𑐣𑑂𑐫𑐹 𑐖𑐾𑐣𑐶𑐠 𑐳𑑂𑐎𑐹𑐮𑑄 𑐟𑑅𑐖𑐶𑐎 𑐀𑐨𑐶𑐨𑐵𑐰𑐎 𑐡𑐶𑐰𑐳 𑐣𑑂𑐫𑐵𑐫𑐾𑐎𑐮

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐬𑐵𑐖𑐷𑐰 𑐬𑐵𑐖𑑀𑐥𑐵𑐢𑑂𑐫𑐵𑐫 | 𑑒𑑐𑑗𑑕 𑐦𑐵𑐮𑑂𑐐𑐸𑐞 𑑑𑑗, 𑐱𑐸𑐎𑑂𑐬𑐧𑐵𑐬 𑑑𑑖:𑑓𑑙:𑑕𑑙

𑐫𑐾𑑃𑐫𑐵 𑐟𑐵𑐩𑑂𑐳𑐶𑐥𑐵𑐏𑐵𑐫𑑂 𑐔𑑂𑐰𑑄𑐐𑐸 𑐣𑑂𑐫𑐹 𑐖𑐾𑐣𑐶𑐠 𑐂𑑄𑐐𑑂𑐮𑐶𑐳 𑐩𑑀𑐜𑐾𑐮 𑐳𑑂𑐎𑐹𑐮𑐫𑐵 𑑒𑑐 𑐎𑑂𑐰𑑅𑐐𑐸 𑐀𑐨𑐶𑐨𑐵𑐰𑐎 𑐡𑐶𑐰𑐳 𑐟𑑅𑐖𑐶𑐎 𑐴𑑄𑐐𑐸 𑐡𑐸 𑑋

𑐧𑐶𑐴𑐶𑐰𑐵𑑅 𑐫𑐾𑑃𑐫𑐵 𑐖𑐩𑐮𑐫𑑂 𑐔𑑂𑐰𑑄𑐐𑐸 𑐬𑐵𑐲𑑂𑐚𑑂𑐬𑐶𑐫 𑐣𑐵𑐔𑐑𑐬𑐫𑐵 𑐴𑐮𑐫𑑂 𑐖𑐹𑐐𑐸 𑐄𑐐𑐸 𑐀𑐨𑐶𑐨𑐵𑐰𑐎 𑐡𑐶𑐰𑐳𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑘 𑐰𑐜𑐵𑐫𑐵 𑐰𑐜𑐵 𑐣𑐵𑐫𑑅 𑐤𑐸𑐔𑑂𑐕𑐾𑐎𑐵𑐖𑐷 𑐩𑐴𑐬𑑂‍𑐖𑐣 𑐩𑐹𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅𑐳𑐵 𑐰𑐫𑑂𑐎𑐮𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾, 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐳𑑂𑐎𑐹𑐮 𑐳𑑄𑐔𑐵𑐮𑐎 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐥𑐸𑐲𑑂𑐥𑐮𑐵𑐮 𑐱𑑂𑐬𑐾𑐲𑑂𑐛𑐫𑐵𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐤𑑂𑐫𑐵𑑅𑐐𑐸 𑐏𑑅 𑑋

𑐀𑐨𑐶𑐨𑐵𑐰𑐎 𑐡𑐶𑐰𑐳𑐫𑑂 𑐳𑑂𑐎𑐹𑐮𑐫𑐵 𑐕𑐐𑐹 𑐟𑐐𑐶𑑄 𑐣𑐶𑐳𑐾𑑄 𑑑𑑒 𑐟𑐐𑐶𑐟𑐎𑐫𑐵 𑐰𑐶𑐡𑑂𑐫𑐵𑐬𑑂‍𑐠𑐷𑐥𑐣𑑂𑐳𑑄 𑐠𑐷𑐠𑐷 𑐴𑐸𑐮𑐵𑐥𑑂𑐫𑐵𑐏𑑄𑐮𑐶𑐳𑐾𑑄 𑐳𑐵𑑄𑐐𑐶𑐟𑐶𑐎 𑐖𑑂𑐫𑐵𑐗𑑂𑐰𑑅 𑐤𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐳𑑂𑐎𑐹𑐮𑐫𑐵 𑐱𑐶𑐎𑑂𑐲𑐎 𑐰𑐶𑐎𑐵𑐳 𑐥𑑁𑐜𑐾𑐮𑑄 𑐮𑐳𑐎𑐸𑐳 𑐣𑑂𑐰𑐔𑐹 𑐧𑐶𑐫𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐎𑐹𑐮𑐫𑑂 𑑑𑑕 𑐡𑑃 𑐖𑑂𑐫𑐵 𑐫𑐵𑐫𑐾𑐢𑐸𑑄𑐎𑐹𑐥𑐶𑑄 𑐐𑐸𑐬𑐸𑐰𑐬𑑂‍𑐐 𑐰 𑐎𑐬𑑂‍𑐩𑐔𑐵𑐬𑐷𑐥𑐶𑐣𑑂𑐟 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅𑐳𑐵 𑐳𑑂𑐎𑐹𑐮 𑐥𑐮𑐶𑐳𑑂𑐠𑐵 𑐖𑐹𑐧𑐮𑐾 𑐡𑐎𑐮𑐾 𑐤𑐵𑐥𑐵𑑄 𑐨𑐬𑑂‍𑐣𑐵 𑐖𑐹𑐥𑐶𑑄 𑐣𑐶𑐪 𑐰𑐶𑐡𑑂𑐫𑐵𑐬𑑂‍𑐠𑐷𑐥𑐶𑐣𑑂𑐟 𑐣𑑄 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋

𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐳𑑂𑐎𑐹𑐮𑐫𑐵 𑐳𑑄𑐳𑑂𑐠𑐵𑐥𑐎 𑐥𑑂𑐬𑐶𑐣𑑂𑐳𑐶𑐥𑐮 𑐬𑐵𑐖𑐸 𑐩𑐴𑐬𑑂‍𑐖𑐣𑑄 𑐳𑑂𑐎𑐹𑐮 𑐥𑐮𑐶𑐳𑑂𑐠𑐵𑐎𑐵𑐮𑐣𑐶𑐳𑐾𑑄 𑐁𑑅𑐟𑐎𑐫𑐵 𑐳𑑄𑐑𑐬𑑂‍𑐲𑐫𑐵 𑐏𑑃 𑐮𑐶𑐳𑐾𑐮𑐶𑐳𑐾𑑄 𑐁𑑅 𑐕𑐵𑐟𑑂𑐬𑐧𑐺𑐟𑑂𑐟𑐶𑐫𑐵 𑐣𑐶𑐟𑐶𑑄 𑐕𑐵𑐟𑑂𑐬𑐧𑐺𑐟𑑂𑐟𑐶 𑐎𑑀𑐲 𑐣𑑄 𑐣𑐷𑐳𑑂𑐰𑐣𑐵𑑅 𑐰𑐣𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑑𑑘 𑐰𑐜𑐵𑐫𑐵 𑐰𑐜𑐵𑐣𑐵𑐫𑑅 𑐤𑐸𑐔𑑂𑐕𑐾𑐎𑐵𑐖𑐷 𑐩𑐴𑐬𑑂‍𑐖𑐣𑑄 𑐠𑑅𑐐𑐸 𑐣𑐸𑐐𑑅𑐏𑑃𑐫𑐵 𑐮𑐶𑐳𑐾𑑄 𑐄𑐐𑐸 𑐕𑐵𑐟𑑂𑐬𑐧𑐺𑐟𑑂𑐟𑐶 𑐎𑑀𑐲𑐫𑐵 𑐣𑐶𑐟𑐶𑑄 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐣𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶𑐮𑐶𑐳𑐾𑑄 𑐳𑑂𑐎𑐹𑐮 𑐳𑑄𑐔𑐵𑐮𑐎 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐥𑐸𑐲𑑂𑐥𑐮𑐵𑐮 𑐱𑑂𑐬𑐾𑐲𑑂𑐛𑑄 𑐳𑐸𑐨𑐵𑐫𑑂 𑐡𑐾𑐕𑐵𑐫𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐦𑐵𑐐𑐸𑐣 𑑑𑑕 𑐐𑐟𑐾 𑐧𑐸𑐢𑐰𑐵𑑅 𑐴𑐾𑐮𑐶𑐎𑑀𑐥𑑂𑐚𑐬 𑐡𑐸𑐬𑑂‍𑐑𑐚𑐣𑐵𑐫𑑂 𑐮𑐵𑐣𑐵𑑅 𑐩𑐡𑐸𑐪 𑐥𑐬𑑂‍𑐫𑐚𑐣𑐩𑐣𑑂𑐟𑑂𑐬𑐷 𑐬𑐰𑐶𑐣𑑂𑐡𑑂𑐬 𑐀𑐢𑐶𑐎𑐵𑐬𑐷 𑐮𑐶𑐳𑐾𑑄 𑐩𑐡𑐸𑐥𑐶𑑄 𑑗 𑐪 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑐣𑐶𑐐𑐸 𑐁𑐟𑑂𑐩𑐵𑐫𑐵 𑐔𑐷𑐬 𑐱𑐵𑐣𑑂𑐟𑐶𑐫𑐵 𑐎𑐵𑐩𑐣𑐵 𑐫𑐵𑐳𑐾𑑄 𑑑 𑐩𑐶𑐣𑐾𑐚 𑐩𑑁𑐣𑐢𑐵𑐬𑐞 𑐣𑑄 𑐫𑐵𑑅𑐐𑐸 𑐏𑑅 𑑋