𑐧𑐾𑐮𑐵𑐫𑐟𑐫𑑂 𑐮𑐎𑐜𑐵𑐄𑐣𑐫𑑂 𑐣𑐾𑐥𑐵𑑅𑐫𑐵 𑐳𑐩𑑂𑐥𑐡𑐵 𑐡𑐫𑐾𑐎𑐵𑐔𑑂𑐰𑑄𑐥𑐶𑑄 𑐩𑐳𑑂𑐟

 

 

𑐠𑑁𑑄𑐎𑐣𑑂𑐴𑐫𑑂 𑐧𑐾𑐮𑐵𑐫𑐟𑐫𑑂 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑑄𑐎𑑂𑐬𑐩𑐞 𑐣𑐶𑐫𑐣𑑂𑐟𑑂𑐬𑐞𑐫𑑂 𑐰𑐮 𑑋 𑐀𑐠𑐾𑐳𑐵𑑄 𑐕𑐸𑑄 𑐰𑐵𑑅 𑐣𑑂𑐴𑑂𑐫𑑅 𑐟𑐎 𑐣𑑄 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐠𑑂𑐫𑑄𑐩𑐠𑑂𑐫𑑄 𑐡𑑂𑐰𑑅𑐕𑐶𑑄 𑐩𑐮𑑂𑐫𑐵𑐎 𑐩𑐣𑐹 𑐳𑐶𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐗𑐷𑐳𑑄 𑐡𑐎𑑂𑐰 𑐖𑑂𑐫𑐵 𑐕𑐏𑐾 𑐟𑐫𑐵𑑅 𑐳𑐸𑐩𑑂𑐎 𑐕𑐾𑐫𑑂𑑃 𑐔𑑂𑐰𑐣𑐾𑐐𑐸𑐫𑐵 𑐕𑐸𑑄 𑐰𑐶𑐎𑐮𑑂𑐥 𑐩𑐏𑐣𑐵 𑑋 𑐩𑐵𑐣𑐰 𑐂𑐟𑐶𑐴𑐵𑐳𑐫𑑂 𑐳𑐸𑐫𑐵𑐟𑑄 𑐣𑑄 𑐟𑐵𑐮𑑄 𑐐𑑂𑐰𑐫𑐵𑑅 𑐎𑐸𑐣𑐵 𑐟𑐫𑐾𑐐𑐸 𑐢𑐂𑐐𑐸 𑐀𑐥𑐬𑐵𑐢 𑐳𑐬𑐴 𑐖𑐸𑐂 𑑋 𑐀𑐠𑐾𑐳𑐵𑑄 𑐠𑑂𑐰𑐥𑐵𑐮𑐫𑑂 𑐢𑐵𑑅𑐳𑐵 𑐗𑐷𑐳𑑄 𑐠𑑅𑐐𑐸 𑐰 𑐳𑐩𑐵𑐖𑐫𑐵 𑐣𑐶𑑄𑐟𑐶𑑄 𑐕𑐾𑑃 𑐡𑐸𑐣𑐾 𑐴𑐾 𑐎𑐸𑑄𑐎𑐵 𑐔𑑂𑐰𑐣𑐵𑐐𑐸 𑐖𑐸𑐮 𑑋 𑐠𑐖𑑂𑐫𑐵𑑅𑐐𑐸 𑐀𑐥𑐹𑐬𑑂𑐰 𑐂𑐮𑐫𑑂 𑐖𑑀𑐏𑐶𑐩𑐫𑑂 𑐮𑐵𑐫𑐾𑐦𑐸𑐥𑐶𑑄 𑐢𑐫𑐵𑐥𑐶𑑄 𑐩𑐳𑑂𑐟 𑐣𑑄 𑐏𑑅 𑑋 𑐩𑐵𑑄𑐧𑑁𑐥𑐶𑑄𑐟 𑐣𑑄 𑐩𑐳𑑂𑐟𑐫𑑂𑐐𑐸 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵 𑐐𑐸𑐧𑐮𑐾𑑄 𑐳𑑂𑐰𑐫𑐾 𑐩𑐏𑑄𑐣𑐶𑐐𑐸, 𑐕𑐐𑐹 𑐎𑐠𑑄 𑐣𑑂𑐴𑐹𑐐𑐸 𑐴𑐾 𑐀𑐰𑐳𑑂𑐠𑐵 𑐖𑐸𑐂 𑑋 𑐠𑐖𑑂𑐫𑐵𑑅𑐐𑐸 𑐂𑐮𑐫𑑂 𑐩𑐳𑑂𑐟𑐫𑑂𑐟 𑐖𑑀𑐏𑐶𑐩𑐫𑑂 𑐩𑐮𑐵𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐧𑐵𑑄𑐮𑐵𑑅𑐐𑐸 𑐳𑐩𑐵𑐢𑐵𑐣 𑐕𑐐𑐹 𑐬𑐔𑐣𑐵𑐟𑑂𑐩𑐎 𑐥𑑂𑐬𑐰𑐶𑐢𑐶 𑐣𑑄 𑐏𑑅 𑑋

𑐧𑐾𑐮𑐵𑐫𑐟 𑐳𑐬𑐎𑐵𑐬𑑄 𑑒𑑓 𑐩𑐵𑐬𑑂𑐔 𑑒𑑐𑑒𑑐 𑐫𑑂 𑐁𑐢𑐶𑐎𑐵𑐬𑐶𑐎 𑐬𑐹𑐥𑑄 𑐮𑐎𑐜𑐵𑐄𑐣𑐫𑐵 𑐑𑑀𑐲𑐞𑐵 𑐫𑐵𑑅𑐳𑐵𑑄 𑐄𑐎𑐶𑐫𑐵 𑐕𑐸𑑄 𑐰𑐵𑑅 𑐣𑑂𑐴𑑂𑐫𑑅 𑐴𑐾 𑐫𑐎𑑂𑐰 𑐩𑐳𑑂𑐟 𑐧𑑂𑐰𑐣𑐾𑐎𑐸𑐠𑐶 𑐰𑐣𑐾𑐐𑐸 𑐟𑑂𑐰𑑅𑐟𑐾 𑐢𑐸𑑄𑐎𑐹𑐐𑐸 𑐏𑑅 𑑋 𑐧𑑂𑐰𑐣𑐾𑐎𑐸𑐠𑐶 𑐟𑐷𑐢𑐸𑑄𑐎𑐵𑑅 𑐮𑐵 𑐄𑐩𑐶𑐳𑑄 𑐥𑐵𑐳𑐵𑐥𑐶𑑄 𑐟𑐎𑑄 𑐣𑐵𑐥𑐮𑐵𑐫𑐾 𑐩𑐏𑐣 𑑋 𑐠𑐖𑑂𑐫𑐵𑑅𑐐𑐸 𑐂𑐮𑐫𑑂 𑐧𑐾𑐮𑐵𑐫𑐟𑐫𑑂 𑐣𑐾𑐰𑐵𑑅 𑐟𑐖𑐶𑐮𑐖𑐶 𑐩𑑂𑐰𑐵𑐎𑐵𑐟𑐫𑐾𑐟 𑐣𑐷𑐡𑑃 𑐣𑐶𑐳𑐾𑑄 𑐳𑐣𑐵𑐔𑑂𑐰𑑄𑐐𑐸 𑐳𑑄𑐳𑑂𑐠𑐵 𑐥𑐵𑐳𑐵 𑐥𑐸𑐔𑑅 𑐐𑐸𑐠𑐶 𑐮𑐣𑑂𑐡𑐣𑑄 𑐩𑐳𑑂𑐟𑐫𑑂𑐟 𑐕𑐸𑑄 𑐣𑑂𑐴𑑂𑐫𑐂𑐥𑐸𑐎𑐾𑐐𑐸 𑐰 𑐧𑐵𑑄𑐮𑐵𑑅𑐐𑐸 𑐏𑑃 𑐳𑑂𑐫𑐣𑐾𑐐𑐸 𑐨𑐵𑐮𑐵 𑐎𑐵𑐮 𑑋

𑐠𑑂𑐰 𑐮𑐶𑐥𑐵 𑐐𑐸𑐠𑐶𑑄 𑐜𑐶𑐖𑐶𑐚𑐮 𑐥𑑂𑐮𑐾𑐚𑐦𑐬𑑂𑐩𑐫𑑂 𑐕𑐐𑐹 ‘𑐐𑐸𑐠𑐶 𑐩𑐵𑐂𑐣𑐎𑑂𑐬𑐵𑐦𑑂𑐚 𑐳𑐬𑑂𑐨𑐬’ 𑐢𑐂𑐐𑐸 𑐳𑐸𑐬𑐎𑑂𑐲𑐶𑐟 𑐰 𑐎𑐺𑐟𑑂𑐬𑐶𑐩 𑐠𑐵𑐫𑑂 𑐡𑐫𑐾𑐎𑐮 𑑋 𑐠𑑂𑐰 𑐢𑐸𑑄𑐎𑐵𑑅 𑐗𑐶𑑄𑐳𑑂𑐰𑐡𑑄 𑐎𑑂𑐰𑐫𑑂𑐫𑐵 𑐗𑐶𑑄𑐣𑑂𑐫𑐵𑐩𑑂𑐴 𑐩𑐳𑑂𑐟𑐫𑑂𑐳𑑄 𑐠𑑂𑐰 𑐡𑐧𑐸𑐮𑐶𑐂 𑐧𑑂𑐰𑐟𑐶 𑐎𑐵𑐮 𑑋 𑐠𑐸𑐐𑐸 𑐜𑐶𑐖𑐶𑐚𑐮 𑐡𑐧𑐸𑐮𑐶𑐂 𑐂𑐥𑐶𑑄 𑐣𑑂𑐴𑐶𑐣𑑂𑐴𑐶𑑄 𑐣𑐶𑐑𑑁 𑐩𑑂𑐴𑐶𑐟𑐾𑐐𑐸 𑐰 𑐣𑑂𑐴𑐹𑐏𑑃 𑐳𑐫𑐾𑐎𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐳𑑂𑐰𑐮𑐵 𑐡𑐟 𑑋 𑐧𑐾𑐮𑐵𑐫𑐟𑐫𑐵 𑐠𑐷𑐠𑐷 𑐠𑐵𑐳𑑄 𑐰𑑅𑐥𑐶𑑄 𑐄𑐩𑐶𑐳𑑄 𑐠𑑅𑐥𑐶𑑄𑐟 𑐢𑐵𑐠𑐾𑑄 𑐣𑐵𑐥𑐮𑐵𑑅𑐐𑐸 𑐢𑐵𑑅𑐳𑐵 𑐩𑐡𑐸 𑑋

𑐡𑐎𑐮𑐾𑐫𑑂 𑐣𑑂𑐴𑐵𑐥𑐵𑑄 𑐄𑐩𑐶𑐳𑑄 𑐣𑐶𑐰𑐵𑑅 𑐟𑐎 𑐠𑑅𑐥𑐶𑑄𑐟 𑐩𑑂𑐴𑐳𑐶𑐎𑐮 𑑋 𑐄𑐩𑐶𑐐𑐸 𑐮𑑂𑐴𑐵𑐟𑐫𑑂 𑐰𑑅𑐐𑐸 𑐖𑑂𑐫𑐵𑐨𑑅𑐫𑐵 𑐕𑑂𑐫𑐵𑐮𑐵𑐧𑐸𑐮𑐵 𑐰 𑐣𑑂𑐴𑐹 𑐥𑐵𑐳𑐵𑐥𑐶𑐣𑐶𑐐𑐸 𑐧𑑅 𑐕𑐸𑐎𑐷 𑐡𑐸 𑐢𑐫𑐵𑐐𑐸 𑐠𑐸𑐂𑐎𑐮 𑑋 𑐩𑐾𑐐𑐸 𑐔𑐬𑐞𑐫𑑂 𑐄𑐩𑐶𑐳𑑄 𑐣𑑂𑐴𑐵𑐥𑐵𑑄𑐐𑐸 𑐖𑑂𑐫𑐵 𑐎𑐠𑑄 𑐳𑑂𑐰𑐫𑐩𑑂𑐨𑐹 𑐳𑑂𑐟𑐹𑐥𑐵 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐮 𑑋 𑐣𑐾𑐥𑐵𑑅 𑐡𑐾𑐫𑑂𑐫𑐵 𑐠𑐸𑐐𑐸 𑐡𑐎𑐮𑐫𑑂 𑐣𑐵𑑄𑐖𑐵𑑅𑐐𑐸 𑐩𑐴𑐵𑐔𑐿𑐟𑑂𑐫 𑐡𑐫𑐾𑐎𑐾𑐧𑐮𑐫𑑂 𑐂𑐩𑐶𑐐𑐸 𑐣𑐶𑑄𑐟𑐶𑑄 𑐡𑐎𑑂𑐰 𑐣𑑂𑐴𑐹 𑐖𑑂𑐫𑐵𑐨𑑅𑐟 𑐖𑐹𑐐𑐸𑐮𑐶𑑄 𑐔𑐶𑐔𑐶𑐢𑑄𑐐𑐸 𑐖𑑂𑐫𑐵 𑐫𑐵𑐫𑐾𑐟 𑐣𑑄 𑐄𑐩𑐶𑐳𑑄 𑐫𑐎𑑂𑐰 𑐥𑐬𑐶𑐱𑑂𑐬𑐩 𑐫𑐵𑐫𑐾𑐩𑐵𑐮 𑑋 𑐠𑐸𑐎𑐷 𑐡𑐸𑐣𑐾 𑐫𑐎𑑂𑐰 𑐳𑑄𑐬𑐔𑐣𑐵𑐟 𑐡𑐫𑐾𑐎𑐾𑐩𑐵𑑅𑐐𑐸𑐮𑐶𑑄 𑐄𑐩𑐶𑐐𑐸 𑐫𑐎𑑂𑐰 𑐃 𑐦𑐸𑐟 𑑋 𑐣𑑂𑐴𑑂𑐫𑐵𑐐𑐸 𑐖𑐹𑐳𑐵𑑄 𑐣𑑂𑐴𑐹𑐥𑐶𑑄𑐳𑑄 𑐡𑐫𑐾𑐎𑐸𑐐𑐹 𑐳𑑂𑐰𑐫𑐩𑑂𑐨𑐹 𑐳𑑂𑐟𑐸𑐥𑐵 𑐮𑐶𑐥𑐵𑐟𑐫𑑂 𑐧𑐵𑑄 𑐴𑐾 𑐮𑐵𑐟, 𑐀𑐮𑐾 𑐠𑐸𑐐𑐸𑐳𑐷𑐫𑐵 𑐳𑑂𑐰𑐵𑑄𑐫𑐵𑑅 𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐳𑐶𑐢𑑅𑐐𑐸 𑐣𑑄 𑐥𑐵𑑅 𑐮𑐵𑐟 𑑋

‘𑐐𑐸𑐠𑐶 𑐩𑐵𑐂𑐣𑐎𑑂𑐬𑐵𑐦𑑂𑐚’ 𑐡𑐸𑐣𑐾 𑐗𑐷𑐳𑑄 𑐫𑐎𑑂𑐰 𑐏𑑃 𑐳𑐫𑐾𑐎𑐾 𑐏𑐣 𑐰 𑐣𑑂𑐴𑐹 𑐣𑑂𑐴𑐹 𑐴𑐵𑐠𑑂𑐫𑐵𑐟 𑐰𑐫𑐵𑐔𑑂𑐰𑐣 𑑋 𑐣𑐾𑐥𑐵𑑅 𑐰𑐣𑐵𑐧𑐮𑐫𑑂 𑐕𑐾𑑃𑐖𑑅𑐮𑐶𑐳𑐾 𑐳𑑂𑐰𑐫𑐩𑑂𑐨𑐹 𑐳𑑂𑐰𑑅𑐰𑐣𑐵𑐐𑐸 𑐖𑐶 𑐮𑐸𑐩𑑄’, 𑐳𑑂𑐚𑑀𑐎𑐫𑑂 𑐔𑑂𑐰𑐣𑐷𑐩𑑂𑐴 𑐔𑑂𑐫𑐵𑐡𑑃 𑐎𑑂𑐫𑑄𑐩𑑂𑐴 𑐀𑐮𑐶𑐱𑐵 𑐡𑐬𑑂𑐱𑐣𑐢𑐵𑐬𑐷𑑄 𑐢𑐵𑐮 𑑋

𑐧𑐾𑐖𑐶𑑄𑐐𑐳𑑂𑐚𑑀𑐎𑐫𑐵 𑐣𑑂𑐴𑐫𑑂𑐡𑑃 𑐎𑑂𑐫𑑄𑐩𑑂𑐴 𑐬𑐾𑐂𑐳𑐵 𑐬𑐵𑐖𑐨𑐞𑑂𑐜𑐵𑐬𑐷𑐫𑐵𑐟 𑐢𑐵𑑅𑐳𑐵 𑐫𑐎𑑂𑐰 𑐔𑐶𑐢𑐷𑐧𑐮𑐫𑑂 𑐳𑑂𑐰𑐫𑐩𑑂𑐨𑐹 𑐰𑑄𑐐𑐸𑐮𑐶𑑄 𑐨𑐟𑐶𑐨𑐟𑐶 𑐖𑐎𑑅 𑐮𑐸𑐩𑑄 𑑋

𑐄𑐩𑐶𑐐𑐸 𑐣𑐶𑐎𑑂𑐰𑑅𑐐𑐸 𑐖𑑂𑐫𑐵𑐠𑐹 𑐖𑐸𑐮, ‘𑐧𑐶𑐐 𑐧𑐾𑐣 𑑋’ 𑐡𑐎𑑂𑐰 𑐩𑐳𑑂𑐟 𑐳𑑂𑐰𑐫𑐩𑑂𑐨𑐹 𑐩𑐰𑑄𑐐𑐸 𑐖𑐹𑐳𑐵𑑄 𑐮𑐣𑑂𑐡𑐣𑐫𑑂 𑐔𑑂𑐰𑑄𑐐𑐸 𑐧𑐶𑐐 𑐧𑐾𑐣 𑐂𑐩𑐶𑐳𑑄 𑐏𑐣𑐵𑐔𑑂𑐰𑑄𑐐𑐸 𑐳𑑄𑐬𑐔𑐣𑐵 𑐖𑐸𑐮 𑑋 𑐀𑐠𑐾𑐳𑐵𑑄 𑐕𑐐𑐹 𑐳𑑂𑐩𑐵𑐬𑐎 𑐟𑑂𑐬𑐶𑐁𑐫𑐵𑐩𑐫𑑂 𑐡𑐫𑐾𑐎𑐾𑐟 𑐏𑐣𑐵𑐔𑑂𑐰𑑄𑐐𑐸 𑐖𑐸𑐫𑐵𑑄 𑐖𑐎 𑐩𑐐𑐵𑑅 𑐢𑐫𑐵𑐐𑐸 𑐄𑐩𑐶𑐳𑑄 𑐫𑐵𑐎𑐣𑑄 𑐴𑐾 𑐠𑐸𑐮 𑑋 𑐥𑐹𑐰𑑄𑐎 𑐖𑑂𑐫𑐵 𑐫𑐵𑐣𑐵𑑅 𑐳𑐶𑐢𑐫𑐾𑐎𑐾𑐢𑐸𑑄𑐎𑐵𑑅 𑐄𑐩𑐶𑐳𑑄 𑐄𑐎𑐶𑐫𑐵 𑐰𑐵𑐳𑑂𑐟𑐸𑐎𑐮𑐵𑐫𑐵 𑐧𑐵𑑄𑐮𑐵𑐎 𑐀𑐢𑑂𑐫𑐫𑐣 𑐫𑐵𑑅𑐐𑐸 𑐣𑑄 𑐏𑐣𑐾𑐡𑐟 𑑋 𑐔𑐶𑐔𑐷𑐢𑑄𑐐𑐸 𑐖𑑂𑐫𑐵 𑐮𑐶𑐳𑐵𑐫𑐵 𑐫𑐵𑐣𑐵𑑅 𑐠𑐵𑐎𑐸𑐂𑐢𑐸𑑄𑐎𑐹𑐐𑐸𑐮𑐶𑑄 𑐄𑐩𑐶𑐳𑑄 𑐐𑐠𑐾 𑐫𑐵𑐎𑐣𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐢𑐂𑐐𑐸 𑐳𑐫𑐾𑐎𑐮 𑑋

‘𑐧𑐶𑐐 𑐧𑐾𑐣’ 𑐡𑐎𑐮𑐫𑑂 𑐔𑑂𑐰𑐫𑑂𑐫𑐵 𑐥𑐶𑐬𑐵𑐩𑐶𑐜 𑐩𑐾𑐠𑐵𑐫𑑂 𑐳𑑂𑐰𑐫𑐵𑑅 𑐏𑐶𑐄𑑃𑐳𑐾 𑐏𑐣𑐾𑐡𑐸 𑐏𑐣𑐶, 𑐖𑐶𑑄 𑐣𑑂𑐴𑐵𑐥𑐵 𑐧𑐶𑐔𑐵𑑅 𑐩𑐫𑐵𑐣𑐵’, 𑐧𑐾𑐖𑐶𑑄𑐐𑐳𑑂𑐚𑑀𑐎𑐫𑐵 𑐔𑑂𑐫𑐵𑐡𑑃 𑐎𑑂𑐫𑑄𑐩𑑂𑐴 𑐫𑐵𑐱 𑐬𑐵𑐖𑐨𑐞𑑂𑐜𑐵𑐬𑐷𑑄 𑐢𑐵𑐮 𑑋

𑐄𑐩𑐶𑐐𑐸 𑐳𑑂𑐰𑑄𑐐𑐹𑐐𑐸 𑐖𑑂𑐫𑐵𑐠𑐹 𑐎𑐠𑑄 𑐣𑐾𑐥𑐵𑑅𑐫𑐵 𑐡𑐎𑐮𑐫𑑂 𑐟𑐖𑐵𑑅𑐐𑐸 𑐡𑐾𑐐𑑅 𑐣𑑂𑐫𑐵𑐟𑐥𑑁 𑐡𑐫𑐾𑐎𑐷𑐐𑐸 𑐖𑐸𑐮 𑑋 𑐠𑐸𑐎𑐶𑐫𑐵 𑐰𑐵𑐳𑑂𑐟𑐸𑐎𑐮𑐵 𑐡𑐸𑐣𑐾𑐫𑐵 𑐥𑑂𑐬𑐟𑐶𑐬𑐹𑐥𑐎𑐟𑐵 𑐰 𑐟𑐵𑐮𑐫𑑂 𑐄𑐩𑐶𑐳𑑄 𑐗𑐶𑐣𑑂𑐴𑐸 𑐟𑐎 𑐳𑐰𑐵𑑅 𑐎𑐵𑐎𑐵𑑄 𑐖𑑂𑐫𑐵 𑐫𑐵𑐟 𑑋 𑐠𑐷𑐠𑐷 𑐥𑐱𑐸𑐫𑐵 𑐗𑑂𑐰𑐵𑐟𑐵 𑐕𑐠𑐵𑐫𑑂 𑐟𑐫𑐾𑐧𑐮𑐫𑑂 𑐳𑐵𑐩𑑄𑐖𑑂𑐫𑐳𑑂𑐫 𑐴𑐫𑐾𑐟, 𑐍𑐥𑐔𑐵𑐬𑐶𑐎 𑐳𑑄𑐟𑐸𑐮𑐣 𑐐𑐠𑐾 𑐫𑐵𑐣𑐵𑑅 𑐕𑑂𑐫𑐮𑐾𑐐𑐸 𑐢𑐂𑐐𑐸 𑐣𑐾𑐥𑐵𑑅𑐫𑐵 𑐩𑑁𑐮𑐶𑐎 𑐰𑐵𑐳𑑂𑐟𑐸𑐎𑐮𑐵𑐫𑐵 𑐧𑐵𑑄𑐮𑐵𑑅𑐐𑐸 𑐡𑐳𑐸 𑐣𑑂𑐫𑐵𑐟𑐥𑑁 𑐖𑐸𑐮 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐄𑐩𑐶𑐳𑑄 𑐣𑑂𑐴𑐵𑐥𑐵𑑄𑐏𑐸𑐳𑐶 𑐥𑑂𑐬𑑀𑐐𑑂𑐬𑐵𑐩𑐶𑑄𑐐 𑐥𑑂𑐬𑐰𑐶𑐢𑐶 𑐕𑑂𑐫𑐮𑐾𑐩𑐵𑐮 𑑋

𑐀𑐮𑐶𑐱𑐵𑐫𑐵𑐟 𑐠𑑅 𑐎𑐾𑐴𑐾𑑃 𑐣𑐵𑐥 𑐣𑑂𑐫𑐵𑐟𑐥𑑁 𑐰𑑄𑐐𑐸 𑐮𑐸𑐩𑑄𑐳𑐾 𑐰𑐮 𑑋 𑐬𑐾𑐂𑐳𑐵𑑄 𑐢𑐵𑑅𑐳𑐵 𑐣𑑂𑐴𑐵𑐥𑐵 𑐣𑑂𑐫𑐵𑐟𑐥𑑁𑐫𑐵 𑐧𑐵𑐬𑐾 𑐩𑐳𑐶𑐄 𑑋 𑐫𑐵𑐱𑐫𑐵 𑐢𑐵𑐥𑐹 𑐎𑐠𑑄 𑐣𑑂𑐫𑐵𑐟𑐥𑑁 𑐕𑐐𑐹 𑐡𑐎𑐮𑐫𑑂 𑐧𑑂𑐫𑐵𑐐𑐮𑑄 𑐰 𑐢𑐵𑐬𑑂𑐩𑐶𑐎 𑐩𑐴𑐟𑑂𑐰𑑄 𑐖𑐵𑑅𑐐𑐸 𑐡𑐾𑐐𑑅 𑐣𑑄 𑐏𑑅 𑑋

𑐳𑐚𑐣𑐫𑑂 𑐔𑑂𑐰𑐣𑐷𑐩𑑂𑐴 𑐔𑑂𑐫𑐵𑐡𑑃 𑐎𑑂𑐫𑑄𑐩𑑂𑐴 𑐥𑑂𑐬𑐟𑑂𑐫𑐸𑐱 𑐢𑐵𑑅𑐳𑐵 𑐣𑑂𑐫𑐵𑐟𑐥𑑁 𑐩𑐰𑑄𑐣𑐶 𑑋 ‘𑐠𑐵𑐎𑐹 𑐂𑐮𑐫𑑂 𑐗𑐷𑐳𑑄 𑐢𑐵𑐠𑐾𑑄 𑐧𑐵𑑄𑐮𑐵𑐎 𑐕𑐐𑐹 𑐥𑐸𑐔𑑅 𑐖𑐸𑐫𑐵𑑅 𑐖𑑂𑐫𑐵 𑐫𑐵𑐣𑐵 𑑋 𑐖𑐶𑐟𑑅 𑐣𑐾𑐥𑐵𑑅𑐫𑐵 𑐰𑐵𑐳𑑂𑐟𑐸𑐎𑐮𑐵 𑐫𑑅, 𑐀𑐮𑐾 𑐩𑑂𑐴𑐶𑐟𑐵𑑅–𑐩𑑂𑐴𑐶𑐟𑐵𑑅 𑐫𑐎𑑂𑐰 𑐏𑑃 𑐳𑐫𑐾𑐎𑐾𑐐𑐸 𑐣𑑄 𑐔𑐹𑐮𑐵𑐟’, 𑐰𑑄 𑐢𑐵𑐮 𑑋

𑐠𑐷𑐠𑐷 𑐔𑐬𑐞𑐫𑑂 𑐩𑐳𑑂𑐟𑐫𑑂𑐳𑑄 𑐠𑑅𑐠𑑅𑐐𑐸 𑐡𑐸𑐔𑐸 𑐎𑐵𑐮𑐧𑐶𑐮 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐾𑐮𑐶𑑄𑐐𑐫𑑂 𑐔𑑂𑐰𑐣𑐷𑐩𑑂𑐴 𑐔𑑂𑐫𑐵𑐡𑑃 𑐎𑑂𑐫𑑄𑐩𑑂𑐴 𑐁𑐡𑐬𑑂𑐱 𑐡𑐵𑐴𑐵𑐮𑑄 𑐣𑑄 𑐣𑐎𑐟𑐶𑐣𑐶 𑐖𑐎 𑐧𑑂𑐰𑐟𑐶 𑐎𑐵𑑅𑐐𑐸 𑐖𑐹𑐳𑐵𑑄 𑐥𑐵𑐳𑐵𑐥𑐶𑑄𑐳𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐰𑐫𑐵𑐟 𑐮𑐫𑑂𑐟𑐵𑑅 𑑋 𑐊𑐖𑑂𑐰𑐫𑐾𑐬𑐫𑑂 𑐔𑑂𑐰𑐣𑐷𑐩𑑂𑐴 𑐣𑑂𑐴𑐫𑑂𑐡𑑃 𑐎𑑂𑐫𑑄𑐩𑑂𑐴 𑐡𑐶𑐥𑐵𑑄𑐎𑐬 𑐩𑐵𑐣𑐣𑑂𑐢𑐬𑐫𑐵 𑐣𑑄 𑐀𑐖𑑂𑐫𑐵𑑅𑐐𑐸 𑐴𑐾 𑐀𑐣𑐸𑐨𑐰 𑐡𑐸 𑑋 𑐣𑑂𑐫𑐵𑐡𑑃 𑐖𑐎 𑐎𑑂𑐫𑑄𑐩𑑂𑐴 𑐮𑐣𑑂𑐡𑐣𑐫𑐵 𑐮𑐸𑐣𑐶𑐨𑐵 𑐩𑐴𑐬𑑂𑐖𑐣𑐫𑐵𑐟 𑐣𑑄 𑐩𑑂𑐴𑐶𑐟𑐵𑑅–𑐩𑑂𑐴𑐶𑐟𑐵𑑅 𑐣𑑂𑐴𑐹𑐏𑑃 𑐳𑐫𑐾𑐎𑐾 𑐫𑑅 𑑋

𑐠𑐷𑐠𑐷 𑐳𑑄𑐬𑐔𑐣𑐵𑐟 𑐡𑐣𑐾𑐐𑐸 𑐖𑑂𑐫𑐵 𑐫𑐵𑐫𑐾𑐢𑐸𑑄𑐎𑐵 𑐧𑐾𑐮𑐵𑐫𑐟𑐫𑑂 𑐔𑑂𑐰𑑄𑐥𑐶𑑄 𑐣𑐾𑐥𑐵𑑅𑐩𑐶 𑐩𑐳𑑂𑐟𑐫𑑂𑐳𑑄 𑐣𑐾𑐥𑐵𑑅𑐫𑐵 𑐳𑐩𑑂𑐥𑐡𑐵 𑐐𑐖𑑂𑐫𑐵𑑅𑐐𑐸 𑐢𑐎𑐵𑑅 𑐠𑐸𑐂𑐎𑐵 𑐎𑐵𑐳𑐾𑑄 𑐠𑑅𑐥𑐶𑑄𑐳𑑄 𑐳𑐫𑐾𑐎𑐹𑐐𑐸 𑐏𑑃 𑐥𑐵𑐳𑐵𑐥𑐶𑑄𑐟 𑐣𑑄 𑐎𑐣𑐾𑐐𑐸 𑐫𑐵𑐣𑐵𑐔𑑂𑐰𑐣 𑑋 𑐎𑐾𑐣𑑂𑐚𑐫𑑂 𑐔𑑂𑐰𑐣𑐷𑐩𑑂𑐴 𑐔𑑂𑐫𑐵𑐡𑑃 𑐎𑑂𑐫𑑄𑐩𑑂𑐴 𑐀𑐩𑑀𑐮 𑐣𑑂𑐫𑑁𑐥𑐵𑐣𑐾𑐫𑐵 𑐢𑐵𑑅𑐳𑐵 𑐮𑐶𑐥𑐵 𑐥𑐱𑐸𑐥𑐟𑐶𑐣𑐵𑐠 𑐡𑐫𑐾𑐎𑐾𑐐𑐸 𑐧𑐶𑐔𑐵𑑅 𑐡𑐸 𑑋

‘𑐣𑐾𑐥𑐵𑑅𑐫𑐵 𑐰𑐵𑐳𑑂𑐟𑐸𑐎𑐮𑐵 𑐡𑐸𑐣𑐾 𑐗𑑂𑐰𑐵𑐟𑐵 𑐰 𑐀𑑄𑐐𑐮𑐫𑑂 𑐡𑐂𑐐𑐸 𑐩𑐶𑐴𑐶𑐣 𑐧𑐸𑐚𑑂𑐚𑐵 𑐖𑐶𑐟𑑅 𑐫𑑅 𑑋 𑐗𑐷 𑐕𑐢𑐷 𑐖𑐸𑐫𑐵𑑅 𑐣𑑂𑐴𑐹 𑐧𑐶𑐔𑐵𑑅𑐟 𑐥𑑂𑐰𑑄𑐎𑐵, 𑐕𑐐𑐹 𑐥𑐸𑐔𑑅 𑐖𑐸𑐫𑐵 𑐖𑑂𑐫𑐵 𑐫𑐵𑐫𑐾 𑐫𑑅’, 𑐔𑐶𑑄𑐐𑐦𑐬𑑂𑐜𑐫𑑂 𑐔𑑂𑐰𑐣𑐷𑐩𑑂𑐴 𑐗𑐷𑐕𑐡𑑃 𑐎𑑂𑐫𑑄𑐩𑑂𑐴 𑐳𑑄𑐫𑑀𑐖𑐣 𑐱𑑂𑐬𑐾𑐲𑑂𑐛𑑄 𑐢𑐵𑐮 𑑋

‘𑐡𑐎𑑂𑐰 𑐖𑐵𑐣𑐵𑑅 𑐖𑑂𑐫𑐵 𑐫𑐵𑐫𑐾𑐐𑐸 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 𑐣𑐵𑐥𑑄, 𑐗𑐷𑐳𑑄 𑐣𑐾𑐥𑐵𑑅𑐫𑐵 𑐟𑐖𑐶𑐮𑐖𑐶 𑐰 𑐳𑐩𑑂𑐥𑐡𑐵𑐫𑐵 𑐧𑐵𑐬𑐾 𑐣𑑄 𑐠𑐸𑐂𑐎𑐵𑐔𑑂𑐰𑐣𑐵’, 𑐳𑑂𑐎𑐚𑐮𑑂𑐫𑐵𑐣𑑂𑐜𑐫𑑂 𑐔𑑂𑐰𑐣𑐷𑐩𑑂𑐴 𑐔𑑂𑐫𑐵𑐡𑑃 𑐎𑑂𑐫𑑄𑐩𑑂𑐴 𑐥𑐮𑐶𑐳𑑂𑐠𑐵 𑐩𑐴𑐬𑑂𑐖𑐣𑑄 𑐢𑐵𑐮 𑑋

𑐳𑐚𑐣𑐫𑑂 𑐔𑑂𑐰𑐣𑐷𑐩𑑂𑐴 𑐐𑐸𑐡𑑃 𑐎𑑂𑐫𑑄𑐩𑑂𑐴 𑐱𑐫𑑂𑐮𑐶 𑐜𑑄𑐐𑑀𑐮𑑄 𑐢𑐵𑑅𑐳𑐵 𑐠𑐷𑐠𑐷 𑐖𑑂𑐫𑐵𑐠𑐹 𑐢𑐸𑑄𑐎𑐵𑑅 𑐫𑐎𑑂𑐰 𑐠𑐵𑐫𑑂𑐫𑐵 𑐣𑐵𑑄 𑐩𑑂𑐴𑐳𑐶𑐂𑐎𑐮 𑑋 ‘𑐖𑐶𑐐𑐸 𑐧𑐶𑐔𑐵𑐬𑐫𑑂 𑐣𑐾𑐥𑐵𑑅𑐫𑐵 𑐐𑐸𑐐𑐸𑑄 𑐣𑑄 𑐰𑐵𑐳𑑂𑐟𑐸𑐎𑐮𑐵𑐫𑐵 𑐮𑐶𑐄𑐣𑐾 𑐰𑐶𑐱𑐾𑐲 𑐀𑐬𑑂𑐠 𑐡𑐫𑐵𑐔𑑂𑐰𑐣𑐷 𑑋 𑐂𑐥𑐶𑑄 𑐩𑐢𑑂𑐫𑐾 𑐫𑐎𑑂𑐰 𑐠𑐵𑐳𑐫𑑂 𑐖𑐶𑐟𑑅 𑐰𑐣𑐾 𑐩𑐵𑐳𑑂𑐟𑐾 𑐰𑑅’, 𑐰𑑄 𑐢𑐵𑐮 𑑋

𑐥𑑂𑐬𑐟𑑂𑐫𑐸𑐱 𑐠𑐾𑑄 𑐫𑐵𑐱 𑐣𑑄 𑐣𑑂𑐫𑐵𑐟𑐥𑑁 𑐩𑐰𑑄𑐣𑐶 𑑋 ‘𑐣𑑂𑐫𑐵𑐟𑐥𑑁 𑐡𑐫𑐾𑐎𑐵𑐧𑐮𑐫𑑂 𑐖𑐶𑑄 𑐠𑐸𑐐𑐸 𑐡𑐾𑐐𑑅 𑐣𑐾𑐥𑐵𑑅𑐫𑐵 𑐏𑑂𑐰𑐥𑐫𑑂 𑐡𑐸𑐐𑐸 𑐏𑑃 𑐳𑐶𑐮 𑑋 𑐳𑑂𑐰𑐫𑐩𑑂𑐨𑐹𑐫𑐵 𑐧𑐵𑐬𑐾 𑐣𑑄 𑐖𑐶𑑄 𑐣𑑂𑐴𑐵𑐥𑐵 𑐩𑐳𑐶𑐄𑐳𑐵𑑄

‘𑐐𑐸𑐠𑐶 𑐩𑐵𑐂𑐣𑐎𑑂𑐬𑐵𑐦𑑂𑐚’ 𑐥𑐸𑐔𑐮𑑄 𑐖𑐶𑐟𑑅 𑐣𑐾𑐥𑐵𑑅𑐫𑐵 𑐟𑐖𑐶𑐮𑐖𑐶 𑐧𑐵𑐬𑐾 𑐫𑐎𑑂𑐰 𑐏𑑃 𑐳𑑂𑐫𑐣, 𑐐𑐸𑐐𑐸 𑐟𑐳𑐎𑑄 𑐧𑐵𑑄𑐮𑐵𑑅𑐐𑐸 𑐏𑑃 𑐏𑑅’, 𑐰𑑄 𑐢𑐵𑐮 𑑋

𑐩𑐵𑐂𑐣𑐎𑑂𑐬𑐵𑐦𑑂𑐚𑐫𑑂 𑐡𑐾𑐰𑐣𑐵𑐐𑐬𑐷 𑐰 𑐬𑐘𑑂𑐖𑐣𑐵 𑐁𑐏𑑅𑐫𑐵 𑐳𑑄𑐳𑐵𑑅 𑐡𑐫𑐾𑐎𑐵𑐔𑑂𑐰𑑄𑐐𑐸 𑐗𑑂𑐰𑐮𑐫𑑂 𑐫𑐵𑐱 𑐰 𑐳𑑄𑐫𑑀𑐖𑐣𑑄 𑐕𑐐𑐹 𑐣𑑂𑐴𑐹 𑐧𑐶𑐔𑐵𑑅 𑐴𑐮 𑑋 𑐄𑐩𑐶𑐳𑑄 𑐥𑑂𑐬𑑀𑐐𑑂𑐬𑐵𑐩𑐶𑑄𑐐 𑐫𑐵𑐣𑐵 ‘𑐐𑐸𑐠𑐶 𑐊𑐎𑑂𑐳𑐥𑑂𑐬𑐾𑐳’ 𑐢𑐂𑐐𑐸 𑐕𑐐𑐹 𑐕𑐸𑐸𑐎𑐕𑐸𑐎 𑐳𑑅 𑐥𑐶𑐎𑐫𑐵𑑅 𑐧𑑂𑐰𑐵𑑄 𑐰𑐣𑐷𑐐𑐸 𑐬𑐾𑐮𑐐𑐵𑐜𑐷 𑐡𑐫𑐾𑐎𑐮 𑑋 𑐠𑐸𑐎𑐷 𑐧𑑂𑐫𑐵𑐐𑐮𑑄 𑐧𑑂𑐫𑐵𑐐𑐮𑑄 𑐎𑑂𑐰𑐠𑐵𑐫𑑂 𑐔𑑂𑐰𑐣𑐵𑑅 𑐡𑐎𑑂𑐰 𑐩𑐳𑑂𑐟 𑐣𑐵𑐥𑑄 𑐔𑐵𑑅𑐴𑐶𑐮𑐾𑐦𑐸 𑑋 𑐄𑐩𑐶𑐳𑑄 𑐁𑑅 𑐄𑐐𑐸 𑐬𑐾𑐮𑐐𑐵𑐜𑐷𑐫𑐵𑐟 𑐱𑑂𑐬𑐷𑐰𑐟𑑂𑐳 𑐣𑐵𑐥𑑄 𑐮𑑂𑐰𑐂𑐐𑐸 𑐚𑑂𑐫𑑂𑐬𑐵𑐎 (𑐮𑑃𑐥𑐸) 𑐡𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐣𑐣𑑂𑐟 𑐐𑐠𑑅𑐫𑐵 𑐠𑐸𑐐𑐸 𑐨𑐶𑑄𑐐𑐸 𑐔𑐶𑑄 𑐣𑐾𑐥𑐵𑑅𑐫𑐵 𑐧𑑁𑐡𑑂𑐢 𑐰 𑐴𑐶𑐣𑑂𑐡𑐹 𑐢𑐬𑑂𑐩 𑐡𑐸𑐣𑐾𑐫𑐵 𑐀𑐲𑑂𑐚𑐩𑑄𑐐𑐮 𑐩𑐢𑑂𑐫𑐾𑐫𑑂 𑐕𑐐𑐹 𑐏𑑅 𑑋 𑐐𑐸𑐐𑐸𑑄 𑐦𑐸𑐟𑐶𑑄 𑐣𑑂𑐴𑑂𑐫𑐵𑐎𑐹𑐳𑐵𑑄 𑐠𑐸𑐐𑐸 𑐐𑐠𑐮𑐫𑑂 𑐐𑐣𑑄 𑐡𑐶𑐎𑐾𑐩𑑂𑐰𑐵𑑅𑐐𑐸𑐮𑐶𑑄 𑐠𑐸𑐎𑐶𑑄 𑐀𑐣𑐣𑑂𑐟 𑐖𑐷𑐰𑐣𑐫𑐵 𑐡𑐬𑑂𑐱𑐣 𑐣𑑄 𑐎𑑂𑐫𑐣𑐷 𑑋

𑐮𑐎𑐜𑐵𑐄𑐣 𑐥𑐹𑐰𑑄𑐎 𑐎𑑂𑐰𑐔𑐵𑐫𑐾𑐢𑐸𑑄𑐎𑐵𑑅 𑐰 𑐗𑐷 𑐡𑐎𑑂𑐰 𑐳𑐵𑐢𑐵𑐬𑐞 𑐖𑐷𑐰𑐣𑐫𑑂 𑐮𑐶𑐴𑐵𑑄 𑐰𑐫𑐾𑐢𑐸𑑄𑐎𑐵𑑅 𑐠𑐸𑐥𑐶𑑄 𑐎𑐺𑐟𑑂𑐬𑐶𑐩 𑐣𑐾𑐥𑐵𑑅𑐫𑐵 𑐎𑐣𑐶𑐲𑑂𑐚 𑐰𑐵𑐳𑑂𑐟𑐸𑐎𑐵𑐬𑐥𑐶𑑄𑐳𑑄 𑐢𑐵𑐠𑐾𑑄 𑐴𑐾 𑐏𑑂𑐰𑐵𑑅𑐏𑑂𑐰𑐵𑑅 𑐳𑑂𑐰𑐫𑐵𑑅 𑐣𑐵𑐥𑐮𑐵𑐫𑐾𑐐𑐸 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐡𑐸 𑑋 𑐐𑐣𑑄 𑐣𑐵𑐥𑐮𑐵𑐫𑐾𑐐𑐸 𑐰 𑐕𑐸 𑐕𑐸 𑐎𑐵𑐳𑐵 𑐩𑑂𑐴𑐶𑐟𑐾𑐐𑐸 𑐢𑐎𑐵𑑅 𑐣𑑄 𑐂𑐩𑐶𑐐𑐸 𑐏𑑃 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋