𑐥𑐸𑐮𑐵𑑄𑐐𑐸 𑐳𑐦𑐹 𑐣𑑂𑐴𑐹𑐐𑐸 𑐳𑑄𑐬𑐎𑑂𑐲𑐞

𑐣𑐾𑐥𑐵𑐮 𑐳𑑄𑐰𑐟𑑂 𑑗𑑐𑑐 𑐖𑑅𑐏𑑅 𑐔𑑂𑐰𑐫𑐵𑐟𑑅𑐐𑐸 𑐀𑐬𑑂𑐠𑐵𑐟 𑐠𑑁𑑄 𑐳𑑂𑐰𑐫𑐵𑑄 𑑔𑑐𑑐 𑐡𑑃 𑐳𑑂𑐰𑐫𑐵𑑄 𑐥𑐸𑐮𑐵𑑄𑐐𑐸 𑐳𑐦𑐹𑐟 𑐣𑑄 𑐠𑐸𑐎𑐷 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐲𑐫 𑐣𑑂𑐴𑑂𑐫𑐵𑐐𑐸 𑐴𑐾 𑐖𑐹𑐳𑐵𑑄 𑐳𑐦𑐹𑐫𑐵 𑐠𑑂𑐰 𑐁𑐫𑐸𑐥𑐵𑐏𑐾𑑄 𑐴𑐾 𑐄𑐎𑐶𑐫𑐵 𑐥𑐸𑐬𑐵𑐟𑐵𑐟𑑂𑐰𑐶𑐎 𑐩𑐴𑐟𑑂𑐰 𑐎𑑅𑐑𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐠𑐸𑐎𑐶𑐫𑐵 𑐳𑑄𑐬𑐎𑑂𑐲𑐞 𑐄𑐟𑐶𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹 𑑋
𑐠𑑂𑐰𑐴𑐾 𑐏𑑃𑐫𑐵𑐟 𑐰𑐵𑑅𑐔𑐵𑐫𑐾𑐎𑐵𑑅 𑐁𑐱𑐵 𑐳𑐦𑐹𑐎𑐸𑐠𑐶𑐂 𑐩𑐸𑐣𑐵𑐔𑑂𑐰𑑄𑐐𑐸 𑐠𑑂𑐰 𑐳𑐦𑐹𑐫𑐵𑐟 𑐠𑑁𑑄𑐎𑐣𑑂𑐴𑐫𑑂 𑐜𑐶𑐖𑐶𑐚𑐵𑐂𑐖 𑐫𑐵𑐣𑐵𑑅 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐁𑐱𑐵 𑐳𑐦𑐹𑐎𑐸𑐠𑐶𑐫𑐵 𑐔𑑂𑐰𑐫𑑂𑐫𑐵 𑐟𑑃𑐫𑑂 𑐠𑑁𑑄𑐎𑐣𑑂𑐴𑐫𑑂 𑐕𑐐𑐹 𑐥𑐬𑐶𑐫𑑀𑐖𑐣𑐵 𑐎𑐠𑑄 𑐴𑐾 𑐠𑑂𑐰 𑐖𑑂𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐮𑐾 𑐠𑐸𑐎𑐶𑐫𑐵 𑐣𑐾𑐟𑐺𑐟𑑂𑐰 𑐫𑐵𑐣𑐵 𑐔𑑂𑐰𑐣𑐵𑐡𑐷𑐩𑑂𑐴 𑐏𑑅 𑐖𑐬𑑂𑐩𑐣𑐷𑐳𑑂𑐠𑐶𑐟 𑐴𑐵𑐩𑑂𑐰𑐬𑑂𑐐 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐀𑐣𑐸𑐳𑐣𑑂𑐢𑐵𑐟𑐵 𑐜𑐵. 𑐰𑐶𑐡𑐸𑐬 𑐨𑐚𑑂𑐚𑐬𑐵𑐃 𑑋 𑐁𑐱𑐵 𑐳𑐦𑐹𑐎𑐸𑐠𑐶𑐫𑐵 𑐠𑑂𑐰 𑐩𑐴𑐟𑑂𑐰𑐥𑐹𑐬𑑂𑐞 𑐳𑐦𑐹𑐫𑐵𑐟 𑐖𑐟𑐣𑐳𑐵𑐠 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐠𑐸𑐐𑐸 𑐖𑑂𑐫𑐵 𑐖𑐬𑑂𑐩𑐣𑐷𑐫𑐵 𑐴𑐵𑐩𑑂𑐧𑐬𑑂𑐐 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐀𑐣𑑂𑐟𑐬𑑂𑐐𑐟 𑐮𑐵𑑅𑐰𑐸 𑐳𑐾𑐣𑑂𑐚𑐬 𑐦𑐬 𑐡 𑐳𑑂𑐚𑐜𑐷 𑐀𑐦 𑐩𑑂𑐫𑐵𑐣𑐸𑐳𑑂𑐎𑑂𑐬𑐶𑐥𑑂𑐚 𑐎𑐮𑑂𑐔𑐬𑑂𑐳, 𑐀𑐩𑐾𑐬𑐶𑐎𑐵𑐫𑐵 𑐴𑐶𑐮 𑐩𑑂𑐫𑐸𑐖𑐶𑐫𑐩 𑐊𑐞𑑂𑐜 𑐩𑑂𑐫𑐵𑐣𑐸𑐳𑑂𑐎𑑂𑐬𑐶𑐥𑑂𑐚 𑐮𑐵𑐂𑐧𑑂𑐬𑐾𑐬𑐷, 𑐀𑐩𑐾𑐬𑐶𑐎𑐵𑐫𑐵 𑐴𑐾 𑐩𑐶𑐣𑐾𑐳𑑀𑐚𑑂𑐚𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐰 𑐁𑐱𑐵 𑐳𑐦𑐹𑐎𑐸𑐠𑐶 𑐳𑐩𑐾𑐟 𑐥𑑂𑐫𑑄𑐐𑐹 𑐳𑑄𑐳𑑂𑐠𑐵𑐫𑐵 𑐩𑑄𑐎𑐵𑑅 𑐎𑐸𑐟𑐮𑐫𑑂 𑐳𑐘𑑂𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐏𑐟𑐸𑑄 𑐁𑐱𑐵 𑐳𑐦𑐹𑐎𑐸𑐠𑐶𑐂 𑐩𑐸𑐣𑐵𑐔𑑂𑐰𑑄𑐐𑐸 𑐥𑐸𑐮𑐵𑑄𑐐𑐸 𑐴𑐳𑑂𑐟𑐮𑐶𑐏𑐶𑐟 𑐳𑐦𑐹𑐟𑐫𑑂𑐟 𑐜𑐶𑐖𑐶𑐚𑐵𑐂𑐖 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑂𑐴𑐵𑐥𑐵 𑐣𑑄 𑐩𑐖𑐹𑐐𑐸 𑐩𑐏𑐸 𑑋 𑐟𑐬 𑐠𑐸𑐐𑐸𑐳𑐷 𑐖𑐸𑐫𑐵𑐔𑑂𑐰𑑄𑐐𑐸 𑐳𑑄𑐬𑐎𑑂𑐲𑐞𑐫𑐵 𑐖𑑂𑐫𑐵 𑐣𑑂𑐴𑐵𑐥𑐵 𑐢𑐵𑑅𑐳𑐵 𑐳𑑂𑐰𑐫𑐵𑑄 𑐥𑐵𑑅 𑑋 𑐠𑑁𑑄𑐎𑐣𑑂𑐴𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐜𑐶𑐖𑐶𑐚𑐵𑐂𑐖𑐾𑐱𑐣𑐫𑐵 𑐖𑑂𑐫𑐵𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐠𑑂𑐫𑐵𑐳𑐦𑐹𑐫𑐵 𑐣𑑂𑐴𑑂𑐫𑑅𑐣𑐾 𑐰 𑐮𑐶𑐄𑐣𑐾𑐫𑐵 𑐰𑐵𑐎𑑂𑐫 𑐧𑑂𑐰𑐣𑐾𑐐𑐸 𑐖𑑂𑐫𑐵 𑐖𑐸𑐂 𑑋 𑐠𑐸𑐎𑐶𑑄 𑐄𑐐𑐸 𑐳𑐦𑐹𑐫𑐵 𑐰𑐶𑐲𑐫 𑐥𑐟𑑂𑐟𑐵 𑐮𑐐𑐾 𑐖𑐸𑐂 𑑋 𑐠𑑂𑐰 𑐗𑑂𑐰𑐮𑐫𑑂 𑐳𑐦𑐹𑐫𑐵 𑐳𑐵𑐂𑐖, 𑐥𑑃, 𑐥𑐾𑐖 𑐰 𑐳𑐦𑐹𑐫𑐵 𑐀𑐰𑐳𑑂𑐠𑐵 𑐕𑐸 𑐡𑐸 𑐢𑐂𑐐𑐸 𑐏𑑃 𑐟𑐎𑑄 𑐀𑐨𑐶𑐮𑐾𑐏𑐷𑐎𑐬𑐞 𑐫𑐵𑐂 𑑋 𑐰𑐫𑐵𑑄 𑐮𑐶𑐥𑐵 𑐄𑐐𑐸 𑐳𑐦𑐹𑐫𑐵 𑐥𑐵𑐣𑐵 𑐥𑐵𑐣𑐵𑐫𑐵 𑐴𑐾 𑐦𑑀𑐚𑑀 𑐏𑐶𑐔𑐾 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂 𑑋 𑐴𑐬𑐾𑐎 𑐥𑐵𑐣𑐵𑐫𑐵 𑐦𑑀𑐚𑑀 𑐏𑐶𑐔𑐾 𑐫𑐵𑐣𑐵𑑅 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐠𑑂𑐰 𑐖𑑂𑐫𑐵𑐫𑐵𑐟 𑐴𑐾 𑐜𑐶𑐖𑐶𑐚𑐵𑐂𑐖𑐾𑐱𑐣 𑐢𑐵𑐂𑐐𑐸 𑐏𑑅 𑑋
𑐳𑐦𑐹 𑐜𑐶𑐖𑐶𑐚𑐵𑐂𑐖𑑂𑐜 𑐖𑐸𑐮 𑐎𑐶 𑐄𑐎𑐶𑐫𑐵𑐟 𑐳𑐸𑐣𑐵𑑄 𑐣𑑄 𑐮𑑂𑐴𑐵𑐟𑑄 𑐠𑐶𑐫𑐵𑑅 𑐥𑐸𑐂𑐎𑐾 𑐩𑐵𑐮𑐷 𑐩𑐏𑐸 𑑋 𑐀𑐖𑑂𑐫𑐵𑑅𑐐𑐸 𑐥𑐸𑐮𑐵𑑄𑐐𑐸 𑐳𑐦𑐹𑐟 𑐫𑐎𑑂𑐰 𑐮𑑂𑐴𑐵𑐟𑑄 𑐥𑐸𑐂𑐎𑐵𑐔𑑂𑐰𑐣 𑐢𑐵𑑅𑐳𑐵 𑐫𑐵𑐎𑐣𑑄 𑐣𑐲𑑂𑐚 𑐣𑑄 𑐖𑐸𑐫𑐵 𑐰𑐣𑐾𑐦𑐸 𑑋 𑐄𑐎𑐶𑑄 𑐳𑐸𑐫𑐵𑑄 𑐀𑐖𑑂𑐫𑐵𑑅𑐐𑐸 𑐳𑐦𑐹 𑐳𑑂𑐰𑐫𑐾 𑐩𑐵𑐮 𑐢𑐵𑑅𑐳𑐵 𑐎𑐩𑑂𑐥𑑂𑐫𑐸𑐚𑐬𑐫𑑂 𑐴𑐾 𑐔𑑂𑐰𑐣𑐵𑑅 𑐳𑑂𑐰𑐫𑐾𑐐𑐸 𑐖𑐸𑐂 𑑋 𑐠𑑅𑐟 𑐐𑐸𑐐𑐸𑑄 𑐥𑐾𑐖 𑐩𑐵𑐮 𑐢𑐵𑑅𑐳𑐵 𑐎𑐩𑑂𑐥𑑂𑐫𑐸𑐚𑐬𑑄 𑐴𑐾 𑐥𑑂𑐬𑐶𑐣𑑂𑐚 𑐣𑑄 𑐥𑐶𑐎𑐵𑐫𑐾 𑐦𑐂 𑑋

𑐴𑐬𑐾𑐎 𑐳𑐦𑐹𑐫𑐵𑐟 𑐠𑐸𑐎𑐠𑑄 𑐦𑑀𑐚𑑀 𑐏𑐶𑐔𑐾 𑐫𑐵𑐣𑐵𑑅 𑐎𑐵𑐫𑐾𑐢𑐸𑑄𑐎𑐵𑑅 𑐰𑐫𑐵𑑄 𑐮𑐶𑐥𑐵 𑐄𑐐𑐸 𑐳𑐦𑐹𑐫𑐵𑐟 𑐀𑐟𑐶𑐎𑑄 𑐳𑐸𑐬𑐎𑑂𑐲𑐶𑐟𑐥𑐹𑐬𑑂𑐰𑐎 𑐟𑐫𑐾𑐐𑐸 𑐖𑑂𑐫𑐵 𑐣𑑄 𑐠𑐸𑐐𑐸𑐳𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐮𑐵𑐐𑐶𑑄 𑐴𑐬𑐾𑐎 𑐳𑐦𑐹𑐫𑐵𑐟 𑐕𑐐𑑅 𑐕𑐐𑑅 𑐰𑐶𑐱𑐾𑐲 𑐎𑐠𑑄𑐫𑐵 𑐧𑐚𑑂𑐚𑐵𑐫𑑂 𑐡𑐸𑐣𑐾 𑐟𑐫𑐵𑑅 𑐳𑑄𑐬𑐎𑑂𑐲𑐶𑐟 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐦𑐹 𑐟𑐫𑐾𑐐𑐸 𑐮𑐵𑐐𑐶𑑄 𑐩𑐵𑑅𑐐𑐸 𑐠𑑂𑐰 𑐧𑐚𑑂𑐚𑐵 𑐣𑑄 𑐁𑐱𑐵 𑐳𑐦𑐹𑐎𑐸𑐠𑐶𑐂 𑐴𑐾 𑐔𑑂𑐰𑐣𑐵𑑅 𑐡𑐫𑐾𑐎𑐾𑐐𑐸 𑐫𑐵𑐂 𑑋 𑐠𑐸𑐎𑐶𑐫𑐵 𑐮𑐵𑐐𑐶𑑄 𑐕𑐸𑑄 𑐩𑐣𑐹𑐟𑐫𑑂𑐟 𑐧𑐚𑑂𑐚𑐵 𑐡𑐫𑐾𑐎𑐾𑐐𑐸 𑐟𑐵𑐮𑐶𑐩 𑐴𑐾 𑐧𑐷𑐐𑐸 𑐖𑑂𑐫𑐵 𑐳𑐩𑐾𑐟 𑐖𑐹𑐐𑐸 𑐏𑑅 𑑋

𑐳𑐦𑐹 𑐟𑐫𑐾𑐐𑐸 𑐮𑐵𑐐𑐶𑑄 𑐠𑑂𑐰 𑐐𑐸𑐐𑐸 𑐧𑐚𑑂𑐚𑐵 𑐡𑐫𑐾𑐎𑐷, 𑐰 𑐧𑐚𑑂𑐚𑐵𑐫𑐵 𑐨𑑂𑐰𑑄 𑐢𑐵𑑅𑐳𑐵 𑐗𑐷𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐔𑐵𑑅𑐔𑐹 𑐩𑐏𑐸 𑑋 𑐠𑑂𑐰 𑐨𑑂𑐰𑑄 𑐴𑐾 𑐖𑐬𑑂𑐩𑐣𑐷𑑄 𑐰𑐂 𑑋 𑐠𑐸𑐎𑐶𑐫𑐵𑐟 ‘𑐃–𑐦𑑂𑐮𑐸𑐚 𑐧𑑀𑐬𑑂𑐜’ 𑐢𑐵𑐂 𑑋 𑐡𑐠𑐸𑐂 𑐥𑑂𑐰𑐵𑑅𑐥𑑂𑐰𑐵𑑅 𑐟𑐫𑐵𑑅 𑐡𑐫𑐾𑐎𑐵𑐟𑑅𑐐𑐸 𑐠𑑂𑐰 𑐏𑑂𑐰𑐵𑐟𑑂𑐟𑐸𑐐𑐸 𑐨𑑂𑐰𑑄𑐫𑐵 𑐰𑐶𑐱𑐾𑐲𑐟𑐵 𑐕𑐸 𑐢𑐵𑐫𑐾𑐧𑐮𑐫𑑂 𑐠𑑂𑐰 𑐊𑐳𑐶𑐜 𑐦𑑂𑐬𑐶 𑐖𑐸𑐂 𑑋 𑐀𑐬𑑂𑐠𑐵𑐟 𑐠𑑂𑐰 𑐨𑑂𑐰𑑄𑐫𑐵 𑐧𑐚𑑂𑐚𑐵 𑐡𑐸𑐣𑐾 𑐏𑑂𑐰𑐵𑐄𑑃 𑐰𑐵 𑐎𑑂𑐰𑐵𑑅𑐫𑐵 𑐮𑐶𑐔𑑂𑐰𑑅 𑐮𑐵𑐂 𑐩𑐏𑐸 𑑋 𑐰𑐠𑑄 𑐐𑐂 𑐩𑐏𑐸 𑑋 𑐢𑐸𑐮𑑄 𑐠𑐷 𑐦𑐂 𑐩𑐏𑐸 𑑋 𑐧𑐚𑑂𑐚𑐵 𑐡𑐸𑐣𑐾 ‘𑐩𑑀𑐂𑐱𑑂𑐔𑐬’ 𑐧𑐣𑐾 𑐖𑐸𑐂 𑐩𑐏𑐸 𑑋 𑐎𑐶𑐮𑑄 𑐣𑑄 𑐣𑐂 𑐩𑐏𑐸 𑑋

𑐠𑑂𑐰 𑐨𑑂𑐰𑑄 𑐟𑐟𑑅𑐥𑐵𑑅𑐐𑐸 𑐳𑐵𑐂𑐖𑐫𑑂 𑐰𑐂 𑑋 𑐄𑐎𑐶𑐫𑐵𑐟 𑐳𑐦𑐹𑐫𑐵 𑐁𑐎𑐵𑐬 𑐳𑑂𑐰𑐫𑐵𑑅 𑐔𑐵𑐣𑐵𑑅 𑐧𑐚𑑂𑐚𑐵 𑐡𑐫𑐾𑐎𑐾𑐐𑐸 𑐫𑐵𑐂 𑑋 𑐠𑑂𑐰 𑐧𑐚𑑂𑐚𑐵 𑐡𑐸𑐣𑐾 𑐳𑐦𑐹 𑐟𑐫𑐾𑐢𑐸𑑄𑐎𑐮 𑐎𑐶 𑐄𑐎𑐶𑐫𑐵𑐟 𑐴𑐟𑐥𑐟𑐶𑑄 𑐔𑐵𑐫𑐾𑐎𑐷 𑐩𑐏𑐸 𑑋 𑐳𑐮𑑄𑐳𑑅𑐡𑑃 𑐟𑐎 𑐳𑐦𑐹 𑐄𑐎𑐷 𑐡𑐸𑐣𑐾 𑐟𑐫𑐵𑐟𑑅𑐳𑐵𑑄 𑐰 𑐐𑐠𑐾 𑐏𑑅 𑐀𑐠𑐾 𑐴𑐾 𑐖𑐸𑐫𑐵𑐔𑑂𑐰𑐣𑐷 𑑋 𑐥𑐸𑐮𑐵𑑄𑐐𑐸 𑐳𑐦𑐹𑐫𑐵𑐟 𑐗𑐷𑐐𑐸 𑐥𑐸𑐮𑐵𑑄𑐐𑐸 𑐴𑐾 𑐥𑐡𑑂𑐢𑐟𑐶 𑐎𑐠𑑄 𑐎𑐵𑐥𑐟𑐫𑑂 𑐥𑑂𑐰𑑅𑐔𑐶𑐣𑐵𑑅 𑐧𑐚𑑂𑐚𑐵 𑐡𑐸𑐣𑐾 𑐳𑑂𑐰𑐠𑐣𑐾𑐐𑐸 𑐫𑐵𑐂 𑑋 𑐠𑑂𑐰 𑐳𑐦𑐹 𑐳𑑄𑐬𑐎𑑂𑐲𑐞 𑐖𑑂𑐫𑐵𑐫𑐵 𑐥𑑂𑐬𑐩𑐸𑐏 𑐜𑐵. 𑐨𑐚𑑂𑐚𑐬𑐵𑐃𑐫𑐵 𑐎𑐠𑑄 𑐠𑑂𑐰 𑐕𑐐𑐹 𑐟𑐳𑐎𑑄 𑐴𑐾 𑐄𑐔𑑂𑐔𑐎𑑀𑐚𑐷𑐫𑐵 𑐳𑑄𑐬𑐎𑑂𑐲𑐞 𑐏𑑅 𑑋 𑐫𑐸𑐬𑑀𑐥 𑐀𑐩𑐾𑐬𑐶𑐎𑐵𑐥𑐵𑐏𑐾 𑐣𑑄 𑐠𑐠𑐾 𑐫𑐵𑐣𑐵𑑅 𑐥𑐸𑐮𑐵𑑄𑐐𑐸 𑐳𑐦𑐹𑐟 𑐳𑑄𑐬𑐎𑑂𑐲𑐞 𑐫𑐵𑐂𑐐𑐸 𑐏𑑅 𑑋 𑐠𑑅𑐐𑐸 𑐀𑐢𑑂𑐫𑐫𑐣𑐫𑐵 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐨𑐵𑐬𑐟𑐫𑐵 𑐡𑐶𑐮𑑂𑐮𑐷, 𑐰𑐶𑐴𑐵𑐬, 𑐄𑐟𑑂𑐟𑐬 𑐥𑑂𑐬𑐡𑐾𑐱, 𑐗𑐵𑐬𑐏𑐞𑑂𑐜 𑐮𑐐𑐵𑐫𑐟 𑐁𑐥𑐵𑐮𑑄 𑐠𑐵𑐳𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐳𑑄𑐬𑐎𑑂𑐲𑐞 𑐣𑑄 𑐳𑑂𑐰𑐫𑐵𑐡𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑅𑐐𑐸 𑐀𑐣𑐸𑐨𑐰 𑐎𑑃𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐁𑑅 𑐗𑐷𑐳𑑄 𑐫𑐵𑐣𑐵𑐔𑑂𑐰𑐣𑐵𑐐𑐸 𑐳𑑄𑐬𑐎𑑂𑐲𑐞 𑐮𑐵 𑐨𑐵𑐬𑐟𑐫𑑂 𑐟𑐎𑑄 𑐖𑐹𑐐𑐸 𑐩𑐡𑐸𑐣𑐶 𑑋’ 𑐰𑐫𑑂𑐎𑑅𑐫𑐵 𑐎𑐠𑑄 𑐨𑐵𑐬𑐟𑐫𑐵 𑐥𑐸𑐮𑐵𑑄𑐐𑐸 𑐐𑑂𑐬𑐣𑑂𑐠𑐟 𑐳𑑂𑐰𑐫𑐵𑑄 𑐁𑐱𑐵 𑐳𑐦𑐹𑐎𑐸𑐠𑐶𑐫𑐵 𑐥𑐸𑐮𑐵𑑄𑐐𑐸 𑐐𑑂𑐬𑐣𑑂𑐠𑐟 𑐁𑑅 𑐐𑐣 𑐏𑑅 𑐐𑐣 𑐖𑐸𑐂𑐎 𑐳𑐸𑐬𑐎𑑂𑐲𑐶𑐟 𑐖𑐹𑐐𑐸 𑐡𑐸 𑑋
𑐠𑐸𑐥𑐵𑐮𑐫𑑂 𑐠𑑂𑐰 𑐥𑐸𑐮𑐵𑑄𑐐𑐸 𑐐𑑂𑐬𑐣𑑂𑐠𑐫𑐵 𑐳𑑄𑐬𑐎𑑂𑐲𑐞 𑐖𑐎 𑐩𑐏𑐸 𑐳𑑄𑐬𑐎𑑂𑐲𑐞𑐫𑐵 𑐣𑐵𑐥𑐣𑐵𑐥𑑄 𑐄𑐐𑐸 𑐳𑐦𑐹𑐫𑐵 𑐀𑐢𑑂𑐫𑐫𑐣 𑐳𑐩𑐾𑐟 𑐫𑐵𑐣𑐵 𑐰𑐣𑐾𑐐𑐸 𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐸𑐮𑐵𑑄𑐐𑐸 𑐳𑐦𑐹𑐫𑐵 𑐮𑐶𑐥𑐶, 𑐨𑐵𑐲𑐵, 𑐎𑐵𑐮𑐏𑐞𑑂𑐜, 𑐰𑐶𑐲𑐫𑐰𑐳𑑂𑐟𑐸 𑐠𑐾𑑄𑐖𑑂𑐫𑐵𑑅𑐐𑐸 𑐏𑑃 𑐣𑑄 𑐣𑐵𑐥𑐣𑐵𑐥𑑄 𑐀𑐢𑑂𑐫𑐫𑐣 𑐫𑐵𑐣𑐵 𑐰𑐣𑐾𑐐𑐸 𑐠𑐸𑐐𑐸𑐳𑐷𑐫𑐵 𑐎𑐸𑐟𑑅 𑐏𑑅 𑑋 𑐠𑐠𑐾 𑐖𑐸𑐮 𑐢𑐵𑑅𑐳𑐵 𑐎𑐣𑑂𑐴𑐫𑑂 𑐳𑐸𑐫𑐵𑑄 𑐄𑐐𑐸 𑐳𑐦𑐹 𑐀𑐢𑑂𑐫𑐫𑐣 𑐫𑐵𑐫𑐾 𑐩𑐵𑐮 𑐢𑐵𑑅𑐳𑐵 𑐄𑐩𑐶𑐟 𑐠𑐸𑐎𑐶𑑄 𑐫𑐎𑑂𑐰 𑐴𑐾 𑐐𑑂𑐰𑐵𑐴𑐵𑐮𑐶 𑐫𑐵𑐂 𑑋

𑐁𑐱𑐵 𑐳𑐦𑐹𑐎𑐸𑐠𑐶𑐫𑐵 𑐣𑑂𑐴𑐵𑐥𑐵𑐫𑐵 𑐳𑐦𑐹𑐟 𑐳𑑄𑐬𑐎𑑂𑐲𑐶𑐟 𑐖𑐹𑐳𑐵𑑄 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐖𑐹𑐐𑐸 𑐩𑐡𑐸 𑑋 𑐄𑐎𑐶𑐫𑐵 𑐕𑐸𑑄 𑐳𑐦𑐹𑐟 𑐩𑐵𑑅𑐥𑐶𑑄𑐳𑑄 𑐖𑐎 𑐀𑐢𑑂𑐫𑐫𑐣 𑐫𑐵𑑅𑐐𑐸 𑐡𑐸 𑑋 𑐳𑐦𑐹 𑐳𑑄𑐬𑐎𑑂𑐲𑐞𑐫𑐵 𑐠𑑂𑐰 𑐖𑑂𑐫𑐵 𑐥𑑂𑐫𑐮𑐵 𑐟𑐎 𑐖𑐎 𑐫𑐵𑐫𑐾𑐐𑐸 𑐐𑑂𑐰𑐳𑐵𑑅 𑐡𑐸𑐐𑐸 𑐏𑑅 𑑋 𑐥𑑂𑐫𑐮𑐵 𑐦𑐸𑐂 𑐣𑑄 𑐢𑐸𑑄𑐎𑐮 𑑋 𑐠𑑂𑐰 𑐔𑐬𑐞𑐫𑐵 𑐳𑑄𑐬𑐎𑑂𑐲𑐞 𑐮𑐶𑐥𑐵 𑐁𑑅 𑐴𑐵𑐣𑑄 𑐩𑐾𑐐𑐸 𑐟𑐵𑐮𑐶𑐩 𑐧𑐶𑐫𑐵𑑅 𑐩𑐾𑐐𑐸 𑐔𑐬𑐞𑐫𑐵 𑐳𑑄𑐬𑐎𑑂𑐲𑐞 𑐖𑑂𑐫𑐵 𑐖𑐸𑐂𑐐𑐸 𑐏𑑃 𑐣𑑄 𑐜𑐵. 𑐨𑐚𑑂𑐚𑐬𑐵𑐃𑐣𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐁𑐱𑐵 𑐳𑐦𑐹𑐎𑐸𑐠𑐶 𑐐𑐸𑐮𑐶 𑐳𑐸𑐬𑐎𑑂𑐲𑐶𑐟 ?

𑐠𑐣𑐶𑑄 𑑓𑑓 𑐡𑑃 𑐳𑐬𑑂𑐰𑐳𑐵𑐢𑐵𑐬𑐞𑐫𑐵 𑐮𑐵𑐐𑐶𑑄 𑐏𑐸𑐮𑑂𑐮𑐵 𑐖𑐹𑐐𑐸 𑐁𑐱𑐵 𑐳𑐦𑐹𑐎𑐸𑐠𑐶 𑐣𑐾𑐥𑐵𑑅𑐫𑐵 𑐴𑐾 𑐥𑐸𑐮𑐵𑑄𑐐𑐸 𑐳𑐦𑐹 𑐰 𑐠𑑂𑐫𑐵𑐳𑐦𑐹 𑐳𑑄𑐎𑐮𑐣𑐫𑐵 𑐮𑐵𑐐𑐶𑑄 𑐀𑐟𑐶𑐎𑑄 𑐣𑐵𑑄𑐖𑐵𑑅𑐐𑐸 𑐎𑐾𑐣𑑂𑐡𑑂𑐬 𑐏𑑅 𑑋 𑐨𑐵𑐲𑐵𑐣𑐶𑐨𑐵𑑅 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅𑐖𑐸𑑄 𑐠𑑅 𑐀𑐧𑐸 𑐁𑐱𑐵𑐬𑐟𑑂𑐣 𑐎𑐳𑐵𑑅𑐫𑐵 𑐣𑐵𑐩𑑄 𑐳𑑂𑐰𑐣𑐵𑐡𑐷𑐐𑐸 𑐠𑑂𑐰 𑐳𑐦𑐹𑐎𑐸𑐠𑐶𑐂 𑑖𑑗𑑐𑑐 𑐐𑐹 𑐥𑐸𑐮𑐵𑑄𑐐𑐸 𑐐𑑂𑐬𑐣𑑂𑐠 𑐳𑑄𑐎𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐣𑐫𑐵 𑐥𑐸𑐳𑑂𑐟𑐎𑐵𑐮𑐫𑐵𑐢𑑂𑐫𑐎𑑂𑐲 𑐱𑐬𑐡 𑐎𑐳𑐵𑑅𑐖𑐸𑑄 𑐎𑐣𑐵𑐡𑐷 𑐎𑐠𑑄 𑐠𑑂𑐰 𑐦𑐸𑐎𑑂𑐎 𑐴𑐾 𑐳𑐦𑐹𑐟 𑐜𑐶𑐖𑐶𑐚𑐵𑐂𑐖𑑂𑐜 𑐖𑐸𑐂𑐢𑐸𑑄𑐎𑐮 𑑋 𑐀𑐠𑐾 𑐴𑐾 𑐀𑐣 𑑑𑑑𑑐𑑐 𑐐𑐹 𑐟𑐵𑐜𑐥𑐟𑑂𑐬 𑐣𑑄 𑐩𑐸𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐥𑐶𑑄 𑐳𑐦𑐹 𑐰 𑐟𑐵𑐜𑐥𑐟𑑂𑐬𑐟 𑐀𑐥𑑂𑐰𑑅 𑐫𑐵𑐣𑐵𑑅 𑐢𑐵𑐬𑑂𑐩𑐶𑐎, 𑐰𑐵𑐳𑑅𑐟𑐵𑐳𑑅, 𑐖𑑂𑐫𑑀𑐟𑐶𑐲, 𑐰𑐵𑐳𑑂𑐟𑐸𑐱𑐵𑐳𑑂𑐟𑑂𑐬 𑐁𑐡𑐶 𑐰𑐶𑐲𑐫𑐫𑐵𑐐𑐸 𑐏𑑅 𑑋 𑐠𑐣 𑐩𑐸𑐣𑐵𑐔𑑂𑐰𑑄𑐐𑐸 𑐐𑐸𑐮𑐶𑐏𑐾 𑐳𑐥𑐹m 𑐮𑐸𑑃 𑐁𑐏𑑅, 𑐰𑐴𑑅 𑐁𑐏𑑅 𑐰 𑐴𑐶𑑄 𑐔𑑂𑐰𑐫𑐵𑐟𑑅𑐐𑐸 𑐟𑐎𑑄 𑐡𑐸 𑑋
𑐁𑐱𑐵 𑐳𑐦𑐹𑐎𑐸𑐠𑐶𑐂 𑐐𑐸𑐮𑐶 𑐣𑑄 𑐳𑐥𑐹m 𑐩𑐸𑐣𑐵𑐔𑑂𑐰𑑄𑐐𑐸 𑐡𑐸 𑐄𑐎𑐶𑐫𑐵 𑐜𑐶𑐖𑐶𑐚𑐵𑐂𑐖𑑂𑐜 𑐎𑐥𑐷 𑐰𑐶𑐱𑑂𑐰𑐫𑐵 𑐠𑐷𑐠𑐷 𑐡𑐾𑐱𑐫𑑂 𑐔𑑂𑐰𑑄𑐐𑐸 𑐣𑐵𑑄𑐖𑐵𑑅𑐐𑐸 𑐮𑐵𑐂𑐧𑑂𑐬𑐾𑐬𑐷𑐟𑐫𑑂𑐟 𑐣𑑄 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐄𑐐𑐸 𑐮𑐵𑐂𑐧𑑂𑐬𑐾𑐬𑐷𑐟𑐫𑑂𑐳𑑄 𑐠𑑂𑐰 𑐎𑐥𑐷 𑐮𑐵𑐏𑑁𑑄 𑐟𑐎𑐵 𑐢𑑂𑐫𑐧𑐵 𑐥𑐸𑐮𑐵𑑅 𑐣𑑂𑐫𑐵𑐣𑐵 𑐟𑑅𑐐𑐸 𑐏𑑅 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐰𑐶𑐱𑑂𑐰𑐫𑐵 𑐩𑐾𑐩𑐾𑐐𑐸 𑐡𑐾𑐱𑐫𑑂 𑐔𑑂𑐰𑐣𑐵𑑅 𑐟𑐎𑑄 𑐁𑐱𑐵 𑐳𑐦𑐹𑐎𑐸𑐠𑐶𑐫𑐵 𑐥𑐸𑐮𑐵𑑄𑐐𑐸 𑐐𑑂𑐬𑐣𑑂𑐠𑐫𑐵 𑐃–𑐎𑐥𑐷 𑐳𑑂𑐰𑐫𑐾 𑐦𑐂𑐐𑐸 𑐖𑐹𑐐𑐸 𑐡𑐸 𑑋 𑐩𑐹 𑐳𑐥𑐹m 𑐴𑐾 𑐳𑑂𑐰𑐫𑐾 𑐩𑐵𑑅𑐐𑐸 𑐖𑐸𑐮 𑐢𑐵𑑅𑐳𑐵 𑐣𑐾𑐥𑐵𑑅 𑐰𑐫𑐵𑑅 𑐁𑐱𑐵 𑐳𑐦𑐹 𑐎𑐸𑐠𑐶𑐂 𑐴𑐾 𑐰𑐫𑐾 𑐩𑐵𑐮𑐷𑐐𑐸 𑐖𑐸𑐂 𑑋 𑐣𑐾𑐥𑐵𑑅 𑐰 𑐣𑐾𑐰𑐵𑑅𑐫𑐵 𑐧𑐵𑐬𑐾 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐳𑑂𑐰𑐡𑐾𑐱𑐷 𑐖𑐸𑐂𑐩𑐵 𑐰𑐵 𑐰𑐶𑐡𑐾𑐱𑐷, 𑐁𑐱𑐵 𑐳𑐦𑐹𑐎𑐸𑐠𑐶𑐂 𑐡𑐸𑐴𑐵𑑄 𑐩𑐰𑐫𑐾𑐎𑑄 𑐰𑐫𑐵𑐐𑐸 𑐀𑐢𑑂𑐫𑐫𑐣 𑐥𑐹𑐰𑐣𑐷 𑐩𑐏𑐸 𑑋 𑐠𑐣 𑐣𑐾𑐥𑐵𑐮𑐨𑐵𑐲𑐵𑑄 𑐁𑑅 𑐟𑐎 𑐥𑐶𑐴𑐵𑑄 𑐰𑑅𑐐𑐸 𑐮𑐐𑐨𑐐 𑐦𑐸𑐎𑑂𑐎 𑐴𑐾 𑐥𑑂𑐬𑐶𑐣𑑂𑐚𑐾𑐜 𑐳𑐦𑐹𑐟 𑐣𑑄 𑐳𑑄𑐐𑑂𑐬𑐴𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐦𑐹 𑐳𑑄𑐬𑐎𑑂𑐲𑐞𑐫𑐵 𑐮𑑂𑐫𑐵𑐏𑑄 𑐁𑐱𑐵 𑐳𑐦𑐹𑐎𑐸𑐠𑐶𑐫𑐵 𑐕𑐾𑑃 𑐠𑑅 𑐴𑐾 𑐣𑑄 𑐕𑐐𑐹 𑐣𑑂𑐴𑑂𑐫𑐠𑐣𑐾𑐧𑐴𑑅𑐐𑐸 𑐨𑐰𑐣 𑐏𑑅 𑑋 𑐥𑑂𑐬𑐾𑐩 𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 ‘𑐳𑐵𑐴𑐶𑐟𑑂𑐫 𑐡𑐾𑐐𑑅’ 𑐡𑐣𑐾𑐐𑐸 𑐩𑑂𑐴𑐐𑐳 𑐥𑐹𑐰𑑄𑐎𑐾 𑐎𑐠𑑄 𑐠𑑂𑐰 𑐕𑐾𑑃 𑐡𑐾𑐐𑑅 𑐱𑐿𑐮𑐷𑑄 𑐡𑐣𑐵𑐟𑑅𑐐𑐸 𑐡𑐸 𑑋 𑐀𑐩𑐹𑐮𑑂𑐫 𑐐𑑂𑐬𑐣𑑂𑐠𑐟 𑐩𑐸𑑄𑐎𑐵𑐟𑑅𑐐𑐸 𑐠𑐵𑐫𑑂 𑐖𑐹𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐖𑐶𑐎𑑂𑐰 𑐳𑐸𑐬𑐎𑑂𑐲𑐶𑐟 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐠𑑂𑐰 𑐕𑐾𑑃𑐫𑐵𑐟 𑑋