𑐫𑐮 𑐀𑐢𑑂𑐫𑐫𑐣 𑐎𑐾𑐣𑑂𑐡𑑂𑐬𑐫𑐵 𑐣𑐾𑐥𑐵𑐮𑐨𑐵𑐲𑐵 𑐥𑐵𑐛𑐰𑐵𑐔𑐣 𑐖𑑂𑐫𑐵𑐗𑑂𑐰𑑅

𑐫𑐮 𑐀𑐢𑑂𑐫𑐫𑐣 𑐎𑐾𑐣𑑂𑐡𑑂𑐬𑐫𑐵 𑐐𑑂𑐰𑐳𑐵𑑅 𑐰 𑐀𑐲𑑂𑐚𑐩𑐵𑐫𑐵 𑐦𑐵𑐄𑐞𑑂𑐜𑐾𑐱𑐣𑐫𑐵 𑐐𑑂𑐰𑐵𑐴𑐵𑐮𑐶𑐂 ‘𑐣𑐾𑐥𑐵𑐮𑐨𑐵𑐲𑐵 𑐥𑐵𑐛𑐰𑐵𑐔𑐣 𑐖𑑂𑐫𑐵𑐗𑑂𑐰𑑅-𑑑𑑑𑑔𑑖’ 𑐖𑐹𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐫𑐮𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑐳𑑂𑐟𑐫𑑂𑐳𑑄 ‘𑐖𑐶𑐐𑐸 𑐧𑑂𑐰𑐣𑐾𑐎𑐸𑐠𑐶’ 𑐱𑐷𑐬𑑂𑐲𑐎𑐫𑑂 𑐣𑐾𑐰𑐵𑑅 𑐨𑐵𑐳𑑄 𑐥𑐵𑐛 𑐰𑐵𑐔𑐣 𑐫𑐵𑑅𑐐𑐸 𑐏𑑅 𑑋 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐠𑐣𑐫𑐵 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐂 𑐂𑐳𑐷𑐜𑐷 𑐟𑐐𑐶𑑄 𑐣𑐶𑐳𑐾𑑄 𑐣𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐮 𑐩𑐴𑐵𑐣𑐐𑐬𑑄 𑐠𑐣𑐫𑐵 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾 𑐎𑐸𑐠𑐶𑐂 𑐀𑐣𑐶𑐰𑐵𑐬𑑂𑐫 𑐬𑐸𑐥𑑄 𑐣𑐾𑐥𑐵𑐮𑐨𑐵𑐲𑐵 𑐮𑐵𑐐𑐸 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾 𑐎𑐸𑐠𑐶𑐂 𑐋𑐔𑑂𑐕𑐶𑐎𑐎𑐠𑑄 𑐟𑐫𑐵𑐟𑑅𑐐𑐸 𑐡𑐸 𑑋 𑐫𑐮 𑐩𑐴𑐵𑐣𑐐𑐬 𑐡𑐸𑐣𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐵 𑐰𑐫𑐵𑐔𑑂𑐰𑑄𑐐𑐸 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐧𑑂𑐰𑐣𑐵𑐩𑐶𑐟𑐫𑑂 𑐡𑐠𑐸𑐂 𑐣𑐾𑐥𑐵𑐮𑐨𑐵𑐲𑐵 𑐥𑐵𑐛𑐰𑐵𑐔𑐣 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐖𑐹𑐐𑐸 𑐏𑑅 𑑋 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐳𑑂𑐰𑐷𑐏𑐸𑐩𑑂𑐴 𑐰 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾𑐎𑐸𑐠𑐶𑐫𑐵 𑐗𑐶𑑄𑐕𑐩𑑂𑐴 𑐫𑐵𑐣𑐵𑑅 𑐥𑐷𑐣𑑂𑐴𑐫𑑂𑐩𑑂𑐴𑐾𑐳𑐶𑐣𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐧𑑂𑐰𑑃𑐩𑐶𑐟𑐫𑑂 𑐡𑐠𑐸𑐂 𑐰𑑄𑐐𑐸 𑐩𑑄𑐐𑐮𑐰𑐵𑑅 𑐫𑐮𑐫𑐵 𑐁𑐡𑐬𑑂𑐱 𑐩𑐵𑐰𑐶𑐂 𑐕𑐣𑑀𑐚 𑐔𑐬𑐞 𑐖𑐹𑐐𑐸 𑐏𑑅 𑑋

𑐕𑐣𑑀𑐚𑐫𑑂 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐗𑐶𑐩𑑂𑐴 𑐰 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐣𑐶𑐩𑑂𑐴 𑐫𑐵𑐣𑐵𑑅 𑐗𑐶𑑄𑐣𑐶𑐩𑑂𑐴𑐾𑐳𑐶𑐟 𑐦𑐵𑐂𑐣𑐮𑐫𑑂 𑐔𑐬𑐞𑐫𑑂 𑐥𑐵𑐛 𑐬𑐔𑐣𑐵 𑐫𑐵𑐎𑐹𑐐𑐸 𑐏𑑅 𑑋 𑐦𑐵𑐂𑐣𑐮 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐠𑑂𑐫𑑄𑐥𑐶𑑄𑐩𑐢𑑂𑐫𑐾 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐗𑐶𑐩𑑂𑐴𑑄 𑐧𑑂𑐰𑑃𑐩𑐶𑐥𑐶𑑄 𑐐𑐿𑐬 𑐣𑐾𑐰𑐵𑑅𑐟 𑐮𑐵𑑅𑐐𑐸 𑐏𑑅 𑑋 𑐠𑐸𑐥𑐶𑑄 𑐗𑐶𑐩𑑂𑐴𑐾 𑐳𑐶𑐣𑑄𑐟𑐳𑐎𑑄 𑐣𑑂𑐴𑑂𑐫𑐂𑐥𑐸𑐎 𑐣𑐾𑐥𑐵𑐮𑐨𑐵𑐲𑐵𑑄 𑐥𑐵𑐛 𑐬𑐔𑐣𑐵 𑐫𑐵𑐣𑐵𑑅 𑐣𑑂𑐫𑑄𑐎𑐹𑐐𑐸 𑐏𑑅 𑑋 𑐐𑐸𑐎𑐷 𑐱𑑂𑐬𑐷 𑐱𑑂𑐬𑐩𑐶𑐎 𑐧𑐵𑐮𑐰𑐶𑐖𑑂𑐘𑐵𑐣 𑐁𑐢𑐵𑐬𑐨𑐹𑐟 𑐰𑐶𑐡𑑂𑐫𑐵𑐮𑐫𑐫𑐵 𑐁𑐬𑑂𑐲𑐶𑐟 𑐝𑐸𑑄𑐐𑐾𑐮 𑐣𑑂𑐴𑐵𑐥, 𑐩𑐶𑐣𑐣𑐵𑐠 𑐁𑐡𑐬𑑂𑐱 𑐱𑐶𑐎𑑂𑐲𑐵𑐳𑐡𑐣 𑐁𑐢𑐵𑐬𑐨𑐹𑐟 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑑂𑐬𑐶𑐖𑑂𑐩𑐵 𑐮𑐵𑐩𑐵 𑐮𑐶𑐄 𑐰 𑐔𑐞𑑂𑐜𑐷 𑐁𑐡𑐬𑑂𑐱 𑐳𑐬𑐮 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐰𑐬𑑂𑐲𑐵 𑐬𑐵𑐃 𑐮𑐶𑐫𑐵𑑄𑐮𑐶𑐄 𑐮𑐵𑑅𑐐𑐸 𑐏𑑅 𑑋

𑐕𑐣𑑀𑐚 𑐔𑐬𑐞𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐎 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬, 𑐳𑑂𑐫𑐣𑐵𑐩𑐶 𑐬𑐵𑐩 𑐩𑐴𑐬𑑂𑐖𑐣 𑐰 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑐸𑐮𑐵𑑄𑐩𑑂𑐴 𑐥𑑂𑐬𑐵𑐖𑑂𑐘 𑐀𑐐𑐶𑐧 𑐧𑐣𑐾𑐥𑐵𑐮𑐷𑑄 𑐄𑐟𑑂𑐎𑐺𑐲𑑂𑐚 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐮𑑂𑐫𑐫𑐵𑐡𑐷𑐐𑐸 𑐏𑑅𑐳𑐵 𑐱𑐣𑐶𑐰𑐵𑑅 𑐀𑐱𑑀𑐎 𑐴𑐮𑐫𑑂 𑐖𑐹𑐐𑐸 𑐦𑐵𑐂𑐣𑐮 𑐔𑐬𑐞𑐫𑑂 𑐥𑐸𑐮𑐵𑑄𑐩𑑂𑐴 𑐥𑑂𑐬𑐵𑐖𑑂𑐘 𑐧𑐣𑐾𑐥𑐵𑐮𑐷𑑄 𑐣𑐶𑐬𑑂𑐞𑐵𑐫𑐎𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐐𑐸 𑐏𑑅 𑑋

𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐟𑑂𑐫𑐵𑑅𑐥𑐶𑑄 𑐰 𑐳𑐴𑐨𑐵𑐐𑐷𑐥𑐶𑑄𑐟 𑐩𑐹𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬 𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐀𑐲𑑂𑐚𑐩𑐵𑐫𑐵 𑐦𑐵𑐄𑐞𑑂𑐜𑐾𑐱𑐣𑐫𑐵 𑐧𑐵𑐧𑐸𑐬𑐵𑐖𑐵 𑐩𑐴𑐬𑑂𑐖𑐣 𑐰 𑐳𑐬𑐶𑐟𑐵 𑐩𑐴𑐬𑑂𑐖𑐣𑑄 𑐡𑐵𑑄 𑐳𑐶𑐬𑐥𑐵𑑅 𑐰 𑐄𑐥𑐴𑐵𑐬 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐄𑐟𑑂𑐎𑐺𑐲𑑂𑐚 𑐖𑐹𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐾𑐥𑐵𑐮𑐨𑐵𑐲𑐵 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎𑐵𑐥𑐶𑑄𑐟 𑐣𑑄 𑐡𑐵𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐀𑐢𑑂𑐫𑐫𑐣 𑐎𑐾𑐣𑑂𑐡𑑂𑐬𑐫𑐵 𑐣𑐵𑐫𑑅 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐩𑐹𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐠𑑁𑑄 𑐩𑐳𑑂𑐟𑐫𑑂𑐳𑑄 𑐣𑐾𑐰𑐵𑑅 𑐨𑐵𑐳𑑄 𑐣𑑂𑐰𑐰𑐵𑑅𑐐𑐸 𑐢𑐫𑐵𑐐𑐸 𑐧𑑂𑐰𑐣𑐾 𑐎𑐸𑐠𑐶𑐂 𑐳𑑂𑐠𑐵𑐣𑐷𑐫 𑐨𑐵𑐫𑑂 𑐮𑐵𑐐𑐸 𑐫𑐵𑐣𑐵𑐐𑐸𑐫𑐵 𑐧𑐵𑑄𑐮𑐵𑑅𑐐𑐸 𑐮𑐶𑐔𑑂𑐰𑑅 𑐏𑐣𑐾 𑐡𑐸𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐫𑐮 𑐩𑐴𑐵𑐣𑐐𑐬𑐫𑑂 𑐁𑑅 𑐣𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐳𑑂𑐠𑐵𑐣𑐷𑐫 𑐣𑐾𑐰𑐵𑑅 𑐨𑐵𑐫𑑂 𑐮𑐵𑐐𑐸 𑐫𑐵𑐣𑐵 𑐟𑐫𑐵𑐐𑐸 𑐖𑐹𑐳𑐵𑑄 𑐫𑐵𑐎𑐣𑑄 𑐴𑐾 𑐔𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐮𑐵𑐐𑐹 𑐫𑐵𑐫𑐾𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐰𑐶𑐱𑐾𑐲 𑐥𑐵𑐴𑐵𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐩𑐘𑑂𑐖𑐮𑐷 𑐱𑐵𑐎𑑂𑐫𑑄 𑐁𑑅 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾 𑐎𑐸𑐠𑐶𑐂 𑐖𑐎 𑐣𑐾𑐰𑐵𑑅 𑐨𑐵𑐫𑑂 𑐀𑐣𑐶𑐰𑐵𑐬𑑂𑐫 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑐂 𑐫𑐵𑐎𑐣𑑄 𑐴𑐾 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾 𑐎𑐸𑐠𑐶𑐂 𑐣𑑄 𑐀𑐣𑐶𑐰𑐵𑐬𑑂𑐫 𑐫𑐵𑐣𑐵𑐫𑑄𑐎𑐾 𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐧𑑂𑐰𑐣𑐾 𑐎𑐸𑐠𑐶𑐫𑐵 𑐩𑐳𑑂 𑐟𑐫𑑂𑐳𑑄 𑐥𑐵𑐛𑐫𑑂 𑐡𑐸𑐐𑐸 𑐩𑑂𑐫𑐾𑑃𑐫𑑂 𑐴𑐸𑐮𑐵𑐥𑑂𑐫𑐵𑐏𑑄 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋