𑐩𑑄𑐎𑐵𑑅 𑐏𑐮𑑅 𑐰𑐶𑐢𑐶𑐰𑐟𑑂 𑐡𑐬𑑂𑐟𑐵

𑐫𑐾𑑃 – 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐩𑑂𑐴𑐶𑐐𑑅 𑐰𑐶𑐢𑐶𑐰𑐟 𑐬𑐸𑐥𑑄 𑐫𑐾𑑃 𑐖𑐶𑐮𑑂𑐮𑐵 𑐥𑑂𑐬𑐱𑐵𑐳𑐣 𑐎𑐵𑐬𑑂𑐫𑐵𑐮𑐫𑐫𑑂 𑐡𑐬𑑂𑐟𑐵 𑐖𑐹𑐐𑐸 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵 𑐮𑐶𑐳𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐳𑑄𑐳𑑂𑐠𑐵 𑐰𑐶𑐢𑐶𑐰𑐟 𑐬𑐸𑐥𑑄 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐀𑐠𑐾 𑐴𑐾 𑐩𑑄𑐎𑐵𑑅 𑐏𑐮𑑅 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐫𑑂 𑐣𑑄 𑐡𑐬𑑂𑐟𑐵 𑐫𑐵𑐫𑐾𑐩𑐵𑑅𑐐𑐸 𑐥𑑂𑐬𑐵𑐰𑐢𑐵𑐣 𑐎𑐠𑑄 𑐰𑐜𑐵𑐫𑐵 𑐮𑐶𑐳𑐾𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑑄 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐩𑑂𑐴𑐶𑐐𑑅 𑐎𑑂𑐰𑐔𑐵𑑅𑐐𑐸 𑐡𑐸 𑑋

𑐳𑑄𑐳𑑂𑐠𑐵 𑐡𑐬𑑂𑐟𑐵 𑐮𑐶𑐥𑐵 𑐣𑑂𑐴𑐵𑐥𑐵𑑄𑐐𑐸 𑐔𑐬𑐞𑐫𑐵 𑐖𑑂𑐫𑐵 𑐎𑑂𑐰𑐔𑐵𑑅𑐐𑐸 𑐰 𑐁𑑅 𑐣𑑂𑐴𑐹𑐐𑐸 𑐖𑑂𑐫𑐵𑐗𑑂𑐰𑑅 𑐎𑐠𑑄 𑐮𑐶𑐐𑑄𑐖𑑅 𑐰 𑐫𑐵𑐎𑑅𑐕𑐶 𑐖𑑅 𑐩𑐸𑐣𑐵𑑅 𑐫𑐵𑐎𑐣𑑄 𑐴𑐾 𑐀𑐢𑐶𑐰𑐾𑐱𑐣 𑐫𑐵𑐣𑐵𑑅 𑐩𑑄𑐎𑐵𑑅 𑐏𑐮𑑅 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐴𑐳𑑂𑐟𑐵𑐣𑑂𑐟𑐬𑐞 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑑄 𑐣𑑂𑐴𑐹 𑐣𑐷𑐳𑑂𑐰𑑄𑐐𑐸 𑐎𑐵𑐬𑑂𑐫𑐳𑐩𑐶𑐟𑐶𑑄 𑐥𑑂𑐰𑑄𑐎𑐹𑐐𑐸 𑐡𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐁𑑅 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐎𑐠𑑄 𑐟𑐫𑐵𑐬𑐷 𑐟𑐎𑑄 𑐖𑐸𑐂𑐢𑐸𑑄𑐎𑐹𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐳𑑄𑐳𑑂𑐠𑐵𑐥𑐣 𑐥𑐎𑑂𑐲𑐫𑐵 𑐳𑐴𑐮𑐴 𑐮𑐶𑐥𑐵 𑐧𑐶𑐄𑐐𑐸 𑐩𑑂𑐫𑐵𑐞𑑂𑐜𑐾𑐜 𑐎𑐠𑑄 𑐩𑑄𑐎𑐵𑑅 𑐏𑐮𑑅 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐰 𑐳𑑄𑐳𑑂𑐠𑐵 𑐡𑐬𑑂𑐟𑐵 𑐫𑐵𑐫𑐾𑐢𑐸𑑄𑐎𑐵𑑅 𑐩𑑄𑐎𑐵𑑅 𑐏𑐮𑑅𑐫𑐵 𑐩𑐹 𑐊𑐖𑐾𑐣𑑂𑐜𑐵 𑐀𑐢𑐶𑐰𑐾𑐱𑐣 𑐖𑐹𑐐𑐸𑐮𑐶𑑄 𑐫𑐵𑐎𑐣𑑄 𑐴𑐾 𑐀𑐢𑐶𑐰𑐾𑐱𑐣 𑐫𑐵𑐫𑐾𑐟 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑐮𑑄 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐹𑐐𑐸 𑐡𑐸 𑑋
𑐮𑐶𑐳𑐾𑑄 𑐣𑐾𑐰𑐵𑑅 𑐏𑑂𑐫𑐮𑐫𑑂 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐳𑐩𑐳𑑂𑐫𑐵𑐫𑐵𑐟 𑐣𑑄 𑐳𑐴𑐖𑐷𑐎𑐬𑐞 𑐫𑐵𑐫𑐾𑐐𑐸 𑐰 𑐣𑐾𑐰𑐵𑑅𑐟𑐫𑑂 𑐩𑐸𑐡𑑂𑐡𑐵𑐫𑐵𑐟 𑐣𑑄 𑐋𑐎𑑂𑐫𑐰𑐡𑑂𑐢𑐟𑐵 𑐎𑑂𑐫𑐣𑐾𑐐𑐸 𑐎𑐠𑑄 𑐣𑑂𑐴𑐶𑐠𑑄𑐫𑐵 𑐖𑑂𑐫𑐵 𑐣𑑄 𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐣𑐾𑐥𑐵𑐮 𑐳𑑄𑐰𑐟 𑑑𑑐𑑙𑑙 𑐳 𑐠𑐵𑐥𑐣𑐵 𑐖𑐹𑐐𑐸 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐰𑑄𑐐𑐸 𑐣𑐶𑐐𑐹 𑐡𑐱𑐎 𑐣𑐶𑐳𑐾𑑄 𑐀𑐢𑐶𑐰𑐾𑐱𑐣 𑐩𑐖𑐸𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐳𑑄𑐳𑑂𑐠𑐵𑐫𑐵𑐟 𑐰𑐿𑐢𑐵𑐣𑐶𑐎 𑐬𑐸𑐥𑑄 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐩𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐵𑑅 𑐃𑐫𑐵 𑐳𑐴𑐮𑐴 𑐮𑐶𑐥𑐵 𑐳𑑄𑐳𑑂𑐠𑐵 𑐡𑐬𑑂𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐠𑐸𑐎𑐶𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐠𑐥 𑐟𑐶𑐧𑑅 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐎𑐫𑐵𑐟𑑅𑐐𑐸 𑐡𑐸 𑑋

𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐣𑑂𑐴𑐵𑐥𑐵𑑄𑐏𑐸𑐳𑐷 𑐳𑐵𑑄𑐐𑐛𑐣𑐶𑐎 𑐬𑐸𑐥𑑄 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑐎𑑄 𑐳𑐎𑐮 𑐣𑐾𑐰𑐵𑑅𑐟𑐫𑑂 𑐂𑐔𑑂𑐕𑐵 𑐎𑐠𑑄 𑐩𑑄𑐎𑐵𑑅 𑐡𑐧𑐹𑐕𑐾𑑃 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐟𑐵𑑅 𑐟𑐫𑐵𑐟𑑅𑐐𑐸 𑐡𑐸 𑐐𑐸𑐐𑐸 𑐁𑑅 𑐟𑐎 𑐥𑐹𑐰𑑄𑐎𑐾 𑐩𑐦𑐸𑐣𑐶 𑑋 𑐁𑑅 𑐠𑐸𑐥𑐶𑑄 𑐖𑑂𑐫𑐵𑐏𑑃𑐟 𑐫𑐵𑐣𑐵 𑐰𑐣𑐾𑐟 𑐣𑑄 𑐳𑐴𑐖 𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐩𑑄𑐎𑐵𑑅 𑐏𑐮𑑅𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄
𑐩𑑂𑐴𑐶𑐐𑑅 𑐡𑐬𑑂𑐟𑐵 𑐫𑐵𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄 𑐠𑐸𑐎𑐠𑑄 𑐡𑐸 –
𑐣𑐵𑐫𑑅- 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛,
𑐣𑑂𑐰𑐎𑐸- 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬
𑐕𑑂𑐫𑐵𑐘𑑂𑐖𑐾- 𑐥𑐸𑐲𑑂𑐥𑐵𑐣𑐣𑑂𑐡 𑐱𑐵𑐎𑑂𑐫 (𑐬𑐵𑐖𑐵 𑐱𑐵𑐎𑑂𑐫),
𑐡𑐵𑑄𑐨𑐬𑐷- 𑐐𑐞𑐾𑐱 𑐳𑐵𑐫𑑂𑐩𑐶,
𑐡𑐸𑐖𑑅𑐥𑐶𑑄 – 𑐎𑐶𑐬𑐞 𑐱𑑂𑐬𑐾𑐲𑑂𑐛, 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐩𑑄𑐐𑐮𑐵 𑐎𑐵𑐬𑑄𑐖𑐶𑐟 𑑋

𑐠𑑂𑐰 𑐥𑐡𑐵𑐢𑐶𑐎𑐵𑐬𑐷𑐥𑐶𑑄 𑐳𑐎𑐮𑐾𑑄 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵𑐫𑐵 𑐎𑐵𑐬𑑂𑐫𑐳𑐩𑐶𑐟𑐶𑐂 𑐔𑑂𑐰𑐣𑐵𑑅 𑐖𑑂𑐫𑐵 𑐫𑐵𑐣𑐵𑐡𑐷𑐢𑐸𑑄𑐎𑐹𑐥𑐶𑑄 𑐏𑑅 𑑋 𑐠𑑂𑐰 𑐧𑐵𑐴𑐾𑐎 𑐏𑐮𑑅𑐫𑐵𑐟 𑐣𑑂𑐴𑐶𑐫𑐵𑐣𑑂𑐴𑐶𑐠𑑄𑐫𑐵 𑐖𑑂𑐫𑐵 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐠𑑂𑐰 𑐠𑐸𑐐𑐸 𑐎𑐵𑐬𑑂𑐫𑐳𑐩𑐶𑐟𑐶𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐨𑐵𑐲𑐵𑐴𑑂𑐫𑐩𑐶𑐥𑐶𑐣𑐶𑐐𑐸 𑐩𑐾𑐐𑐸 𑐕𑐐𑐹 𑐐𑑂𑐰𑐵𑐴𑐵𑐮𑐶 𑐥𑐸𑐔𑑅 𑐐𑐛𑐣 𑐫𑐵𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑑂𑐰 𑐐𑑂𑐰𑐵𑐴𑐵𑐮𑐶 𑐥𑐸𑐔𑐮𑐫𑑂 𑐩𑑄𑐎𑐵𑑅 𑐏𑐮𑑅𑐫𑐵 𑐥𑐸𑐮𑐵𑑄𑐥𑐶𑑄 𑐡𑐸𑐖𑑅𑐥𑐶𑑄 𑐮𑐶𑐳𑐾𑑄 𑐠𑑁𑑄𑐎𑐣𑑂𑐴𑐫𑑂 𑐁𑐣𑑂𑐡𑑀𑐮𑐣𑐫𑑂 𑐳𑐴𑐨𑐵𑐐𑐷 𑐖𑐸𑐫𑐵𑐔𑑂𑐰𑑄𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐥𑐶𑑄 𑐣𑑄 𑐡𑐸𑐠𑑂𑐫𑐵𑐎𑐵 𑐫𑑄𑐎𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋