𑐥𑑂𑐬𑐶𑐫𑐾, 𑐖𑐶𑐟𑑅 𑐕𑑄 𑐟𑑅𑐩𑐶 𑐖𑐸 𑐢𑐿𑐮𑐵 ?

𑐥𑑂𑐬𑐶𑐫𑐾, 𑐖𑐶𑐟𑑅 𑐕𑑄 𑐟𑑅𑐩𑐶 𑐖𑐸 𑐢𑐿𑐮𑐵 ?

𑐔𑐶𑐟𑑂𑐟𑐢𑐬 ‘𑐴𑐺𑐡𑐫’

𑐩𑐫𑑀 𑐠𑑂𑐰 𑐖𑐐𑐟𑐫𑑂 𑐟𑑅𑐩𑐶 𑐖𑐶 𑐖𑑂𑐰𑐷𑐐𑐸
𑐎𑑂𑐰𑐟𑑂𑐫𑐮𑐵𑑅 𑐖𑑂𑐰𑐷 𑐣𑑄 𑐴𑑂𑐩𑐵 𑐩𑐾𑐥𑐶𑐣𑑂𑐟,
‘𑐩𑐡𑐸’ 𑐢𑐿𑐐𑐸 𑐕𑐟𑐵 𑐎𑐸𑐧𑐸𑐫𑐵𑑄 𑐐𑐵: 𑐠𑐵𑐫𑑂
𑐢𑐣𑑂𑐡𑐵 𑐣𑑂𑐫𑐵𑐦𑐵 𑐎𑐸𑐧𑐸𑐫𑐵 𑐖𑑂𑐰𑐷𑐮𑐵 ?
𑐥𑑂𑐬𑐶𑐫𑐾, 𑐖𑐶𑐟𑑅 𑐕𑑄 𑐟:𑐩𑐶 𑐖𑐸 𑐢𑐿𑐮𑐵 ?

𑐕𑐐𑐹 𑐬𑑀𑐐 𑐏𑑅 𑐟𑑅𑐩𑐶 𑐖𑑂𑐰𑐷𑐐𑐸 𑐣𑑄
𑐀𑐫𑑂𑐮𑐵𑑅𑐐𑐸𑐮𑐸 𑐠𑐾𑑄 𑐟:𑐩𑐶𑐥𑐴𑑅 𑐗𑑄,
𑐬𑑀𑐐𑐷 𑐀𑐫𑐮𑐵𑑅𑐐𑐸𑐮𑐸 𑐠𑐾𑑄 𑐖𑑂𑐰𑐷𑐎𑐵:
𑐐𑐸𑐮𑐶 𑐡𑐟 𑐄𑐮𑐶 𑐗𑑄 𑐠:𑐟 𑐩𑐕𑐶𑑄𑐎𑐵𑑅
𑐥𑑂𑐬𑐶𑐫𑐾, 𑐖𑐶𑐟𑑅 𑐕𑑄 𑐟𑑅𑐩𑐶 𑐖𑐸 𑐢𑐿𑐮𑐵 ?

𑐡𑐟 𑐢𑐵𑐫𑑂𑐰𑑄 𑐟𑐸𑑄 𑐐𑑀𑐕𑐵𑑅 𑐣𑐫𑑂 𑐖𑑂𑐫𑐹 ?
𑐡𑐫𑑂𑐰𑑄 𑐧𑑅 𑐧𑑅 𑐐𑑀𑐖𑐸 𑐥𑐸𑐣𑐾 𑐖𑑂𑐫𑐹 ?
𑐎𑐾𑐰𑐮 𑐩𑐾𑐥𑐶𑐣𑐶𑐐𑐸 𑐩𑐶𑐏𑐵𑐫𑑂 𑐴𑐵𑐎𑐵𑑅
‘𑐟𑑅𑐩𑐶 𑐰 𑐟:𑐩𑐶 𑐰´𑐢𑐵𑐫𑑂𑐎𑐵 𑐖𑑂𑐰𑐷𑐮𑐵 ?
𑐥𑑂𑐬𑐶𑐫𑐾, 𑐖𑐶𑐟: 𑐕𑑄 𑐟𑑅𑐩𑐶 𑐖𑐸 𑐢𑐿𑐮𑐵 ?

𑐏𑑅 𑐎𑐵 𑐩𑐾𑐥𑐶𑐣𑐶 𑐣𑑂𑐴𑑂𑐫𑑀𑐣𑐾 𑐕 𑐎𑑂𑐰𑐴𑑂𑐫𑑄
𑐀𑐩𑐶 ‘𑐨𑐸𑐣𑐸𑐨𑐸𑐣𑐸’ 𑐣𑑄 𑐣𑑂𑐫𑐣𑑂𑐫𑐩𑐵: 𑐖𑑂𑐰𑐷 𑐕𑑄
𑐀𑐖𑑂𑐖 𑐖𑑂𑐰𑐾𑐥𑑂𑐫𑐸𑐥𑑂𑐫𑐸𑑄 𑐳𑑂𑐰𑑅 𑐖𑑂𑐰𑐷 𑐕𑐣𑑂𑐟
𑐄𑐎𑐶 𑐕 𑐣𑑄 𑐀𑐩𑐶 𑐖𑑀 𑐖𑑂𑐰𑐷 𑐫𑐮 𑐮𑐵 ?
𑐥𑑂𑐬𑐶𑐫𑐾, 𑐖𑐶𑐟𑑅 𑐕𑑄 𑐟𑑅𑐩𑐶 𑐖𑐸 𑐢𑐿𑐮𑐵 ?

𑐏𑑅 𑐖𑐵 𑐖𑐶𑐟𑑅 𑐣𑑄 𑐏𑐬𑑂𑐔 𑐮𑐶𑐩𑐮𑐵𑑅
𑐕𑐩𑑀-𑐣𑐶𑐩𑑀 𑐡𑐵𑐩𑑄 𑐴𑐾 𑐏𑐟𑑂𑐟𑐵,
𑐀𑐫𑑂𑐣𑑄 𑐄𑐐𑐸 𑐳𑐸𑐏 𑐡𑐸𑐏 𑐳𑐴𑐫𑐵𑐫𑑂𑐐𑐸
𑐩𑐵𑐣𑐰 𑐖𑐷𑐰𑐣 𑐢𑐿𑐐𑐸 𑐰 𑐴𑐾 𑐮𑐵 ?
𑐥𑑂𑐬𑐶𑐫𑐾, 𑐖𑐶𑐟𑑅 𑐕𑑄 𑐟𑑅𑐩𑐶 𑐖𑐸 𑐢𑐿𑐮𑐵 !

𑐟: 𑐩𑐶 𑐟:𑐩𑐥𑐶𑑄 , 𑐧:𑐧:𑐮𑐵:𑐥𑐶𑑄
𑐰𑑄 𑐮𑐶𑐳𑑂𑐫 𑐣𑐵𑑄 𑐣𑑄 𑐣𑐵𑐥𑑄 𑐰𑐣 𑐬𑐾
𑐣𑐶𑐣𑑂𑐴𑐸𑐫𑐵 𑐟𑑂𑐫𑐾𑑃 𑐦𑐸𑐂𑑃 𑐫𑐵𑐣𑐵: 𑐖𑐐𑐟𑐾
𑐖𑐶𑐐𑐸 𑐣𑑄 𑐀𑐫𑑂 𑐴𑐾 𑐕𑑄 𑐕𑑂𑐰𑐫𑑂 𑐢𑐿𑐮𑐵 ?
𑐥𑑂𑐬𑐶𑐫𑐾, 𑐕𑑄 𑐖𑐶𑐟: 𑐟: 𑐩𑐶 𑐖𑐹 𑐢𑐿𑐮𑐵 ?

𑐴𑑂𑐣𑐵𑐥𑐵 𑐴𑑂𑐣𑐵𑐥𑐵𑐫𑐵𑐥𑐶𑑄 𑐎𑐰𑐶𑐥𑐶𑑄
𑐎𑐮𑐵𑐎𑐵𑐬 𑐰𑐵 𑐐𑐵𑐫𑐎𑐥𑐶𑑄
𑐳𑐸 𑐖𑐎 𑐖𑐸𑐫𑐵 𑐰𑐣 𑐢𑐵 𑐬𑐾 𑐟𑑅𑐩𑐶 ?
𑐖𑐶 𑐖𑐎 𑐀𑐩𑐶𑐐𑐸 𑐀𑑅𑐏𑑅 𑐖𑑂𑐰𑐷 𑐖𑐷𑐮𑐵 ?
𑐥𑑂𑐬𑐶𑐫𑐾, 𑐖𑐶𑐟: 𑐕𑑄 𑐟:𑐩𑐶’ 𑐖𑐸 𑐢𑐿𑐮𑐵 ?

𑐨𑐵𑐬𑐰𑐶 𑐳𑐳𑐮𑐾 𑐳𑐵 𑐖: 𑐖𑐸𑐮 𑐬𑐾
𑐎𑐵𑐮𑐶𑐡𑐵𑐳𑐫𑐵 𑐩𑐾𑐥𑐶𑐣𑐶 𑐨𑐬 𑐬𑐾
𑐩𑐢𑐸𑐳𑐹𑐡𑐣 𑐳𑐶𑐟 𑐔𑐷𑐩𑐶 𑐖𑐸𑐫𑐵: 𑐴𑐾
𑐳𑐶𑐡𑑂𑐢𑐶𑐡𑐵𑐳 𑐢𑐣𑐶 𑐐𑐧𑐮𑐾𑑄 𑐖𑐸𑐮 𑐮𑐵 ?
𑐥𑑂𑐬𑐶𑐫𑐾 𑐖𑐶𑐟: 𑐕𑑄 𑐟:𑐩𑐶 𑐖𑐸 𑐢𑐿𑐮𑐵 ?

𑐠𑐸𑐎𑐠𑑄 𑐖𑐶𑐩𑐶 𑐎𑐸𑐮 𑐟𑑄 𑐟𑑄 𑐔𑐷𑐩𑐶
𑐖𑐶 𑐖𑐎 𑐐𑐣𑑄 𑐖𑑂𑐰𑐷 𑐢𑐵 𑐬𑐾 𑐟𑑅𑐩𑐶
“𑐧𑐸𑐡𑑂𑐢 𑐰𑑄𑐱𑐫𑐵 𑐣𑐶𑐫𑐩 𑐠𑑂𑐰 𑐴𑐾 𑐏:”
𑐢𑐵:𑐐𑐸 𑐧𑐸𑐡𑑂𑐢- 𑐰𑐵𑐔𑐵 𑐮𑑀𑐩𑐣 𑐮𑐵 ?
𑐥𑑂𑐬𑐶𑐫𑐾, 𑐖𑐶𑐟: 𑐕𑑄 𑐟:𑐩𑐶 𑐖𑐸 𑐢𑐿𑐮𑐵?

– 𑐣𑐾𑐥𑐵𑐮 𑐆𑐟𑐸𑐥𑑁; 𑐡𑑃 𑑔: 𑐮𑑂𑐫𑐵: 𑑖: 𑐣𑐾. 𑐳𑑄. 𑑑𑑐𑑗𑑖