𑐫𑐾𑑃𑐫𑐵 𑐥𑐸𑐮𑐵𑑄𑐐𑐸 𑐰𑐶𑐡𑑂𑐫𑐵𑐮𑐫𑐫𑐵 𑐫𑑀𑐐𑐡𑐵𑐣

𑐫𑐾𑑃 – 𑐣𑐾𑐥𑐵𑐮𑐫𑑂 𑐱𑐶𑐎𑑂𑐲𑐵 𑐖𑐵𑐐𑐬𑐞𑐫𑐵 𑐖𑐐 𑐟𑐫𑐾𑐟 𑐰𑐶.𑐳𑑄. 𑑒𑑐𑑐𑑗 𑐫𑐵 𑐎𑑂𑐬𑐵𑐣𑑂𑐟𑐶 𑐮𑐶𑐥𑐵 𑐳𑑂𑐠𑐵𑐥𑐣𑐵 𑐫𑐵𑑅𑐐𑐸 𑐫𑐾𑑃𑐫𑐵 𑐥𑐸𑐮𑐵𑑄𑐐𑐸 𑐰𑐶𑐡𑑂𑐫𑐵𑐮𑐫𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐫𑑀𑐐𑐡𑐵𑐣 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑑀𑐴𑐣𑐶, 𑐳𑑂𑐰𑐣𑑂𑐟𑐶, 𑐣𑐾𑐥𑐵𑐮 𑐳𑑄𑐰𑐟𑑂 𑐣𑑂𑐴𑐹𑐡𑑃 𑐰 𑐕𑐛 𑐥𑐬𑑂𑐰𑐫𑐵 𑐮𑐳𑐟𑐵𑐫𑑂 𑐠𑐣𑐫𑐵 𑐠𑑃𑐴𑐶𑐟𑐶𑐂 𑐔𑑂𑐰𑑄𑐐𑐸 𑐱𑐵𑐣𑑂𑐟𑐶 𑐱𑐶𑐎𑑂𑐲𑐵 𑐩𑐣𑑂𑐡𑐶𑐬𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐨𑐶𑑄𑐟𑐸𑐣𑐵 𑐎𑐵𑐮𑐧𑐶𑐮 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐣𑐵𑐡𑐷𑐥𑐶𑑄 𑐰𑐎𑑂𑐟𑐵𑐟𑐫𑑂𑐳𑑄 𑐫𑐾𑑃𑐫𑐵 𑐥𑐸𑐮𑐵𑑄𑐐𑐸 𑐰𑐶𑐡𑑂𑐫𑐵𑐮𑐫𑐫𑐵 𑐫𑑀𑐐𑐡𑐵𑐣𑐫𑐵 𑐳𑑂𑐩𑐬𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐀𑐖𑑂𑐫𑐵𑑅𑐐𑐸 𑐰𑐶𑐡𑑂𑐫𑐵𑐮𑐫 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐳𑐬𑐎𑐵𑐬, 𑐀𑐨𑐶𑐨𑐵𑐰𑐎 𑐰 𑐡𑐎𑑂𑐰𑑄 𑐥𑐎𑑂𑐲𑐫𑐵 𑐀𑐐𑑂𑐬𑐞𑐷 𑐨𑐹𑐩𑐶𑐎𑐵 𑐡𑐫𑐾𑐩𑐵𑑅𑐐𑐸 𑐏𑑃𑐫𑑂 𑐰𑐎𑑂𑐟𑐵𑐟𑐫𑑂𑐳𑑄 𑐧𑑅 𑐧𑐶𑐄𑐐𑐸 𑐡𑐸 𑑋 𑐥𑐸𑐮𑐵𑑄𑐐𑐸 𑐳𑑂𑐠𑐵𑐥𑐶𑐟 𑐰𑐶𑐡𑑂𑐫𑐵𑐮𑐫𑐩𑐢𑑂𑐫𑐾 𑐱𑐵𑐣𑑂𑐟𑐶 𑐱𑐶𑐎𑑂𑐲𑐵 𑐩𑐣𑑂𑐡𑐶𑐬 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐥𑐬𑑀𑐥𑐎𑐵𑐬 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐣𑐾𑐥𑐵𑐮 𑐁𑐡𑐬𑑂𑐱 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐎𑐵𑐣𑑂𑐟𑐶 𑐃𑐱𑑂𑐰𑐬𑐷 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐰𑐶𑐱𑑂𑐰 𑐣𑐶𑐎𑐾𑐟𑐣 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐨𑐵𑐣𑐸 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫 𑐁𑐡𑐶 𑐄𑐐𑐸 𑐃𑐫𑐵 𑐣𑐵𑑄𑐖𑐵𑑅𑐐𑐸 𑐰𑐶𑐡𑑂𑐫𑐵𑐮𑐫𑐫𑑂 𑐮𑐵𑑅 𑑋

𑐰𑐶𑐱𑑂𑐰 𑐣𑐶𑐎𑐾𑐟𑐣 𑐰 𑐥𑐬𑑀𑐥𑐎𑐵𑐬 𑐁𑐡𑐬𑑂𑐱 𑐩𑐵.𑐰𑐶. 𑐠𑐾𑑄𑐖𑑂𑐫𑐵𑑅𑐐𑐸 𑐳𑐬𑐎𑐵𑐬𑐷 𑐰𑐶𑐡𑑂𑐫𑐵𑐮𑐫𑑄 𑐟𑑅𑐎𑑂𑐰𑑅 𑐟𑑅𑐎𑑂𑐰𑑅 𑐴𑐾 𑐄𑐟𑑂𑐎𑐺𑐲𑑂𑐚 𑐮𑐶𑐔𑑂𑐰𑑅 𑐴𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅𑐳𑐵 𑐩𑐾𑐩𑐾𑐐𑐸 𑐰𑐶𑐡𑑂𑐫𑐵𑐮𑐫 𑐣𑑄 𑐄𑐟𑐶𑐎𑑄 𑐥𑑂𑐬𑐳𑐶𑐡𑑂𑐢 𑐖𑐹 𑑋 𑐳𑑂𑐰𑐣𑐶𑐐𑐮𑐫𑑂 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫 𑐡𑐸𑐴𑐵𑑄 𑐰𑐫𑐾𑐰𑑄 𑐳𑐬𑐎𑐵𑐬𑐷 𑐰𑐶𑐡𑑂𑐫𑐵𑐮𑐫 𑐢𑑂𑐫𑐵𑐎𑐸𑐣𑐫𑑂 𑐮𑐵𑑅𑐐𑐸 𑐏𑐣𑐾𑐡𑐸𑐳𑐵𑑄 𑐰𑐶𑐱𑑂𑐰 𑐣𑐶𑐎𑐾𑐟𑐣 𑐩𑐵.𑐰𑐶𑑄. 𑐟𑑅𑐎𑑂𑐰𑑅 𑐟𑑅𑐎𑑂𑐰𑑅 𑐴𑐾 𑐬𑐵𑐲𑑂𑐚𑑂𑐬𑐶𑐫 𑐢𑑂𑐰𑐵𑑃𑐫𑑂 𑐥𑑂𑐬𑐵𑐥𑑂𑐟 𑐫𑐵𑐫𑐾𑐟 𑐳𑐦𑐮 𑐖𑐹𑐐𑐸 𑐡𑐸𑐳𑐵 𑐥𑐬𑑀𑐥𑐎𑐵𑐬 𑐁𑐬𑑂𑐡𑐱 𑐰𑐶𑐡𑑂𑐫𑐵𑐮𑐫 𑐣𑑄 𑐄𑐟𑑂𑐎𑐺𑐲𑑂𑐚 𑐣𑐩𑐹𑐣𑐵 𑐰𑐶𑐡𑑂𑐫𑐵𑐮𑐫𑐫𑑂 𑐮𑐵𑑅 𑑋

𑐰𑐶.𑐳𑑄. 𑑒𑑐𑑐𑑗 𑐳𑐵𑐮𑐫𑑂 𑐳𑑂𑐠𑐵𑐥𑐣𑐵 𑐖𑐹𑐐𑐸 𑐱𑐵𑐣𑑂𑐟𑐶 𑐱𑐶𑐎𑑂𑐲𑐵 𑐩𑐣𑑂𑐡𑐶𑐬 𑐩𑐵.𑐰𑐶.𑐂 𑐠𑐸𑐐𑐸𑐳𑐷 𑐠𑐥 𑐳𑑂𑐰𑐳𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐣𑑂𑐴𑐹𑐥𑐶𑑄 𑐨𑐬𑑂𑐣𑐵 𑐫𑐵𑐫𑐾𑐟 𑐳𑐦𑐮 𑐖𑐹𑐐𑐸 𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐳𑐸𑐡𑐵𑐩𑐥𑑂𑐬𑐳𑐵𑐡 𑐐𑑁𑐟𑐩𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑑒𑑐𑑗𑑒 𑐳𑐵𑐮𑐫𑐵 𑐨𑐸𑐏𑐵𑐔𑑄 𑐥𑑂𑐬𑐨𑐵𑐰𑐶𑐟 𑐄𑐐𑐸 𑐰𑐶𑐡𑑂𑐫𑐵𑐮𑐫𑐫𑐵 𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐂𑐖𑐬𑐵𑐫𑐮𑐷 𑐬𑐵𑐖𑐡𑐹𑐟𑐵𑐰𑐵𑐳, 𑐊𑐱𑐶𑐫𑐵𑐮𑐷 𑐰𑐶𑐎𑐵𑐳 𑐧𑐿𑑄𑐎, 𑐳𑑂𑐠𑐵𑐣𑐷𑐫 𑑑𑑗 𑐰𑐜𑐵 𑐖𑑂𑐫𑐵𑐎𑐹, 𑐄𑐐𑐸 𑐎𑑂𑐲𑐾𑐟𑑂𑐬𑐫𑐵 𑐥𑑂𑐬𑐟𑐶𑐣𑐶𑐢𑐶𑐳𑐨𑐵 𑐳𑐡𑐳𑑂𑐫 𑐬𑐵𑐩𑐰𑐷𑐬 𑐩𑐵𑐀𑐣𑐣𑑂𑐢𑐬 𑐮𑐐𑐵𑐫𑐟 𑐁𑐥𑐵𑐮𑑄 𑐳𑑄𑐑𑐳𑑄𑐳𑑂𑐠𑐵𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐶𑐡𑑂𑐫𑐵𑐮𑐫𑐫𑐵 𑐣𑐶𑑄𑐟𑐶𑑄 𑐗𑐶𑑄𑐣𑑂𑐫𑐵𑐐𑐹 𑐮𑐵𑐏 𑐧𑐖𑐾𑐚 𑐰𑐶𑐣𑐶𑐫𑑀𑐖𑐣 𑐫𑐵𑐫𑐾𑐟 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐐𑐸 𑐢𑐵𑐳𑐾𑑄 𑐳𑐵𑑄𑐳𑐡 𑐩𑐵𑐣𑐣𑑂𑐢𑐬𑐫𑐵𑐟 𑐰𑐶𑐱𑐾𑐲 𑐳𑐩𑑂𑐩𑐵𑐣 𑐣𑑄 𑐫𑐵𑑅𑐐𑐸 𑐏𑑅 𑑋 𑐣𑐾𑐥𑐵𑐮𑐫𑑂 𑐠𑑁𑑄𑐎𑐣𑑂𑐴𑐫𑑂 𑑘𑑐 𑐥𑑂𑐬𑐟𑐶𑐱𑐟 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐰𑐶𑐡𑑂𑐫𑐵𑐬𑑂𑐠𑐷 𑐳𑐵𑐬𑑂𑐰𑐖𑐣𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑑒𑑐 𑐥𑑂𑐬𑐟𑐶𑐱𑐟 𑐰𑐶𑐡𑑂𑐫𑐵𑐬𑑂𑐠𑐷 𑐣𑐶𑐖𑐷 𑐏𑑂𑐫𑑅𑐫𑐵 𑐰𑐶𑐡𑑂𑐫𑐵𑐮𑐫𑐫𑑂 𑐧𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐵𑑄𑐳𑐡 𑐩𑐵𑐣𑐣𑑂𑐢𑐬𑑄 𑐣𑐾𑐥𑐵𑐮𑐫𑑂 𑐐𑐞𑐟𑐣𑑂𑐟𑑂𑐬 𑐴𑐫𑐾𑐟 𑐡𑑂𑐰𑐮𑑄𑐡𑑂𑐰𑑅 𑐩𑐣𑐸𑐏𑑄 𑐳𑐴𑐵𑐡𑐟 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐰 𑐀𑐗𑑄 𑐮𑐏𑑁𑑄 𑐩𑐣𑐹 𑐕𑐾𑑃 𑐩𑐡𑐫𑐾𑐎𑐵𑑅 𑐔𑑂𑐰𑐣𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸𑐐𑐸 𑐢𑐵𑐳𑐾𑑄 𑐂𑐩𑐶𑐐𑐸 𑐩𑑂𑐴𑐐𑐳 𑐥𑐹𑐰𑑄𑐎𑐾𑐟 𑐐𑐸𑐞𑐳𑑂𑐟𑐬𑐷𑐫 𑐱𑐶𑐎𑑂𑐲𑐵𑐫𑐵 𑐩𑐵𑐢𑑂𑐫𑐩𑑄 𑐖𑐵𑐐𑐬𑐞 𑐴𑐫𑐵𑑅 𑐡𑐾𑐫𑑂𑐫𑐵𑐟 𑐁𑐬𑑂𑐠𑐶𑐎 𑐰𑐶𑐎𑐵𑐳𑐫𑐵 𑐮𑑃𑐥𑐸𑐂 𑐫𑑄𑐎𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐥𑑂𑐬𑐡𑐾𑐱 𑐣𑑄. 𑑓 𑐫𑐵 𑐥𑑂𑐬𑐡𑐾𑐱𑐳𑐨𑐵 𑐳𑐡𑐳𑑂𑐫 𑐰𑐳𑐣𑑂𑐟 𑐩𑐵𑐣𑐣𑑂𑐢𑐬𑑄 𑐰𑐶𑐡𑑂𑐫𑐵𑐮𑐫𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵 𑐰 𑐰𑑂𑐫𑐎𑑂𑐟𑐶𑐫𑐵𑐟 𑐥𑑂𑐬𑐱𑑄𑐳𑐵𑐥𑐟𑑂𑐬 𑐮𑑅𑐮𑑂𑐴𑐵𑐣𑐵𑐡𑐶𑐳𑐾𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐄𑐟𑑂𑐥𑐵𑐡𑐣 𑐖𑐹𑐐𑐸 𑐖𑐣𑐱𑐎𑑂𑐟𑐶𑑄 𑐣𑑄 𑐡𑐾𑐫𑑂𑐫𑐵 𑐠𑐷𑐠𑐷 𑐏𑑂𑐫𑐮𑐫𑑂 𑐫𑑀𑐐𑐡𑐵𑐣 𑐫𑐵𑐣𑐵𑐔𑑂𑐰𑑄𑐐𑐸 𑐎𑐣𑐵𑐡𑐶𑐮 𑑋

𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐂𑐖𑐬𑐵𑐫𑐮𑐷 𑐬𑐵𑐖𑐡𑐹𑐟 𑐧𑐾𑐣𑐷 𑐌𑐩𑐵𑐬𑑄 𑐐𑐸𑐞𑐳𑑂𑐟𑐬𑐷𑐫 𑐱𑐶𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐮𑐐𑐵𑐣𑐷 𑐫𑐵𑐫𑐾𑐐𑐸 𑐡𑐾𑐫𑑂𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐀𑐟𑐶𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐂𑐖𑐬𑐵𑐫𑐮𑑄 𑐱𑐶𑐎𑑂𑐲𑐵𑐫𑐵 𑐎𑑂𑐲𑐾𑐟𑑂𑐬𑐫𑑂 𑐫𑐵𑐣𑐵𑐔𑑂𑐰𑑄𑐐𑐸 𑐄𑐥𑐮𑐧𑑂𑐢𑐶𑐫𑐵 𑐀𑐣𑐸𑐨𑐰 𑐣𑐾𑐥𑐵𑑅 𑐠𑐾𑑄𑐖𑑂𑐫𑐵𑑅𑐐𑐸 𑐡𑐾𑐫𑑂𑐫𑐵 𑐣𑐶𑑄𑐟𑐶𑑄 𑐣𑑄 𑐄𑐥𑐫𑑀𑐐𑐷 𑐖𑐸𑐂𑐐𑐸 𑐰𑐶𑐔𑐵𑑅 𑐥𑑂𑐰𑑄𑐎𑐵𑐡𑐶𑐮 𑑋
𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬𑑄 𑐱𑐵𑐣𑑂𑐟𑐶 𑐱𑐶𑐎𑑂𑐲𑐵 𑐩𑐣𑑂𑐡𑐶𑐬 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑑄 𑐳𑑂𑐠𑐵𑐥𑐣𑐵𑐎𑐵𑐮𑐣𑐶𑐳𑐾𑑄 𑐴𑐾 𑐡𑐾𑐫𑑂𑐫𑐵 𑐱𑐶𑐎𑑂𑐲𑐵𑐫𑐵 𑐏𑑂𑐫𑐮𑐫𑑂 𑐩𑑂𑐴𑐶𑐟𑐵 𑐰𑐫𑐵𑐔𑑂𑐰𑑄𑐐𑐸 𑐨𑐹𑐩𑐶𑐎𑐵 𑐢𑐵𑐠𑐾𑑄 𑐴𑐾 𑐔𑑂𑐰𑐕𑐵𑐫𑐾𑐧𑐴𑐖𑐹 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐡𑑂𑐫𑐵𑐮𑐫𑐫𑐵 𑐣𑐶𑑄𑐟𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐩𑑂𑐴 𑐥𑑂𑐬𑐟𑐶𑐣𑐶𑐳𑐨𑐵𑐫𑐵 𑐳𑐵𑑄𑐳𑐡 𑐬𑐵𑐩𑐰𑐷𑐬 𑐩𑐵𑐣𑐣𑑂𑐢𑐬, 𑐥𑑂𑐬𑐡𑐾𑐱𑐳𑐨𑐵 𑐳𑐡𑐳𑑂𑐫 𑐰𑐳𑐣𑑂𑐟 𑐩𑐵𑐣𑐣𑑂𑐢𑐬, 𑐬𑐵𑐲𑑂𑐚𑑂𑐬𑐶𑐫 𑐳𑐩𑐵𑐔𑐵𑐬 𑐳𑐩𑐶𑐟𑐶 (𑐬𑐵𑐳𑐳)𑐫𑐵 𑐩𑐴𑐵𑐥𑑂𑐬𑐧𑐣𑑂𑐢 𑐌𑐥𑐾𑐣𑑂𑐡𑑂𑐬 𑐱𑐬𑑂𑐩𑐵, 𑐳𑐵𑐮𑑂𑐚 𑐚𑑂𑐬𑐾𑐜𑐶𑐒 𑐎𑐬𑑂𑐥𑑀𑐬𑐾𑐳𑐣𑐫𑐵 𑐩𑐴𑐵𑐥𑑂𑐬𑐧𑐣𑑂𑐢 𑐄𑐬𑑂𑐩𑐶𑐮𑐵 𑐱𑑂𑐬𑐾𑐲𑑂𑐛, 𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬, 𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐳𑐸𑐡𑐵𑐩𑐥𑑂𑐬𑐳𑐵𑐡 𑐐𑑁𑐟𑐩, 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐂𑐖𑐬𑐵𑐫𑐮𑐷 𑐬𑐵𑐖𑐡𑐹𑐟 𑐧𑐾𑐣𑐷 𑐌𑐩𑐵𑐬 𑐮𑐐𑐵𑐫𑐟𑐫𑐵 𑐰𑐶𑐱𑐶𑐲𑑂𑐚 𑐰𑑂𑐫𑐎𑑂𑐟𑐶𑐟𑑂𑐰𑐫𑐵 𑐣𑑄 𑐥𑑂𑐬𑐱𑑄𑐳𑐵 𑐫𑐵𑑅𑐐𑐸 𑐏𑑅 𑑋