𑐣𑐾𑐥𑐵𑑅𑐫𑐵 𑐖𑑂𑐰𑑅𑐩𑐡𑐸𑐐𑐸 𑐣𑑂𑐴𑐵𑐥𑐵𑑄𑐐𑐸 𑐖𑑂𑐘𑐵𑐣𑐎𑑀𑐱𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐟𑑅𑐖𑐶𑐎 𑐎𑑂𑐰𑐔𑐵𑐮

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐶 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑑄𑐎𑐵𑑅 𑐥𑐶𑐠𑐣𑐵 𑐎𑐠𑑄 𑐟𑐫𑐵𑐬 𑐖𑐹𑐐𑐸 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐱𑐸𑐎𑑂𑐬𑐰𑐵𑑅 𑐘𑑃𑐮𑐵𑐠𑑂𑐰 𑐟𑐺𑐟𑐶𑐫𑐵𑐏𑐸𑐣𑑂𑐴𑐸 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮 𑐰 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐎𑐸𑐮𑐥𑐟𑐶 𑐫𑐖𑑂𑐘𑐬𑐮 𑐢𑐵𑐏𑑂𑐰𑐵𑑅𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐣𑑂𑐴𑑂𑐫𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐶𑐲𑑂𑐚 𑐥𑐵𑐴𑐵𑑃𑐥𑐶𑑄 𑐎𑐠𑑄 𑐰𑐶𑐢𑐵𑐐𑐟 𑐰𑐶𑐖𑑂𑐘 𑐣𑑂𑐫𑐵𑐩𑑂𑐴 𑐥𑐵𑐴𑐵𑑃𑐥𑐶𑑄 𑐣𑐾𑐰𑐵𑑅 𑐩𑑂𑐴𑐳𑐷𑐎𑐵𑐥𑐵𑐏𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵 𑐰𑐶𑐖𑑂𑐘 𑐫𑐖𑑂𑐘𑐩𑐵𑐣𑐥𑐟𑐶 𑐧𑐖𑑂𑐬𑐵𑐔𑐵𑐬𑑂𑐫, 𑐨𑐵𑐲𑐵, 𑐮𑐶𑐥𑐶 𑐰 𑐳𑐵𑐴𑐶𑐟𑑂𑐫𑐰𑐶𑐡𑑂 𑐳𑐸𑐰𑐬𑑂𑐞 𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, 𑐣𑐵𑐚𑑂𑐫, 𑐳𑑄𑐐𑐷𑐟 𑐰 𑐧𑐵𑐖𑑄𑐰𑐶𑐡𑑂 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶 𑐰 𑐱𑐶𑐮𑑂𑐥, 𑐥𑑂𑐬𑐰𑐶𑐢𑐶 𑐰 𑐖𑑂𑐘𑐵𑐣𑐰𑐶𑐡𑑂 𑐎𑑂𑐬𑑀𑐢𑐎𑐮𑐵 𑐱𑐶𑐬𑑀𑐩𑐞𑐶 𑐎𑐵𑐮𑐸 𑐎𑐸𑐩𑐵𑐮𑐾 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐠𑑂𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐣𑐾𑐥𑐵𑑅𑐫𑐵 𑐴𑐾 𑐡𑐎𑐮𑐾 𑐣𑑂𑐴𑐵𑐥𑐵𑑄𑐐𑐸 𑐖𑑂𑐘𑐵𑐣𑐎𑑀𑐲 𑐏𑑅𑐳𑐵 𑐠𑐖𑐵𑑅𑐐𑐸 𑐳𑐦𑐹 𑐁𑑅 𑐩𑐾𑐩𑐾𑐐𑐸 𑐏𑑂𑐫𑐮𑑄 𑐣𑑄 𑐠𑐖𑐵𑑅𑐐𑐸 𑐖𑑂𑐘𑐵𑐣𑐎𑑀𑐱 𑐥𑐶𑐎𑐵𑐣𑐵 𑐗𑐷𑐐𑐸 𑐋𑐟𑐶𑐴𑐵𑐳𑐶𑐎 𑐐𑑁𑐬𑐰𑐫𑐵𑐟 𑐮𑐶𑐥𑐶𑐧𑐡𑑂𑐢 𑐫𑐵𑐣𑐵𑑅 𑐫𑑄𑐎𑐾𑐩𑐵𑑅 𑐢𑐎𑐵𑑅 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐏𑑃 𑐥𑐶𑐴𑐵𑐰𑑅𑐐𑐸 𑐏𑑅 𑑋

𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐠𑑂𑐰 𑐥𑐶𑐠𑐣𑐵𑐫𑐵𑐟 𑐣𑑂𑐫𑐵𑐐𑑅 𑐀𑐩𑐹𑐮𑑂𑐫 𑐩𑐞𑐶 𑐏𑑅 𑐢𑐎𑐵𑑅 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐳𑐩𑑂𑐥𑐡𑐵 𑐰 𑐥𑐬𑑂𑐫𑐚𑐣 𑐳𑐩𑐶𑐟𑐶 𑐎𑐖𑐶 𑐁𑐱𑐵𑐩𑐵𑐣 𑐳𑑄𑐐𑐟 𑐨𑐵𑐖𑐸𑑄 𑐮𑐳𑐎𑐸𑐳 𑐣𑑂𑐰𑐔𑐹 𑐟𑐫𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐥𑐬𑐶𑐫𑑀𑐖𑐣𑐵𑐫𑐵 𑐎𑐖𑐶 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐖𑑂𑐘𑐵𑐣𑐎𑑀𑐱𑐫𑑂 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐥𑐎𑑂𑐲𑐫𑐵 𑐏𑑃 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾𑐟𑐸𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, , 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐳𑐩𑑂𑐥𑐡𑐵 𑐰 𑐥𑐬𑑂𑐫𑐚𑐣 𑐰𑐶𑐨𑐵𑐐 𑐎𑐖𑐶 𑐎𑐸𑐩𑐵𑐬𑐷 𑐬𑐵𑐃𑐥𑐶𑐣𑑂𑐳𑑄 𑐠𑐷𑐠𑐷 𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋 𑐰𑐫𑐎𑑅𑐥𑐶𑐣𑑂𑐳𑑄 𑐠𑑂𑐰 𑐖𑑂𑐘𑐵𑐣𑐎𑑀𑐱 𑐢𑐂𑐐𑐸 𑐳𑐎𑐮𑐾𑑄 𑐣𑐾𑐰𑐵𑑅𑐟𑐫𑐾𑐐𑐸 𑐩𑑂𑐴𑐳𑐷𑐎𑐵 𑐏𑑅 𑐢𑐎𑐵𑑅 𑐢𑐫𑐵𑐡𑐶𑐮 𑑋

𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐱𑐵𑐎𑑂𑐫 𑐳𑐸𑐬𑐾𑐣, 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐫𑐖𑑂𑐘𑐩𑐵𑐣𑐥𑐟𑐶 𑐧𑐖𑑂𑐬𑐵𑐔𑐵𑐬𑑂𑐫 , 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐜𑐵. 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐳𑐩𑐵𑐖𑐳𑐾𑐰𑐷 𑐳𑐸𑐰𑐬𑑂𑐞 𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬, 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶, 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬 𑐰 𑐰𑐶𑐱𑑂𑐰 𑐱𑐵𑐎𑑂𑐫𑐥𑐶𑐣𑑂𑐳𑑄 𑐳𑐦𑐹 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐳𑐡𑐳𑑂𑐫 𑐳𑐔𑐶𑐰 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐂𑐣𑑂𑐳𑐵𑐂𑐎𑑂𑐮𑑀𑐥𑐾𑐜𑐶𑐫𑐵𑐎𑐠𑑄 𑐎𑐫𑐵𑐟𑑅𑐐𑐸 ‘𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱’𑐫𑐵 𑐣𑑂𑐫𑐵𑐐𑐹 𑐧𑑂𑐰 𑐣𑐾𑐰𑐵𑑅 𑐳𑐩𑐵𑐖𑐫𑐵 𑐣𑑂𑐫𑐵𑐩𑑂𑐴 𑐰𑐶𑐱𑐶𑐲𑑂𑐚𑐥𑐶𑑄 𑐥𑐵𑐏𑐾𑑄 𑐩𑑄𑐎𑐵𑑅𑐎𑐠𑑄 𑐥𑐶𑐟 𑐧𑐶𑐮 𑑋 𑐎𑑂𑐬𑑀𑐢𑐎𑐮𑐵 𑐱𑐶𑐬𑑀𑐩𑐞𑐶 𑐎𑐵𑐮𑐸 𑐎𑐸𑐩𑑂𑐴𑐵𑑅, 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐰𑐬𑐶𑐲𑑂𑐛 𑐳𑑄𑐐𑐷𑐟𑐎𑐬𑑂𑐩𑐷 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶, 𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐫𑐖𑑂𑐘𑐩𑐵𑐣𑐥𑐟𑐶 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐳𑐸𑐰𑐬𑑂𑐞 𑐔𑐶𑐟𑑂𑐬𑐎𑐵𑐬𑑄 𑐬𑐵𑐲𑑂𑐚𑑂𑐬𑐶𑐫 𑐣𑐵𑐔𑐑𑐬𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑑂𑐘𑐵𑐣𑐎𑑀𑐲𑐫𑐵 𑐠𑐷𑐠𑐷 𑐧𑑂𑐰 𑐥𑐶𑐟𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐘𑐵𑐣𑐎𑑀𑐱𑐫𑐵 ‘𑐣𑐾𑐰𑐵𑑅 𑐩𑑂𑐴𑐳𑐷𑐎𑐵’, ‘𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵’, ‘𑐨𑐵𑐲𑐵, 𑐮𑐶𑐥𑐶 𑐰 𑐳𑐵𑐴𑐶𑐟𑑂𑐫’, ‘𑐩𑑂𑐫𑐾, 𑐧𑐵𑐖𑑄 𑐰 𑐥𑑂𑐫𑐵𑐏𑑄’ 𑐰 ‘𑐱𑐶𑐮𑑂𑐥, 𑐥𑑂𑐬𑐰𑐶𑐢𑐶 𑐰 𑐖𑑂𑐘𑐵𑐣’ 𑐫𑐵𑐣𑐵𑑅 𑐣𑑂𑐫𑐵𑐐𑐹 𑐧𑑂𑐰𑐫𑑂 𑐩𑐸𑐎𑑂𑐎𑑄 𑑒𑑘 𑐳𑐫 𑐥𑐺𑐲𑑂𑐛 𑐡𑐸 𑑋
𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐷 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑃𑐎𑐠𑑄 𑐫𑐾𑑃𑐩𑐣𑐥𑐵𑐫𑐵 𑐄𑐥𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬, 𑐫𑐾𑑃 𑐩𑐣𑐥𑐵𑐫𑐵 𑐄𑐥-𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮, 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐁𑐱𑐵𑐩𑐵𑐣 𑐳𑑄𑐐𑐟𑐥𑐶𑑄𑐳𑑄 𑐣𑐸𑐐𑑅 𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐳𑐦𑐹 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐩𑐶𑑄 𑐡𑐫𑐾𑐎𑐵𑑅 𑐥𑐶𑐠𑑄𑐐𑐸 𑐏𑑅 𑑋