𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵𑐟 𑐡𑐸𑐰𑐵𑐮𑐾𑐧𑐮𑐫𑑂

𑐩𑐠𑐵𑑄 𑐁𑐏𑑅 𑐳𑐫𑐾𑐎𑐾𑐐𑐸 𑐏𑑅𑐳𑐵 𑐩𑐵𑑄𑐨𑐵𑐳𑑄 𑐁𑐏𑑅 𑐳𑑂𑐫𑐣𑐾𑐩𑐵𑑅 𑐢𑐂𑐐𑐸 𑐩𑐵𑐳𑑂𑐚𑐬 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮𑑄 𑐣𑑂𑐴𑑂𑐫𑐠𑐣𑐵𑐡𑐷𑐐𑐸 𑐢𑐵𑐬𑐞𑐵 𑐴𑐾 𑐣𑐾𑐥𑐵𑐮𑐫𑑂 𑐩𑐵𑐟𑐺𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐄𑐡𑑂𑐑𑑀𑐲 𑐖𑐸𑐂𑐦𑐸 𑑋 𑐄𑐐𑐸 𑐂𑐮𑐫𑑂 𑐟𑐎𑑄 𑐕𑐐𑐹 𑐨𑐵𑐲𑐵𑑄 𑐩𑐾𑐐𑐸 𑐨𑐵𑐲𑐵𑐫𑐵𑐟 𑐡𑐩𑐣 𑐫𑐵𑐫𑐾𑐐𑐸, 𑐱𑑀𑐲𑐞 𑐫𑐵𑐫𑐾𑐐𑐸 𑐰𑐵 𑐰𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐹𑐐𑐸 𑐏𑐣𑐾 𑐩𑐡𑐸 𑑋 𑐧𑐬𑐸 𑐠𑑅𑐐𑐸 𑐳𑐩𑐸𑐡𑐵𑐫 𑐡𑐸𑐣𑐾 𑐠𑑅𑐠𑑅𑐐𑐸 𑐨𑐵𑐲𑐵 𑐮𑑂𑐴𑐵𑐣𑐵𑑅 𑐩𑐣𑐹𑐟 𑐳𑑂𑐰𑐟𑐣𑑂𑐟𑑂𑐬 𑐬𑐸𑐥𑑄 𑐴𑐾 𑐨𑐵𑐲𑐵 𑐳𑐫𑐾𑐎𑐵 𑐳𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐧𑐮𑐾 𑐟𑐎 𑐳𑐸𑐣𑐵𑐣𑑄 𑐳𑐸𑐫𑐵𑐟𑑄 𑐴𑐾 𑐣𑐶𑐲𑐾𑐢𑐫𑐵 𑐬𑐵𑐖𑐣𑐷𑐟𑐶 𑐣𑑄 𑐐𑐣𑑄 𑐖𑐹𑐐𑐸 𑐏𑐣𑐾 𑐩𑐡𑐸 𑑋 𑐰𑐫𑐵𑑄 𑐮𑐶𑐥𑐵 𑐡𑐾𑐳𑐫𑑂 𑐬𑐵𑐞𑐵 𑐱𑐵𑐳𑐣𑐫𑐵𑐟 𑐚𑐶𑐎𑐵𑐄 𑐫𑐵𑐫𑐾𑐩𑐵𑑅𑐐𑐸 𑐎𑐵𑐬𑐞𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐔𑑂𑐰𑐂𑐥𑐶𑑄 𑐔𑑂𑐰𑐩𑐶 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄𑐳𑑄 𑐰𑐶𑐡𑑂𑐬𑑀𑐴𑐫𑐵 𑐳𑑅 𑐠𑐸𑐐𑐸 𑐨𑐵𑐲𑐵𑑄 𑐔𑑂𑐰𑐫𑐵𑑅 𑐠𑑂𑐰𑐫𑐾𑐎𑐵𑐔𑑂𑐰𑑄𑐐𑐸 𑐳𑐷𑐰𑑄 𑐬𑐵𑐞𑐵𑐟𑐫𑑂𑐳𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐔𑑂𑐰𑐫𑐾𑐐𑐸 𑐰 𑐧𑑂𑐰𑐣𑐾𑐐𑐸 𑐖𑑂𑐫𑐵𑐫𑑂 𑐰𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐣𑐷𑐟𑐶 𑐎𑐵𑑅𑐐𑐸 𑐏𑑅 𑑋 𑐫𑐡𑐶 𑐴𑐬𑐶𑐨𑐖𑐣 𑐴𑐾 𑐖𑐎 𑐴𑐵𑐮𑐵𑐔𑑂𑐰𑑄𑐐𑐸 𑐖𑐹𑐳𑐵, 𑐢𑐮𑑂𑐔𑐵 𑐨𑐖𑐣𑐫𑑂 𑐴𑐾 𑐖𑐎 𑐣𑐾𑐥𑐵𑐮𑐨𑐵𑐲𑐵 𑐠𑑂𑐰𑐫𑐾𑐎𑐵𑐔𑑂𑐰𑑄𑐐𑐸 𑐖𑐹𑐳𑐵 𑐀𑐠𑐾 𑐡𑐩𑐣 𑐫𑐵𑐂 𑐩𑐏𑐸 𑑋

𑐣𑐾𑐥𑐵𑐮𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑐠𑐠𑐾 𑐬𑐵𑐞𑐵𑐟𑐫𑑂𑐳𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵𑑄 𑐔𑑂𑐰𑐫𑐾 𑐧𑑂𑐰𑐣𑐾 𑐡𑐂 𑐩𑐏𑐸 𑐢𑐂𑐐𑐸 𑐏𑑃 𑐬𑐵𑐖𑑂𑐫𑐳𑑂𑐟𑐬𑑄 𑐮𑐵𑐡𑐾 𑐫𑐵𑑅𑐐𑐸 𑐏𑑅 𑑋 𑐄𑐎𑐶𑐫𑐵 𑐎𑐵𑐬𑐞𑑄 𑐐𑐸𑐮𑐶𑑄 𑐰𑐶𑐡𑑂𑐬𑑀𑐴𑐷𑐟 𑐖𑐾𑐮 𑐔𑑂𑐰𑐣𑐳𑐵 𑐐𑐸𑐮𑐶𑐳𑐶𑐟𑑄 𑐡𑐾𑐱 𑐣𑐶𑐎𑐵𑐮𑐵 𑐟𑐎𑑄 𑐫𑐵𑑅𑐐𑐸 𑐏𑑅 𑑋 𑐀𑐠𑐾 𑐖𑐸𑐫𑐵𑑅 𑐴𑐾 𑐣𑐾𑐥𑐵𑐮𑐫𑑂 𑐣𑑂𑐴𑐵𑐥𑐵𑑄 𑐣𑐷𑐳𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐳𑑂𑐠𑐵 𑐔𑑂𑐰𑐳𑐵𑐥𑐵𑐳𑐵 𑐨𑐵𑐬𑐟𑐫𑐵 𑐧𑐣𑐵𑐬𑐳𑐫𑑂 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐠𑑂𑐰 𑐕𑐐𑐹 𑐐𑐣 𑐡𑐩𑐣 𑐖𑐸𑐂, 𑐀𑐣 𑐰𑐶𑐡𑑂𑐬𑑀𑐴 𑐖𑐸𑐂 𑐢𑐂𑐠𑐾𑑄 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐎𑐸𑐞𑑂𑐛𑐶𑐟 𑐫𑐵𑐫𑐾𑐟 𑐳𑑂𑐰𑐫𑐾𑐰𑑄 𑐰𑐶𑐡𑑂𑐬𑑀𑐴𑐫𑐵 𑐳𑑅 𑐠𑑂𑐰𑐫𑐾𑐎𑐾𑐟 𑐥𑐶𑐖𑑂𑐰𑑅𑐐𑐸 𑐰𑐶𑐡𑑂𑐬𑑀𑐴𑐫𑐵 𑐥𑐮𑐵𑑅 𑐴𑐾 𑐏𑑅 𑑋 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵 𑐥𑐹𑐬𑑂𑐰𑐷 𑐥𑐵𑐎𑐶𑐳𑑂𑐟𑐵𑐣𑑄 𑐧𑑄𑐐𑐮𑐵𑐡𑐾𑐱 𑐀𑐮𑐐𑑂𑐐 𑐖𑐹𑐐𑐸 𑐂𑐮𑐫𑑂 𑐣𑑄 𑐖𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐥𑐵𑐎𑐶𑐳𑑂𑐟𑐵𑐣𑑄 𑐕𑐐𑐹 𑐨𑐵𑐲𑐵 𑐕𑐐𑐹 𑐖𑐵𑐟𑐶𑐫𑐵𑐟 𑐖𑐎 𑐠𑐵𑐫𑑂 𑐧𑐶𑐄𑐐𑐸𑐮𑐶𑑄 𑐴𑐾 𑐮𑐶𑐥𑐵 𑐧𑑄𑐐𑐮𑐵𑐡𑐾𑐱 𑐀𑐮𑐐𑑂𑐐 𑐖𑐸𑐮 𑐢𑐵𑐂 𑑋 𑐀𑐣 𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐗𑑂𑐰𑐮𑐫𑑂 𑐁𑐥𑐵𑐮𑑄 𑐩𑐣𑐹𑐟𑐫𑑂𑐳𑑄 𑐳𑐵𑐴𑐡𑐟 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑑅𑐥𑐶𑐣𑐶 𑐧𑑄𑐐𑐵𑐮 𑐨𑐵𑐲𑐵𑐫𑐵 𑐩𑐵𑐐 𑐫𑐵𑐣𑐵 𑐣𑑂𑐴𑑂𑐫𑐵𑐎𑐹𑐐𑐸 𑐄𑐐𑐸 𑐀𑐨𑐶𑐫𑐵𑐣𑑄 𑐳𑐦𑐮𑐟𑐵 𑐎𑐵𑐫𑐾𑐰𑑄 𑐧𑑄𑐐𑐮𑐵𑐡𑐾𑐱𑑄 𑐴𑐾 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐴𑐣𑐾𑐐𑐸 𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑐎𑐵 𑐫𑑄𑐎𑐮 𑑋 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐡𑑃𑐫𑑂𑐡𑐳𑑄 𑑒𑑑 𑐦𑐾𑐧𑑂𑐬𑐸𑐀𑐬𑐷 𑐎𑐸𑐣𑑂𑐴𑐸 𑐴𑐣𑐾𑐐𑐸 𑐫𑐵𑑅 𑑋

𑐠𑐠𑐾 𑐩𑐵𑐟𑐺𑐨𑐵𑐲𑐵 𑐥𑑂𑐬𑐟𑐶 𑐥𑑂𑐬𑐾𑐩𑐨𑐵𑐰 𑐧𑑂𑐰𑐮𑑄𑐎𑐾𑐐𑐸 𑐖𑑂𑐫𑐵 𑐡𑐾𑐱 𑐰𑐶𑐡𑐾𑐳𑐫𑑂 𑐠𑐷𑐠𑐷 𑐀𑐨𑐶𑐫𑐵𑐣 𑐎𑐠𑑄 𑐟𑐵𑑅 𑐃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐴𑐾 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐗𑐷𑐐𑐸 𑐡𑐾𑐳𑐫𑑂 𑐢𑐵𑑅𑐳𑐵 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑑄𑐎𑐷𑐐𑐸 𑐳𑑂𑐎𑐸𑐮 𑐔𑐵𑐫𑐾𑐎𑐵𑑅 𑐳𑐷𑐊𑐚𑐷 𑐎𑑂𑐫𑐵𑐚, 𑐎𑑂𑐫𑐵𑐚 𑐩𑐵𑐣𑐾 𑐨𑑁𑐔𑐵, 𑐜𑐷𑐌𑐖𑐷 𑐜𑐐, 𑐜𑐐 𑐩𑐵𑐣𑐾 𑐏𑐶𑐔𑐵, 𑐁𑐬𑐊𑐚𑐷 𑐬𑐵𑐫𑑂𑐚, 𑐬𑐵𑐫𑑂𑐚 𑐩𑐵𑐣𑐾 𑐕𑐸𑑃𑐔𑐵 𑐢𑐵𑐢𑐵𑑄 𑐀𑑄𑐐𑑂𑐬𑐾𑐖𑐷 𑐩𑐵𑐣𑐾𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐱𑐧𑑂𑐡𑑄 𑐁𑐏𑑅 𑐳𑑂𑐫𑐣𑐾𑐐𑐸 𑐫𑐵𑐣𑐵𑑅 𑐩𑐵𑐳𑑂𑐚𑐬 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮𑑄 𑐴𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 𑐠𑐖𑑂𑐫𑐵𑑅𑐐𑐸 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑐣𑐾𑐡𑐸 𑑋 𑐳𑑄𑐳𑑂𑐎𑐺𑐟𑑄 𑐖𑐎 𑐔𑑂𑐰𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐄𑐐𑐸 𑐂𑐮𑐫𑑂 𑐣𑑄 𑐖𑐣𑐧𑑀𑐮𑐷 𑐥𑑂𑐬𑐔𑐮𑐣𑐫𑑂 𑐡𑐸𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐔𑑂𑐰𑐫𑐵𑑅 𑐧𑑂𑐰𑐣𑐵𑑅 𑐀𑐮𑐾 𑐧𑑂𑐫𑐵𑐎𑐬𑐞 𑐟𑐫𑐵𑐬 𑐫𑐵𑑅𑐐𑐸 𑐎𑐵𑐬𑐞𑑄 𑐴𑐾 𑐱𑐴𑐷𑐡 𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷𑐫𑐵𑐟 𑐬𑐵𑐞𑐵𑐟𑐫𑑂𑐳𑑄 𑐚𑐾𑐎𑐸𑐂 𑐫𑐏𑐵𑐣𑐵𑑅 𑐳𑑂𑐫𑐵𑐣𑐵 𑐧𑐶𑐮 𑑋 𑐀𑐮𑐾 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮, 𑐫𑑀𑐐𑐧𑐷𑐬𑐳𑐶𑑄 𑐎𑐳𑐵𑑅, 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸 𑐰 𑐣𑐶𑐲𑑂𑐛𑐵𑐣𑐣𑑂𑐡 𑐰𑐖𑑂𑐬𑐵𑐔𑐵𑐬𑑂𑐫 𑐠𑐾𑑄𑐖𑑂𑐫𑐵𑑅𑐥𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑑂𑐫𑑄𑐐𑑅𑐠𑐵𑑄 𑐢𑐫𑐵𑐟𑑅𑐥𑐶𑑄 𑐩𑐣𑐹𑐟𑐫𑑂𑐐𑐸 𑐥𑑂𑐬𑐾𑐬𑐞𑐵 𑐎𑐫𑐵𑑅 𑐣𑑂𑐴𑑂𑐫𑐔𑐶𑐮𑐵𑐔𑑂𑐰𑑄𑐥𑐶𑑄 𑐖𑐐𑐟𑐩𑐵𑐣 𑐰𑐿𑐡𑑂𑐫 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫, 𑐢𑐬𑑂𑐩𑐬𑐟𑑂𑐣 𑐫𑐩𑐶, 𑐥𑑂𑐬𑐾𑐩 𑐧𑐴𑐵𑐡𑐸𑐬 𑐎𑑄𑐳𑐵𑐎𑐵𑐬, 𑐔𑐶𑐟𑑂𑐟𑐢𑐬 𑐴𑐺𑐡𑐫𑐥𑐶𑑄𑐟 𑐖𑐾𑐮𑐣𑐾𑐮𑐫𑐵 𑐳𑐖𑐵𑐫𑑃 𑐧𑐷𑐐𑐸, 𑐡𑐾𑐱 𑐣𑐶𑐎𑐵𑐮𑐵 𑐫𑐵𑐫𑐾𑐐𑐸𑐣𑐶𑐳𑐾𑑄 𑐠𑐷𑐠𑐷 𑐎𑐠𑑄𑐫𑐵 𑐫𑐵𑐟𑐣𑐵 𑐧𑐶𑐫𑐵 𑐫𑑄𑐎𑐮 𑑋 𑐟𑐬 𑐧𑐶𑐡𑑂𑐬𑑀𑐴𑑄 𑐡𑐶𑐥𑐵𑑅 𑐩𑐎𑐵𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐕𑐐𑐹 𑐗𑐶𑑄𑐣𑑂𑐫𑐵𑐳𑑅𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐴𑐾 𑐮𑐶𑐏𑐶𑐟 𑐂𑐟𑐶𑐴𑐵𑐳 𑐡𑐸𑐐𑐸 𑐰 𑐣𑑂𑐫𑐵𑐳𑑅 𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐮𑐵 𑐧𑐵𑑄𑐧𑐵𑑄𑐮𑐵𑑅𑐐𑐸 𑐳𑐵𑐴𑐶𑐟𑑂𑐫 𑐴𑐾 𑐳𑐶𑐬𑑂𑐖𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐳𑐩𑐺𑐡𑑂𑐢 𑐨𑐵𑐲𑐵 𑐏𑑅 𑑋 𑐀𑐖𑑂𑐫𑐵𑑅𑐐𑐸 𑐨𑐵𑐲𑐵𑐫𑐵 𑐎𑐵𑐬𑐞𑑄 𑐬𑐵𑐞𑐵𑐟𑐫𑑂𑐳𑑄 𑐰 𑐥𑐘𑑂𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵𑑄 𑐟𑐎𑑄 𑐠𑑅𑐥𑐶𑑄𑐟 𑐰𑐶𑐡𑑂𑐬𑑀𑐴𑐷 𑐏𑑄𑐎𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐧𑑂𑐰𑐮𑐣 𑑋 𑐰𑐵𑐳𑑂𑐟𑐰𑐫𑑂 𑐖𑐣𑐟𑐵𑐫𑐵𑐟 𑐡𑐩𑐣 𑐫𑐵𑐟 𑐢𑐵𑑅𑐳𑐵 𑐴𑐾 𑐄𑐎𑐶𑐫𑐵 𑐥𑑂𑐬𑐟𑐶𑐎𑐵𑐬 𑐖𑐸𑐂𑐐𑐸 𑐏𑑅 𑑋 𑐬𑐵𑐞𑐵 𑐰𑐶𑐬𑑀𑐢𑐷 𑐁𑐣𑑂𑐡𑑀𑐮𑐣 𑐰 𑐥𑐘𑑂𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐎𑑂𑐰𑑅𑐠𑐮𑐾𑐐𑐸 𑐁𑐣𑑂𑐡𑑀𑐮𑐣𑐫𑑂 𑐣𑑄 𑐁𑐥𑐵𑐮𑑄 𑐨𑐵𑐲𑐵𑐨𑐵𑐲𑐷 𑐰 𑐖𑐣𑐖𑐵𑐟𑐶𑐫𑐵 𑐮𑑂𑐴𑐵𑑅 𑐡𑐸 𑑋 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐥𑐶𑑄𑐳𑑄 𑐣𑑂𑐴𑑂𑐫𑐵𑐎𑐹𑐐𑐸 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐰𑐶𑐡𑑂𑐬𑑀𑐴, 𑐩𑐢𑐾𑐱𑐫𑑂 𑐩𑐿𑐠𑐶𑐮𑐷 𑐨𑐵𑐲𑐵𑐨𑐵𑐲𑐷𑑄 𑐣𑑂𑐴𑑂𑐫𑐵𑐎𑐹𑐐𑐸 𑐀𑐨𑐶𑐫𑐵𑐣 𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐡𑐳𑐶 𑐏𑑅 𑑋 𑐠𑑂𑐰 𑐖𑑂𑐫𑐵 𑐗𑐷𑐐𑐸 𑐡𑐾𑐳𑐫𑑂 𑐖𑐎 𑐩𑐏𑐸 𑐰𑐶𑐱𑑂𑐰𑐣𑑂𑐫𑑄𑐎𑑄 𑐴𑐾 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐀𑐖𑑂𑐫𑐵𑑅𑐐𑐸 𑐴𑐾 𑐡𑐳𑐶 𑐧𑑄𑐐𑐮𑐡𑐾𑐱𑐫𑑂 𑐣𑑄 𑐖𑐸𑐮 𑑋 𑐄𑐎𑐶𑑄 𑐧𑑄𑐐𑐮𑐵𑐡𑐾𑐱𑑄 𑐴𑐾 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐴𑐣𑐾𑐐𑐸 𑐥𑐬𑐩𑑂𑐥𑐬𑐵 𑐣𑑄 𑐳𑐸𑐬𑐸 𑐖𑐸𑐮 𑑋 𑐠𑑅𑐐𑐸 𑐨𑐵𑐲𑐵 𑐥𑑂𑐬𑐟𑐶 𑐥𑑂𑐬𑐾𑐩 𑐫𑐵𑐫𑐾𑐐𑐸 𑐢𑐂𑐐𑐸 𑐩𑐾𑐩𑐾𑐐𑐸 𑐕𑐸𑑄 𑐣𑑄 𑐨𑐵𑐲𑐵𑐫𑐵𑐟 𑐳𑑂𑐫𑑄𑐎𑐾𑐐𑐸, 𑐩𑐨𑐶𑑄 𑐎𑐠𑑄 𑐳𑑂𑐰𑐫𑐾𑐐𑐸 𑐰𑐵 𑐰𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐏 𑐴𑐾 𑐩𑐏𑐸 𑑋

𑐟𑐬 𑐗𑐷𑐠𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑑄 𑐔𑑂𑐰𑐫𑐾𑐰𑑄 𑐏𑐳 𑐣𑐾𑐥𑐵𑐮𑐷 𑐨𑐵𑐲𑐵𑐫𑐵𑐟 𑐁𑐑𑐵𑐟 𑐮𑐵𑐂 𑐢𑐂𑐐𑐸 𑐴𑐾 𑐢𑐵𑐬𑐞𑐵𑑄 𑐬𑐵𑐞𑐵𑐟𑐫𑑂𑐳𑑄 𑐠𑐖𑐸 𑐰𑐵 𑐥𑑄𑐔𑐵𑐫𑐟𑐷 𑐧𑑂𑐫𑐰𑐳𑑂𑐠𑐵𑑄 𑐠𑐖𑐸 𑐄𑐎𑐶𑐫𑐵𑐟 𑐣𑐶𑐲𑐾𑐢 𑐴𑐾 𑐫𑐵𑐟 𑑋

𑐁𑑅 𑐡𑐾𑐳𑐫𑑂 𑐥𑑂𑐬𑐖𑐵𑐟𑐵𑐣𑑂𑐟𑑂𑐬𑐶𑐎 𑐰𑑂𑐫𑐰𑐳𑑂𑐠𑐵 𑐥𑐸𑐣𑑅 𑐳𑑂𑐠𑐵𑐥𑐣𑐵 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐡𑐾𑐱𑐫𑑂 𑐐𑐞𑐟𑐣𑑂𑐟𑑂𑐬 𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐍𑐔𑐶𑐟𑑂𑐫 𑐢𑐵𑑅𑐳𑐵 𑐁𑑅 𑐣𑑄 𑐳𑐩𑐵𑐥𑑂𑐟 𑐖𑐹𑐐𑐸 𑐩𑐡𑐸𑐣𑐶 𑑋 𑐠𑐣 𑐕𑐐𑐹 𑐨𑐵𑐲𑐵𑑄 𑐴𑐾 𑐖𑐎 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐥𑐬𑐶𑐥𑐵𑐚𑐷 𑐡𑐣𑐶 𑑋 𑐠𑐷𑐠𑐷 𑐨𑐵𑐲𑐵𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾𑐩𑐵𑑅𑐐𑐸𑐮𑐷 𑐏𑐳 𑐣𑐾𑐥𑐵𑐮𑐷 𑐨𑐵𑐲𑐵 𑐕𑐐𑐸𑐮𑐶𑑄 𑐴𑐾 𑐖𑐎 𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐀𑐣𑐶𑐰𑐵𑐬𑑂𑐫 𑐰𑐶𑐲𑐫 𑐡𑐫𑐾𑐎𑐵𑑅 𑐣𑐾𑐥𑐵𑐮𑐷 𑐰 𑐧𑐬𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵 𑐀𑑄𑐐𑑂𑐬𑐾𑐖𑐷𑐫𑐵𑐟 𑐩𑐵𑐣𑑂𑐫𑐟𑐵 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐩𑐵𑑄𑐨𑐵𑐫𑑂𑐫𑐵 𑐳𑑂𑐠𑐵𑐣 𑐴𑐾 𑐩𑐡𑐸 𑑋 𑐕𑐐𑐹 𑐩𑐵𑐟𑐺𑐨𑐵𑐲𑐵 𑐖𑐎 𑐮𑐵𑐐𑐹 𑐫𑐵𑐫𑐾𑐐𑐸 𑐏𑑅𑐳𑐵 𑐀𑑅𑐥𑐸𑐎 𑐁𑐏𑑅 𑐳𑐫𑐾𑐎𑐾 𑐦𑐂 𑑋 𑐩𑐵𑐟𑐺𑐨𑐵𑐲𑐵𑑄 𑐁𑐏𑑅 𑐳𑑂𑐫𑐣𑐾𑐐𑐸 𑐂𑐮𑐫𑑂 𑐐𑐸𑐮𑐶 𑐀𑑅𑐥𑐸𑐎 𑐁𑐏𑑅 𑐳𑐫𑐾𑐎𑐾 𑐦𑐂𑐐𑐸 𑐏𑑅 𑐩𑐾𑐩𑐾𑐐𑐸 𑐨𑐵𑐲𑐵𑑄 𑐄𑐮𑐶 𑐀𑑅𑐥𑐸𑐎 𑐳𑐫𑐾𑐎𑐾 𑐦𑐂 𑐩𑐏𑐸 𑑋 𑐰𑐫𑐵𑐟 𑐩𑐣𑑄 𑐩𑐣𑑄 𑐕𑐎𑑅 𑐀𑐣𑐸𑐰𑐵𑐡 𑐫𑐵𑐣𑐵𑐔𑑂𑐰𑐣𑐾𑐐𑐸 𑐂𑐮𑐫𑑂 𑐴𑐾 𑐰𑐫𑐵𑐐𑐸 𑐡𑐶𑐩𑐵𑐐𑐫𑐵 𑐀𑐥𑑂𑐰𑑅 𑐱𑐎𑑂𑐟𑐶 𑐏𑐬𑑂𑐔 𑐖𑐸𑐂𑐢𑐸𑑄𑐎𑐷 𑑋 𑐀𑐮𑐾 𑐰𑐵𑐳𑑂𑐟𑐰𑐫𑑂 𑐖𑐣𑐖𑐵𑐟𑐶, 𑐨𑐵𑐲𑐵𑐨𑐵𑐲𑐷𑐟 𑐮𑐶𑐄𑐣𑐾 𑐮𑐵𑐂𑐐𑐸𑐫𑐵 𑐎𑐵𑐬𑐞 𑐣𑑄 𑐠𑑂𑐰 𑐴𑐾 𑐖𑐸𑐫𑐵 𑐧𑐷 𑑋

𑐰𑐿𑐖𑑂𑐘𑐵𑐣𑐶𑐎𑐟𑐫𑑂 𑐢𑐵𑐬𑐞𑐵 𑐎𑐠𑑄 𑐩𑐔𑐵𑐧𑐮𑐫𑑂 𑐫𑐡𑐶 𑐰𑐵𑐟𑐵𑐰𑐬𑐞 𑐔𑐹𑐮𑐵𑐟 𑐢𑐵𑑅𑐳𑐵 𑐰𑑄 𑐣𑑂𑐴𑐫𑑂𑐐𑐹 𑐟𑐎 𑐨𑐵𑐲𑐵 𑐕𑐎𑑂𑐰𑐮𑑄 𑐳𑐫𑐾𑐎𑐾𑐦𑐸 𑑋 𑐄𑐎𑐶𑑄 𑐨𑐵𑐲𑐵𑐨𑐵𑐲𑐷 𑐰 𑐖𑐣𑐖𑐵𑐟𑐶𑑄 𑐣𑑄 𑐮𑐵𑐡𑐾 𑐴𑐾 𑐫𑐵𑑅𑐐𑐸 𑐏𑐳 𑐨𑐵𑐲𑐵 𑐳𑐫𑐾𑐎𑐾 𑐩𑐦𑐂 𑐢𑐎𑐵𑑅 𑐠𑑅𑐐𑐸 𑐩𑐵𑐟𑐺𑐨𑐵𑐲𑐵 𑐴𑐾 𑐩𑐳𑑂𑐫𑑃𑐳𑐾𑑄 𑐩𑐳𑑂𑐟𑐫𑑂𑐟 𑐏𑐳 𑐨𑐵𑐲𑐵 𑐀𑐣𑐶𑐰𑐵𑐬𑑂𑐫 𑐎𑐠𑑄 𑐩𑐳𑑅 𑐩𑐳𑑅 𑐳𑑂𑐫𑐣𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐴𑐾 𑐩𑐡𑐸 𑑋 𑐰𑑄 𑐳𑑂𑐎𑐹𑐮𑐫𑑂 𑐰𑐣𑐵𑑅 𑐳𑐫𑐾𑐎𑐷𑐐𑐸 𑐮𑐵 𑐰𑐴𑐾 𑐬𑐵𑐖𑑂𑐫𑑄 𑐮𑐵𑐡𑐾 𑐫𑐵𑐣𑐵𑐟𑑅𑐐𑐸 𑐏𑐳 𑐣𑐾𑐥𑐵𑐮𑐷 𑐨𑐵𑐲𑐵 𑐴𑐾 𑐏𑑅 𑑋 𑐄𑐎𑐶𑑄 𑐮𑐐𑐵𑐣𑐷 𑐴𑐾 𑐩𑑂𑐰𑐵𑐫𑐾𑐎 𑐠𑑅𑐐𑐸 𑐴𑐾 𑐩𑐸𑐮𑐫𑑂 𑐟𑐫𑐵𑑅 𑐳𑑂𑐫𑐣𑐾 𑐖𑐶𑐄𑐐𑐸 𑐨𑐵𑐲𑐵 𑐩𑐵𑐟𑐺𑐨𑐵𑐲𑐵 𑐣𑐶𑑄 𑐣𑑂𑐴𑐵𑐥𑐵𑑄 𑐠𑑅 𑐩𑐳𑑂𑐟𑐫𑑂𑐟 𑐳𑑂𑐫𑐣𑐾𑐩𑐵𑑅 𑑋 𑐩𑐔𑐵𑐟𑐫𑑂𑐳𑑄 𑐮𑑂𑐴𑐵𑐂𑐐𑐸 𑐩𑐔𑐵𑐨𑐵𑐫𑑂 𑐳𑑂𑐫𑐣𑐾𑐩𑐵𑑅 𑑋 𑐠𑑂𑐰 𑐔𑐮𑐣 𑐴𑑂𑐬𑐵𑐳 𑐖𑐸𑐖𑐸𑑄 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐰𑐫𑐳𑑂𑐎 𑐄𑐩𑐾𑐬𑐫𑐵𑐥𑐶𑑄 𑐩𑐣𑐹𑐟𑐫𑑂𑐳𑑄 𑐴𑐾 𑐩𑐳𑑂𑐟 𑐏𑐣𑐾𑐰𑑄 𑐴𑐾 𑐰𑑄 𑐩𑐵𑐟𑐺𑐨𑐵𑐲𑐵𑑄 𑐏𑑃 𑐮𑑂𑐴𑐵𑑅𑐐𑐸 𑐠𑐹𑑂𑐩𑑂𑐴 𑐴𑐾 𑐖𑐹𑐳𑐵𑑄 𑐗𑐷𑐳𑑄 𑐏𑐳 𑐨𑐵𑐲𑐵𑑄 𑐏𑑃 𑐮𑑂𑐴𑐵𑐫𑐾𑐐𑐸 𑐧𑐵𑐣𑐷 𑐖𑐹𑐰𑐣 𑑋 𑐠𑑂𑐰 𑐗𑐷 𑐳𑐎𑐳𑐶𑐫𑐵𑑄 𑐎𑐩𑐖𑑀𑐬𑐷 𑐴𑐾 𑐏𑑅 𑑋 𑐠𑐸𑐎𑐶𑐫𑐵𑐟 𑐰𑐵𑑅𑐔𑐵𑐫𑐾𑐎𑐵𑑅 𑐗𑐷𑐐𑐸 𑐠𑑅𑐐𑐸 𑐩𑐵𑑄 𑐨𑐵𑐫𑑂 𑐣𑑂𑐴𑐵𑐥𑐵𑑄 𑐳𑑂𑐫𑐣𑐾𑐩𑐵𑑅, 𑐳𑐫𑐾𑐎𑐾𑐩𑐵𑑅 𑐰 𑐩𑐠𑐸𑐮 𑐢𑐵𑑅𑐳𑐵 𑐴𑐾 𑐖𑐎 𑐣𑐶𑐐𑐹𑐐𑐸 𑐨𑐵𑐲𑐵 𑐰𑐵 𑐳𑑂𑐰𑑄𑐐𑐹𑐐𑐸 𑐨𑐵𑐲𑐵𑐫𑐵 𑐱𑐬𑐞 𑐎𑐵𑐫𑐾𑐟 𑐎𑐸𑐟𑑅 𑐫𑐵𑐫𑐾𑐩𑐵𑑅 𑐢𑐂𑐐𑐸 𑐢𑑂𑐫𑐵𑐣 𑐥𑑂𑐬𑐟𑑂𑐫𑐾𑐎 𑐨𑐵𑐲𑐵𑐨𑐵𑐲𑐵 𑐰 𑐖𑐣𑐖𑐵𑐟𑐶𑑄 𑐣𑐵𑐮𑐵 𑐎𑐵𑐫𑐾 𑐦𑐫𑐾𑐎𑐾𑐩𑐵𑑅 𑑋 𑐀𑐮𑐾 𑐴𑐾 𑐖𑐎 𑐗𑐷 𑐀𑐐𑑂𑐬𑐖𑐟𑐫𑑂𑐳𑑄 𑐫𑐵𑐣𑐵 𑐰𑑄𑐐𑐸 𑐨𑐵𑐲𑐵 𑐁𑐣𑑂𑐡𑑀𑐮𑐣 𑐳𑐵𑐬𑑂𑐠𑐎 𑐖𑐸𑐂 𑑋 𑐧𑑄𑐐𑐮𑐵𑐡𑐾𑐱𑑄 𑐩𑐵𑐣𑐾 𑐫𑐵𑐣𑐵𑑅 𑐰𑐶𑐱𑑂𑐰𑐫𑑂 𑐣𑑂𑐫𑐣𑐵𑐰𑑄𑐐𑐸 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐴𑐣𑐵𑐐𑐸𑐫𑐵 𑐍𑐔𑐶𑐟𑑂𑐫 𑐥𑐸𑐲𑑂𑐚𑐶 𑐖𑐸𑐂 𑑋

–𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶