𑐧𑐵𑐮 𑐳𑐵𑐂𑐧𑐬 𑐳𑐸𑐬𑐎𑑂𑐲𑐵 𑐳𑐩𑑂𑐧𑐣𑑂𑐢𑐷 𑐱𑑂𑐰𑐾𑐟𑐥𑐟𑑂𑐬 𑐖𑐵𑐬𑐷

𑐫𑐾𑑃- 𑐔𑐵𑐂𑐮𑑂𑐜𑐳𑐾𑐦𑐣𑐾𑐚 𑐰 𑐫𑐸𑐣𑐶𑐳𑐾𑐦 𑐣𑐾𑐥𑐵𑐮𑑄 𑐩𑐳𑑂𑐟 𑐰 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐀𑐣𑐮𑐵𑐂𑐣 𑐳𑐸𑐬𑐎𑑂𑐲𑐵 𑐧𑐵𑐬𑐾 𑐕𑐐𑐹 𑐱𑑂𑐰𑐾𑐟𑐥𑐟𑑂𑐬 𑐖𑐵𑐬𑐷 𑐫𑐵𑑅𑐐𑐸 𑐡𑐸 𑑋 𑐔𑐵𑐂𑐮𑑂𑐜𑐳𑐾𑐦𑐣𑐾𑐚𑑄 𑐄𑐐𑐸 𑐱𑑂𑐰𑐾𑐟𑐥𑐟𑑂𑐬 𑐫𑐸𑐣𑐶𑐳𑐾𑐦𑐫𑐵 𑐐𑑂𑐰𑐵𑐴𑐵𑐮𑐶𑐂 𑐩𑐳𑑂𑐟 𑐰 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐣𑐶𑑄𑐟𑐶𑑄 𑐂𑐣𑑂𑐚𑐬𑐣𑐾𑐚 𑐥𑑂𑐬𑐫𑑀𑐐𑐫𑑂 𑐳𑐸𑐬𑐎𑑂𑐲𑐶𑐟 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐴𑑅𑐐𑐸 𑐏𑑅 𑑋

𑐱𑑂𑐰𑐾𑐟𑐥𑐟𑑂𑐬𑐫𑑂 𑐩𑐳𑑂𑐟 𑐰 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐀𑐣𑐮𑐵𑐂𑐣 𑐳𑐸𑐬𑐎𑑂𑐲𑐵 𑐧𑐵𑐬𑐾 𑐣𑐷𑐟𑐶, 𑐫𑑀𑐖𑐣𑐵, 𑐳𑐴𑐫𑑀𑐐 𑐳𑑄𑐫𑐣𑑂𑐟𑑂𑐬 𑐰 𑐎𑐵𑐬𑑂𑐫𑐵𑐣𑑂𑐰𑐫𑐣 𑐳𑐩𑑂𑐧𑐣𑑂𑐢𑐷 𑐩𑑂𑐴𑑀𑐟𑐶𑐫𑐵 𑐧𑐵𑐬𑐾 𑐳𑐩𑐷𑐎𑑂𑐲𑐵 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵 𑐩𑐳𑑂𑐟 𑐰 𑐮𑑂𑐫𑐵𑐫𑐩𑑂𑐴𑐟𑐫𑑂 𑐂𑐣𑑂𑐚𑐬𑐣𑐾𑐚 𑐥𑑂𑐬𑐫𑑀𑐐𑐮𑐶𑐳𑐾𑑄 𑐂𑐩𑐶𑐟 𑐎𑐫𑐵𑑅 𑐖𑐸𑐂𑐐𑐸 𑐀𑐣𑐮𑐵𑐂𑐣 𑐖𑑀𑐏𑐶𑐩, 𑐡𑐸𑐰𑑂𑐬𑑂𑐫𑐰𑐴𑐵𑐬 𑐰 𑐱𑑀𑐲𑐞 𑐧𑐵𑐬𑐾 𑐰𑐶𑐳𑑂𑐟𑐺𑐟 𑐖𑐵𑐣𑐎𑐵𑐬𑐷 𑐡𑐸𑐠𑑂𑐫𑐵𑐎𑐵 𑐟𑑅𑐐𑐸 𑐡𑐸 𑑋𑐰𑑄𑐐𑐸 𑐕𑐐𑐹 𑐡𑐱𑐎𑐫𑐵 𑐡𑐸𑐣𑐾 𑐣𑐾𑐥𑐵𑐮𑐫𑑂 𑐂𑐣𑑂𑐚𑐬𑐣𑐾𑐚 𑐥𑑂𑐬𑐫𑑀𑐐𑐎𑐬𑑂𑐟𑐵𑐫𑐵 𑐮𑑂𑐫𑐵𑐏𑐫𑑂 𑐟𑐷𑐰𑑂𑐬 𑐬𑐸𑐥𑑄 𑐰𑐺𑐡𑑂𑐢𑐶 𑐖𑐹𑐐𑐸 𑐡𑐸𑐳𑐵 𑐣𑐾𑐥𑐵𑐮 𑐡𑐹𑐬𑐳𑑄𑐔𑐵𑐬 𑐥𑑂𑐬𑐵𑐢𑐶𑐎𑐬𑐞𑐫𑐵 𑐎𑐠𑑄 𑐠𑑁𑑄𑐟𑐎𑐫𑐵 𑐡𑐸𑐣𑐾 𑑘𑑐.𑑐𑑗 𑐥𑑂𑐬𑐟𑐶𑐱𑐟 𑐣𑐾𑐥𑐵𑑅𑐩𑐶𑐫𑐵 𑐂𑐣𑑂𑐚𑐬𑐣𑐾𑐚𑐫𑑂 𑐥𑐴𑐸𑑃𑐔 𑐡𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐖𑐧𑐎𑐶 𑐕𑐐𑐹 𑐡𑐱𑐎 𑐣𑑂𑐴𑑂𑐫𑑅𑐟𑐎 𑐠𑑂𑐰 𑐮𑑂𑐫𑐵𑑅 𑐢𑐂𑐐𑐸 𑑒.𑑖𑑕 𑐥𑑂𑐬𑐟𑐶𑐱𑐟𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐣𑐶𑐐𑐸𑐮𑐶𑑄 𑐳𑑄𑐳𑑂𑐠𑐵𑑄 𑐩𑑄𑐎𑐵𑑅𑐎𑐠𑑄 𑐫𑐵𑑅𑐐𑐸 𑐕𑐐𑐹 𑐳𑐬𑑂𑐰𑐾𑐎𑑂𑐲𑐞𑐎𑐠𑑄 𑐣𑐾𑐥𑐵𑐮𑐫𑑂 𑐎𑑀𑐨𑐶𑐜–𑑑𑑙𑐫𑐵 𑐥𑑂𑐬𑐎𑑀𑐥 𑐮𑐶𑐥𑐵 𑐥𑑂𑐬𑐟𑑂𑐫𑐾𑐎 𑐥𑑂𑐫𑐩𑑂𑐴 𑐣𑐾𑐥𑐵𑑅𑐩𑐢𑑂𑐫𑐾 𑐕𑐩𑑂𑐴 𑐩𑐔𑐵 𑐰𑐵 𑐮𑑂𑐫𑐵𑐫𑑂𑐩𑑂𑐴𑑄 𑐣𑑂𑐴𑐶𑐕𑐶𑐫𑐵 𑑑𑑐 𑐑𑑁 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐃 𑐂𑐣𑑂𑐚𑐬𑐣𑐾𑐚 𑐔𑐮𑐾 𑐫𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐳𑐷𑐡𑐸𑐐𑐸 𑐡𑐸 𑑋 𑐔𑐵𑐂𑐮𑑂𑐜𑐳𑐾𑐦𑐣𑐾𑐚𑐫𑐵 𑐳𑑄𑐳𑑂𑐠𑐵𑐥𑐎 𑐀𑐢𑑂𑐫𑐎𑑂𑐲 𑐀𑐣𑐶𑐮 𑐬𑐑𑐸𑐰𑑄𑐱𑐷𑑄 𑐨𑐬𑑂𑐔𑐸𑐀𑐮 𑐩𑐵𑐢𑑂𑐫𑐩𑑄 𑐱𑑂𑐰𑐾𑐟𑐥𑐟𑑂𑐬 𑐖𑐵𑐬𑐷 𑐫𑐵𑐣𑐵𑐡𑐶𑐳𑐾𑑄 𑐂𑐣𑑂𑐚𑐬𑐣𑐾𑐚𑐫𑐵 𑐥𑐸𑐴𑑃𑐔 𑐰 𑐥𑑂𑐬𑐫𑑀𑐐𑐎𑐬𑑂𑐟𑐵𑐫𑐵 𑐮𑑂𑐫𑐵𑑅 𑐀𑐥𑑂𑐰𑑅𑐳𑐵𑑄 𑐣𑑄 𑐠𑐸𑐎𑐶𑐫𑐵 𑐳𑐸𑐬𑐎𑑂𑐲𑐵𑐧𑐵𑐬𑐾 𑐖𑐣𑐳𑑂𑐟𑐬𑐫𑑂 𑐀𑐗 𑐣𑑄 𑐔𑐾𑐟𑐣𑐵𑐫𑐵 𑐎𑐩𑐶 𑐡𑐸𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐠𑐸𑐎𑐶𑐫𑐵 𑐥𑐬𑐶𑐞𑐵𑐩𑐳𑑂𑐰𑐬𑐸𑐥 𑐩𑐳𑑂𑐟 𑐰 𑐮𑑂𑐫𑐵𑐫𑑂𑐩𑑂𑐴𑐟 𑐀𑐣𑐮𑐵𑐂𑐣 𑐫𑑁𑐣 𑐡𑐸𑐰𑑂𑐬𑑂𑐫𑐰𑐴𑐵𑐬, 𑐀𑐣𑐮𑐵𑐂𑐣 𑐫𑑁𑐣 𑐱𑑀𑐲𑐞, 𑐳𑐵𑐂𑐧 𑐧𑐸𑐮𑐶·, 𑐳𑐵𑐂𑐧𑐬 𑐐𑑂𑐬𑐸𑐩𑐶𑐒 𑐰 𑐳𑐵𑐂𑐧𑐬 𑐦𑐶𑐳𑐶· 𑐠𑐾𑑄𑐖𑑂𑐫𑐵𑑅𑐐𑐸 𑐀𑐣𑐮𑐵𑐂𑐣 𑐖𑑀𑐏𑐶𑐩𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐫𑐸𑐣𑐶𑐳𑐾𑐦 𑐣𑐾𑐥𑐵𑐮𑐫𑐵 𑐧𑐵𑐮 𑐳𑑄𑐬𑐎𑑂𑐲𑐞 𑐥𑑂𑐬𑐩𑐸𑐏 𑐂𑐣𑐵𑐴 𑐦𑐵𑐚𑐸𑐩𑐵𑐚𑐵 𑐎𑐵𑐮𑑀𑐐𑐵𑑄 𑐱𑑂𑐰𑐾𑐟𑐥𑐟𑑂𑐬𑑄 𑐣𑐾𑐥𑐵𑐮𑐫𑑂 𑐩𑐳𑑂𑐟 𑐰 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵 𑐣𑐶𑑄𑐟𑐶𑑄 𑐀𑐣𑐮𑐵𑐂𑐣 𑐳𑐸𑐬𑐎𑑂𑐲𑐵𑐫𑑂 𑐡𑐫𑐵𑐔𑑂𑐰𑑄𑐐𑐸 𑐖𑑂𑐘𑐵𑐣𑐫𑐵 𑐎𑐩𑐶𑐫𑐵𑐟 𑐥𑐹𑐬𑑂𑐟𑐶 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐀𑐥𑐾𑐎𑑂𑐲𑐵 𑐫𑐵𑐣𑐵𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐱𑑂𑐰𑐾𑐟𑐥𑐟𑑂𑐬𑐫𑐵 𑐩𑐳𑑂𑐫𑑁𑐡𑐵𑐎𑐵𑐬𑐮𑐶𑐳𑐾𑑄 𑐩𑐵𑐣𑐰𑐀𑐢𑐶𑐎𑐵𑐬 𑐰 𑐎𑐵𑐣𑐹𑐣 𑐰𑐶𑐖𑑂𑐘 𑐎𑐥𑐶𑐮 𑐀𑐬𑑂𑐫𑐵𑐮𑑄 𑐣𑐾𑐥𑐵𑐮𑐫𑑂 𑐳𑐵𑐂𑐧𑐮 𑐀𑐥𑐬𑐵𑐢 𑐳𑐩𑑂𑐧𑐣𑑂𑐢𑐷 𑐳𑐎𑐟𑐵𑑄 𑐎𑐠𑑄𑐫𑐵 𑐎𑐾𑐳𑐫𑑂 𑐰𑐶𑐡𑑂𑐫𑐸𑐟𑐷𑐫 𑐎𑐵𑐬𑑀𑐧𑐵𑐬 𑐋𑐣–𑑒𑑐𑑖𑑓 𑐥𑑂𑐬𑐫𑑀𑐐 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐎𑐵𑐛𑐩𑐵𑐜𑑁𑑄 𑐮 𑐳𑑂𑐎𑐸𑐮𑐫𑐵 𑐥𑑂𑐬𑐵𑐢𑑂𑐫𑐵𑐥𑐎 𑐟𑐎𑑄 𑐖𑐸𑐫𑐵𑐡𑐷𑐩𑑂𑐴 𑐰𑐫𑑂𑐎𑐮𑑄 𑐫𑐾𑑃 𑐖𑐶𑐮𑑂𑐮𑐵 𑐀𑐡𑐵𑐮𑐟𑐫𑑂 𑐖𑐎 𑐋𑐣𑐎𑐠𑑄 𑐡𑐬𑑂𑐟𑐵 𑐖𑐹𑐐𑐸 𑐩𑐸𑐡𑑂𑐡𑐵𑐫𑐵 𑐳𑐸𑐣𑐸𑐰𑐵𑐃𑐫𑐵 𑐣𑐶𑑄𑐟𑐶𑑄 𑐎𑑂𑐰𑑅𑐕𑐶𑐣𑐵𑐟𑑅𑐐𑐸𑐮𑐶𑑄 𑐳𑑂𑐰𑐣𑐶𑐐𑑅 𑐥𑐶𑐣𑐾𑐫𑐵 𑐥𑐷𑐜𑐶𑐟𑐟𑐫𑑂 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋