𑐨𑑂𑐰𑑃𑐟𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵

𑐳𑐎𑐶𑐩𑐣𑐵 𑐥𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐨𑑂𑐰𑑃𑐟𑐫𑑂 𑐣𑑂𑐴𑐵𑐥𑐵𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐨𑑂𑐰𑑃𑐟𑐫𑐵 𑐮𑐵𑐫𑑂𑐎𑐹 𑐡𑐧𑐸𑐮𑐶𑐂 𑐖𑐹𑐐𑐸 𑐟𑑅𑐩𑐸𑑃𑐖𑑂𑐫𑐵 𑐳𑑂𑐠𑐵𑐣𑐷𑐫 𑐳𑐩𑐵𑐖𑐳𑐾𑐰𑐷 𑐎𑐺𑐲𑑂𑐞𑐮𑐵𑐮 𑐥𑑂𑐬𑐖𑐵𑐥𑐟𑐶𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹 𑐥𑐵𑐴𑐵𑑄 𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐥𑐵𑐬𑑂𑐚𑐷𑐫𑐵 𑐎𑐾𑐣𑑂𑐡𑑂𑐬𑐷𑐫 𑐳𑐔𑐶𑐰 𑐳𑐵𑑄𑐳𑐡 𑐥𑑂𑐬𑐾𑐩 𑐳𑐸𑐰𑐵𑐮𑑄 𑐳𑐵𑐴𑐶𑐟𑑂𑐫 𑐕𑐐𑐹 𑐰𑐶𑐖𑑂𑐘𑐵𑐣 𑐴𑐾 𑐏𑑅 𑐢𑐫𑐵𑐡𑐶𑐳𑐾𑑄 𑐣𑐾𑐥𑐵𑑅𑐫𑐵 𑐀𑐬𑑂𑐠𑐟𑐣𑑂𑐟𑑂𑐬 𑐳𑑂𑐫𑑄𑐐𑐸𑐮𑐶𑐂 𑐣𑐾𑐥𑐵𑐮𑐷 𑐬𑐵𑐖𑐣𑐷𑐟𑐶𑐎 𑐣𑐾𑐟𑐵𑐟 𑐡𑑀𑐲𑐷 𑐖𑐹𑐐𑐸 𑐏𑑃 𑐳𑑂𑐥𑐲𑑂𑐚 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡 𑐳𑐸𑐬𑐾𑐣𑑂𑐡𑑂𑐬𑐬𑐵𑐖 𑐐𑑀𑐳𑐵𑐃𑑄 𑐰 𑐩𑐾𑐩𑑂𑐴 𑐳𑐵𑑄𑐳𑐡 𑐳𑐺𑐖𑐣𑐵 𑐳𑐿𑑄𑐖𑐸𑐥𑐶𑑄𑐳𑑄 𑐣𑑄 𑐠𑑅𑐠𑑅𑐐𑐸 𑐬𑐵𑐖𑐣𑐷𑐟𑐶𑐎 𑐢𑐵𑐬𑐞𑐵 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐕𑐣𑑂𑐴𑐸 𑐣𑑂𑐴𑐶𑐕𑐶 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐥𑑂𑐬𑐾𑐩 𑐳𑐸𑐰𑐵𑐮𑑄 𑐐𑑄 𑐥𑑂𑐫𑐵𑐏𑑄 𑐰 𑐧𑐵𑐖𑑄𑐫𑐵 𑐐𑐸𑐬𑐸 𑐳𑐟𑑂𑐫𑐣𑐵𑐬𑐵𑐫𑐞 𑐜𑑄𑐐𑑀𑐮 𑐰 𑐎𑐶𑐳𑐵𑐣 𑐣𑑂𑐴𑑂𑐫𑐮𑐸𑐰𑐵 𑐩𑑄𑐐𑐮𑐬𑐵𑐖 𑐩𑐵𑐣𑐣𑑂𑐢𑐬𑐫𑐵𑐟 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵𑑅 𑐴𑐣𑐵 𑐥𑑁 𑐡𑐾𑐕𑐵𑐳𑐾𑑄 𑐴𑐣𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐩𑑀𑐴𑐣 𑐡𑐸𑐰𑐵𑐮, 𑐱𑐶𑐎𑑂𑐲𑐵𑐰𑐶𑐡 𑐳𑐹𑐬𑑂𑐫 𑐮𑐵𑐎𑑀𑐮 𑐮𑐐𑐵𑐫𑐟𑑄 𑐠𑑅𑐠𑑅𑐐𑐸 𑐣𑐸𑐐𑑅 𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐟𑑅𑐩𑐸𑑃𑐖𑑂𑐫𑐵𑐫𑑂 𑐥𑐵𑐛 𑐖𑐹𑐐𑐸 𑐗𑐶𑑄𑐕𑐥𑐸 𑐔𑐶𑐣𑐵𑐏𑑃 𑐩𑐢𑑂𑐫𑐾 𑐥𑑂𑐬𑐎𑐵𑐱 𑐎𑐵𑐫𑐳𑑂𑐠 𑐄𑐖𑑂𑐖𑑂𑐰𑐮 𑐣𑑂𑐴𑐵𑐥, 𑐢𑐸𑑂𑐬𑐰𑐎𑐺𑐲𑑂𑐞 𑐟𑐵𑐩𑑂𑐬𑐵𑐎𑐵𑐬 𑐮𑐶𑐄 𑐰 𑐳𑐸𑐣𑐶𑐟𑐵 𑐐𑐵𑑄𑐳𑐷 𑐮𑐶𑐫𑐵𑑄 𑐮𑐶𑐄 𑐮𑐵𑑅𑐐𑐸 𑐏𑑅 𑑋

𑐳𑐩𑐵𑐖𑐳𑐾𑐰𑐷 𑐴𑐬𑐶𑐐𑑀𑐥𑐵𑐮 𑐥𑑂𑐬𑐢𑐵𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐣𑑂𑐴𑐵𑐥𑐵𑑄𑐐𑐸 𑐟𑑅𑐩𑐸𑑃𑐖𑑂𑐫𑐵𑐫𑑂 𑐳𑐶𑐡𑑂𑐢𑐶𑐧𑐴𑐵𑐡𑐸𑐬 𑐎𑐬𑑂𑐩𑐵𑐔𑐵𑐬𑑂𑐫, 𑐳𑑀𑐩𑐎𑐵𑐖𑐷 𑐱𑐵𑐎𑑂𑐫, 𑐱𑐩𑐱𑐾𑐬𑐧𑐴𑐵𑐡𑐸𑐬 𑐣𑑂𑐴𑐸𑐕𑐾𑑃 𑐥𑑂𑐬𑐢𑐵𑐣, 𑐣𑐬𑐾𑐣𑑂𑐡𑑂𑐬 𑐎𑐸𑐩𑐵𑐬 𑐧𑐖𑑂𑐬𑐵𑐔𑐵𑐬𑑂𑐫, 𑐬𑐵𑐩𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶, 𑐴𑐬𑑂𑐲𑐣𑐵𑐬𑐵𑐫𑐞 𑐎𑐬𑑂𑐩𑐵𑐔𑐵𑐬𑑂𑐫 𑐰 𑐎𑐰𑐶𑐟𑐵 𑐱𑐵𑐎𑑂𑐫𑑄 𑐠𑑅𑐠𑑅𑐐𑐸 𑐔𑑂𑐰𑐳𑐸 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐥𑐵𑐛 𑐫𑐵𑑅𑐥𑐶𑑄 𑐬𑐔𑐣𑐵𑐎𑐵𑐬𑐟𑐫𑑂𑐟 𑐡𑐳𑐶 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐦𑐹 𑐧𑑂𑐰𑐖𑑂𑐫𑐵 𑐰 𑐫𑑅𑐩𑐬𑐶 𑐣𑐎𑐾𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋