑐳𑑂𑐰𑐫𑐵𑑄 𑐦𑐬𑐎 𑐖𑐸𑐂𑐩𑐵𑑅 𑑋 𑐐𑐣 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐦𑐬𑐎 𑐎𑐠𑑄𑐫𑐵 𑐎𑑂𑐬𑐶𑐫𑐵𑐎𑐮𑐵𑐥𑐫𑑂 𑐡𑐸𑐠𑑂𑐫𑐵𑐎𑐷 𑑋 𑐐𑐸𑐐𑐸 𑐰𑐶𑐡𑑂𑐫𑐵𑐮𑐫 𑐣𑐩𑐸𑐣𑐵 𑐏𑑅, 𑐀𑐣 𑐥𑑂𑐬𑐰𑐶𑐢𑐶𑐫𑐵 𑐳𑐴𑐖 𑐥𑐴𑐸𑑃𑐔, 𑐐𑐸𑐞𑐳𑑂𑐟𑐬𑐷𑐫 𑐱𑐶𑐎𑑂𑐲𑐵, 𑐁𑐣𑑂𑐟𑐬𑐶𑐎 𑐎𑐵𑐬𑑂𑐫𑐎𑑂𑐬𑐩, 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐏𑑂𑐫𑐵𑐫𑐵 𑐁𑐢𑐵𑐬𑐫𑑂 𑐁𑐰𑐱𑑂𑐫𑐎 𑐰𑐶𑐲𑐫𑐐𑐟 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐠𑐾𑑄𑐖𑑂𑐫𑐵𑑅𑐐𑐸 𑐰𑐶𑐲𑐫 𑐀𑐣𑐶𑐰𑐵𑐬𑑂𑐫 𑐳𑐩𑐵𑐰𑐾𑐱 𑐖𑐸𑐂 𑑋 𑐁𑐢𑐸𑐣𑐶𑐎 𑐥𑐸𑐳𑑂𑐟𑐎𑐵𑐮𑐫𑐫𑐵 𑐰𑑂𑐫𑐰𑐳𑑂𑐠𑐵, 𑐐𑐸𑐎𑐶𑐫𑐵 𑐎𑐵𑐬𑐞𑑄 𑐣𑐩𑐸𑐣𑐵 𑐰𑐶𑐡𑑂𑐫𑐵𑐮𑐫𑐟 𑐩𑐾𑐩𑐾𑐐𑐸 𑐰𑐶𑐡𑑂𑐫𑐵𑐮𑐫 𑐳𑑂𑐰𑐫𑐵𑑄 𑐐𑐸𑐞𑐳𑑂𑐟𑐬𑐷𑐫 𑐖𑐸𑐂𑐦𑐂 𑑋

–𑐬𑐵𑐳𑐳