𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐳𑐸𑐬𑐸

𑐫𑐾𑑃 – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐖𑑂𑐫𑐵𑐗𑑂𑐰𑑅 𑐳𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐮𑐎𑐜𑐵𑐄𑐣𑐫𑐵 𑐃 𑐟𑐵𑑅𑐴𑐵𑐎 𑐖𑐸𑐫𑐵𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐰𑐿𑐎𑐮𑑂𑐥𑐶𑐎 𑐩𑐵𑐢𑑂𑐫𑐩𑑄 𑐧𑑂𑐰𑑄𑐎𑐾𑐐𑐸 𑐟𑐵𑑅 𑐟𑐫𑐵 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐖𑑂𑐫𑐵𑐗𑑂𑐰𑑅 𑐳𑐸𑐬𑐸 𑐫𑐵𑑅𑐐𑐸 𑐡𑐸 𑑋

𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑑄𑐔𑐵𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐩𑐾𑐚𑑂𑐬𑑀 𑐊𑐦𑐊𑐩 𑑙𑑔.𑑖 𑐩𑐾𑐐𑐵𑐴𑐬𑑂𑐖 𑐩𑐵𑐬𑑂𑐦𑐟 𑐠𑐣𑐶𑑄𑐣𑐶𑐳𑐾𑑄 𑐁𑐢𑐵𑐬𑐨𑐹𑐟 𑐣𑐶𑐳𑐾𑑄 𑑑𑑐 𑐟𑐐𑐶𑑄 𑐟𑐎𑐫𑐵 𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐳𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐧𑐸𑐢𑐰𑐵𑑅 𑐳𑐸𑐠𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐄𑐐𑐸 𑐱𑐶𑐎𑑂𑐲𑐵 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐶𑐳𑐾𑑄 𑐩𑐫𑐾𑐬 𑐱𑐵𑐎𑑂𑐫𑑄 𑐕𑐾𑑃𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑐳𑑂𑐟𑐫𑑂𑐟 𑐰𑐿𑐎𑐮𑑂𑐥𑐶𑐎 𑐬𑐸𑐥𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐄𑐡𑑂𑐡𑐾𑐱𑑂𑐫𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐖𑑂𑐫𑐵𑐗𑑂𑐰𑑅 𑐳𑐸𑐬𑐸 𑐫𑐵𑐣𑐵𑐐𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐠𑐸𑐐𑐸 𑐖𑑂𑐫𑐵𑐗𑑂𑐰𑐥𑐵𑐏𑐾𑑄 𑐖𑐷𑐰𑐣𑐥𑑂𑐬𑐟𑐶 𑐠𑐥 𑐄𑐟𑑂𑐳𑐵𑐴 𑐧𑑂𑐰𑐮𑑄𑐎𑐷𑐐𑐸 𑐰 𑐱𑐿𑐎𑑂𑐲𑐶𑐎 𑐐𑐟𑐶𑐰𑐶𑐢𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐣𑑄 𑐐𑑂𑐰𑐵𑐴𑐵𑐮𑐶 𑐖𑐸𑐂 𑑋’

𑐖𑑂𑐫𑐵𑐗𑑂𑐰𑐮𑐫𑑂 𑐩𑐴𑐵𑐣𑐐𑐬𑐫𑐵 𑐥𑑂𑐬𑐰𑐎𑑂𑐟𑐵 𑐣𑐵𑐥𑑄 𑐰𑐜𑐵 𑐣𑐩𑑂𑐧𑐬 𑑑𑑕𑐫𑐵 𑐀𑐢𑑂𑐫𑐎𑑂𑐲 𑐃𑐱𑑂𑐰𑐬𑐩𑐵𑐣 𑐜𑑄𑐐𑑀𑐮𑑄 𑐩𑐴𑐵𑐩𑐵𑐬𑐷𑐫𑐵 𑐎𑐵𑐬𑐞𑑄 𑐦𑐸𑐎𑑂𑐎𑑄 𑐎𑑂𑐲𑐾𑐟𑑂𑐬𑐫𑑂 𑐳𑐩𑐳𑑂𑐫𑐵 𑐮𑐵𑐎𑐹𑐐𑐸 𑐢𑐫𑐵𑐡𑐶𑐳𑐾𑑄 𑐄𑐎𑐷 𑐩𑐢𑑂𑐫𑐾 𑐟𑑅𑐢𑑄𑐐𑐸 𑐳𑐩𑐳𑑂𑐫𑐵 𑐱𑐶𑐎𑑂𑐲𑐵 𑐎𑑂𑐲𑐾𑐟𑑂𑐬𑐫𑑂 𑐮𑐵𑐐𑐸𑐮𑐶𑑄 𑐄𑐎𑐷𑐫𑐵𑐟 𑐳𑐴𑐖 𑐫𑐵𑐣𑐵𑐫𑑄𑐎𑐾𑐐𑐸 𑐢𑐫𑐵𑐡𑐶𑐮 𑑋

𑐀𑐠𑐾𑐴𑐾 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐱𑐵𑐏𑐵 𑐀𑐢𑐶𑐎𑐺𑐟 𑐩𑑀𑐟𑐶 𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃𑑄 𑐠𑐣𑐶𑐣𑐶𑐳𑐾𑑄 𑐳𑐸𑐬𑐸 𑐖𑐹𑐐𑐸 𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐩𑐵𑐬𑑂𑐦𑐟 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑑙𑑑𑐐𑐹 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫, 𑑓𑐐𑐹 𑐰𑐶𑐱𑐾𑐲 𑐰𑐶𑐡𑑂𑐫𑐵𑐮𑐫 𑐰 𑑖 𑐳𑐫 𑑔𑑓𑐐𑐹 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐮𑐫𑑂 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐥𑑂𑐬𑐟𑑂𑐫𑐵𑐎𑑂𑐲/𑐀𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐮𑐵𑐨𑐵𑐣𑑂𑐰𑐶𑐟 𑐖𑐸𑐂𑐐𑐸 𑐢𑐫𑐵𑐡𑐶𑐮 𑑋

𑐬𑐾𑐜𑐶𑐫𑑀 𑐱𑐶𑐎𑑂𑐲𑐵 𑐖𑑂𑐫𑐵𑐗𑑂𑐰𑑅 𑐰𑐶𑐡𑑂𑐫𑐵𑐮𑐫𑐫𑐵 𑐱𑐶𑐎𑑂𑐲𑐎–𑐱𑐶𑐎𑑂𑐲𑐶𑐎𑐵𑐟𑐫𑑂𑐳𑑄 𑐳𑑄𑐔𑐵𑐮𑐣 𑐫𑐵𑐂𑐳𑐵 𑐬𑐾𑐜𑐶𑐫𑑀𑐎𑐬𑑂𑐩𑐷𑐟𑐫𑑂𑐳𑑄 𑐳𑐴𑐖𑐷𑐎𑐬𑐞𑐫𑐵 𑐖𑑂𑐫𑐵 𑐫𑐵𑐂 𑑋 𑐣𑑂𑐴𑐶𑐣𑑂𑐴𑐶 𑐣𑑂𑐴𑑂𑐫𑐵𑐂𑐐𑐸 𑐖𑑂𑐫𑐵𑐗𑑂𑐰𑑅 𑐩𑐢𑑂𑐫𑐾 𑑑 𑐣𑐶𑐳𑐾𑑄 𑑖 𑐟𑐐𑐶𑑄𑐟𑐎𑐫𑐵 𑐳𑑄𑐫𑑀𑐖𑐣 𑐫𑐵𑐫𑐾𑐐𑐸 𑐖𑐶𑐩𑑂𑐩𑐵 𑐳𑐬𑐳𑑂𑐰𑐟𑐷 𑐣𑐶𑐎𑐾𑐟𑐣 𑐩𑐵𑐰𑐶𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐬𑐰𑐶𑐣𑐵 𑐩𑐴𑐬𑑂𑐖𑐣𑐫𑐵𑐟 𑐰 𑑗 𑐣𑐶𑐳𑐾𑑄 𑑑𑑐 𑐟𑐐𑐶𑑄𑐫𑐵 𑐳𑑄𑐫𑑀𑐖𑐣𑐫𑐵 𑐖𑐶𑐩𑑂𑐩𑐵 𑐰𑐶𑐱𑑂𑐰 𑐣𑐶𑐎𑐾𑐟𑐣 𑐩𑐵𑐰𑐶𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐴𑐾𑐬𑐩𑑂𑐧𑐬𑐵𑐖 𑐎𑑃𑐜𑐾𑐮𑐫𑐵𑐟 𑐧𑐶𑐄𑐐𑐸 𑐡𑐸 𑑋