𑐫𑐮 𑐮𑐵𑐫𑑂𑐎𑐸𑐮𑐶𑐂 𑐳𑐶𑐮𑐸 𑐦𑐾𑐳𑑂𑐚𑐶𑐨𑐮

𑐣𑐾𑐰𑐵𑑅 𑐧𑑁𑐡𑑂𑐢 𑐢𑐬𑑂𑐩𑐵𑐰𑐮𑐩𑑂𑐧𑐶𑐟𑐫𑑂 𑐟𑑅𑐖𑐶𑐐𑐸 𑐐𑐸𑑄𑐮𑐵 𑐥𑐬𑑂𑐰 𑐰 𑐠𑑂𑐰 𑐴𑐾 𑐐𑐸𑑄𑐮𑐵𑐫𑐵 𑐂𑐮𑐫𑑂 𑐩𑐾𑐮𑐵 𑐖𑐸𑐂𑐐𑐸 𑐕𑐐𑐹 𑐢𑐵𑐬𑑂𑐩𑐶𑐎 𑐥𑐬𑑂𑐫𑐚𑐎𑐷𑐫 𑐳𑑂𑐠𑐮 𑐳𑐶𑐮𑐸 𑐏𑑅 𑑋 𑐣𑐾𑐥𑐵𑐮 𑐳𑑄𑐰𑐟𑑂𑐎𑐠𑑄 𑐗𑐶𑐐𑐹𑐐𑐸 𑐮𑐵 𑐐𑐸𑑄𑐮𑐵 𑐰 𑐳𑐶𑐮𑐸 𑐟𑐷𑐬𑑂𑐠 𑐣𑐵𑐥 𑐳𑑂𑐰𑐵𑐎𑐵𑑅 𑐥𑑂𑐬𑑀𑐖𑐾𑐎𑑂𑐚 𑐧𑐵𑐖𑐵 𑐣𑐾𑐥𑐵𑐮𑑄 𑐕𑐐𑐹 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑐮 𑑋 𑐄𑐐𑐸 𑐳𑑄𑐳𑑂𑐠𑐵𑑄 ‘𑐳𑐶𑐮𑐸 𑐦𑐾𑐳𑑂𑐚𑐶𑐨𑐮 𑐂𑐣 𑐡𑐬𑐰𑐵𑐬’𑐫𑐵 𑐣𑐵𑐩𑑄 𑐄𑐐𑐸 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋

𑐐𑐸𑑄𑐮𑐵 𑐥𑐬𑑂𑐰𑐫𑐵 𑐂𑐮𑐫𑑂 𑐮𑐵𑐎𑐵𑑅 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐥𑐬𑐩𑑂𑐥𑐬𑐵𑐐𑐟 𑐳𑐵𑑄𑐐𑐷𑐟𑐶𑐎 𑐧𑐵𑐖𑑄𑐫𑐵 𑐥𑑂𑐬𑐳𑑂𑐟𑐸𑐟𑐶 𑐖𑑂𑐫𑐵𑐗𑑂𑐰𑐮𑐫𑑂 𑐡𑐸𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐱𑐸𑐬𑐸 𑐢𑐵𑑅𑐳𑐵 𑐧𑑁𑐡𑑂𑐢 𑐮𑐶𑐮𑐵 𑐥𑑂𑐫𑐵𑐏𑑄𑐥𑐵𑐏𑐾𑑄 𑐖𑐸𑐮 𑑋 𑐫𑐮 𑐮𑐵𑐫𑑂𑐎𑐹𑐳𑑂𑐠𑐶𑐟 𑐣𑐵𑐳𑑅 𑐔𑐸𑐎𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐴𑑂𑐫𑐧𑑂𑐰𑑅𑐐𑐸 𑐧𑑁𑐡𑑂𑐢 𑐮𑐶𑐮𑐵 𑐥𑑂𑐫𑐵𑐏𑑄 𑐰𑐶𑐱𑑂𑐰𑐫𑑂 𑑓𑑘𑑐 𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐠𑑁𑑄𑐟𑐎 𑐣𑑄 𑐎𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐵𑐚𑑂𑐫 𑐥𑐬𑐩𑑂𑐥𑐬𑐵 𑐢𑐎𑐵𑑅 𑐟𑐎𑑄 𑐡𑐵𑐰𑐷 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐎𑐵𑐟𑑂𑐟𑐶 𑐥𑑂𑐫𑐵𑐏𑐣𑐫𑑂 𑐎𑑂𑐫𑐣𑐷𑐐𑐹 𑐕𑐐𑐹 𑐡𑐸𑐬𑑂𑐮𑐨 𑐥𑑂𑐫𑐵𑐏𑑄 𑐏𑑅 𑑋

𑐐𑐸𑐐𑐸𑑄 𑐂𑐮𑐫𑑂 𑐡𑑃𑐫𑑂𑐡𑐳𑑄 𑐎𑐵𑐟𑑂𑐟𑐶𑐎 𑐩𑐴𑐶𑐣𑐵𑐫𑑂 𑐮𑐕𑐶𑐫𑑄𑐎𑑄 𑐎𑑂𑐫𑐣𑐷𑐐𑐸 𑐠𑑂𑐰 𑐎𑐵𑐟𑑂𑐟𑐶 𑐥𑑂𑐫𑐵𑐏𑑄 𑐠𑐷𑐠𑐷 𑐥𑐬𑐶𑐳𑑂𑐠𑐶𑐟𑐶𑐫𑐵 𑐎𑐵𑐬𑐞𑑄 𑐕𑐰𑐵𑑅𑐖𑐎 𑐎𑑂𑐫𑐣𑐾𑐐𑐸𑐮𑐶𑐂 𑐟𑐎𑑄 𑐳𑐷𑐩𑐶𑐟 𑐖𑐹𑐐𑐸 𑐏𑑅𑐳𑐵 𑐠𑑁𑑄𑐫𑐵 𑐂𑐮𑐫𑑂 𑐟𑐎 𑐠𑑂𑐫𑑄𑐐𑐸 𑐀𑐰𑐳𑑂𑐠𑐵𑐫𑑂 𑐁𑑅 𑐗𑐶𑑄𑐣𑐶𑐣𑑂𑐴𑐸𑐟𑐎 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐟𑐶𑐠𑐶𑐎𑐠𑑄 𑐔𑐟𑐸𑐬𑑂𑐡𑐱𑐷 𑐰𑐵 𑐥𑐸𑐣𑑂𑐴𑐶 𑐣𑐶𑐣𑑂𑐴𑐸 𑐮𑐵𑐟 𑐢𑐵𑑅𑐳𑐵 𑐖𑐎 𑐠𑑂𑐰 𑐥𑑂𑐫𑐵𑐏𑑄 𑐎𑐵𑐟𑑂𑐟𑐶 𑐥𑑂𑐫𑐵𑐏𑐣𑐫𑑂 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐎𑐵𑐟𑑂𑐟𑐶 𑐥𑑂𑐫𑐵𑐏𑑄 𑐳𑑄𑐬𑐎𑑂𑐲𑐞 𑐳𑐩𑐶𑐟𑐶𑐫𑐵 𑐥𑑂𑐬𑐟𑐵𑐥𑐢𑐬 𑐱𑐬𑑂𑐩𑐵 𑐰 𑐳𑐸𑐬𑐾𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐏𑐶𑑄 𑐧𑐵𑐖𑐣𑐫𑑂 𑐄𑐟𑑂𑐟𑐩𑐬𑐟𑑂𑐣 𑐱𑐵𑐎𑑂𑐫, 𑐳𑐸𑐥𑑂𑐬𑐶𑐣 𑐱𑐵𑐎𑑂𑐫, 𑐥𑐹𑐖𑐣 𑐱𑑂𑐬𑐾𑐲𑑂𑐛, 𑐬𑐶𑐖𑐣 𑐩𑐴𑐬𑑂𑐖𑐣, 𑐎𑑀𑐱𑐶𑐱 𑐟𑐵𑐩𑑂𑐬𑐵𑐎𑐵𑐬𑑄 𑐳𑐶𑐮𑐸 𑐦𑐾𑐳𑑂𑐚𑐶𑐨𑐮 𑐂𑐣 𑐡𑐬𑐰𑐵𑐬 𑐣𑐵𑑄𑐫𑐵 𑐄𑐐𑐸 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐮𑐸𑐨𑐸𑐳𑑂𑐠𑐶𑐟 𑐩𑐴𑐵𑐮𑐎𑑂𑐲𑑂𑐩𑐷 𑐢𑐵𑑅 𑐡𑐵𑐦𑐵 𑐏𑐮𑑅𑐫𑐵 𑐰𑐶𑐥𑐸 𑐱𑑂𑐬𑐾𑐲𑑂𑐛, 𑐫𑐸𑐖𑐾𑐱 𑐱𑑂𑐬𑐾𑐲𑑂𑐛, 𑐳𑐸𑐣𑐶𑐮 𑐱𑑂𑐬𑐾𑐲𑑂𑐛, 𑐥𑑂𑐬𑐱𑐣𑑂𑐣 𑐱𑑂𑐬𑐾𑐲𑑂𑐛, 𑐀𑐨𑐶𑐲𑐾𑐎 𑐱𑑂𑐬𑐾𑐲𑑂𑐛, 𑐳𑐣𑐶𑐲 𑐱𑑂𑐬𑐾𑐲𑑂𑐛 𑐰 𑐬𑑀𑐖𑐾𑐱 𑐱𑑂𑐬𑐾𑐲𑑂𑐛𑑄 𑐐𑐵𑐫𑐣𑐫𑑂 𑐳𑐵𑐠 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐳𑐵𑑄𑐐𑐷𑐟𑐶𑐎 𑐥𑐬𑐩𑑂𑐥𑐬𑐵𑐫𑐵 𑐏𑑀𑐖𑐷 𑐀𑐮𑐾 𑐟𑑂𑐰𑐵𑑅 𑐟𑑂𑐰𑐵𑐮𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐠𑐖𑑂𑐫𑐵𑑅𑐐𑐸 𑐥𑐬𑐩𑑂𑐥𑐬𑐵𑐫𑐵𑐟 𑐠𑐸𑐎𑐠𑑄 𑐖𑐸𑐂𑐐𑐸 𑐠𑐷𑐠𑐷 𑐎𑐠𑑄𑐫𑐵 𑐳𑐵𑑄𑐐𑐷𑐟𑐶𑐎 𑐰 𑐩𑐾𑐩𑐾𑐐𑐸 𑐡𑐧𑐸𑐮𑐶𑐂 𑐣𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐮𑑂𑐫𑐵𑐏𑑄 𑐠𑐸𑐐𑐸 𑐡𑑃𑐫𑑂 𑐥𑑂𑐬𑑀𑐖𑐾𑐎𑑂𑐚 𑐧𑐵𑐖𑐵 𑐣𑐾𑐥𑐵𑐮𑑄 𑐠𑐸𑐐𑐸𑐳𑐷 𑐔𑑂𑐰𑐧𑐸 𑐐𑐵𑑅𑐴𑐶𑐟𑐶 𑐴𑐬𑐶𑐨𑐖𑐣 𑐡𑐵𑐦𑐵 𑐏𑐮𑑅𑐫𑐵𑐟 𑐣𑑄 𑐧𑑂𑐰𑐣𑐵𑑅 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋 𑑑𑑔 𑐡𑑃 𑐡𑐸𑐥𑐶𑑄 𑐣𑐔𑑂𑐔𑐵 𑐮𑑂𑐫𑐵𑐫𑑂𑐩𑑂𑐴 𑐣𑐶𑐳𑐾𑑄 𑐎𑐫𑐵𑑅 𑑙𑑕 𑐟𑐎 𑐡𑐸𑐥𑐶𑑄 𑐖𑑂𑐫𑐵𑐠𑐥𑐶𑑄 𑐟𑐎𑐫𑐵 𑐩𑑂𑐫𑐾𑑃 𑐴𑐵𑐮𑐵𑐩𑐶, 𑐰𑐵𑐡𑑂𑐫𑐰𑐵𑐡𑐎 𑐡𑐸𑐠𑑂𑐫𑐵𑑅𑐐𑐸 𑐄𑐐𑐸 𑐡𑐵𑐦𑐵 𑐏𑐮𑐎𑑄 𑐮𑐮𑐶𑐟, 𑐣𑐾𑐥𑐵𑐮 𑐳𑐩𑐸𑐡 𑐰 𑐳𑐧 𑐩𑐵𑐃 𑐡𑐵𑐦𑐵 𑐨𑐖𑐣𑐫𑐵 𑐥𑑂𑐬𑐳𑑂𑐟𑐸𑐟𑐶 𑐧𑐶𑐄𑐐𑐸 𑐏𑑅 𑑋

𑐡𑐶𑐣𑐾𑐱 𑐩𑐴𑐬𑑂𑐖𑐣𑐫𑐵 𑐣𑐾𑐟𑐺𑐟𑑂𑐰𑐫𑑂 𑐁𑐖𑐸 𑐎𑐵𑐣𑑂𑐕𑐵 𑐩𑐴𑐬𑑂𑐖𑐣, 𑐩𑑂𑐫𑐾𑑃 𑐐𑐸𑐬𑐸 𑐳𑐵𑐣𑐸𑐎𑐵𑐖𑐷 𑐩𑐴𑐬𑑂𑐖𑐣, 𑐡𑐵𑐦𑐵 𑐐𑐸𑐬𑐸 𑐧𑐾𑐏𑐵𑐮𑐵𑐮 𑐩𑐴𑐬𑑂𑐖𑐣, 𑐣𑐵𑐩𑐳𑑄𑐐𑐷𑐟𑐶 𑐐𑐸𑐬𑐸 𑐧𑐵𑐧𑐸𑐎𑐵𑐖𑐷 𑐩𑐴𑐬𑑂𑐖𑐣𑐮𑐶𑐳𑐾𑑄 𑐳𑐴𑐵𑐫𑐎 𑐐𑐸𑐬𑐸𑐥𑐶𑑄 𑐡𑐱𑐬𑐠𑐮𑐵𑐮 𑐩𑐴𑐬𑑂𑐖𑐣, 𑐐𑑁𑐟𑐩 𑐩𑐴𑐬𑑂𑐖𑐣, 𑐣𑐵𑐬𑐵𑐫𑐞 𑐩𑐴𑐬𑑂𑐖𑐣, 𑐧𑐵𑐧𑐸𑐬𑐵𑐖𑐵 𑐩𑐴𑐬𑑂𑐖𑐣, 𑐟𑑂𑐬𑐶𑐬𑐟𑑂𑐣 𑐩𑐴𑐬𑑂𑐖𑐣, 𑐳𑐵𑐣𑐸 𑐩𑐴𑐬𑑂𑐖𑐣, 𑐬𑐟𑑂𑐣 𑐩𑐴𑐬𑑂𑐖𑐣, 𑐰𑐶𑐖𑐫 𑐩𑐴𑐬𑑂𑐖𑐣, 𑐩𑐢𑐸𑐬 𑐩𑐴𑐬𑑂𑐖𑐣, 𑐔𑐣𑑂𑐡𑑂𑐬𑐮𑐵𑐮 𑐩𑐴𑐬𑑂𑐖𑐣 𑐮𑐐𑐵𑐫𑐟𑑄 𑐡𑐵𑐦𑐵 𑐩𑑂𑐫𑐾𑑃 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐰𑐫𑑂𑐎𑑅𑐥𑐶𑑄𑐟 𑐀𑐧𑐶𑐖 𑐩𑐴𑐬𑑂𑐖𑐣, 𑐊𑐣𑑂𑐖𑐾𑐮 𑐩𑐖𑐬𑑂𑐴𑐣, 𑐁𑐨𑐵𑐲 𑐩𑐴𑐬𑑂𑐖𑐣 𑐮𑐐𑐵𑐫𑐟𑐫𑐵 𑐥𑐸𑐔𑐮𑑄 𑐰𑐵𑐡𑑂𑐫𑐰𑐵𑐡𑐣𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑑂𑐬𑑀𑐖𑐾𑐎𑑂𑐚 𑐧𑐵𑐖𑐵 𑐣𑐾𑐥𑐵𑐮𑑄 𑐐𑐸𑐬𑐸 𑐳𑐸𑐬𑐾𑐱𑐬𑐵𑐖 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐰𑐵𑐡𑑂𑐫 𑐳𑑄𑐫𑑀𑐖𑐣𑐫𑑂 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐰 𑐥𑑂𑐬𑐟𑑂𑐫𑐾𑐎 𑐧𑑁𑐡𑑂𑐢 𑐡𑐾𑐐𑑅, 𑐔𑐿𑐟𑑂𑐫𑐫𑑂 𑐠𑐵𑐂𑐐𑐸 𑐰 𑐴𑐵𑐮𑐷𑐐𑐸 𑐩𑑂𑐫𑐾𑑃 𑐨𑐐𑐰𑐵𑐣 𑐐𑑂𑐰𑐵𑐴𑐵𑐬𑐫𑐵 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐔𑐵𑐮 𑐥𑐘𑑂𑐔𑐩 𑐀𑐬𑑂𑐠𑐵𑐟 𑐣𑑂𑐫𑐵𑐐𑐹 𑐟𑐵𑐮 𑐔𑑂𑐰𑑅, 𑐥𑐮𑐾𑐩𑐵𑑄, 𑐀𑐳𑑂𑐟𑐬𑐵, 𑐖𑐟𑐶 𑐰 𑐥𑑂𑐬𑐟𑐵𑐮𑐫𑑂 𑐠𑐵𑐂𑐐𑐸 𑐨𑐐𑐰𑐵𑐣 𑐐𑑂𑐰𑐵𑐴𑐵𑐬 𑐬𑐵𑐐 𑐳𑐵𑐬𑑄𑐐𑐫𑑂 𑐁𑐢𑐵𑐬𑐶𑐟 𑐏𑑅 𑑋

𑐳𑐬𑑀𑐡𑐰𑐵𑐡𑐣𑐫𑑂 𑐳𑐸𑐬𑐾𑐱𑐬𑐵𑐖 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐦𑐶𑐬𑑀𑐖 𑐰𑐖𑑂𑐬𑐵𑐔𑐵𑐬𑑂𑐫, 𑐨𑑂𑐰𑐵𑐂𑐮𑐶𑐣𑐫𑑂 𑐩𑐶𑐮𑐣 𑐟𑐞𑑂𑐜𑐸𑐎𑐵𑐬, 𑐟𑐵𑐮𑐰𑐵𑐡𑐣𑐫𑑂 𑐮𑐎𑑂𑐲𑑂𑐩𑐷𑐥𑑂𑐬𑐳𑐵𑐡 𑐜𑑄𑐐𑑀𑐮, 𑐰𑐶𑐥𑐸 𑐱𑑂𑐬𑐾𑐲𑑂𑐛, 𑐟𑐵𑑅, 𑐨𑐸𑐳𑑂𑐫𑐵𑑅, 𑐕𑐸𑐳𑑂𑐫𑐵𑑅 𑐰 𑐂𑐦𑐾𑐎𑑂𑐚𑐫𑑂 𑐳𑐖𑐶𑐲 𑐱𑑂𑐬𑐾𑐲𑑂𑐛, 𑐬𑑀𑐖𑐾𑐱 𑐱𑑂𑐬𑐾𑐲𑑂𑐛 𑐧𑐾𑐳 𑐐𑐶𑐟𑐵𑐬𑐫𑑂 𑐨𑐹𑐥𑐾𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐐𑐶𑐟𑐵𑐬𑐫𑑂 𑐳𑐸𑐩𑐣 𑐩𑐴𑐬𑑂𑐖𑐣, 𑐧𑐵𑐳𑐸𑐬𑐶𑐂 𑐳𑑂𑐰𑐬𑑂𑐞𑐶𑐩 𑐩𑐴𑐬𑑂𑐖𑐣𑑄 𑐧𑐶𑐫𑐵𑐡𑐷𑐐𑐸 𑐨𑐐𑐰𑐵𑐣 𑐐𑑂𑐰𑐵𑐬𑐵𑐫𑐵 𑐥𑑂𑐬𑐳𑑂𑐟𑐸𑐟𑐶 𑐮𑐶𑐥𑐵 𑐖𑑂𑐘𑐵𑐣𑐩𑐵𑐮𑐵 𑐨𑐖𑐣𑐫𑑂 𑐀𑐟𑐶𑐎𑑄 𑐮𑑀𑐎𑑄𑐴𑑂𑐰𑐵𑑅𑐐𑐸 𑐩𑑂𑐫𑐾𑑃 ‘𑐖𑐫 𑐣𑐩𑑀 𑐱𑑂𑐬𑐷 𑐧𑐸𑐡𑑂𑐢 𑐨𑐐𑐰𑐵𑐣, 𑐮𑐸𑐩𑑂𑐧𑐶𑐣𑐷 𑐰𑐣𑐳 ……..’𑐫𑐵 𑐥𑑂𑐬𑐳𑑂𑐟𑐸𑐟𑐶 𑐧𑐶𑐄𑐐𑐸 𑐏𑑅 𑑋

𑐥𑑂𑐬𑑀𑐖𑐾𑐎𑑂𑐚 𑐧𑐵𑐖𑐵 𑐣𑐾𑐥𑐵𑐮𑑄 𑐣𑐾𑐰𑐵𑑅 𑐳𑐵𑑄𑐐𑐷𑐟𑐶𑐎 𑐥𑐬𑐩𑑂𑐥𑐬𑐵𑐫𑑂 𑐀𑐟𑐶𑐎𑑄 𑐮𑑀𑐎𑑄 𑐴𑑂𑐰𑐵𑑅𑐐𑐸 𑐆𑐟𑐸 𑐩𑑂𑐫𑐾𑑃 𑐀𑐣𑑂𑐟𑐬𑑂𑐐𑐟 𑐳𑐶𑐮𑐸𑐫𑐵 𑐢𑐸𑐣 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐐𑐸𑑄𑐮𑐵𑐫𑐵 𑐡𑐠𑐸𑐂 𑐐𑐸𑑄𑐥𑐸𑐣𑑂𑐴𑐶𑐫𑐵 𑐡𑐶𑐣𑐫𑑂 𑐳𑐶𑐮𑐸𑐂 𑐟𑑅𑐢𑑄𑐐𑐸 𑐩𑐾𑐮𑐵 𑐖𑐸𑐂 𑑋 𑐳𑐶𑐮𑐸 𑐟𑐷𑐬𑑂𑐠𑐫𑐵 𑐴𑐾 𑐧𑐫𑐵𑐣 𑐫𑐵𑐣𑐵𑐟𑑅𑐐𑐸 𑐠𑑂𑐰 𑐩𑑂𑐫𑐾𑑃𑐫𑑂 𑐎𑐮𑐵𑑅𑐨𑐵𑑅𑐟 𑐣𑐶𑐩𑑂𑐴 𑐟𑐶𑐥𑐹𑐫𑐵 𑐳𑐶𑐮 𑐫𑐵𑐟𑑂𑐬𑐵𑐫𑐵 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐀𑐟𑐶𑐎𑑄 𑐩𑐵𑐬𑑂𑐩𑐶𑐎 𑐧𑐵𑐏𑑄 𑐡𑐸𑐠𑑂𑐫𑐵𑑅𑐐𑐸 𑐩𑑂𑐫𑐾𑑃 𑐏𑑅 𑑋

𑐠𑐸𑐎𑐠𑑄 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑑄𑐮𑐵𑐫𑐵 𑐴𑐾 𑐂𑐮𑐫𑑂 𑐫𑐮𑐫𑑂 𑐡𑑃𑐫𑑂𑐡𑐳𑑄 𑐟𑑅𑐖𑐶𑐎 𑐣𑑂𑐫𑐵𑐫𑐾𑐎𑐷𑐐𑐸 𑐩𑐟𑐫𑐵𑑅 𑐀𑐬𑑂𑐠𑐵𑐟 𑐱𑑂𑐬𑐺𑑄𑐐𑐨𑐾𑐬𑐷 𑐖𑐵𑐟𑑂𑐬𑐵𑐫𑐵 𑐂𑐮𑐫𑑂 𑐴𑐵𑐮𑐷𑐐𑐸 𑐥𑐬𑐩𑑂𑐥𑐬𑐵𑐐𑐟 𑐩𑑂𑐫𑐾𑑃𑐫𑐵 𑐢𑐸𑐣𑐫𑐵𑐟 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐩𑐟𑐫𑐵𑑅𑐫𑐵 𑐂𑐮𑐫𑑂 𑐴𑐵𑐮𑐷𑐐𑐸 𑐩𑑂𑐫𑐾𑑃𑐫𑐵 𑐳𑐵𑑄𑐐𑐷𑐟𑐶𑐎 𑐢𑐸𑐣 𑐣𑑂𑐴𑑂𑐫𑐧𑑂𑐰𑑅𑐐𑐸 𑐂𑐮𑐫𑑂 𑐖𑑂𑐫𑐵𑐗𑑂𑐰𑑅 𑐳𑑂𑐰𑐫𑐾𑐟 𑐰𑐫𑐵𑐔𑑂𑐰𑑄𑐥𑐶𑑄 𑐳𑐎𑐮𑐾𑑄 𑐥𑑂𑐫𑐵𑐏𑑄 𑐴𑐸𑐮𑐵 𑐴𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐾𑐐𑐸 𑐥𑑂𑐬𑐳𑑂𑐟𑐸𑐟𑐶 𑐎𑐠𑑄 𑐬𑐵𑐖𑐶𑐥 𑐰𑐖𑑂𑐬𑐵𑐔𑐵𑐬𑑂𑐫𑑄 𑐱𑐵𑐣𑑂𑐟 𑐨𑐿𑐬𑐰𑐫𑐵 𑐥𑑂𑐬𑐟𑐷𑐎 𑐮𑐵𑐏𑐾 𑐥𑑂𑐫𑐵𑐏𑑄𑐫𑐵 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐰𑐶𑐱𑐾𑐲 𑐫𑐵𑐣𑐵𑑅 𑐫𑐾𑑃𑐫𑐵𑑅 𑐥𑐸𑐣𑑂𑐴𑐶𑐫𑐵 𑐂𑐮𑐫𑑂 𑐥𑐶𑐴𑐵𑑄 𑐰𑐂𑐐𑐸 𑐩𑐖𑐶𑐥𑐵𑑅 𑐮𑐵𑐏𑐾 𑐥𑑂𑐫𑐵𑐏𑐣𑑄 𑐳𑐩𑐵𑐖𑐫𑐵 𑐣𑐎𑐵𑐬𑐵𑐟𑑂𑐩𑐎 𑐱𑐎𑑂𑐟𑐶𑐫𑐵𑐟 𑐱𑐶𑐠𑐶𑐮 𑐫𑐵𑐂 𑐢𑐂𑐐𑐸 𑐰𑐶𑐱𑑂𑐰𑐵𑐳 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐟𑐣𑐵 𑐰𑐣𑐾𑐢𑐸𑑄𑐎𑐹𑐐𑐸 𑐰 𑐮𑑀𑐥𑑀𑐣𑑂𑐩𑐸𑐏 𑐧𑐵𑐖𑑄𑐫𑐵 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐄𑐡𑑂𑐡𑐾𑐱𑑂𑐫𑑄 𑐥𑑂𑐬𑑀𑐖𑐾𑐎𑑂𑐚 𑐧𑐵𑐖𑐵 𑐣𑐾𑐥𑐵𑐮𑑄 𑐰𑑄𑐐𑐸 𑐕𑐸𑑄 𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐸𑐐𑐸𑐳𑐷 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑐮𑐫𑑂 𑐫𑐮 𑐩𑐣𑐥𑐵 𑑒𑑑 𑐰𑐜𑐵𑐀𑐢𑑂𑐫𑐎𑑂𑐲 𑐬𑐰𑐶𑐣𑑂𑐡𑑂𑐬 𑐩𑐴𑐬𑑂𑐖𑐣, 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐫𑐮 𑐖𑐶𑐮𑑂𑐮𑐵 𑐳𑐩𑐶𑐟𑐶𑐫𑐵 𑐳𑐨𑐵𑐥𑐟𑐶 𑐬𑐵𑐖𑐾𑐱 𑐩𑐴𑐬𑑂𑐖𑐣, 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐧𑐮 𑐣𑐾𑐥𑐵𑐮 𑐰𑐵𑐡𑑂𑐫𑐰𑐵𑐡𑐣 𑐐𑐸𑐮𑑂𑐩 𑐥𑑂𑐬𑐩𑐸𑐏 𑐣𑐵𑐥𑑄 𑐰𑐬𑐶𑐲𑑂𑐛 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐣𑐵𑐫𑐧 𑐣𑐶𑐬𑐷𑐎𑑂𑐲𑐎 𑐟𑐷𑐬𑑂𑐠 𑐝𑐸𑑄𑐐𑐾𑐮, 𑐥𑐵𑐚𑐣 𑐳𑑄𑐐𑑂𑐬𑐴𑐵𑐮𑐫𑐫𑐵 𑐳𑐸𑐬𑐾𑐱 𑐮𑐵𑐏𑐾, 𑐎𑐵𑐟𑑂𑐟𑐶 𑐥𑑂𑐫𑐵𑐏𑑄 𑐳𑑄𑐬𑐎𑑂𑐲𑐞 𑐳𑐩𑐶𑐟𑐶𑐫𑐵 𑐎𑐶𑐬𑐞 𑐔𑐶𑐟𑑂𑐬𑐎𑐵𑐬 𑐰𑐬𑐶𑐲𑑂𑐛 𑐱𑐵𑐳𑑂𑐟𑑂𑐬𑐷𑐫 𑐳𑑄𑐐𑐷𑐟𑐖𑑂𑐘 𑐥𑑂𑐬𑐨𑐸𑐬𑐵𑐖 𑐝𑐎𑐵𑐮 𑐮𑐐𑐵𑐫𑐟𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

# 𑐣𑑂𑐴𑑂𑐫𑐧𑑂𑐰𑑅𑐩𑑂𑐴 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫