𑐣𑐾𑐰𑐵𑑅 𑐪𑐳𑐷𑐎𑐵 𑐳𑑄𑐳𑑂𑐎𑐺𑐟𑐶 𑐖𑐎 𑐩𑐏𑐸 𑐨𑐵𑐲𑐵 𑐣𑑄

𑐣𑐾𑐥𑐵𑐮 𑐳𑑄𑐰𑐟𑑂 𑐤𑐹𑐡𑑃𑐫𑐵 𑐄𑐩𑑄𑐐 𑐳𑐎𑐳𑐶𑐫𑐵𑑄 𑐤𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐤𑐹𑐡𑑃 𑐴𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐤𑐵𑐥𑐵 𑐣𑐾𑐰𑐵𑑅𑐟𑐫𑑂𑐐𑐸 𑐡𑐠𑐸𑐂 𑐖𑐎 𑐮𑐶𑐎𑐸𑐣𑐵𑐔𑑂𑐰𑑄𑐐𑐸 𑐏𑑅𑐳𑐵 𑐮𑐶𑐥𑐵 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 ‘𑐨𑐶𑑄𑐟𑐸𑐣𑐵’ 𑐁𑐣𑑂𑐡𑑀𑐮𑐣𑑄 𑐠𑐸𑐎𑐶𑐫𑐵𑐟 𑐡𑐾𑐱𑐧𑑂𑐫𑐵𑐥𑐷 𑐖𑐎 𑐩𑐏𑐸𑐳𑐾𑑄 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐳𑑂𑐟𑐬𑐫𑑂 𑐴𑐾 𑐠𑑂𑐫𑑄𑐎𑐵 𑐧𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂𑐳𑑄 𑐴𑐣𑐷𑐐𑐸 𑐳𑑂𑐰𑐣𑑂𑐟𑐶 𑐣𑐏𑑅𑐫𑐵 𑐡𑐸𑐣𑐾 𑐪𑐥𑐸𑐖𑐵 𑐎𑐸𑐤𑐸 𑐴𑐣𑐷𑐐𑐸 𑐠𑐸𑐐𑐸 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐤𑐹𑐡𑑃𑐫𑐵 𑐮𑐳𑐟𑐵 𑐳𑐎𑐮 𑐣𑐾𑐥𑐵𑑅𑐩𑐶𑐟𑐫𑑂𑐐𑐸 𑐁𑐟𑑂𑐩 𑐐𑑁𑐬𑐰𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐣𑐏𑑅 𑐖𑐸𑐫𑐵 𑐧𑐶𑐄𑐐𑐸 𑐡𑐸 𑑋

𑐄𑐩𑑄𑐐 𑐰 𑐄𑐟𑑂𑐳𑐵𑐴𑐫𑐵 𑐥𑐬𑑂‍𑐰 𑐖𑐸𑐫𑐵 𑐧𑐶𑐄𑐐𑐸 𑐡𑐸 𑑋 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐤𑐹𑐡𑑃 𑐴𑐣𑐷𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐕𑐐𑐹 𑐂𑐮𑐫𑑂 𑐬𑐵𑐖𑑂𑐫𑑄 ‘𑐰𑐶𑐏𑐞𑑂𑐜𑐣𑐰𑐵𑐡𑐷’ 𑐢𑐎𑐵𑑅 𑐡𑐩𑐣 𑐫𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐠𑐵𑐳𑐫𑑂 𑐁𑑅 𑐳𑐬𑐎𑐵𑐬 𑐥𑑂𑐬𑐩𑐸𑐏 𑐴𑐾 𑐥𑑂𑐬𑐩𑐸𑐏 𑐀𑐟𑐶𑐠𑐶𑐎𑐠𑑄 𑐰𑐫𑐵𑑅 𑐠𑐸𑐎𑐶𑐫𑐵 𑐰𑐶𑐱𑐾𑐲 𑐳𑐩𑐵𑐬𑑀𑐴𑐫𑐵𑐟 𑐳𑐩𑑂𑐧𑑀𑐢𑐣 𑐫𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐀𑐨𑐶𑐫𑐵𑐣𑐫𑐵 𑐄𑐥𑐮𑐧𑑂𑐢𑐶𑐎𑐠𑑄 𑐣𑑄 𑐎𑐵𑐫𑐾𑐐𑐸 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐰𑐵𑑅𑐟 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐎 𑐩𑐏𑐸𑐳𑐾𑑄 𑐣𑐾𑐥𑐵𑑅 𑐬𑐵𑐲𑑂𑐚𑑂𑐬𑐫𑐵𑐟 𑐰𑐶𑐱𑑂𑐰𑐫𑑂 𑐧𑐶𑐳𑑂𑐎𑑄 𑐥𑐴𑐶𑐔𑐵𑐣 𑐧𑐶𑐫𑐵𑑅 𑐠𑑅𑐥𑐶𑐣𑐶𑐐𑐸 𑐪𑐳𑐷𑐎𑐵 𑐰𑐶𑐱𑑂𑐰𑐫𑑂 𑐧𑐫𑑂𑐧𑐫𑑂 𑐫𑐵𑐫𑐾𑐦𑐸𑐐𑐸 𑐖𑐵𑐟𑐶 𑐏𑑅 𑑋 𑐣𑐾𑐰𑐵𑑅𑐟 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐹𑐐𑐸 𑐎𑐵𑐬𑐞𑑄 𑐴𑐾 𑐄𑐩𑐶𑐐𑐸 𑐴𑐬𑐾𑐎 𑐎𑐺𑐟𑐶 𑐬𑐵𑐲𑑂𑐚𑑂𑐬𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐖𑐸𑐮 𑑋 𑐣𑐾𑐥𑐵𑑅 𑐬𑐵𑐲𑑂𑐚𑑂𑐬𑐫𑐵 𑐣𑐵𑐩𑐫𑑂 𑐠𑑅𑐥𑐶𑐣𑑂𑐟 𑐳𑑂𑐰𑐵𑐣𑐵𑑅 𑐠𑑅𑐥𑐶𑐣𑐶𑐐𑐸 𑐁𑐟𑑂𑐩𑐷𑐫 𑐐𑑁𑐬𑐰 𑐧𑑂𑐰𑐮𑑄𑐎𑐾𑐟 𑐟𑐵𑑅𑐮𑐵𑑅𑐥𑐶𑑄 𑐣𑐾𑐰𑐵𑑅𑐟 𑐴𑐾 𑐖𑐸𑐫𑐵𑐔𑑂𑐰𑐣 𑑋

𑐄𑐎𑐶 𑐴𑐾 𑐂𑐩𑐶𑐳𑑄 𑐯𑐵𑐂𑐐𑐸 𑐨𑐵𑐫𑑂 𑐣𑐾𑐥𑐵𑐮𑐨𑐵𑐲𑐵, 𑐂𑐩𑐶𑐳𑑄 𑐔𑑂𑐰𑐂𑐐𑐸 𑐮𑐶𑐥𑐶 𑐣𑐾𑐥𑐵𑐮 𑐮𑐶𑐥𑐵 𑐀𑐮𑐾 𑐂𑐩𑐶𑐳𑑄 𑐕𑑂𑐫𑐮𑐷𑐐𑐸 𑐳𑑄𑐰𑐟𑑂 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐣𑐵𑐩𑑄 𑐏𑑂𑐫𑐵𑐟𑐷 𑐎𑐫𑐵𑐔𑑂𑐰𑐣 𑑋 𑐟𑐬 𑐃𑐫𑐵 𑐀𑐣𑑂𑐟𑐬𑐵𑐮 𑐮𑐶𑐳𑐾𑐮𑐶𑐳𑐾𑑄 𑐠𑐸𑐎𑐷 𑐣𑑄 𑐕𑐸𑑄 𑐴𑐶𑐄𑐥𑐵𑑅 𑐰𑐫𑐵𑐔𑑂𑐰𑑄𑐐𑐸 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋 𑐄𑐎𑐠𑑄 𑐴𑐾 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐳𑑂𑐰𑐫𑐩𑑂 𑐳𑑂𑐰𑐵𑐨𑐶𑐩𑐵𑐣𑐫𑐵 𑐎𑐩𑐷𑐫𑐵 𑐎𑐵𑐬𑐞𑑄 𑐠𑐸𑐎𑐶𑐫𑐵 𑐩𑐴𑐟𑑂𑐟𑐵 𑐠𑐸𑐂𑐎𑐾 𑐩𑐦𑐫𑐵𑑅 𑐠𑐸𑐥𑐶𑑄 𑐦𑐸𑐎𑑂𑐎𑑄 𑐴𑐾 𑐧𑐸𑐮𑐸𑐴𑐸𑑃 𑐧𑐸𑐮𑐸𑐴𑐸𑑃 𑐢𑑂𑐫𑐵𑐎𑐸𑑄𑐔𑐵𑐫𑑂 𑐮𑐵𑑅𑐰𑑄𑐐𑐸 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋

𑐣𑐾𑐰𑐵𑑅 𑐮𑐶𑐥𑐶, 𑐨𑐵𑐲𑐵, 𑐳𑑄𑐰𑐟𑑂𑐫𑐵 𑐩𑐴𑐶𑐩𑐵 𑐤𑑄𑐎𑐾𑐐𑐸 𑐖𑑂𑐫𑐵𑐫𑑂 𑐬𑐵𑐖𑑂𑐫𑐵 𑐣𑐷𑐟𑐶𑐫𑐵 𑐯𑐵𑑅 𑐡𑐸𑐐𑐸 𑐮𑐵 𑐖𑐸 𑐴𑐾 𑐖𑐸𑐮, 𑐟𑐬 𑐠𑐸𑐎𑐶𑐫𑐵 𑐳𑐩𑑂𑐧𑐣𑑂𑐢𑐶𑐟 𑐥𑐎𑑂𑐲𑐟, 𑐳𑑂𑐰𑐵𑐩𑐶𑐟𑑂𑐰 𑐎𑐫𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐢𑑂𑐫𑐵𑐣 𑐣𑑄 𑐩𑐰𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐠𑐸𑐎𑐶𑐫𑐵 𑐎𑐵𑐬𑐞𑑄 𑐣𑐾𑐰𑐵𑑅𑐟𑐫𑑂 𑐥𑐸𑐬𑑂‍𑐏𑐵𑑄 𑐣𑐷𑐳𑑂𑐰𑐣𑐵 𑐠𑐎𑐹𑐐𑐸 𑐁𑐥𑐵𑐮𑑄 𑐳𑐩𑑂𑐥𑐡𑐵, 𑐳𑑄𑐳𑑂𑐎𑐺𑐟𑐶 𑐤𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐮𑑂𑐫𑑄 𑐡𑐣𑐶𑐐𑐸 𑐳𑐩𑑂𑐥𑐡𑐵, 𑐳𑑄𑐳𑑂𑐎𑐺𑐟𑐶 𑐥𑑂𑐬𑐷𑐟 𑐣𑑄 𑐣𑐾𑐰𑐵𑑅𑐟𑐫𑑂𑐳𑑄 𑐐𑐬𑑂‍𑐰 𑐫𑐵𑐫𑐾 𑐩𑐦𑐸𑐐𑐸 𑐎𑐵𑐬𑐞𑑄 𑐠𑑂𑐰 𑐪𑑀 𑐖𑐸𑐖𑐸𑑄 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐰𑐵𑑅𑐟𑐫𑑂𑐐𑐸 𑐁𑐡𑐶𑐨𑐹𑐩𑐶 𑐳𑑂𑐰𑐣𑐶𑐐𑑅 𑐏𑑅 𑑋 𑐁𑑅 𑐣𑐾𑐰𑐵𑑅𑐟 𑐡𑐾𑐫𑑂𑐣𑑂𑐫𑑄𑐎𑑄 𑐖𑐎 𑐩𑐏𑐸, 𑐰𑐶𑐱𑑂𑐰𑐫𑐵 𑐎𑐸𑑄𑐎𑐸𑐮𑐵𑐩𑐫𑑂 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐣𑐾𑐥𑐵𑑅 𑐡𑐸𑐣𑐾 𑐴𑐾 𑐣𑑄 𑐧𑐳𑐵𑐂𑑃 𑐳𑐬𑐾 𑐖𑐸𑐫𑐵𑐰𑑄𑐥𑐶𑑄 𑐣𑐾𑐰𑐵𑑅𑐟 𑐀𑐣𑐫𑐵 𑐳𑑂𑐠𑐵𑐣𑐷𑐫 𑐬𑐴𑐣𑐳𑐴𑐣𑐥𑐵𑐏𑐾𑑄 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵𑑅 𑐨𑐵𑐫𑑂 𑐯𑐵𑐫𑐾𑐐𑐸 𑐟𑑂𑐰𑑅𑐟𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐣𑐾𑐰𑐵𑑅 𑐨𑐵𑐫𑑂 𑐩𑐠𑐹𑐥𑐶𑑄 𑐣𑐾𑐰𑐵𑑅𑐟 𑐣𑐾𑐥𑐵𑑅 𑐡𑐸𑐣𑐾 𑐴𑐾 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐟𑐠𑑂𑐫𑐵𑑄𑐎 𑐥𑐶𑐡𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐗 𑐠𑐸𑐥𑐶𑑄 𑐩𑐾𑐩𑐾𑐐𑐸 𑐖𑐵𑐟𑐶𑐫𑐵 𑐳𑑄𑐳𑑂𑐎𑐺𑐟𑐶, 𑐢𑐬𑑂‍𑐩, 𑐎𑐮𑐵 𑐰 𑐬𑐴𑐣𑐳𑐴𑐣𑐥𑐵𑐏𑐾𑑄 𑐥𑑂𑐬𑐨𑐵𑐰𑐶𑐟 𑐖𑐸𑐫𑐵𑑅 𑐠𑑅𑐥𑐶𑐣𑐶𑐐𑐸 𑐩𑑁𑐮𑐶𑐎 𑐬𑐶𑐟𑐶𑐠𑐶𑐟𑐶, 𑐣𑐏𑑅𑐔𑐏𑑅 𑐴𑐣𑐾𑐐𑐸 𑐳𑑄𑐳𑑂𑐎𑐺𑐟𑐶 𑐣𑑄 𑐮𑑂𑐰𑑅𑐩𑑄𑐎𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐠𑐸𑐥𑐶𑑄 𑐠𑑅𑐥𑐶𑑄𑐟 𑐣𑐾𑐰𑐵𑑅 𑐏𑑅 𑐢𑐵𑐫𑐾𑐎𑐾𑐐𑐸 𑐐𑐬𑑂‍𑐰 𑐮𑑂𑐫𑑄𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐣𑐾𑐰𑐵𑑅 𑐪𑐳𑐷𑐎𑐵𑐫𑐵 𑐀𑐣𑐾𑐎 𑐎𑐮𑐵 𑐳𑑄𑐳𑑂𑐎𑐺𑐟𑐶 𑐰 𑐣𑐏𑑅𑐔𑐏𑑅 𑐴𑐣𑐵𑑅 𑐠𑐸𑐩𑐶𑐳𑑄 𑐠𑑅𑐥𑐶𑑄𑐟 𑐣𑐾𑐰𑐵𑑅 𑐢𑐎𑐵𑑅 𑐩𑐾𑐩𑐾𑐐𑐸 𑐳𑐩𑐸𑐡𑐵𑐫 𑐡𑐸𑐣𑐾 𑐪𑐳𑐷𑐎𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑑂𑐰𑐣𑐶𑐐𑑅 𑐮𑐐𑐵𑐫𑐟 𑐡𑐾𑐱 𑐰 𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐪𑐳𑐷𑐎𑐵 𑐥𑐶𑐟 𑐧𑐷𑐐𑐸 𑐣𑐶𑑄𑐟𑐶𑑄 𑐣𑐾𑐰𑐵𑑅 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐤𑑂𑐫𑐧𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑅𑐥𑐶𑐣𑐶𑐐𑐸 𑐩𑑁𑐮𑐶𑐎 𑐨𑐵𑐫𑑂 𑐣𑐾𑐰𑐵𑑅 𑐨𑐵𑐫𑑂 𑐕𑑂𑐫𑐮𑐾𑐟 𑐟𑐵𑑅𑐩𑐮𑐵𑑅𑐳𑐵𑑄 𑐠𑑅𑐥𑐶𑑄 𑐣𑐾𑐰𑐵𑑅 𑐖𑐹𑐐𑐸𑐫𑐵 𑐐𑐬𑑂‍𑐰 𑐴𑐾 𑐀𑐖𑑂𑐫𑐵𑑅𑐐𑐸 𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵 𑐣𑐵𑐮𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑅𑐥𑐶𑐣𑐶𑐐𑐸 𑐧𑐶𑐳𑑂𑐎𑑄𑐫𑐵 𑐪𑐳𑐷𑐎𑐵 𑐥𑐶𑐟 𑐧𑐶𑐫𑐵𑑅 𑐠𑑅𑐥𑐶𑐣𑐶𑐐𑐸 𑐩𑑁𑐮𑐶𑐎 𑐳𑑄𑐳𑑂𑐎𑐺𑐟𑐶 𑐡𑐸𑐣𑐾 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐤𑑂𑐫𑐧𑑂𑐰𑐫𑐵𑑅 𑐠𑑅𑐥𑐶𑑄 𑐥𑑂𑐬𑐵𑐔𑐷𑐣 𑐖𑐵𑐟𑐶𑐫𑐵𑐥𑐶𑑄 𑐩𑐣𑐹𑐟 𑐏𑑅 𑐢𑐫𑐵𑐐𑐸 𑐎𑑂𑐫𑐣𑐾𑐐𑐸 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑁𑑄𑐎𑐤𑐫𑑂𑐫𑐵 𑐡𑐎𑐮𑐾 𑐰𑐶𑐎𑐳𑐶𑐟 𑐡𑐾𑐫𑑂 𑐢𑐫𑐵𑐟𑑅𑐐𑐸 𑐀𑐩𑐾𑐬𑐶𑐎𑐵 𑐡𑐾𑐫𑑂 𑐎𑑀𑐮𑐩𑑂𑐧𑐳𑑄 𑐮𑐸𑐂𑐎𑐾 𑐤𑑂𑐫𑑅 𑐴𑐾 𑐣𑐾𑐥𑐵𑑅 𑐡𑐸𑐣𑐾 𑐎𑐮𑐵 𑐳𑐨𑑂𑐫𑐟𑐵𑑄 𑐖𑐵𑑅𑐐𑐸 𑐫𑐾𑑃, 𑐫𑐮, 𑐏𑑂𑐰𑐥𑐫𑐵 𑐮𑐵𑐫𑑂𑐎𑐹 𑐣𑐶𑐬𑑂‍𑐩𑐵𑐞 𑐖𑐸𑐂𑐢𑐸𑑄𑐎𑐹𑐐𑐸 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋

𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐁𑑅 𑐠𑑅𑐥𑐶𑐣𑐶𑐐𑐸 𑐪𑐳𑐷𑐎𑐵 𑐤𑑂𑐫𑐧𑑂𑐰𑐫𑐾𑐐𑐸 𑐣𑐶𑑄𑐟𑐶𑑄 𑐣𑐾𑐰𑐵𑑅 𑐎𑐮𑐵, 𑐳𑐩𑑂𑐥𑐡𑐵, 𑐬𑐴𑐣𑐳𑐴𑐣, 𑐳𑑄𑐳𑑂𑐎𑐺𑐟𑐶 𑐣𑐏𑑅𑐔𑐏𑑅𑐫𑐵𑐟 𑐩𑐵𑐢𑑂𑐫𑐩𑐎𑐠𑑄
𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮 𑐳𑑄𑐰𑐟𑑂 𑐤𑐹𑐡𑑃𑐫𑐵 𑐮𑐳𑐟𑐵𑐫𑑂 𑐀𑐣𑐾𑐎 𑐄𑐟𑑂𑐳𑐰𑐫𑐵 𑐖𑑂𑐫𑐵𑐗𑑂𑐰𑑅𑐮𑐶𑐳𑐾𑑄 𑐡𑐾𑐱 𑐰𑐶𑐡𑐾𑐱𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐪𑐥𑐸𑐖𑐵 𑐫𑐵𑐫𑐾𑐐𑐸, 𑐳𑑂𑐰𑐣𑑂𑐟𑐶 𑐣𑐏𑑅 𑐗𑑅𑐗𑑅 𑐢𑐵𑐫𑐾𑐎 𑐴𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐗 𑐄𑐮𑐶 𑐖𑐎 𑐩𑐏𑐸, 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐡𑐾𑐱 𑐰𑐶𑐡𑐾𑐱𑐫𑑂 𑐣𑐾𑐰𑐵𑑅𑐟𑐫𑑂𑐳 𑐠𑑅𑐥𑐶𑐣𑐶𑐐𑐸 𑐧𑐶𑐳𑑂𑐎𑑄 𑐪𑐳𑐷𑐎𑐵 𑐤𑑂𑐫𑐧𑑂𑐰𑐫𑐾𑐐𑐸 𑐗𑑂𑐰𑐮𑐫𑑂 𑐠𑐷𑐠𑐷 𑐣𑐏𑑅𑐔𑐏𑑅 𑐴𑐣𑐾𑐐𑐸, 𑐫𑑃𑐫𑐵𑑅𑐫𑐵 𑐂𑐮𑐫𑑂 𑐎𑐸𑐩𑐵𑐬𑐷 𑐬𑐠 𑐳𑐵𑐮𑐾𑐐𑐸, 𑐰 𑐣𑐏𑑅𑐎𑐠𑑄 𑐫𑑅𑐩𑐬𑐶, 𑐩𑐵𑐫𑑂 𑐰𑑅, 𑐔𑐟𑐵𑑄𑐩𑐬𑐶 𑐣𑐫𑐵𑑅 𑐣𑐾𑐰𑐵𑑅 𑐣𑐳𑐵𑐖𑑂𑐰𑐮𑑄𑐫𑐵𑐟 𑐣𑑄 𑐠𑑅𑐥𑐶𑐣𑐶𑐐𑐸 𑐪𑐳𑐷𑐎𑐵 𑐩𑐵𑐢𑑂𑐫𑐩𑐎𑐠𑑄 𑐰𑐶𑐡𑐾𑐱𑐫𑑂 𑐥𑑂𑐬𑐔𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐀𑐟𑐶 𑐮𑐳𑐟𑐵𑐫𑐵 𑐏𑑃 𑐏𑑅 𑑋

𑐠𑐸𑐎𑐷 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐪𑐳𑐷𑐎𑐵 𑐖𑐎 𑐩𑐏𑐸𑐳𑐾𑑄 𑐳𑐩𑐐𑑂𑐬𑐎𑐠𑑄 𑐣𑐾𑐥𑐵𑑅 𑐡𑐾𑐫𑑂𑐫𑐵 𑐴𑐾 𑐐𑐬𑐶𑐩𑐵 𑐀𑐥𑑂𑐰𑐫𑐾𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋𑐟𑐬 𑐡𑐾𑐱 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐪𑐳𑐷𑐎𑐵 𑐤𑑂𑐫𑐧𑑂𑐰𑐫𑐾𑐐𑐸 𑐗𑑂𑐰𑐮𑐫𑑂 𑐠𑐸𑐮𑐶𑐩𑐕𑐶 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑐳𑐵𑑄 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵 𑐣𑐾𑐰𑐵𑑅 𑐨𑐵𑐫𑑂 𑐰 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐰𑐶𑐎𑐵𑐳𑐫𑑂 𑐄𑐮𑐶 𑐕𑑂𑐫𑐮𑐵𑐧𑐸𑐮𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾 𑐩𑐡𑐸 𑑋

𑐏𑐫𑑂𑐟 𑐮𑐵 𑐰𑐶𑐡𑐾𑐱𑐫𑑂 𑐔𑑂𑐰𑐣𑐾𑐟 𑐩𑐵𑐟𑐺𑐨𑐹𑐩𑐶 𑐴𑐾 𑐟𑑂𑐰𑑅𑐟𑐵 𑐰𑑄𑐥𑐶𑐳𑑄 𑐩𑐵𑐟𑐺𑐨𑐵𑐲𑐵𑐫𑐵𑐟 𑐕𑐸𑐎𑐶𑐫𑐵 𑐰𑐵𑐳𑑂𑐟𑐵 𑐫𑐵𑐂 𑐢𑐎𑐵𑑅 𑐎𑐸𑑄𑐏𑐶𑐣𑐷𑐥𑐶𑑄 𑐣𑑄 𑐩𑐡𑐸𑐐𑐸 𑐩𑐏𑐸, 𑐟𑐬 𑐠𑑅𑐥𑐶𑐣𑐶𑐐𑐸 𑐪𑐳𑐷𑐎𑐵 𑐮𑑂𑐫𑑄𑐎𑐾𑐟 𑐀𑐥𑐵𑐫𑑂𑐔𑑂𑐰𑐎𑑄 𑐫𑑀𑐐𑐡𑐵𑐣 𑐫𑐵𑐣𑐵𑐔𑑂𑐰𑑄𑐥𑐶𑑄𑐳𑑄 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐰𑐶𑐎𑐵𑐳 𑐰 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐕𑐸 𑐩𑐫𑐵𑐂 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐫𑐾 𑐦𑐂𑐩𑐏𑐸 𑑋 𑐐𑐸𑐮𑐶𑐳𑐶𑐣𑑄 𑐠𑑅𑐥𑐶𑑄 𑐩𑐳𑑂𑐟𑐣𑐵𑐥 𑐣𑐾𑐰𑐵𑑅 𑐨𑐵𑐲𑐵𑑄 𑐏𑑃𑐯𑐵𑐧𑐯𑐵 𑐫𑐵𑐣𑐵 𑐢𑐎𑐵𑑅 𑐐𑐬𑑂‍𑐰 𑐫𑐵𑐣𑐵 𑐖𑐸𑐂, 𑐀𑐗 𑐐𑐸𑐪 𑐐𑐸𑐪𑐾𑐳𑑂𑐫𑐵𑑄 𑐮𑐵 𑐥𑐶𑐣𑐾 𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑑅 𑐣𑑄 𑐣𑐾𑐥𑐵𑐮𑐫𑐵 𑐊𑐦𑐊𑐩𑐥𑐵𑐏𑐾𑑄 𑐰𑐂𑐐𑐸 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐖𑑂𑐫𑐵𑐗𑑂𑐰𑑅 𑐣𑑂𑐫𑐣𑐵𑐔𑑂𑐰𑐣𑐵 𑐢𑐎𑐵𑑅 𑐁𑐟𑑂𑐩𑐳𑐣𑑂𑐟𑐸𑐲𑑂𑐚𑐶 𑐥𑑂𑐰𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐷 𑑋

𑐣𑐾𑐥𑐵𑐮𑐨𑐵𑐲𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐴𑐾 𑐣𑑄 𑐩𑐾𑐩𑐾𑐐𑐸 𑐨𑐵𑐲𑐵 𑐡𑐸𑐠𑑂𑐫𑐵𑐎𑐵𑑅 𑐠𑐷𑐠𑐷 𑐥𑐟𑑂𑐬𑐶𑐎𑐵 𑐥𑐶𑐠𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐣𑑄 𑐳𑐣𑑂𑐟𑐸𑐲𑑂𑐚𑐷𑐫𑐵 𑐏𑑃 𑐏𑑅 𑑋 𑐟𑐬 𑐥𑐶𑐣𑐾 𑐡𑐾𑐱𑐫𑑂 𑐣𑐾𑐰𑐵𑑅𑐨𑐵𑐫𑑂𑐫𑐵 𑐕𑑂𑐫𑐮𑐵𑐧𑐸𑐮𑐵𑐫𑐵𑐟 𑐎𑐫𑐵𑑅 𑐠𑐠𑐾 𑐴𑐾 𑐢𑐵𑐫𑐾𑐦𑐹𑐐𑐸 𑐳𑑂𑐠𑐶𑐟𑐶 𑐩𑐡𑐸𑐣𑐶 𑑋 𑐀𑐗 𑐰𑐶𑐡𑐾𑐱𑐫𑑂 𑐖𑐸𑐂𑐐𑐸 𑐠𑐷𑐠𑐷 𑐣𑐾𑐰𑐵𑑅 𑐖𑑂𑐫𑐵𑐗𑑂𑐰𑑅 𑐰𑐵 𑐩𑑄𑐎𑐵𑑅 𑐪𑐥𑐸𑐖𑐵, 𑐤𑐹𑐡𑑃𑐫𑐵 𑐖𑑂𑐫𑐵𑐗𑑂𑐰𑑅𑐳 𑐣𑐾𑐰𑐵𑑅𑐨𑐵𑐫𑑂𑐫𑐵 𑐧𑑂𑐫𑐵𑐥𑐎 𑐕𑑂𑐫𑐮𑐵𑐧𑐸𑐮𑐵, 𑐪𑑀𑐟𑐶 𑐣𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐡𑐠𑐸𑐂 𑐴𑐾 𑐖𑐎 𑐖𑐹𑐳𑐵𑑄 𑐀𑐥𑑂𑐰𑐫𑐾𑐎𑐵 𑐫𑑄𑐎𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵𑐫𑐵𑐟 𑐥𑐶𑐣𑐾 𑐔𑑂𑐰𑑄𑐥𑐶𑑄 𑐳𑑄𑐳𑑂𑐎𑐺𑐟𑐶𑐥𑑂𑐬𑐾𑐩𑐷 𑐣𑐾𑐰𑐵𑑅𑐟𑐫𑑂𑐳𑑄 𑐰𑐵𑑅𑐔𑐵𑐫𑐾𑐎𑐷𑐐𑐸 𑐰𑐶𑐱𑑂𑐰𑐵𑐳 𑐫𑐵𑐫𑐾 𑑋

𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵𑐟 𑐖𑐎 𑐧𑐫𑑂𑐧𑐫𑑂 𑐫𑐵𑐣𑐵𑑅 𑐤𑑂𑐫𑐧𑑂𑐰𑐫𑐾𑐐𑐸 𑐟𑐬 𑐠𑐸𑐎𑐶𑐫𑐵 𑐴𑐶𑐣𑐹 𑐖𑐸𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐢𑑂𑐫𑐵𑐎𑐸𑐣𑐫𑑂 𑐟𑐫𑐾𑐐𑐸 𑐖𑑂𑐫𑐵 𑐖𑐸𑐮 𑐢𑐵𑑅𑐳𑐵 𑐄𑐎𑐶𑐫𑐵𑐟 𑐣𑐾𑐰𑐵𑑅 𑐪𑐳𑐷𑐎𑐵𑐫𑐵 𑐰𑐶𑐎𑐵𑐳 𑐢𑐵𑐫𑐾𑐐𑐸 𑐳𑑂𑐰𑐫𑐵𑑄 𑐩𑐾𑐎𑐠𑑄 𑐴𑐾 𑐰𑐶𑐱𑑂𑐮𑐾𑐲𑐞 𑐖𑐹𑐰𑐣𑐾 𑐦𑐂𑐐𑐸 𑐳𑐩𑑂𑐨𑐵𑐰𑐣𑐵𑐫𑐵𑐟 𑐮𑑂𑐰𑑅𑐩𑑄𑐎𑐾 𑐦𑐂 𑐩𑐏𑐸 𑑋