𑐣𑑂𑐫𑐫𑑂𑐡𑐰𑑅 𑐰𑐶𑐖𑑂𑐘𑐥𑐶𑑄𑐎𑐾 𑐳𑐸𑐗𑐵𑐰 𑐳𑐒𑑂𑐎𑐮𑐣 𑐫𑐵𑐂𑐐𑐸

𑐰𑐶𑐡𑑂𑐫𑐵𑐮𑐫 𑐟𑐴𑐫𑐵 𑐬𑐵𑐲𑑂𑐚𑑂𑐬𑐶𑐫 𑐥𑐵𑐛𑑂𑐫𑐎𑑂𑐬𑐩 𑐥𑑂𑐬𑐵𑐬𑐸𑐥 𑐥𑐸𑐣𑐬𑐵𑐰𑐮𑑀𑐎𑐣 𑐎𑐵𑐬𑑂𑐫𑐡𑐮𑑄 𑐥𑐵𑐛𑑂𑐫𑐎𑑂𑐬𑐩 𑐳𑐸𑐢𑐵𑐬 𑐫𑐵𑐫𑐾𑐟 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐠𑐷 𑐠𑐷 𑑕𑑐 𑐡𑑂𑐰𑑅 𑐰𑐶𑐖𑑂𑐘𑐥𑐶𑑄𑐎𑐾 𑐳𑐸𑐗𑐵𑐰 𑐳𑐒𑑂𑐎𑐮𑐣 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋
𑐱𑐿𑐎𑑂𑐲𑐶𑐎 𑐡𑑃 𑑒𑑐𑑘𑑐 𑐣𑐶𑐳𑐾𑑄 𑐬𑐵𑐲𑑂𑐚𑑂𑐬𑐶𑐫 𑐥𑐵𑐛𑑂𑐫𑐎𑑂𑐬𑐩 𑐥𑑂𑐬𑐵𑐬𑐹𑐥 𑑒𑑐𑑗𑑖 𑐫𑐵 𑐣𑑂𑐫𑐵𑐡𑑃𑐫𑐵 𑐔𑐎𑑂𑐬 𑐥𑐹𑐰𑑄𑐐𑐸𑐮𑐶𑑄 𑐥𑐵𑐛𑑂𑐫𑐎𑑂𑐬𑐩 𑐥𑐸𑐣𑐬𑐵𑐰𑐮𑑀𑐎𑐣 𑐫𑐵𑐫𑐾𑐟𑑂𑐫𑑄𑐐𑐸𑐮𑐶𑑄 𑐰𑐶𑐖𑑂𑐘𑐥𑐶𑐣𑐶𑐐𑐸 𑐳𑐸𑐗𑐵𑐰 𑐩𑐸𑑄𑐎𑐾𑐟𑑂𑐫𑑄𑐐𑐸 𑐏𑑅 𑑋
𑐱𑐶𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐬𑐵𑐲𑑂𑐚𑑂𑐬𑐶𑐫 𑐀𑐨𑐶𑐫𑐵𑐣 𑑙𑐊𑐣𑐳𑐶𑐂𑑐 𑐣𑐾𑐥𑐵𑐮𑑄 𑐠𑑁𑑄 𑐐𑑂𑐰𑐳𑐵𑑅𑐐𑑂𑐰𑑅𑐐𑐸 ‘𑐰𑐶𑐡𑑂𑐫𑐵𑐮𑐫 𑐟𑐴𑐫𑐵 𑐥𑐵𑐛𑑂𑐫𑐎𑑂𑐬𑐩 𑐥𑐸𑐣𑐬𑐵𑐰𑐮𑑀𑐎𑐣 𑑅 𑐳𑐬𑑀𑐎𑐵𑐬𑐰𑐵𑐮𑐵𑐟𑐫𑑂𑐐𑐸 𑐡𑐺𑐲𑑂𑐚𑐶𑐎𑑀𑐞 𑐰 𑐳𑐸𑐗𑐵𑐰’ 𑐰𑐶𑐲𑐫𑐫𑐵 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐎𑐵𑐬𑑂𑐫𑐡𑐮𑐫𑐵 𑐎𑐖𑐶 𑐜𑐵 𑐧𑐵𑐮𑐔𑐣𑑂𑐡𑑂𑐬 𑐮𑐸𑐂𑑃𑐚𑐾𑐮𑑄 𑐎𑐵𑐬𑑂𑐫𑐫𑑀𑐖𑐣𑐵𑐎𑐠𑑄 𑐩𑐸𑐏𑑂𑐫 𑑑𑑒 𑐐𑐹 𑐰𑐶𑐲𑐫𑐐𑐟 𑐏𑑂𑐫𑑅 𑐰 𑐳𑐩𑐶𑐟𑐶 𑐐𑐛𑐣 𑐫𑐵𑐣𑐵𑑅 𑐰𑑂𑐫𑐵𑐥𑐎 𑐳𑐸𑐗𑐵𑐰 𑐳𑐒𑑂𑐎𑐮𑐣 𑐫𑐵𑐫𑐾𑐐𑐸 𑐢𑐫𑐵𑐡𑐶𑐮 𑑋
𑐎𑐖𑐶 𑐜𑐵 𑐮𑐸𑐂𑑃𑐚𑐾𑐮𑑄 𑐳𑐎𑑂𑐲𑐩𑐟𑐵, 𑐰𑑂𑐫𑐵𑐰𑐳𑐵𑐫𑐶𑐎 𑐮𑐶𑐳𑐾𑑄 𑐥𑑂𑐬𑐵𑐰𑐶𑐢𑐶𑐎 𑐱𑐶𑐎𑑂𑐲𑐵, 𑐳𑑂𑐠𑐵𑐣𑐷𑐫 𑐖𑑂𑐘𑐵𑐣, 𑐩𑐵𑐣𑐰 𑐩𑐹𑐹𑐮𑑂𑐫 𑐰 𑐣𑐿𑐟𑐶𑐎 𑐱𑐶𑐎𑑂𑐲𑐵, 𑐎𑐮𑐵, 𑐎𑐵𑐳𑐵, 𑐳𑑂𑐰𑐵𑐳𑑂𑐠𑑂𑐫, 𑐳𑐩𑐵𑐰𑐾𑐱𑐷𑐎𑐬𑐞, 𑐰𑐶𑐥𑐡𑑂 𑐰𑑂𑐫𑐰𑐳𑑂𑐠𑐵𑐥𑐣, 𑐩𑐵𑐟𑐺𑐨𑐵𑐲𑐵 𑐱𑐶𑐎𑑂𑐲𑐞 𑐰𑐶𑐢𑐶, 𑐩𑐹𑐮𑑂𑐫𑐵𑐒𑑂𑐎𑐣 𑐥𑐡𑑂𑐢𑐟𑐶, 𑐥𑐵𑐛𑑂𑐫𑐎𑑂𑐬𑐩 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐰𑐶𑐲𑐫𑐫𑑂 𑐳𑐸𑐗𑐵𑐰 𑐳𑐒𑑂𑐎𑐮𑐣 𑐫𑐵𑐣𑐵𑑅 𑐐𑐸𑐮𑐵𑐫𑐵 𑐡𑐸𑐣𑐾 𑐥𑐵𑐛𑑂𑐫𑐎𑑂𑐬𑐩𑐫𑐵 𑐳𑑂𑐰𑐬𑐸𑐥 𑐟𑐫𑐵𑐬 𑐫𑐵𑐫𑐾𑐐𑐸 𑐢𑐫𑐵𑐡𑐶𑐮 𑑋
𑐬𑐵𑐲𑑂𑐚𑑂𑐬𑐶𑐫 𑐥𑐵𑐛𑑂𑐫𑐎𑑂𑐬𑐩 𑐰𑐶𑐎𑐵𑐳 𑐮𑐶𑐳𑐾𑑄 𑐩𑐹𑐮𑑂𑐫𑐵𑐒𑑂𑐎𑐣 𑐥𑐬𑐶𑐲𑐡𑑂𑐫𑐵 𑐰𑑄𑐐𑐸 𑐰𑐿𑐱𑐵𑐏 𑑑𑑑 𑐐𑐟𑐾 𑐱𑐶𑐎𑑂𑐲𑐵 𑐮𑐶𑐳𑐾𑑄 𑐏𑐾𑐮𑐎𑐸𑐡𑐩𑐣𑑂𑐟𑑂𑐬𑐷 𑐳𑐳𑑂𑐩𑐶𑐟 𑐥𑑀𑐏𑐬𑐾𑐮𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐖𑐹𑐐𑐸 𑑙𑑘 𑐎𑑂𑐰𑑅𑐐𑐸 𑐧𑐿𑐛𑐎𑑄 𑐎𑐵𑐛𑐩𑐵𑐜𑑁𑑃 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 ‘𑐳𑑂𑐎𑐸𑐮 𑐀𑐦 𑐊𑐖𑐸𑐎𑐾𑐳𑐣’ 𑐫𑐵 𑐜𑐷𑐣 𑐥𑑂𑐬𑐵 𑐜𑐵 𑐮𑐸𑐂𑑃𑐚𑐾𑐮𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐎𑐵𑐬𑑂𑐫𑐡𑐮 𑐐𑐛𑐣 𑐫𑐵𑑅𑐐𑐸 𑐏𑑅 𑑋
𑐎𑐵𑐬𑑂𑐫𑐡𑐮𑐫𑐵 𑐡𑐸𑐖𑑅 𑐜𑐵 𑐩𑐷𑐣𑐵𑐎𑑂𑐲𑐷 𑐡𑐵𑐴𑐵𑐮𑑄 𑐰𑑅𑐐𑐸 𑐳𑐸𑐗𑐵𑐰𑐫𑐵𑐟 𑐣𑐵𑐮𑐵𑐎𑐵𑐫𑐾𑐐𑐸 𑐢𑐫𑐵𑐡𑐶𑐮 𑑋 𑐱𑐶𑐎𑑂𑐲𑐵𑐰𑐶𑐡𑑂 𑐜𑐵 𑐰𑐶𑐡𑑂𑐫𑐵𑐣𑐵𑐠 𑐎𑑀𑐂𑐬𑐵𑐮𑐵𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐳𑑂𑐰𑐟𑐣𑑂𑐟𑑂𑐬 𑐰 𑐳𑐺𑐖𑐣𑐱𑐷𑐮 𑐖𑐸𑐂𑐎𑐾𑐟 𑐥𑐵𑐛𑑂𑐫𑐎𑑂𑐬𑐩𑑄 𑐧𑑅 𑐧𑐶𑐂𑐩𑐵𑑅 𑐢𑐫𑐵𑐡𑐶𑐮 𑑋
𑐥𑑂𑐬𑐵𑐖𑑂𑐘 𑐰𑐶𑐩𑐮 𑐦𑐸𑐫𑐵𑑃𑐮𑑄 𑐖𑑂𑐘𑐵𑐣 𑐟𑑅𑐢𑑄 𑐖𑐹𑐐𑐸𑐮𑐶𑑄 𑐡𑐾𑐫𑑂 𑐣𑐶𑐬𑑂𑐩𑐵𑐞𑐫𑐵 𑐁𑐢𑐵𑐬𑐱𑐶𑐮𑐵𑐫𑑂 𑐥𑐵𑐛𑑂𑐫𑐎𑑂𑐬𑐩𑑄 𑐧𑑅 𑐧𑐶𑐂𑐩𑐵𑑅 𑐢𑐫𑐵𑐡𑐶𑐮 𑑋 𑐥𑐵𑐛𑑂𑐫𑐎𑑂𑐬𑐩 𑐰𑐶𑐎𑐵𑐳 𑐎𑐾𑐣𑑂𑐡𑑂𑐬𑐫𑐵 𑐣𑐶𑐬𑑂𑐡𑐾𑐱𑐎 𑐰𑐶𑐖𑐫𑐬𑐵𑐖 𑐧𑐜𑐹𑑄 𑐥𑐵𑐛𑑂𑐫𑐎𑑂𑐬𑐩, 𑐥𑐵𑐛𑑂𑐫𑐥𑐸𑐳𑑂𑐟𑐎, 𑐱𑐶𑐎𑑂𑐲𑐎 𑐟𑐵𑐮𑐶𑐩, 𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐀𑐣𑐸𑐐𑐩𑐣 𑐰 𑐩𑐹𑐮𑑂𑐫𑐵𑐒𑑂𑐎𑐣 𑐧𑐶𑐳𑑂𑐎𑑄𑐧𑐶𑐳𑑂𑐎𑑄 𑐣𑐶𑐎𑐵𑐫𑐥𑐵𑐏𑐾𑑄 𑐖𑐸𑐂𑐐𑐸 𑐳𑑂𑐠𑐶𑐟𑐶 𑐡𑐹𑐐𑐸𑐮𑐶𑑄 𑐥𑐵𑐛𑑂𑐫𑐎𑑂𑐬𑐩𑐫𑐵 𑐁𑐖𑑂𑐖𑐸𑐂 𑐠𑑂𑐫𑑄𑐎𑐾𑐟 𑐴𑐵𑐠𑑂𑐫𑐵 𑐏𑐣𑐾𑐡𑐹𑐐𑐸 𑐢𑐫𑐵𑐡𑐶𑐮 𑑋
𑐱𑐶𑐎𑑂𑐲𑐵 𑐰𑐶𑐱𑑂𑐮𑐾𑐲𑐎 𑐚𑐷𑐎𑐵 𑐨𑐚𑑂𑐚𑐬𑐵𑐃𑑄 𑐱𑐶𑐎𑑂𑐲𑐵 𑐳𑑂𑐫𑑄𑐐𑐸𑐫𑐵 𑐡𑑂𑐰𑐥𑑄 𑐎𑐾𑐰𑐮 𑐥𑐵𑐛𑑂𑐫𑐎𑑂𑐬𑐩𑐫𑐵𑐟 𑐧𑐶𑐂 𑐩𑐖𑑂𑐫𑐹 𑐢𑐫𑐵𑐡𑐶𑐮 𑑋 𑐱𑐶𑐎𑑂𑐲𑐵 𑐮𑐶𑐳𑐾𑑄 𑐏𑐾𑐮𑐎𑐸𑐡 𑐩𑐣𑑂𑐟𑑂𑐬𑐵𑐮𑐫𑐫𑐵 𑐥𑐹𑐬𑑂𑐰𑐳𑐔𑐶𑐰 𑐡𑐷𑐥𑐾𑐣𑑂𑐡𑑂𑐬𑐰𑐶𑐎𑑂𑐬𑐩 𑐠𑐵𑐥𑐵𑑄 𑐥𑐵𑐛𑑂𑐫𑐎𑑂𑐬𑐩𑐫𑑂 𑐖𑐵𑐟𑐷𑐫 𑐰𑐶𑐨𑐾𑐡 𑐎𑑂𑐫𑐣𑐷𑐐𑐸 𑐡𑐳𑐸 𑐮𑐶𑐎𑐵𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋
𑐡𑐮𑐶𑐟 𑐐𑐿𑐬𑐳𑐬𑐎𑐵𑐬𑐷 𑐳𑑄𑐳𑑂𑐠𑐵 𑐩𑐴𑐵𑐳𑐒𑑂𑐑𑐫𑐵 𑐣𑐵𑐫𑑅 𑐖𑐶𑐧𑐷 𑐰𑐶𑐱𑑂𑐰𑐎𑐬𑑂𑐩𑐵𑑄 𑐥𑐵𑐛𑑂𑐫𑐎𑑂𑐬𑐩𑐫𑑂 𑐖𑐵𑐟𑐶𑐫 𑐰𑐶𑐨𑐾𑐡𑐫𑐵 𑐡𑐳𑐸 𑐰𑐂𑐐𑐸 𑐳𑑂𑐠𑐶𑐟𑐶 𑐧𑐶𑐂 𑐩𑐖𑑂𑐫𑐹𑐐𑐸 𑐎𑐣𑐵𑐡𑐶𑐮 𑑋 𑐣𑐾𑐥𑐵𑐮 𑐱𑐶𑐎𑑂𑐲𑐎 𑐩𑐴𑐵𑐳𑐒𑑂𑐑𑐫𑐵 𑐣𑐵𑐫𑑅 𑐮𑐎𑑂𑐲𑑂𑐩𑐷𑐎𑐶𑐱𑑀𑐬 𑐳𑐸𑐰𑐾𑐡𑐷𑑄 𑐎𑐵𑐬𑑂𑐫𑐡𑐮𑐫𑑂 𑐡𑐸𑐩𑐠𑑂𑐫𑐵𑐎𑐹𑐐𑐸𑐮𑐶𑑄 𑐀𑐳𑐣𑑂𑐟𑐸𑐲𑑂𑐚𑐶 𑐥𑑂𑐰𑑄𑐎𑐵𑐡𑐶𑐮 𑑋

𑐎𑐵𑐬𑑂𑐫𑐡𑐮𑐫𑐵 𑐡𑐸𑐖𑐮𑐫𑑂 𑐜𑐵 𑐮𑐾𑐏𑐣𑐵𑐠 𑐥𑑁𑐜𑐾𑐮, 𑐜𑐵 𑐀𑐩𑐶𑐣𑐵 𑐳𑐶𑑄𑐴, 𑐥𑐰𑐶𑐟𑑂𑐬𑐧𑐴𑐵𑐡𑐸𑐬 𑐐𑑁𑐟𑐩, 𑐜𑐵 𑐥𑑂𑐬𑐩𑑀𑐡 𑐨𑐚𑑂𑐚, 𑐖𑑂𑐘𑐵𑐣𑐾𑐣𑑂𑐡𑑂𑐬 𑐩𑐮𑑂𑐮, 𑐳𑐵𑐐𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐬𑐷𑐔𑐵 𑐣𑑂𑐫𑑁𑐥𑐵𑐣𑐾, 𑐬𑐾𑐰𑐟𑐷 𑐎𑐵𑐬𑑂𑐎𑐷 𑐰 𑐡𑐸𑐖𑑅𑐕𑑂𑐫𑐵𑐘𑑂𑐖𑐾 𑐥𑐡𑐫𑑂 𑐥𑐵𑐛𑑂𑐫𑐎𑑂𑐬𑐩 𑐰𑐶𑐎𑐵𑐳 𑐎𑐾𑐣𑑂𑐡𑑂𑐬𑐫𑐵 𑐩𑐴𑐵𑐣𑐶𑐬𑑂𑐡𑐾𑐱𑐎 𑐫𑐸𑐰𑐬𑐵𑐖 𑐥𑑁𑐜𑐾𑐮 𑐡𑐸 𑑋