𑐫𑐾𑑃𑐩𑐥𑐵𑐫𑐵 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐂 𑐊𑐎𑐷𑐎𑐺𑐟 𑐴𑐵𑐖𑐶𑐬𑐷 𑐥𑑂𑐬𑐞𑐵𑐮𑐷𑐂 𑐳𑑂𑐰𑐵𑐟

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐱𑐶𑐎𑑂𑐲𑐎, 𑐎𑐬𑑂𑐩𑐔𑐵𑐬𑐷 𑐰 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐣𑑂𑐴𑐶𑐣𑑂𑐴𑐶𑐠𑑄𑐫𑐵 𑐴𑐵𑐖𑐶𑐬𑐷𑐫𑐵 𑐣𑐶𑑄𑐟𑐶𑑄 𑐠𑑅𑐐𑐸 𑐴𑐾 𑐊𑐎𑐷𑐎𑐺𑐟 𑐴𑐵𑐖𑐶𑐬𑐷 𑐥𑑂𑐬𑐞𑐵𑐮𑐷 𑐰𑐶𑐎𑐵𑐳 𑐫𑐵𑑅𑐐𑐸 𑐡𑐸 𑑋

𑐱𑐶𑐎𑑂𑐲𑐵 𑐰𑐶𑐨𑐵𑐐 𑐰 𑐳𑐸𑐔𑑄 𑐥𑑂𑐬𑐰𑐶𑐢𑐶 𑐰𑐶𑐨𑐵𑐐𑑄 𑐠𑑅𑐐𑐸 𑐥𑑂𑐬𑐞𑐵𑐮𑐷 𑐰𑐶𑐎𑐵𑐳 𑐫𑐵𑐣𑐵𑑅 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐊𑐎𑐷𑐎𑐺𑐟 𑐥𑑂𑐬𑐞𑐵𑐮𑐷𑐂 𑐳𑑂𑐰𑐵𑑅𑐐𑐸 𑐏𑑅 𑑋

𑐳𑐎𑐮𑐾𑑄 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 ‘𑐫𑐸𑐖𑐬 𑐣𑐾𑐩’ 𑐰 ‘𑐥𑐵𑐳𑐰𑐬𑑂𑐜’ 𑐧𑐶𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐠𑐾 𑐴𑐾, 𑐖𑐣𑐎𑐮𑑂𑐫𑐵𑐞 𑐩𑐵𑐰𑐶, 𑐚𑐒𑑂𑐐𑐵𑐮 𑐩𑐵𑐰𑐶, 𑐐𑐷𑐟𑐵𑐩𑐵𑐟𑐵 𑐩𑐵𑐰𑐶, 𑐖𑑂𑐘𑐵𑐣𑑀𑐡𑐫 𑐩𑐵𑐰𑐶, 𑐟𑐬𑐸𑐞 𑐩𑐵𑐰𑐶, 𑐬𑐟𑑂𑐣𑐬𑐵𑐖𑑂𑐫 𑐩𑐵𑐰𑐶, 𑐥𑐡𑑂𑐩𑑀𑐡𑐫 𑐩𑐵𑐰𑐶, 𑐖𑐣𑐥𑐠 𑐩𑐵𑐰𑐶 𑐰 𑐰𑐶𑐱𑑂𑐰 𑐣𑐶𑐎𑐾𑐟𑐣 𑐩𑐵𑐰𑐶𑐫𑐵 𑐱𑐶𑐎𑑂𑐲𑐎 𑐰 𑐎𑐬𑑂𑐩𑐔𑐵𑐬𑐷𑐫𑐵 𑐣𑐵𑑄 ‘𑐜𑐵𑐚𑐵 𑐂𑐣𑑂𑐚𑑂𑐬𑐷’ 𑐰 ‘𑐦𑐾𑐳 𑐬𑐶𑐜𑐶𑐒’ 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋

𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐐𑐸 𑐟𑐠𑑂𑐫𑐵𑐒𑑂𑐎 𑐥𑑂𑐬𑐰𑐶𑐲𑑂𑐚 𑐫𑐵𑐎𑐾𑐐𑐸 𑐰 𑐦𑐾𑐳 𑐬𑐶𑐜𑐶𑐒 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐣𑐶𑐩𑐶𑐟𑑂𑐟 𑐥𑑂𑐬𑐩𑐸𑐏 𑐎𑐾𑐱𑐰𑐥𑑂𑐬𑐳𑐵𑐡 𑐖𑑂𑐘𑐰𑐵𑐮𑐷𑑄 𑐢𑐫𑐵𑐡𑐶𑐮 𑑋

𑐄𑐐𑐸 𑐥𑑂𑐬𑐞𑐵𑐮𑐷𑐫𑐵 𑐣𑐶𑑄𑐟𑐶𑑄 𑐫𑐾𑑃𑐩𑐥𑐵𑐫𑐵 𑐁𑐣𑑂𑐟𑐬𑐶𑐎 𑐖𑐣𑐱𑐎𑑂𑐟𑐶𑑄 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐠𑐸𑐎𑐶𑑄, 𑐫𑐾𑑃𑐩𑐥𑐵𑐫𑐵 𑐥𑑂𑐬𑐞𑐵𑐮𑐷 𑐰𑐶𑐎𑐵𑐳𑐫𑑂 𑐎𑐟𑑅𑐥𑐶𑑄𑐟 𑐣𑐶𑐬𑑂𑐨𑐬 𑐖𑐸𑐂 𑐩𑑂𑐰𑐵𑐫𑐾𑐎𑐷𑐐𑐸 𑐡𑐸 𑑋 𑐥𑑂𑐬𑐞𑐵𑐮𑐷 𑐰𑐶𑐎𑐵𑐳𑐮𑐶𑐥𑐵 𑐧𑑂𑐰𑐣𑐾𑐎𑐸𑐠𑐶𑐫𑐵 𑐮𑐾𑐏𑐵 𑐰 𑐥𑑂𑐬𑐱𑐵𑐳𑐣𑐫𑑂 𑐖𑑂𑐫𑐵 𑐫𑐵𑐂𑐥𑐶𑑄 𑐎𑐬𑑂𑐩𑐔𑐵𑐬𑐷𑐥𑐶𑑄𑐟 𑐴𑐵𑐖𑐶𑐬𑐷 𑐥𑑂𑐬𑐞𑐵𑐮𑐷 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐟𑐵𑐮𑐶𑐩 𑐧𑑂𑐫𑐹𑐐𑐸 𑐡𑐸 𑑋 𑐟𑐵𑐮𑐶𑐩𑐥𑐵𑐏𑐾𑑄 𑐜𑐵𑐚𑐵 𑐂𑐣𑑂𑐚𑑂𑐬𑐷 𑐫𑐵𑐫𑐾𑐐𑐸, 𑐀𑐡𑑂𑐫𑐵𑐰𑐢𑐶𑐎 𑐫𑐵𑐫𑐾𑐐𑐸, 𑐥𑑂𑐬𑐟𑐶𑐰𑐾𑐡𑐣 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐧𑑂𑐰𑐣𑐾𑐎𑐸𑐠𑐶𑐂 𑐴𑐾 𑐔𑑂𑐰𑐣𑐵 𑐫𑐵𑐫𑐾𑐖𑐶 𑑋 𑐀𑐠𑐾 𑐏𑑅𑐳𑐵𑑄, 𑐠𑐸𑐎𑐶𑐫𑐵 𑐬𑐶𑐫𑐮 𑐚𑐵𑐂𑐩 𑐳𑐸𑐔𑑄 𑐫𑐾𑑃𑐩𑐥𑐵𑐫𑐵 𑐎𑐾𑐣𑑂𑐡𑑂𑐬𑐷𑐫 𑐥𑑂𑐬𑐞𑐵𑐮𑐷𑐥𑐵𑐏𑐾𑑄 𑐣𑐶𑐐𑐬𑐵𑐣𑐷 𑐫𑐵𑐫𑐾 𑐦𑐂𑐐𑐸 𑐡𑐸 𑑋 𑐳𑐸𑐔𑑄 𑐥𑑂𑐬𑐰𑐶𑐢𑐶 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐀𑐣𑐶𑐬𑐸𑐡𑑂𑐬 𑐣𑐾𑐥𑐵𑐮 𑐢𑐫𑐵𑐡𑐷, “𑐫𑐾𑑃𑐩𑐥𑐵𑐫𑐵 𑐠𑑅𑐐𑐸 𑐴𑐾 𑐥𑑂𑐬𑐞𑐵𑐮𑐷 𑐰𑐶𑐎𑐵𑐳 𑐖𑐹𑐐𑐸 𑐟𑑅𑐢𑑄𑐐𑐸 𑐄𑐥𑐮𑐧𑑂𑐢𑐶 𑐏𑑅 𑑋 𑐁𑑅 𑐳𑐾𑐰𑐵𑐫𑐵 𑐣𑐶𑑄𑐟𑐶𑑄 𑐥𑐬𑐵𑐩𑐬𑑂𑐱 𑐡𑐵𑐟𑐵𑐫𑐵 𑐨𑑅 𑐔𑑂𑐰𑐣𑐾 𑐩𑐵𑐮𑐷𑐐𑐸 𑐩𑐏𑐸𑐟 𑑋”

𑐥𑑂𑐬𑐞𑐵𑐮𑐷𑐂 𑐟𑐠𑑂𑐫𑐵𑐒𑑂𑐎 𑐥𑑂𑐬𑐰𑐶𑐲𑑂𑐚 𑐫𑐵𑐫𑐾𑐢𑐸𑑄𑐎𑐵𑑅 𑐳𑐧–𑐣𑐾𑐱𑐣𑐮 𑐚𑑂𑐬𑐾𑐖𑐬𑐷 𑐬𑐾𑐐𑐸𑐮𑐵𑐚𑑀𑐬𑐷 𑐊𑐥𑑂𑐮𑐶𑐎𑐾𑐳𑐣 (𑐳𑐹𑐟𑑂𑐬)𑐫𑑂 𑐳𑑂𑐰𑐵𑐫𑐾𑐐𑐸 𑐫𑑀𑐖𑐣𑐵 𑐡𑐹𑐐𑐸 𑐳𑐸𑐔𑑄 𑐥𑑂𑐬𑐰𑐶𑐢𑐶 𑐀𑐢𑐶𑐎𑐺𑐟 𑐂𑐘𑑂𑐖𑐶𑐣𑐶𑐫𑐬 𑐩𑐵𑐢𑐰 𑐏𑐣𑐵𑐮𑑄 𑐢𑐫𑐵𑐡𑐶𑐮 𑑋

𑐠𑑂𑐰 𑐥𑑂𑐬𑐞𑐵𑐮𑐷 𑐰𑑂𑐫𑐎𑑂𑐟𑐶𑐐𑐟 𑐥𑑂𑐬𑑀𑐦𑐵𑐂𑐮 𑐣𑐵𑐥𑑄 𑐖𑐹𑐰𑐣𑐶 𑑋 𑐐𑐸𑐎𑐷 𑐰𑐶𑐡𑑂𑐫𑐵𑐬𑑂𑐠𑐷𑑄 𑐠𑑅𑐐𑐸 𑐰𑐶𑐰𑐬𑐞 𑐠𑑅𑐩𑑂𑐴𑐾𑐳𑑂𑐫𑐵𑑄 𑐴𑐾 𑐳𑑂𑐰𑐫𑐾𑐦𑐂 𑑋 𑐠𑐸𑐎𑐶𑐫𑐵𑐟 𑐰𑐶𑐎𑐵𑐳 𑐫𑐵𑐣𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐐𑐫𑐮 𑐖𑐹𑐐𑐸 𑐳𑐸𑐔𑑄 𑐀𑐨𑐶𑐨𑐵𑐰𑐎𑐫𑐵𑐟 𑐕𑑂𑐰𑐫𑐾𑐐𑐸 𑐎𑐠𑑄 𑐡𑐫𑐾𑐎𑐾𑐐𑐸 𑐫𑐾𑑃𑐩𑐥𑐵𑑄 𑐢𑐵𑑅𑐐𑐸 𑐡𑐸 𑑋