𑐣𑐾𑐥𑐵𑐮𑐮𑐶𑐥𑐶

𑐠𑑂𑐰 𑐁𑐏:𑐫𑐵 𑐳𑑂𑐰𑐬𑐸𑐥𑐫𑐵 𑐧𑐶𑐲𑐫𑐫𑑂 𑐢𑐵𑐫𑐾𑐐𑐸 𑐏:𑐳𑐵 𑐳𑑂𑐰𑐣𑐶𑐐:𑐫𑐵 𑐩𑐮𑑂𑐮𑐃𑐫𑐵 𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶 𑐩𑐿𑐠𑐶𑐮𑐷 𑐮𑐶𑐥𑐶𑐮𑐶𑐳𑐾 𑐥𑑂𑐬𑐵𑐫: 𑐩𑐶𑐮𑐫𑑂 𑐖𑐹𑐰:| 𑐀𑐗 𑐧𑐶𑐲𑐾𑐱 𑐫𑐵𑐣𑐵: 𑐠𑑂𑐰 𑐁𑐏:𑐫𑐵 𑐰𑑂𑐫𑐘𑑂𑐖𑐣𑐰𑐬𑑂𑐞 𑐥𑑄𑐖𑐵𑐧𑐷, 𑐐𑐸𑐖𑐬𑐵𑐟𑐷, 𑐧𑑄𑐐𑐵𑐮𑐷𑐣𑐵𑐥 𑐣𑑄 𑐩𑐶𑐮𑐫𑑂𑐖𑐹 𑐢𑐵𑐫𑐾𑐩𑐵: | 𑐠𑐠𑐾 𑐖𑐹𑐐𑐸𑐫𑐵 𑐴𑐸𑐣𑐶 𑐩𑐮𑑂𑐮 𑐖𑐸𑐖𑐸𑐥𑐶𑐳𑑄 𑐥𑐶𑐣𑐾 𑐥𑑂𑐬𑐡𑐱𑐾𑐫𑐵𑐥𑐶𑑄 𑐧𑐶𑐡𑑂𑐰𑐵𑐣𑐟𑐮𑐶𑐳𑐾 𑐳𑐩𑑂𑐥𑐬𑑂𑐎 𑐟𑐫𑐵𑐔𑑂𑐰𑑄𑐐𑐸𑐮𑐶𑑄 𑐰 𑐩𑐮𑑂𑐮 𑐖𑐸𑐖𑐸𑐥𑐶𑐣𑐶 𑐧𑐿𑐰𑐵𑐴𑐶𑐎 𑐳𑑂𑐰𑐵𑐥𑐹 𑐨𑐵𑐬𑐟𑐫𑐵 𑐠𑐷𑐠𑐷 𑐬𑐵𑐖𑑂𑐫𑐣𑐵𑐥 𑐡𑐸𑐐𑐸𑐮𑐶𑑄 𑐏:| 𑐩𑐾𑐐𑐸 𑐨𑐵𑐬𑐟𑐫𑑂 𑐴𑐾 𑐢𑐵𑐬𑑂𑐩𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐠𑐷𑐠𑐷 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐎𑐮𑐴 𑐰 𑐮𑑂𑐰𑐵𑐥𑐸 𑐫𑐵𑐣𑐵: 𑐄𑐏𑐾𑐔𑑂𑐰𑐐𑐸 𑐢𑐬𑑂𑐩, 𑐳𑐳𑑂𑐎𑐺𑐟𑐶𑐫𑐵 𑐮𑐶𑐳𑐾𑐮𑐶𑐳𑐾𑑄 𑐠𑐣 𑐮𑐶𑐥𑐶𑐫𑐵 𑐣𑑄 𑐥𑑂𑐬𑐰𑐾𑐱 𑐖𑐹𑐐𑐸 𑐴𑐸𑐣𑐶𑑄 𑐏:|

𑐀𑐠𑐾 𑐴𑐾 𑐄𑐐𑐸 𑐂𑐮𑐫𑑂 𑐳𑐵𑐴𑐶𑐟𑑂𑐫𑐶𑐎 𑐬𑐔𑐣𑐵𑐫𑑂 𑐨𑐵𑐫𑑂 𑐣𑐾𑐰𑐵:, 𑐏𑐳, 𑐳𑑄𑐳𑑂𑐎𑐺𑐟, 𑐧𑑄𑐐𑐵𑐮𑐷, 𑐨𑑀𑐖𑐥𑐸𑐬𑐷 𑐁𑐡𑐶 𑐖𑐸𑐳𑐵𑑄 𑐮𑐶𑐥𑐶 𑐢𑐵:𑐳𑐵 𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶 𑐖𑐸𑐫𑐵𑐔𑑂𑐰𑐣𑐷𑐐𑐸𑐮𑐷𑑄 𑐫𑐵𑐣𑐵: 𑐣𑑄 𑐠𑐠𑐾 𑐖𑐸𑐐𑐸 𑐏:| 𑐠𑐣 𑐏𑐵𑐳 𑐫𑐵𑐣𑐵: 𑐠𑑂𑐰 𑐮𑐶𑐥𑐶𑐫𑐵𑐟 𑐣𑐾𑐰𑐵: 𑐖𑐵𑐟𑐶𑐫𑐵 𑐨𑐵𑐲𑐵𑐫𑐵 𑐮𑐶𑐥𑐶 𑐩𑐵𑐣𑐫𑑂 𑐫𑐵𑐣𑐵𑐟:𑐐𑐸 𑐡𑐸 | 𑐢𑐵𑐠𑐾𑑄 𑐢𑐵𑐫𑐾𑐩𑐵𑐮 𑐢𑐵:𑐳𑐵 𑐗𑐷𑐐𑐸 𑐥𑑂𑐬𑐵𑐔𑐷𑐣 𑐳𑐵𑐴𑐶𑐟𑑂𑐫 𑐨𑐞𑑂𑐜𑐵𑐬 𑐡𑐸𑐐𑐸 𑐬𑐵𑐲𑑂𑐚𑑂𑐬𑐶𑐫 𑐀𑐨𑐶𑐮𑐾𑐏𑐵𑐮𑐫, 𑐁𑐱𑐵 𑐳𑐦𑐹𑐎𑐸𑐠𑐶 𑐰 𑐩𑐾𑐩𑐾𑐐𑐸 𑐀𑐨𑐶𑐮𑐾𑐏𑐵𑐮𑐵𑐫𑐫𑐵 𑐧𑐶𑐲𑐫-𑐢𑐮: 𑐀𑐢𑑂𑐫𑐫𑐣 𑐰 𑐀𑐣𑐸𑐳𑐣𑑂𑐢𑐵𑐣 𑐫𑐵𑐟 𑐢𑐵:𑐳𑐵 𑐣𑐾𑐥𑐵𑐮𑐫𑑂 𑐕𑑂𑐫𑐮𑐵𑐧𑐸𑐮𑐵𑐫𑑂 𑐡𑐸𑐐𑐸 𑐦𑐸𑐎𑑂𑐎 𑐮𑐶𑐥𑐶𑐩𑐢𑑂𑐫𑐾 𑐫𑐎𑑂𑐰 𑐐𑑂𑐬𑐣𑑂𑐠
𑐔𑑂𑐰𑐫𑐵𑐟:𑐐𑐸 𑐠𑑂𑐰 𑐴𑐾 𑐮𑐶𑐥𑐶 𑐳𑐶𑐡𑑂𑐢 𑐖𑐹𑐰𑐂 |

𑐠𑑂𑐰 𑐮𑐶𑐥𑐶 𑐐𑐸𑑄𑐐𑐹𑐐𑐸 𑐱𑐟𑐵𑐧𑑂𑐡𑐷𑐣𑐶𑐳𑐾𑑄 𑐥𑑂𑐬𑐔𑐮𑐣𑐫𑑂 𑐰𑐫𑐵: 𑐠𑑁𑑄𑐟𑐎 𑐣𑑄 𑐄𑐟𑐶𑐎𑑄 𑐥𑑂𑐬𑐔𑐮𑐣𑐫𑑂 𑐡𑐣𑐶 | 𑐠𑐸𑐎𑐠𑑄 𑐣𑐾𑐥𑐵𑐮𑐫𑑂 𑐮𑐶𑐔𑑂𑐕𑐰𑐶𑐎𑐵𑐮𑐣𑐶𑐳𑐾𑑄 𑐟:𑐐𑐹𑐩𑐕𑐶 𑐮𑐶𑐥𑐶𑐫𑐵 𑐕𑑂𑐫𑐮𑐵𑐧𑐸𑐮𑐵 𑐫𑐵𑐫𑐵𑑄 𑐩𑐮𑑂𑐮𑐵𑐎𑐵𑐮𑐫𑑂 𑐰𑐫𑐵: 𑐮𑐶𑐥𑐶𑐫𑐵 𑐰𑐶𑐎𑐵𑐳 𑐔𑐬𑐩 𑐳𑐶𑐩𑐵𑐫𑑂 𑐠𑑂𑐫𑐣 | 𑐠𑐸𑐎𑐷 𑐩𑐢𑑂𑐫𑐾 𑐥𑑂𑐬𑐔𑐮𑐶𑐟 𑐣𑐾𑐥𑐵𑐮 𑐮𑐶𑐥𑐶𑑄 𑐠𑐣 𑐧𑐵𑑄𑐮𑐵𑐎 𑐴𑐵 𑐎𑐫𑐵𑐫𑑄𑐎𑐹𑐐𑐸 𑐏𑐣𑐾𑐡𑐸 |

-𑐳𑐬𑐡 𑐎𑐳𑐵𑑅

source : jheeguinformation.com