𑐩𑐩𑑅𑐔𑐵 𑐥𑐸𑐬𑐵𑐞

𑐳𑐸𑐣𑐵𑐣𑑄 𑐕𑐶𑐟𑑅 ‘𑐴𑑂𑐫𑐵𑐎𑐸𑐮𑐵 𑐳𑑂𑐫𑐵𑐫𑐾 𑐫𑑅’ 𑐎𑐶 ‘𑐩𑐩𑑅𑐔𑐵 𑐳𑑂𑐫𑐵𑐫𑐾 𑐫𑑅’ 𑐢𑐎𑐵𑑅 𑐣𑑂𑐫𑑄𑐳𑐵 𑐕𑐶𑑄 𑐕𑐸 𑐮𑐶𑐳𑑅𑐧𑐶𑐂 ! 𑐰 𑐖𑐶𑑄 𑐖𑐎 𑐩𑐏𑐸 𑐣𑐧𑑂𑐧𑐾 𑐥𑑂𑐬𑐟𑐶𑐱𑐟 𑐩𑐣𑐹𑐟𑐫𑑂𑐳𑑄 𑐴𑐵𑐩𑑂𑐰𑑅𑐐𑑂𑐰𑑅𑐕𑐶 𑐴𑐾 𑐩𑐥𑐵𑐎 𑐥𑐎𑑂𑐎𑐵 𑐣𑑄 𑐢𑐵𑐂 ! 𑐩𑐢𑐵𑐂𑐐𑐸 𑐣𑑄 𑐐𑐠𑐾 ! 𑐳𑑂𑐰 𑐮𑐾 𑐕𑐶𑐐𑐸 𑐩𑑂𑐴𑐸𑐟𑐸𑐂 𑐃 𑐧𑐸𑐫𑐵𑑅 𑐰𑑅𑐐𑐸 𑐩𑐩𑑅𑐔𑐵 𑐣𑐵𑑄 𑐎𑐵𑐫𑐾𑐰𑑄 𑑋

𑐨𑐩𑐔𑐵 𑐠𑐾𑑄 𑐩𑐕𑐵𑐮𑐾 𑐩𑑂𑐰𑐵𑑅,𑐢𑐵𑐂𑐐𑐸 𑐣𑐵𑐥𑑄 𑐡𑐸 𑐥𑐵𑐄𑑃 𑐏𑐣𑐾𑐰𑑄 𑐩𑑂𑐴𑐸𑐟𑐸𑐂 𑐃 𑐧𑐸𑐫𑐵 𑐩𑐰𑐮𑐎𑐶 𑐰 𑐩𑐣𑐹 𑐮𑐵𑐏𑐾 𑐴𑐵𑐂𑐔𑐚 𑐖𑐸𑐂𑐐𑐸 𑐀𑐥𑑂𑐰𑑅 𑐩𑐵𑐮𑐷 𑐩𑐏𑐸𑐟 𑐴𑑃 ! 𑐴ऽ…..𑐀𑐠𑐾 𑐴𑐾 𑐩𑐩𑑅𑐔𑐵 𑐧𑐵𑐳 𑐰𑐮𑐎𑐶 𑐥𑑂𑐰𑐵𑑅 𑐏𑐳𑑂𑐏𑐳𑑂 𑐩𑐰𑑅𑐥𑐶𑑄 𑐣𑐾𑐥𑐵𑑅𑐩𑐶𑐟 𑐴𑐾 𑐩𑐏𑐸 𑐴𑑃 ! 𑐏𑑅 𑐩𑐏𑐸 𑐰 𑐮𑐵 𑐩𑐩𑑅𑐔𑐵 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 𑐳𑑂𑐰𑐫𑐾 𑐩𑐵𑐣𑐶 𑐎𑐵 ! 𑐀𑐠𑐾 𑐮𑐵 𑐩𑐩𑑅𑐔𑐵𑐫𑐵 𑐂𑐟𑐶𑐴𑐵𑐳 𑐥𑐸𑐂𑐎𑐵𑑅 𑐳𑑂𑐰𑑅𑐳𑐵 𑐐𑐸𑐮𑐶𑐏𑐾 𑐱𑐵𑐎𑐵𑐴𑐵𑐬𑐷𑐟𑐫𑑂𑐟 𑐩𑐩𑑅𑐔𑐵𑑄 𑐩𑐵𑑄𑐳𑐵𑐴𑐵𑐬𑐷 𑐫𑐵𑑅𑐐𑐸 𑐡𑐸 𑑋

𑐳𑐸 𑐧𑑂𑐬𑐩𑑂𑐴𑐸, 𑐳𑐸 𑐩𑐵𑐬𑐰𑐵𑐜𑐷 𑐣𑐵𑐩𑐹𑐡 𑐳𑐾 𑐣𑐵𑐩𑐹𑐡 𑐱𑐵𑐎𑐵𑐴𑐵𑐬𑐷𑐟 𑐣𑑄 𑐩𑐩𑑅𑐔𑐶𑐫𑐵 𑐣𑑂𑐴𑑂𑐫𑑅𑐣𑐾 𑐠𑑂𑐫𑐣𑐾𑐰𑑄 𑐠𑑅 𑐥𑐬𑐵𑐖𑐶𑐟 𑐖𑐹𑐐𑐸 𑐩𑐴𑐳𑐸𑐳 𑐫𑐵𑐂 𑑋 𑐩𑐾𑐣𑐎𑐵 𑐏𑐣𑐾𑐰𑑄 𑐰𑐶𑐱𑑂𑐰𑐵𑐩𑐶𑐟𑑂𑐬𑐫𑐵 𑐟𑐥𑐳𑑂𑐫𑐵 𑐨𑑄𑑄𑐐 𑐖𑐹𑐠𑐾𑑄 𑐩𑐩𑑅𑐔𑐶𑐫𑐵 𑐧𑐵𑐳𑑄 𑐮𑐛𑑂𑐛 𑐖𑐸𑐫𑐵𑑅 𑐎𑐠𑐸𑑄 𑐎𑐸𑐴𑐵𑑄𑐰𑑄𑐐𑐸 𑐴𑑀𑐳 𑐴𑐾 𑐡𑐂𑐩𑐏𑐸 𑑋 𑐠𑑂𑐰 𑐩𑐩𑑅𑐔𑐶𑐎𑐾 𑐧𑐱𑐷𑐎𑐬𑐞 𑐫𑐵𑐫𑐾𑐐𑐸 𑐱𑐎𑑂𑐟𑐶 𑐡𑐸𑐐𑐸 𑐢𑐵𑐫𑐾 𑐮𑐵 𑐰𑐵 𑐩𑐩𑑅𑐔𑐶𑐫𑐵 𑐨𑐎𑑂𑐟𑐶 𑐖𑐹𑐐𑐸 𑐢𑐵𑐫𑐾 ! 𑐠𑑂𑐰 𑐕𑐸𑑄 𑐴𑐾 𑐩𑐢𑐵𑐳𑐾 𑐢𑐵𑐫𑐾— 𑐩𑐩𑑅𑐔𑐵 𑐀𑐖𑐵𑑅𑐐𑐸 𑐣𑐳𑐵 𑐏𑑅 𑐐𑐸𑐐𑐸 𑐳𑐎𑐳𑐶𑐫𑐵𑑄 𑐫𑑅 𑑋

𑐕𑐩𑑂𑐴 𑐥𑐵𑐳𑐵 𑐮𑐵 𑐫𑐾𑑃𑐫𑑂 𑐰𑐂𑐐𑐸 𑐢𑐫𑐵𑐐𑐸 𑐴𑐾 𑐩𑐩𑑅𑐔𑐵 𑐮𑐸𑐩𑑄𑐎𑐵𑑅 𑐴𑑃 ! 𑐠𑑂𑐰 𑐴𑐾 𑐩𑐩𑑅𑐔𑐵𑐫𑐵𑐐𑐸 𑐣𑐶𑑄𑐟𑐶𑑄 𑐟𑑂𑐰𑐴𑑅 𑐩𑐡𑐸 𑐟𑑂𑐰𑐴𑑅 𑐡𑐫𑐾𑐎𑐵𑑅 𑐎𑐵𑐖 𑐫𑐵𑐣𑐵𑑅 𑐫𑐾𑑃𑐫𑑂 𑐰𑐫𑐾𑐐𑐸 𑐴𑑃 ! 𑐣𑐟𑑂𑐬 𑐰 𑐣𑑂𑐴𑐵𑐫𑑂𑐥𑑂𑐰𑐵𑑅 𑐟𑐶𑐣𑐵 𑐖𑐸𑐂𑐩𑐵𑑅𑐠𑐵𑐫𑑂 𑐩𑑂𑐰𑐵𑐫𑑂 𑐣𑑄 𑐰𑐫𑐾 𑐩𑐏𑐸 𑐴𑑃 ! 𑐀𑐠𑐾 𑐴𑐾 𑐩𑐾𑐩𑑂𑐴 𑐥𑐵𑐳𑐵 𑐕𑐩𑑂𑐴 𑐡𑐸, 𑐮𑐵 𑐩𑐫𑑅 𑐩𑐩𑑅𑐔𑐶𑐫𑐵 𑐏𑑀𑐮𑐵 𑐖𑐎 𑐣𑐫𑐾𑐫𑑅– 𑐮𑐵 𑐨𑑂𑐫𑐵𑑅𑐐𑐸 𑑋 𑐠𑑂𑐰 𑐖𑐸𑐮 𑐏𑑂𑐫𑑃𑐾𑐫𑐵 𑐩𑑂𑐴𑐵𑐳𑐸𑐐𑐸 𑐩𑐫𑑅, 𑐟𑐸𑐂𑐐𑐸 𑐫𑑅 𑐢𑐵𑑅𑐠𑐾𑑄 𑐖𑐵𑑅𑐐𑐸 𑐏𑑃 𑑋

𑐰𑐫𑑂𑐎𑑅 𑐥𑐵𑐳𑐵𑑄 𑐣𑑂𑐴𑑂𑐫𑐵𑐧𑐮𑐾𑑄 𑐩𑐩𑑅𑐔𑐵 𑐣𑐫𑐾 𑐩𑐵𑐮𑐎𑐶 𑐖𑐶𑐟𑑅𑐥𑐵𑐳𑐵 𑐧𑑂𑐰𑐣𑐵𑐫𑑄𑐎𑐶𑐐𑐸 𑑋 𑐥𑐵𑐳𑐵𑑄 𑐩𑐩𑑅𑐔𑐵𑐫𑐵 𑐏𑑀𑐮𑐵 𑐟𑐸𑐂𑐎𑐵𑑅 𑐣𑐂, 𑐖𑐶𑑄 𑐮𑐵 𑐖𑐎 𑐣𑐫𑐾𑐐𑐸 𑑋 𑐕𑐩𑑂𑐴 𑐧𑑂𑐬𑐩𑑂𑐴𑐸 𑐥𑐵𑐳𑐵 𑐡𑐸, 𑐰𑐫𑑂𑐎𑑅𑐫𑐵 𑐩𑐩𑑅𑐔𑐵 𑐣𑐫𑐾 𑐩𑐵𑐮𑐎𑐶 𑐖𑐶𑐠𑐵𑐫𑑂 𑐀𑐦𑐶𑐳𑐫𑑂 𑐰𑐂𑐐𑐸 𑐀𑐮𑐾 𑐩𑐩𑑅𑐔𑐵 𑐀𑐬𑑂𑐜𑐬 𑐫𑐵𑐎𑐾 𑐧𑐶𑐂𑐐𑐸 ! 𑐏𑑃 𑐕𑐸 𑐢𑐵𑑅𑐳𑐵 𑐰𑐫𑑂𑐎𑑅 𑐥𑐵𑐳𑐵 𑐩𑐩𑑅𑐔𑐵 𑐣𑑄 𑐣𑐫𑐾𑐩𑐵𑑅𑐩𑑂𑐴,𑐖𑐵𑐟 𑐰𑐣𑐷 𑐢𑐎𑐵𑑅 𑐣𑑄 𑐐𑑂𑐫𑐵𑑅𑐩𑑂𑐴 𑑋

𑐄𑐎𑐶𑑄 𑐰𑑄 𑐳𑐎𑐳𑐶𑐫𑐵 𑐣𑑂𑐴𑑂𑐫𑑅𑐣𑐾 𑐩𑐟𑐮𑐧 𑐴𑑀𑐚𑐮𑐫𑑂 𑐰𑐣𑐵𑑅 𑐩𑐩𑑅𑐔𑐵 𑐣𑑅 𑐩𑐰𑑄 𑑋 𑐩𑐩𑑅𑐔𑐶𑐫𑐵 𑐖𑐎 𑐏𑑃 𑐮𑑂𑐴𑐵𑐫𑐾𑐳𑐵 𑐐𑐸𑐮𑐶 𑐏𑑃 𑐮𑑂𑐴𑐵𑐫𑐾 ! 𑐩𑐣𑐹𑐟𑐫𑑂𑐳𑑄 𑐳𑐸𑐠𑐣𑑂𑐴𑐵𑐥𑐵𑑄 𑐔𑑂𑐫𑐵𑐫𑐵 𑐥𑐮𑐾𑐳𑐵 𑐩𑐴𑐵𑐧𑑁𑐡𑑂𑐢𑐫𑑂 𑐩𑐩𑑅𑐔𑐵 𑐣𑑅 𑐰𑐫𑐵𑐔𑑂𑐰𑐣𑐷𑐐𑐸 𑑋 𑐔𑑂𑐫𑐵 𑐡𑐵𑐫𑐾𑐎𑐾𑐟 𑐡𑐸𑐬𑐸 𑐴𑐂 𑐩𑐏𑐸𑐣𑐶 𑐩𑐩𑑅𑐔𑐵 𑐳𑐮𑑄𑐳𑑅 𑐥𑑂𑐮𑐾𑐚 𑐦𑐸𑐂 𑐢𑐸𑑄𑐎𑐷 𑑋 𑐔𑑂𑐫𑐵 𑐣𑐶𑐐𑐹 𑐎𑐥 𑐟𑑂𑐰𑑄𑐳𑐵𑑄 𑐥𑑂𑐰𑐵𑑅 𑐡𑐣𑐶𑐩𑐏𑐸 ,𑐩𑐩𑑅𑐔𑐵 𑐕𑐐𑐹 𑐥𑑂𑐮𑐾𑐚 𑐣𑑅𑐳𑐵 𑐢𑑅𑐎𑐩𑐶𑑄𑐎 𑐢𑐎𑑂𑐎𑐵 𑐟𑐫𑐾𑐡𑐸 𑑋

𑐔𑑂𑐫𑐵 𑐳𑑂𑐰𑐫𑐵𑑅 𑐩𑐩𑑅𑐔𑐵 𑐎𑐟𑐶𑐮𑐵𑐳𑐾𑐮𑐶𑑄 𑐮𑐏𑐫𑑂 𑐢𑑂𑐫𑐧𑐵 𑐎𑑂𑐰𑐦𑐵𑑅 𑐖𑐸𑐂 𑐮𑐵 ? 𑐳𑐸𑐥𑑂𑐬𑐸 𑐳𑐸𑐥𑑂𑐬𑐸 𑐩𑐩𑑅𑐔𑐵 𑐎𑑂𑐰𑐦𑐵𑐫𑐾𑐐𑐸 𑐟𑑂𑐰𑑅𑐟𑐵𑑅 𑑋 𑐕𑐩𑑂𑐴 𑐥𑐵𑐳𑐵𑐫𑐵𑐟 𑐮𑐵 𑐠𑑂𑐰 𑐩𑐩𑑅𑐔𑐵𑑄 𑐫𑐵𑐣𑐵𑑅 𑐠𑑁𑑄 𑐟𑐎 𑐎𑐮𑐵𑐟𑑄 𑐴𑐶𑐳𑑂𑐫𑐵𑐣𑐵 𑐔𑑂𑐰𑐣𑐷𑐐𑐸 𑐴𑑃 “𑐐𑐫𑑂𑐔𑑂𑐰𑑄 𑐩𑐩𑑅𑐔𑐵 𑐢𑐎𑐵𑑅” 𑑋 𑐏𑑃 𑐕𑐸 𑐖𑐸𑐮 𑐢𑐵𑑅𑐳𑐵 𑐥𑐵𑐳𑐵𑐫𑐵 𑐣𑐎𑐟𑐶𑐣𑐶 𑐧𑑂𑐫𑐵𑐴𑐵 𑐫𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐳𑐳𑐮𑐫𑑂 𑐡𑐸𑐔𑐵𑐫𑐾𑐎𑑅 𑐰𑐣𑐾𑐧𑐮𑐫𑑂 𑐳𑐳𑐮𑐫𑑂 𑐥𑐵𑐴𑐵𑑃 𑐫𑐵𑐎𑐾 𑐴𑑅𑐐𑐸 𑐣𑐫𑐾 𑐩𑐖𑐶𑐄 𑐢𑐎𑐵𑑅 𑐥𑐵𑐳𑐵𑐫𑐵𑐟 𑐳𑐸𑐣𑐵𑑄 𑐣𑑂𑐴𑐵𑐫𑑂𑐥𑐣𑐫𑑂 𑐳𑑂𑐰𑐵𑑄 𑐥𑐸𑐫𑐵𑐟𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐄𑐎𑐶𑑄 𑐰 𑐥𑐵𑐳𑐵𑑄 𑐳𑐳𑐮𑐫𑑂 𑐰𑐣𑐾 𑐟𑑂𑐫𑐫𑐾𑐎𑐵𑑅 𑐩𑐩𑑅 𑐣𑐶𑐐𑐹𑐹 𑐥𑑂𑐮𑐾𑐚 𑐳𑑂𑐫𑐵𑐣𑐵𑐰𑐮 𑐠𑐾𑑄 𑑋 𑐴𑐠𑐵𑐫𑑂𑐥𑐠𑐵𑐳𑑄 𑐣𑑅𑐐𑐸𑐮𑐶 𑐳𑑂𑐫𑐠𑐵𑐎𑑂𑐎 𑐥𑐸𑐣𑐵𑑅 𑐩𑑂𑐴𑐸𑐟𑐸𑐂 𑐠𑐎𑑂𑐰𑐫𑐵 𑐮𑐵 𑐔𑑂𑐰𑐟𑐹𑐐𑐸 𑐩𑐔𑐵𑑅 𑐴𑑃 𑐥𑐵𑐳𑐵𑐫𑐵 𑑋 𑐳𑐳𑐮𑐫𑑂 𑐳𑐵𑑅𑐳𑐵𑑅𑐐𑐸 𑐟𑐫𑐵𑑅 𑐥𑐵𑐴𑐵𑑃 𑐫𑐵𑐎𑐾 𑐴𑐮 𑐴𑑃 ! 𑐦𑐸𑐎𑐳𑐶𑐣𑑄 𑐨𑐥𑐶𑐫𑐵𑐡𑐶𑐳𑑃, 𑐨𑐥𑐶𑐫𑐵𑐡𑐶𑐳𑑃 ! 𑐩𑐕𑐵𑐮𑐾𑐩𑑂𑐰𑐵𑑅 𑐠𑑅𑐐𑐸 𑐴𑐾 𑐕𑐾𑑃 𑐖𑐸𑐂𑐢𑐸𑑄𑐳𑐾𑐮𑐶 𑐢𑐵𑑅𑐐𑐸𑐮𑐶𑑄 𑐐𑐸𑐮𑐶 𑐢𑐵𑐫𑐾𑐎𑐵 𑐔𑑂𑐰𑐣𑐾𑐐𑐸 𑐕𑐐𑐹 𑐣𑐶𑐐𑐹 𑐮𑐵 𑐣𑐫𑐾𑐩𑐵𑐮𑐶 𑐢𑐎𑐵𑑅 𑐮𑐵 𑐕𑐎𑐹 𑐩𑑂𑐴𑐸𑐟𑐸𑐂 𑐕𑐸 𑐟𑐫𑐵 𑐴𑑃 ! 𑐌… 𑐴𑑀…𑐴𑑀..𑐩𑑂𑐴𑐸𑐟𑐸𑑄 𑐮𑐵 𑐮𑐵 𑐕𑑂𑐰𑐵𑐬𑐵𑐎𑑂𑐎 𑐥𑐶𑐟𑐕𑑂𑐰𑐫𑐵 𑐴𑐮 𑐴𑑃 !

𑐐𑐶𑐮𑐵𑐳𑐫𑑂 𑐔𑑂𑐰𑑄𑐐𑐸 𑐮𑑅 𑐔𑐸𑑃𑐂 𑐔𑐸𑑃𑐂 𑐟𑑂𑐰𑑄𑐐𑐸 𑐏𑐣𑐵𑑅 𑐥𑐵𑐳𑐵 𑐧𑑂𑐰𑐣𑐵𑑅 𑐫𑑄𑐎𑐵𑐩𑑂𑐴𑐾𑐳𑐶𑐣𑑄 𑐠𑐵𑐟 𑐮𑐵 𑐢𑐎𑐵𑑅 𑐡𑐸𑐐𑐵𑐠𑐶𑐂 𑐢𑐸𑐐𑐸 𑐢𑐸𑐐𑐸 𑐡𑐵𑐮 𑐴𑑃 ! 𑐗𑐣 𑐮𑑅 𑐴𑐾 𑐴𑑀 𑐴𑑀 𑐥𑐸𑐟 𑐴𑑃 ! 𑐀𑐠𑐾 𑐴𑐾 𑐨𑑂𑐰𑐫𑑂 𑐣𑐎𑐾 𑐴𑐮 𑐴𑑃 ! 𑐨𑑂𑐰𑐫𑑂 𑐣𑑄 𑐃 𑐔𑐸𑐬𑐸 𑐔𑐸𑐬𑐸 𑐰𑑄𑐎𑐵 𑐩𑐣𑐳𑐾𑑄 𑐔𑑂𑐰𑐣𑐾 𑐩𑐵𑐮 𑐴𑑃 ! 𑐨𑑂𑐰𑐖𑐫𑑂 𑐣𑑄 𑐕𑐸𑑄 𑐴𑐾 𑐩𑐣𑐳𑐾 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑐣𑐵𑑅 𑐐𑐸𑐮𑐶 𑐎𑐬 𑐫𑐵𑐟 𑐴𑑃 𑑋

𑐀𑐣𑑂𑐟𑐫𑑂 𑐳𑐳𑑅𑐀𑐧𑐸𑐩𑑂𑐴 𑐰𑐫𑐵𑑅 𑐎𑐬 𑐫𑐵𑑅𑐰𑐮 𑐴𑑃 “𑐨𑐥𑐶𑐫𑐵𑐡𑐶𑐳𑑃 𑐩𑐕𑐵𑐮𑐾𑐩𑐵𑑅 𑐢𑐿𑐐𑐸 𑐡𑐸𑐮𑐵 ! 𑐣𑑂𑐴𑐵𑐔𑑅 𑐣𑑄 𑐕𑐸𑑄 𑐨𑐥𑐶𑐫𑐵 𑐩𑐡𑐷, 𑐎𑐵… 𑐨𑐥𑐶𑐫𑐵𑐡𑐶𑐳𑑃 ! ” 𑐳𑐳𑑅𑐀𑐧𑐸𑐩𑑂𑐴𑐾𑐳𑐶𑐣𑑄 𑐫𑐎𑑂𑐰 𑐴𑐾 𑐎𑐬 𑐫𑐵𑑅𑐐𑐸𑐮𑐶𑑄 𑐥𑐵𑐳𑐵𑐫𑐵 𑐩𑑂𑐴𑐸𑐟𑐸𑑄 𑐔𑑂𑐰𑐵𑐎𑑂𑐎 𑐠𑐠𑐾 𑐢𑐵𑐫𑐾 𑐮𑐵𑐟 𑐴𑑃 “𑐠𑐣 𑐰𑐫𑐾𑐟 𑐩𑐩𑑅𑐔𑐵 𑐣𑐫𑐵𑐰𑑅𑐐𑐸𑐮𑐶𑑄 𑐠𑐎𑑂𑐰𑐫𑑂 𑐮𑐵 𑐔𑑂𑐰𑐟𑐹𑐫𑐵 𑐕𑐸𑑄 𑐴𑐾 𑐣𑐫𑐾 𑐩𑐖𑐶𑐄 𑐕𑐸 𑐫𑐵𑐫𑐾 !” 𑐥𑐵𑐳𑐵𑐫𑐵 𑐏𑑄 𑐳𑐳𑑅𑐀𑐧𑐸𑐩𑑂𑐴 𑐣𑑂𑐴𑐶𑐮𑐾 𑐦𑐷 𑐩𑐦𑐫𑐵𑑅 𑐩𑑂𑐴𑐸𑐟𑐸 𑐟𑐶𑐟𑐶𑐄𑑃 𑐧𑐿𑐐𑐮𑐫𑑂 𑐠𑐴𑐵𑑄 𑐰𑐣𑐵𑐕𑑂𑐰𑐟 𑐴𑑃 ! 𑐧𑐿𑐐𑐮𑐫𑑂 𑐣𑑄 𑐰 𑐴𑐾 𑐏𑑃 𑐎𑐣𑐵𑑅 𑐮𑐵 𑐧𑐿𑐐𑑅 𑐴𑐾 𑐠𑑂𑐰𑐎𑑂𑐎 𑐣𑑂𑐴𑐶𑐄𑐐𑐸 𑐳𑑅 𑐟𑐵𑐫𑐾𑐡𑐸𑐧𑐮𑐫𑑂 𑐮𑐵 𑐥𑐵𑐳𑐵𑐫𑐵 𑐏𑑂𑐰𑐵𑑅 𑐀𑐣 𑐳𑐸𑐔𑐸𑐎𑐾 𑐠𑐣 𑐳𑐸𑐔𑐸𑐎𑐾 𑐩𑑄𑐟 𑐴𑑃 !

𑐄𑐮𑑂𑐳𑐵𑑄𑐣𑐶𑐳𑐾𑑄 𑐎𑐮𑐵𑑅𑐔𑐵𑑄 𑐖𑐵 𑐕𑐎𑐹𑐔𑐵 𑐖𑐎 𑐎𑐩 𑐣𑑅𑐳𑐵𑑄 𑐩𑐩𑑅𑐔𑐵 𑐣𑐫𑐵𑑅 𑐮𑐵 𑐔𑑂𑐰𑐟𑐸𑐮 𑐮𑐵𑐎𑐶 𑐕𑐸 𑐢𑐎𑐵𑑅 𑐴𑐵𑐫𑐾𑐎𑐷𑐐𑐸 𑐴𑑃 𑑋 𑐀𑐠𑐾𑑄 𑐴𑐾 𑐏𑐸𑐳𑐶𑐂 𑐎𑑂𑐰𑐧𑑂𑐰𑐵𑐣𑐵𑑅 𑐩𑐡𑐸𑐩𑑂𑐴 𑐎𑐩𑐬𑐾𑐜 𑐩𑐡𑐣 𑐨𑐞𑑂𑐜𑐵𑐬𑐷𑐖𑐸𑑄 𑐖𑐶𑐟𑑅 𑐫𑑅𑐐𑐸 𑐏𑐵𑐣𑐵 𑐩𑐩𑑅𑐔𑐵 𑐢𑐵𑐂 𑐮𑐵 ? 𑐩𑐩𑑅𑐔𑐵𑐫𑐵 𑐎𑑂𑐬𑐾𑐖𑐷𑐟 𑐩𑐵𑐮𑐵 𑐳𑑂𑐰𑑅𑐳𑐵 𑐩𑐡𑐣 𑐨𑐞𑑂𑐜𑐵𑐬𑐷 𑐖𑐎 𑐕𑐸, 𑐐𑑂𑐰𑐵𑑅 𑐐𑑂𑐰𑐵𑑅𑐣𑐾𑐟𑐵𑐣𑐶𑐳𑐾𑑄 𑐎𑐫𑑂𑐟𑐵𑐟 𑐠𑑂𑐫𑑄𑐎 𑐗𑑂𑐰𑑅𑐕𑐹𑐰𑐂 𑐎𑐵 𑑋 𑐩𑐩𑑅𑐔𑐵 𑐣𑐣𑑄 𑐥𑐷𑐐𑑅 𑐟𑐎 𑐮𑐵 𑐳𑐵𑐳𑑅 𑐴𑐾 𑐩𑐦𑐶𑐳𑐾 𑐣𑐂𑐥𑐶𑑄 𑐡𑐸 𑑋

𑐮𑑂𑐴𑐵𑐟𑐶𑐂 𑐕𑐐𑑅 𑐩𑑂𑐴𑐸𑐟𑐸𑐂 𑐕𑐐𑑅, 𑐎𑐠𑐸𑐂 𑐕𑐐𑑅, 𑐥𑑂𑐰𑐵𑐠𑐫𑑂 𑐠𑑂𑐫𑑄𑐐𑐸 𑐣𑐵𑐥𑑄 𑐫𑐵𑐣𑐵𑑅 𑐕𑐎𑑅𑐫𑐵 𑐥𑑂𑐫𑑄𑐐𑑅 𑐩𑐩𑑅𑐔𑐵 𑐮𑐵 𑐣𑐫𑐾𑐰𑑄 𑐮𑐵𑐂𑐣𑑄 𑐔𑑂𑐰𑐣𑐷 𑑋 𑐩𑐾𑐩𑐾𑐐𑐸 𑐐𑐵𑐕𑐶 𑐣𑐫𑐵𑑅 𑐩𑑂𑐴𑐵𑑅𑐮 𑐎𑐵 𑐢𑐵𑐫𑐾𑐦𑐸, 𑐟𑐬 𑐩𑐩𑑅𑐔𑐵 𑐢𑐵𑐮𑐎𑐶 𑐎𑐣𑑂𑐚𑐹𑐬𑐫𑑂 𑐡𑐵𑑄 𑐎𑑂𑐰𑐦𑐵𑐫𑐾𑐠𑐾𑑄 𑐏𑐸𑐟𑑂𑐬𑐸𑑂𑐬 𑐏𑐸𑐟𑑂𑐬𑐸𑑂𑐬 𑐎𑐵 ! 𑐩𑐾𑐥𑐶𑑄 𑐕𑐸 𑐳𑑂𑐰𑐫𑐾, 𑐖𑐶 𑐴𑐾 𑐳𑑂𑐰 𑐮𑐾, 𑐣𑐮𑐎𑐶 𑐐𑐵𑐟 𑐢𑐵𑐫𑐾 𑐩𑐳𑑅 𑑋 𑐎𑐮𑐵𑑅𑐔𑐵𑑄 𑐁𑑅 𑐮𑐵 𑐐𑐵𑐟 ! 𑐐𑐵𑐟 ! 𑐎𑐣𑑂𑐴𑐫𑑂 𑐖𑐷𑐰𑐣𑐖𑐮 𑐟𑑂𑐰𑐣𑐾 𑐩𑐵𑐫𑐾𑐎 𑐕𑑂𑐫𑐬𑐾 𑐖𑐸𑐂 𑐳𑑂𑐰𑑅 𑐢𑐵𑑅𑐳𑐵𑑄 𑐖𑐶𑐐𑐸 𑐩𑑂𑐴𑐸𑐟𑐸 𑐩𑐩𑑅𑐔𑐵 𑐣𑐵𑐥𑑄 𑐨𑐾𑐬𑐾 𑐖𑐸𑐫𑐵𑐔𑑂𑐰𑐣𑐷 𑑋

𑐖𑐶 𑐣𑑄 𑐎𑐮𑐵𑑅𑐔𑐶𑐟 𑐏𑑂𑐫𑐵𑑅 𑐧𑐔𑑂𑐕𑐶 𑐣𑐷 𑐧𑐔𑑂𑐕𑐶 𑐫𑐵𑐣𑐵𑑅 𑐢𑐵𑐫𑐾𑐐𑐸 𑐳𑐳𑐮𑐫𑑂 𑐕𑐸 𑐰𑐫𑐾𑐐𑐸 ! 𑐳𑐳𑐮𑐫𑑂 𑐰𑐣𑐾𑐐𑐸 𑐳𑑂𑐰𑐫𑐵𑑄 𑐥𑐳𑐮𑐫𑑂 𑐰𑐣𑐵𑑅 𑐩𑐩𑑅 𑐣𑐶𑐐𑐹 𑐥𑑂𑐮𑐾𑐚 𑐣𑐫𑐵𑑅 𑐢𑐎𑑂𑐎𑐵𑑅 𑐟𑐫𑐾𑐐𑐸 𑐴𑐾 𑐫𑑅 𑑋 𑐀𑐫𑑂𑐮𑐵𑑅, 𑐔𑐸𑐬𑑀𑐚, 𑐐𑑂𑐰𑐫𑑂 𑐐𑑂𑐰𑐵𑑅 𑐠𑐾𑑄 𑐩𑐩𑑅𑐔𑐵 𑐣𑑄 𑐣𑐳𑐵 𑐴𑐾 𑐏𑑅𑐮𑐵 𑐕𑐸 𑐠𑐾𑑄 𑐖𑐶𑐟𑑅𑐮𑐵 𑐣𑑂𑐴𑐶𑑄 𑐕𑐐𑐹 𑐥𑑂𑐮𑐾𑐚 𑐮𑐵 𑐩𑐣𑐳𑐾𑑄 𑐔𑑂𑐰𑐣𑐾 𑐩𑐦𑐸 𑐢𑐫𑐵𑑄 𑑋 𑐀𑐗 𑐐𑐣𑑄 𑐥𑐵𑐬𑑂𑐚𑐶𑐂 𑐩𑐩𑑅𑐔𑐵 𑐩𑑄𑐟𑐎𑐶…𑐕𑐸 𑐢𑐵𑐫𑐾 𑐥𑑂𑐰𑐵𑑅 𑐴𑐾 𑐩𑐡𑑄𑐎𑐵 𑐴𑐸𑑃…𑐥𑐵𑐬𑑂𑐚𑐶 𑐴𑐾 𑐩𑐏𑐸𑐎𑐵 𑐴𑐸𑑃 !

𑐩𑐩𑑅𑐔𑐵 𑐕𑐸 𑐏𑑅, 𑐕𑐸𑐔𑐸𑐣𑐫𑑂 𑐥𑑂𑐰𑑅𑐔𑐶𑐣𑐵𑐟𑑅𑐐𑐸 𑐮𑐵 𑐮𑐵 𑐏𑑅 𑐩𑐩𑑅𑐔𑐵 𑑋 𑐰 𑐴𑐾 𑐕𑐸𑐔𑐸𑐣𑐫𑑂 𑐥𑑂𑐰𑑅𑐔𑐶𑐣𑐵 𑐟𑑅𑐐𑐸 𑐰𑐳𑑂𑐟𑐸 𑐠𑐫𑑂𑐨𑐣𑑄 𑐥𑑂𑐬𑐏𑑂𑐫𑐵𑐟 𑐫𑐵𑐣𑐾 𑐥𑐥𑐸𑐮𑐬 𑐖𑐸𑐂 𑐢𑐎𑐵𑑅 𑐣 𑐩𑐩𑑅𑐔𑐶𑐫𑐵 𑐁𑐧𑐶𑐲𑑂𑐎𑐵𑐬𑑄 𑐳𑐶𑐄 𑐣 𑐖𑐶𑑄 𑐴𑐾 𑐳𑐶𑐄 𑑋 𑐠𑑂𑐰𑐴𑐾 𑐕𑐸𑐔𑐸𑐣𑐫𑑂 𑐥𑑂𑐰𑑅𑐔𑐶𑐣𑐵𑐟𑑅𑐐𑐸 𑐰𑐳𑑂𑐟𑐸𑑄 𑐩𑑂𑐴𑐶𑐐𑑅 𑐟𑐎 𑐴𑑀𑐚𑐮𑐫𑑂 𑐔𑑂𑐫𑐵 𑐐𑐶𑐮𑐵𑐳 𑐳𑐶𑐮𑐷𑐩𑑂𑐴 𑐎𑐵𑐣𑑂𑐕𑐵𑑄 𑐠𑑁𑑄 𑐨𑐬𑐵𑐫𑑂𑐏𑐵𑑅𑐐𑐸 𑐧𑐶𑐮𑑂𑐜𑐶𑐒𑑂𑐐 𑐢𑐳𑑂𑐰𑐵𑐎𑐵 𑐎𑐵𑐣𑑂𑐕𑐵𑐳𑐵𑐴𑐸 𑐖𑐸𑐂 𑐢𑐸𑑄𑐎𑐮 𑑋

𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐣𑐥𑐳𑑅 𑐟𑐫𑐵 𑐢𑐎𑐵𑑅 𑐳𑐸𑐣𑐵𑐣𑑄 𑐢𑐵𑐂𑐧𑐮𑐫𑑂 𑐕𑐸𑑄 𑐖𑑂𑐫𑐵 𑐫𑐵𑐣𑐵𑑅 𑐣𑐫𑐾𑐐𑐸 𑐁𑑃𑐚 𑐩𑑄𑐟 𑐖𑐸𑐂 𑐄𑐎𑐶𑑄 𑐣𑐥𑐳𑑅 𑐟𑐮 𑐢𑐵𑐂 𑑋 𑐩𑐣𑐹𑐟𑐫𑑂𑐳𑑄 𑐎𑑂𑐰𑐴𑑂𑐫𑑄𑐎𑐵𑑅 𑐳𑑂𑐰𑐂 𑑋 𑐟𑐬 𑐠𑑁𑑄𑐎𑐣𑑂𑐴𑐫𑑂 𑐩𑐩𑑅𑐔𑐵 𑐥𑐳𑑅 𑐟𑐫𑐵 𑐢𑐵𑐂𑐧𑐮𑐫𑑂 𑐗𑐷𑐳𑑄 𑐫𑐵𑐄𑑃𑐎 𑐀𑐣𑐸𑐩𑐵𑐣 𑐫𑐵𑐂 “𑐎𑐵 𑐠𑑂𑐰𑑄 𑐢𑑂𑐫𑐧𑐵 𑐎𑐩𑐾 𑐫𑐵𑐂𑐐𑐸 𑐖𑐸𑐮 𑐎𑐵 𑑋” 𑐩𑐩𑑅𑐔𑐵 𑐠𑐸𑐮𑐶 𑐥𑐥𑐸𑐮𑐬 𑐖𑐹𑐐𑐸 𑐰𑐵𑐳𑑂𑐟𑐰𑐫𑑂 𑐕𑐸𑐔𑐸𑐣𑐫𑑂 𑐮𑐵 𑐥𑑂𑐰𑑅𑐔𑐶𑐣𑐵 𑐟𑑅𑐐𑐸𑐮𑐶𑑄 𑐏𑑅𑑋

𑐜𑐵𑐂𑐬𑐾𑐎𑑂𑐚 𑐮𑐵 𑐏𑐣𑐾 𑐩𑐡𑐂𑐐𑐸 𑐖𑐹𑐐𑐸𑐮𑐶𑑄 𑐣𑑂𑐴𑑂𑐫𑐵𑐩𑑂𑐴𑐾𑐳𑐶𑐣𑑄 𑐠𑑂𑐰𑐂𑐟 𑐫𑐵𑐄𑑃𑐎 𑐑𑐸𑐟𑐸𑐎𑐵 𑐕𑑂𑐰𑐂𑐐𑐸 𑐏𑑅 𑑋 𑐣𑐟𑑂𑐬 𑐐𑐵𑐜𑐵𑐫𑑂 𑐟𑐫𑐵𑑅, 𑐡𑑀𑐎𑐫𑑂 𑐟𑐫𑐵𑑅 𑐮𑐵 𑐴𑑅𑐐𑐸 𑐏𑐣𑐷𑐧𑐮𑐫𑑂, 𑐎𑑄𑐐𑐫𑑂 𑐩𑑂𑐫𑐾𑐫𑑂𑐫𑐵𑐐𑐸 𑐐𑐟𑐶 𑐏𑐣𑐷𑐧𑐮𑐫𑑂 𑐩𑑂𑐴𑐸𑐟𑐸𑐂 𑐩𑐾𑐎𑐠𑑄 𑐃 𑐖𑐎 𑐧𑐸𑐫𑐵 𑐩𑐰𑑅𑐳𑐵𑑄 𑐎𑐸𑐐𑐵𑑅, 𑐣𑐫𑐾𑐐𑐸 𑐮𑐵 𑐕𑐸 ! 𑐨𑐵𑐬𑐟𑑄 𑐰𑑅𑐥𑐶𑑄 𑐮𑐸𑑃𑐫𑐵 𑐟𑐶𑐳𑐵 𑐡𑐫𑐾𑐎𑐷𑐥𑐶𑑄 𑐧𑑄𑐐𑐵𑐮𑐷𑐟 𑐐𑐸𑐔𑑂𑐔𑐵 𑐟𑑂𑐰𑐵𑐮𑐫𑑂 𑐕𑐾𑑃𑐫𑑂 𑐕𑐾𑑃𑐫𑑂 𑐎𑑂𑐰𑐠𑐵 𑐥𑐟𑐶𑐎𑑄 𑐡𑐸 𑑋 𑐄𑐩𑐶𑐳𑑄 𑐣𑑂𑐫𑐵𑐫𑐵 𑐮𑐵 𑐧𑐵𑐴𑐾𑐎𑑄 𑐩𑐾𑐐𑐸 𑐩𑐣𑑅, 𑐟𑐬 𑐩𑐩𑑅𑐔𑐵 𑐢𑐵𑑅𑐳𑐵 𑐏𑐹𑐧 𑐣𑐂𑐐𑐸 𑑋

𑐖𑐶𑑄 𑐂𑐩𑐶𑐳𑑄 𑐣𑑂𑐴𑐶𑑄 𑐣𑑂𑐴𑐶𑑄 𑐩𑐩𑑅𑐔𑐵 𑐣𑑂𑐫𑐵𑐣𑐵𑑅 𑐣𑑅𑐐𑐸 𑐏𑐣𑐵𑑅 𑐣𑑂𑐫𑐣𑐵— “𑐕𑐶𑐩𑐶𑐳𑑄 𑐣𑑂𑐫𑐵𑐫𑐵 𑐮𑐵𑑅 𑐧𑐵𑐴𑐾𑐎𑑄 𑐩𑐾𑐐𑐸 𑐮𑐵 𑐣𑑅𑐐𑐸 𑐩𑐏𑑄, 𑐩𑐩𑑅𑐔𑐵 𑐢𑐵𑑅𑐳𑐵 𑐏𑐹𑐧 𑐣𑑅𑐣𑐶 𑐢𑐫𑐵𑐧𑐮𑐫𑑂 𑐰 𑐧𑑄𑐐𑐵𑐮𑐷𑐟𑐫𑑂𑐳𑑄 𑐕𑐸 𑐢𑐵𑐮 𑐳𑐶𑐄 𑐮𑐵 ?” “𑐂𑑅𑐟𑑀 𑐰𑐶𑐱𑑂𑐰𑐎𑐬𑑂𑐩𑐵 𑐎𑐵 𑐥𑑂𑐬𑐳𑐵𑐡 𑐁𑐕𑐶 ! 𑐀𑐩𑐵𑐬 𑐩𑐵𑐮𑐶𑐎 𑐧𑑀𑐮𑐾𑐥𑐕𑐶 𑐂𑑅𑐥𑑂𑐬𑐳𑐵𑐡 𑐣 𑐏𑐵𑐧𑐾𑐟𑑀 𑐨𑐵𑐮𑑀 𑐎𑐵𑐖 𑐣 𑐴𑐵𑐧𑐾 𑑋” 𑐖𑐶 𑐣𑑂𑐴𑐶𑐮𑐾 𑐦𑐷 𑐩𑐦𑐫𑐵𑑅 𑐣𑑂𑐴𑐶𑐮𑐵𑑅 𑐴𑐬𑐬𑑂𑐬 𑑋 𑐧𑑄𑐐𑐵𑐮𑐷𑐟 𑐖𑐶 𑐣𑑂𑐴𑐶𑐮𑐵𑐐𑐸 𑐏𑐣𑐵𑑅 𑐖𑑂𑐫𑑅 𑐖𑐸𑐫𑐵𑑅 𑐰𑐵𑐟𑐵𑐴𑐵𑑄 𑐔𑑂𑐰𑐣𑐵𑐔𑑂𑐰𑐣 𑑋

𑐖𑐸𑐂𑐦𑐸 𑐐𑐸𑐩𑑂𑐴𑐳𑐶𑐟𑑄 𑐩𑐩𑑅𑐔𑐵 𑐡𑐸𑐐𑐸𑐡𑑂𑐫𑑅, 𑐐𑐸𑐩𑑂𑐴𑐳𑐶𑐟𑑄 𑐨𑐶𑑄𑐡𑑂𑐫𑑅 𑑋 𑐣𑑂𑐴𑑂𑐫𑐵𑐐𑐸 𑐎𑐠𑑄 𑐢𑐵𑑅𑐳𑐵𑑄, 𑐣𑑂𑐴𑑂𑐫𑐵𑐐𑐸 𑐎𑐠𑑄 𑐎𑐵𑑅𑐳𑐵𑑄 𑐰𑐵𑐳𑑂𑐟𑐰𑐫𑑂 𑐩𑐩𑑅𑐔𑐵 𑐣𑑂𑐴𑐹𑐩𑑂𑐴 𑐨𑐩𑐔𑐵 𑐫𑑅𑐠𑐾𑑄 𑐳𑐎𑐳𑐶𑐟𑑄 𑐫𑑅 𑑋 𑐠𑐠𑐾 𑐫𑑅𑐐𑐸 𑐰𑐳𑑂𑐟𑐸 𑐖𑐹𑐐𑐸𑐮𑐶𑑄 𑐖𑐶𑑄 𑐳𑑂𑐰𑐫𑐾 𑐮𑐵 𑐩𑐩𑑅𑐔𑐶𑐟 𑐬𑐵𑐲𑑂𑐚𑑂𑐬𑐶𑐫 𑐏𑐵𑐣𑐵 𑐑𑑀𑐲𑐶𑐟 𑐫𑐵𑐫𑐾𑐩𑐵𑑅 𑑋 𑐀𑐮𑐾 𑐰𑐶𑐡𑐾𑐱𑐷 𑐥𑐵𑐴𑐵𑑄𑐥𑐶𑑄𑐟 𑐬𑐵𑐟𑑂𑐬𑐷𑐨𑑀𑐖𑐫𑑂 𑐩𑐩𑑅𑐔𑐵 𑐣𑐵𑐥𑑄 𑐚𑑀𑐳𑑂𑐚 𑐥𑑂𑐬𑐳𑑂𑐟𑐵𑐰 𑐟𑐫𑐾𑐧𑐮𑐫𑑂 𑐰𑐶𑐡𑐾𑐱𑐷𑐟𑐫𑑂𑐐𑐸 𑐣𑑂𑐴𑑂𑐫𑑅𑐣𑐾 𑐗𑐷𑐐𑐸 𑐬𑐵𑐲𑑂𑐚𑑂𑐬𑐶𑐫 𑐐𑑁𑐬𑐰 𑐀𑐥𑑂𑐰𑑅 𑐩𑐖𑐸𑐂 𑐮𑐵 ?

𑐩𑐩𑑅𑐔𑐵𑐫𑐵 𑐴𑐬𑐬𑑂𑐬 𑐧𑐵𑐳𑑂𑐣𑐵𑑄 𑐩𑐖𑐸𑐂𑐐𑐸 𑐳𑐩𑑂𑐗𑑁𑐟𑐵 𑐣𑑄 𑐖𑐸𑐫𑐵𑐰𑐣𑐷, 𑐳𑐣𑑂𑐢𑐶 𑐣𑑄 𑐖𑐸𑐫𑐵𑐰𑐣𑐷, 𑐀𑐮𑐾 𑐀𑐣𑐸𑐡𑐵𑐣 𑐣𑑄 𑐡𑑂𑐫𑑅 𑐮𑐫𑑂𑐟𑐵𑐮𑐎𑐶 𑐰𑐬𑐡𑐵𑐣 𑐧𑐶𑐄 𑐠𑐾𑑄 𑐧𑐶𑐄 𑐩𑐰𑐂 𑐮𑐵 !
𑐫𑐾𑑃 𑐡𑐾𑐱𑐫𑑂 𑐕𑑂𑐫𑐵𑐳𑐕𑑂𑐫𑐵𑐳𑐟𑐶 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐢𑐫𑐵𑐐𑐸 𑐴𑐾 𑐮𑐸𑑃𑐫𑐵 𑐟𑐶𑐳𑐵 𑐥𑐳𑑅 𑐰 𑐩𑐩𑑅𑐔𑐵 𑐥𑐳𑑅 𑐏𑑅𑑋 𑐠𑐸𑐎𑐶𑑄 𑐳𑐶𑐂𑐡𑐸 𑐟𑐶𑐫𑐵𑑄 𑐟𑐶𑐳𑐵, 𑐣𑐫𑐵𑑄 𑐩𑐩𑑅𑐔𑐵 𑑋 𑐕𑐐𑐹 𑐱𑑀𑐨𑐵 𑐏𑑅𑐳𑐵 𑐩𑐾𑐐𑐸 𑐣𑐨𑐵 𑐩𑐵𑐣𑐾 𑐥𑑂𑐰𑐵𑑅𑐡𑑄 𑑋

𑐠𑑂𑐰 𑐣𑐶𑐟𑐵 𑐡𑐫𑐾𑐰𑑄 𑐩𑐾𑐐𑐸 𑐕𑐸 𑐩𑐵𑐣𑐶 ! ‘𑐨𑐵𑐐𑑂𑐫𑐩𑐵𑐣𑐶𑐟𑐫𑑂 𑐨𑐹𑐟𑐿 𑐎𑐩𑐵𑐬𑑀’ 𑐢𑐵𑑅𑐠𑐾𑑄 𑐫𑐾𑑃 𑐡𑐾𑐱𑐫𑐵𑐥𑐶𑐣𑐶 𑐣𑐫𑐾 𑐣𑑄 𑐡𑐸, 𑐟𑐶𑐫𑐾 𑐣𑑄 𑐡𑐸 𑑋 𑐁𑑅 𑐮𑐵 𑐠𑑂𑐰 𑐩𑐩𑑅𑐔𑐵 𑐫𑐾𑑃𑐫𑑂 𑐖𑐎 𑐩𑐏𑐸 𑐀𑐢𑐶𑐬𑐵𑐖𑑂𑐫𑐫𑐵 𑐩𑐹 𑐩𑐹 𑐧𑐖𑐵𑐬𑐫𑑂 𑐟𑐎𑑄 𑐴𑐬𑐬𑑂𑐬 𑐧𑐵𑐳 𑐰𑑅 𑑋 𑐣𑑂𑐴𑑂𑐫𑐵𑐎𑑂𑐰 𑐴𑐾 𑐧𑐵𑐳 𑐰𑑅𑐳𑐵𑑄 𑐩𑐾𑐠𑐵𑐫𑑂 𑐫𑐾𑑃𑐫𑑂 𑐠𑐾𑑄 𑐎𑑄𑐐 𑐧𑐵𑐳 𑐩𑐰𑑅 ! 𑐄𑐎𑐶𑑄 𑐣𑑄 𑐩𑐣𑐹𑐟 𑐫𑐾𑑃𑐫𑑂 𑐴𑐠𑐵𑐳𑑄 𑐰𑐫𑐾𑐟 𑐳𑐣𑐷𑐐𑐸 𑐏𑑅 𑑋

𑐩𑐩𑑅𑐔𑐵 𑐟𑑅𑐐𑐹 𑐥𑑂𑐬𑐎𑐵𑐬𑐫𑐵 𑐡𑐸𑐳𑐵𑑄 𑐕𑐸𑐔𑐸𑐣𑐫𑑂 𑐮𑐵 𑐥𑑂𑐰𑑅𑐔𑐶𑐣𑐵𑐟𑐂𑐐𑐸 𑐠𑑂𑐰𑐫𑐵 𑐧𑐶𑐱𑐾𑐲𑐟𑐵 𑐏𑑅, 𑐠𑑂𑐰𑐫𑐵 𑐩𑑂𑐴𑐳𑐷𑐎𑐵 𑐏𑑅 𑑋 𑐣𑐫𑐾 𑐢𑐸𑐣𑐾𑐰𑑄 𑐢𑐎𑑂𑐎𑐩𑐶𑑄𑐎 𑐢𑐎𑑂𑐎𑐵 𑐟𑐫𑐾𑐐𑐸 𑐠𑑂𑐰𑐫𑐵 𑐱𑑀𑐨𑐵 𑐏𑑅, 𑐩𑐾𑐎𑐠𑑄 𑐢𑐵𑐫𑐾𑐳𑐵 𑐠𑑂𑐰𑐫𑐵 𑐢𑐬𑑂𑐩 𑐏𑑅 𑑋 𑐴𑐬𑐬𑑂𑐬 𑐰𑐂𑐐𑐸 𑐧𑐵𑐳𑑂𑐣𑐵𑑄 𑐩𑑂𑐴𑐸𑐟𑐸𑐂 𑐃 𑐳𑐮𑑂𑐮 𑐧𑐸𑐫𑐵 𑐰𑐂𑐐𑐸 𑐠𑑂𑐰𑐫𑐵 𑐥𑑂𑐬𑐨𑐵𑐰 𑐏𑑅 𑑋 𑐐𑐸𑐎𑐶𑑄 𑐣𑑂𑐴𑑂𑐫𑐵𑐠𑐾𑑄 𑐖𑐵𑑅𑐩𑑂𑐴 𑐮𑑂𑐰𑐐𑐶𑐳𑐵𑑄 𑐕𑐐𑑅𑐳𑐵𑑄 𑐣𑐫𑐾 𑐢𑐎𑐵𑑅 𑐮𑑂𑐴𑐵𑑅 𑐣𑑂𑐴𑑂𑐫𑐔𑐶𑐎𑐷 𑑋 𑐄𑐎𑐶𑑄 𑐳𑐶𑐂𑐡𑐸 𑐴𑑂𑐫𑐵𑐎𑐸𑐮𑐵 𑐳𑑂𑐰𑐫𑐵𑑅 𑐩𑐩𑑅𑐔𑐵 𑐫𑐫𑐾𑐎𑐷𑐐𑐸 𑐳𑐎𑐳𑐶𑐣𑑄 𑑋 𑐖𑐫 𑐩𑐩𑑅𑐔𑐵 𑑋