𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐱 𑐡𑐫𑐾𑐎𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑑅𑐥𑐶𑑄𑐟 𑐳𑐩𑑂𑐩𑐵𑐣

𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐥𑐶𑐠𑐣𑐾𑐐𑐸 𑐣𑐶𑑄𑐟𑐶𑑄 𑐠𑐷𑐠𑐷 𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄𑐟 𑐔𑑂𑐰𑐕𑐵𑐫𑐵𑐥𑑁 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐳𑑀𑐩𑐰𑐵𑑅 𑐫𑐮𑐫𑐵 𑐎𑐾𑐱𑐰𑐣𑐵𑐬𑐵𑐫𑐞 𑐔𑐸𑐎𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐖𑑂𑐘𑐵𑐣𑐎𑑀𑐱𑐫𑑂 𑐠𑐷𑐠𑐷 𑐔𑑂𑐰𑐳𑐸 𑐔𑑂𑐰𑐫𑐵𑐡𑐷𑐥𑐶𑑄𑐟 𑐎𑐰𑑅 𑐎𑐖𑐶𑐥𑐶𑑄𑐳𑑄 𑐔𑑂𑐰𑐕𑐵𑐫𑐵𑐥𑑁 𑐮𑑅𑐮𑑂𑐴𑐵𑐣𑐵𑐡𑐶𑐮𑐳𑐵 𑐖𑑂𑐘𑐵𑐣𑐎𑑀𑐱 𑐥𑐶𑐠𑐣𑐾𑐐𑐸 𑐣𑐶𑑄𑐟𑐶𑑄 𑐖𑑂𑐫𑐵 𑐫𑐵𑐣𑐵𑐡𑐷𑐥𑐶𑑄 𑐎𑐰𑑅 𑐎𑐖𑐶, 𑐎𑐩𑐶𑐚𑐷𑐫𑐵 𑐡𑐸𑐖𑑅, 𑐳𑐔𑐶𑐰𑐵𑐮𑐫 𑐡𑐸𑐖𑑅, 𑐥𑐬𑐶𑐫𑑀𑐖𑐣𑐵 𑐥𑑂𑐬𑐩𑐸𑐏, 𑐥𑐬𑐶𑐫𑑀𑐖𑐣𑐵 𑐳𑐴𑐵𑐫𑐎𑐥𑐶𑑄𑐟 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐣𑑄 𑐔𑑂𑐰𑐕𑐵𑐫𑐵𑐥𑑁 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐥𑐵𑐏𑐾𑑄 𑐥𑐶𑐡𑑄𑐐𑐸 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐣𑑂𑐫𑐵𑐐𑐹 𑐏𑐞𑑂𑐜𑐫𑑂 𑐥𑐶𑐡𑑄𑐐𑐸 𑐏𑑅 𑑋 𑐠𑐷𑐠𑐷 𑐏𑐞𑑂𑐜𑐫𑐵 𑐎𑐖𑐶𑐥𑐶𑑄 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐄𑐥.𑐥𑑂𑐬𑐵. 𑐩𑐡𑐣𑐳𑐾𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬, 𑐰𑐶𑐱𑑂𑐰 𑐱𑐵𑐎𑑂𑐫 𑐰 𑐱𑐵𑐎𑑂𑐫 𑐳𑐸𑐬𑐾𑐣𑐥𑐶𑑄𑐳𑑄 𑐖𑑂𑐘𑐵𑐣𑐎𑑀𑐱𑐫𑐵 𑐣𑐶𑑄𑐟𑐶𑑄 𑐔𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐥𑐶𑑄 𑐠𑑂𑐫𑑄𑐩𑐠𑑂𑐫𑑄 𑐳𑐕𑐶 𑐰 𑐣𑐷𑐣𑑂𑐫𑐵𑐩𑑂𑐴𑐾𑐳𑐶𑐟 𑐔𑑂𑐰𑐕𑐵𑐫𑐵𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐖𑑂𑐘𑐵𑐣𑐎𑑀𑐱𑐫𑐵 𑐩𑐹 𑐥𑐬𑐶𑐎𑐮𑑂𑐥𑐣𑐵𑐎𑐵𑐬 𑐰 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐖𑑂𑐘𑐵𑐣𑐎𑑀𑐱𑐫𑑂 𑐫𑐎𑑂𑐰 𑐩𑐐𑐵𑑅𑐩𑐔𑐵𑑅 𑐡𑐣𑐶𑐐𑐸, 𑐟𑑂𑐰𑑅𑐦𑐶𑐣𑐵 𑐔𑑂𑐰𑑄𑐐𑐸 𑐡𑐣𑐶𑐐𑐸𑐮𑐶𑑄 𑐄𑐎𑐶𑐫𑐵𑐟 𑐩𑐾𑐩𑐾𑐐𑐸 𑐳𑑄𑐳𑑂𑐎𑐬𑐞𑐫𑑂 𑐎𑑅𑐑𑐵𑐣𑐵 𑐫𑑄𑐎𑐾𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐀𑐠𑐾𑐴𑐾 𑐰𑐫𑑂𑐎𑐮𑑄 𑐁𑑅 𑐥𑐶𑐡𑑄𑐐𑐸 𑐖𑑂𑐘𑐵𑐣𑐎𑑀𑐱𑐫𑑂 𑐕𑐸𑑄 𑐕𑐸𑑄 𑐐𑐮𑑂𑐟𑐷 𑐣𑑄 𑐏𑐣𑐾𑐡𑐸𑐐𑐸𑐮𑐶𑑄 𑐄𑐎𑐶𑐫𑐵𑐟 𑐣𑑄 𑐩𑐾𑐐𑐸 𑐳𑑄𑐳𑑂𑐎𑐬𑐞𑐫𑑂 𑐨𑐶𑑄𑐎𑐵 𑐫𑑄𑐎𑐾𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐣𑐾𑐳𑑄 𑑑𑑑𑑔𑑔 𑐘𑐮𑐵𑐠𑑂𑐰 𑑓, 𑐫𑐾𑑃 𑑋 𑐣𑐾𑐰𑐵𑑅 𑐂𑐣𑑂𑐳𑐵𑐂𑐎𑑂𑐮𑑀𑐥𑐾𑐜𑐶𑐫𑐵𑐎𑐠𑑄 𑐎𑐫𑐵𑐟𑑅𑐐𑐸 ‘𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱’𑐫𑐵 𑐣𑑂𑐫𑐵𑐐𑐹 𑐧𑑂𑐰 𑐣𑐾𑐰𑐵𑑅 𑐳𑐩𑐵𑐖𑐫𑐵 𑐣𑑂𑐫𑐵𑐩𑑂𑐴 𑐰𑐶𑐱𑐶𑐲𑑂𑐚𑐥𑐶𑑄 𑐥𑐵𑐏𑐾𑑄 𑐩𑑄𑐎𑐵𑑅𑐎𑐠𑑄 𑐥𑐶𑐟 𑐧𑐶𑐮 𑑋 𑐎𑑂𑐬𑑀𑐢𑐎𑐮𑐵 𑐱𑐶𑐬𑑀𑐩𑐞𑐶 𑐎𑐵𑐮𑐸 𑐎𑐸𑐩𑑂𑐴𑐵𑑅, 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐰𑐬𑐶𑐲𑑂𑐛 𑐳𑑄𑐐𑐷𑐟𑐎𑐬𑑂𑐩𑐷 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶, 𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐫𑐖𑑂𑐘𑐩𑐵𑐣𑐥𑐟𑐶 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐳𑐸𑐰𑐬𑑂𑐞 𑐔𑐶𑐟𑑂𑐬𑐎𑐵𑐬𑑄 𑐬𑐵𑐲𑑂𑐚𑑂𑐬𑐶𑐫 𑐣𑐵𑐔𑐑𑐬𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑑂𑐘𑐵𑐣𑐎𑑀𑐲𑐫𑐵 𑐠𑐷𑐠𑐷 𑐧𑑂𑐰 𑐥𑐶𑐟𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐘𑐵𑐣𑐎𑑀𑐱𑐫𑐵 ‘𑐣𑐾𑐰𑐵𑑅 𑐩𑑂𑐴𑐳𑐷𑐎𑐵’, ‘𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵’, ‘𑐨𑐵𑐲𑐵, 𑐮𑐶𑐥𑐶 𑐰 𑐳𑐵𑐴𑐶𑐟𑑂𑐫’, ‘𑐩𑑂𑐫𑐾, 𑐧𑐵𑐖𑑄 𑐰 𑐥𑑂𑐫𑐵𑐏𑑄’ 𑐰 ‘𑐱𑐶𑐮𑑂𑐥, 𑐥𑑂𑐬𑐰𑐶𑐢𑐶 𑐰 𑐖𑑂𑐘𑐵𑐣’ 𑐫𑐵𑐣𑐵𑑅 𑐣𑑂𑐫𑐵𑐐𑐹 𑐧𑑂𑐰𑐫𑑂 𑐩𑐸𑐎𑑂𑐎𑑄 𑑒𑑘 𑐳𑐫 𑐥𑐺𑐲𑑂𑐛 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐷 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑃𑐎𑐠𑑄 𑐫𑐾𑑃𑐩𑐣𑐥𑐵𑐫𑐵 𑐄𑐥𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬, 𑐫𑐾𑑃 𑐩𑐣𑐥𑐵𑐫𑐵 𑐄𑐥-𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮, 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐁𑐱𑐵𑐩𑐵𑐣 𑐳𑑄𑐐𑐟𑐥𑐶𑑄𑐳𑑄 𑐣𑐸𑐐𑑅 𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐳𑐦𑐹 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐩𑐶𑑄 𑐡𑐫𑐾𑐎𑐵𑑅 𑐥𑐶𑐠𑑄𑐐𑐸 𑐏𑑅 𑑋

𑐖𑑂𑐘𑐵𑐣𑐎𑑀𑐱𑐫𑐵 𑐡𑐫𑐾𑐎𑐾𑐐𑐸 𑐖𑑂𑐫𑐵𑐫𑐵 𑐧𑐵𑐬𑐾 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐖𑐶𑐩𑐶𑐳𑑄 𑐠𑑂𑐰 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐧𑐮𑐫𑑂 𑐴𑐾 𑐫𑐎𑑂𑐰 𑐩𑐐𑐵𑑅𑐩𑐔𑐵𑑅 𑐡𑐂 𑐢𑐫𑐵𑐐𑐸 𑐰𑐵𑑅𑐔𑐵𑑅𑐐𑐸 𑐏𑑅 𑑋 𑐟𑐬 𑐩𑐐𑐵𑑅𑐩𑐔𑐵𑑅 𑐡𑐂 𑐢𑐎𑐵𑑅 𑐳𑐸𑑄𑐎 𑐔𑑂𑐰𑐣𑐵𑑅 𑐩𑐖𑐶𑐮, 𑐖𑑂𑐫𑐵 𑐮𑐵 𑐣𑑂𑐴𑑂𑐫𑐵𑐎𑐾 𑐴𑐾 𑐩𑐵𑐮 𑑋 𑐫𑐡𑐶 𑐩𑐐𑐵𑑅𑐩𑐔𑐵𑑅 𑐡𑐂 𑐢𑐎𑐵𑑅 𑐳𑐸𑐣𑐵𑑄 𑐣𑑄 𑐖𑑂𑐫𑐵 𑐩𑐫𑐵𑐟 𑐢𑐵𑑅𑐳𑐵 𑐠𑐖𑑂𑐫𑐵𑑅𑐐𑐸 𑐟𑑅𑐖𑐶𑐐𑐸 𑐖𑑂𑐫𑐵 𑐖𑐸𑐂𑐐𑐸 𑐳𑐩𑑂𑐨𑐰 𑐖𑐸𑐂𑐩𑐏𑐸, 𑐄𑐎𑐶𑑄 𑐣𑑂𑐴𑑂𑐫𑐵𑐠𑐾𑑄 𑐖𑑂𑐫𑐵𑑅𑐐𑐸 𑐩𑐐𑐵𑑅𑐩𑐔𑐵𑑅 𑐡𑐸𑐳𑐵𑑄 𑐄𑐎𑐶𑐫𑐵𑐟 𑐧𑐸𑐮𑐸𑐴𑐸𑑄 𑐨𑐶𑑄𑐎𑐵𑑅 𑐰𑐣𑐾𑐐𑐸, 𑐩𑐐𑐵𑑅𑐩𑐐𑐵𑑅𑐫𑐵 𑐡𑑀𑐲 𑐊𑐎𑐾𑐡𑐾𑐩𑐶𑑄 𑐴𑐾 𑐎𑐸𑐧𑐶𑐫𑐵 𑐰𑐣𑐾𑐐𑐸 𑐎𑑂𑐰𑑅𑐕𑐶𑐣𑐵𑑅 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐐𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐠𑑁𑑄 𑐠𑐸𑐮𑐶 𑐟𑐎 𑐗𑐷𑐳𑑄 𑐥𑐶𑐎𑐵𑐫𑐾𑐦𑐟, 𑐁𑑅 𑐠𑐸𑐎𑐶𑐫𑐵𑐟 𑐀𑐗 𑐧𑐵𑑄𑐮𑐵𑐎𑐵 𑐫𑑄𑐎𑐾𑐐𑐸 𑐖𑑂𑐫𑐵 𑐣𑐶𑐬𑐣𑑂𑐟𑐬 𑐖𑐸𑐫𑐵 𑐰𑐣𑐷 𑑋’

𑐀𑐠𑐾𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐖𑑂𑐘𑐵𑐣𑐎𑑀𑐱 𑐥𑐬𑐶𑐫𑑀𑐖𑐣𑐵𑐫𑐵 𑐣𑐶𑐬𑑂𑐡𑐾𑐱𑐣 𑐳𑐩𑐶𑐟𑐶𑐫𑐵 𑐎𑐖𑐶 𑐜𑐵. 𑐫𑑀𑐐𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣𑑄 𑐣𑐾𑐰𑐵𑑅𑐟𑐫𑑂𑐧𑐵𑐬𑐾 𑐰𑐶𑐳𑑂𑐟𑐺𑐟 𑐬𑐸𑐥𑑄 𑐖𑐵𑐣𑐎𑐵𑐬𑐷 𑐎𑐵𑐫𑐾𑐐𑐸 𑐣𑐶𑑄𑐟𑐶𑑄 𑐗𑐷𑐎𑐾 𑐕𑐐𑐹 𑐟𑑅𑐖𑐶𑐐𑐸 𑐥𑑂𑐬𑐎𑐵𑐱𑐣 𑐡𑐸𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐢𑐫𑐵𑐡𑐶𑐮, ‘𑐠𑑂𑐰 𑐁𑑅𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅𑐟𑐫𑑂𑐟 𑐩𑑂𑐴𑐳𑐷𑐎𑐾𑐐𑐸, 𑐣𑐾𑐰𑐵𑑅𑐟𑐫𑑂 𑐧𑐵𑐬𑐾 𑐥𑐹𑐰𑑄𑐎 𑐖𑐵𑐣𑐎𑐵𑐬𑐷 𑐎𑐵𑐫𑐾𑐐𑐸 𑐳𑐦𑐹 𑐖𑐎 𑐖𑐹𑐐𑐸 𑐡𑐸, 𑐠𑐸𑐎𑐶𑐫𑐵𑐟 𑐀𑐗 𑐰𑐺𑐴𑐟 𑐬𑐸𑐥𑑄 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋’

𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐠𑑂𑐰 𑐖𑑂𑐘𑐵𑐣𑐎𑑀𑐱𑐫𑐵 𑐣𑐾𑐥𑐵𑐮𑐷, 𑐀𑑄𑐐𑑂𑐬𑐾𑐖𑐷𑑄 𑐀𑐣𑐸𑐰𑐵𑐡 𑐫𑐵𑐫𑐾𑐐𑐸 𑐧𑐵𑐬𑐾 𑐣𑐾𑐰𑐵𑑅𑐟𑐫𑑂𑐳𑑄 𑐎𑐥𑐵𑑅 𑐳𑑂𑐫𑐵𑐎𑐵 𑐔𑑂𑐰𑐣𑐾𑐩𑑂𑐰𑐵𑑅𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐢𑐫𑐵𑐡𑐶𑐮, ‘𑐗𑐷𑐳𑑄 𑐗𑐷𑐐𑐸 𑐧𑐵𑐬𑐾 𑐥𑐹𑐰𑑄𑐎 𑐖𑐵𑐣𑐎𑐵𑐬𑐷 𑐡𑐸𑐐𑐸 𑐖𑑂𑐘𑐵𑐣𑐎𑑀𑐱 𑐥𑐶𑐠𑐣𑐾 𑐢𑐸𑐣𑐵𑐐𑐸 𑐡𑐸, 𑐁𑑅 𑐣𑐾𑐰𑐵𑑅𑐟𑐫𑑂 𑐧𑐵𑐬𑐾 𑐐𑐿𑐬𑐣𑐾𑐰𑐵𑑅𑐟𑐫𑑂𑐳𑑄 𑐳𑐶𑐂𑐎𑐾𑐐𑐸 𑐠𑐸𑐂𑐎𑐾𑐐𑐸 𑐏𑑅𑐳𑐵 𑐄𑐩𑐶𑐳𑑄 𑐮𑐐𑐵𑐣𑐷 𑐫𑐵𑐣𑐵𑑅 𑐠𑐸𑐎𑐶𑐫𑐵 𑐀𑐣𑐸𑐰𑐵𑐡 𑐫𑐵𑐎𑐾𑐩𑐵𑑅 𑑋 𑐣𑐾𑐥𑐵𑐮 𑐊𑐎𑐾𑐡𑐾𑐩𑐶, 𑐳𑐵𑐗𑐵 𑐥𑑂𑐬𑐎𑐵𑐱𑐣 𑐠𑐾𑑄𑐖𑑂𑐫𑐵𑑅𑐐𑐸 𑐳𑑄𑐳𑑂𑐠𑐵 𑐠𑐸𑐎𑐶𑐫𑐵 𑐀𑐣𑐸𑐰𑐵𑐡 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑑂𑐴𑑂𑐫𑑅𑐣𑐾 𑐰𑐫𑐾𑐩𑐵𑑅, 𑐣𑐾𑐰𑐵𑑅𑐟𑐫𑑂𑐳𑑄 𑐢𑑂𑐫𑐧𑐵 𑐥𑐵𑐣𑐵𑑅 𑐀𑐣𑐸𑐰𑐵𑐡 𑐫𑐵𑐣𑐵𑐔𑑂𑐰𑐣𑐾𑐩𑐵𑑅𑐐𑐸 𑐩𑐡𑐸 𑑋 𑐧𑐬𑐸 𑐣𑐾𑐰𑐵𑑅𑐨𑐵𑐳𑑄 𑐀𑐗 𑐰𑐺𑐴𑐟𑑂 𑐎𑑀𑐱 𑐡𑐫𑐾𑐎𑐾𑐐𑐸 𑐥𑐵𑐏𑐾 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅 𑑋’

𑐊𑐎𑐾𑐡𑐾𑐩𑐶𑐫𑐵 𑐥𑑂𑐬𑐵𑐖𑑂𑐘 𑐰 𑐣𑐶𑐬𑑂𑐡𑐾𑐱𑐣 𑐳𑐩𑐶𑐟𑐶𑐫𑐵 𑐡𑐸𑐖𑑅 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐫𑐵𑐣𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐏𑑅 𑑋