𑐫𑐮 𑑑𑑖 𑐰𑐜𑐵𑐫𑐵 𑐩𑑂𑐴𑐳𑐷𑐎𑐵 𑐳𑐦𑐹

𑐫𑐮 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑖 𑐰𑐜𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐮𑑂𑐫𑐵𑐏𑑄 𑐣𑐶𑐐𑐹 𑐳𑐦𑐹 𑐥𑐶𑐡𑑄𑐐𑐸 𑐡𑐸 𑑋 𑐫𑐮 𑐩𑐴𑐵𑐣𑐐𑐬𑐫𑑂 𑐎𑐮𑐵𑐎𑐺𑐟𑐶𑑄 𑐖𑐵𑐫𑐵𑐔𑑂𑐰𑑄𑐐𑐸 𑑑𑑖 𑐰𑐜𑐵𑐫𑐵 𑐥𑑂𑐬𑑀𑐦𑐵𑐂𑐮 𑐰 𑐰𑐜𑐵 𑐩𑑂𑐴𑐳𑐷𑐎𑐵 (𑐰𑐜𑐵 𑐔𑐶𑐣𑐵𑐬𑐷) 𑐣𑐵𑑄𑐫𑐵 𑐣𑐶𑐐𑐹 𑐳𑐦𑐹 𑐥𑐶𑐡𑑄𑐐𑐸 𑐏𑑅 𑑋

𑐠𑐸𑐥𑐶𑑄 𑐣𑐶𑐐𑐸𑐮𑐶𑑄 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑑑𑑖 𑐰𑐜𑐵𑐫𑐵 𑐳𑐮𑑂𑐮𑐵𑐴𑐎𑐵𑐬 𑐐𑐩𑑂𑐨𑐶𑐬𑐮𑐵𑐮 𑐬𑐵𑐖𑐨𑐞𑑂𑐜𑐵𑐬𑐷𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑑑𑑖 𑐰𑐜𑐵 𑐖𑑂𑐫𑐵𑐎𑐸𑐠𑐶𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷 𑐎𑐠𑑄 𑐳𑑂𑐠𑐵𑐣𑐷𑐫 𑐳𑐐𑐸𑐣 𑐢𑐵𑐏𑑂𑐰𑐵𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐐𑐛𑐣 𑐫𑐵𑐣𑐵𑐟𑑅𑐐𑐸 𑐎𑐩𑐶𑐚𑐷𑑄 𑐰𑑄𑐐𑐸 𑐣𑐶𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐰𑐜𑐵𑐫𑐵 𑐥𑑂𑐬𑐟𑑂𑐫𑐾𑐎 𑐕𑐾𑑃𑐏𑐵𑐥𑐟𑐶𑐎𑑄 𑐰𑐣𑐵𑑅 𑐰𑐜𑐵 𑐥𑑂𑐬𑑀𑐦𑐵𑐂𑐮 𑐟𑐫𑐵𑐬 𑐫𑐵𑐣𑐵𑐡𑐷𑐐𑐸 𑐏𑑅𑐳𑑄𑐫𑑀𑐖𑐎 𑐢𑐵𑐏𑑂𑐰𑐵𑑄 𑐰𑐶𑐣𑐫 𑐢𑐵𑐏𑑂𑐰𑐵, 𑐳𑐵𑐎𑑂𑐲𑐷 𑐬𑐵𑐖𑐨𑐞𑑂𑐜𑐵𑐬𑐷𑐳𑐴𑐶𑐟 𑑒𑑐𑐩𑑂𑐴𑐾𑐳𑐶𑐫𑐵 𑐥𑐸𑐔𑐮𑑄 𑐳𑑂𑐠𑐮𑐐𑐟 𑐬𑐸𑐥𑑄 𑐟𑐠𑑂𑐫𑐵𑑄𑐎 𑐳𑑄𑐎𑐮𑐣 𑐫𑐵𑐣𑐵𑑅 𑐥𑑂𑐬𑑀𑐦𑐵𑐂𑐮 𑐟𑐫𑐵𑐬 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷 𑐰 𑐩𑐾𑐩𑐾𑐐𑐸 𑐳𑐩𑐳𑑂𑐫𑐵𑐫𑐵 𑐡𑐠𑐸𑐂 𑐣𑑄 𑐠𑑅𑐥𑐶𑑄𑐳𑑄 𑐰𑐜𑐵 𑐥𑑂𑐬𑑀𑐦𑐵𑐂𑐮 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃𑐫𑑂 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐀𑐠𑐾 𑐴𑐾 𑐰𑐜𑐵𑐫𑐵 𑐩𑑂𑐴𑐳𑐷𑐎𑐵 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐰𑐜𑐵 𑐩𑑂𑐴𑐳𑐷𑐎𑐵 𑐳𑐦𑐹 𑐬𑐰𑐶𑐣𑑂𑐡𑑂𑐬 𑐱𑐵𑐎𑑂𑐫𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐡𑐸𑐐𑐸 𑐎𑐩𑐶𑐚𑐷𑑄 𑐟𑐫𑐵𑐬 𑐫𑐵𑑅𑐐𑐸 𑐏𑑅 𑑋 𑐳𑐵𑑄𑐳𑑂𑐎𑐺𑐟𑐶𑐎 𑐡𑐺𑐲𑑂𑐚𑐶𑐎𑑀𑐞𑑄 𑐫𑐮 𑐣𑐐𑐬𑐫𑐵 𑐴𑐾 𑐩𑐴𑐟𑑂𑐰𑐥𑐹𑐬𑑂𑐞 𑐰𑐜𑐵𑐎𑐠𑑄 𑐎𑐫𑐵𑐟𑑅𑐐𑐸 𑑑𑑖 𑐰𑐜𑐵 𑐩𑑂𑐴𑐳𑐷𑐎𑐵𑐫𑐵 𑐳𑐦𑐹 𑐳𑐸𑐣𑐶𑐮 𑐩𑐴𑐬𑑂𑐖𑐣𑑄 𑐳𑐩𑑂𑐥𑐵𑐡𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑑒𑑐𑑐 𑐥𑐺𑐲𑑂𑐛𑐫𑐵 𑐳𑐦𑐹𑐫𑐵 𑐎𑑂𑐫𑐹 𑐐𑑂𑐬𑐵𑐦𑐶𑐎𑑂𑐳 𑐨𑐹𑐲𑐞 𑐎𑐥𑐵𑐮𑐷𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐫𑐮 𑐩𑐴𑐵𑐣𑐐𑐬 𑐄𑐥𑐥𑑂𑐬𑐩𑐸𑐏 𑐐𑐷𑐟𑐵 𑐳𑐟𑑂𑐫𑐵𑐮𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐜𑐵𑐀𑐢𑑂𑐫𑐎𑑂𑐲 𑐣𑐶𑐬𑑂𑐩𑐮𑐬𑐟𑑂𑐣 𑐱𑐵𑐎𑑂𑐫𑑄 𑐰𑐜𑐵 𑐥𑑂𑐬𑑀𑐦𑐵𑐂𑐮 𑐰 𑐩𑑂𑐴𑐳𑐷𑐎𑐵 𑐳𑐦𑐹 𑐟𑐫𑐵𑐬 𑐫𑐵𑐫𑐾𑐟 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐥𑐶𑑄𑐟 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋

𑐳𑐦𑐸𑐟𑐶𑐂 𑐖𑐣𑐥𑑂𑐬𑐟𑐶𑐣𑐶𑐢𑐶𑐫𑐵 𑐩𑑂𑐴𑐳𑐷𑐎𑐵, 𑐰𑐜𑐵𑐫𑐵 𑐩𑑂𑐴𑐳𑐷𑐎𑐵, 𑐰𑐜𑐵 𑐡𑐸𑐣𑐾𑐫𑐵 𑐦𑐮𑑂𑐔𑐵, 𑐳𑐟𑑅, 𑐥𑐬𑑂𑐫𑐚𑐎𑐷𑐫 𑐮𑐵𑐐𑐵, 𑐀𑐩𑐹𑐬𑑂𑐟 𑐳𑐩𑑂𑐥𑐡𑐵, 𑐧𑐴𑐵𑑅𑐧𑐴𑐷, 𑐮𑑅𑐫𑐵 𑐳𑑂𑐬𑑀𑐟, 𑐰𑐜𑐵𑐫𑐵 𑐐𑐟𑐶𑐰𑐶𑐢𑐶 𑐁𑐡𑐶 𑐰𑐶𑐲𑐫 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋