𑐩𑐴𑐵𑐣𑐐𑐬𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐩𑐶𑐮𑐵𑐣 𑐫𑐵𑐂𑐐𑐸

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐡𑐎𑑂𑐰𑑄 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐩𑐶𑐮𑐵𑐣 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐩𑐴𑐵𑐣𑐐𑐬𑐫𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐩𑐶𑐮𑐵𑐣𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐟𑑂𑐫𑑄𑐐𑐸 𑐏𑑅 𑑋

𑐩𑐴𑐵𑐣𑐐𑐬𑐫𑐵 𑐐𑐸𑐐𑐸𑑄 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑑅 𑐳𑑂𑐫𑐣𑐵𑐩𑐶 𑐩𑑂𑐴𑑀, 𑐐𑐸𑐐𑐸𑑄 𑐧𑑂𑐰𑐣𑐾𑐎𑐸𑐠𑐶𑐂 𑐳𑑂𑐫𑐣𑐵𑐩𑐶 𑐀𑐥𑑂𑐰𑑅 𑐟𑐬 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐩𑑂𑐴𑑀 𑐖𑐹𑐐𑐸 𑐢𑐵𑐳𑐾𑑄 𑐁𑐰𑐱𑑂𑐫𑐎𑐟𑐵𑐎𑐠𑑄 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷𑐫𑐵 𑐩𑐶𑐮𑐵𑐣 𑐫𑐵𑐫𑐾𑐟𑑂𑐫𑐣𑐵𑐐𑐸 𑐰𑐶𑐨𑐵𑐐𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐩𑐶𑐮𑐵𑐣𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑐫𑐾𑐢𑐸𑑄𑐎𑐹𑐐𑐸 𑐰𑐶𑐨𑐵𑐐𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋

𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐷𑐟𑐵𑐬𑐵𑐩 𑐎𑑀𑐂𑐬𑐵𑐮𑐵𑑄 𑐡𑐬𑐧𑐣𑑂𑐡𑐷 𑐩𑐶𑐮𑐵𑐣𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐫𑐾𑐢𑐸𑑄𑐎𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐁𑐥𑐵𑑅 𑐧𑑂𑐰𑑃𑐩𑐶 𑐡𑐸𑐐𑐸 𑐧𑑂𑐰𑐣𑐾𑐎𑐸𑐠𑐶𑑄 𑐡𑐬𑐧𑐣𑑂𑐡𑐷 𑐠𑐥 𑐫𑐵𑐫𑐾𑐟 𑐩𑐵𑐐 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐣𑑂𑐴𑐵𑐥𑐵𑑄 𑐀𑐖𑑂𑐫𑐵𑑅𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐡𑐬𑐧𑐣𑑂𑐡𑐷 𑐩𑐶𑐮𑐵𑐣𑐫𑐵 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐫𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋

𑐠𑑁𑑄𑐎𑐣𑑂𑐴𑐫𑑂 𑐩𑐴𑐵𑐣𑐐𑐬 𑐡𑐸𑐣𑐾 𑑘𑑙 𑐐𑐹 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶 𑐳𑑄𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐷𑐩𑐢𑑂𑐫𑐾 𑑕𑑙 𑐐𑐹 𑐩𑐵𑐢𑑂𑐫𑐶𑐶𑐩𑐎 𑐟𑐴𑐫𑐵 𑐧𑑂𑐰𑐣𑐾𑐎𑐸𑐠𑐶 𑐡𑐸𑐳𑐵 𑐩𑐾𑐐𑐸 𑐁𑐢𑐵𑐬𑐨𑐹𑐟 𑐟𑐴𑐫𑐵 𑐧𑑂𑐰𑐣𑐾𑐎𑐸𑐠𑐶 𑐏𑑅 𑑋 𑐳𑑄𑐔𑐵𑐮𑐣𑐫𑑂 𑐡𑐸𑐐𑐸 𑐡𑐎𑑂𑐰𑑄 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐫𑐵 𑐳𑑂𑐟𑐬𑑀𑐣𑑂𑐣𑐟𑐶 𑐫𑐵𑐫𑐾𑐐𑐸 𑐣𑑄 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐨𑐵𑐐𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐣𑐶𑐖𑐷 𑐧𑑂𑐰𑐣𑐾𑐎𑐸𑐠𑐶 𑐟𑑂𑐰𑑅𑐟𑐵𑑅 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐂 𑐀𑐢𑑂𑐫𑐫𑐣 𑐫𑐵𑐫𑐾𑐟 𑐰𑐂𑐥𑐶𑑄 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐣𑑄 𑐩𑐴𑐵𑐣𑐐𑐬𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐩𑐾𑐏𑐾 𑐩𑑂𑐴𑑀 𑐧𑑂𑐰𑑃𑐩𑐶 𑐡𑐸𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐐𑐸𑐎𑐠𑑄 𑐀𑐥𑑂𑐰𑐫𑐾𑐎𑐾𑐐𑐸, 𑐧𑑂𑐰𑐣𑐾𑐎𑐸𑐠𑐶𑐫𑐵 𑐨𑑁𑐟𑐶𑐎 𑐳𑑄𑐬𑐔𑐣𑐵 𑐁𑐬𑑂𑐎𑐲𑐎 𑐫𑐵𑐫𑐾𑐐𑐸 𑐰 𑐧𑐵𑑄𑐮𑐵𑐎𑐾𑐐𑐸, 𑐁𑐰𑐱𑑂𑐫𑐎𑐟𑐵𑐎𑐠𑑄 𑐱𑐶𑐎𑑂𑐲𑐎 𑐠𑐥 𑐫𑐵𑐫𑐾𑐐𑐸 𑐰 𑐱𑐶𑐎𑑂𑐲𑐵𑐫𑐵 𑐐𑐸𑐞𑐳𑑂𑐟𑐬 𑐀𑐥𑑂𑐰𑐫𑐾𑐎𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐣𑑄 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸𑐥𑐵𑐏𑐾 𑐩𑐴𑐵𑐣𑐐𑐬 𑐰𑐣𑐵𑐔𑑂𑐰𑑄𑐐𑐸 𑐰𑐶𑐨𑐵𑐐𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐂 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐀𑐖𑑂𑐫𑐵𑑅𑐐𑐸 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐨𑑁𑐟𑐶𑐎 𑐳𑑄𑐬𑐔𑐣𑐵 𑐧𑐵𑑄𑐮𑐵𑐎𑐵𑑅 𑐠𑐥 𑐐𑐸𑐞𑐳𑑂𑐟𑐬𑐷𑐫 𑐡𑐫𑐾𑐎𑐾𑐐𑐸 𑐖𑑂𑐫𑐵𑐥𑐵𑐏𑐾 𑐰𑐣𑐵𑐔𑑂𑐰𑐣𑐵𑐐𑐸 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐎𑑀𑐂𑐬𑐵𑐮𑐵𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐠𑑂𑐰 𑐴𑐾 𑐁𑐬𑑂𑐠𑐶𑐎 𑐡𑑃𑐣𑐶𑐳𑐾𑑄 ‘𑐕𑐐𑐹 𑐧𑑂𑐰𑐣𑐾𑐎𑐸𑐠𑐶 𑐕𑐩𑑂𑐴 𑐣𑐬𑑂𑐳’ 𑐖𑑂𑐫𑐵𑐗𑑂𑐰𑑅 𑐳𑑄𑐔𑐵𑐮𑐣 𑐫𑐵𑐫𑐾𑐟𑑂𑐫𑑄𑐐𑐸 𑐩𑐴𑐵𑐣𑐐𑐬𑑄 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶 𑐣𑑂𑐴𑑂𑐫𑐵𑐧𑐮𑐾𑑄 𑐧𑐵𑑄𑐮𑐵𑐎𑐵 𑐟𑐫𑐾𑐟 𑐰 𑐴𑐬𑐵𑐨𑐬𑐵 𑐫𑐵𑐣𑐵 𑐟𑐫𑐾𑐟 𑐣𑑂𑐫𑐵𑐐𑐹 𑐎𑐬𑑀𑐜 𑐟𑐎𑐵 𑐡𑐵𑑄 𑐣𑑄 𑐰𑐶𑐣𑐶𑐫𑑀𑐖𑐣 𑐫𑐵𑑅𑐐𑐸 𑐡𑐸 𑑋