𑐩𑐔𑐵 𑐔𑐶𑐣𑐵𑐏𑑃 𑐎𑐵𑐳𑐵𑐫𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐟

𑐫𑐾𑑃 – 𑐐𑑂𑐮𑑀𑐧𑐮 𑐣𑐾𑐥𑐵𑐮 𑐣𑐾𑐚𑐰𑐬𑑂𑐎 𑐰 𑐣𑐾𑐰𑐵𑑅 𑐊𑐔𑐜𑐷 𑐚𑐾𑐮𑐶𑐨𑐶𑐖𑐣𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐩𑐔𑐵 𑐔𑐶𑐣𑐵𑐏𑑃 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄𑐟 𑐰𑑄𑐐𑐸 𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐠𑐣𑐫𑐵 𑐣𑐾𑐥𑐵𑑅 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐟 𑑋 𑐣𑐾𑐚𑐰𑐎𑐬𑑂𑐚𑐫𑐵 𑐎𑐖𑐶 𑐳𑐸𑐣𑐷𑐮𑐎𑐸𑐩𑐵𑐬 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐩𑐹𑐴𑐵𑐥𑐵𑑄 𑐖𑐣𑐎𑐰𑐶 𑐱𑑂𑐬𑐾𑐲𑑂𑐛𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑑂𑐰𑑃𑐩𑐶𑐥𑐶𑑄𑐳𑑄 𑐣𑐾𑐰𑐵𑑅 𑐬𑐵𑐲𑑂𑐚𑑂𑐬𑐶𑐫 𑐩𑑂𑐫𑐾𑑃 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐣𑐾𑐚𑐰𑐬𑑂𑐎𑐫𑐵 𑐎𑐖𑐶𑐮𑐶𑐳𑐾𑑄 𑐣𑐾𑐰𑐵𑑅 𑐊𑐎𑐟𑐵 𑐀𑐨𑐶𑐫𑐵𑐣𑐫𑐵 𑐣𑑄 𑐎𑐖𑐶 𑐖𑐸𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐔𑐵 𑐔𑐶𑐣𑐵𑐏𑑃 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑐵 𑐮𑑂𑐫𑐖𑑂𑐫𑐵 𑐥𑐸𑐔𑑅𑐫𑐵 𑐎𑐖𑐶 𑐣𑐵𑑄𑐖𑐵𑑅𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐨𑐹𑐲𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑑄 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄 𑐩𑐳𑑂𑐟𑐫𑑂𑐐𑐸 𑐣𑐵𑑄 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐩𑐔𑐵 𑐔𑐶𑐣𑐵𑐏𑑃 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐠𑐷𑐠𑐷 𑐧𑑂𑐰𑐣𑐾𑐎𑐸𑐠𑐶𑐫𑐵 𑐩𑐸𑐎𑑂𑐎𑑄 𑐣𑑂𑐴𑐫𑑂𑐣𑐶𑐩𑑂𑐴 𑐩𑐳𑑂𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋 𑐎𑐵𑐳𑐵𑐫𑑂 𑐃𑐳𑐶𑐎𑐵 𑐩𑐴𑐬𑑂𑐖𑐣 𑐣𑑂𑐴𑐵𑐥, 𑐮𑐸𑐩𑐣𑑂𑐟𑐶 𑐡𑐾𑐳𑐵𑐬 𑐮𑐶𑐄, 𑐳𑐸𑐨𑐵𑐣𑐷 𑐬𑐵𑐞𑐵 𑐔𑐶𑐟𑑂𑐬𑐎𑐵𑐬 𑐮𑐶𑐫𑐵𑑄𑐮𑐶𑐄 𑐰 𑐮𑐸𑑃𑐳𑑂𑐰𑐵𑑄 𑐩𑐵𑐣𑐣𑑂𑐢𑐬𑑄 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐳𑑂𑐰𑑅𑐐𑐸 𑐮𑑂𑐫𑐵𑐏𑑄 ‘𑐨𑑂𑐫𑐸𑐀𑐬𑑂𑐳 𑐔𑑂𑐰𑐵𑐂𑐳’𑐫𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐎𑐵𑐳𑐵𑐫𑑂 𑐣𑑂𑐴𑐵𑐥𑐫𑐵𑐟 𑐣𑐷𑐡𑑂𑐰𑑅, 𑐮𑐶𑐄𑐫𑐵𑐟 𑐗𑐶𑑄𑐣𑑂𑐫𑐵𑐡𑑂𑐰𑑅, 𑐮𑐶𑐫𑐵𑑄𑐮𑐶𑐄𑐫𑐵𑐟 𑐗𑐶𑐡𑑂𑐰 𑐰 𑐦𑐾𑐳𑐧𑐸𑐎 𑐰 𑐫𑐸𑐚𑑂𑐫𑐸𑐧𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐫𑐵𑐫𑐾𑐎𑐹𑐐𑐸𑐫𑐵𑐟 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐎𑐵𑐳𑐵𑐫𑑂 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐡𑐷𑐥𑐶𑑄𑐟 𑐣𑐾𑐚𑐰𑐬𑑂𑐎𑐫𑐵 𑐎𑐖𑐶 𑐱𑐵𑐎𑑂𑐫𑑄 𑐏𑐵𑐡𑐵𑑄 𑐣𑑂𑐫𑐫𑐾𑐎𑐵𑐡𑐷𑐐𑐸 𑐏𑑅𑐳𑐵 𑐩𑐹𑐥𑐵𑐴𑐵𑑄 𑐖𑐣𑐎𑐰𑐶 𑐱𑑂𑐬𑐾𑐲𑑂𑐛𑑄 𑐳𑐶𑐬𑐥𑐵𑑅 𑐰 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑐎𑐠𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐴𑐬𑐶𑐥𑑂𑐬𑐨𑐵 𑐏𑐜𑑂𑐐𑐷 𑐱𑑂𑐬𑐾𑐲𑑂𑐛, 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, 𑐮𑑂𑐫𑐖𑑂𑐫𑐵 𑐥𑐸𑐔𑑅𑐫𑐵 𑐎𑐖𑐶 𑐨𑐹𑐲𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐣𑐾𑐰𑐵𑑅 𑐊𑐎𑐟𑐵 𑐀𑐨𑐶𑐫𑐵𑐣𑐫𑐵 𑐎𑐸𑐩𑐸𑐡 𑐱𑑂𑐬𑐾𑐲𑑂𑐛, 𑐣𑐾𑐰𑐵𑑅 𑐧𑐳𑑂𑐟𑐷 𑐣𑐾𑐰𑐵𑑅 𑐳𑑂𑐎𑐸𑐮 𑐀𑐨𑐶𑐫𑐵𑐣𑐫𑐵 𑐎𑐖𑐶 𑐡𑐷𑐥𑐎 𑐟𑐸𑐮𑐵𑐢𑐬 , 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐳𑐸𑐣𑐶𑐟𑐵 𑐩𑐵𑐣𑐣𑑂𑐢𑐬, 𑐴𑐮𑐶𑑄 𑐣𑐾𑐰𑐵𑑅 𑐡𑐧𑐹𑐫𑐵 𑐱𑑂𑐬𑐷𑐖𑐣 𑐥𑑂𑐬𑐢𑐵𑐣, 𑐣𑐾𑐰𑐵𑑅 𑐊𑐔𑐜𑐷 𑐚𑐾𑐮𑐶𑐨𑐶𑐖𑐣𑐫𑐵 𑐥𑑂𑐬𑐩𑐸𑐏 𑐣𑐰𑐶𑐣 𑐖𑑀𑐱𑐷, 𑐊𑐎𑐷𑐎𑐺𑐟 𑐣𑐾𑐰𑐵𑑅 𑐧𑐳𑑂𑐟𑐷 𑐀𑐨𑐶𑐫𑐵𑐣𑐫𑐵 𑐩𑐔𑐵𑐬𑐵𑐖𑐵 𑐩𑐴𑐬𑑂𑐖𑐣𑐥𑐶𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋