𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐬𑑂𑐞𑐶𑐎𑐫𑐵 𑐳𑐦𑐹𑐟𑐶𑐂 𑐴𑐣𑐾𑐧𑐴𑑅𑐥𑐶𑐣𑐶 𑐧𑐶𑐔𑐵𑑅

#𑐨𑐶𑐎𑑂𑐲𑐸 𑐧𑑀𑐢𑐶𑐖𑑂𑐘𑐵𑐣

𑐱𑐵𑐣𑑂𑐟𑐶 𑐳𑐣𑑂𑐡𑐾𑐱 𑐳𑑂𑐩𑐵𑐬𑐶𑐎𑐵 (𑐰𑐶.𑐳𑑄.𑑒𑑐𑑕𑑙 𑐳𑐵𑐮) 𑐫𑑂 ‘𑐨𑐶𑐎𑑂𑐲𑐸 𑐳𑐸𑐡𑐬𑑂𑐱𑐣 𑐨𑐣𑑂𑐟𑐾𑐎𑑀 𑐳𑐴𑐫𑑀𑐐𑐷𑐨𑐵𑐰𑐣𑐵 𑐬 𑐥𑑂𑐬𑐾𑐬𑐞𑐵’ 𑐢𑐿𑐐𑐸 𑐮𑐾𑐏𑐫𑑂 ‘𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐨𑐣𑑂𑐟𑐾𑐎𑑀 𑐥𑐸𑐳𑑂𑐟𑐎𑐩𑐵 𑐳𑐸𑐡𑐬𑑂𑐱𑐣 𑐨𑐣𑑂𑐟𑐾𑐎𑑀 𑐨𑐹𑐩𑐶𑐎𑐵’ 𑐢𑐿𑐐𑐸 𑐄𑐥𑐱𑐷𑐬𑑂𑐲𑐎𑐫𑑂 𑑑𑑒 𑐡𑑃 𑐧𑐬𑑂𑐩𑐵𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐢𑐩𑑂𑐩𑐵𑐔𑐬𑐶𑐫 𑐄𑐥𑐵𑐢𑐶 𑐥𑐵𑐳 𑐫𑐵𑐣𑐵𑐧𑐶𑐖𑑂𑐫𑐵𑑅𑐩𑑂𑐴 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐬𑑂𑐞𑐶𑐎𑐫𑐵 𑐣𑐾.𑐳𑑄. 𑑑𑑐𑑘𑑙 𑐳𑐵𑐮𑐫𑑂 𑐥𑐶𑐡𑑄𑐐𑐸 𑑓𑑔 𑐥𑐾𑐖𑐫𑐵 𑐔𑐷𑐥𑑄𑐐𑐸 𑐳𑐦𑐹 ‘𑐥𑐵𑐫𑐵𑐳𑐶 𑐳𑐸𑐟𑑂𑐟’𑐫𑑂 𑐀𑐣𑐸𑐰𑐵𑐡 𑐱𑐸𑐡𑑂𑐢 𑐫𑐵𑐫𑐾𑐐𑐸 𑐣𑐶𑐳𑐾𑑄 𑐨𑐹𑐩𑐶𑐎𑐵 𑐣𑑄 𑐔𑑂𑐰𑐫𑐵𑐧𑐶𑐖𑑂𑐫𑐵𑐣𑐵 𑐮𑐶𑐥𑐵 𑐟𑐟𑑅𑐥𑑃𑐐𑐸 𑐳𑐦𑐹𑐟𑐫𑑂𑐟 𑐣𑑄 𑐐𑐴𑐣 𑐀𑐢𑑂𑐫𑐫𑐣 𑐰 𑐰𑐶𑐱𑑂𑐮𑐾𑐲𑐞 𑐫𑐵𑐣𑐵𑑅 𑐰 𑐳𑐱𑐎𑑂𑐟 𑐨𑐹𑐩𑐶𑐎𑐵𑐟 𑐔𑑂𑐰𑐫𑐵𑑅 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐬𑑂𑐞𑐶𑐎𑐫𑐵 𑐳𑐵𑐴𑐶𑐟𑑂𑐫𑐶𑐎 𑐫𑐵𑐟𑑂𑐬𑐵𑐫𑑂 𑐳𑐵𑐠 𑐧𑐶𑐫𑐵𑐧𑐶𑐖𑑂𑐫𑐵𑑅𑐐𑐸 𑐏𑑃𑐫𑐵𑐟 𑐄𑐮𑐵𑑅 𑐰𑐳𑐥𑑀𑐮 𑐳𑐸𑐡𑐬𑑂𑐱𑐣 𑐨𑐣𑑂𑐟𑐾 𑐣𑑄 𑐳𑐦𑐹 𑐔𑑂𑐰𑐩𑐶𑐥𑐶𑑄𑐟 𑐴𑑁𑐳𑐮𑐵 𑐰𑐺𑐡𑑂𑐢𑐶 𑐫𑐵𑐫𑐾𑐟 𑐰 𑐳𑐦𑐹𑐫𑐵 𑐩𑐴𑐟𑑂𑐰 𑐎𑑂𑐫𑐣𑐾𑐟 𑐳𑐩𑑂𑐧𑐣𑑂𑐢𑐶𑐟 𑐐𑑂𑐬𑐣𑑂𑐠𑐫𑑂 𑐧𑐶𑐫𑐵𑐧𑐶𑐖𑑂𑐫𑐵𑑅𑐐𑐸 𑐨𑐹𑐩𑐶𑐎𑐵 𑐖𑐎 𑐩𑐸𑑄𑐎𑐹𑐳𑐵𑑄 𑐕𑐐𑐹 𑐟𑑅𑐥𑑄𑐐𑐸 𑐳𑐦𑐹 𑐟𑐫𑐵𑐬 𑐖𑐸𑐂 𑐦𑐂 𑐢𑐫𑐵𑐐𑐸 𑐁𑐱𑐫 𑐰𑑂𑐫𑐎𑑂𑐟 𑐫𑐵𑐣𑐵𑑅 𑐮𑐾𑐏 𑐔𑑂𑐰𑐫𑐵𑐟𑐫𑐵𑐐𑐸 𑐏𑑅 𑑋

𑐄𑐧𑐮𑐾𑐫𑑂 𑐣𑐶𑐳𑐾𑑄 𑐰𑐳𑐥𑑀𑐮 𑐳𑐸𑐡𑐬𑑂𑐱𑐣 𑐨𑐣𑑂𑐟𑐾𑑄 𑐐𑐸𑐬𑐸𑐰𑐬 𑐱𑑂𑐬𑐡𑑂𑐢𑐾𑐫 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐨𑐣𑑂𑐟𑐾𑐫𑐵 𑐳𑐦𑐹𑐟𑐶𑐂 𑐧𑐶𑐫𑐵𑐧𑐶𑐖𑑂𑐫𑐵𑐣𑐵 𑐟𑑅𑐐𑐸 𑐨𑐹𑐩𑐶𑐎𑐵𑐟 𑐰𑐶𑐱𑑂𑐰𑐱𑐵𑐣𑑂𑐟𑐶 𑐰𑐶𑐴𑐵𑐬𑐫𑑂 𑐔𑑂𑐰𑑄𑐥𑐶𑑄 𑐨𑐶𑐎𑑂𑐲𑐸 𑐱𑑂𑐬𑐵𑐩𑐞𑐾𑐬𑐥𑐶𑑄𑐟 𑐚𑐵𑐂𑐥 𑐫𑐵𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑂𑐰 𑐴𑐾 𑐳𑐶𑐮𑐳𑐶𑐮𑐵𑐫𑑂 𑑒𑑐𑑖𑑕 𑐩𑑄𑐳𑐶𑐬 𑑒𑑒 𑐐𑐟𑐾𑐣𑐶𑐳𑐾𑑄 𑐥𑐸𑐲 𑑕 𑐐𑐟𑐾𑐟𑐎 𑐱𑑄𑐏𑐩𑐹𑐮 𑐢𑑂𑐫𑐵𑐣 𑐎𑐾𑐣𑑂𑐡𑑂𑐬𑐫𑑂 𑐢𑑂𑐫𑐵𑐣 𑐱𑐶𑐰𑐶𑐬𑐫𑑂 𑐰𑐣𑐵𑐧𑐮𑐫𑑂 𑐨𑐣𑑂𑐟𑐾𑐫𑐵 𑐄𑐥𑐳𑐩𑑂𑐥𑐡𑐵𑐫𑐵 𑑕𑑐 𑐰𑐬𑑂𑐲 𑐳𑐩𑑂𑐧𑐣𑑂𑐢𑐶 𑐖𑑂𑐫𑐵 𑐮𑐸𑐩𑐣𑐵𑐰𑑅𑐐𑐸 𑐎𑐠𑑄 𑐨𑐣𑑂𑐟𑐾𑐫𑐵 𑐐𑐸𑐮𑐶 𑐣𑑄 𑐳𑐦𑐸𑐮𑐶𑐂 𑐨𑐹𑐩𑐶𑐎𑐵 𑐡𑐸 𑐰 𑐦𑐸𑐎𑑂𑐎 𑐡𑐸𑐠𑑂𑐫𑐵𑐎𑐾 𑐡𑑅𑐳𑐵 𑐧𑐵𑑄𑐮𑐵𑑅 𑐖𑐸𑐂 𑐢𑐫𑐵𑐐𑐸 𑐩𑐟𑐶𑐂 𑐰𑐣𑐵𑑅 𑐄𑐐𑐸𑐎𑐠𑑄 𑐳𑐩𑑂𑐧𑐣𑑂𑐢𑐶𑐟 𑐨𑐹𑐩𑐶𑐎𑐵𑐟 𑐣𑑄 𑐚𑐵𑐂𑐥 𑐫𑐵𑐎𑐾 𑐧𑐶𑐫𑐵 𑑋

𑐄𑐎𑐠𑑄 𑐚𑐵𑐂𑐥 𑐫𑐵𑐎𑐾 𑐧𑐶𑐧𑐶𑐄𑑃 𑐱𑑂𑐬𑐡𑑂𑐢𑐾𑐫 𑐐𑐸𑐬𑐸 𑐩𑐴𑐵𑐳𑑂𑐠𑐰𑐶𑐬𑐫𑐵 𑐳𑐦𑐹 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐂𑐮𑐫𑑂 𑐰𑐳𑐥𑑀𑐮𑑄 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐩𑐾𑐴𑐣𑐟, 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐐𑑂𑐰𑐵𑐴𑐵𑐮𑐶, 𑐐𑐖𑑂𑐫𑐵𑑅𑐐𑐸 𑐥𑐬𑐶𑐳𑑂𑐠𑐶𑐟𑐶𑐂 𑐀𑐣𑐸𑐰𑐵𑐡 𑐖𑐹𑐐𑐸 𑐏𑑅 ?, 𑐮𑐶𑐳𑐾𑑄 𑐳𑐦𑐹𑐫𑐵 𑐩𑐴𑐟𑑂𑐰𑐧𑐵𑐬𑐾 𑐣𑑄 𑐥𑐹𑐬𑑂𑐞𑐬𑐸𑐥𑑄 𑐳𑐷𑐎𑐾𑐫𑐵 𑐣𑐶𑑄𑐟𑐶𑑄 𑐳𑐦𑐸𑐮𑐶𑐂 𑐔𑑂𑐰𑐫𑐵𑐟𑑅𑐐𑐸 𑐨𑐹𑐩𑐶𑐎𑐵𑑄 𑐴𑐾 𑐖𑐎 𑐥𑐹𑐰𑐣𑐶 𑐠𑐾𑑄 𑐩𑐟𑐵𑐫𑐵𑑅 𑐨𑐹𑐩𑐶𑐎𑐵 𑐣𑐵𑐥𑐣𑐵𑐥𑑄 𑐨𑐣𑑂𑐟𑐾𑐫𑐵 𑐠𑑅𑐐𑐸 𑐣𑐸𑐐𑑅𑐏𑑃 𑐣𑑄 𑐟𑐫𑐵𑐐𑐸 𑐖𑐸𑐮 𑑋

𑐨𑐣𑑂𑐟𑐾𑐫𑐵 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐰𑑄𑐰𑑄 𑐰𑐳𑐥𑑀𑐮𑑄 𑐩𑐾𑐥𑐶𑑄 𑐔𑑂𑐰𑐩𑐶𑐥𑐶𑐣𑐶 𑐳𑐦𑐹𑐟𑐶𑐂 𑐔𑑂𑐰𑐫𑐵 𑐟𑐫𑐵𑐧𑐶𑐖𑑂𑐫𑐵𑑅𑐐𑐸 𑐨𑐶𑐣𑑂𑐟𑐸𑐣𑐵, 𑐩𑐣𑑂𑐟𑐸𑐣𑐵, 𑐕𑐟𑑂𑐰𑐵 𑐏𑑃𑐫𑐵𑐟 𑐣𑑄 𑐡𑐸𑐠𑑂𑐫𑐵𑐎𑐵 𑐨𑐹𑐩𑐶𑐎𑐵 𑐳𑐦𑐹 𑐳𑐩𑑂𑐥𑐵𑐡𑐣 𑐖𑐹𑐐𑐸 𑐏𑑅 𑑋 𑐨𑐹𑐩𑐶𑐎𑐵 𑐳𑐦𑐹𑐫𑐵 𑐀𑐢𑑂𑐫𑐫𑐣𑑄 𑐕𑐸 𑐕𑐸 𑐳𑐦𑐸𑐮𑐶𑐂 𑐳𑐸𑐣𑐵𑑄 𑐳𑐸𑐣𑐵𑑄 𑐨𑐹𑐩𑐶𑐎𑐵 𑐔𑑂𑐰𑐫𑐵𑐧𑐶𑐖𑑂𑐫𑐵𑐟 𑐢𑐎𑐵𑑅 𑐳𑑂𑐥𑐲𑑂𑐚 𑐖𑐸𑐂 𑑋 𑐰𑐶𑐱𑐾𑐲𑑄 𑐡𑐶𑐰𑑄𑐐𑐟 𑐖𑐸𑐫𑐵𑐧𑐶𑐖𑑂𑐫𑐵𑐫𑐾 𑐢𑐸𑑄𑐎𑐹𑐥𑐶𑑄 𑐁𑐔𑐵𑐬𑑂𑐫 𑐨𑐶𑐎𑑂𑐲𑐸 𑐀𑐩𑐺𑐟𑐵𑐣𑐣𑑂𑐡𑐩𑐴𑐵𑐳𑑂𑐠𑐰𑐶𑐬, 𑐨𑐶𑐎𑑂𑐲𑐸 𑐳𑐸𑐡𑐬𑑂𑐱𑐣 𑐩𑐴𑐵𑐳𑑂𑐠𑐰𑐶𑐬, 𑐎𑐰𑐶𑐎𑐾𑐱𑐬𑐷 𑐔𑐶𑐟𑑂𑐟𑐢𑐬 𑐴𑐺𑐡𑐫 𑐰 𑐂𑐣𑑂𑐡𑑂𑐬𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬𑐥𑐶𑑄𑐳𑑄 𑐳𑐩𑑂𑐧𑐣𑑂𑐢𑐶𑐟 𑐳𑐦𑐹 𑐧𑑂𑐰𑐣𑐵𑑅 𑐳𑐦𑐹𑐫𑐵 𑐩𑐹𑐮𑑂𑐫𑐵𑑄𑐎𑐣 𑐐𑐠𑐾 𑐫𑐵𑐣𑐵𑐟𑐮 𑐢𑐫𑐵𑐐𑐸 𑐏𑑃 𑐢𑑂𑐰𑐵𑐠𑐸𑐂 𑑋

𑐮𑐶𑐳𑐾𑑄 𑐰𑐳𑐥𑑀𑐮𑐥𑐶𑐣𑐶𑐐𑐸 𑐐𑐸𑐞𑐫𑐵𑐟 𑐣𑑄 𑐮𑐸𑐩𑑄𑐎𑐵 𑐔𑑂𑐰𑐣𑐵𑐐𑐸 𑐏𑑅 𑑋 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐕𑐸𑑄 𑐫𑐵𑐣𑐵𑐟𑑅𑐐𑐸𑐫𑐵𑐟 𑐴𑐾, 𑐰𑐫𑐵 𑐟𑑅𑐐𑐸𑐫𑐵𑐟 𑐮𑐸𑐩𑑄𑐎𑐵𑑅 𑐴𑐾 𑐦𑐮𑐵𑐣𑐵𑐩𑑂𑐴𑑄 𑐠𑑂𑐰 𑐫𑐵𑐣𑐵𑐟𑑅𑐐𑐸, 𑐠𑑂𑐰 𑐔𑑂𑐰𑐫𑐵𑐟𑑅𑐐𑐸 𑐏𑑅 𑐢𑐎𑐵 𑐳𑑄𑐐𑑂𑐬𑐴 𑐫𑐵𑐫𑐾 𑐦𑐂𑐐𑐸 𑐏𑑅 𑑋

𑐥𑑂𑐬𑐎𑐵𑐱𑐶𑐟 𑐨𑐹𑐩𑐶𑐎𑐵 𑐳𑐦𑐹 𑐮𑐶𑐳𑐾𑑄 𑐮𑐶𑐥𑐵 𑐥𑐶𑐴𑐵𑑃𑐰𑑅𑐐𑐸 𑐳𑐦𑐹𑐫𑐵𑐟 𑐧𑑅 𑐎𑐫𑐵𑑅 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐬𑑂𑐞𑐶𑐎𑐫𑐵 𑐳𑐦𑐸𑐮𑐶𑐂 𑐴𑐣𑐾𑐧𑐴𑑅𑐥𑐶𑐣𑐶 𑐧𑐶𑐔𑐵𑑅
𑐎) 𑐰𑐳𑐥𑑀𑐮 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬 𑐨𑐣𑑂𑐟𑐾𑐫𑐵𑐥𑐵𑐏𑐾𑑄 𑐀𑐣𑐸𑐡𑐶𑐟, 𑐳𑐩𑑂𑐥𑐵𑐡𑐶𑐟 𑐖𑐹𑐐𑐸 𑐳𑐦𑐸𑐮𑐶𑐂 𑐎𑑂𑐰𑐫𑑂 𑐧𑐶𑐫𑐵𑐎𑐠𑑄 𑐨𑐹𑐩𑐶𑐎𑐵 𑐔𑑂𑐰𑐫𑐵𑐟𑑅𑐐𑐸 𑐏𑐣𑐾𑐡𑐸 :—

 

𑐠𑐸𑐎𑐠𑑄 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐨𑐣𑑂𑐟𑐾𑐫𑐵 𑐳𑐦𑐹𑐟 𑐩𑐢𑑂𑐫𑐫𑑂 𑐧𑐸𑐡𑑂𑐢𑐑𑑀𑐲 𑐨𑐣𑑂𑐟𑐾𑐫𑐵 𑑑 𑐐𑐹𑐹 , 𑐀𑐩𑐺𑐟𑐵𑐣𑐣𑑂𑐡 𑐨𑐣𑑂𑐟𑐾𑐫𑐵 𑑑 𑐐𑐹, 𑐳𑐸𑐡𑐬𑑂𑐱𑐣 𑐨𑐣𑑂𑐟𑐾𑐫𑐵 𑑑𑑑 𑐐𑐹, 𑐔𑐶𑐟𑑂𑐟𑐢𑐬 𑐴𑐺𑐡𑐫𑐫𑐵 𑑒 𑐐𑐹, 𑐳𑐸𑐰𑐬𑑂𑐞 𑐱𑐵𑐎𑑂𑐫𑐫𑐵 𑑕 𑐐𑐹, 𑐨𑐶𑐎𑑂𑐲𑐸 𑐎𑑀𑐞𑑂𑐜𑐣𑑂𑐫𑐫𑐵 𑑑 𑐐𑐹 𑐰 𑐂𑐣𑑂𑐡𑑂𑐬𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬𑐫𑐵 𑑑 𑐐𑐹 𑐨𑐹𑐩𑐶𑐎𑐵 𑐡𑐸 𑑋 𑐀𑐮𑐾 𑐠𑐷𑐠𑐷 𑐂𑐮𑐫𑑂 𑐔𑑂𑐰𑐫𑐵 𑐧𑐶𑐖𑑂𑐫𑐵𑐣𑐵𑐟𑑅𑐐𑐸 𑐮𑐾𑐏 𑐬𑐔𑐣𑐵 𑐳𑑄𑐐𑑂𑐬𑐴𑐫𑐵 𑐁𑐢𑐵𑐬𑐫𑑂 𑐀𑐣𑐵𑐐𑐵𑐬𑐶𑐎𑐵 𑐄𑐥𑑂𑐥𑐮𑐰𑐞𑑂𑐞𑐵𑐥𑐵𑐏𑐾𑑄 𑐳𑐩𑑂𑐥𑐵𑐡𑐣 𑐖𑐹𑐐𑐸 𑐳𑐦𑐸𑐟 𑐩𑐢𑑂𑐫𑐫𑑂 𑐕𑐐𑐸𑐮𑐷 𑐁𑐬.𑐧𑐷. 𑐧𑐣𑑂𑐡𑑂𑐫𑐖𑐸 𑐰 𑐩𑐾𑐐𑐸𑐮𑐶𑐂 𑐳𑐸𑐰𑐬𑑂𑐞 𑐱𑐵𑐎𑑂𑐫𑐖𑐸𑑄 𑐨𑐹𑐩𑐶𑐎𑐵 𑐔𑑂𑐰𑐫𑐵 𑐧𑐶𑐖𑑂𑐫𑐵𑐣𑐵 𑐟𑑅𑐐𑐸 𑐡𑐸 𑑋

𑐏) 𑐰𑐳𑐥𑑀𑐮 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬 𑐨𑐣𑑂𑐟𑐾𑑄 𑐀𑐣𑐸𑐰𑐵𑐡 𑐫𑐵𑐣𑐵 𑐧𑐶𑐖𑑂𑐫𑐵𑑅𑐐𑐸 𑐳𑐦𑐹𑐫𑐵 𑐔𑑂𑐰𑐩𑐶𑐥𑐶𑑄

𑐰𑐳𑐥𑑀𑐮 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬 𑐨𑐣𑑂𑐟𑐾𑑄 𑐩𑐴𑐵𑐱𑐷 𑐳𑐫𑐵𑐡𑑀𑐫𑐵 𑑑𑑙 𑐐𑐹 𑐳𑐦𑐹 , 𑐳𑐫𑐵𑐡𑑀 𑐥𑑂𑐫𑐸𑑄𑐡𑐖𑐵 𑐀𑐱𑑂𑐫𑐶𑐒𑑂 𑐳𑐸𑐣𑑂𑐡𑐬𑐫𑐵 𑑕𑐐𑐹 𑐳𑐦𑐹𑐫𑐵 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐡𑐸 𑑋 𑐐) 𑐰𑐳𑐥𑑀𑐮 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬 𑐨𑐣𑑂𑐟𑐾𑑄 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐳𑐦𑐹 𑐣𑐾𑐥𑐵𑐮𑐷 𑐨𑐵𑐲𑐵𑑄 𑐀𑐣𑐸𑐰𑐵𑐡 𑐖𑐸𑐫𑐵 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐳𑐦𑐹𑐟 𑐠𑐸𑐎𑐠𑑄 𑐡𑐸 𑑅

𑐑) 𑐨𑐣𑑂𑐟𑐾𑐫𑐵 𑐄𑐥𑐡𑐾𑐱 𑐰 𑐄𑐥𑐡𑐾𑐱 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐁𑐢𑐵𑐬𑐫𑑂 𑐥𑐶𑐴𑐵𑑄𑐰𑑅𑐐𑐸 𑐳𑐦𑐹

𑐰𑐳𑐥𑑀𑐮𑐫𑐵 𑐣𑐾𑐥𑐵𑐮𑐨𑐵𑐲𑐵𑑄 𑑔𑑓 𑐐𑐹 𑐰 𑐣𑐾𑐥𑐵𑐮𑐷𑐨𑐵𑐲𑐵𑑄 𑑑𑑐𑐐𑐹 𑐳𑐦𑐹 𑐥𑐶𑐡𑑄𑐐𑐸 𑐡𑐸 𑑋 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬𑐫𑐵 𑐣𑐾𑐥𑐵𑐮𑐨𑐵𑐳𑑄 𑐰 𑐣𑐾𑐥𑐵𑐮𑐷𑑄 𑐥𑐶𑐴𑐵𑑄𑐰𑑅𑐐𑐸 𑐠𑐷𑐠𑐷 𑐔𑑂𑐰𑐳𑐸𑐫𑐵 𑐁𑐢𑐵𑐬𑐫𑑂 𑐀𑐣𑐵𑐐𑐵𑐬𑐶𑐎𑐵 𑐄𑐥𑑂𑐥𑐮𑐰𑐞𑑂𑐞𑐵𑐫𑐵 𑐳𑐩𑑂𑐥𑐵𑐡𑐣𑐫𑑂 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬𑐫𑐵 𑐔𑑂𑐰𑐳𑐸 𑐩𑐸𑐣𑐵 𑐰 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬𑐎𑑀 𑐬𑐔𑐣𑐵 𑐳𑑄𑐐𑑂𑐬𑐴 𑐥𑐶𑐴𑐵𑑄 𑐰𑑅𑐐𑐸 𑐡𑐸 𑑋

𑐔𑐷𑐥𑑄𑐐𑐸 𑐔𑐷𑐢𑑄𑐐𑐸 𑐳𑐦𑐹 𑐥𑐶𑐎𑐵𑐫𑐾𑐟 𑐴𑐾 𑐨𑐟𑐶𑐔𑐵 𑐩𑐾𑐴𑐾𑐣𑐟 𑐰 𑐥𑐬𑐶𑐱𑑂𑐬𑐩𑑄 𑐩𑐐𑐵𑑅 𑐢𑐵𑑅𑐳𑐵 𑑕𑑐𑐐𑐸𑐮𑐶𑑄 𑐩𑐫𑐵𑐎 𑐟𑐟𑐥𑑄𑐐𑐸 𑐳𑐦𑐹 𑐥𑐶𑐎𑐵𑐫𑐾𑐟 𑐱𑑂𑐬𑐡𑑂𑐢𑐾𑐫 𑐨𑐣𑑂𑐟𑐾𑐫𑐵 𑐥𑐬𑐶𑐱𑑂𑐬𑐩, 𑐮𑐐𑐵𑐣𑐷, 𑐗𑐸𑐎𑐵𑐰 𑐐𑐸𑐮𑐶 𑐡𑐸 𑐖𑐸𑐃 ? 𑐀𑐣𑐸𑐩𑐵𑐣 𑐫𑐵𑐫𑐾 𑐟𑐎𑑄 𑐠𑐵𑐎𑐸 𑑋 𑐣𑑂𑐴𑑂𑐫𑐵𑐠𑐵𑐫𑑂 𑐔𑑂𑐰𑐣𑐵𑐧𑐶𑐖𑑂𑐫𑐵𑑅𑐳𑐵𑑄 𑐳𑐦𑐹 𑐧𑑂𑐰𑐣𑐾𑐐𑐸 𑐰 𑐳𑐦𑐹 𑐀𑐣𑐸𑐰𑐵𑐡𑐫𑑂 𑐮𑑂𑐴𑐵𑑅 𑐣𑑂𑐴𑑂𑐫𑐵𑐎𑐵𑐧𑐶𑐖𑑂𑐫𑐵𑑅𑐐𑐸𑐮𑐶𑑄 𑐴𑐾 𑐗𑐷𑐐𑐸 𑐣𑑂𑐴𑑂𑐫𑑅𑐣𑐾 𑐣𑐾𑐥𑐵𑐮𑐨𑐵𑐲𑐵 𑐰 𑐣𑐾𑐥𑐵𑐮𑐷 𑐨𑐵𑐲𑑄 𑐄𑐮𑐶𑐩𑐕𑐶 𑐳𑐦𑐹 𑐥𑐶𑐴𑐵𑑄 𑐰𑑅𑐐𑐸 𑐳𑑂𑐰𑐫𑐾 𑐏𑑄𑐐𑐸, 𑐧𑑂𑐰𑐣𑐾𑐏𑑄𑐐𑐸 𑐏𑑅 𑑋

𑐢𑐩𑑂𑐩𑐵𑐰𑐟𑐷 𑐐𑐸𑐬𑐸𑐩𑐵𑑄𑐫𑐵 𑐖𑐷𑐰𑐣𑐷𑐂 𑐁𑐢𑐵𑐬𑐶𑐟 𑐫𑐵𑐣𑐵𑑅 𑐬 𑐰𑐾 𑐠𑑂𑐰 𑐨𑐣𑑂𑐟𑐾𑑄 𑐔𑑂𑐰𑐫𑐵𑐧𑐶𑐖𑑂𑐫𑐵𑑅𑐐𑐸𑐫𑐵𑐟 𑐣𑐾𑐰𑐵𑑅 𑐨𑐵𑐳𑑄 𑐫𑑅𑐩𑑂𑐴 𑐩𑑂𑐴𑑂𑐫𑐵𑐫𑑂𑐫𑐵 𑐬𑐸𑐥𑐫𑑂 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐳𑐦𑐹𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐵𑑄𑐖𑐵𑑅𑐐𑐸 𑐱𑑂𑐬𑐾𑐲𑑂𑐛 𑐳𑐶𑐬𑐥𑐵𑐮𑑄 𑐣𑐾.𑐳𑑄. 𑑑𑑐𑑙𑑐 𑐳𑐵𑐮𑐫𑑂 𑐕𑐵𑐫𑑂𑐥𑐶𑐄𑐐𑐸 𑐗𑐷𑐐𑐸 𑐮𑐵𑐐𑐷 𑐣𑑄 𑐕𑐐𑐹 𑐟𑑅𑐢𑑄𑐐𑐸 𑐐𑑁𑐬𑐰𑐫𑐵 𑐏𑑃 𑐏𑑅 𑑋 𑐀.𑐧𑑁.𑐨𑐵. 𑐎𑐾𑐣𑑂𑐡𑑂𑐬𑐫𑑂 𑐄𑐥𑐡𑐾𑐱 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸𑐫𑐵𑐟 𑐰 𑐰𑐶𑐱𑑂𑐰𑐱𑐵𑐣𑑂𑐟𑐶 𑐰𑐶𑐴𑐵𑐬𑐫𑑂 𑐄𑐥𑐡𑐾𑐱 𑐎𑐣𑐵 𑐧𑐶𑐖𑑂𑐫𑐵𑑅𑐐𑐸𑐫𑐵𑐟 𑐁𑐢𑐵𑐬 𑐎𑐫𑐵𑑅 𑐢𑐬𑑂𑐩𑐬𑐟𑑂𑐣 𑐟𑑂𑐬𑐶𑐱𑐸𑐮𑐷𑐥𑐵𑐏𑐾𑑄 𑐳𑐦𑐹𑐟 𑐳𑐩𑑂𑐥𑐵𑐡𑐣 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐩𑐮𑐾𑐳𑐶𑐫𑐵𑐫𑑂 𑐢𑑂𑐫𑐵𑐣 𑐱𑐶𑐰𑐶𑐬𑐫𑐵 𑐡𑑁𑐬𑐵𑐣𑐫𑑂 𑐱𑐶𑐰𑐶𑐬𑐫𑑂 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐄𑐥𑐡𑐾𑐱 𑐰 𑐠𑐵𑐫𑑂 𑐠𑐵𑐳𑐫𑑂 𑐧𑐶𑐫𑐵𑐧𑐶𑐖𑑂𑐫𑐵𑑅𑐐𑐸 public talk of 𑐁𑐢𑐵𑐬𑐫𑑂 Human life is precious 𑐣𑐵𑐩𑑄 𑐀𑑄𑐐𑑂𑐬𑐾𑐖𑐷 𑐳𑐦𑐹 𑐕𑐐𑐹 𑐥𑐶𑐴𑐵𑑄𑐰𑑅𑐐𑐸 𑐡𑐸 𑑋 𑐀𑐠𑐾𑐴𑐾 CD 𑐮𑐫𑑂 𑐬𑐾𑐎𑐬𑑂𑐜 𑐫𑐵𑐣𑐵𑑅 𑐰𑐶𑐟𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐣𑑄 𑐡𑐸 𑑋 𑐥𑐹𑐬𑐵 𑐄𑐥𑐡𑐾𑐱 𑐬𑐾𑐎𑐬𑑂𑐜𑐫𑐵 𑐆𑐩𑑂 𑐰 𑐳𑐦𑐹 𑐥𑐶𑐎𑐵𑑅𑐳𑐵 𑐫𑐎𑑂𑐰 𑐡𑐫𑐾𑐦𑐸 𑑋 𑐁𑑅 𑐕𑐸𑑄 𑐕𑐸𑑄 𑐄𑐥𑐡𑐾𑐱𑐫𑐵 𑐳𑑄𑐎𑐮𑐣 𑐖𑐎 𑐥𑐶𑐴𑐵𑑄𑐰𑑅𑐐𑐸 𑐏𑑅 𑑋

𑐀𑐠𑐾𑐴𑐾 𑐰𑐳𑐥𑑀𑐮𑑄 𑐣𑐾𑐥𑐵𑐮𑐫𑑂 𑐠𑐵𑐫𑑂 𑐠𑐵𑐳𑐫𑑂 𑐧𑐶𑐫𑐵𑐧𑐶𑐖𑑂𑐫𑐵𑐐𑐸 𑐄𑐥𑐡𑐾𑐱 𑐰 𑐎𑑂𑐮𑐵𑐳 𑐎𑐫𑐵𑐧𑐶𑐖𑑂𑐫𑐵𑐐𑐸𑐫𑐵𑐟 𑐬𑐾𑐎𑐬𑑂𑐜 𑐫𑐵𑐣𑐵𑑅 𑐄𑐎𑐶𑐫𑐵 𑐁𑐢𑐵𑐬𑐫𑑂 𑐴𑐾 𑐆𑐩𑑂,𑐩𑑂𑐏𑑂𑐩𑑂 𑐂 𑐥𑐶𑐎𑐵𑐫𑐾𑐐𑐸 𑐰 𑐳𑐦𑐹 𑐥𑑂𑐬𑐎𑐵𑐱𑐣 𑐫𑐵𑐣𑐵𑑅 𑐰𑐳𑐥𑑀𑐮𑐫𑐵 𑐖𑑂𑐘𑐵𑐣𑐫𑐵𑐟 𑐮𑐶𑐥𑐵 𑐠𑑂𑐫𑑄𑐎𑑄 𑐣𑑂𑐫𑐣𑐾𑐐𑐸 𑐧𑑂𑐰𑐣𑐾𑐐𑐸 𑐫𑐵𑐣𑐵𑐫𑑄𑐎𑐾 𑐦𑐸 𑑋 𑐄𑐎𑐶𑐫𑐵 𑐮𑐵𑐐𑐶 𑐱𑑂𑐬𑐡𑑂𑐢𑐵𑐮𑐸 𑐡𑐵𑐟𑐵𑐥𑐶𑐣𑐶𑐥𑐵𑐏𑐾𑑄 𑐥𑐴𑐮𑐖𑐹𑐳𑐵 𑐄𑐐𑐸 𑐖𑑂𑐫𑐵𑐟 𑐣𑑂𑐴𑑂𑐫𑐵𑐣𑐵𑐰𑐣𑐷 𑑋

𑐱𑑂𑐬𑐡𑑂𑐢𑐾𑐫 𑐐𑐸𑐬𑐸𑐰𑐬 𑐨𑐣𑑂𑐟𑐾𑑄 𑐠𑐷𑐠𑐷 𑐳𑐦𑐸𑐮𑐶𑐂 𑐔𑑂𑐰𑐫𑐵𑐟𑑅𑐐𑐸 𑐨𑐹𑐩𑐶𑐎𑐵 𑐩𑐣𑑂𑐟𑐰𑑂𑐫 𑐩𑐵𑐮𑐵𑐫𑑄𑐎𑐵𑐧𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑑒𑑐𑑓𑑓 𑐳𑐵𑐮𑐫𑑂 𑐣𑐵𑐣𑐷𑐩𑐿𑑄𑐫𑐵 𑐩𑐵𑐣𑐣𑑂𑐢𑐬𑐫𑐵 𑐩𑐐𑑂𑐐𑐒𑑂𑐐𑐡𑐷𑐥𑐣𑐷 𑐳𑐦𑐹𑐟𑐷 𑑖 𑐥𑐾𑐖𑐫𑐵 𑐨𑐸𑐩𑐶𑐎𑐵 𑐏𑑅𑐳𑐵 𑐡𑐎𑐮𑐫𑑂 𑐫𑐎𑑂𑐎 𑐏𑑃 𑐣𑐾𑐥𑐵𑐮𑐷𑑄 𑐀𑐣𑐸𑐡𑐷𑐟 𑐧𑐸𑐡𑑂𑐢 𑐬 𑐧𑐸𑐡𑑂𑐢𑐰𑐵𑐡 𑐨𑐵𑐐(𑑑)𑐫𑑂 𑑑𑑙 𑐥𑐾𑐖𑐫𑐵 𑐏𑑅 𑑋 𑐰𑐳𑐥𑑀𑐮𑑄 𑐠𑐷𑐠𑐷 𑐔𑑂𑐰𑐩𑐶𑐥𑐶𑐣𑐶𑐐𑐸 𑐳𑐦𑐸𑐮𑐶𑐂 𑑒𑑐𑑖𑑕 𑐳𑐵𑐮𑐟𑐎 𑐧𑐶𑐫𑐵𑐧𑐶𑐖𑑂𑐫𑐵𑐣𑐵𑐟𑑅𑐐𑐸 𑐨𑐹𑐩𑐶𑐎𑐵, 𑐩𑐣𑑂𑐟𑐰𑑂𑐫, 𑐱𑐸𑐨𑐎𑐵𑐩𑐣𑐵𑐫𑐵 𑐥𑐺𑐲𑑂𑐛 𑐖𑐎 𑐴𑐾 𑑒𑑒𑑗 𑐥𑐾𑐖 𑐡𑐸 𑑋

𑐧𑐬𑑂𑐩𑐷 𑐨𑐵𑐲𑐵𑑄 𑐀𑐣𑐸𑐰𑐵𑐡 𑐫𑐵𑐣𑐵𑐧𑐶𑐖𑑂𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐳𑐵𑐦𑐷 𑐫𑐵𑐫𑐾𑐐𑐸, 𑐥𑑂𑐬𑐹𑐦 𑐧𑑂𑐰𑐣𑐾𑐐𑐸, 𑐡𑐵𑐟𑐵, 𑐥𑑂𑐬𑐎𑐵𑐱𑐎𑐥𑐶𑑄 𑐔𑐹𑐮𑐵𑐎𑐵𑐧𑐷𑐐𑐸, 𑐳𑐦𑐹𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐰𑐶𑐱𑐾𑐲𑑄 𑐀𑐣𑐵𑐐𑐵𑐬𑐶𑐎𑐵 𑐄𑐟𑑂𑐥𑐮𑐰𑐬𑑂𑐞𑐵 (𑐔𑐶𑐣𑐷 𑐐𑐸𑐬𑐸𑐩𑐵) 𑐫𑐵𑐐𑐸 𑐟𑑅𑐢𑑄𑐐𑐸 𑐮𑑂𑐴𑐵𑑅 𑐡𑐫𑐵𑐔𑑂𑐰𑑄𑐐𑐸 𑐖𑐸𑐮 𑑋 𑐨𑐣𑑂𑐟𑐾𑑄 𑐠𑑅𑐐𑐸 𑐳𑐦𑐹 𑐥𑑂𑐬𑐵𑐫𑑅 𑐫𑐵𑐣𑐵𑑅 𑐣𑐾𑐥𑐵𑐮 𑐥𑑂𑐬𑐾𑐳𑐫𑑂 𑐕𑐥𑐵𑐃 𑐫𑐵𑐎𑐵𑐧𑐶𑐖𑑂𑐫𑐵𑑅𑐐𑐸 𑐖𑐸𑐮 𑑋

𑐎𑐩𑑂𑐥𑑂𑐫𑐹𑐚𑐬 𑐩𑐰𑑅𑐣𑐶𑐐𑐸 𑐀𑐰𑐳𑑂𑐠𑐵𑐫𑑂 𑐴𑐾 𑐠𑐵𑐳𑐵 𑐁𑐏𑐮𑐫𑑂 𑐀𑐫m𑐄𑐫𑐎𑐨 𑐫𑐵𑐫𑐾𑐐𑐸 𑐣𑐶𑐳𑐾𑑄 𑐁𑑅𑐫𑐵𑐐𑐸 𑐎𑐩𑑂𑐥𑑂𑐫𑐹𑐚𑐬𑐫𑐵𑐐𑐸 𑐀𑐰𑐳𑑂𑐠𑐵𑐫𑑂 𑐟𑐎𑑄 𑐣𑑄 𑐰𑐳𑐥𑑀𑐮𑑄 𑐳𑐦𑐹 𑐥𑑂𑐬𑐎𑐵𑐱𑐣𑐫𑐵 𑐮𑐵𑐐𑐶𑑄 𑐣𑐾𑐥𑐵𑐮 𑐥𑑂𑐬𑐾𑐳 𑐮𑑂𑐫𑐫𑐵 𑐧𑐶𑐖𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾.𑐳𑑄. 𑑑𑑐𑑙𑑐 𑐣𑐶𑐳𑐾𑑄 𑐣𑐾.𑐳𑑄. 𑑑𑑑𑑓𑑙 𑐟𑐎 𑑕𑑐 𑐡𑑃 𑐫𑐵 𑐡𑐸𑐣𑐾 𑐰𑐳𑐥𑑀𑐮𑐫𑐵𑐐𑐸 𑑕𑑗 𑐐𑐹 𑐳𑐦𑐹𑐟 𑐩𑐢𑑂𑐫𑐾 𑑓𑑕 𑐐𑐹 𑐳𑐦𑐹 𑐣𑐾𑐥𑐵𑐮 𑐥𑑂𑐬𑐾𑐳𑐫𑑂 𑐕𑐵𑐥𑐾 𑐖𑐹𑐐𑐸 𑐡𑐸 𑑋
𑐳𑐦𑐹 𑐥𑑂𑐬𑐎𑐵𑐱𑐣 𑐫𑐵𑐫𑐾𑐟 𑐡𑐵𑐟𑐵𑐥𑐶𑑄 𑐩𑐵𑐮𑐾𑐐𑐸, 𑐳𑐦𑐹 𑐥𑑂𑐬𑐎𑐵𑐱𑐣 𑐫𑐵𑑅𑐐𑐸 𑐩𑐸𑐏𑑂𑐫 𑐳𑑄𑐳𑑂𑐠𑐵𑐟 𑐠𑐸𑐎𑐠𑑄 𑐡𑐫𑐵𑐔𑑂𑐰𑑄𑐐𑐸 𑐖𑐸𑐮 𑑅—
𑑑) 𑐳𑐣𑑂𑐟𑐶 𑐳𑐸𑐏𑐵𑐰𑐵𑐳 𑐥𑑂𑐬𑐎𑐵𑐱𑐣 𑐳𑐩𑐶𑐟𑐶, 𑐔𑐵𑐎𑐸𑐥𑐵𑐚— 𑑑𑑕𑐐𑐹
𑑒) 𑐢𑐬𑑂𑐩𑐎𑐷𑐬𑑂𑐟𑐶 𑐧𑑁𑐡𑑂𑐢 𑐀𑐢𑑂𑐫𑐫𑐣 𑐐𑑀𑐲𑑂𑐛𑐷, 𑐢𑐬𑑂𑐩𑐎𑐷𑐬𑑂𑐟𑐶 𑐰𑐶𑐴𑐵𑐬— 𑑙 𑐐𑐹
𑑓) 𑐡𑐶 𑐎𑐬𑑂𑐥𑑀𑐬𑐾𑐚 𑐧𑐜𑐷 𑐀𑐦 𑐡𑐷 𑐧𑐸𑐡𑑂𑐢 𑐊𑐖𑐸𑐎𑐾𑐱𑐣𑐮 𑐦𑐵𑐄𑐞𑑂𑐜𑐾𑐱𑐣, 𑐟𑐵𑐂𑐰𑐵𑐣 — 𑑔𑐐𑐹
( 𑑕𑑐𑑐𑑐 ÷𑑕𑑐𑑐𑑐 𑐡𑐬𑑄 𑐥𑑂𑐫𑐵𑐴𑐵𑑃 𑐰𑑅𑐐𑐸 𑐠𑐸𑐥𑐶𑑄 𑐳𑐦𑐹 𑐥𑐶𑐎𑐵𑐫𑐾𑐟 𑐰 𑐣𑐾𑐥𑐵𑐮𑐫𑑂 𑐴𑐫𑐾𑐟 𑐨𑐶𑐎𑑂𑐲𑐸 𑐩𑑄𑐐𑐮 𑐰 𑐨𑐶𑐎𑑂𑐲𑐸 𑐰𑐖𑐶𑐬𑐧𑐸𑐡𑑂𑐢𑐶 𑐮𑐶𑐳𑐾𑑄 𑐳𑐸𑐏𑐷 𑐴𑑀𑐟𑐸 𑐣𑐾𑐥𑐵𑐮𑐫𑐵 𑐟𑑅𑐢𑑄𑐐𑐸 𑐮𑑂𑐴𑐵𑑅 𑐡𑐸𑐐𑐸 𑐖𑐸𑐮 𑑋)

𑐣𑐾𑐥𑐵𑑅𑐫𑐵 𑑗 𑐩𑑂𑐴𑐩𑑂𑐴 𑐳𑑄𑐑𑐣𑐵𑐫𑐎 𑐎𑐠𑑄 𑐀𑐏𑐶𑐮 𑐣𑐾𑐥𑐵𑐮 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑 𑐣𑑂𑐴𑑂𑐫𑐔𑐶𑐮𑐵𑑅 𑐫𑐵𑐣𑐵 𑐧𑐶𑐖𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑐵𑐩𑐹𑐴𑐶𑐎 𑐀𑐨𑐶𑐣𑐣𑑂𑐡𑐣 𑐳𑐩𑐵𑐬𑑀𑐴𑐫𑐵 𑐄𑐥𑐮𑐎𑑂𑐲𑑂𑐫𑐫𑑂 𑐰𑐳𑐥𑑀𑐮 𑐐𑐸𑐬𑐸𑐰𑐬 𑐨𑐶𑐎𑑂𑐲𑐸 𑐖𑑂𑐘𑐵𑐣𑐥𑐹𑐬𑑂𑐞𑐶𑐎 𑐩𑐴𑐵𑐳𑑂𑐠𑐰𑐶𑐬𑐫𑐵 𑐨𑐶𑑄𑐄𑐳𑐵𑑃𑐫, 𑐟𑐵𑑅𑐁𑐫𑐸 𑐮𑐶𑐳𑐾𑑄 𑐳𑐸𑐏𑐷 𑐩𑑄𑐐𑐮 𑐩𑐿𑐟𑑂𑐬𑐷 𑐫𑐵𑐣𑐵𑐔𑑂𑐰𑐣𑐵 𑑋 𑐰𑐶𑐱𑑂𑐰𑐱𑐵𑐣𑑂𑐟𑐶 𑐰𑐶𑐴𑐵𑐬, 𑑒𑑐𑑗𑑖𑐱𑑂𑐬𑐵𑐰𑐞 𑑒𑑒