𑐐𑐸𑑄𑐮𑐵 𑐥𑐬𑑂𑐰 𑐰 𑐣𑑂𑐫𑐎𑐸 𑐥𑐸𑐂𑐐𑐸 𑐥𑐬𑐩𑑂𑐥𑐬𑐵𑐫𑐵𑐟 𑐎𑑅𑐑𑐵𑐣𑐵 𑐡𑐸𑐠𑑂𑐫𑐵𑑅𑐐𑐸 𑐧𑐵𑐏𑑃 𑐳𑐦𑐹 “𑐣𑑂𑐫𑐎𑐹 𑐧𑐵𑐖𑑄 𑐬 𑐐𑐸𑑄𑐮𑐵” 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐳𑐦𑐹 𑐧𑐵𑐏𑑄 𑐣𑑂𑐫𑐣𑐾 𑐰𑐵 𑐳𑑄𑐳𑑂𑐠𑐵𑐥𑐵𑐏𑐾𑑄 𑐥𑐶𑐟𑐧𑑂𑐫𑐹𑐐𑐸 𑐏𑑅𑐳𑐵 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐰𑐶𑐡𑑂𑐫𑐵 𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅𑑋

𑐱𑐣𑐶𑐰𑐵𑑅 𑐫𑐾𑑃𑐫𑐵 𑐩𑐬𑐹 𑐥𑐶𑑄𑐐𑐣𑐣𑐷 𑐳𑐦𑐹 𑐥𑐶𑐟𑐧𑑂𑐰𑑅𑐖𑑂𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹 𑐥𑐵𑑃𑐴𑐵 𑐎𑐠𑑄 𑐗𑐵𑐩𑑂𑐴 𑐩𑐾𑐫𑐬 𑐱𑐵𑐎𑑂𑐫𑑄 𑐳𑐦𑐹𑐫𑐵 𑐥𑐶𑐟𑐰𑑂𑐰𑐖𑑂𑐫𑐵 𑐫𑐵𑐣𑐵𑐡𑐶𑐐𑐸 𑐏 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐾𑐫𑐬 𑐱𑐵𑐎𑑂𑐫𑑄 𑐠𑑅 𑐩𑐔𑐵𑐧𑐮𑐫𑑂 𑐧𑐵𑐏𑑃 𑐣𑑂𑐫𑑄 𑐰𑐣𑐵𑐐𑐸 𑐰 𑐁𑑅 𑐀𑐖𑑂𑐫𑐵𑐐𑐸 𑐥𑐬𑐩𑑂𑐥𑐬𑐵 𑐟𑐣𑐵𑐰𑑄𑐐𑐸 𑐢𑐵𑑅𑐳𑐾𑑄 𑐄𑐐𑐸 𑐥𑐬𑐩𑑂𑐥𑐬𑐵𑐫𑐵𑐟 𑐩𑑂𑐰𑐵𑐎𑐾𑐩𑐵𑑅𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐩𑐣𑐸 𑐣𑐵𑐥𑑄 𑐧𑐵𑐏𑑃 𑐟𑐣𑐵 𑐰𑐣𑐷, 𑐀𑐣𑐸𑐨𑐰 𑐟𑐣𑐵𑐰𑐣𑐷 𑐰 𑐴𑐾 𑐖𑐹𑐐𑐸𑐮𑐶𑑄 𑐠𑑅𑐩𑑂𑐴𑑄 𑐣𑑄 𑐠𑐸𑐎𑐠𑑄 𑐧𑐵𑐏𑑃 𑐰 𑐀𑐣𑐸𑐨𑐰 𑐮𑑂𑐫𑑄𑐎𑐾𑐟 𑐠𑐷𑐠𑐷 𑐰𑑂𑐫𑐎𑑂𑐟𑐶𑐟𑑂𑐰𑐫𑐵 𑐏𑑃 𑐳𑑄𑐎𑐮𑐣 𑐫𑐵𑐣𑐵 𑐩𑐸𑑄𑐎𑐵𑐐𑐸 𑐰 𑐧𑐵𑐏𑑃 𑐣𑑂𑐫𑐣𑐾 𑐰𑐵 𑐥𑐸𑐔𑐮𑑄 𑐄𑐎𑐠𑑄 𑐴𑐾 𑐧𑐵𑐏𑑃 𑐩𑐸𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐣𑐾𑐰𑐵𑑅 𑐳𑑃𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑑂 𑐟𑐶𑐧𑑅 𑐧𑐷𑐐𑐸 𑐎𑐸𑐟𑑅 𑐫𑐵𑑅𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑑂𑐫𑐹𑐳𑐵 𑐩𑐴𑐵𑐣𑐐𑐬𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐰𑐫𑐾𑐎𑐮𑑄 𑐠𑑅𑐩𑑂𑐴𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐐𑐸 𑐟𑐬 𑐣𑐾𑐰𑐵𑑅𑐟𑐫𑐾𑐟 𑐐𑑂𑐰𑐵𑐴𑐵𑐮𑐶 𑐧𑑂𑐫𑐹𑐳𑐵𑑄 𑐎𑐵𑑅 𑐩𑐰𑑄𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐩𑐳𑑂𑐟𑐫𑐾𑐟 𑐳𑑂𑐠𑐵𑐣𑐶𑐫 𑐳𑑃𑐳𑑂𑐎𑐺𑐟𑐶 𑐳𑐷𑐎𑐾𑐟 𑐧𑑂𑐰𑐣𑐾𑐎𑐸𑐠𑐶𑐂 𑐠𑐸𑐎𑐠𑑄 𑐴𑐾 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐐𑐸 𑐟𑐎𑑄 𑐮𑐸𑐩𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑃 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐬𑐵𑐖𑐾𑐱 𑐱𑐵𑐎𑑂𑐫𑑄 𑐳𑐦𑐹𑐫𑐵 𑐥𑑂𑐬𑐱𑑄𑐳𑐵 𑐫𑐵𑐣𑐵𑐡𑐶𑐮𑐳𑐵 𑐥𑐵𑐴𑐵𑑃 𑐎𑐠𑑄 𑐗𑐵𑐩𑑂𑐴 𑐰𑐜𑐵 𑐣𑑄 𑑒𑑐 𑐫𑐵 𑐀𑐢𑑂𑐫𑐎𑑂𑐲  𑐬𑐵𑐖𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬𑑄 𑐳𑐦𑐹𑐫𑐵 𑐩𑐐𑐵𑑅 𑐩𑐔𑐵 𑐎𑐸𑐮𑐵𑐡𑐶𑐮 𑑋

𑐥𑐵𑐴𑐵𑑃𑐥𑐶𑑄𑐳𑑄 𑐩𑑄𑐎𑐵 𑐎𑐠𑑄 𑐳𑐦𑐹 𑐥𑐶𑐟𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐱𑐶𑐎𑑂𑐲𑐵𑐰𑐶𑐡 𑐣𑐵𑐥𑑄 𑐳𑑄𑐳𑑂𑐎𑐺𑐟𑐰𑐶𑐡 𑐜𑐵 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫𑑄 𑐳𑐦𑐹𑐫𑐵 𑐳𑐩𑐶𑐎𑑂𑐲𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑐾𑐎𑐮𑑄 𑐳𑐦𑐹𑐥𑐵𑐏𑐾𑑄 𑐩𑐳𑑂𑐟𑐫𑐾𑐳𑑄 𑐫𑐎𑑂𑐰 𑐳𑐫𑐾𑐎𑐾 𑐳𑐷𑐎𑐾 𑐦𑐂𑐐𑐸 𑐰 𑐣𑑂𑐴𑐹𑐐𑐸 𑐥𑑂𑐬𑐫𑐵𑐾𑐐 𑐖𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐣𑐾𑐥𑐵𑐮𑐨𑐵𑐲𑐵 𑐊𑐩𑐊 𑐟𑐐𑐶𑐩𑐫𑑂 𑐧𑑂𑐰𑐣𑐾𑐩𑐵𑑅𑐐𑐸 𑐣𑑂𑐫𑐎𑐸 𑐧𑐵𑐖𑑃 𑐠𑑅𑐩𑑂𑐴𑑃 𑐴𑐾 𑐧𑑂𑐰𑑄𑐎𑐵𑐐𑐸 𑐰𑐶𑐲𑐫𑐫𑐵 𑐧𑐵𑐏𑑃 𑐳𑐦𑐹 𑐥𑐶𑐴𑐵𑑃𑐰𑑅𑐐𑐸 𑐰 𑐠𑑅𑐩𑑂𑐴𑑃 𑐳𑐩𑐶𑐎𑑂𑐲𑐵 𑐫𑐵𑐫𑐾𑐏𑑄𑐐𑐸 𑐢𑐵𑑅𑐳𑐾𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑐾𑐎𑐮𑑄 𑐳𑐦𑐹𑐫𑐵 𑐩𑐴𑐟𑑂𑐰𑐫𑐵 𑐧𑐵𑐬𑐾 𑐏𑑃 𑐎𑐣𑐵𑐡𑐷𑐳𑐾𑑄 𑐩𑐾𑐐𑐸 𑐳𑑄𑐳𑑂𑐎𑐬𑐞𑐫𑐵 𑐣𑐶𑐟𑐶𑑄 𑐡𑐸𑐠𑑂𑐫𑐵𑐎𑐾𑐩𑐵𑑅𑐐𑐸 𑐕𑑂𑐫𑐵𑐟𑐵 𑐟𑐎𑑄 𑐧𑐶𑐫𑐵𑐡𑐶𑐮 𑑋

𑐧𑐵𑐏𑑃 𑐣𑑂𑐫𑐣𑐾 𑐰𑐵𑐫𑐵 𑐣𑐵𑐫𑑅 𑐀𑐱𑑂𑐰𑐾𑐣𑐰𑐷𑐬 𑐳𑐶𑑄 𑐟𑐵𑐩𑑂𑐬𑐵𑐎𑐵𑐬𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐦𑐹𑐫𑐵 𑐧𑐵𑐏𑑃 𑐎𑐣𑐵𑐩𑐶 𑐟𑐵𑐩𑑂𑐬𑐵𑐎𑐵𑐬 𑐐𑐸𑑃𑐮𑐵 𑐧𑐵𑐖𑑃𑐫𑐵 𑐧𑐵𑐖𑑃 𑐐𑐸𑐬𑐸 𑐳𑑂𑐰𑐟𑐣𑑂𑐟𑑂𑐬 𑐧𑐴𑐵𑐡𑐸𑐬 𑐟𑐵𑐩𑑂𑐬𑐵𑐎𑐵𑐬𑑄 𑐠𑑅𑐐𑐸 𑐣𑐸𑐐𑑅 𑐏𑑃 𑐎𑐣𑐵𑐡𑐶𑐮 𑐣𑐵𑐥𑑄 𑐧𑐵𑐏𑑃𑐫𑐵 𑐧𑐵𑐬𑐾 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐧𑐵𑐏𑑃 𑐣𑑂𑐫𑐣𑐾 𑐰𑐵 𑐫𑐵 𑐣𑑂𑐰𑐎𑐸 𑐊𑐮𑐶𑐣𑐵 𑐟𑐵𑐩𑑂𑐬𑐵𑐎𑐵𑐬𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐧𑐵𑐏𑑃 𑐣𑑂𑐫𑐣𑐾 𑐰𑐵 𑐳𑑄𑐳𑑂𑐠𑐵𑐫𑐵 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐏𑑅𑐳𑐵 𑐳𑐨𑐵𑐣𑐵𑐫𑑅 𑐟𑐵𑐩𑑂𑐬𑐵𑐎𑐵𑐬𑐥𑐵𑐏𑐾𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋

𑐡𑐸𑐖𑑅 𑐥𑑂𑐬𑐖𑑂𑐰𑐮 𑐱𑐵𑐎𑑂𑐫𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐸𑐖𑑅𑐥𑐶𑑄 𑐱𑑂𑐬𑐺𑐲𑑂𑐚𑐶𑐣𑐵 𑐱𑑂𑐬𑐾𑐲𑑂𑐛, 𑐰𑐶𑐣𑐶𑐟𑐵 𑐩𑐐𑐿𑐫𑐵 𑐰 𑐬𑐵𑐖 𑐩𑐴𑐬𑑂𑐖𑐣𑑄 𑐳𑐦𑐹𑐫𑐵 𑐧𑐵𑐏𑑃 𑐰𑐵𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐕𑑂𑐫𑐵𑐘𑑂𑐖𑐾 𑐬𑐷𑐖𑐵 𑐖𑐵𑐾𑐱𑐷, 𑐡𑐵𑑃𑐨𑐬𑐷 𑐬𑐵𑐖𑐶𑐰 𑐧𑐖𑑂𑐬𑐵𑐔𑐵𑐬𑑂𑐫 𑐰 𑐡𑐸𑐖𑑅 𑐱𑐿𑐮𑐾𑐱 𑐬𑐵𑐖𑐨𑐞𑑂𑐜𑐵𑐬𑐷𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐏𑑅 𑑋

 

𑐧𑐵𑐏𑑄 𑐣𑑂𑐫𑐣𑐾 𑐰𑐵 𑐳𑑄𑐳𑑂𑐠𑐵 𑐳𑑃𑐳𑑂𑐎𑐺𑐟𑐶 𑐥𑑂𑐬𑐾𑐩𑐷 𑐮𑑂𑐫𑐵𑐩𑑂𑐴 𑐮𑑂𑐫𑐵𑐳𑐾𑐥𑐶𑐣𑐶𑐐𑐸 𑐧𑐵𑐏𑑃 𑐣𑑂𑐫𑑄𑐎𑐾𑐐𑐸 𑐥𑐬𑐩𑑂𑐥𑐬𑐵 𑐩𑑂𑐰𑐵𑐎𑐾𑐐𑐸 𑐎𑐸𑐟𑑅 𑐎𑐠𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅𑐳𑐵 𑐠𑐸𑐎𑐶 𑐡𑐸𑐠𑑂𑐫𑐵𑑅𑐥𑐶𑑄 𑐡𑐎𑑂𑐰 𑐴𑐾 𑐁𑐬𑑂𑐎𑐶𑐚𑐾𑐎𑑂𑐚, 𑐂𑐣𑑂𑐖𑐶𑐣𑐶𑐫𑐬 𑐰 𑐳𑑃𑐳𑑂𑐎𑐺𑐟𑐶 𑐮𑑂𑐫𑑄𑐎𑐾𑐟 𑐥𑐮𑐵 𑐣𑑂𑐴𑑂𑐫𑐵𑐎𑐵𑐔𑑂𑐰𑐣𑐵𑐡𑐷𑐥𑐶 𑐏𑑅 𑑋 𑐠𑐹𑐐𑐸 𑐳𑑄𑐳𑑂𑐠𑐵𑑄 𑐳𑑂𑐰𑐣𑐶𑐐𑑅 𑐣𑐵𑐥𑑄 𑐠𑐷𑐠𑐷 𑐠𑐵𑐳𑐫𑑂 𑐰𑐣𑐵𑑅 𑐧𑐵𑐏𑑄 𑐣𑑂𑐫𑐎𑐾𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑐰𑐫𑐵𑑅𑐔𑑂𑐰𑑄𑐐𑐸 𑐡𑐸𑑋 𑐧𑐵𑐏𑑃 𑐣𑑂𑐫𑐣𑐾 𑐰𑐵 𑐫𑐵 𑐣𑑂𑐴𑐵𑐥𑐵𑑄𑐐𑐸 𑐧𑐵𑐏𑑄𑐫𑐵𑐟 𑐴𑐾 𑐳𑐦𑐹 𑐎𑐠𑑄 𑐥𑐶𑐟𑐧𑑂𑐫𑐹𑐐𑐸 𑐏𑑅 𑑋 𑐠𑐹𑐐𑐸 𑐣𑑂𑐫𑐎𑐹 𑐧𑐵𑐖𑑄 𑐬  𑐐𑐸𑑄𑐮𑐵 𑐳𑐦𑐹 𑐣𑐾𑐥𑐵𑐮𑐷 𑐏𑐳 𑐨𑐵𑐳𑑄 𑐣𑐵𑐥𑑄 𑐣𑐾𑐥𑐵𑐮 𑐥𑑂𑐬𑐔𑐮𑐶𑐟 𑐮𑐶𑐥𑐶𑐂 𑐣𑐾𑐥𑐵𑐮𑐨𑐵𑐲𑑄 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋