𑐣𑐾𑐥𑐵𑐮 𑐮𑐶𑐥𑐶𑐫𑐵 𑐩𑑂𑐴𑐳𑐷𑐎𑐵 – 𑐳𑐬𑐡 𑐎𑐳𑐵𑑅

𑐣𑐾𑐥𑐵𑐮 𑐀𑐢𑐶𑐬𑐵𑐖𑑂𑐫𑐫𑑂 𑐰𑐶𑐱𑐾𑐲𑐫𑐵𑐣𑐵 𑐳𑑂𑐰𑐣𑐶𑐐𑐮𑐫𑑂 𑐐𑐸𑐮𑐶𑐣𑑄 𑐥𑐸𑐬𑐵𑐟𑐵𑐟𑑂𑐰𑐶𑐎, 𑐋𑐟𑐶𑐴𑐵𑐳𑐶𑐎 𑐟𑐠𑐵 𑐥𑐸𑐮𑐵𑑄 𑐥𑐸𑐮𑐵𑑄𑐐𑐸 𑐢𑐵𑐬𑑂𑐩𑐶𑐎–𑐳𑐵𑑄𑐳𑑂𑐎𑐺𑐟𑐶𑐎 𑐴𑐮𑑄𑐖𑑂𑐰𑐮𑑄𑐟 𑐡𑐸 𑐰 𑐦𑐸𑐎 𑐢𑐿𑐠𑐾𑑄 𑐮𑑂𑐰𑐴𑑃𑐥𑐟𑑂𑐟𑐶𑐂 (𑐱𑐶𑐮𑐵𑐮𑐾𑐏𑐫𑑂), 𑐟𑐵𑐮𑐟𑑂𑐬𑐫𑑂 (𑐴𑐬𑐶𑐟𑐵𑐮𑐥𑐟𑑂𑐬𑐫𑑂) , 𑐣𑐷𑐮𑐥𑐟𑑂𑐬𑐫𑑂 , 𑐳𑑂𑐰𑐬𑑂𑐞𑐥𑐟𑑂𑐬𑐫𑑂 ,𑐨𑐹𑐖𑐵𑐥𑐟𑑂𑐬𑐫𑑂 ,𑐎𑐵𑐲𑑂𑐛𑐥𑐟𑑂𑐬𑐫𑑂 ,𑐂𑐳𑑂𑐚𑐶𑐎𑐵𑐥𑐟𑑂𑐬𑐫𑑂 , 𑐟𑐵𑐩𑑂𑐬𑐥𑐟𑑂𑐬𑐫𑑂 , 𑐠𑐷𑐠𑐷 𑐎𑐠𑑄𑐫𑐵 𑐨𑑂𑐰𑑃𑐟𑐫𑑂 𑐰 𑐠𑑂𑐫𑐵𑐳𑐦𑐸𑐟𑐶𑐂 𑐥𑑂𑐬𑐵𑐔𑐶𑐣 𑐮𑐶𑐥𑐶𑐂 𑐎𑐶𑐫𑐵𑐟𑑅𑐐𑐸 𑐔𑑂𑐰𑐫𑐵𑐟𑑅𑐐𑐸 𑐗𑐶𑐳𑑄 𑐏𑑄𑐎𑐵𑐔𑑂𑐰𑐣𑐵 𑑋 𑐠𑐸𑐖𑑀𑐐𑐸 𑐩𑐴𑑀𑐟𑑂𑐰𑐥𑐹𑐬𑑂𑐞𑐐𑐸 𑐴𑐮𑑄𑐖𑑂𑐰𑐮𑑄 𑐀𑐢𑑂𑐫𑐫𑐣, 𑐀𑐣𑑂𑐰𑐾𑐲𑐞 𑐰 𑐀𑐣𑐸𑐱𑐣𑑂𑐢𑐵𑐣 𑐫𑐵𑐫𑐾𑐟 𑐠𑐷𑐠𑐷 𑐎𑐠𑑄𑐫𑐵 𑐮𑐶𑐥𑐶𑐳 (Scripts) 𑐔𑑂𑐰𑐫𑐵𑐟𑑅𑐐𑐸 𑐰𑐬𑑂𑐞𑐩𑐵𑐮𑐵 𑐀𑐟𑐶𑐎𑑄𑐴𑐾 𑐁𑐰𑐱𑑂𑐫𑐎 𑐖𑐸𑐐𑐸𑐮𑐶𑑄 𑐠𑐣 𑐠𑐷𑐠𑐷 𑐎𑐠𑑄𑐫𑐵 𑐮𑐶𑐥𑐶 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐰𑐬𑑂𑐞𑐩𑐵𑐮𑐵𑐫𑐵 𑐀𑐢𑑂𑐫𑐫𑐣 𑐫𑐵𑐣𑐵𑑅𑐐𑐸 𑐖𑐸𑐮 𑑋
𑐣𑐾𑐥𑐵𑐮 𑐮𑐶𑐥𑐶𑐫𑐵 𑐩𑑂𑐴𑐳𑐷𑐎𑐵:-

𑐳𑐺𑐲𑑂𑐚𑐶𑐫𑐵 𑐁𑐬𑐩𑑂𑐨𑑄𑐣𑐶𑐳𑐾 𑐴𑐾 𑐩𑐵𑐣𑐰𑐷𑐫 𑐀𑐣𑐸𑐨𑐰𑑄 𑐖𑑂𑐘𑐵𑐣𑐫𑐵 𑐬𑐸𑐥 𑐎𑐵𑐫𑐐𑐸 𑐱𑐸𑐬𑐸 𑐫𑐵𑐟 | 𑐀𑐮𑐾 𑐎𑐠𑐴𑑄 𑐠𑑂𑐰 𑐴𑐾 𑐖𑑂𑐘𑐵𑐣𑑄 𑐮𑐶𑐥𑐶𑐧𑐡𑑂𑐢 𑐖𑐸𑐫𑐵: 𑐔𑐶𑐟𑑂𑐬𑐮𑐾𑐏 𑐀𑐠𑐰𑐵 𑐱𑐧𑑂𑐡𑐮𑐾𑐏 𑐀𑐨𑐶𑐮𑐾𑐏𑐟𑐫𑑂𑐐𑐸 𑐬𑐸𑐥 𑐎𑐵𑐮 | 𑐰𑐶𑐱𑑂𑐰𑐫𑑂 𑐐𑐸𑐮𑐶 𑐣𑑄 𑐮𑐶𑐥𑐶 𑐡𑐸 , 𑐨𑐵𑐲𑐵𑐫𑐵 𑐖𑐣𑑂𑐩 𑐮𑐶𑐥𑐶 𑐳𑐶𑐎𑑄 𑐣𑑂𑐴𑐵𑐥𑐵𑑄 𑐖𑐸𑐮, 𑐮𑐶𑐥𑐶𑐫𑐵 𑐖𑐣𑑂𑐩 𑐮𑐶𑐥𑐵 𑐟𑐶𑐣𑐶 𑐖𑐸𑐮 | 𑐕𑐵𑐫𑑂𑐎𑐶 𑐮𑐶𑐥𑐶𑐫𑐵 𑐳𑐩𑑂𑐧𑐣𑑂𑐢 𑐔𑐶𑑄𑐥𑐵𑐏𑐾 𑐡𑐸 | 𑐨𑐵𑐫𑑂 𑐢𑐫𑐵𑐐𑐸 𑐕𑐩𑑂𑐴𑐾𑐳𑐶𑐣𑑄 𑐩𑐾𑐩𑑂𑐴𑐾𑐳𑐶𑐟 𑐠:𑐐𑐸 𑐏𑑃 𑐎𑐣𑐾𑐫𑐵 𑐣𑐶𑐟𑐶𑑄 𑐏: | 𑐳𑐸𑑄 𑐣𑑄 𑐥𑑂𑐬𑐞𑐷𑐫𑐵 𑐣𑐶𑑄𑐟𑐶𑑄 𑐠:𑐐𑐸 𑐏𑑃 𑐀𑐨𑐶𑐰𑑂𑐫𑐎𑑂𑐟 𑐫𑐵𑐫𑐾𑐐𑐸 𑐩𑐵𑐢𑑂𑐫𑐩 𑐢𑐫𑐵𑐐𑐸 𑐴𑐾 𑐨𑐵𑐫𑑂 𑐏: | 𑐠𑑂𑐰 𑐄𑐟𑐶𑑄𑐎 𑐁𑐧𑐱𑑂𑐫𑐎 𑐰 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹 | 𑐀𑐠𑐾 𑐴𑐾 𑐠𑑂𑐰 𑐨𑐵𑐫𑑂𑐫𑐵𑐟 𑐣𑑄 𑐳𑑄𑐔𑐫 𑐫𑐵𑐫𑐾𑐐𑐸 𑐰 𑐀𑐨𑐶𑐮𑐾𑐏 𑐟𑐫𑐾𑐫𑐵 𑐣𑐶𑑄𑐟𑐶𑑄 𑐕𑐟𑐵 𑐔𑐷𑐖𑐫𑐵 𑐁𑐧𑐱𑑂𑐫𑐎𑐟𑐵 𑐖𑐸𑐂,𑐰 𑐏: 𑐁𑐏: 𑐰𑐵 𑐮𑐶𑐥𑐶 | 𑐐𑐸𑐐𑐸𑑄 𑐣𑑄 𑐡𑐾𑐫𑑂𑐫𑐵 𑐂𑐟𑐶𑐴𑐵𑐳,𑐢𑐬𑑂𑐩,𑐳𑑄𑐳𑑂𑐎𑐺𑐟𑐶,𑐎𑐮𑐵, 𑐳𑐵𑐴𑐶𑐟𑑂𑐫 𑐰 𑐠𑐷 𑐠𑐷 𑐧𑐶𑐲𑐫𑐫𑐵 𑐡𑐸𑐐𑑂𑐫𑑄𑐐𑐸 𑐁𑐢𑑂𑐫𑐫𑐣 𑐰 𑐀𑐣𑐸𑐳𑐣𑑂𑐢𑐵𑐣𑐫𑐵 𑐣𑐶𑑄𑐟𑐶𑑄 𑐄𑐐𑐸 𑐡𑐾𑐫𑑂𑐫𑐵 𑐠𑐷 𑐠𑐷 𑐮𑐶𑐥𑐶𑐫𑐵 𑐖𑑂𑐘𑐵𑐣 𑐩𑐡𑐫𑐾𑐎𑑄 𑐩𑐐𑐵: | 𑐠𑐣 𑐰𑐶𑐱𑐾𑐲 𑐫𑐵𑐣𑐵: 𑐣𑐾𑐥𑐵:𑐫𑐵 𑐔𑐵𑐫𑑂 𑐧𑑂𑐰𑐮𑑄𑐐𑐸 𑐣𑐾𑐥𑐵𑐮 𑐮𑐶𑐥𑐶 𑐩𑑂𑐴𑐳𑐷𑐎𑐾𑐥𑐵𑐏𑐾 𑐰𑐣𑐾|

𑐣𑐾𑐥𑐵𑐮 𑐮𑐶𑐥𑐶 :-
𑐣𑐾𑐥𑐵𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐏𑐣𑐾𑐡𑐸𑐐𑐸 𑐎𑐶𑐬𑐵𑐟𑐎𑐵𑐮𑐫𑑂 𑐧𑐶.𑐳𑑄.𑐥𑐹𑐬𑑂𑐰 𑑒𑑒𑑖 𑐣𑐶𑐳𑐾𑑄 𑑒𑑓𑑒 𑐟𑐎𑐫𑐵 𑐥𑐸𑐮𑐵𑑄𑐐𑐸 𑐣𑐶𑐐𑐹 𑐀𑐨𑐶𑐮𑐾𑐏 𑐣𑐶𑐐𑑂𑐮𑐷𑐴𑐰𑐵𑐫𑑂 𑐡𑐸𑐐𑐸 𑐟:𑐢𑑄𑐐𑐸 𑐥𑐸𑐏𑐹𑐫𑐵 𑐳𑐶𑐠𑐫𑑂𑐔𑑂𑐰𑑄𑐐𑐸 𑐀𑐱𑑀𑐎 𑐳𑑂𑐟𑐩𑑂𑐨 𑐰 𑐱𑐵𑐎𑑂𑐫𑐩𑐸𑐣𑐷 𑐧𑐸𑐡𑑂𑐢𑐫𑐵 𑐖𑐣𑑂𑐩𑐨𑐹𑐩𑐶 𑐮𑐸𑐩𑑂𑐧𑐶𑐣𑐷𑐳 𑐡𑐸𑐐𑐸 𑐀𑐱𑑀𑐎𑐳𑑂𑐟𑐩𑑂𑐨 𑐏:| 𑐠𑐸𑐥𑐶𑑄 𑐀𑐨𑐶𑐮𑐾𑐏 𑐧𑑂𑐬𑐵𑐴𑑂𑐩𑐷 𑐮𑐶𑐥𑐶𑑄 𑐔𑑂𑐰𑐫𑐵𑐟:𑐐𑐸 𑐏:| 𑐠𑑂𑐰 𑐢𑐸𑑄𑐎𑐵: 𑐣𑐾𑐥𑐵𑐮𑐫𑑂 𑐮𑐶𑐔𑑂𑐕𑐰𑐶𑐎𑐵𑐮𑐫𑑂 𑐥𑐹𑐬𑑂𑐰 𑐮𑐶𑐔𑑂𑐕𑐰𑐶 𑐮𑐶𑐥𑐶 𑐰 𑐄𑐟𑑂𑐟𑐬 𑐮𑐶𑐔𑑂𑐕𑐰𑐶 𑐮𑐶𑐥𑐶 𑐏𑐣𑐾𑐡𑐟 | 𑐠𑐸𑐥𑐶𑑄 𑐮𑐶𑐥𑐶𑐫𑐵𑐟 𑐣𑑂𑐴𑐵𑐥𑐵𑑄 𑐐𑐸𑐥𑑂𑐟𑐵𑐎𑑂𑐲𑐬 𑐰𑐵 𑐐𑐸𑐥𑑂𑐟 𑐮𑐶𑐥𑐶 𑐰 𑐎𑐸𑐚𑐶𑐮𑐵𑐎𑑂𑐲𑐬 𑐰𑐵 𑐎𑐸𑐚𑐶𑐮𑐵 𑐮𑐶𑐥𑐶 𑐢𑐎𑐵: 𑐣𑑄 𑐢𑐵𑐃 | 𑐮𑐶𑐥𑐵 𑐄𑐟𑑂𑐟𑐬 𑐮𑐶𑐔𑑂𑐕𑐰𑐶 𑐮𑐶𑐥𑐶 𑐰𑐵 𑐎𑐸𑐚𑐶𑐮𑐵 𑐮𑐶𑐥𑐶𑐥𑐵𑐏𑐾𑑄 𑐴𑐾 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐧𑐶𑐎𑐵𑐳 𑐖𑐸𑐮 | 𑐧𑐵𑐳𑑂𑐟𑐰𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐢𑐵𑐫𑐾𑐧𑐮𑐫𑑂 𑐮𑐶𑐥𑐶 𑐰𑐶𑐎𑐵𑐳𑐫𑐵 𑐎𑑂𑐬𑐩𑐫𑑂 𑐣𑐾𑐥𑐵:𑐫𑐵 𑐠:𑐐𑐸 𑐴𑐾 𑐮𑐶𑐥𑐶𑐎𑐠𑑄 𑐣𑐵𑐮𑐵𑐎𑐵𑐫𑐾𑐦𑐸𑐐𑐸 𑐐𑐸𑐟𑐵 𑐮𑐶𑐥𑐶 𑐏𑐣𑐾𑐡𑐸 ,𑐐𑐸𑐐𑐸 𑐠𑐠𑐾 𑐡𑐸 :-

𑐣𑐾.𑐳.𑑗𑑗𑑔 𑐫𑐵 𑐥𑑂𑐬𑐟𑐵𑐥 𑐩𑐮𑑂𑐮𑐫𑐵 𑐴𑐣𑐸𑐩𑐵𑐣 𑐢𑑂𑐰𑐵𑐏𑐵𑐫𑐵 𑐗𑐶𑑄𑐣𑑂𑐫𑐵𑐟𑐵 𑐮𑐶𑐥𑐶𑐫𑐵 𑐀𑐨𑐶𑐮𑐾𑐏𑐫𑑂 𑐣𑑂𑐴𑑂𑐫𑐠𑐣𑐵𑐟:𑐎𑐠𑑄 :-
𑑑. 𑐣𑐾𑐰𑐵𑐬 𑐁𑐏𑐬 (𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶)
𑑒. 𑐬𑐘𑑂𑐖𑐣𑐵
𑑓. 𑐐𑑀𑐮𑐩𑑀𑐮
𑐣𑐾.𑐳𑑄.𑑑𑑐𑑔𑑖 𑐳𑑄 𑐢𑐩𑑂𑐩𑐁𑐡𑐶𑐟𑑂𑐫 𑐢𑐩𑑂𑐩𑐵𑐔𑐵𑐬𑑂𑐫𑐖𑐸𑐫𑐵 “Nepalese Language and Literature: A Short History and Bibliography of Nepal Basha of Nepalese”𑐢𑐫𑐵𑐐𑐸 𑐮𑐾𑐏𑐫𑑂 𑐣𑑂𑐴𑑂𑐫𑐠𑐣𑐵𑐟:𑐐𑐸 𑐠𑐥 𑐣𑐵𑑄𑐎𑐠𑑄 :-
𑑔. 𑐨𑐸𑐖𑐶𑑄𑐩𑑀𑐮
𑑕. 𑐥𑐵𑐔𑐸𑐩𑑀𑐮

𑐣𑐾.𑐳𑑄.𑑑𑑐𑑗𑑓 𑐫𑑂 𑐴𑐾𑐩𑐬𑐵𑐖 𑐱𑐵𑐎𑑂𑐫𑐧𑑄𑐱𑐖𑐸𑐫𑐵 𑐳𑐦𑐹 “𑐣𑐾𑐥𑐵𑐮 𑐮𑐶𑐥𑐶 𑐳𑑄𑐐𑑂𑐬𑐴” 𑐳 𑐩𑐾𑐐𑐸 𑐄𑐥𑑂𑐰: 𑐣𑐵𑑄 𑐧𑐶𑐫𑐵𑐟:𑐐𑐸𑐎𑐠𑑄 :–
𑑖. 𑐎𑐸𑑄𑐩𑑀𑐮
𑑗. 𑐎𑑂𑐰𑐾𑑄𑐩𑑀𑐮
𑑘, 𑐴𑐶𑑄𑐩𑑀𑐮
𑑙. 𑐮𑐶𑐟𑐸𑐩𑑀𑐮
𑐠𑐸𑐥𑐶𑑄 𑐡𑐎𑑂𑐰𑑄 𑐮𑐶𑐥𑐶𑐫𑐵𑐟 𑐣𑐾𑐥𑐵𑐮 𑐮𑐶𑐥𑐶 𑐢𑐵𑐫𑐾𑐐𑐸 𑐔𑐮𑐣 𑐡𑐸𑐳𑐵𑑄 𑐮𑐶𑐥𑐵 𑐰𑐫𑐵: 𑐣𑐾𑐥𑐵𑐮 𑐮𑐶𑐥𑐶 𑐢𑐎𑐵: 𑐥𑑂𑐬𑐔𑐮𑐶𑐟 𑐮𑐶𑐥𑐶𑐫𑐵𑐟 𑐖𑐎 𑐠𑐸𑐂𑐎𑐵𑐫𑑄𑐎𑐵𑐔𑑂𑐰𑐣 |

𑐠𑐸𑐎𑐠𑑄 𑐣𑐾𑐥𑐵𑐮 𑐮𑐶𑐥𑐶 𑐩𑑂𑐴𑐳𑐶𑐎𑐾 𑐢𑐸𑑄𑐎𑐵: 𑐠𑑂𑐰 𑐮𑐶𑐥𑐶 𑐕𑑂𑐫𑐮𑐵𑐟:𑐐𑐸𑐮𑐷 𑐮𑑂𑐰:𑐩𑑄𑐎𑐾 𑐩𑐖𑑂𑐫𑐹𑐐𑐸 𑐏𑑃𑐥𑐵𑐏𑐾 𑐕𑐎𑑂𑐰: 𑐣𑑄 𑐰𑐣𑐾 |

𑐎. 𑐥𑐵𑐞𑑂𑐜𑐸𑐮𑐶𑐥𑐶 𑐰 𑐀𑐨𑐶𑐮𑐾𑐏𑐟𑐫𑐐𑐸 𑐀𑐢𑑂𑐫𑐫𑐣𑑄 𑐠𑐸𑐥𑐶𑑄 𑐮𑐶𑐥𑐶𑐫𑐵 𑐄𑐥𑐫𑑀𑐐 𑐣𑐾𑐥𑐵𑐮𑐨𑐵𑐲𑐵𑐳𑐶𑐧𑐫𑑂 𑐀𑐥𑑂𑐰: 𑐳𑑄𑐳𑑂𑐎𑐺𑐟𑐫𑐵 𑐣𑐶𑑄𑐟𑐶𑑄 𑐖𑐸𑐐𑐸 𑐡𑐸 |

𑐏. 𑐨𑐵𑐲𑐵,𑐡𑐾𑐱𑐨𑐵𑐲𑐵 𑐰𑐵 𑐣𑐾𑐥𑐵𑐮𑐨𑐵𑐲𑐵 𑐠𑐾𑑄 𑐖𑐵:𑐐𑐸 𑐏𑑃𑐐𑑂𑐰: 𑐗𑐶𑑄𑐣𑑂𑐫𑐵𑐐𑐹𑐐𑐸 𑐱𑐟𑐵𑐧𑑂𑐡𑐷𑐣𑐶𑐳𑐾𑑄 𑐀𑐥𑑂𑐰: 𑐥𑑂𑐬𑐔𑐮𑐶𑐟 𑐖𑐹𑐐𑐸 𑐏𑐣𑐾𑐡𑐸,𑐖𑐧 𑐎𑐶 𑐠𑑂𑐰 𑐣𑐵𑑄𑐫𑐵 𑐮𑐶𑐥𑐶𑐫𑐵 𑐔𑐮𑐣 𑐩𑑂𑐴𑑀𑐟𑐶𑑄 𑐣𑐶𑑄 𑐠𑐸𑐎𑐶𑐫𑐵 𑐥𑑂𑐫𑐳𑑄: 𑐡𑑃 𑐣𑑂𑐴𑑂𑐫𑐫𑐣𑐶𑐳𑐾𑑄 𑐖𑐸𑐫𑐵𑐰:𑐐𑐸 𑐡𑐸|

𑐐. 𑐮𑐶𑐥𑐶𑐫𑐵 𑐳𑐩𑑂𑐧𑐣𑑂𑐢 𑐣𑑂𑐴𑑂𑐫𑐵𑐧𑐮𑐾𑑄 𑐨𑐵𑐲𑐵 𑐧𑐶𑐱𑐾𑐲𑐮𑐶𑐳𑐾 𑐖𑐎 𑐳𑑂𑐰𑐵𑐫𑐾𑐐𑐸 𑐄𑐥𑐫𑐸𑐎𑑂𑐟 𑐖𑐸𑐂𑐩𑐏𑐸 | 𑐡𑐳𑐸𑐫𑐵 𑐮𑐵𑐐𑐶 𑐧𑑂𑐬𑐵𑐴𑑂𑐩𑐷𑐫𑐵 𑐳𑐩𑑂𑐧𑐣𑑂𑐢 𑐐𑐸𑐮𑐶 𑐥𑐵𑐮𑐶𑐮𑐶𑐳𑐾 𑐡𑐸 , 𑐄𑐮𑐶 𑐴𑐾 𑐳𑑄𑐳𑑂𑐎𑐺𑐟𑐣𑐵𑐥 𑐣𑑄 𑐡𑐸 | 𑐀𑑄𑐐𑑂𑐬𑐾𑐖𑐷𑐨𑐵𑐲𑐵 𑐬𑑀𑐩𑐣 𑐮𑐶𑐥𑐶𑐂 𑐔𑑂𑐰𑐂 𑐰 𑐁𑐢𑐸𑑄𑐣𑐶𑐎 𑐣𑐾𑐰𑐵:𑐨𑐵𑐫𑑂 𑐡𑐾𑐰𑐣𑐵𑐐𑐬𑐷𑐂 𑐔𑑂𑐰𑐂 |

𑐑. ‘𑐣𑐾𑐥𑐵𑐮 𑐮𑐶𑐥𑐶 ‘ 𑐕𑐐𑐹 𑐴𑐾 𑐎𑐠𑑄𑐫𑐵 𑐮𑐾𑐏𑐵𑐂𑐫𑐵 𑐣𑐵𑑄 𑐩𑐏𑐸 | 𑐂𑐮𑐫𑑂 𑐰𑑂𑐫𑐮𑐫𑑂 𑐠𑐸𑐎𑐷 𑐀𑐣𑐾𑐎 𑐴𑐶𑐄𑐥𑐵: 𑐰:𑐐𑐸 𑐏𑐣𑐾𑐡𑐸 | 𑐠𑐸𑐎𑐶𑐫𑐵 𑐡𑐸𑐣𑐾 𑐀𑐣𑐾𑐎 𑐱𑐿𑐮𑐷 𑐮𑐵: |

𑐒. 𑐠𑐶𑐠𑐶𑐎𑐠𑑄𑐫𑐵 𑐮𑐾𑐏𑐵𑐂 𑐣𑐵𑐥𑐣𑐵𑐥𑑄 𑐥𑑂𑐬𑐔𑐮𑐶𑐟 𑐖𑐸𑐂𑐐𑐸 𑐰 𑐄𑐐𑐸 𑐁𑐏:𑐫𑐵 𑐁𑐣𑑂𑐟𑐬𑐶𑐎 𑐳𑑂𑐰𑐬𑐹𑐥𑐫𑑂 𑐩𑑁𑐮𑐶𑐎 𑐨𑐶𑐣𑑂𑐣𑐟𑐵 𑐏𑐣𑐾𑐩𑐡𑐸𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐮𑐶𑐥𑐶𑐂 𑐩𑐾𑐐𑐸 𑐧𑐶𑐱𑐾𑐲𑐟𑐵 𑐏: |

𑐣𑐾𑐥𑐵:𑐫𑐵 𑐠𑐸𑐥𑐶𑑄 𑐴𑐾 𑐩𑑁𑐮𑐶𑐎 𑐮𑐶𑐥𑐶 𑐣𑐾𑐥𑐵𑐮 𑐮𑐶𑐥𑐶 𑐬𑐵𑐲𑑂𑐚𑑂𑐬𑐶𑐫, 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐏𑑂𑐫𑐮𑐫𑑂 𑐳𑐮𑑄𑐳: 𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐠:𑐐𑐸 𑐴𑐾 𑐎𑐠𑑄 𑐕𑑂𑐫𑐮𑐵𑐫𑑂𑐧𑐸𑐮𑐵𑐫𑑂 𑐰𑐫𑐵𑐔𑑂𑐰𑑄𑐐𑐸 𑐰 𑐥𑑂𑐬𑐳𑐶𑐡𑑂𑐢𑐶 𑐎𑐵𑐫𑐾𑐟 𑐳𑐦𑐮 𑐖𑐸𑐫𑐵𑐔𑑂𑐰𑑄𑐐𑐸 𑐏: | 𑐣𑐾𑐥𑐵:𑐡𑐸𑐣𑐾 𑐠𑐷𑐠𑐷 𑐱𑐷𑐮𑐵𑐳𑑂𑐟𑐩𑑂𑐨, 𑐰𑑄𑐱𑐵𑐰𑐮𑐷𑐣𑐶𑐳𑐾𑑄 𑐎𑐫𑐵: 𑐡𑑂𑐰𑐮𑑄𑐡𑑂𑐰: 𑐠𑐷𑐠𑐷 𑐥𑐟𑑂𑐬 , 𑐟𑐵𑐩𑑂𑐬𑐥𑐟𑑂𑐬, 𑐟𑐵𑐮𑐥𑐟𑑂𑐬, 𑐳𑐸𑐧𑐬𑑂𑐞𑐥𑐟𑑂𑐬 , 𑐣𑐷𑐮𑐥𑐟𑑂𑐬 𑐁𑐡𑐶 𑐰 𑐥𑐵𑐞𑑂𑐜𑐸𑐮𑐶𑐥𑐶 𑐠𑐸𑐥𑐶𑑄 𑐴𑐾 𑐮𑐶𑐥𑐶𑑄 𑐔𑑂𑐰𑐫𑐵𑐟:𑐐𑐸 𑐡𑐸 |𑐠𑐸𑐥𑐶𑑄 𑐮𑐶𑐥𑐶 𑐎𑐾𑐰𑐮 𑐣𑐾𑐰𑐵 𑐨𑐵𑐫𑑂 𑐫𑐵 𑐣𑐶𑐟𑐶𑑄 𑐖𑐎 𑐕𑑂𑐫𑐮𑐵𑐟𑐵:𑐐𑐸 𑐩𑐡𑐸 | 𑐠𑑂𑐰 𑐴𑐾 𑐮𑐶𑐥𑐶𑐂 𑐳𑑄𑐳𑑂𑐎𑐺𑐟, 𑐩𑐿𑐠𑐶𑐮𑐷, 𑐏𑐳𑐨𑐵𑐫𑑂 𑐁𑐡𑐶𑐫𑐵𑐐𑐸 𑐐𑑂𑐬𑐣𑑂𑐠 𑐣𑑄 𑐩𑐢𑑂𑐫𑐎𑐵𑐮𑐫𑑂 𑐔𑑂𑐰𑐫𑐵𑐟:𑐐𑐸 𑐡𑐸 | 𑐀𑐠𑐾 𑐖𑐸𑐫𑐵: 𑐣𑑂𑐴𑐵𑐥𑐵𑐫𑐵 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶 𑐰 𑐂𑐟𑐶𑐴𑐵𑐳𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐟 𑐣𑑂𑐴𑐵𑐥𑐵𑑄 𑐩𑐡𑐫𑐾𑐎𑑄 𑐩𑐐𑐵:𑐐𑐸 𑐄𑐧𑐮𑐫𑐫𑐵 𑐮𑐶𑐥𑐶 𑐰 𑐨𑐵𑐲𑐵 𑐴𑐾 𑐏: | 𑐗𑐷𑐐𑐸 𑐡𑐾𑐫𑐫𑐵 𑐩𑐴𑐟𑑂𑐰𑐥𑐸𑐬𑑂𑐞 𑐂𑐟𑐶𑐴𑐵𑐳, 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐀𑐢𑑂𑐫𑐫𑐣𑐫𑐵 𑐩𑐹𑐮𑐸𑐏𑐵𑐫𑐵 𑐟𑐵:𑐔𑐵 𑐢𑐵𑐠𑐾𑑄 𑐢𑐵𑐫𑐾𑐩𑐵𑐮 𑐢𑐵:𑐳𑐵 𑐄𑐐𑐸 𑐂𑐫𑐵 𑐮𑐶𑐥𑐶 𑐏: | 𑐮𑐶𑐥𑐶 𑐰 𑐮𑐶𑐥𑐶 𑐰𑐶𑐎𑐵𑐳𑐫𑐵 𑐖𑑂𑐘𑐵𑐣𑐫𑐵 𑐀𑐨𑐵𑐧𑐫𑑂 𑐰𑐵 𑐀𑐥𑐬𑐶𑐥𑐎𑑂𑐰𑐟𑐵𑐫𑑂 𑐕𑐟𑐵 𑐔𑑂𑐰𑐫𑐵𑐟: 𑐐𑐸𑐮𑐷 𑐩𑐾𑐟𑐵 𑐧𑑂𑐰𑑄𑐰𑐣𑐶𑐐𑐸𑐮𑐶𑑄 𑐀𑐬𑑂𑐠𑐫𑐵 𑐀𑐣𑐬𑑂𑐠 𑐖𑐹𑐰𑐣𑐷𑐐𑐸 𑐰 𑐩𑐶𑐟𑐶 𑐣𑐶𑐬𑑂𑐢𑐵𑐬𑐞 𑐁𑐡𑐶𑐂 𑐳𑐬𑑂𑐐: 𑐥𑐵:𑐟𑐵:𑐫𑐵 𑐦𑐬𑐎𑐳𑐩𑐾𑐟 𑐖𑐹𑐰𑐣𑐷𑐐𑐸 𑐖𑐸𑐮 | 𑐄𑐎𑐶𑑄 𑐥𑑂𑐬𑐵𑐔𑐷𑐣 𑐮𑐶𑐥𑐶𑐫𑐵 𑐖𑑂𑐘𑐵𑐣 𑐀𑐟𑑂𑐫𑐵𑐧𑐱𑑂𑐫𑐎 𑐰 𑐀𑐣𑐶𑐧𑐵𑐬𑑂𑐫𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 |