𑐣𑐾𑐰𑐵𑑅𑐟𑐫𑑂𑐳𑑄 𑐎𑑅𑐑𑐵𑐣𑐵𑐟𑑅𑐐𑐸 𑐜𑑀𑐚𑐷𑐫𑐵 𑐳𑐶𑐮𑐐𑐝𑐷 𑐧𑐖𑐵𑑅

𑐫𑐾𑑃 (𑐬𑐵𑐳𑐳)- 𑐜𑑀𑐚𑐷 𑐖𑐶𑐮𑑂𑐮𑐵𑐫𑐵 𑐳𑐡𑐬𑐩𑐸𑐎𑐵𑐩 𑐳𑐶𑐮𑐐𑐝𑐷 𑐳𑐸𑐡𑐹𑐬𑐥𑐱𑑂𑐔𑐶𑐩𑐫𑐵 𑐴𑐾 𑐩𑐸𑐏𑑂𑐫 𑐥𑑂𑐬𑐱𑐵𑐳𑐣 𑐎𑐾𑐣𑑂𑐡𑑂𑐬𑐫𑐵 𑐬𑐸𑐥𑐫𑑂 𑐎𑐵𑐫𑐩 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐐𑐹 𑐂𑐮𑐫𑑂 𑐠𑑂𑐰 𑐱𑐎𑑂𑐟𑐶𑐱𑐵𑐮𑐷 𑐜𑑀𑐚𑐷 𑐬𑐵𑐖𑑂𑐫𑐫𑐵 𑐬𑐵𑐖𑐢𑐵𑐣𑐷𑐫𑐵 𑐬𑐸𑐥𑐫𑑂 𑐣𑑄 𑐩𑑂𑐴𑐳𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐧𑐵𑐂𑐳𑐾–𑐔𑑁𑐧𑐶𑐳𑐾 𑐬𑐵𑐖𑑂𑐫𑐎𑐵𑐮𑐫𑑂 𑐠𑐣 𑐎𑐟𑑂𑐫𑐸𑐬𑐷𑐰𑑄𑐱𑐷 𑐖𑐸𑐫𑐵𑑅 𑐬𑐿𑐎𑐵𑐰𑑄𑐱𑐷𑐫𑐵 𑐱𑐵𑐳𑐣 𑐣𑑂𑐴𑑂𑐫𑐵𑑅𑐐𑐸 𑐏𑐣𑐾𑐡𑐸 𑐰 𑐠𑑂𑐰 𑐰𑐶𑐱𑐵𑐮 𑐣𑐾𑐥𑐵𑐮𑐫𑑂 𑐩𑐳𑑂𑐰𑐵𑑅𑐐𑐸 𑐂𑐮𑐫𑑂𑐟𑐎 𑐎𑐵𑐫𑐩 𑐴𑐾 𑐖𑐸𑐫𑐵𑐔𑑂𑐰𑐣 𑑋 𑐬𑐵𑐞𑐵𑐎𑐵𑐮𑐫𑑂 𑐣𑑄 𑐠𑑂𑐰 𑐎𑑂𑐲𑐾𑐟𑑂𑐬𑐫𑐵𑐟 𑐳𑐸𑐡𑐹𑐬𑐥𑐶𑐱𑑂𑐔𑐩𑐫𑐵 𑐴𑐾 𑐕𑐐𑐹 𑐩𑐸𑐏𑑂𑐫 𑐥𑑂𑐬𑐱𑐵𑐳𑐣 𑐎𑐾𑐣𑑂𑐡𑑂𑐬𑐫𑐵 𑐬𑐸𑐥𑐫𑑂 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐏𑐣𑐾𑐡𑐸 𑑋 𑐟𑐵𑐟𑑂𑐎𑐵𑐮𑐷𑐣 𑐂𑐮𑐫𑑂 𑐠𑑂𑐰 𑐖𑐶𑐮𑑂𑐮𑐵 𑐜𑑀𑐚𑐷 𑐐𑑁𑑄𑐜𑐵𑐫𑐵 𑐬𑐸𑐥𑐫𑑂 𑐥𑐬𑐶𑐔𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅𑑋

𑐰𑐶.𑐳𑑄. 𑑒𑑐𑑒𑑙 𑐳𑐵𑐮𑐫𑑂 𑐣𑑂𑐫𑐵𑐐𑐹 𑐰𑐶𑐎𑐵𑐳 𑐎𑑂𑐲𑐾𑐟𑑂𑐬 𑐀𑐣𑑂𑐟𑐬𑑂𑐐𑐟 𑐳𑐸𑐡𑐹𑐬𑐥𑐱𑑂𑐔𑐶𑐵𑐩𑐵𑐘𑑂𑐔𑐮 𑐰𑐶𑐎𑐵𑐳 𑐎𑑂𑐲𑐾𑐟𑑂𑐬𑐫𑐵 𑐬𑐵𑐖𑐢𑐵𑐣𑐷𑐫𑐵 𑐬𑐸𑐥𑐫𑑂 𑐡𑐷𑐥𑐵𑐫𑐮 𑐎𑐵𑐫𑐩 𑐫𑐵𑑅𑐐𑐸 𑐂𑐮𑐫𑑂 𑐮𑐐𑐨𑐐 𑑑𑑐 𑐎𑐶𑐮𑑀𑐩𑐶𑐚𑐬 𑐟𑐵𑐥𑐵𑑅𑐐𑐸 𑐠𑐵𑐳𑐫𑑂 𑐀𑐰𑐳𑑂𑐠𑐶𑐟 𑐳𑐶𑐮𑐐𑐝𑐷𑐫𑐵 𑐔𑐴𑐮𑐥𑐴𑐮 𑐰 𑐰𑑂𑐫𑐵𑐥𑐵𑐬𑐫𑑂 𑐳𑐸𑐳𑑂𑐟𑐟𑐵 𑐰𑐮 𑑋 𑐠𑑁𑑄𑐎𑐣𑑂𑐴𑐫𑑂 𑐣𑐶𑐐𑐸𑐮𑐶𑑄 𑐫𑐵𑐟 𑐳𑑂𑐰𑐵𑐣𑐵𑑅 𑐡𑐷𑐥𑐵𑐫𑐮–𑐳𑐶𑐮𑐐𑐝𑐷 𑐣𑐐𑐬𑐥𑐵𑐮𑐶𑐎𑐵 𑐡𑐫𑐾𑐎𑐹𑐐𑐸 𑐡𑐸 𑑋 𑐠𑑂𑐰 𑐎𑑂𑐲𑐾𑐟𑑂𑐬 𑐠𑑁𑑄𑐫𑐵 𑐣𑐾𑐥𑐵𑑅𑐫𑐵 𑐣𑐶𑐐𑐹𑐐𑐸 𑐔𑐶𑐎𑐹𑐐𑐸 𑑑𑑙,𑑕𑑓𑑙 𑐰𑐬𑑂𑐐𑐩𑐶𑐚𑐬 𑐎𑑂𑐲𑐾𑐟𑑂𑐬𑐦𑐮𑐫𑑂 𑐣𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐡𑐬𑐩𑐸𑐎𑐵𑐩 𑐡𑐷𑐥𑐵𑐫𑐮–𑐳𑐶𑐮𑐐𑐜𑐷𑐥𑐵𑐏𑐾𑑄 𑐥𑐸𑐮𑐵𑑄𑐐𑐸 𑐥𑑂𑐬𑐱𑐵𑐳𑐣𑐶𑐎 𑐎𑐾𑐣𑑂𑐡𑑂𑐬 𑐳𑐶𑐮𑐐𑐝𑐷 𑑑𑑕 𑐐𑐹 𑐩𑐶𑐣𑐾𑐚𑐫𑐵 𑐩𑑀𑐚𑐬 𑐮𑑃𑐥𑐸𑑄 𑐀𑑅𑐥𑐸𑐎 𑐠𑑂𑐫𑑄𑐎𑐾 𑐦𑐂 𑑋

𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵 𑐩𑐸𑐏𑑂𑐫 𑐧𑐳𑑀𑐧𑐵𑐳 𑐡𑐸𑐐𑐸 𑐥𑐴𑐵𑐜𑐫𑐵 𑐔𑑂𑐰𑐎𑐵𑐫𑑂 𑐳𑐶𑐮𑐐𑐝𑐷 𑐧𑐖𑐵𑑅 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐗𑑂𑐫𑐵𑐮𑐏𑐵𑐣 𑐜𑐵𑑃𑐜𑐵𑑄 𑐎𑐬𑐶𑐧 𑑒 𑐐𑐹 𑐎𑐶𑐮𑑀𑐩𑐶𑐚𑐬 𑐳𑑂𑐰𑐫𑐵𑑄 𑐔𑑂𑐰𑐫𑑂 𑐗𑑂𑐰𑑅𑐮𑐶𑐎𑑂𑐎 𑐕𑐐𑐹 𑐴𑐾 𑐮𑐴𑐬𑐫𑑂 𑐠𑑂𑐰 𑐧𑐖𑐵𑑅 𑐣𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐳𑐸𑐡𑐹𑐬 𑐨𑐾𑐐𑐫𑑂 𑐫𑐾𑑃 (𑐳𑑂𑐰𑐣𑐶𑐐𑐮)𑑄) 𑐰𑑅𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐠𑐸𑐮𑐶 𑐏𑑂𑐰𑐵𑐟𑐸𑐐𑐸 𑐧𑐳𑑂𑐟𑐷 𑐏𑐣𑐷𑐧𑐮𑐫𑑂 𑐣𑑂𑐴𑑂𑐫𑐵𑐩𑑂𑐴 𑐣𑑄 𑐀𑐖𑐹 𑐔𑐵𑐂 𑑋 𑐠𑑅𑐐𑐸 𑐴𑐾 𑐎𑐮𑐵𑐎𑑁𑐱𑐮 𑐰 𑐕𑐐𑐹 𑐴𑐾 𑐎𑐠𑑄𑐫𑐵 𑐟𑐵𑐎𑐸𑐔𑐵 𑐥𑐵𑐣𑐵𑐟𑑅𑐐𑐸 𑐕𑐾𑑃𑐏𑐵𑑄 𑐀𑐣 𑐰𑐂𑐥𑐶𑑄 𑐥𑐵𑐴𑐵𑑄𑐥𑐶𑑄𑐟 𑐬𑑀𑐩𑐵𑐘𑑂𑐔𑐶𑐟 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐾𑑃𑐫𑑂 𑐖𑐎 𑐣𑐾𑐰𑐵𑑅𑐟 𑐡𑐂 𑐢𑐂𑐐𑐸 𑐟𑐵𑐫𑐾𑐎𑐷𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐠𑑂𑐰 𑐕𑐐𑐹 𑐔𑐶𑐄𑐟𑐵𑑅 𑐡𑐸𑐐𑐸 𑐰𑐶𑐲𑐫 𑐖𑐸𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐳𑐶𑐮𑐐𑐝𑐷𑐫𑐵 𑐳𑑂𑐠𑐵𑐣𑐷𑐫𑐵𑐰𑐵𑐳𑐷 𑐥𑑂𑐬𑐰𑐷𑐞 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐩𑐾𑐩𑐾𑐠𑐵𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟 𑐳𑑂𑐰𑐫𑐵𑑄 𑐣𑑄 𑐫𑐾𑑃𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐳𑐩𑐸𑐡𑐵𑐫𑐮𑐶𑐳𑐾 𑐖𑐶𑐩𑐶𑐐𑐸 𑐁𑐥𑐵𑐮𑑄 𑐏𑑃 𑐩𑐶𑐮𑐾 𑐖𑐹 𑑋 𑐫𑐾𑑃𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑐾𑑄 𑐴𑐾 𑐖𑐶𑐩𑐶𑐳𑑄𑐣𑑄 𑐠𑐣 𑐠𑑅𑐐𑐸 𑐢𑐬𑑂𑐩𑐬𑑂𑐎𑐵 𑐫𑐵𑐣𑐵𑐔𑑂𑐰𑐣𑐵 𑑋’ 𑐠𑐸𑐐𑐸 𑐠𑐵𑐳𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐧𑐳𑐵𑐂𑐳𑐬𑐵𑐂 𑑓𑑐𑑐 𑐡𑑃 𑐣𑑂𑐴𑑂𑐫𑑅 𑐴𑐾 𑐱𑐸𑐬𑐸 𑐖𑐹𑐐𑐸 𑐳𑑂𑐠𑐵𑐣𑐷𑐫𑐰𑐵𑐳𑐷𑐫𑐵 𑐢𑐵𑐥𑐹 𑐡𑐸 𑑋

𑐣𑐾𑐰𑐵𑑅𑐟 𑐩𑐸𑐏𑑂𑐫 𑐫𑐵𑐣𑐵𑑅 𑐰𑑂𑐫𑐵𑐥𑐵𑐬𑐫𑐵 𑐴𑐾 𑐳𑐶𑐮𑐳𑐶𑐮𑐵𑐫𑑂 𑐜𑑀𑐚𑐷 𑐠𑑂𑐫𑑄𑐎𑑅 𑐰𑑅𑐐𑐸 𑐳𑐶𑐮𑐐𑐝𑐷𑐫𑐵 𑐩𑐾𑐩𑑂𑐴 𑐳𑑂𑐠𑐵𑐣𑐷𑐫𑐰𑐵𑐳𑐷 𑐚𑐾𑐎𑐧𑐴𑐵𑐡𑐸𑐬 𑐀𑐩𑐵𑐟𑑂𑐫𑑄 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐣𑐾𑐰𑐵𑑅𑐟 𑐜𑐵𑐚𑐷𑐂 𑐰𑑂𑐫𑐵𑐥𑐵𑐬𑐫𑐵 𑐣𑐶𑑄𑐟𑐶𑑄 𑐠𑑂𑐫𑑄𑐎𑑅 𑐰𑑅𑐐𑐸 𑐢𑐂𑐐𑐸 𑐏𑑃 𑐡𑐸 𑑋 𑐖𑐶𑐩𑐶𑐐𑐸 𑐩𑐸𑐏𑑂𑐫 𑐥𑐾𑐱𑐵 𑐁𑑅 𑐣𑑄 𑐰𑑂𑐫𑐵𑐥𑐵𑐬 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋’ 𑐰𑑂𑐫𑐵𑐥𑐵𑐬𑐫𑐵 𑐣𑐶𑑄𑐟𑐶𑑄 𑐠𑐣 𑐰𑑅𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑐣𑐫𑐵 𑐴𑐾 𑐥𑐬𑐶𑐰𑐾𑐱𑐎𑐠𑑄 𑐧𑐶𑐳𑑂𑐎𑑄 𑐠𑑅𑐥𑐶𑐣𑐶𑐐𑐸 𑐩𑑂𑐴𑐳𑐷𑐎𑐵 𑐡𑐫𑐾𑐎𑐹𑐐𑐸 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋 𑐠𑐣 𑐡𑐫𑐾𑐎𑐵𑐟𑑅𑐐𑐸 𑐕𑐾𑑃𑐏𑐵𑐫𑐵 𑐳𑑄𑐬𑐔𑐣𑐵 𑐫𑐾𑑃𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐳𑑂𑐰𑐫𑐵𑑄 𑐦𑐬𑐎 𑐢𑐵𑑅𑐳𑐵 𑐏𑐣𑐾𑐡𑐸 𑑋

𑐜𑑀𑐚𑐷 𑐬𑐵𑐖𑑂𑐫𑐫𑑂 𑐧𑐣𑑂𑐡 𑐰𑑂𑐫𑐵𑐥𑐵𑐬 𑐀𑐥𑑂𑐰𑐫𑐾𑐎𑐵𑑅 𑐳𑐩𑐺𑐡𑑂𑐢 𑐫𑐵𑐫𑐾𑐟 𑐠𑐣𑐫𑐵 𑐬𑐿𑐎𑐵𑐰𑑄𑐱𑐷 𑐖𑐸𑐖𑐸𑐥𑐶𑑄𑐳𑑄 𑐣𑐾𑐥𑐵𑐮𑐩𑐞𑑂𑐜𑐮𑐫𑐵 𑐩𑐮𑑂𑐮 𑐖𑐸𑐖𑐸𑐥𑐶𑑄𑐮𑐶𑐳𑐾 𑐳𑐣𑑂𑐢𑐶 𑐫𑐵𑐣𑐵𑑅 𑐣𑐾𑐰𑐵𑑅 𑐰𑑂𑐫𑐵𑐥𑐵𑐬𑐷𑐟 𑐠𑐣 𑐴𑐫𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐂𑐟𑐶𑐴𑐵𑐳𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐣𑐾𑐥𑐵𑐮 𑐊𑐎𑐷𑐎𑐬𑐞 𑐮𑐶𑐥𑐵 𑐢𑐵𑑅𑐳𑐵 𑐠𑑂𑐰 𑐖𑑂𑐫𑐵𑑄 𑐀𑐗 𑐟𑐷𑐰𑑂𑐬𑐟𑐵 𑐎𑐵𑑅𑐐𑐸 𑐏𑐣𑐾𑐡𑐸 𑑋 𑐠𑑂𑐰 𑐎𑑂𑐬𑐩 𑐰𑐶.𑐳𑑄. 𑑒𑑐𑑐𑑗 𑐳𑐵𑐮𑐫𑑂 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑐫𑐾𑐢𑐸𑑄𑐎𑐵𑑅 𑐧𑐣𑑂𑐡 𑐖𑐹𑐐𑐸 𑐖𑐵𑐣𑐎𑐵𑐬𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐁𑑅 𑐰𑐫𑐵𑑅 𑐠𑐣𑑄 𑐣𑐾𑐰𑐵𑑅𑐮𑐶𑐳𑐾𑑄 𑐩𑐾𑐩𑐾𑐐𑐸 𑐖𑐵𑐟𑐶 𑐰 𑐳𑐩𑐸𑐡𑐵𑐫 𑐳𑐸𑐰𑐶𑐢𑐵𑐳𑐩𑑂𑐥𑐣𑑂𑐣 𑐖𑐹𑐐𑐸 𑐠𑐵𑐳𑐫𑑂 𑐧𑐳𑐵𑐂𑑃𑐳𑐬𑐵𑐂𑑃 𑐫𑐵𑐫𑐾𑐐𑐸 𑐫𑐵𑐣𑐵𑐴𑑅𑐐𑐸 𑐎𑐵𑐬𑐞𑑄 𑐜𑑀𑐚𑐷𑐫𑐵 𑐀𑐳𑑂𑐟𑐶𑐟𑑂𑐰 𑐳𑑄𑐎𑐚𑐫𑑂 𑐮𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐜𑑀𑐚𑐷 𑐧𑐴𑐸𑐩𑐸𑐏𑐷 𑐎𑑂𑐫𑐵𑐩𑑂𑐥𑐳𑐫𑐵 𑐥𑑂𑐬𑐩𑐸𑐏 𑐎𑐺𑐲𑑂𑐞𑐧𑐴𑐵𑐡𑐸𑐬 𑐎𑐛𑐵𑐫𑐟𑑄 𑐢𑐫𑐵𑐡𑐶𑐮, ‘𑐣𑐾𑐰𑐵𑑅 𑐳𑐩𑐸𑐡𑐵𑐫𑑄 𑐎𑑅𑐑𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐳𑐶𑐮𑐐𑐝𑐷𑐂 𑐧𑐸𑐮𑐸𑐴𑐸𑑄 𑐂𑐥𑐶𑑄 𑐣𑑄 𑐳𑐸𑐰𑐶𑐢𑐵 𑐳𑐩𑑂𑐥𑐣𑑂𑐣 𑐠𑐵𑐳𑐫𑑂 𑐧𑐳𑐵𑐂𑑃 𑐳𑐬𑐾 𑐖𑐸𑐫𑐵 𑐰𑐣𑐾𑐰𑑄 𑐖𑐶𑐮𑑂𑐮𑐵 𑐳𑐡𑐬𑐩𑐸𑐎𑐵𑐩𑐫𑐵 𑐔𑐴𑐮𑐥𑐴𑐮𑐫𑑂 𑐩𑑂𑐴𑑀 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋’

𑐣𑐾𑐰𑐵𑑅𑐟𑐫𑑂 𑐰𑐶𑐱𑐶𑐲𑑂𑐚 𑐳𑑄𑐳𑑂𑐎𑐺𑐟𑐶𑐫𑐵 𑐥𑑂𑐬𑐨𑐵𑐰 𑐠𑐸𑐐𑐸 𑐎𑑂𑐲𑐾𑐟𑑂𑐬 𑐰 𑐨𑐵𑐬𑐟𑐫𑐵 𑐎𑐸𑐩𑐵𑐄𑐟𑐎 𑐣𑑂𑐫𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐠𑐣 𑐣𑑂𑐫𑐵𑐫𑐾𑐎𑐷𑐐𑐸 𑐐𑑁𑐬𑐵 𑐥𑐬𑑂𑐰𑐫𑑂 𑐴𑐸𑐂𑐎𑐷𑐐𑐸 𑐮𑐵𑐏𑐾 𑐥𑑂𑐫𑐵𑐏𑑄 𑐠𑐸𑐎𑐶𑐫𑐵 𑐕𑐐𑐹 𑐖𑑂𑐰𑐮𑐣𑑂𑐟 𑐄𑐡𑐵𑐴𑐬𑐞 𑐖𑐹𑐐𑐸 𑐳𑐶𑐮𑐐𑐝𑐷𑐫𑐵 𑐳𑑂𑐠𑐵𑐷𑐫𑐰𑐵𑐳𑐷 𑐳𑐬𑐶𑐦 𑐱𑑂𑐬𑐾𑐲𑑂𑐛𑑄 𑐢𑐫𑐵𑐡𑐷 𑑋 𑐰𑐫𑑂𑐎𑑅𑐫𑐵𑐎𑐠𑑄 𑐳𑐶𑐮𑐐𑐝𑐷𑐂 𑐣𑐾𑐰𑐵𑑅 𑐳𑐩𑐸𑐡𑐵𑐫𑑄 𑐳𑐵𑐫𑐵𑑅 𑐖𑐵𑐟𑑂𑐬𑐵 𑐣𑑄 𑐣𑑂𑐫𑐵𑐫𑐾𑐎𑐾𑐐𑐸 𑐫𑐵𑑅 𑑋 𑐳𑐵𑐫𑐵𑑅𑐫𑐵𑐫𑐵 𑐳𑑂𑐰𑐣𑑂𑐴𑐸𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 𑐣𑑂𑐫𑐵𑐫𑐾𑐎𑐷𑐐𑐸 𑐢𑐸𑑃 𑐖𑐵𑐟𑑂𑐬𑐵𑐫𑐵 𑐣𑑄 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄 𑐩𑑂𑐴𑐳𑐷𑐎𑐵 𑐡𑐸 𑑋 𑐣𑐾𑐰𑐵𑑅 𑐳𑐩𑐸𑐡𑐵𑐫𑑄 𑐠𑐣 𑐫𑑃𑐫𑐵𑑅 𑐰 𑐬𑑀𑐥𑐵𑐂𑑃 𑐖𑐵𑐟𑑂𑐬𑐵 𑐣𑑄 𑐣𑑂𑐫𑐵𑐫𑐾𑐎𑐾𑐐𑐸 𑐫𑐵𑑅𑑋 𑐠𑐸𑐥𑐶𑑄 𑐖𑐵𑐟𑑂𑐬𑐵 𑐢𑐵𑑅𑐳𑐵 𑐮𑑀𑐥 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐠𑐣𑐫𑐵 𑐰𑐵𑐳𑐶𑐣𑑂𑐡𑐵𑑄 𑐔𑐶𑐄𑐟𑐵𑑅 𑐥𑑂𑐰𑑄𑐎𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐣𑐫𑐵 𑐥𑑂𑐬𑐩𑐸𑐏 𑐢𑐵𑐬𑑂𑐩𑐶𑐎𑐳𑑂𑐠𑐮𑐩𑐢𑑂𑐫𑐾 𑐕𑐐𑐹 𑐏𑑅 𑐱𑐿𑐮𑐾𑐱𑑂𑐰𑐬𑐷 𑐡𑐾𑐐𑑅 𑑋 𑐳𑐶𑐮𑐐𑐝𑐷 𑐧𑐖𑐵𑑅𑐫𑐵 𑐩𑐢𑑂𑐫𑐨𑐵𑐐𑐫𑑂 𑐎𑐮𑐵𑐟𑑂𑐩𑐎 𑐢𑑄𑐐𑑄 𑐣𑐶𑐬𑑂𑐩𑐵𑐞 𑐫𑐵𑐣𑐵𑐔𑑂𑐰𑑄𑐐𑐸 𑐱𑐿𑐮𑐾𑐱𑑂𑐰𑐬𑐷 𑐡𑐾𑐰𑐷𑐫𑐵 𑐡𑐬𑑂𑐱𑐣𑑄 𑐳𑐎𑐳𑐶𑐐𑐸𑑄 𑐡𑐸𑑅𑐏 𑐰 𑐳𑐣𑑂𑐟𑐵𑐥 𑐠𑑅𑐴𑐾 𑐟𑐣𑐵 𑐰𑑄𑐐𑐸 𑐩𑐴𑐳𑐸𑐳 𑐖𑐸𑐂𑐐𑐸 𑐡𑐾𑐐𑑅𑐫𑐵 𑐩𑐹𑐮 𑐥𑐸𑐖𑐵𑐬𑐷 𑐥𑐾𑑂𑐬𑐩𑐱𑑄𑐎𑐬 𑐨𑐚𑑂𑐚𑑄 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐣𑐸𑐐𑐮𑐫𑑂 𑐣𑑂𑐴𑑂𑐫𑐵𑐎𑑂𑐰 𑐴𑐾 𑐳𑐣𑑂𑐟𑐵𑐥 𑐡𑐸𑐐𑐸 𑐏𑑅𑐳𑐵𑑄 𑐣𑑄 𑐕𑐎𑑂𑐰𑑅 𑐱𑐿𑐮𑐾𑐱𑑂𑐰𑐬𑐷 𑐡𑐾𑐰𑐷𑐫𑐵 𑐡𑐬𑑂𑐱𑐣 𑐫𑐵𑐟 𑐢𑐵𑑅𑐳𑐵 𑐡𑐎𑑂𑐰𑑄 𑐟𑐣𑐵𑐰𑐣𑐷 𑑋’ 𑐥𑐸𑐮𑐵𑑄𑐐𑐸 𑐣𑐾𑐰𑐵𑑅 𑐧𑐖𑐵𑑅, 𑐣𑐾𑐰𑐵𑑅𑐟𑐫𑑂 𑐕𑐾𑑃𑐏𑐵, 𑐳𑐸𑐡𑐹𑐬𑐥𑐱𑑂𑐔𑐶𑐩𑐾𑐮𑐷 𑐬𑐴𑐣𑐳𑐴𑐣, 𑐨𑐾𑐲𑐨𑐹𑐲𑐵, 𑐱𑐿𑐮𑐾𑐱𑑂𑐰𑐬𑐷 𑐡𑐾𑐐𑑅 𑐥𑐬𑐶𑐳𑐬, 𑐬𑐵𑐞𑐵𑐎𑐵𑐮𑐷𑐣 𑐡𑐬𑐰𑐵𑐬 𑐰 𑐠𑐣𑑄 𑐏𑐣𑐾 𑐡𑐂𑐐𑐸 𑐀𑐣𑐸𑐥𑐩 𑐥𑐴𑐵𑐜𑐷 𑐮𑐸𑐟 𑐳𑑂𑐰𑐫𑐾 𑐮𑐵𑐫𑐎 𑐠𑐵𑐫𑑂𑐟 𑐏𑑅 𑑋 𑐎𑐾𑐣𑑂𑐡𑑂𑐬 𑐳𑐬𑐎𑐵𑐬 𑐰 𑐳𑑂𑐠𑐵𑐣𑐷𑐫𑐳𑑂𑐟𑐬𑑄 𑐠𑐸𑐎𑐶𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑐰 𑐳𑑄𑐬𑐎𑑂𑐲𑐞 𑐩𑐫𑐵𑐫𑐾𑐐𑐸 𑐏 𑐢𑐂𑐐𑐸 𑐖𑐹𑐳𑐵 𑐠𑑂𑐰 𑐂𑐟𑐶𑐴𑐵𑐳𑐫𑐵 𑐥𑐵𑐣𑐵𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐂𑐐𑐸 𑐡𑐶𑐮𑑂𑐥𑐾𑐱𑑂𑐰𑐬 𑐩𑐵𑐰𑐶𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐡𑐷𑐬𑑂𑐑𑐧𑐴𑐵𑐡𑐸𑐬 𑐎𑐛𑐵𑐫𑐟𑑄 𑐎𑐣𑐵𑐡𑐶𑐮 𑑋