𑐩𑐵𑑄𑐨𑐵𑐫𑑂𑐫𑐵 𑐣𑐶𑑄𑐟𑐶𑑄 𑐖𑐹𑐐𑐸 𑐁𑐣𑑂𑐡𑑀𑐮𑐣

-𑐀𑐳𑑂𑐩𑐷𑐟 𑐩𑐮𑑂𑐮

‘𑐨𑐵𑐫𑑂𑐫𑐵 𑐣𑐶𑑄𑐟𑐶𑑄 𑐕𑐶𑐩𑐶𑐳𑑄 𑐠𑑅𑐐𑐸 𑐖𑑂𑐫𑐵𑐣 𑐥𑐵𑐟
𑐬𑐩𑐣𑐵𑐫𑐵 𑐡𑐸𑐰𑐵𑐟𑐫𑑂 𑐴𑐶𑐧𑐵𑑅 𑐰𑐫𑐾𑐎𑐮
𑐳𑐷𑐩𑐵 𑐰𑐵 𑐩𑑂𑐰𑐵𑐫𑐾𑐩𑐵 𑐧𑑄𑐐𑐵𑐮𑐷 𑐨𑐵𑐫𑑂 𑐧𑑄𑐐𑐵𑐮𑐷 𑐳𑐩𑐸𑐡𑐵𑐫𑐫𑐵 𑐣𑐶𑑄𑐟𑐶𑑄 𑐏𑑅
𑐩𑐵𑑄 𑐨𑐵𑐫𑑂 𑐧𑐶𑐣𑐵 𑐖𑐷𑐰𑐣 𑐩𑐺𑐟𑑂𑐫𑐸 𑐳𑐩𑐵𑐣 𑐏𑑅 𑑋’

𑐟𑐟𑑂𑐎𑐵𑐮𑐷𑐣 𑐥𑐵𑐎𑐶𑐳𑑂𑐟𑐵𑐣𑐫𑐵 𑐥𑐹𑐬𑑂‍𑐰𑐷 𑐧𑑄𑐐𑐵𑐮 𑐎𑑂𑐲𑐾𑐟𑑂𑐬𑐫𑑂 𑐨𑐵𑐲𑐵 𑐁𑐣𑑂𑐡𑑀𑐮𑐣 𑐖𑐹𑐐𑐸 𑐂𑐮𑐫𑑂 𑐠𑑂𑐰𑑅𑐐𑐸 𑐳𑑅 𑐏𑑅, 𑐠𑑂𑐰 𑑋 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐥𑑂𑐬𑐟𑐶 𑐖𑐹𑐐𑐸 𑐀𑐣𑑂𑐫𑐵𑐫 𑐰 𑐡𑐩𑐣𑐫𑐵 𑐰𑐶𑐬𑐸𑐡𑑂𑐢 𑐁𑐣𑑂𑐡𑑀𑐮𑐶𑐟 𑐧𑑄𑐐𑐵𑐮𑐷 𑐰𑐶𑐡𑑂𑐫𑐵𑐬𑑂‍𑐠𑐷 𑐰 𑐧𑐸𑐡𑑂𑐢𑐶𑐖𑐷𑐰𑐶𑐟𑐫𑑂𑐳𑑄 𑐥𑐵𑐎𑐶𑐳𑑂𑐟𑐵𑐣 𑐳𑐬𑐎𑐵𑐬𑐫𑐵 𑐰𑐶𑐬𑑀𑐢𑐫𑑂 𑐐𑐸𑐧𑐮𑐫𑑂 𑐳𑑅 𑐠𑑂𑐰𑐫𑐾𑐎𑐮, 𑐄𑐧𑐮𑐫𑑂 𑐱𑐴𑐵𑐡𑐟 𑐥𑑂𑐬𑐵𑐥𑑂𑐟 𑐱𑐴𑐶𑐡𑐫𑐵 𑐳𑐩𑑂𑐩𑐵𑐣𑐫𑑂 𑐳𑐟𑐎𑐫𑑂 𑐥𑑂𑐰𑑄𑐎𑐹𑐐𑐸 𑐀𑐨𑐶𑐰𑑂𑐫𑐎𑑂𑐟𑐶 𑐏𑑅 𑐠𑑂𑐰 𑑋

𑐬𑐵𑐖𑑂𑐫𑐫𑐵 𑐨𑐵𑐲𑐶𑐎 𑐣𑐷𑐟𑐶 𑐥𑑂𑐬𑐟𑐶𑐫𑐵 𑐀𑐳𑐴𑐩𑐟𑐶 𑐰 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐥𑑂𑐬𑐟𑐶𑐫𑐵 𑐳𑐩𑑂𑐩𑐵𑐣𑐫𑑂 𑐧𑑄𑐐𑐵𑐮𑐷 𑐖𑐣𑐟𑐵𑑄 𑐫𑐵𑑅𑐐𑐸 𑐁𑐣𑑂𑐡𑑀𑐮𑐣𑐫𑐵𑐟 𑐠𑑁𑑄 𑐟𑐎 𑐣𑑄 𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐥𑑂𑐬𑐟𑐶𑐎 𑐎𑐠𑑄 𑐎𑐵𑐫𑐾𑐐𑐸 𑐫𑐵𑑅 𑑋 𑐟𑐟𑑂𑐎𑐵𑐮𑐶𑐣 𑐥𑐵𑐎𑐶𑐳𑑂𑐟𑐵𑐣 𑐳𑐬𑐎𑐵𑐬𑑄 𑐄𑐬𑑂‍𑐡𑐹 𑐨𑐵𑐫𑑂𑐫𑐵𑐟 𑐖𑐎 𑐳𑐬𑐎𑐵𑐬𑐷 𑐩𑐵𑐣𑑂𑐫𑐟𑐵 𑐧𑐷𑐰𑑄 𑐳𑐸𑐬𑐸 𑐖𑐹𑐐𑐸 𑐠𑑂𑐰𑐴𑐾 𑐧𑑄𑐐𑐵𑐮𑐷 𑐨𑐵𑐲𑐷𑐟𑐫𑑂 𑐁𑐣𑑂𑐡𑑀𑐮𑐣𑐫𑐵 𑐄𑐥𑐖 𑐏𑑅– 𑐧𑑄𑐐𑐮𑐵𑐡𑐾𑐱 𑑋𑐨𑐵𑐫𑑂 𑐩𑐢𑑂𑐫𑐾 𑐡𑐎𑐮𑐫𑑂 𑐳𑐟𑐶𑐎, 𑐣𑐸𑐐𑐮𑐫𑑂 𑐠𑐷𑐐𑐸 𑐨𑐵𑐫𑑂 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐴𑐾 𑐏𑑅 𑑋

𑐩𑐵𑑄𑐥𑐵𑐏𑐾𑑄 𑐳𑑂𑐫𑐣𑐵𑐎𑐵𑐂𑐐𑐸 𑐖𑐹𑐐𑐸𑐮𑐶𑑄 𑐠𑑅𑐣𑐵𑐥 𑐡𑐎𑐮𑐫𑑂 𑐳𑐟𑐶𑐐𑐸 𑐰 𑐎𑑂𑐰𑐵𑐟𑐸𑐎𑑂𑐎 𑐠𑐷𑐐𑐸 𑐨𑐵𑐫𑑂 𑐴𑐾 𑐩𑐵𑑄𑐨𑐵𑐫𑑂 𑐏𑑅 𑑋 𑐀𑐖𑑂𑐫𑐵𑑅𑐐𑐸 𑐨𑐵𑐫𑑂𑐫𑐵𑐟 𑐡𑐩𑐣 𑐖𑐸𑐂𑐧𑐮𑐫𑑂 𑐳𑐸𑑄 𑐣𑑄 𑐳𑐔𑑂𑐔𑐵 𑐩𑐵𑑄𑐨𑐵𑐫𑑂 𑐥𑑂𑐬𑐾𑐩𑐷 𑐳𑐸𑐩𑑂𑐎 𑐔𑑂𑐰𑐣𑐾𑐦𑐂𑐩𑐏𑐸 𑑋 𑐠𑑅𑐐𑐸 𑐩𑐵𑑄𑐨𑐵𑐫𑑂𑐫𑐵𑐟 𑐧𑐔𑐾 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐁𑐣𑑂𑐡𑑀𑐮𑐣 𑐖𑐸𑐂, 𑐰𑐶𑐡𑑂𑐬𑑀𑐴 𑐖𑐸𑐂 𑑋 𑐧𑑄𑐐𑐮𑐵𑐡𑐾𑐱𑐫𑐵 𑐖𑐣𑑂𑐩 𑐖𑐸𑐂 𑐤𑑂𑐫𑑅 𑐥𑐹𑐬𑑂‍𑐰𑐷 𑐧𑑄𑐐𑐵𑐮𑐫𑐵 𑐖𑐣𑐟𑐵𑑄 𑐫𑐵𑑅𑐐𑐸 𑐀𑐣𑑂𑐡𑑀𑐮𑐣 𑐣𑑄 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐥𑑂𑐬𑐟𑐶 𑐬𑐵𑐖𑑂𑐫𑑄 𑐫𑐵𑑅𑐐𑐸 𑐰𑐶𑐨𑐾𑐡 𑐥𑑂𑐬𑐟𑐶𑐫𑐵 𑐰𑐶𑐡𑑂𑐬𑑀𑐴 𑐏𑑅 𑑋 𑐟𑐵𑑅 𑐃 𑐟𑐎 𑐖𑐹𑐐𑐸 𑐄𑐐𑐸 𑐁𑐣𑑂𑐡𑑀𑐮𑐣 𑐀𑐣𑑂𑐟𑐟𑑅 𑐠𑑅𑐐𑐸 𑐧𑐶𑐳𑑂𑐎𑑄 𑐡𑐾𑐫𑑂 𑐳𑑂𑐠𑐵𑐥𑐣𑐵 𑐮𑐶𑐥𑐵 𑐖𑐎 𑐎𑑂𑐰𑐔𑐵𑑅𑐐𑐸 𑐏𑑅 𑑋

𑐥𑐺𑐲𑑂𑐛𑐨𑐹𑐩𑐶
𑐨𑐵𑐬𑐟𑐫𑑂 𑐳𑐵𑐴𑐶𑐟𑑂𑐫, 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐩𑐸𑐐𑐮 𑐱𑐵𑐳𑐎𑐟𑐫𑑂 𑐟𑑅𑐢𑑄𑐐𑐸 𑐯𑐵𑑅 𑐡𑐸 𑑋 𑐩𑐸𑐐𑐮 𑐱𑐵𑐳𑐎𑐟𑐫𑑂𑐳𑑄 𑐳𑐵𑐴𑐶𑐟𑑂𑐫, 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐣𑐵𑐥𑑄 𑐄𑐬𑑂‍𑐡𑐹 𑐨𑐵𑐫𑑂𑐫𑐵𑐟 𑐣𑑄 𑐟𑐳𑐎𑑄 𑐩𑐴𑐟𑑂𑐰 𑐧𑐶𑐫𑐵𑑅 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐟 𑑋 𑐩𑐸𑐐𑐮𑐟𑐫𑑂𑐳𑑄 𑐄𑐬𑑂‍𑐡𑐹 𑐨𑐵𑐫𑑂𑐫𑐵𑐟 𑐧𑐶𑐄𑐐𑐸 𑐩𑐴𑐟𑑂𑐰𑐫𑐵 𑐎𑐵𑐬𑐞𑑄 𑐴𑐾 𑐨𑐵𑐬𑐟𑐫𑑂 𑐩𑐸𑐳𑑂𑐩𑐵𑑄 𑐳𑐩𑐸𑐡𑐵𑐫𑐫𑐵 𑐬𑐵𑐖𑐣𑐷𑐟𑐶𑐎 𑐰 𑐢𑐵𑐬𑑂‍𑐩𑐶𑐎 𑐣𑐾𑐟𑐵𑐟𑐫𑑂𑐳𑑄 𑐄𑐐𑐸 𑐨𑐵𑐫𑑂𑐫𑐵𑐟 𑐠𑑅𑐥𑐶𑐣𑐶𑐐𑐸 𑐳𑐩𑑂𑐥𑐬𑑂‍𑐎 𑐨𑐵𑐫𑑂 𑐎𑐠𑑄 𑐰𑐶𑐎𑐵𑐳 𑐫𑐵𑐣𑐵𑐫𑑄𑐎𑐮 𑑋

𑐕𑐏𑐾 𑐄𑐬𑑂‍𑐡𑐹 𑐨𑐵𑐫𑑂 𑐨𑐵𑐬𑐟𑐷𑐫 𑐩𑐸𑐳𑑂𑐩𑐵𑑄𑐟𑐫𑑂 𑐳𑑄𑐳𑑂𑐎𑐺𑐟𑐶𑐫𑐵 𑐕𑐐𑐹 𑐀𑑄𑐐 𑐎𑐠𑑄 𑐎𑐫𑐵𑐫𑑄𑐎𑐾𑐐𑐸 𑐫𑐵𑐟𑐳𑐵 𑐩𑐾𑐏𑐾 𑐴𑐶𑐣𑑂𑐡𑐷 𑐨𑐵𑐫𑑂 𑐰 𑐡𑐾𑐰𑐣𑐵𑐐𑐬𑐷 𑐮𑐶𑐥𑐶𑐫𑐵𑐟 𑐨𑐵𑐬𑐟𑐷𑐫 𑐴𑐶𑐣𑑂𑐡𑐹𑐟𑐫𑑂 𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬𑐣𑐵𑐥 𑐳𑑂𑐰𑐵𑐎𑐵𑐫𑑄𑐎𑐮 𑑋𑐄𑐟𑑂𑐟𑐬𑐷 𑐨𑐵𑐬𑐟𑐫𑐵 𑐩𑐸𑐳𑑂𑐩𑐵𑑄𑐟𑐫𑑂𑐳𑑄 𑐄𑐬𑑂‍𑐡𑐹 𑐨𑐵𑐫𑑂𑐫𑐵𑐟 𑐟𑐳𑐎𑑄 𑐩𑐴𑐟𑑂𑐰 𑐧𑐶𑐫𑐵 𑐫𑑄𑐎𑐵𑐔𑑂𑐰𑑄𑐐𑐸 𑐂𑐮𑐫𑑂 𑐧𑑄𑐐𑐵𑐮𑐫𑐵 𑐩𑐸𑐳𑑂𑐩𑐵𑑄𑐟𑐫𑑂𑐳𑑄 𑐢𑐵𑑅𑐳𑐵 𑐠𑑅𑐐𑐸 𑐴𑐾 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵 𑐩𑐵𑐢𑑂𑐫𑐩𑑄 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐫𑐵𑐫𑐾𑐐𑐸 𑐄𑐔𑐶𑐟 𑐟𑐵𑐫𑐾𑐎𑐮 𑑋

𑐨𑐵𑐬𑐟–𑐥𑐵𑐎𑐶𑐳𑑂𑐟𑐵𑐣 𑐰𑐶𑐨𑐵𑐖𑐣 𑐖𑐸𑐂 𑐤𑑂𑐫𑐰𑑄𑐣𑐶𑐳𑐾𑑄 𑐄𑐬𑑂‍𑐡𑐹 𑐨𑐵𑐲𑐷 𑐰 𑐧𑑄𑐐𑐵𑐮𑐷 𑐨𑐵𑐲𑐷 𑐩𑐸𑐳𑑂𑐩𑐵𑑄𑐟𑐫𑑂 𑐡𑐠𑐸𑐂 𑐨𑐵𑐫𑑂𑐫𑐵 𑐎𑐵𑐬𑐞𑑄 𑐰𑐶𑐰𑐵𑐡 𑐧𑑂𑐰𑐮𑐣𑐾𑐢𑐸𑑄𑐎𑐹𑐐𑐸 𑐏𑑅 𑑋 𑐳𑐣𑑂 𑑑𑑙𑑓𑑗 𑐳 𑐮𑐏𑐣𑐄𑐮𑐫𑑂 𑐖𑐹𑐐𑐸 𑐩𑐸𑐳𑑂𑐮𑐶𑐩 𑐮𑐶𑐐𑐫𑐵 𑐩𑐸𑑃𑐖𑑂𑐫𑐵𑑄 𑐠𑑅𑐐𑐸 𑐳𑐩𑑂𑐥𑐬𑑂‍𑐎 𑐨𑐵𑐫𑑂 𑐄𑐬𑑂‍𑐡𑐹 𑐨𑐵𑐫𑑂 𑐫𑐵𑐫𑐾𑐐𑐸 𑐢𑐎𑐵𑑅 𑐣𑐶𑐬𑑂‍𑐞𑐫 𑐫𑐵𑑅𑐐𑐸 𑐂𑐮𑐫𑑂 𑐴𑐾 𑐧𑑄𑐐𑐵𑐮𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐳𑑄 𑐄𑐎𑐶𑐫𑐵 𑐰𑐶𑐬𑑀𑐢 𑐫𑐵𑑅𑐐𑐸 𑐏𑑅 𑑋

𑐳𑐣𑑂 𑑑𑑙𑑔𑑗 𑐳 𑐨𑐵𑐬𑐟𑑄 𑐥𑐵𑐎𑐶𑐳𑑂𑐟𑐵𑐣 𑐕𑐸𑐚𑐾 𑐖𑐸𑐂𑐢𑐸𑑄𑐎𑐵𑑅 𑐄𑐬𑑂‍𑐡𑐹 𑐨𑐵𑐲𑐷 𑐰 𑐧𑑄𑐐𑐵𑐮𑐷 𑐨𑐵𑐲𑐷𑐟𑐫𑑂 𑐡𑐠𑐸𑐂𑐫𑐵 𑐟𑐶𑐎𑑂𑐟𑐟𑐵 𑐀𑐥𑑂𑐰𑐫𑐵𑐰𑐣 𑑋 𑐄𑐐𑐸 𑐡𑑃𑐫𑑂 𑐎𑐬𑐵𑑃𑐔𑐷𑐂 𑐖𑐹𑐐𑐸 𑐕𑐐𑐹 𑐬𑐵𑐲𑑂𑐚𑑂𑐬𑐶𑐫 𑐱𑐶𑐎𑑂𑐲𑐵 𑐐𑑀𑐲𑑂𑐛𑐷𑐂 𑐨𑐵𑐫𑑂 𑐳𑐩𑑂𑐧𑐣𑑂𑐢𑐷 𑐳𑑄𑐎𑐮𑑂𑐥 𑐥𑑂𑐬𑐳𑑂𑐟𑐵𑐰𑑄 𑐠𑐵𑐫𑑂 𑐎𑐵𑐮 𑑋 𑐄𑐐𑐸 𑐳𑑄𑐎𑐮𑑂𑐥 𑐥𑑂𑐬𑐳𑑂𑐟𑐵𑐰𑐫𑑂 𑐄𑐬𑑂‍𑐡𑐹𑐫𑐵𑐟 𑐖𑐎 𑐳𑐬𑐎𑐵𑐬𑐷 𑐨𑐵𑐫𑑂 𑐎𑐠𑑄 𑐕𑑂𑐫𑐮𑐾𑐐𑐸 𑐀𑐮𑐾 𑐳𑑄𑐔𑐵𑐬 𑐩𑐵𑐢𑑂𑐫𑐩 𑐰 𑐱𑐶𑐎𑑂𑐲𑐵𑐫𑑂 𑐣𑑄 𑐕𑐐𑐹 𑐴𑐾 𑐨𑐵𑐫𑑂 𑐖𑐎 𑐮𑐵𑐐𑐹 𑐫𑐵𑐫𑐾𑐐𑐸 𑐢𑐎𑐵𑑅 𑐤𑑂𑐫𑐠𑐣𑐵𑐟𑑅𑐐𑐸 𑐏𑑅 𑑋

𑐳𑑄𑐎𑐮𑑂𑐥 𑐥𑑂𑐬𑐳𑑂𑐟𑐵𑐰 𑐧𑐵𑐬𑐾 𑐳𑐴𑐮𑐴 𑐖𑐸𑐂𑐰𑑄 𑐧𑑄𑐐𑐵𑐮𑐷 𑐂𑐳𑑂𑐮𑐵𑐩𑐶𑐎 𑐳𑐵𑑄𑐳𑑂𑐎𑐺𑐟𑐶𑐎 𑐳𑑄𑐳𑑂𑐠𑐵𑐫𑐵 𑐣𑐾𑐟𑐺𑐟𑑂𑐰𑐫𑑂 𑐝𑐵𑐎𑐵𑐫𑑂 𑐰𑐶𑐬𑑀𑐢 𑐥𑑂𑐬𑐡𑐬𑑂‍𑐱𑐣 𑐱𑐸𑐬𑐸 𑐖𑐸𑐮 𑑋 𑐮𑐶𑐥𑐵 𑐥𑐵𑐎𑐶𑐳𑑂𑐟𑐵𑐣𑐫𑐵 𑐳𑑄𑐰𑐶𑐢𑐵𑐣𑐳𑐨𑐵𑐫𑑂 𑐣𑑄 𑐳𑐵𑑄𑐳𑐡𑐟 𑐢𑐶𑐬𑐾𑐣𑑂𑐡𑑂𑐬𑐣𑐵𑐠 𑐡𑐟𑑂𑐟𑑄 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐣𑑄 𑐳𑐬𑐎𑐵𑐬𑐷 𑐨𑐵𑐫𑑂𑐫𑐵 𑐩𑐵𑐣𑑂𑐫𑐟𑐵 𑐧𑐷𑐩𑐵𑑅𑐐𑐸 𑐥𑑂𑐬𑐳𑑂𑐟𑐵𑐰 𑐟𑐮 𑑋 𑐥𑐹𑐬𑑂‍𑐰𑐷 𑐧𑑄𑐐𑐵𑐮𑐫𑐵 𑐳𑐵𑑄𑐳𑐡𑐟𑐫𑑂𑐳𑑄 𑐄𑐐𑐸 𑐥𑑂𑐬𑐳𑑂𑐟𑐵𑐰𑐫𑐵𑐟 𑐳𑐩𑐬𑑂‍𑐠𑐣 𑐫𑐵𑑅𑐳𑐵𑑄 𑐥𑑂𑐬𑐳𑑂𑐟𑐵𑐰𑐫𑐵 𑐰𑐶𑐥𑐎𑑂𑐲𑐫𑑂 𑐦𑐿𑐳𑐮𑐵 𑐖𑐸𑐮 𑑋

𑐟𑐟𑑂𑐎𑐵𑐮𑐷𑐣 𑐥𑐵𑐎𑐶𑐳𑑂𑐟𑐵𑐣𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐮𑑂𑐫𑐵𑐎𑐟 𑐀𑐮𑐶 𑐮𑐐𑐵𑐫𑐟 𑐩𑐸𑐳𑑂𑐮𑐶𑐩 𑐮𑐶𑐐𑐫𑐵 𑐣𑐾𑐟𑐵𑐟𑐫𑑂𑐳𑑄 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐩𑐵𑐣𑑂𑐫𑐟𑐵 𑐧𑐷𑐐𑐸 𑐥𑑂𑐬𑐳𑑂𑐟𑐵𑐰𑑄 𑐥𑐵𑐎𑐶𑐳𑑂𑐟𑐵𑐣𑐷 𑐖𑐣𑐟𑐵𑐫𑐵𑐟 𑐰𑐶𑐨𑐵𑐖𑐶𑐟 𑐫𑐵𑐫𑐾𑐟 𑐳𑑂𑐰𑑅𑐐𑐸 𑐡𑑂𑐰𑐥𑑄 𑐟𑐎𑑄 𑐧𑐶𑐮 𑑋 𑐳𑑄𑐰𑐶𑐢𑐵𑐣𑐳𑐨𑐵𑑄 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐩𑐵𑐣𑑂𑐫𑐟𑐵 𑐧𑐷𑐟 𑐀𑐳𑑂𑐰𑐷𑐎𑐵𑐬 𑐫𑐵𑐫𑐾𑐰𑑄 𑐳𑐣𑑂 𑑑𑑙𑑔𑑘 𑐩𑐵𑐬𑑂‍𑐔 𑑑𑑑𑐫𑑂 𑐖𑐹𑐐𑐸 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂 𑐥𑑂𑐬𑐬𑑂‍𑐡𑐱𑐣𑐫𑑂 𑐥𑑂𑐬𑐴𑐬𑐷𑑄 𑐟𑐳𑐎𑑄 𑐡𑐩𑐣 𑐫𑐵𑐟 𑑋

𑐥𑑂𑐬𑐡𑐬𑑂‍𑐱𑐣 𑐥𑑂𑐫𑐤𑐸 𑐟𑐎 𑐩𑐡𑐶𑐎𑑂𑐎 𑐖𑐸𑐫𑐵𑐔𑑂𑐰𑐣 𑑋 𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑐵 𑐡𑐠𑐸𑐂 𑐩𑐵𑐬𑑂‍𑐔 𑑒𑑑 𑐫𑑂 𑐥𑐵𑐎𑐶𑐳𑑂𑐟𑐵𑐣𑐫𑐵 𑐐𑐨𑐬𑑂‍𑐣𑐬 𑐖𑐣𑐬𑐮 𑐩𑐸𑐴𑐩𑐡 𑐀𑐮𑐶 𑐖𑐶𑐣𑑂𑐣𑐵𑑄 𑐄𑐐𑑂𑐬 𑐨𑐵𑐲𑐞 𑐧𑐶𑐮 𑑋 𑐥𑐵𑐎𑐶𑐳𑑂𑐟𑐵𑐣𑐫𑐵 𑐩𑐸𑐳𑑂𑐩𑐵𑑄𑐟𑐫𑑂𑐟 𑐰𑐶𑐨𑐵𑐖𑐣 𑐫𑐵𑐫𑐾𑐟 𑐳𑑂𑐰𑑅𑐥𑐶𑑄𑐳𑑄 𑐩𑐾𑐐𑐸 𑐨𑐵𑐫𑑂𑐫𑐵𑐟 𑐣𑑄 𑐩𑐵𑐣𑑂𑐫𑐟𑐵 𑐧𑐷𑐩𑐵𑑅 𑐢𑐎𑐵𑑅 𑐩𑐵𑐐 𑐫𑐵𑐣𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐩𑐸𑐳𑑂𑐩𑐵𑑄 𑐡𑐾𑐫𑑂 𑐥𑐵𑐎𑐶𑐳𑑂𑐟𑐵𑐣𑐫𑐵 𑐨𑐵𑐫𑑂 𑐄𑐬𑑂‍𑐡𑐹 𑐰 𑐎𑐾𑐰𑐮 𑐄𑐬𑑂‍𑐡𑐹 𑐴𑐾 𑐖𑐎 𑐖𑐸𑐂𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐶𑐮 𑑋

𑐳𑐣𑑂 𑑑𑑙𑑕𑑒 𑐦𑐾𑐧𑑂𑐬𑐸𑐀𑐬𑐷 𑑒𑑑 𑐫𑐵 𑐁𑐣𑑂𑐡𑑀𑐮𑐣
𑐖𑐶𑐣𑑂𑐣𑐵 𑐐𑐨𑐬𑑂‍𑐣𑐬 𑐖𑐣𑐬𑐮 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐟𑐎 𑐧𑑄𑐐𑐵𑐮𑐷𑐨𑐵𑐲𑐷𑐟𑐫𑑂𑐳𑑄 𑐰𑐶𑐬𑑀𑐢𑐫𑐵 𑐳𑑅 𑐟𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐰𑐫𑑂𑐎𑑅 𑐮𑐶𑐥𑐵 𑐏𑑂𑐰𑐵𑐖𑐵 𑐣𑐵𑐖𑐸𑐩𑐸𑐡𑑂𑐡𑐶𑐣 𑐐𑐨𑐬𑑂‍𑐣𑐬 𑐖𑐣𑐬𑐮 𑐖𑐸𑐂𑐢𑐸𑑄𑐎𑐵𑑅 𑐢𑐵𑑅𑐳𑐵 𑐁𑐣𑑂𑐡𑑀𑐮𑐣 𑐕𑐎𑑂𑐰𑐮𑑄 𑐟𑐔𑑂𑐰𑐮 𑑋 𑐣𑐵𑐖𑐸𑐩𑐸𑐡𑑂𑐡𑐶𑐣𑑄 𑐳𑐣𑑂 𑑑𑑙𑑕𑑒𑐫𑐵 𑑒𑑗 𑐖𑐣𑐰𑐬𑐷 𑐎𑐸𑐤𑐸 𑐥𑐵𑐎𑐶𑐳𑑂𑐟𑐵𑐣𑐫𑐵 𑐳𑐬𑐎𑐵𑐬𑐷 𑐨𑐵𑐫𑑂 𑐄𑐬𑑂‍𑐡𑐹 𑐖𑐎 𑐖𑐸𑐂𑐐𑐸 𑐏𑑃𑐫𑐵𑐟 𑐮𑐶𑐳𑐵 𑐎𑐫𑐵𑑅 𑐣𑑂𑐰𑐰𑐵𑐫𑐾𑐰𑑄 𑐧𑑄𑐐𑐵𑐮𑐷𑐨𑐵𑐲𑐷𑐟 𑐴𑐵𑐣𑑄 𑐕𑐎𑑂𑐰𑑅 𑐁𑐣𑑂𑐡𑑀𑐮𑐶𑐟 𑐖𑐸𑐮 𑑋

𑐄𑐎𑐶𑐫𑐵 𑐳𑑂𑐰𑐤𑐸 𑐮𑐶𑐥𑐵 𑐴𑐾 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵 𑐦𑐸𑐎𑑂𑐎 𑐀𑐐𑑂𑐬𑐖𑐥𑐶𑑄 𑐔𑑂𑐰𑐣𑐵𑑅 𑐎𑐾𑐣𑑂𑐡𑑂𑐬𑐷𑐫 𑐨𑐵𑐲𑐶𑐎 𑐳𑑄𑐑𑐬𑑂‍𑐲 𑐳𑐩𑐶𑐟𑐶𑐫𑐵 𑐐𑐛𑐣 𑐫𑐵𑐟 𑑋 𑐄𑐐𑐸 𑐳𑐩𑐶𑐟𑐶𑑄 𑐥𑐵𑐎𑐶𑐳𑑂𑐟𑐵𑐣 𑐳𑐬𑐎𑐵𑐬𑑄 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐣𑑄 𑐀𑐬𑐧𑐷 𑐮𑐶𑐥𑐶𑑄 𑐴𑐾 𑐔𑑂𑐰𑐫𑐾𑐐𑐸 𑐢𑐎𑐵𑑅 𑐫𑐵𑑅𑐐𑐸 𑐥𑑂𑐬𑐳𑑂𑐟𑐵𑐰 𑐣𑑄 𑐀𑐳𑑂𑐰𑐷𑐎𑐵𑐬 𑐫𑐵𑑅𑐐𑐸 𑐏𑑅 𑑋 𑐄𑐐𑐸 𑐴𑐾 𑐩𑐸𑑃𑐖𑑂𑐫𑐵𑑄 𑑒𑑑 𑐦𑐾𑐧𑑂𑐬𑐸𑐀𑐬𑐷𑐎𑐸𑐤𑐸 𑐁𑐩 𑐴𑐜𑑂𑐟𑐵𑐮 𑐫𑐵𑐫𑐾𑐐𑐸 𑐣𑐶𑐬𑑂‍𑐞𑐫 𑐫𑐵𑐟 𑑋

𑐳𑑄𑐑𑐬𑑂‍𑐲 𑐳𑐩𑐶𑐟𑐶𑐫𑐵 𑐣𑐶𑐬𑑂‍𑐞𑐫 𑐖𑐸𑐂𑐰𑑄 𑐳𑐬𑐎𑐵𑐬𑑄 𑐳𑑄𑐰𑐶𑐢𑐵𑐣𑐫𑐵 𑐨𑐵𑐐 𑑑𑑔𑑔 𑐎𑐠𑑄 𑐳𑐵𑐬𑑂‍𑐰𑐖𑐣𑐶𑐎 𑐠𑐵𑐳𑐫𑑂 𑐩𑐸𑐣𑐾𑐟 𑐥𑑂𑐬𑐟𑐶𑐧𑐣𑑂𑐢 𑐟𑐫𑐵𑐧𑐶𑐮 𑑋𑐳𑐬𑐎𑐵𑐬𑑄 𑐥𑑂𑐬𑐡𑐬𑑂‍𑐱𑐣 𑐫𑐵𑐫𑐾𑐟 𑐥𑑂𑐬𑐟𑐶𑐧𑐣𑑂𑐢 𑐟𑐫𑐵𑐟𑑅𑐳𑐵𑑄 𑑒𑑑 𑐦𑐾𑐧𑑂𑐬𑐸𑐀𑐬𑐷𑐫𑐵 𑐳𑐸𑐠𑑄𑐣𑐶𑐳𑐾𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐝𑐵𑐎𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐩𑐸𑐣𑐾𑐐𑐸 𑐱𑐸𑐬𑐸 𑐖𑐸𑐮 𑑋 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐥𑐶𑐣𑐾 𑐢𑐵𑑅𑐳𑐵 𑐳𑐬𑐎𑐵𑐬𑑄 𑐰𑑂𑐫𑐵𑐥𑐎 𑐳𑐸𑐬𑐎𑑂𑐲𑐵 𑐦𑑁𑐖 𑐟𑐿𑐣𑐵𑐠 𑐫𑐵𑐣𑐵𑐟𑐮 𑑋 𑐮𑐶𑐥𑐵 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐳𑑄 𑐥𑑂𑐬𑐡𑐬𑑂‍𑐱𑐣 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐳𑐸𑐬𑐎𑑂𑐲𑐵 𑐣𑐶𑐎𑐵𑐫 𑐮𑐶𑐳𑐾 𑐄𑐩𑐶𑐐𑐸 𑐟𑑅𑐎𑑂𑐰 𑐗𑐜𑐥 𑐖𑐸𑐮 𑑋

𑐫𑐎𑑂𑐰 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐟 𑐖𑑂𑐰𑐣𑐵 𑐣𑑄 𑐫𑑄𑐎𑐮 𑑋 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐥𑐶𑐣𑐾 𑐖𑐹𑐐𑐸 𑐥𑑂𑐬𑐡𑐬𑑂‍𑐱𑐣𑐫𑑂 𑐥𑑂𑐬𑐡𑐬𑑂‍𑐱𑐣𑐎𑐵𑐬𑐷 𑐰 𑐳𑐸𑐬𑐎𑑂𑐲𑐵 𑐦𑑁𑐖 𑐡𑐠𑐸𑐂 𑐟𑑅𑐎𑑂𑐰𑑅 𑐗𑐜𑐥 𑐮𑐶𑐥𑐵 𑐥𑐹𑐬𑑂‍𑐰 𑐧𑑄𑐐𑐮𑐵 𑐳𑑄𑐳𑐡 𑐨𑐰𑐣𑐥𑐵𑐏𑐾 𑐩𑐸𑐣𑐵𑑅 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐳𑑄 𑐥𑑂𑐬𑐡𑐬𑑂‍𑐱𑐣 𑐱𑐸𑐬𑐸 𑐫𑐵𑐟 𑑋 𑐀𑐣 𑐗𑐣𑑂 𑐟𑐣𑐵𑐰 𑐧𑑂𑐰𑐮𑐣𑐾𑐰𑑄 𑐥𑑂𑐬𑐴𑐬𑐷𑑄 𑐐𑑀𑐮𑐷𑑄 𑐎𑐫𑐾𑐎𑐮 𑑋 𑐐𑑀𑐮𑐷𑑄 𑐮𑐵𑐣𑐵𑑅 𑐁𑐥𑐵𑐮𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐴𑐟𑐵𑐴𑐟 𑐖𑐸𑐮 𑑋 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐴𑐟𑐵𑐴𑐟 𑐖𑐹𑐐𑐸 𑐏𑐧𑐬𑑄 𑐥𑐹𑐬𑑂‍𑐰𑐷 𑐧𑑄𑐐𑐵𑐮 𑐥𑑂𑐬𑐵𑐣𑑂𑐟 𑐕𑐐𑐹𑐮𑐶𑑄 𑐩𑐶𑑄 𑐖𑐸𑐫𑐵𑐧𑐶𑐮 𑑋

𑐰𑐫𑐵𑑄 𑐎𑐤𑐫𑑂𑐎𑐸𑐤𑐸𑐣𑐶𑐳𑐾𑑄 𑐕𑐐𑐸𑐮𑐶𑑄 𑐥𑑂𑐬𑐵𑐣𑑂𑐟𑐫𑑂 𑐟𑐟𑑅𑐢𑑄𑐐𑐸 𑐥𑑂𑐬𑐡𑐬𑑂‍𑐱𑐣 𑐖𑐸𑐮 𑑋 𑐧𑑄𑐐𑐵𑐮𑐷𑐨𑐵𑐲𑐷𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐖𑑂𑐫𑐵 𑐟𑑂𑐰𑑅𑐟𑐵𑑅 𑐳𑐟𑐎𑐫𑑂 𑐎𑐸𑐴𑐵𑑄𑐰𑐫𑐵𑑅 𑐥𑑂𑐬𑐡𑐬𑑂‍𑐱𑐣 𑐫𑐵𑐟 𑑋 𑑒𑑑 𑐦𑐾𑐧𑑂𑐬𑐸𑐀𑐬𑐷 𑐎𑐸𑐤𑐸 𑐖𑐹𑐐𑐸 𑐗𑐜𑐥𑐫𑑂 𑐮𑐵𑐣𑐵𑑅 𑐁𑐥𑐵𑐮𑑄 𑐰𑐶𑐡𑑂𑐫𑐵𑐬𑑂‍𑐠𑐷 𑐣𑐾𑐟𑐵𑐟 𑐰 𑐥𑑂𑐬𑐡𑐬𑑂‍𑐱𑐣𑐎𑐵𑐬𑐷𑐟 𑐳𑐶𑐟 𑑋 𑐩𑐵𑑄𑐨𑐵𑐫𑑂 𑐥𑑂𑐬𑐟𑐶 𑐎𑑂𑐫𑑄𑐐𑐸 𑐳𑐩𑑂𑐩𑐵𑐣 𑐰 𑐩𑐵𑑄𑐨𑐵𑐫𑑂 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐖𑑂𑐫𑐵𑐣 𑐥𑐵𑑅𑐐𑐸 𑐤𑐶𑐫𑐵𑐟 𑐮𑐸𑐩𑑄𑐎𑐵𑑅 𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑑒𑑑 𑐦𑐾𑐧𑑂𑐬𑐸𑐀𑐬𑐷𑐫𑐵𑐟 𑐳𑐴𑐶𑐡 𑐡𑐶𑐰𑐳 𑐎𑐠𑑄 𑐴𑐣𑐾𑐐𑐸 𑐫𑐵𑐟 𑑋

𑐳𑐣𑑂 𑑑𑑙𑑕𑑒 𑐮𑐶𑐥𑐵𑐫𑐵 𑐁𑐣𑑂𑐡𑑀𑐮𑐣 𑐰 𑐧𑑄𑐐𑐮𑐵𑐡𑐾𑐱𑐫𑐵 𑐖𑐣𑑂𑐩
𑑑𑑙𑑕𑑒𑐫𑐵 𑐟𑐔𑑂𑐰𑑅𑐐𑐸 𑐁𑐣𑑂𑐡𑑀𑐮𑐣 𑐮𑐶𑐥𑐵 𑐣𑑄 𑐥𑐵𑐎𑐶𑐳𑑂𑐟𑐵𑐣𑐷 𑐳𑐬𑐎𑐵𑐬𑑄 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐩𑐵𑐣𑑂𑐫𑐟𑐵 𑐧𑐷𑐟 𑐕𑐸𑑄 𑐣𑑄 𑐎𑐠𑑄𑐫𑐵 𑐥𑐮𑐵𑑅 𑐩𑐯𑑂𑐰𑑄 𑑋 𑐮𑐶𑐥𑐵 𑐥𑐹𑐬𑑂‍𑐰𑐷 𑐧𑑄𑐐𑐵𑐮𑐫𑑂 𑐳𑐣𑑂 𑑑𑑙𑑕𑑖 𑐫𑑂 𑐖𑐹𑐐𑐸 𑐥𑑂𑐬𑐵𑐣𑑂𑐟𑐶𑐫 𑐳𑐬𑐎𑐵𑐬𑐫𑐵 𑐔𑐸𑐣𑐵𑐰𑐫𑑂 𑐧𑑄𑐐𑐵𑐮𑐷𑐟𑐫𑑂𑐳𑑄 𑐧𑐴𑐸𑐩𑐟 𑐴𑐫𑐾𑐰𑑄 𑐀𑐣 𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐩𑐵𑐣𑑂𑐫𑐟𑐵 𑐧𑐷𑐐𑐸 𑐖𑑂𑐫𑐵 𑐖𑐸𑐮 𑑋 𑐟𑐬 𑐮𑐶𑐥𑐵 𑐥𑐵𑐎𑐶𑐳𑑂𑐟𑐵𑐣𑐫𑑂 𑐰𑑅𑐐𑐸 𑐳𑐿𑐣𑑂𑐫 𑐳𑐬𑐎𑐵𑐬𑑄 𑐧𑑄𑐐𑐵𑐮𑐷𑐟𑐫𑑂𑐟 𑐫𑐵𑑅𑐐𑐸 𑐰𑑂𑐫𑐰𑐴𑐵𑐬𑑄 𑐀𑐣 𑐳𑑂𑐰𑐟𑐣𑑂𑐟𑑂𑐬 𑐡𑐾𑐫𑑂𑐫𑐵 𑐣𑐶𑑄𑐟𑐶𑑄 𑐫𑐸𑐡𑑂𑐢 𑐴𑐾 𑐖𑐸𑐮 𑑋

𑐳𑐣𑑂 𑑑𑑙𑑗𑑑 𑐫𑑂 𑐧𑑄𑐐𑐮𑐵𑐡𑐾𑐱 𑐩𑐸𑐎𑑂𑐟𑐶 𑐫𑐸𑐡𑑂𑐢 𑐢𑐎𑐵𑑅 𑐳𑐱𑐳𑑂𑐟𑑂𑐬 𑐰𑐶𑐡𑑂𑐬𑑀𑐴 𑐳𑐸𑐬𑐸 𑐖𑐸𑐮 𑑋 𑐟𑐟𑑂𑐎𑐵𑐮𑐶𑐣 𑐥𑐵𑐎𑐶𑐳𑑂𑐟𑐵𑐣𑐫𑑂 𑐬𑐵𑐖𑑂𑐫𑐫𑐵 𑐠𑐷𑐠𑐷 𑐀𑑄𑐐 𑐣𑐵𑐥𑑄 𑐳𑐾𑐣𑐵𑐫𑑂 𑐧𑑄𑐐𑐵𑐮𑐷 𑐳𑐩𑐸𑐡𑐵𑐫𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐟𑐳𑐎𑑄 𑐪𑑀 𑐖𑐹𑐐𑐸 𑐖𑐎 𑐩𑐏𑐳𑐾 𑐳𑐿𑐣𑑂𑐫 𑐳𑐬𑐎𑐵𑐬𑑄 𑐧𑑄𑐐𑐵𑐮𑐷 𑐳𑐩𑐸𑐡𑐵𑐫𑐫𑐵𑐟 𑐕𑐐𑐹𑐫𑐵𑑄 𑐮𑐶𑐥𑐵 𑐩𑐾𑐐𑐸 𑐡𑐩𑐣𑐫𑐵 𑐱𑑂𑐬𑐺𑑄𑐏𑐮𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑑄𑐟𑐸𑑄 𑐔𑑂𑐰𑐣 𑑋 𑐰𑐴𑐾 𑐎𑐵𑐬𑐞𑑄 𑐀𑐣 𑐳𑑂𑐰𑐟𑐣𑑂𑐟𑑂𑐬 𑐧𑑄𑐐𑐮𑐵𑐡𑐾𑐱𑐫𑐵 𑐣𑐵𑐬𑐵 𑐟𑐔𑑂𑐰𑐫𑐵𑐰𑐣 𑑋

𑐐𑐸𑐮𑐵 𑐟𑐎 𑐖𑐹𑐐𑐸 𑐫𑐸𑐡𑑂𑐢 𑐮𑐶𑐥𑐵 𑐥𑐵𑐎𑐶𑐳𑑂𑐟𑐵𑐣𑐷 𑐳𑐸𑐬𑐎𑑂𑐲𑐵𑐦𑑁𑐖𑑄 𑐳𑐣𑑂 𑑑𑑙𑑗𑑑 𑐜𑐶𑐳𑐾𑐩𑑂𑐧𑐬 𑑑𑑖 𑐟𑐵𑐬𑐶𑐏 𑐎𑐸𑐤𑐸 𑐁𑐟𑑂𑐩𑐳𑐩𑐬𑑂‍𑐥𑐞 𑐫𑐵𑐟 𑑋 𑐧𑑄𑐐𑐵𑐮𑐷 𑐳𑐩𑐸𑐡𑐵𑐫𑑄 𑐩𑐵𑐬𑑂‍𑐔 𑑒𑑖, 𑑑𑑙𑑗𑑑 𑐫𑑂 𑐠𑑅𑐥𑐶 𑐳𑑂𑐰𑐟𑐣𑑂𑐟𑑂𑐬 𑐡𑐾𑐫𑑂 𑐖𑐹𑐐𑐸 𑐑𑑀𑐲𑐞𑐵 𑐫𑐵𑐣𑐵𑑅 𑐱𑐸𑐬𑐸 𑐫𑐵𑑅𑐐𑐸 𑐫𑐸𑐡𑑂𑐢𑐫𑐵𑐟 𑐮𑐶𑐥𑐵 𑐰𑐶𑐱𑑂𑐰 𑐳𑐩𑐸𑐡𑐵𑐫𑑄 𑐣𑑄 𑐳𑑂𑐰𑐷𑐎𑐵𑐬 𑐫𑐵𑐟 𑑋 𑐧𑑄𑐐𑐮𑐵𑐡𑐾𑐱𑐷 𑐖𑐣𑐟𑐵𑐫𑐵 𑐁𑐟𑑂𑐩𑐣𑐶𑐬𑑂‍𑐞𑐫𑐫𑐵 𑐀𑐢𑐶𑐎𑐵𑐬𑐫𑐵 𑐳𑐩𑑂𑐩𑐵𑐣 𑐫𑐵𑐳𑐾𑑄 𑐰𑐶𑐱𑑂𑐰 𑐳𑐩𑐸𑐡𑐵𑐫𑑄 𑐣𑑄 𑐧𑑄𑐐𑐮𑐵𑐡𑐾𑐱𑐫𑐵𑐟 𑐳𑑂𑐰𑐟𑐣𑑂𑐟𑑂𑐬 𑐡𑐾𑐫𑑂 𑐎𑐠𑑄 𑐩𑐵𑐣𑑂𑐫𑐟𑐵 𑐧𑐶𑐄𑐐𑐸 𑐏𑑅 𑑋

𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑑄𑐨𑐵𑐫𑑂 𑐡𑐶𑐰𑐳
𑐧𑑄𑐐𑐵𑐮𑐷 𑐨𑐵𑐫𑑂𑐫𑐵𑐟 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐧𑐷𑐩𑐵𑑅 𑐢𑐎𑐵𑑅 𑐥𑐹𑐬𑑂‍𑐰𑐷 𑐧𑑄𑐐𑐵𑐮𑐫𑑂 𑐖𑐹𑐐𑐸 𑐁𑐣𑑂𑐡𑑀𑐮𑐣𑐫𑐵𑐟 𑐩𑐵𑐣𑑂𑐫𑐟𑐵 𑐧𑐷𑐐𑐸 𑐎𑐠𑑄 𑐫𑐸𑐣𑐾𑐳𑑂𑐎𑑀𑑄 𑑒𑑑 𑐦𑐾𑐧𑑂𑐬𑐸𑐀𑐬𑐷𑐫𑐵𑐟 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑑄𑐨𑐵𑐫𑑂 𑐡𑐶𑐰𑐳 𑐎𑐠𑑄 𑐴𑐣𑐾𑐐𑐸 𑐫𑐵𑑅𑐐𑐸 𑐏𑑅 𑑋 𑐳𑐣𑑂 𑑑𑑙𑑙𑑙𑐫𑐵 𑐣𑑀𑐨𑐾𑐩𑑂𑐧𑐬 𑑑𑑗 𑐎𑐸𑐤𑐸 𑐖𑐹𑐐𑐸 𑐬𑐵𑐲𑑂𑐚𑑂𑐬 𑐳𑑄𑐑𑐫𑐵 𑐩𑐸𑑃𑐖𑑂𑐫𑐵𑑄 𑑒𑑑 𑐦𑐾𑐧𑑂𑐬𑐸𑐀𑐬𑐷𑐫𑐵𑐟 𑐩𑐵𑑄𑐨𑐵𑐫𑑂 𑐡𑐶𑐰𑐳 𑐎𑐠𑑄 𑐴𑐣𑐾𑐐𑐸 𑐣𑐶𑐬𑑂‍𑐞𑐫 𑐫𑐵𑑅𑐐𑐸 𑐏𑑅 𑑋

𑐧𑐴𑐸𑐨𑐵𑐲𑐶𑐎 𑐳𑐩𑐵𑐖𑐫𑐵 𑐥𑐬𑐶𑐎𑐮𑑂𑐥𑐣𑐵 𑐣𑐵𑐥𑑄 𑐨𑐵𑐲𑐶𑐎 𑐰 𑐳𑐵𑐩𑐵𑐖𑐶𑐎 𑐰𑐶𑐰𑐶𑐢𑐟𑐵 𑐧𑐵𑐬𑐾 𑐔𑐾𑐟𑐣𑐵 𑐠𑐣𑐾𑐐𑐸 𑐎𑐠𑑄 𑐫𑐸𑐣𑐾𑐳𑑂𑐎𑑀𑑄 𑐳𑐣𑑂 𑑒𑑐𑑐𑑐𑐣𑐶𑐳𑐾𑑄 𑐩𑐵𑑄𑐨𑐵𑐫𑑂 𑐡𑐶𑐰𑐳 𑐴𑐣𑐾𑐐𑐸 𑐳𑐸𑐬𑐸 𑐫𑐵𑑅𑐐𑐸 𑐏𑑅 𑑋𑐫𑐸𑐣𑐾𑐳𑑂𑐎𑑀𑑄 𑐑𑑀𑐲𑐞𑐵 𑐫𑐵𑑅𑐐𑐸 𑐩𑐵𑑄𑐨𑐵𑐫𑑂 𑐡𑐶𑐰𑐳 𑐠𑑁𑑄 𑐁𑐥𑐵𑐮𑑄 𑐡𑐾𑐱𑑄 𑐨𑐵𑐲𑐶𑐎 𑐔𑐾𑐟𑐣𑐵 𑐠𑐣𑐾𑐐𑐸 𑐣𑐵𑐥𑑄 𑐧𑐴𑐸𑐨𑐵𑐲𑐶𑐎 𑐳𑐩𑐵𑐖𑐫𑐵 𑐎𑐮𑑂𑐥𑐣𑐵 𑐫𑐵𑐫𑐾𑐟 𑐴𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐵𑑄𑐨𑐵𑐫𑑂 𑐡𑐶𑐰𑐳 𑐴𑐣𑐾𑐐𑐸 𑐗𑑂𑐰𑐮𑐫𑑂 𑐦𑐸𑐎𑑂𑐎𑐳𑐶𑐣𑑄 𑐧𑑄𑐐𑐮𑐵𑐡𑐾𑐱𑐫𑑂 𑐖𑐹𑐐𑐸 𑐩𑐵𑑄𑐨𑐵𑐫𑑂𑐫𑐵 𑐁𑐣𑑂𑐡𑑀𑐮𑐣𑐫𑐵𑐟 𑐣𑑄 𑐮𑐸𑐩𑑄𑐎𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐮𑐾 𑐩𑐵𑑄𑐨𑐵𑐫𑑂 𑐡𑐶𑐰𑐳 𑐴𑐣𑐾𑐟 𑐥𑑂𑐬𑐾𑐬𑐞𑐵 𑐧𑐷𑐐𑐸 𑐎𑐠𑑄 𑐁𑐣𑑂𑐡𑑀𑐮𑐣 𑐖𑐹𑐐𑐸 𑐡𑐾𑐫𑑂 𑐧𑑄𑐐𑐮𑐵𑐡𑐾𑐱𑐫𑑂 𑐣𑑄 𑐩𑐵𑑄𑐨𑐵𑐫𑑂 𑐡𑐶𑐰𑐳 𑐣𑐵𑐥𑑄 𑐱𑐴𑐷𑐡 𑐡𑐶𑐰𑐳 𑐕𑐎𑑂𑐰𑐮𑑄 𑐴𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐴𑐾 𑐤𑐶 𑐮𑐸𑐩𑑄𑐎𑐾𑐐𑐸 𑐗𑑂𑐰𑐮𑐫𑑂 𑐧𑑄𑐐𑐮𑐵𑐡𑐾𑐱𑐫𑑂 𑐠𑑁𑑄 𑐣𑑄 𑐩𑐵𑑄𑐨𑐵𑐫𑑂𑐫𑐵 𑐣𑐶𑑄𑐟𑐶𑑄 𑐱𑐴𑐷𑐡 𑐖𑐹𑐥𑐶𑑄𑐟 𑐳𑐩𑑂𑐩𑐵𑐣 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 –

‘𑐀𑐨𑐶𑐰𑐵𑐡𑐣 𑐀𑐨𑐶𑐰𑐵𑐡𑐣 𑐳𑐴𑐳𑑂𑐳𑑂𑐬 𑐀𑐨𑐶𑐰𑐵𑐡𑐣 – 𑐱𑐴𑐷𑐡𑐫𑐵 𑐮𑐸𑐩𑐣𑑂𑐟𑐶
𑐗𑐷𑐳𑑄 𑐤𑑂𑐫𑐵𑐧𑐮𑐾𑑄 𑐣𑐸𑐐𑐮𑐫𑑂 𑐟𑐫𑐵𑐟𑐫𑐾𑐦𑐫𑐾𑐩𑐵𑑅
𑐰𑐫𑑂𑐎𑑅𑐥𑐶𑐣𑐶 𑐮𑐸𑐩𑑄𑐟𑐶𑐫𑐵 𑐮𑑃𑐥𑐸
𑐩𑐵𑑄𑐨𑐵𑐳𑑄 𑐣𑑂𑐰𑐰𑐵𑐫𑐾𑐟, 𑐎𑑂𑐰𑐵𑐟𑐸𑐐𑐸 𑐰𑐶𑐱𑑂𑐰𑐵𑐳𑐫𑑂
𑐳𑐸𑐣𑐵𑑄 𑐤𑐶𑐮𑐵𑑅 𑐤𑐶𑐮𑐵𑑅 𑐠𑑅𑐐𑐸 𑐖𑐷𑐰𑐣 𑐧𑐮𑐶𑐡𑐵𑐣 𑐫𑐵𑐟
𑐗𑐷𑐳𑑄 𑐰𑐫𑑂𑐎𑑅𑐥𑐶𑐣𑐶𑐐𑐸 𑐮𑐸𑐩𑑄𑐟𑐶 𑐩𑑂𑐫𑑃𑐾 𑐴𑐵𑐮𑐾, 𑐰𑐫𑑂𑐎𑑅𑐥𑐶𑐣𑐶𑐐𑐸 𑐩𑐺𑐟𑑂𑐫𑐸𑐫𑐵 𑐐𑑁𑐬𑐰 𑐮𑐸𑐩𑑄𑐎𑐾
𑐀𑐨𑐶𑐰𑐵𑐡𑐣 𑐀𑐨𑐶𑐰𑐵𑐡𑐣 𑐳𑐴𑐳𑑂𑐳𑑂𑐬 𑐀𑐨𑐶𑐰𑐵𑐡𑐣 – 𑐱𑐴𑐷𑐡𑐫𑐵 𑐮𑐸𑐩𑑄𑐟𑐶 𑑋’