𑐩𑑂𑐴𑐫𑑂𑐏𑐵 𑐰 𑐐𑑂𑐰𑑄𑐐𑑅

𑐣𑑂𑐴𑐵𑐥𑐵 𑐣𑑂𑐴𑐵𑐥𑐵𑐫𑐵 𑐏𑑃 𑐏𑑅 𑑋 𑐕𑐐𑐹 𑐡𑐾𑐱𑐫𑑂 𑐐𑑂𑐰𑑄𑐐𑑅 𑐕𑐩𑑂𑐴 𑐰 𑐩𑑂𑐴𑐫𑑂𑐏𑐵 𑐕𑐩𑑂𑐴 𑐡𑐸𑑋 𑐂𑐥𑐶𑑄 𑐣𑐶𑐩𑑂𑐴 𑐟𑐳𑐎𑑄 𑐴𑐾 𑐡𑐸𑐧𑐶𑐳𑑂𑐟𑐵 𑐧𑑂𑐫𑐵𑑅𑐥𑐶𑑄 𑐥𑐵𑐳𑐵𑐥𑐶𑑄 𑐏𑑅 𑑋

𑐕𑐣𑑂𑐴𑐸, 𑐔𑐶𑐎𑐸𑐮𑐵𑐫𑐵 𑐃, 𑐂𑐥𑐶𑑄 𑐣𑐶𑐩𑑂𑐴 𑐖𑐵𑐣𑐵𑑅 𑐖𑐐𑑂𑐐𑐵 𑐕𑐎𑐹 𑐣𑑂𑐫𑐵𑐟 𑑋 𑐄𑐐𑐸 𑐖𑐐𑑂𑐐𑐵𑐫𑑂 𑐣𑐶𑐩𑑂𑐴𑑄 𑐖𑐵𑐣𑐵𑑅 𑐧𑐸𑑃𑐖𑑂𑐫𑐵 𑐫𑐵𑐫𑐾𑐐𑐸, 𑐀𑐮𑐾 𑐄𑐐𑐸 𑐧𑐸𑑃𑐂 𑐳𑑅𑐐𑐸 𑐀𑐣𑑂𑐣 𑐡𑐎𑑂𑐰 𑐣𑐶𑐩𑑂𑐴𑐾𑐳𑐶𑐫𑐵 𑐧𑐔𑑂𑐕𑐶 𑐧𑐔𑑂𑐕𑐶 𑐂𑐣𑐵𑐎𑐵𑐫𑐾𑐐𑐸 𑐳𑐮𑑂𑐴𑐵 𑐖𑐸𑐮 𑑋

𑐟𑑅𑐣𑑂𑐴𑐸 𑐮𑐶𑐥𑐵 𑐕𑐣𑑂𑐴𑐸 𑐐𑑂𑐰𑑄𑐐𑑅 𑐳𑐸𑐠 𑐣𑑂𑐴𑐵𑐥𑐣𑑄 𑐡𑐣, 𑐀𑐮𑐾 𑐰𑐫𑐵 𑐥𑐵𑐳𑐵 𑐩𑑂𑐴𑐫𑑂𑐏𑐵𑐫𑐵𑐟 𑐳𑑅𑐟𑑅 𑐰𑐣, “𑐡𑑃, 𑐫𑐵𑐎𑐣𑑄 𑐡𑑃, 𑐗𑐷 𑐧𑐸𑑃 𑐥𑐵𑑅𑐰𑐣𑐾 𑐩𑐵𑐣𑐶 𑐠𑑁𑑄 𑑋”

𑐩𑑂𑐴𑐫𑑂𑐏𑐵𑑄 𑐥𑐮𑐏 𑐧𑐶𑐔𑐵𑑅 𑐫𑐵𑐟, 𑐀𑐮𑐾 𑐢𑐵𑐮, “𑐠𑑁𑑄 𑐖𑐶 𑐥𑑂𑐫𑐵𑐏𑑄 𑐴𑐸𑐮𑐾 𑐩𑐵𑐳𑑂𑐟𑐶 𑐰𑐫𑐵𑐔𑑂𑐰𑐣 𑑋 𑐖𑐶𑐐𑐸 𑐟𑐸𑐟𑐶𑐫𑐵 𑐐𑑁𑐔𑐵𑐫𑑂 𑐔𑑂𑐰𑑄𑐐𑐸 𑐑𑑄𑐐𑐮𑐵 𑐕𑐶𑐮𑐶𑐕𑐶𑐮𑐶 𑐣𑑂𑐫𑐵𑐣𑐵𑐔𑑂𑐰𑐣 𑑋 𑐁𑑅 𑐕 𑐣𑐶 𑐰𑐣𑐵 𑐔𑑂𑐰𑑃 𑑋 𑐣𑐶𑐨𑐵𑑅 𑐧𑐵𑑄𑐮𑐵𑐎 𑐟𑑂𑐰𑐂𑐧𑐮𑐫𑑂 𑐖𑐶 𑐀𑐣 𑐠𑑂𑐫𑑄𑐎𑑅 𑐰𑐫𑐾 𑑋”

𑐐𑑂𑐰𑑄𑐐𑑅 𑐀𑐣𑑄 𑐰𑐣𑐵𑐕𑑂𑐰𑐟 𑑋 𑐰𑑄 𑐄𑐎𑐸𑐣𑑂𑐴𑐸 𑐳𑐸𑐠𑑄𑐣𑐶𑐳𑐾𑑄 𑐧𑐴𑐣𑐶𑐂 𑐠𑑂𑐫𑑄𑐎 𑐧𑐸𑑃 𑐥𑐵𑐮𑐵𑐔𑑂𑐰𑐣 𑑋 𑐧𑐸𑑃 𑐥𑐵𑐮𑐾 𑐩𑐵𑐣𑐶𑐐𑐸 𑐕𑐐𑐹 𑐂𑑄𑐔 𑐣𑑄 𑐮𑑂𑐫𑑄 𑐩𑑄𑐟 𑑋

𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐰 𑐩𑑂𑐴𑐫𑑂𑐏𑐵𑐫𑐵𑐟 𑐢𑐵𑐮, “𑐗𑐷𑐳𑑄 𑐳𑐸𑐠𑐣𑑂𑐴𑐵𑐥𑐵𑑄 𑐴𑐾 𑐖𑑂𑐫𑐵 𑐱𑐸𑐬𑐸 𑐫𑐵𑐫𑐾𑐩𑐵𑑅 𑑋 𑐥𑐸𑐳𑐵 𑐴𑑂𑐰𑐮𑐾𑐟 𑐣𑑂𑐴𑐶𑐔𑑂𑐕𑐶 𑐴𑐾 𑐧𑐶𑐂 𑐟𑐶𑐣𑐶 𑑋”

𑐩𑑂𑐴𑐫𑑂𑐏𑐵 𑐢𑐵𑐮, “𑐠𑑁𑑄 𑐖𑐶 𑐧𑐶𑐔𑐵𑑅 𑐫𑐵𑐫𑐾𑐐𑐸 “𑐩𑐹𑐜”𑐫𑑂 𑐡𑐸𑑋 𑐕 𑐴𑐾 𑐰𑐣𑐵𑑅 𑐥𑐸𑐳𑐵 𑐴𑑂𑐰𑐮𑐵 𑐰𑐵 𑐴𑐸𑑃 𑑋”

𑐐𑑂𑐰𑑄𑐐𑐮𑑄 𑐕𑐸𑑄 𑐩𑐢𑐵𑑅 𑑋 𑐰𑑄 𑐣𑑂𑐴𑐶𑐔𑑂𑐕𑐶 𑐟𑐎 𑐩𑐾𑐴𑐣𑐟 𑐫𑐵𑐣𑐵𑑅 𑐧𑐸𑑃 𑐕𑐎𑐸𑐟𑐶𑑄 𑐐𑐣𑑄 𑐴𑐾 𑐟𑑂𑐰𑑅𑐩𑐦𑐶𑐂𑐎 𑐥𑐸𑐳𑐵 𑐴𑑂𑐰𑐮𑐾 𑐳𑐶𑐢𑐫𑐾𑐎𑐮 𑑋

𑐕𑐸𑑄 𑐣𑑂𑐴𑐶 𑐮𑐶𑐥𑐵 𑐧𑐸𑑃𑐂 𑐰𑐵𑐄𑑃𑐎 𑐕𑑂𑐰𑐩𑐵 𑐧𑐸𑐫𑐵𑐰𑐮 𑑋

“𑐁𑑅 𑐮𑐵 𑐗𑐷𑐳𑑄 𑐮𑑅 𑐩𑐧𑐶𑐳𑐾𑑄 𑐩𑐖𑐶𑐄, 𑐩𑐏𑐸𑐳𑐵 𑐕𑑂𑐰𑐩𑐵 𑐡𑐎𑑂𑐰𑑅 𑐳𑐶𑐣𑐵𑐰𑐣𑐷” 𑐐𑑂𑐰𑑄𑐐𑐮𑑄 𑐠𑑅 𑐥𑐵𑐳𑐵𑐫𑐵𑐟 𑐢𑐵𑐮 𑑋

𑐟𑐬 𑐩𑑂𑐴𑐫𑑂𑐏𑐵𑑄 𑐮𑐵 𑐰𑐫𑐵𑐟 𑐕𑐸𑑄 𑐢𑐵𑐫𑐾𑐐𑐸 𑐥𑐮𑐾𑐳𑐵 𑐩𑑂𑐫𑐾 𑐢𑐎𑐵𑑅 𑐮𑐾 𑐳𑐵 𑐴𑐵𑐮𑐵𑐴𑐮, 𑐀𑐮𑐾 𑐢𑐵𑐮, “𑐠𑑁𑑄 𑐖𑐶 𑐳𑐶𑐎𑑂𑐎 𑐴𑐾 𑐩𑑂𑐫𑐾 𑐴𑐵𑐮𑐾 𑐩𑐵𑐳𑑂𑐟𑐶 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐖𑐶𑑄 𑐠𑐣 𑐴𑐾 𑐔𑑂𑐰𑐣𑐵𑑅 𑐩𑑂𑐫𑐾 𑐴𑐵𑐮𑐵𑐧𑐶𑐂, 𑐀𑐮𑐾 𑐮𑐵 𑐰𑐵 𑐰 𑐴𑐾 𑐰𑐂 𑑋 𑐮𑐏𑑄 𑐥𑑂𑐫𑐵𑐫𑐾 𑐢𑐸𑑄𑐎𑐹𑐐𑐸 𑐧𑐸𑑃𑐂, 𑐀𑐥𑑂𑐰𑑅 𑐖𑑂𑐫𑐵 𑐫𑐵𑐣𑐵 𑐔𑑂𑐰𑐣𑐾 𑐩𑐵𑐮𑐷 𑐩𑐏𑐸 𑐕𑑄 𑐣𑑄 𑐫𑐵𑐎𑐣𑑄 𑐕𑐾𑑃𑐫𑑂 𑐮𑐶𑐴𑐵𑑄 𑐰𑐫𑐵𑐕𑑂𑐰 𑑋”

𑐩𑑂𑐴𑐫𑑂𑐏𑐵 𑐩𑑂𑐫𑐾 𑐴𑐵𑐮𑐾𑐟 𑐰𑐣 𑑋 𑐐𑑂𑐰𑑄𑐐𑐮𑑄 𑐣𑑂𑐴𑐶𑐔𑑂𑐕𑐶 𑐟𑐎 𑐟𑐸𑑄𑐠𑐶𑑄 𑐮𑑅 𑐳𑐵𑐮𑐵𑑄𑐴𑐫𑐵𑑅 𑐧𑐸𑑃𑐂 𑐮𑑅 𑐧𑐶𑐫𑐵𑐔𑑂𑐰𑐣 𑑋 𑐧𑐸𑑃 𑐕𑐎𑐸𑐟𑐶𑑄 𑐰𑐵𑐔𑑂𑐫𑐵𑐰𑐵𑐔𑑂𑐫𑐵 𑐮𑐏𑑄 𑐥𑑂𑐫𑐵𑐟 𑑋

𑐁𑑅 𑐮𑐵 𑐕𑑂𑐰𑐩𑐵𑑅 𑐟𑐟𑑅𑐩𑐵 𑐴𑐾 𑐖𑐸𑐫𑐵𑐰𑐮 𑑋 𑐕𑑂𑐰𑐮𑐫𑐾𑐐𑐸 𑐃 𑐖𑐸𑐫𑐵𑐰𑐮 𑑋 𑐐𑑂𑐰𑑄𑐐𑐮𑑄 𑐩𑑂𑐴𑐫𑑂𑐏𑐵𑐫𑐵𑐟 𑐢𑐵𑐮, “𑐁𑑅 𑐰𑐣𑐵𑑅 𑐕𑑂𑐰 𑐮𑐫𑐵𑐴𑐫𑐾 𑐩𑐵𑐮, 𑐎𑐵 𑐣𑐸𑑋”

“𑐠𑑁𑑄 𑐖𑐶 𑐏𑑂𑐫𑐵𑑅 𑐫𑐵𑐫𑐾𑐐𑐸 𑐩𑐹𑐜𑐫𑑂 𑐡𑐸𑑋 𑐠𑑁𑑄 𑐨𑐔𑐵 𑐣𑑂𑐴𑑂𑐫𑐂 𑐴𑐾 𑐥𑐸𑐂𑐾 𑐎𑐵 𑑋 𑐕𑑂𑐰 𑐮𑐫𑐾𑐐𑐸 𑐢𑐫𑐵𑐐𑐸 𑐄𑐮𑐶 𑐠𑐵𑐎𑐸𑐐𑐸 𑐖𑑂𑐫𑐵 𑐣𑑄 𑐮𑐵 𑐩𑐏𑐸 𑐣𑐶 𑐳𑐵” 𑐩𑑂𑐴𑐫𑑂𑐏𑐵𑐥𑐵𑐏𑐾𑑄 𑐮𑐶𑐳𑑅 𑐰𑐮 𑑋

𑐐𑑂𑐰𑑄𑐐𑑅 𑐠𑑅 𑐥𑐵𑐳𑐵𑐫𑐵 𑐥𑐴𑑅 𑐏𑐣𑐵𑑅 𑐟𑐳𑐎𑑄 𑐴𑐷𑐩𑐷𑐔𑐵𑐮 𑑋 𑐰 𑐠𑑅 𑐫𑐵𑐎𑑅𑐔𑐵 𑐴𑐾 𑐰𑐣𑐵𑑅 𑐧𑐴𑐣𑐷 𑐡𑑂𑐫𑑅𑐏𑐶𑐄𑑃𑐫𑐵 𑐩𑐰𑑅𑐟𑐮𑐾 𑐕𑑂𑐰𑐩𑐵 𑐮𑐫𑐵𑐔𑑂𑐰𑐣 𑑋 𑐮𑐫𑐾 𑐢𑐸𑑄𑐎𑐵𑑅 𑐎𑐸 𑐔𑐶𑐟 𑑋 𑐖𑑂𑐫𑐵𑑄 𑐰 𑐟𑐳𑐎𑑄 𑐴𑐾 𑐣𑑂𑐫𑐮 𑑋

𑐎𑐣𑑂𑐴𑐫𑑂𑐎𑐸𑐣𑑂𑐴𑐸 𑐐𑑂𑐰𑑄𑐐𑐮𑑄 𑐢𑐵𑐮, “𑐳𑐬𑑂𑐐𑐟𑐫𑑂 𑐳𑐸𑐥𑐵𑑃𑐫𑑂 𑐡𑐸𑑋 𑐰𑐵 𑐰𑐫𑐾 𑐣𑑂𑐴𑑂𑐫𑑅 𑐴𑐾 𑐗𑐷𑐳𑑄 𑐠𑑂𑐰 𑐕𑑂𑐰 𑐡𑐵𑐫𑐾 𑐳𑐶𑐢𑐫𑐾𑐎𑐾 𑐩𑐵𑑅 𑑋”

𑐩𑑂𑐴𑐫𑑂𑐏𑐵𑑄 𑐠𑑅𑐐𑐸 𑐟𑐵𑑅𑐴𑐵𑐎𑑅𑐐𑐸 𑐣𑑂𑐴𑐶𑐥𑑂𑐫𑐣𑐫𑑂 𑐕𑐎𑑂𑐰𑑅 𑐩𑐶𑐏𑐵𑑅 𑐧𑑂𑐰𑐮, 𑐀𑐮𑐾 𑐢𑐵𑐮, 𑐠𑑁𑑄 𑐖𑐶 𑐧𑐵𑑄𑐮𑐵𑐎𑐾 𑐩𑐵𑐳𑑂𑐟𑐶 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰 𑐖𑐶𑐐𑐸 𑐥𑐵 𑐕𑐥𑐵 𑐕𑐥𑐵 𑐡𑐟𑐮𑐾 𑐥𑐵𑐮𑐵𑐥𑐵𑐮𑐵 𑐠𑐶𑐎𑐾𑐩𑐵𑐣𑐶 𑑋 𑐕𑑂𑐰 𑐡𑐵𑐫𑐾𑐐𑐸 𑐢𑐫𑐵𑐐𑐸 𑐐𑐸𑐮𑐶 𑐴𑐾 𑐠𑐵𑐎𑐸𑐐𑐸 𑐖𑑂𑐫𑐵 𑐏𑑅 𑐢𑐎𑐵𑑅 𑐣𑐶𑐩𑑂𑐴 𑐣𑐶𑐩𑑂𑐴 𑐖𑐵𑐣𑐵𑑅 𑐫𑐵𑐫𑐾 𑐩𑐵𑐫𑐾𑐎𑑅 𑑋”

𑐐𑑂𑐰𑑄𑐐𑐮𑑄 𑐄𑐎𑐸𑐣𑑂𑐴𑐸 𑐣𑑄 𑐕𑐸𑑄 𑐴𑐾 𑐩𑐢𑐵𑑅 𑑋 𑐰𑑄 𑐠𑑅 𑐫𑐵𑐎𑑅𑐔𑐵𑑄 𑐴𑐾 𑐔𑐵𑑄 𑐣𑑂𑐴𑐶𑑄 𑐕𑑂𑐰 𑐡𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣 𑑋

𑐁𑑅 𑐮𑑂𑐫𑑄𑐡𑐣𑐶𑐐𑐸 𑐖𑑂𑐫𑐵 𑐕𑐟𑐵 𑐴𑐾 𑐖𑐎 𑐡𑐣𑐶 𑑋 𑐐𑑂𑐰𑑄𑐐𑑅 𑐰𑐫𑐵𑑅 𑐩𑑂𑐴𑐫𑑂𑐏𑐵𑐫𑐵𑐟 𑐢𑐵𑐮, “𑐁𑑅 𑐮𑐵 𑐕𑑂𑐰 𑐴𑐵𑐫𑐾𑐐𑐸 𑐖𑑂𑐫𑐵 𑐕𑐟𑐵 𑐴𑐾 𑐖𑐎 𑐮𑑂𑐫𑑄𑐡𑐣𑐶 𑐣𑐸, 𑐗𑐷 𑐣𑐶𑐩𑑂𑐴𑑄 𑐖𑐵𑐣𑐵𑑅 𑐴𑐵𑐫𑐾𑐐𑐸 𑐖𑑂𑐫𑐵 𑐳𑐶𑐢𑐫𑐾𑐎𑐵 𑐕𑑂𑐰𑐫𑐾 𑑋”

𑐩𑑂𑐴𑐫𑑂𑐏𑐵𑑄 𑐢𑐵𑐮, “𑐠𑑁𑑄 𑐖𑐶 𑐧𑑂𑐰𑐣𑐾𑐐𑐸 “𑐩𑐹𑐜”𑐫𑑂 𑐡𑐸𑑋 𑐖𑐶𑑄 𑐮𑐵 𑐕𑑂𑐰 𑐴𑐵𑐫𑐾𑐐𑐸 𑐢𑐫𑐵𑐐𑐸 𑐟𑐳𑐎𑑄 𑐀𑑅𑐥𑐸𑐐𑐸 𑐖𑑂𑐫𑐵 𑐏𑑅 𑐢𑐎𑐵𑑅 𑐣𑑂𑐫𑐣𑐵𑐟𑐫𑐵𑐐𑐸𑑋 𑐁𑑅 𑐡𑐎𑑂𑐰𑑄 𑐖𑑂𑐫𑐵 𑐳𑐶𑐢𑐫𑐾 𑐴𑐾 𑐢𑐸𑑄𑐎𑐮 𑐠𑐾𑑄 𑐀𑐖𑑂𑐫𑐵𑑅𑐐𑐸 𑐀𑑅𑐥𑐸𑐐𑐸 𑐖𑑂𑐫𑐵 𑐕𑐐𑐹 𑐫𑐵𑐫𑐾𑐟 𑐕𑐵𑐫𑑂 𑐖𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑑅𑐰𑐫𑐵𑐔𑑂𑐰𑐣𑐾𑐐 𑐩𑐵𑑅𑐐𑐸 ?”

𑐐𑑂𑐰𑑄𑐐𑐮𑑄 𑐩𑑂𑐴𑐫𑑂𑐏𑐵𑐫𑐵 𑐏𑑃𑐫𑑂 𑐰𑐵𑐳𑑂𑐟𑐵 𑐴𑐾 𑐩𑐫𑐵𑐳𑐾 𑐠𑑅𑐐𑐸 𑐴𑐾 𑐟𑐵𑐮𑑄 𑐩𑐡𑐶𑐎𑑂𑐎 𑐖𑑂𑐫𑐵 𑐫𑐵𑐣𑐵 𑐟𑐸𑑄 𑐔𑑂𑐰𑐣 𑑋 𑐡𑐎𑑂𑐰𑑄 𑐕𑑂𑐰 𑐴𑐵𑐫𑐾 𑐳𑐶𑐢𑑅𑐧𑐮𑐫𑑂 𑐕𑐏𑐾 𑐩𑑂𑐰𑐡𑑀𑑃 𑐩𑐾𑐏𑐾 𑐕𑑂𑐰𑐡𑑀𑑃 𑐕𑐡𑑀𑑃 𑐕𑐡𑑀𑑃 𑐏𑐵𑐟 𑑋 𑐩𑑂𑐰 (𑐕𑑂𑐰𑐫𑐵 𑐏𑑂𑐰𑐮𑐵) 𑐟𑐳𑐎𑑄 𑐟𑐡𑑀𑑃 𑐡𑐸, 𑐕𑑂𑐰𑐡𑑀𑑃 𑐢𑐵𑑅𑐳𑐵 𑐔𑐶𑐡𑑀𑑃 𑑋  𑐁𑑅 𑐢𑐵𑑅𑐳𑐵 𑐩𑑂𑐴𑐫𑑂𑐏𑐵 𑐳𑑅𑐟𑑅𑐰𑐣𑐾 𑐩𑑂𑐰𑐵𑐫𑐾𑐎 𑐴𑐾 𑐰𑐮, 𑐀𑐮𑐾 𑐐𑑂𑐰𑑄𑐐𑑅𑐫𑐵𑐟 𑐢𑐵𑐮,“𑐠𑑁𑑄 𑐖𑐶 𑐏𑐹𑐧 𑐖𑑂𑐫𑐵 𑐫𑐵𑐫𑐾𑐐𑐸 “𑐩𑐹𑐜”𑐫𑑂 𑐡𑐸𑑋 𑐠𑑁𑑄 𑐖𑐶𑑄 𑐡𑐎𑑂𑐰 𑐖𑑂𑐫𑐵 𑐫𑐵𑐎𑑅𑐔𑐵𑑄 𑐴𑐾 𑐫𑐵𑐫𑐾𑐐𑐸𑑋 𑐕𑑄 𑐁𑐬𑐵𑐩 𑐎𑐵 𑑋”

𑐐𑑂𑐰𑑄𑐐𑐮𑑄 𑐥𑐮𑐏 𑐧𑐶𑐔𑐵𑑅 𑐫𑐵𑐟 𑑋 𑐰 𑐩𑐣𑑄𑐩𑐣𑑄 𑐢𑐵𑐮, “𑐠𑑂𑐰 𑐀𑐮𑑂𑐳𑐶𑐩𑑂𑐴 𑐩𑑂𑐴𑐫𑑂𑐏𑐵𑐫𑐵𑐟 𑐁𑐳𑐾 ®𑐾 𑐖𑐶𑑄 𑐫𑐵𑐫𑐾𑐐𑐸 𑐳𑐶𑐄 𑐎𑐵 𑑋𑐠𑑂𑐰 𑐩𑑂𑐴𑐫𑑂𑐏𑐵 𑐕𑑂𑐰 𑐐𑐸𑐐𑐸𑐥𑐟𑐶𑐂 𑐀𑐮𑐾 𑐩𑑂𑐰 𑐐𑐸𑐐𑐸 𑐥𑐟𑐶𑐂 𑐢𑐂𑐐𑐸 𑐴𑐾 𑐩𑐳𑐶𑐄𑐩𑑂𑐴 𑐮𑐵 𑐏𑑅 𑐣𑐶 𑑋

𑐐𑑂𑐰𑑄𑐐𑐮 𑐟𑐷𑐖𑐎 𑐣𑐰𑐵𑐟, “𑐖𑑂𑐫𑐵 𑐡𑐎𑑂𑐰𑑄 𑐮𑐵 𑐖𑐶𑑄 𑐫𑐵𑐎𑑅𑐔𑐵 𑐴𑐾 𑐫𑐵𑐫𑐾 𑐳𑐶𑐢𑐫𑐾𑐎𑐾 𑐢𑐸𑐣 𑑋 𑐄𑐎𑐶𑑄 𑐴𑐸𑑄 𑐟𑐡𑑀𑑃𑐐𑐸 𑐕𑐡𑑀𑑃 𑐖𑐶 𑐎𑐵𑐫𑐾, 𑐔𑐶𑐡𑑀𑑃𑐐𑐸 𑐕𑐡𑑀𑑃 𑐕𑑄 𑐎𑐫𑐵𑐫𑑄𑐎𑐶 𑑋”

𑐩𑐹𑐬𑑂𑐏 𑐩𑑂𑐴𑐫𑑂𑐏𑐵 𑐴𑐵𑐮, “𑐟𑑅𑐢𑐶𑐎𑐩𑑂𑐴 𑐗𑑄𑐐𑑅 𑐖𑐶 𑐖𑐸𑐳𑐾𑑄𑐮𑐶 𑐟𑐡𑑀𑑃𑐐𑐸 𑐡𑑀𑑃 𑐮𑐵 𑐖𑐶 𑐎𑐵𑐂 𑐎𑐵 𑐖𑐶𑑄 𑑋” 𑐠𑐸𑐮𑐶 𑐢𑐫𑐵𑐏𑐟𑑄 𑐰𑑄 𑐐𑑂𑐰𑑄𑐐𑑅𑐫𑐵𑐟 𑐑𑑂𑐰𑐵𑐣𑐵𑐑𑐶𑐣𑐵 𑐟𑐡𑑀𑑃𑐐𑐸 𑐩𑑂𑐰 𑐡𑐎𑑂𑐰 𑐡𑐶𑐎𑑂𑐰 𑐩𑐸𑐣𑐵𑑅 𑐩𑑂𑐴𑐾𑐔𑐵𑐫𑑂 𑐳𑑂𑐰𑐠𑐵𑐣𑐵 𑐫𑑄𑐎𑐮 𑑋

𑐧𑐖𑐵𑐬𑐫𑑂 𑐩𑐶𑐂 𑐫𑑄𑐎𑐹𑐧𑐮𑐫𑑂 𑐕𑑂𑐰 𑐮𑐵 𑐴𑐹𑐮 𑐴𑐹𑐮 𑐩𑐣𑐹𑐟 𑐰𑐫𑐵𑑅 𑐄𑐑𑑂𑐬𑐶𑑄𑐩𑐫𑑂 𑐴𑐾 𑐳𑐸𑐔𑐸𑐎 𑐣𑑂𑐫𑐵𑐣𑐵𑐫𑑄𑐎𑐮 𑑋 𑐐𑑂𑐰𑑄𑐐𑑅𑐫𑐵𑐎𑐾 𑐡𑐵𑑄 𑐣𑑄 𑐫𑐎𑑂𑐰 𑐡𑐟 𑑋 𑐩𑑂𑐰 𑐣𑑂𑐫𑐵𑐂𑐥𑐶𑑄 𑐢𑐵𑑅𑐳𑐵 𑐕𑐩𑑂𑐴 𑐣𑑄 𑐰𑑅𑐐𑐸 𑐩𑐏𑐸𑑋 𑐧𑐬𑐸 𑐀𑐠𑐾 𑐩𑑂𑐰𑐡𑑀𑑃 𑐩𑐶𑐂 𑐴𑑅𑐐𑐸𑐮𑐶𑑄 𑐩𑐣𑐹𑐟𑐫𑑂𑐳𑑄 𑐩𑑂𑐴𑐫𑑂𑐏𑐵𑐫𑐵𑐟 𑐣𑐵𑐐𑑅𑐟𑐸𑐐𑑅 𑐖𑐎𑑄 𑐫𑐵𑐣𑐵 𑐠𑐎𑐮 𑑋

𑐕𑑂𑐰 𑐡𑐎𑑂𑐰 𑐩𑐶𑐂 𑐳𑐶𑐢𑐫𑐾𑐎𑐵𑑅 𑐐𑑂𑐰𑑄𑐐𑑅 𑐩𑑂𑐴𑐫𑑂 𑐏𑐵𑐫𑐵𑐠𑐵𑐫𑑂 𑐰𑐮, 𑐀𑐮𑐾 𑐢𑐵𑐮, “𑐠𑑁𑑄 𑐕𑑄 𑐏𑑂𑐰𑐫𑐾𑐐𑐸 𑐥𑐵𑑅, 𑐖𑐶 𑐣𑑂𑐴𑐶𑐮𑐾𑐐𑐸 𑐥𑐵𑑅 𑑋 𑐕 𑐀𑐮𑑂𑐳𑐶 𑐰 𑐮𑑀𑐨𑐶𑐩𑑂𑐴 𑐗𑑄𑐐𑑅 𑐏𑑅, 𑐀𑐫𑑂 𑐖𑐹𑐐𑐸𑐮𑐶𑑄 𑐕𑑄𑐐𑐸 𑐨𑐵𑐐𑐫𑑂 𑐩𑑂𑐰𑐡𑑀𑑃 𑐮𑐵𑐟, 𑐴𑐵…..𑐴𑐵…..𑐴𑐵….. 𑑋”

– 𑐣𑐶𑐮𑐶𑐩𑐵 𑐟𑐸𑐮𑐵𑐢𑐬