𑐩𑑄𑐐𑐮𑐰𑐵𑑅𑐣𑐶𑐳𑐾𑑄 𑐡𑐾𑐫𑑂 𑐣𑑂𑐫𑑄𑐎𑑄 𑐳𑑂𑐎𑐹𑐮 𑐧𑐣𑑂𑐡 ! 𑐳𑑀𑐩𑐰𑐵𑑅𑐣𑐶𑐳𑐾𑑄 𑐔𑐬𑐞𑐧𑐡𑑂𑐢 𑐁𑐣𑑂𑐡𑑀𑐮𑐣𑐫𑐵 𑐑𑑀𑐲𑐞𑐵𑐐𑐸 𑐏𑑅 𑑋

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑕 𑐦𑐵𑐮𑑂𑐐𑐸𑐞 𑑑𑑙, 𑐁𑐂𑐟𑐧𑐵𑐬 𑑑𑑗:𑑔𑑘:𑑐𑑙

𑐎𑑄𑐳 𑐩𑑄𑐐𑐮𑐰𑐵𑑅𑐣𑐶𑐳𑐾𑑄 𑐁𑐣𑑂𑐡𑑀𑐮𑐣𑐬𑐟 𑐀𑐳𑑂𑐠𑐵𑐃 𑐰 𑐬𑐵𑐴𑐟 𑐱𑐶𑐎𑑂𑐲𑐎 𑐳𑑄𑐐𑐛𑐣 𑐎𑐾𑐣𑑂𑐡𑑂𑐬𑐷𑐫 𑐳𑐩𑐶𑐟𑐶𑑄 𑐡𑐾𑐫𑑂 𑐣𑑂𑐫𑑄𑐎𑑄 𑐔𑑂𑐰𑑄𑐐𑐸 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐥𑐛𑐣–𑐥𑐵𑐛𑐣 𑐧𑐣𑑂𑐡 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐫𑐸𑐰𑐵𑐀𑐰𑐳𑑂𑐠𑐵 𑐰 𑐄𑐬𑑂‍𑐖𑐵𑐰𑐵𑐣 𑐃 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐱𑐿𑐎𑑂𑐲𑐶𑐎 𑐰𑐶𑐎𑐵𑐳𑐫𑐵 𑐣𑐶𑐟𑐶𑑄 𑐃 𑐏𑐬𑑂‍𑐔 𑐫𑐵𑑅𑐐𑐸 𑐰 𑐁𑑅 𑐳𑐬𑐎𑐵𑐬𑑄 𑐏𑐵𑐮𑐶 𑐯𑐵𑑅 𑐮𑐶𑐟𑐕𑑂𑐰𑐫𑐾𑐟𑑂𑐫𑑄𑐐𑐸 𑐢𑐵𑐳𑐾𑑄 𑐀𑐳𑑂𑐠𑐵𑐃 𑐰 𑐬𑐵𑐴𑐟 𑐱𑐶𑐎𑑂𑐲𑐎 𑐁𑐣𑑂𑐡𑑀𑐮𑐣𑐬𑐟 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑅𑐥𑐶𑐣𑐶𑐐𑐸 𑐩𑐵𑐐𑐥𑑂𑐬𑐟𑐶 𑐳𑐬𑐎𑐵𑐬 𑐄𑐟𑑂𑐟𑐬𑐡𑐵𑐫𑐷 𑐩𑐖𑐹𑐐𑐸 𑐢𑐵𑐳𑐾𑑄 𑐳𑐩𑐶𑐟𑐶𑑄 𑐦𑐵𑐐𑐸𑐣 𑑒𑑑 𑐐𑐟𑐾 𑐩𑑄𑐐𑐮𑐰𑐵𑑅𑐣𑐶𑐳𑐾𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐥𑐛𑐣–𑐥𑐵𑐛𑐣 𑐧𑐣𑑂𑐡 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋 𑐮𑐶𑐳𑐾𑑄 𑐡𑐾𑐫𑑂 𑐣𑑂𑐫𑑄𑐎𑑄 𑐡𑐹𑐐𑐸 𑑔𑑐 𑐴𑐖𑐵𑐬𑐳𑐶𑐧𑐾𑑄 𑐀𑐥𑑂𑐰𑑅 𑐀𑐳𑑂𑐠𑐵𑐃 𑐰 𑐬𑐵𑐴𑐟 𑐱𑐶𑐎𑑂𑐲𑐎𑐥𑐶𑐣𑑂𑐟 𑐫𑐾𑑃𑐫𑑂 𑐳𑑅𑐟𑐵𑑅 𑐳𑑀𑐩𑐰𑐵𑑅𑐣𑐶𑐳𑐾𑑄 𑐔𑐬𑐞𑐧𑐡𑑂𑐢 𑐁𑐣𑑂𑐡𑑀𑐮𑐣 𑐫𑐵𑐫𑐾𑐐𑐸 𑐳𑐩𑐶𑐟𑐶𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐡𑐸 𑑋

𑐳𑐬𑐎𑐵𑐬𑑄 𑐠𑑅𑐥𑐶𑐣𑐶𑐐𑐸 𑐩𑐵𑐐𑐥𑑂𑐬𑐟𑐶 𑐧𑐾𑐰𑐵𑐳𑑂𑐟𑐵 𑐫𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐁𑐣𑑂𑐡𑑀𑐮𑐣𑐫𑐵𑐟 𑐀𑐗 𑐀𑐥𑑂𑐰𑑅 𑐳𑐱𑐎𑑂𑐟 𑐫𑐵𑐫𑐾𑐐𑐸 𑐀𑐳𑑂𑐠𑐵𑐃 𑐰 𑐬𑐵𑐴𑐟 𑐳𑑄𑐐𑐛𑐣 𑐎𑐾𑐣𑑂𑐡𑑂𑐬𑐷𑐫 𑐳𑐩𑐶𑐟𑐶𑑄 𑐢𑐵𑑅𑐐𑐸 𑐡𑐸 𑑋

𑐀𑐠𑐾𑐴𑐾, 𑐁𑐂𑐟𑐰𑐵𑑅 𑐧𑐵𑐣𑐾𑐱𑑂𑐰𑐬𑐫𑑂 𑐁𑐣𑑂𑐡𑑀𑐮𑐣𑐬𑐟 𑐀𑐳𑑂𑐠𑐵𑐃 𑐰 𑐬𑐵𑐴𑐟 𑐱𑐶𑐎𑑂𑐲𑐎𑐥𑐶𑑄 𑐰 𑐥𑑂𑐬𑐴𑐬𑐷 𑐡𑐠𑐸𑐂 𑐮𑑂𑐰𑐵𑐥𑐸 𑐟𑐎𑑄 𑐖𑐹𑐐𑐸 𑐏𑑅 𑑋 𑐮𑑂𑐰𑐵𑐥𑐸𑐫𑐵 𑐗𑑂𑐰𑐮𑐫𑑂 𑐡𑐬𑑂‍𑐖𑐣𑐳𑐶𑐧𑐾𑑄 𑐀𑐥𑑂𑐰𑑅 𑐀𑐳𑑂𑐠𑐵𑐃 𑐰 𑐬𑐵𑐴𑐟 𑐱𑐶𑐎𑑂𑐲𑐎𑐥𑐶𑑄 𑐑𑐵𑑅𑐥𑐵𑑅 𑐖𑐹𑐐𑐸 𑐳𑐩𑐶𑐟𑐶𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐡𑐸 𑑋