𑐨𑐵𑐲𑐵𑐫𑐵 𑐔𑐾𑐟𑐣𑐵 𑐔𑑂𑐰𑐤𑑂𑐫𑐵𑐎𑐾𑐐𑐸 𑐥𑐮𑐵𑑅

-𑐣𑐬𑐾𑐱𑐰𑐷𑐬 𑐱𑐵𑐎𑑂𑐫

𑐠𑑁𑑄𑐎𑐤𑐫𑑂 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐖𑐣𑐎𑐰𑐶 𑐡𑐸𑐬𑑂‍𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐫𑐵 𑐎𑐰𑐶𑐟𑐵 𑐧𑐫𑑂𑐧𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐱𑐾𑐲𑐎𑐠𑑄 𑐖𑑂𑐫𑐵𑐥𑐸 𑐖𑐵𑐟𑐶𑐫𑐵 𑐩𑐣𑐹𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐩𑐵𑑄𑐨𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐄𑐮𑐶 𑐔𑐶𑐄𑐟𑐵𑑅 𑐩𑐟𑑅𑐐𑐸 𑐏𑑃𑐫𑑂 𑐮𑐔𑑂𑐕𑐶𑐟 𑐫𑐵𑐳𑐾𑑄 𑐔𑑂𑐰𑐫𑐵𑐟𑑅𑐐𑐸 𑐄𑐐𑐸 𑐎𑐰𑐶𑐟𑐵𑐫𑐵 𑐩𑐬𑑂‍𑐩 𑐠𑑅𑐐𑐸 𑐴𑐾 𑐠𑐵𑐳𑐫𑑂 𑐡𑐸 𑑋 𑐄𑐎𑐶𑐳𑐣𑑄 𑐎𑐰𑐶𑐟𑐵 𑐔𑑂𑐰𑐫𑐾𑐩𑐵𑑅𑐐𑐸𑐫𑐵 𑐥𑐺𑐲𑑂𑐛𑐨𑐹𑐩𑐶 𑐖𑐣𑐎𑐰𑐶𑐫𑐵𑐟 𑐖𑑂𑐫𑐵𑐥𑐸 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐳𑐩𑑂𑐩𑐵𑐣 𑐫𑐵𑐫𑐾𑐟 𑐧𑑂𑐰𑑄𑐐𑐸 𑐂𑐮𑐫𑑂 𑐠𑑅𑐐𑐸 𑐩𑐵𑑄𑐨𑐵𑐳𑑄 𑐖𑑂𑐫𑐵𑐗𑑂𑐰𑑅 𑐩𑐤𑑂𑐫𑐵𑐎𑐷𑐐𑐸 𑐡𑐧𑐸𑐮𑐷 𑐄𑐥𑐳𑑂𑐠𑐶𑐟 𑐩𑐖𑐸𑐂𑐐𑐸 𑐢𑐂𑐐𑐸 𑐰𑐫𑑂𑐎𑑅𑐫𑐵 𑐧𑐶𑐔𑐵𑑅 𑐣𑑄 𑐥𑐶𑐡𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐨𑐵𑐲𑐵, 𑐪𑐳𑐷𑐎𑐵 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐬𑐸𑐎 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐰𑐫𑑂𑐎𑑅𑐫𑐵 𑐧𑐶𑐔𑐵𑑅𑐫𑐵𑐟 𑐥𑐵𑐫𑑂𑐕𑐶 𑐩𑐏𑐸 𑐢𑐎𑐵𑑅 𑐢𑐵𑐫𑐾𑐐𑐸 𑐠𑐵𑐫𑑂 𑐣𑑄 𑐩𑐡𑐸 𑑋 𑐣𑐾𑐰𑐵𑑅𑐟 𑐠𑐸𑐮𑐶 𑐟𑐎 𑐡𑐵𑐳 𑐩𑐵𑐣𑐳𑐶𑐎𑐟𑐵𑐫𑑂 𑐎𑐸𑐴𑐵𑑄 𑐰𑐣𑐾𑐢𑐸𑑄𑐎𑐹𑐐𑐸 𑐡𑐸 𑐎𑐶 𑐕𑐸𑑄 𑐣𑑄 𑐖𑑂𑐫𑐵𑐗𑑂𑐰𑐮𑐫𑑂 𑐕𑐪 𑐖𑐎 𑐐𑐿𑐬 𑐣𑐾𑐰𑐵𑑅𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐳𑐵𑑄 𑐰𑐵 𑐠𑑅𑐥𑐶𑐣𑐶𑐐𑐸 𑐨𑐵𑐲𑐵 𑐣𑑂𑐰𑐰𑐵𑐫𑐾𑐐𑐸 𑐳𑑂𑐰𑐫𑐵𑑄 𑐐𑐿𑐬 𑐣𑐾𑐰𑐵𑑅 𑐨𑐵𑐲𑐵𑑄 𑐣𑑂𑐰𑐰𑐵𑐟 𑐢𑐵𑑅𑐳𑐵 𑐀𑐥𑑂𑐰𑑅 𑐩𑐣𑐹𑐟𑐫𑑂𑐳𑑄 𑐠𑐸𑐂 𑐢𑐫𑐵𑐐𑐸 𑐨𑑂𑐬𑐩 𑐎𑑂𑐰𑐧𑐶𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐕𑑂𑐫𑐮𑐵𑐧𑐸𑐮𑐵𑐫𑐵𑐟 𑐩𑐴𑐟𑑂𑐰 𑐧𑐷𑐐𑐸 𑐣𑐶𑑄𑐟𑐶𑑄 𑐖𑐣𑐎𑐰𑐶𑐫𑐵 𑐥𑐮𑐵𑑅𑐫𑐵𑐟 𑐔𑑂𑐰𑐕𑐵𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐖𑐸𑐂 𑑋

𑐣𑐾𑐰𑐵𑑅𑐟 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐏𑑅 𑑋 𑐄𑐩𑐶𑐐𑐸 𑐩𑐹𑐮𑐨𑐹𑐩𑐶 𑐢𑐫𑐵𑐐𑐸 𑐳𑑂𑐰𑐣𑐶𑐐𑑅 𑐏𑑅 𑑋 𑐠𑐣 𑐣𑐾𑐰𑐵𑑅𑐟𑐫𑑂𑐐𑐸 𑐠𑑅𑐥𑐶𑐣𑐶𑐐𑐸 𑐴𑐾 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶𑑄 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂𑐟 𑐬𑐵𑐖𑑂𑐫 𑐴𑐾 𑐡𑐩𑐣𑐫𑐵 𑐣𑐷𑐟𑐶 𑐡𑐫𑐾𑐎𑐵𑑅 𑐄𑐩𑐶𑐐𑐸 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐤𑑄𑐎𑐾𑐐𑐸 𑐖𑑂𑐫𑐵 𑐳𑐮𑑄𑐳𑑅 𑐡𑑃 𑐤𑑂𑐫𑐰𑑄𑐣𑐶𑐳𑐾𑑄 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐴𑐾 𑐮𑐶𑐔𑑂𑐰𑑅𑐎𑐠𑑄 𑐣𑐾𑐰𑐵𑑅𑐟𑐫𑑂𑐐𑐸 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶 𑐣𑑄 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐸𑐎𑐶𑐫𑐵𑐟 𑐰𑐵𑑅𑐔𑐵𑐫𑐾𑐎𑐵𑑅 𑐳𑐟𑑂𑐫𑐵𑐡𑑃 𑐤𑑂𑐫𑑅 𑐴𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸𑑄 ‘𑐨𑐵𑐲𑐵 𑐩𑑂𑐰𑐵𑑅𑐳𑐵 𑐖𑐵𑐟𑐶 𑐩𑑂𑐰𑐵𑐂’ 𑐢𑐫𑐵𑐐𑐸 𑐏𑑃 𑐤𑑂𑐫𑐠𑐣𑐵 𑐰𑑄𑐐𑐸 𑐡𑐸 𑑋 𑐠𑑁𑑄𑐫𑐵 𑐳𑐣𑑂𑐡𑐬𑑂‍𑐨𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐 𑐨𑐵𑐫𑑂 𑐟𑑂𑐰𑑅𑐟𑐵 𑐰𑐣𑐵𑐔𑑂𑐰𑑄𑐐𑐸𑐫𑐵 𑐎𑐵𑐬𑐞𑑄 𑐖𑐵𑐟𑐶𑐫𑐵 𑐀𑐳𑑂𑐟𑐶𑐟𑑂𑐰𑐫𑑂 𑐳𑑄𑐎𑐚 𑐰𑐫𑐵𑐔𑑂𑐰𑑄𑐐𑐸𑐫𑐵𑐟 𑐳𑐎𑐳𑐶𑐣𑑄 𑐰𑐵𑑅𑐔𑐵𑐫𑐾𑐎𑐵 𑐴𑐾 𑐔𑑂𑐰𑑄𑐐𑐸 𑐡𑐸 𑑋
𑐣𑐾𑐰𑐵𑑅𑐟𑐫𑑂 𑐡𑐸𑐣𑐾 𑐀𑐣𑐾𑐎 𑐖𑐵𑐟𑐶 𑐡𑐸𑐳𑐵 𑐖𑑂𑐫𑐵𑐥𑐸 𑐖𑐵𑐟𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑑅 𑐡𑐸𑐐𑐸 𑐏𑑃𑐫𑑂 𑐱𑑄𑐎𑐵 𑐩𑐡𑐸 𑑋

𑐏𑐫𑑂𑐟 𑐮𑐵 𑐖𑑂𑐫𑐵𑐥𑐸 𑐖𑐵𑐟𑐶 𑐢𑐎𑐵𑑅 𑐐𑐸𑐎𑐠𑑄 𑐥𑐬𑐶𑐨𑐵𑐲𑐶𑐟 𑐫𑐵𑐫𑐾𑐐𑐸 𑐏𑑅 𑐢𑐫𑐵𑐐𑐸 𑐴𑐾 𑐩𑐾𑐐𑐸 𑐤𑑂𑐫𑐳𑑅 𑐮𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐁𑐥𑐵𑐮𑑄 𑐩𑐣𑐹𑐟𑐫𑑂𑐳𑑄 𑐠𑑅𑐥𑐶𑑄𑐟 𑐖𑑂𑐫𑐵𑐥𑐸 𑐢𑐎𑐵𑑅 𑐥𑐴𑐶𑐔𑐵𑐣 𑐫𑐵𑐣𑐵𑐔𑑂𑐰𑑄𑐐𑐸 𑐣𑑄 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋 𑐀𑐥𑑂𑐰𑑅 𑐫𑐵𑐣𑐵𑑅 𑐧𑐸𑑃𑐖𑑂𑐫𑐵𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐥𑐶𑑄 𑐠𑐸𑐐𑐸 𑐖𑐵𑐟𑐶𑐫𑐵 𑐩𑐣𑐹𑐟 𑐣𑐾𑐰𑐵𑑅𑐟𑐫𑑂𑐐𑐸 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐰 𑐖𑐵𑐟𑑂𑐬𑐵 𑐣𑐏𑑅𑐣𑐵𑐥 𑐣𑑄 𑐀𑐨𑐶𑐣𑑂𑐣𑐎𑐠𑑄 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐐𑐸𑐮𑐶𑐏𑐾 𑐖𑐵𑐟𑑂𑐬𑐵 𑐣𑐏𑑅𑐟 𑐠𑐸𑐩𑐶𑐐𑐸 𑐴𑐾 𑐖𑐵𑐟𑐶𑐫𑐵 𑐧𑐵𑐴𑐸𑐮𑑂𑐫𑐟𑐵𑑄 𑐁𑑅 𑐟𑐎 𑐣𑑄 𑐮𑑂𑐫𑐣𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐬𑐵𑐖𑑂𑐫𑑄 𑐣𑐵𑐮𑐵 𑐰𑐫𑐵𑐔𑑂𑐰𑑄𑐐𑐸 𑐱𑐿𑐎𑑂𑐲𑐶𑐎 𑐡𑐩𑐣, 𑐨𑐵𑐲𑐵 𑐣𑐷𑐟𑐶 𑐰 𑐳𑐵𑐩𑐵𑐖𑐶𑐎 𑐎𑐵𑐬𑐞𑑄 𑐳𑐩𑐐𑑂𑐬 𑐣𑐾𑐰𑐵𑑅𑐟 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑐥𑐵𑐏𑐾𑑄 𑐰𑐶𑐔𑐮𑐣𑐫𑑂 𑐰𑐣𑐵𑐔𑑂𑐰𑑄𑐐𑐸 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋 𑐥𑑄𑐔𑐵𑐫𑐟𑐎𑐵𑐮𑐷𑐣 𑐕𑐐𑐹 𑐨𑐵𑐲𑐵𑐫𑐵 𑐣𑐷𑐟𑐶𑐫𑐵 𑐎𑐵𑐬𑐞𑑄 𑐩𑐸𑐮𑐸𑐎 𑐧𑐴𑐸𑐨𑐵𑐲𑐶𑐎 𑐖𑐹𑐳𑐵𑑄 𑐩𑐾𑐩𑐾𑐐𑐸 𑐨𑐵𑐲𑐵𑐫𑐵 𑐀𑐳𑑂𑐟𑐶𑐟𑑂𑐰 𑐳𑑄𑐎𑐚𑐫𑑂 𑐮𑐵𑐣𑐵𑐰𑑄𑐐𑐸 𑐡𑐸 𑑋

𑐕𑐐𑐹 𑐂𑐮𑐫𑑂 𑐣𑐾𑐰𑐵𑑅𑐟𑐫𑑂 𑐡𑐸𑐣𑐾 𑐧𑐴𑐸𑐳𑑄𑐏𑑂𑐫𑐎 𑐮𑑂𑐫𑐵𑑅 𑐡𑐸𑐥𑐶𑑄 𑐖𑑂𑐫𑐵𑐥𑐸 𑐖𑐵𑐟𑐶 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑑄 𑐏𑑃 𑐯𑐵𑐫𑐾𑐐𑐸 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐳𑐩𑑂𑐰𑐡𑑂𑐬𑑂‍𑐢𑐣 𑐫𑐵𑐫𑐾𑐐𑐸 𑐏𑑃𑐫𑑂 𑐤𑑂𑐫𑐔𑐶𑐮𑐵𑐔𑑂𑐰𑑄𑐐𑐸 𑐴𑐾 𑐎𑐵𑐬𑐞𑑄 𑐣𑐾𑐰𑐵𑑅𑐟𑐫𑑂𑐐𑐸 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐨𑐵𑐲𑐵 𑐠𑐵𑐟𑑄 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐐𑐸𑐮𑐶𑐏𑐾 𑐤𑐵𑐥𑐵𑐫𑐵 𑐥𑐸𑐬𑑂‍𑐏𑐵𑐟 𑐣𑐾𑐰𑐵𑑅 𑐨𑐵𑐳𑑄 𑐧𑐵𑐴𑐾𑐎 𑐩𑐾𑐐𑐸 𑐨𑐵𑐳𑑄 𑐣𑑂𑐰𑐰𑐵𑐫𑐾 𑐟𑐎𑑄 𑐩𑐳𑑅, 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐨𑐵𑐲𑐵 𑐣𑐾𑐰𑐵𑑅 𑐨𑐵𑐲𑐵 𑐩𑐖𑐹𑐐𑐸 𑐎𑐵𑐬𑐞𑑄 𑐳𑐬𑐎𑐵𑐬𑐷 𑐀𑐜𑑂𑐜𑐵𑐫𑑂 𑐖𑑂𑐫𑐵 𑐖𑐵𑐐𑐷𑐬 𑐣𑐫𑐾𑐐𑐸 𑐴𑑂𑐰𑑅𑐟𑐵𑑅 𑐟𑐎𑑄 𑐔𑐹𑐩𑐮𑐵𑑅𑐐𑐸 𑐏𑑅 𑑋

𑐟𑐬 𑐀𑐠𑐾 𑐏𑑅𑐳𑐵𑑄 𑐩𑐵𑐟𑐺𑐨𑐵𑐲𑐵𑐫𑐵 𑐀𑐣𑐸𑐫𑐵𑐫𑐷𑐟 𑐠𑑁𑑄 𑐟𑐎 𑐣𑑄 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐩𑐩𑐟𑐵𑑄 𑐗𑐹𑐔𑐵𑐫𑐵𑑅 𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟𑐷𑐫𑐵 𑐁𑐣𑑂𑐡𑑀𑐮𑐣𑐫𑑂 𑐤𑑂𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐔𑐮𑐣𑐫𑑂 𑐰𑐣𑐵𑐔𑑂𑐰𑑄𑐥𑐶𑑄𑐟 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐩𑐴𑐟𑑂𑐰 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐤𑑂𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐣𑐶 𑑋 𑐀𑐣𑐾𑐎 𑐬𑐵𑐖𑐣𑐷𑐟𑐶𑐎 𑐥𑐬𑐶𑐰𑐬𑑂‍𑐟𑐣 𑐮𑐶𑐥𑐵 𑐁𑑅 𑐩𑐸𑐮𑐸𑐎 𑐳𑑄𑐑𑐷𑐫𑐟𑐵𑐫𑑂 𑐡𑐸𑐴𑐵𑑄 𑐰𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐥𑐴𑐶𑐔𑐵𑐣 𑐳𑐴𑐶𑐟𑐫𑐵 𑐳𑑄𑐑𑐷𑐫𑐟𑐵𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐀𑐣𑐾𑐎 𑐀𑐢𑐶𑐎𑐵𑐬𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐴𑐨𑐵𑐐𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂 𑐥𑐸𑐬𑑂‍𑐏𑐵𑐟𑐫𑑂𑐳𑑄 𑐣𑐾𑐥𑐵𑑅 𑐡𑐾𑐫𑑂 𑐣𑐶𑐬𑑂‍𑐩𑐵𑐞𑐫𑐵 𑐣𑐶𑑄𑐟𑐶𑑄 𑐀𑐣𑐾𑐎 𑐫𑑀𑐐𑐡𑐵𑐣 𑐫𑐵𑐣𑐵𑐰𑑄𑐐𑐸 𑐡𑐸 𑑋 𑐠𑑁𑑄 𑐣𑐾𑐥𑐵𑑅𑐫𑐵 𑐪𑐳𑐷𑐎𑐵 𑐢𑐫𑐵𑐐𑐸 𑐴𑐾 𑐣𑐾𑐰𑐵𑑅𑐟𑐫𑑂𑐳𑑄 𑐣𑐶𑐬𑑂‍𑐩𑐵𑐞 𑐫𑐵𑐣𑐵𑐠𑐎𑐹𑐐𑐸 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐳𑐩𑑂𑐥𑐡𑐵 𑐏𑑅 𑑋 𑐣𑐾𑐰𑐵𑑅𑐟 𑐠𑑂𑐰 𑐏𑑃𑐫𑑂 𑐰𑐶𑐔𑐮𑐶𑐟 𑐖𑐹𑐐𑐸 𑐩𑐡𑐸𑐣𑐶 𑑋

𑐣𑐾𑐰𑐵𑑅𑐟𑐫𑑂𑐐𑐸 𑐪𑐳𑐷𑐎𑐵 𑐢𑐫𑐵𑐐𑐸 𑐴𑐾 𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐶 𑐏𑑅 𑑋 𑐠𑑁𑑄 𑐣𑐾𑐰𑐵𑑅𑐟 𑐰𑐶𑐱𑑂𑐰𑐣𑑂𑐫𑑄𑐎𑑄 𑐠𑑂𑐫𑐣𑐵𑐔𑑂𑐰𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐸𑐩𑐶𑐳𑑄 𑐀𑐣 𑐣𑑄 𑐠𑑅𑐥𑐶𑐣𑐶𑐐𑐸 𑐥𑐴𑐶𑐔𑐵𑐣 𑐎𑑂𑐫𑐣𑐾𑐐𑐸 𑐣𑐶𑑄𑐟𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐀𑐣𑐾𑐎 𑐳𑑄𑐳𑑂𑐎𑐺𑐟𑐶 𑐤𑑂𑐫𑐧𑑂𑐰𑐫𑐵 𑐰𑐫𑐵 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑐫𑑂 𑐟𑑅𑐡𑑃 𑐤𑑂𑐫𑐰𑑄𑐣𑐶𑐳𑐾𑑄 𑐩𑑄𑐎𑐵𑑅 𑐪𑐥𑐸𑐖𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐳𑐶𑐎𑑂𑐎𑐶𑐩𑐫𑑂 𑐫𑑃𑐫𑐵𑑅𑐫𑐵 𑐎𑐸𑐩𑐵𑐬𑐷 𑐖𑐵𑐟𑑂𑐬𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐁𑑅 𑐮𑐞𑑂𑐜𑐣𑐫𑑂 𑐫𑑅𑐩𑐬𑐶 𑐥𑐸𑐤𑐶 𑐴𑐣𑐾𑐐𑐸 𑐫𑐵𑐣𑐵𑐴𑑅𑐐𑐸 𑐳𑐩𑐵𑐔𑐵𑐬 𑐥𑐶𑐡𑑄𑐐𑐸 𑐡𑐸 𑑋

𑐣𑐾𑐰𑐵𑑅 𑐪𑐳𑐷𑐎𑐵𑐫𑐵 𑐖𑑂𑐰𑑅 𑐩𑐡𑐸𑐐𑐸 𑐖𑑂𑐫𑐵𑐫𑐵𑐟 𑐳𑐎𑐳𑐶𑐣𑑄 𑐔𑑂𑐰𑐕𑐵𑐫𑐾 𑐴𑐾 𑐩𑐵𑑅 𑑋 𑐟𑐬 𑐰𑐶𑐜𑐩𑑂𑐧𑐣𑐵𑐫𑐵 𑐏𑑃 𑐢𑐵𑐫𑐾𑐩𑐵𑑅, 𑐀𑐣 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐮𑐵 𑐡𑐟, 𑐟𑐬 𑐨𑐵𑐫𑑂 𑐩𑑄𑐟 𑑋 𑐮𑐵 𑐰 𑐮𑐸𑐳𑐶 𑐠𑐾𑑄 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶𑐫𑐵𑐟 𑐧𑑂𑐫𑐵𑐐𑐮𑑄 𑐟𑐫𑐾 𑐴𑐾 𑐦𑐂 𑐩𑐏𑐸𑐳𑐵 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐡𑐬𑑂‍𑐱𑐣, 𑐩𑐹𑐮𑑂𑐫 𑐩𑐵𑐣𑑂𑐫𑐟𑐵𑐫𑐵𑐟 𑐣𑐾𑐰𑐵𑑅 𑐨𑐵𑐲𑐵 𑐩𑐡𑐫𑐾𑐎𑑄 𑐄𑐎𑐶𑐫𑐵𑐟 𑐠𑐸𑐂𑐎𑐾 𑐴𑐾 𑐦𑐂 𑐩𑐏𑐸 𑑋

𑐣𑐾𑐰𑐵𑑅 𑐨𑐵𑐲𑐵𑐫𑐵 𑐀𑐨𑐵𑐰𑐫𑑂 𑐀𑐣𑐫𑐵 𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐣𑐾 𑐏𑐣𑐾 𑐡𑐫𑐵𑐔𑑂𑐰𑐣𑐷𑐐𑐸 𑐎𑐺𑐟𑐶𑐩𑐟𑐵𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵𑐟 𑐴𑐾 𑐗𑐣 𑐰𑐶𑐎𑐺𑐟𑐶𑐂 𑐫𑑄𑐎𑐵𑐔𑑂𑐰𑑄𑐐𑐸 𑐣𑑄 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅𑑋 𑐖𑐣𑐎𑐰𑐶 𑐡𑐸𑐬𑑂‍𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐕𑑂𑐫𑐮𑐵𑐧𑐸𑐮𑐵 𑐖𑐸𑐂𑐩𑐵𑑅 𑐢𑐎𑐵𑑅 𑐣𑐵𑐮𑐵𑐔𑑂𑐰𑑄𑐐𑐸 𑐩𑐵𑐣𑑂𑐫𑐟𑐵𑐫𑐵𑐟 𑐩𑐾𑐩𑐾𑐥𑐶𑑄𑐳𑑄 𑐣𑑄 𑐣𑐵𑐮𑐵 𑐎𑐵𑐫𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋

𑐖𑑂𑐫𑐵𑐥𑐸 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐴𑐾 𑐤𑐵𑐥𑐵 𑐣𑑄 𑐟𑑅𑐎𑑂𑐰𑑅 𑐴𑐾 𑐰𑐬𑐶𑐲𑑂𑐛 𑐨𑐵𑐲𑐵𑐴𑑂𑐫𑐩𑐶𑐥𑐶𑑄 𑐳𑐩𑑂𑐩𑐵𑐣𑐶𑐟 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐟𑐬 𑐠𑐸𑐖𑑂𑐰𑑅𑐐𑐸 𑐔𑐶𑐣𑑂𑐟𑐣 𑐖𑐹𑐐𑐸 𑐏𑐣𑐾𑐩𑐡𑐸 𑑋𑐣𑐾𑐰𑐵𑑅 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐳𑐵𑐴𑐶𑐟𑑂𑐫𑐫𑐵 𑐴𑐬𑐾𑐎 𑐖𑑂𑐫𑐵𑐗𑑂𑐰𑑅𑐫𑐵 𑐳𑑄𑐔𑐵𑐮𑐣 𑐣𑐾𑐰𑐵𑑅 𑐨𑐵𑐳𑑄 𑐴𑐾 𑐖𑐸𑐂𑐩𑐵𑑅𑐐𑐸 𑐏𑑃𑐫𑑂 𑐰𑐶𑐰𑐵𑐡 𑐩𑐡𑐸 𑑋 𑐳𑐵𑐩𑐵𑐣𑑂𑐫𑐬𑐸𑐥𑑄 𑐣𑑄 𑐣𑐾𑐰𑐵𑑅𑐟𑐫𑑂𑐐𑐸 𑐠𑑅𑐥𑐶𑐣𑐶𑐐𑐸 𑐖𑑂𑐫𑐵𑐗𑑂𑐰𑑅 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐳𑑄 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐕𑐸𑑄 𑐀𑐣𑑂𑐫𑐠𑐵 𑐩𑐏𑐸 𑑋

𑐟𑐬 𑐗𑐷 𑐣𑐾𑐰𑐵𑑅𑐟𑐫𑑂 𑐡𑐸𑐣𑐾 𑐡𑐫𑐵𑐔𑑂𑐰𑐣𑐷𑐐𑐸 𑐨𑐵𑐲𑐶𑐎 𑐮𑐑𑐸𑐟𑐵𑐨𑐵𑐲 𑐤𑑄𑐎𑐵 𑐕𑑂𑐰𑐫𑐾𑐩𑐵𑑅𑐐𑐸 𑐰 𑐣𑐾𑐰𑐵𑑅 𑐖𑑂𑐫𑐵𑐗𑑂𑐰𑐮𑐫𑑂 𑐐𑐿𑐬 𑐣𑐾𑐰𑐵𑑅𑐨𑐵𑐳𑑄 𑐖𑐸𑐂𑐐𑐸 𑐳𑐘𑑂𑐔𑐵𑐮𑐣 𑐥𑑂𑐬𑐟𑐶 𑐥𑐹𑐬𑑂‍𑐰𑐵𑐐𑑂𑐬𑐴𑐷 𑐖𑐸𑐂𑐩𑐵𑑅𑐐𑐸 𑐠𑐵𑑄𑐿𑐫𑐵 𑐁𑐰𑐱𑑂𑐫𑐎𑐟𑐵 𑐏𑑅 𑑋 𑐠𑐸𑐎𑐶𑐫𑐵 𑐱𑐸𑐬𑐸𑐰𑐵𑐟 𑐖𑐣𑐎𑐰𑐶𑐥𑐵𑐏𑐾𑑄 𑐖𑐹𑐐𑐸 𑐡𑐸 𑑋 𑐠𑑂𑐰 𑐣𑑄 𑐕𑐐𑐹 𑐨𑐵𑐲𑐶𑐎 𑐔𑐾𑐟𑐣𑐵 𑐀𑐨𑐶𑐰𑐺𑐡𑑂𑐢𑐶𑐫𑐵 𑐁𑐬𑐩𑑂𑐨 𑐏𑑅 𑑋 𑐠𑐸𑐎𑐶𑐫𑐵𑐟 𑐣𑑄 𑐕𑐐𑐹 𑐁𑐣𑑂𑐡𑑀𑐮𑐣𑐎𑐠𑑄 𑐴𑐾 𑐤𑑂𑐫𑐵𑐎𑐾𑐩𑐵𑑅 𑑋