𑐣𑐾𑐥𑐵𑐮𑐨𑐵𑐲𑐵–𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 : 𑐠𑑁𑑄𑐫𑐵 𑐳𑐣𑑂𑐡𑐬𑑂𑐨𑐫𑑂

(𑐣𑐾𑐥𑐵𑐮𑐨𑐵𑐲𑐵 𑐋𑐎𑐾𑐜𑐾𑐩𑐷𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾.𑐳𑑄.𑑑𑑑𑑔𑑒 𑐎𑐕𑐮𑐵𑐠𑑂𑐰 𑐣𑐰𑐩𑐷 (𑐰𑐶.𑐳𑑄.𑑒𑑐𑑗𑑘/𑑐𑑗/𑑒𑑗) 𑐣𑑂𑐴𑑂𑐫𑐧𑑂𑐰𑑅𑐐𑐸 𑐎𑐵𑐬𑑂𑐫𑐥𑐟𑑂𑐬)

𑐣𑑂𑐴𑑂𑐫𑐧𑑂𑐰𑑅𑐩𑑂𑐴 : 𑐜𑐵.𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫

𑑑. 𑐱𑐷𑐬𑑂𑐲𑐎𑐫𑐵 𑐳𑑂𑐥𑐲𑑂𑐚𑐷𑐎𑐬𑐞 :

𑐡𑐎𑑂𑐎𑐳𑐶𑐧𑐾 𑐣𑑂𑐴𑐵𑐥𑐵𑑄 ‘𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 : 𑐠𑑁𑑄𑐫𑐵 𑐳𑐣𑑂𑐡𑐬𑑂𑐨𑐫𑑂’ 𑐣𑐵𑑄𑐐𑐸 𑐠𑐸𑐐𑐸 𑐱𑐷𑐬𑑂𑐲𑐎𑐫𑐵𑐐𑐸 𑐠𑑂𑐰 𑐎𑐵𑐬𑑂𑐫𑐥𑐟𑑂𑐬𑐫𑑂 𑐠𑐸𑐐𑐸 𑐱𑐷𑐬𑑂𑐲𑐎𑐫𑐵 𑐟𑐵𑐟𑑂𑐥𑐬𑑂𑐫, 𑐀𑐨𑐶𑐥𑑂𑐬𑐵𑐫 𑐰 𑐄𑐡𑑂𑐡𑐾𑐱𑑂𑐫𑐫𑐵𑐟 𑐳𑑂𑐥𑐲𑑂𑐚 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐫𑐾 𑑋

𑑑.𑑑. 𑐣𑐾𑐥𑐵𑐮𑐨𑐵𑐲𑐵

𑐣𑐾𑐥𑐵𑐮𑐨𑐵𑐲𑐵 𑐄𑐐𑐸 𑐨𑐵𑐲𑐵 𑐏𑑅, 𑐐𑐸𑐐𑐸 𑐔𑐶𑐣𑐶𑐫𑐵 𑐨𑑀𑐚 𑐨𑐵𑐲𑐵 𑐥𑐬𑐶𑐰𑐵𑐬𑐫𑐵 𑐔𑐷𑐣, 𑐨𑑀𑐚 𑐰 𑐰𑐬𑑂𑐩𑐵𑐮𑐶𑐥𑐵 𑐋𑐟𑐶𑐴𑐵𑐳𑐶𑐎 𑐀𑐨𑐶𑐮𑐾𑐏 𑐡𑐸𑐐𑐸 𑐥𑑂𑐫𑑄𑐐𑐹𑐐𑐸 𑐨𑐵𑐲𑐵 𑐏𑑅 𑑋 𑐠𑑂𑐰 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅 𑐳𑐩𑐸𑐡𑐵𑐫 𑐣𑐾𑐥𑐵𑑅𑐫𑐵 𑐁𑐡𑐶𑐎𑐵𑐮𑐣𑐶𑐳𑐾𑑄 𑐮𑑂𑐴𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐩𑐮𑑂𑐮𑐎𑐵𑐮𑐫𑑂 𑐬𑐵𑐲𑑂𑐚𑑂𑐬𑐨𑐵𑐲𑐵, 𑐡𑐾𑐱𑐨𑐵𑐲𑐵, 𑐬𑐵𑐖𑑂𑐫𑐨𑐵𑐲𑐵𑐫𑐵 𑐬𑐸𑐥𑐫𑑂 𑐣𑐾𑐥𑐵𑐮 𑐬𑐵𑐖𑑂𑐫𑑄 𑐳𑐩𑑂𑐩𑐵𑐣𑐶𑐟 𑐨𑐵𑐲𑐵 𑐏𑑅 𑑋 𑐣𑐾𑐥𑐵𑐮𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐐𑐸 𑐠𑑂𑐰 𑐨𑐵𑐫𑑂𑐫𑐵𑐟 ‘𑐣𑐾𑐰𑐵𑑅 𑐨𑐵𑐫𑑂’ 𑐢𑐵𑐫𑐾𑐐𑐸 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐧𑑁𑐡𑑂𑐢𑐶𑐎, 𑐥𑑂𑐬𑐵𑐖𑑂𑐘𑐶𑐎 𑐎𑑂𑐲𑐾𑐟𑑂𑐬𑐫𑑂 ‘𑐣𑐾𑐥𑐵𑐮𑐨𑐵𑐲𑐵’ 𑐢𑐵𑐫𑐾𑐐𑐸 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑑑.𑑒. 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶

𑐠𑐸𑐎𑐶𑐫𑐵 𑐀𑐬𑑂𑐠 𑐏𑑅 𑐳𑐵𑐴𑐶𑐟𑑂𑐫𑐫𑐵 𑐰𑐶𑐲𑐫𑐫𑐵 𑐳𑐩𑐵𑐮𑑀𑐔𑐣𑐵 𑑋 𑐳𑐩𑐵𑐖𑐫𑐵 𑐁𑐮𑑀𑐔𑐣𑐵 𑐳𑐵𑐴𑐶𑐟𑑂𑐫 𑐏𑑅 𑐠𑐾𑑄, 𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵 𑐏𑑅 𑑋 𑐐𑐠𑐾 – 𑐬𑐵𑐖𑐣𑐿𑐟𑐶𑐎 𑐁𑐮𑑀𑐔𑐣𑐵, 𑐳𑐵𑑄𑐳𑑂𑐎𑐺𑐟𑐶𑐎 𑐁𑐮𑑀𑐔𑐣𑐵, 𑐢𑐵𑐬𑑂𑐩𑐶𑐎 𑐁𑐮𑑀𑐔𑐣𑐵, 𑐁𑐬𑑂𑐠𑐶𑐎 𑐁𑐮𑑀𑐔𑐣𑐵, 𑐱𑐿𑐎𑑂𑐲𑐶𑐎 𑐁𑐮𑑀𑐔𑐣𑐵, 𑐨𑐵𑐲𑐶𑐎 𑐁𑐮𑑀𑐔𑐣𑐵 𑐂𑐟𑑂𑐫𑐵𑐡𑐶 𑐠𑐷𑐠𑐷 𑐎𑐠𑑄𑐫𑐵𑐐𑐸 𑐁𑐮𑑀𑐔𑐣𑐵 𑐡𑐸 𑑋 𑐀𑑄𑐐𑑂𑐬𑐾𑐖𑐷 𑐠𑐸𑐎𑐶𑐫𑐵𑐟 Literary Criticism 𑐢𑐵𑐫𑐾𑐐𑐸 𑐫𑐵𑑅 𑑋 𑐠𑑂𑐰 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵 𑐎𑐰𑐶 𑐀𑐠𑐰𑐵 𑐮𑐾𑐏𑐎 𑐰 𑐥𑐵𑐛𑐎 𑐰𑐬𑑂𑐐 𑐡𑐠𑐸𑐂𑐫𑐵𑐐𑐸 𑐟𑐵𑑄 𑐏𑑅 𑑋

‘𑐁𑐮𑑀𑐔𑐣𑐵–𑐰𑐶𑐢𑐵’ 𑐢𑐿𑐐𑐸 𑐣𑑄 𑐳𑐵𑐴𑐶𑐟𑑂𑐫𑐫𑐵 𑐴𑐾 𑐕𑐐𑐹 𑐩𑐾𑐐𑐸 𑐰𑐶𑐢𑐵𑐎𑐠𑑄 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐁𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐢𑐵 𑐢𑐵𑐫𑐾𑐧𑐮𑐫𑑂 𑐎𑐵𑐰𑑂𑐫, 𑐧𑐵𑐏𑑄, 𑐣𑐶𑐧𑐣𑑂𑐢, 𑐣𑐵𑐚𑐎 (𑐥𑑂𑐫𑐵𑐏𑑄), 𑐄𑐥𑐣𑑂𑐫𑐵𑐳, 𑐖𑐷𑐰𑐣𑐷 𑐁𑐟𑑂𑐩𑐎𑐠𑐵, 𑐣𑐶𑐫𑐵𑐟𑑂𑐬𑐵 𑐠𑐾𑑄 𑐴𑐾 𑐕𑐐𑐹 𑐰𑐶𑐢𑐵𑐎𑐠𑑄 𑐠𑐸𑐂𑐎𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐁𑐮𑑀𑐔𑐣𑐵 𑐢𑐿𑐐𑐸 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐰𑐶𑐢𑐵𑐫𑐵 𑐧𑐵𑐬𑐾 𑐔𑑂𑐰𑐂𑐐𑐸 𑐧𑐶𑐳𑑂𑐎𑑄 𑐥𑐴𑑅𑐫𑐵𑐐𑐸 𑐰𑐶𑐢𑐵 𑐏𑑅 𑑋 𑐄𑐎𑐶𑑄 𑐁𑐮𑑀𑐔𑐣𑐵 𑐢𑐿𑐐𑐸 𑐳𑐵𑐴𑐶𑐟𑑂𑐫𑐫𑐵 𑐀𑐣𑑂𑐟𑐬𑑂𑐐𑐟𑐫𑐵𑐐𑐸 𑐕𑐐𑐹 𑐩𑐾𑐐𑐸 𑐰𑐶𑐢𑐵 𑐩𑐏𑐸, 𑐧𑐬𑐸 𑐩𑐾𑐐𑐸 𑐴𑐾 𑐧𑐶𑐳𑑂𑐎𑑄 𑐰𑐶𑐢𑐵 𑐏𑑅 𑑋 𑐟𑐬 𑐠𑐸𑐮𑐶𑐟𑐎 𑐖𑐸𑐂𑐦𑐸, 𑐁𑐮𑑀𑐔𑐣𑐵𑐫𑑂 𑐣𑑄 𑐳𑐵𑐴𑐶𑐟𑑂𑐫𑐫𑑂 𑐡𑐫𑐾𑐩𑐵𑑅𑐐𑐸 𑐐𑐸𑐮𑐶𑑄 𑐐𑐸𑐞𑐟 𑐡𑐫𑐾𑐩𑐵𑑅 𑐀𑐠𑐰𑐵 𑐡𑐫𑐵𑐔𑑂𑐰𑐣𑐷 𑑋 𑐟𑐬 𑐠𑐸𑐮𑐶𑐫𑐵 𑐴𑐾 𑐁𑐢𑐵𑐬𑐫𑑂 𑐁𑐮𑑀𑐔𑐣𑐵𑐫𑐵𑐟 ‘𑐁𑐮𑑀𑐔𑐣𑐵–𑐳𑐵𑐴𑐶𑐟𑑂𑐫’ 𑐢𑐎𑐵 ‘𑐧𑐵𑐏𑑄–𑐳𑐵𑐴𑐶𑐟𑑂𑐫’, ‘𑐣𑐶𑐧𑐣𑑂𑐢–𑐳𑐵𑐴𑐶𑐟𑑂𑐫’, ‘𑐄𑐥𑐣𑑂𑐫𑐵𑐳–𑐳𑐵𑐴𑐶𑐟𑑂𑐫’ 𑐢𑐵𑐫𑐾 𑐠𑐾𑑄 ‘𑐁𑐮𑑀𑐔𑐣𑐵–𑐳𑐵𑐴𑐶𑐟𑑂𑐫’ 𑐢𑐵𑐫𑐾𑐐𑐸 𑐥𑐵𑐫𑑂𑐕𑐶 𑐩𑐖𑐹 𑐢𑐿𑐐𑐸 𑐖𑐶𑐐𑐸 𑐰𑑂𑐫𑐎𑑂𑐟𑐶𑐐𑐟 𑐰𑐶𑐔𑐵𑐬 𑐏𑑅 𑑋 𑐧𑐬𑐸 ‘𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐣𑐵’ 𑐰𑐵 ‘𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵’ 𑐢𑐵𑐫𑐾𑐐𑐸 𑐥𑐵𑐫𑑂𑐕𑐶 𑐖𑐹 𑑋 𑐀𑑄𑐐𑑂𑐬𑐾𑐖𑐷𑑄 𑐣𑑄 Literary Criticism 𑐀𑐠𑐰𑐵 Literary Qmudies 𑐴𑐾 𑐢𑐵𑐂𑐐𑐸 𑐏𑑅, Criticism Literary 𑐀𑐠𑐰𑐵 Criticism Literature 𑐢𑐵𑐂𑐐𑐸 𑐩𑐏𑐸 𑑋 𑐴𑐶𑐣𑑂𑐡𑐷–𑐳𑐵𑐴𑐶𑐟𑑂𑐫𑐫𑑂, 𑐏𑐳–𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫𑐫𑑂, 𑐣𑐾𑐥𑐵𑐮𑐨𑐵𑐲𑐵–𑐳𑐵𑐴𑐶𑐟𑑂𑐫𑐫𑑂 𑐣𑑄 ‘𑐁𑐮𑑀𑐔𑐣𑐵–𑐳𑐵𑐴𑐶𑐟𑑂𑐫’𑐫𑐵 𑐴𑐾 𑐥𑑂𑐬𑐫𑑀𑐐 𑐰 𑐥𑑂𑐬𑐔𑐮𑐣 𑐫𑐎𑑂𑐎𑑀 𑐡𑐸 𑑋 𑐟𑐬 𑐠𑐸𑐐𑐸 𑐥𑑂𑐬𑐳𑑂𑐟𑐸𑐟 𑐎𑐵𑐬𑑂𑐫𑐥𑐟𑑂𑐬𑐫𑑂 ‘𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵’ 𑐕𑑂𑐫𑐮𑐵𑐟𑐫𑐵𑐐𑐸 𑐡𑐸 𑑋

𑑑.𑑓 𑐠𑑁𑑄𑐫𑐵 𑐳𑐣𑑂𑐡𑐬𑑂𑐨𑐫𑑂

‘𑐠𑑁𑑄𑐫𑐵 𑐳𑐣𑑂𑐡𑐬𑑂𑐨’𑐫𑐵 𑐟𑐵𑐟𑑂𑐥𑐬𑑂𑐫 ‘𑐳𑐩𑐎𑐵𑐮𑐷𑐣 𑐁𑐮𑑀𑐔𑐣𑐵’ 𑐀𑐠𑐰𑐵 Contemporary Criticism 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐏“𑐫𑑂 𑐡𑐎𑑂𑐎𑐳𑐶𑐧𑐾 𑐣𑑂𑐴𑐵𑐥𑐵𑑄𑐩𑑂𑐴 𑐁𑐮𑑀𑐔𑐎 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷, 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫, 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮, 𑐥𑑂𑐬𑐵.𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛, 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣, 𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫𑑄𑐣𑐶𑐳𑑄 𑐠𑑁𑑄𑐟𑐎𑐫𑐵 𑐳𑐩𑐐𑑂𑐬 𑐃𑐫𑐵 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐏𑑅 𑑋

𑐰𑐶𑐱𑑂𑐰𑐫𑑂 𑐳𑐩𑐎𑐵𑐮𑐷𑐣 𑐁𑐮𑑀𑐔𑐣𑐵𑐫𑐵 𑐄𑐔𑑂𑐔–𑐰𑐶𑐎𑐵𑐳 𑐖𑐸𑐂𑐢𑐸𑑄𑐎𑐹𑐐𑐸 𑐠𑑁𑑄𑐫𑐵 𑐳𑑂𑐠𑐶𑐟𑐶𑐂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐕𑐸 𑐐𑐖𑐵𑑅𑐐𑐸 𑐳𑑂𑐠𑐶𑐟𑐶 𑐡𑐸, 𑐕𑐸 𑐐𑐖𑐵𑑅𑐐𑐸 𑐳𑐩𑐳𑑂𑐫𑐵 𑐡𑐸, 𑐄𑐐𑐸 𑐳𑐩𑐳𑑂𑐫𑐵𑐫𑐵 𑐐𑐴𑐣 𑐰 𑐰𑑂𑐫𑐵𑐥𑐎 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐀𑐮𑐾 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣𑐫𑐵 𑐮𑐵𑐐𑐶 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐴𑐾 𑐠𑑂𑐰 𑐎𑐵𑐬𑑂𑐫𑐥𑐟𑑂𑐬𑐫𑐵 𑐩𑐹𑐮 𑐄𑐡𑑂𑐡𑐾𑐱𑑂𑐫 𑐏𑑅, 𑐥𑑂𑐬𑐫𑑀𑐖𑐣 𑐏𑑅 𑑋 𑐄𑐐𑐸 𑐴𑐾 𑐀𑐬𑑂𑐠𑐫𑑂 𑐠𑑂𑐰 𑐎𑐵𑐬𑑂𑐫𑐥𑐟𑑂𑐬𑐫𑐵 𑐠𑐸𑐐𑐸 𑐱𑐷𑐬𑑂𑐲𑐎 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑑒. ‘𑐁𑐮𑑀𑐔𑐣𑐵’, ‘𑐳𑐩𑐵𑐮𑑀𑐔𑐣𑐵’, ‘𑐳𑐩𑐷𑐎𑑂𑐲𑐵’, 𑐱𑐧𑑂𑐡𑐫𑐵 𑐀𑐬𑑂𑐠 𑐰 𑐥𑑂𑐬𑐫𑑀𑐐𑐫𑐵 𑐏𑑃𑐫𑑂

𑐴𑐬𑐾𑐎 𑐱𑐧𑑂𑐡𑐫𑐵 𑐀𑐬𑑂𑐠 𑐰 𑐥𑑂𑐬𑐫𑑀𑐐 𑐕𑐐𑐹 𑐳𑑂𑐰𑐫𑐵𑑄 𑐩𑐾𑐐𑐸 𑐥𑐵𑐣𑐵𑐔𑑂𑐰𑐣𑐷 𑑋 𑐕𑐸𑑄 𑐣𑑄 𑐳𑐵𑐴𑐶𑐟𑑂𑐫𑐶𑐎 𑐎𑐺𑐟𑐶𑐫𑐵 𑐥𑐹𑐰𑑄𑐎 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐐𑐸𑐞 𑐰𑐵 𑐡𑑀𑐲 𑐰𑐵𑐟𑑂𑐟𑐸𑐰𑐵𑐮𑐵𑑅 𑐣𑐶𑐬𑑂𑐞𑐫 𑐧𑐶𑐂𑐐𑐸 𑐖𑑂𑐫𑐵𑐫𑐵 𑐟𑑅𑐠𑐷 𑐣𑐵𑑄 𑐡𑐸 𑑋 𑐐𑐠𑐾 – 𑐁𑐮𑑀𑐔𑐣𑐵, 𑐳𑐩𑐵𑐮𑑀𑐔𑐣𑐵, 𑐳𑐩𑐷𑐎𑑂𑐲𑐵, 𑐩𑐷𑐩𑐵𑑄𑐳𑐵, 𑐰𑐶𑐰𑐾𑐔𑐣𑐵, 𑐀𑐣𑐸𑐱𑐷𑐮𑐣, 𑐩𑐹𑐮𑑂𑐫𑐵𑑄𑐎𑐣, 𑐚𑐷𑐎𑐵, 𑐚𑐶𑐥𑑂𑐥𑐞𑐷, 𑐳𑐬𑑂𑐰𑐾𑐎𑑂𑐲𑐞 𑐁𑐡𑐶 𑑋 𑐟𑐬 𑐠𑑂𑐰 𑐦𑐸𑐎𑑂𑐎 𑐱𑐧𑑂𑐡𑐟𑐥𑐵𑐏𑐾 𑐧𑐶𑐂𑐐𑐸 𑐀𑐬𑑂𑐠 𑐄𑐟𑑂𑐠𑐾𑑄 𑐠𑐾𑑄 𑐔𑑂𑐰𑑄𑐳𑐵𑑄 𑐗𑐷𑐐𑐸 𑐰𑑂𑐫𑐵𑐰𑐴𑐵𑐬𑐶𑐎 𑐥𑑂𑐬𑐫𑑀𑐐𑐫𑑂 𑐥𑐵𑐫𑐕𑐶 𑐖𑐹𑐐𑐸 𑐏𑐣𑐾𑐩𑐡𑐸 𑑋 𑐀𑑄𑐐𑑂𑐬𑐾𑐖𑐷 𑐨𑐵𑐲𑐵𑐫𑑂 𑐣𑑄 criticism, review, evaluation, survey, assessment, comment, judgement, opinion, analysis, interpretation, notice, excoriation, appraisal, appreciation, observation 𑐁𑐡𑐶𑐫𑐵 𑐀𑐬𑑂𑐠 𑐕𑐐𑐹 𑐴𑐾 𑐏𑐣𑐾 𑐡𑐸𑐳𑐵𑑄 𑐱𑐧𑑂𑐡 𑐥𑑂𑐬𑐫𑑀𑐐𑐫𑑂 𑐥𑐵𑐣𑐵𑐔𑑂𑐰𑐣𑐷 𑑋 𑐣𑐾𑐥𑐵𑐮𑐨𑐵𑐲𑐵𑑄 𑐁𑐮𑑀𑐔𑐣𑐵𑐫𑐵𑐟 ‘𑐎𑐸𑑄𑐏𑐶𑐣𑐵’ 𑐱𑐧𑑂𑐡 𑐟𑑂𑐰𑑅𑐟𑐵𑑅 𑐩𑐾𑐐𑐸 𑐏𑐣𑐾𑐩𑐡𑐸 𑑋
𑐔𑑂𑐰𑐫𑑂 𑐣𑑂𑐴𑑂𑐫𑐠𑐣𑐵𑐐𑐸 𑐱𑐧𑑂𑐡𑐫𑐵 𑐀𑐬𑑂𑐠 𑐄𑐟𑑂𑐠𑐾𑑄 𑐔𑑂𑐰𑑄𑐳𑐵𑑄 𑐥𑑂𑐬𑐫𑑀𑐐 𑐰 𑐥𑑂𑐬𑐔𑐮𑐣𑐫𑑂 𑐣𑑄 𑐟𑐳𑑂𑐳𑐎𑑄 𑐳𑐟𑑂𑐟𑐶𑐎 𑐳𑐩𑑂𑐧𑐣𑑂𑐢 𑐡𑐸𑐐𑐸 𑐱𑐧𑑂𑐡𑐟 𑐁𑐮𑑀𑐔𑐣𑐵, 𑐳𑐩𑐵𑐮𑑀𑐔𑐣𑐵, 𑐳𑐩𑐷𑐎𑑂𑐲𑐵 𑐰 𑐰𑐶𑐰𑐾𑐔𑐣𑐵 𑐏𑑅 𑑋 𑐠𑑂𑐰 𑐳𑑂𑐰𑑄𑐐𑐹 𑐱𑐧𑑂𑐡𑐫𑐵 𑐰𑑂𑐫𑐸𑐟𑑂𑐥𑐟𑐶 𑐰 𑐀𑐬𑑂𑐠 𑐠𑐸𑐎𑐠𑑄 𑐡𑐸 –

𑑒.𑑑) 𑐁𑐮𑑀𑐔𑐣𑐵 – 𑐁 + 𑐮𑑀𑐔𑑂 + 𑐀𑐣 + 𑐁 𑑋 𑐠𑐸𑐎𑐶𑐫𑐵 𑐀𑐬𑑂𑐠 𑐕𑐸𑑄 𑐰𑐳𑑂𑐟𑐸 𑐀𑐠𑐰𑐵 𑐎𑐺𑐟𑐶𑐫𑐵 𑐳𑐩𑑂𑐫𑐎𑑂 𑐰𑑂𑐫𑐵𑐏𑑂𑐫𑐵, 𑐄𑐎𑐶𑐫𑐵 𑐩𑐹𑐮𑑂𑐫𑐵𑑄𑐎𑐣 𑐁𑐡𑐶 𑐫𑐵𑐫𑐾𑐐𑐸 𑐴𑐾 𑐁𑐮𑑀𑐔𑐣𑐵 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵𑐫𑑂 ‘𑐁𑐮𑑀𑐔𑐣𑐵’ 𑐱𑐧𑑂𑐡 𑐥𑑂𑐬𑐫𑑀𑐐 𑐫𑐵𑐣𑐵𑑅 𑐔𑑂𑐰𑐫𑐵𑐟𑑅𑐐𑐸 𑐳𑐦𑐹 𑐰 𑐔𑑂𑐰𑐳𑐸 𑐠𑐸𑐎𑐠𑑄 𑐡𑐸 –

𑐁𑐡𑐶𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐐𑐸 𑐕𑐥𑐸 𑐔𑑂𑐰𑐳𑐸 – 𑐀) 𑐁𑐮𑑀𑐔𑐣𑐵, 𑐢𑐬𑑂𑐩𑑀𑐡𑐫, 𑐡“ 𑑒𑑋𑑑𑑐, 𑑒𑑓𑑔–𑑓𑑗
𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸 (𑑑𑑐𑑕𑑖–𑑑𑑑𑑓𑑘) 𑐫𑐵𑐐𑐸 𑐔𑑂𑐰𑐳𑐸𑐟 – 𑐀) 𑐗𑐷𑐐𑐸 𑐳𑐵𑐴𑐶𑐟𑑂𑐫 𑐰 𑐁𑐮𑑀𑐔𑐣𑐵 (𑑑𑑐𑑗𑑙) 𑐁) 𑐣𑐾𑐥𑐵𑐮𑐨𑐵𑐲𑐵𑐫𑑂 𑐁𑐮𑑀𑐔𑐣𑐵 (𑑑𑑐𑑘𑑗) 𑐂) 𑐣𑑅𑐮𑐶 𑐎𑐰𑐶𑐟𑐵 𑐰 𑐣𑐶𑐩𑑂𑐴 𑐁𑐮𑑀𑐔𑐎 𑑋
𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬𑐫𑐵𑐐𑐸 𑐔𑑂𑐰𑐳𑐸 – 𑐀) 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐣𑐵 : 𑐕𑐐𑐹 𑐰𑐶𑐰𑐾𑐔𑐣𑐵 (𑑑𑑐𑑙𑑓)
𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 (𑐣𑐾.𑐳𑑄.𑑑𑑐𑑔𑑗– ) 𑐫𑐵𑐐𑐸 𑐳𑐦𑐹𑐫𑐵 𑐣𑐵𑑄 – 𑐀) 𑐁𑐮𑑀𑐔𑐣𑐵𑐫𑐵 𑐏𑑃, 𑐁) 𑐳𑐵𑐴𑐶𑐟𑑂𑐫𑐫𑑂 𑐁𑐮𑑀𑐔𑐎𑐫𑐵 𑐳𑑂𑐠𑐵𑐣
𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫𑐖𑐸 (𑐣𑐾.𑐳𑑄. 𑑑𑑐𑑔𑑖– ) 𑐫𑐵𑐐𑐸 𑐳𑐦𑐹 – 𑐀) 𑐳𑑁𑐣𑑂𑐡𑐬𑑂𑐫 𑐰 𑐁𑐮𑑀𑐔𑐣𑐵 (𑑑𑑐𑑘𑑗)
𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐖𑐸 𑐫𑐵𑐐𑐸 𑐔𑑂𑐰𑐳𑐸 – 𑐖𑐶𑐐𑐸 𑐣𑐶𑐧𑐣𑑂𑐢 𑐰 𑐁𑐮𑑀𑐔𑐣𑐵
𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣𑐖𑐸 𑐫𑐵𑐐𑐸 𑐔𑑂𑐰𑐳𑐸 – 𑐖𑑀𑐱𑐷𑐖𑐸𑐫𑐵 𑐁𑐮𑑀𑐔𑐣𑐵 : 𑐕𑐐𑐹 𑐥𑑂𑐬𑐵𑐥𑑂𑐟𑐶 𑐕𑐐𑐹 𑐰𑐶𑐔𑐵𑐬 (𑑑𑑑𑑐𑑙)
𑐥𑑂𑐬𑐵. 𑐣𑐬𑑂𑐩𑐡𑐾𑐱𑑂𑐰𑐬𑐩𑐵𑐣 𑐥𑑂𑐬𑐢𑐵𑐣𑐫𑐵𑐐𑐸 𑐳𑐦𑐹 – 𑐀) 𑐳𑑁𑐣𑑂𑐡𑐬𑑂𑐫 𑐰 𑐁𑐮𑑀𑐔𑐣𑐵 (𑑑𑑑𑑒𑑐) 𑑋

𑑒.𑑒) 𑐳𑐩𑐵𑐮𑑀𑐔𑐣𑐵 – 𑐳𑐩𑑂 + 𑐁 + 𑐮𑑀𑐔𑐣𑐵 + 𑐁 𑑋 𑐠𑐸𑐎𑐶𑐫𑐵 𑐀𑐬𑑂𑐠 𑐥𑑂𑐫𑐏𑐾𑐬𑑄 𑐧𑐵𑑄𑐮𑐵𑐎 𑐳𑐩𑑂𑐫𑐎𑑂 𑐬𑐸𑐥𑑄 𑐳𑑂𑐰𑐫𑐾𑐐𑐸 𑐏𑑅 𑑋
𑐥𑑂𑐬𑐵. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐖𑐸𑐫𑐵𑐐𑐸 𑐀) 𑐳𑐦𑐹 – 𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟 (𑐣𑐾.𑐳𑑄. 𑑑𑑐𑑘𑑘) 𑐁) 𑐔𑑂𑐰𑐳𑐸 – 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑐫𑐵 𑐥𑐬𑐩𑑂𑐥𑐬𑐵 𑐰𑐶𑐎𑐵𑐳𑐫𑐵 𑐳𑑂𑐠𑐶𑐟𑐶 (𑑑𑑑𑑐𑑘)
𑐨𑐬𑐟 𑐳𑐵𑐫𑑂𑐩𑐶𑐖𑐸𑐫𑐵 𑐳𑐩𑑂𑐥𑐵𑐡𑐣 𑐳𑐦𑐹 – 𑐧𑐵𑐏𑑄 𑐳𑐩𑐵𑐮𑑀𑐔𑐣𑐵 (𑑑𑑐𑑙𑑕)
𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷𑐖𑐸𑐫𑐵 𑐳𑐦𑐹 – 𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵 𑐳𑐩𑐵𑐮𑑀𑐔𑐣𑐵 (𑐣𑐾.𑐳𑑄.𑑑𑑑𑑔𑑑)
𑐜𑐵. 𑐖𑐣𑐎𑐮𑐵𑐮 𑐰𑐿𑐡𑑂𑐫𑐫𑐵𑐐𑐸 𑐔𑑂𑐰𑐳𑐸 – 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵 (𑐣𑐾.𑐳𑑄. 𑑑𑑑𑑑𑑙)
𑐥𑑂𑐬𑐵. 𑐣𑐬𑑂𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣 – 𑐥𑐵𑐱𑑂𑐔𑐵𑐟𑑂𑐫 𑐳𑐩𑐵𑐮𑑀𑐔𑐣𑐵 𑐳𑐶𑐡𑑂𑐢𑐵𑐣𑑂𑐟 (𑐣𑐾.𑐳𑑄. 𑑑𑑑𑑓𑑘)

𑑒.𑑓) 𑐳𑐩𑐷𑐎𑑂𑐲𑐵 – 𑐳𑐩𑑂 + 𑐃𑐎𑑂𑐲𑑂 + 𑐁 𑑋 𑐠𑐸𑐎𑐶𑐫𑐵 𑐀𑐬𑑂𑐠 𑐧𑐵𑑄𑐮𑐵𑐎 𑐳𑑂𑐰𑐫𑐾𑐐𑐸, 𑐖𑐵“𑐔 𑐫𑐵𑐫𑐾𑐐𑐸, 𑐕𑐸𑑄 𑐰𑐳𑑂𑐟𑐸, 𑐬𑐔𑐣𑐵𑐫𑐵 𑐰𑐶𑐲𑐫𑐫𑐵 𑐳𑐩𑑂𑐧𑐣𑑂𑐢𑐫𑑂 𑐳𑐩𑑂𑐫𑐎𑑂 𑐖𑑂𑐘𑐵𑐣 𑐎𑐵𑐫𑐾𑐐𑐸, 𑐥𑑂𑐬𑐟𑑂𑐫𑐾𑐎 𑐟𑐟𑑂𑐰𑐫𑐵 𑐰𑐶𑐰𑐾𑐔𑐣 𑐫𑐵𑐫𑐾𑐐𑐸 𑐳𑐩𑐷𑐎𑑂𑐲𑐵 𑐏𑑅 𑑋
𑐣𑐾𑐥𑐵𑐮𑐨𑐵𑐲𑐵𑐫𑑂 ‘𑐳𑐩𑐷𑐎𑑂𑐲𑐵’ 𑐱𑐧𑑂𑐡 𑐥𑑂𑐬𑐫𑑀𑐐 𑐫𑐵𑐣𑐵𑑅 𑐔𑑂𑐰𑐫𑐵𑐟𑑅𑐐𑐸 𑐔𑑂𑐰𑐳𑐸 𑐰 𑐳𑐦𑐹𑐟 𑐠𑐸𑐎𑐠𑑄 𑐡𑐸 —
𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐖𑐸𑐫𑐵𑐐𑐸 𑐔𑑂𑐰𑐳𑐸 – 𑐀) 𑐩𑐮𑑂𑐮𑐖𑐸𑐫𑐵 𑐳𑐩𑐷𑐎𑑂𑐲𑐵 𑐥𑐡𑑂𑐢𑐟𑐶 𑐁) 𑐱𑑂𑐬𑐾𑐲𑑂𑐛𑐖𑐸𑐫𑐵𑐐𑐸 𑐳𑐩𑐷𑐎𑑂𑐲𑐵 𑐥𑐡𑑂𑐢𑐟𑐶
𑐖𑐣𑐎𑐮𑐵𑐮 𑐰𑐿𑐡𑑂𑐫𑐖𑐸𑐫𑐵𑐐𑐸 𑐔𑑂𑐰𑐳𑐸𑐫𑐵 𑐣𑐵𑑄 – 𑐀) ‘𑐣𑑂𑐴𑐵𑐫𑑂𑐎𑑄 𑐄𑐥𑐣𑑂𑐫𑐵𑐳𑐫𑐵 𑐳𑐩𑐷𑐎𑑂𑐲𑐵 𑑋

𑑒.𑑔) 𑐰𑐶𑐰𑐾𑐔𑐣𑐵 – 𑐮𑐸𑐩𑑄𑐎𑐾 𑐧𑐴𑐖𑐹, 𑐗𑐷𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 ‘𑐰𑐶𑐰𑐾𑐔𑐣𑐵’ 𑐱𑐧𑑂𑐡 𑐣𑑄 𑐠𑑂𑐰 𑐴𑐾 𑐀𑐬𑑂𑐠 𑐎𑐠𑑄 𑐕𑑂𑐫𑐮𑐵𑑅 𑐳𑐦𑐹 𑐥𑐶𑐴𑐵“𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐠𑐾 – 𑐀) 𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫𑐫𑐵𑐐𑐸 𑐳𑐦𑐹 ‘𑐳𑐟𑑂𑐫𑐳𑐟𑐷’𑐫𑐵 𑐰𑐶𑐰𑐾𑐔𑐣𑐵 𑐁) 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐐𑐸 𑐳𑐦𑐹 ‘𑐳𑐶𑐬𑑂𑐖𑐣𑐵𑐫𑐵 𑐰𑐶𑐰𑐾𑐔𑐣𑐵’ (𑐣𑐾.𑐳𑑄. 𑑑𑑑𑑑𑑗) 𑐏𑑅 𑑋

𑐠𑐸𑐎𑐠𑑄 𑐁𑐮𑑀𑐔𑐣𑐵, 𑐳𑐩𑐵𑐮𑑀𑐔𑐣𑐵, 𑐳𑐩𑐷𑐎𑑂𑐲𑐵 𑐰 𑐰𑐶𑐰𑐾𑐔𑐣𑐵 𑐱𑐧𑑂𑐡𑐫𑐵 𑐥𑑂𑐬𑐫𑑀𑐐 𑐫𑐵𑐣𑐵𑑅 𑐳𑐦𑐹 𑐰𑐵 𑐔𑑂𑐰𑐳𑐸 𑐔𑑂𑐰𑐫𑐾𑐐𑐸𑐫𑐵 𑐥𑑂𑐬𑐔𑐮𑐣 𑐡𑐫𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 ‘𑐁𑐮𑑀𑐔𑐣𑐵’, ‘𑐳𑐩𑐷𑐎𑑂𑐲𑐵’, ‘𑐳𑐩𑐵𑐮𑑀𑐔𑐣𑐵’ 𑐀𑐠𑐰𑐵 ‘𑐰𑐶𑐰𑐾𑐔𑐣𑐵’ 𑐱𑐧𑑂𑐡𑐫𑐵 𑐀𑐬𑑂𑐠 𑐏𑑅 – 𑐦𑐸𑐎𑑂𑐎 𑐥𑑂𑐬𑐎𑐵𑐬𑑄 𑐰𑐶𑐢𑐶𑐥𑐹𑐬𑑂𑐰𑐎 𑐕𑐸𑑄 𑐰𑐳𑑂𑐟𑐸𑐫𑐵𑐟 𑐳𑑂𑐰𑐫𑐾𑐐𑐸 𑐰𑑂𑐫𑐰𑐳𑑂𑐠𑐵 𑐀𑐬𑑂𑐠𑐵𑐟𑑂 𑐕𑐸𑑄 𑐰𑐳𑑂𑐟𑐸𑐫𑐵𑐟 𑐳𑐩𑑂𑐫𑑂𑐎 𑐥𑑂𑐬𑐎𑐵𑐬𑑄 𑐳𑑂𑐰𑐫𑐾𑐐𑐸 𑐕𑐐𑐹 𑐰𑐶𑐱𑐾𑐲 𑐰𑑂𑐫𑐰𑐳𑑂𑐠𑐵𑐫𑐵 𑐰𑐶𑐢𑐶 𑐏𑑅 𑑋
𑐠𑐸𑐥𑐶𑑄 ‘𑐁𑐮𑑀𑐔𑐣𑐵’, ‘𑐳𑐩𑐵𑐮𑑀𑐔𑐣𑐵’, ‘𑐳𑐩𑐷𑐎𑑂𑐲𑐵, ‘𑐰𑐶𑐰𑐾𑐔𑐣𑐵’ 𑐥𑑂𑐫𑑄𑐐𑐹 𑐱𑐧𑑂𑐡𑐩𑐢𑑂𑐫𑐾 𑐣𑑄 ‘𑐁𑐮𑑀𑐔𑐣𑐵’ 𑐰 ‘𑐳𑐩𑐵𑐮𑑀𑐔𑐣𑐵’ 𑐰 ‘𑐳𑐩𑐷𑐎𑑂𑐲𑐵’ 𑐱𑐧𑑂𑐡 𑐡𑐎𑐳𑐶𑐧𑐾 𑐮𑐶𑐎𑑂𑐎 𑐮𑐵𑑅𑐐𑐸 𑐄𑐟𑑂𑐠𑐾𑑄 𑐀𑐬𑑂𑐠 𑐧𑐶𑐂𑐐𑐸 𑐱𑐧𑑂𑐡 𑐏𑑅 𑑋 𑐴𑐵𑐎𑐣𑑄 𑐠𑑂𑐰 𑐳𑑂𑐰𑑄𑐐𑐹 𑐱𑐧𑑂𑐡 𑐩𑐢𑑂𑐫𑐾 𑐣𑑄 ‘𑐁𑐮𑑀𑐔𑐣𑐵’ 𑐰 ‘𑐳𑐩𑐵𑐮𑑀𑐔𑐣𑐵’ 𑐡𑐎𑐳𑐶𑐧𑐾 𑐮𑐶𑐎𑑂𑐎 𑐮𑐵𑑅𑐐𑐸 𑐣𑐶𑐐𑐹 𑐱𑐧𑑂𑐡 𑐏𑑅 𑑋 𑐠𑑂𑐰 𑐣𑐶𑐐𑐹 𑐱𑐧𑑂𑐡𑐫𑐵 𑐀𑑄𑐐𑑂𑐬𑐾𑐖𑐷 𑐱𑐧𑑂𑐡 Criticism 𑐴𑐾 𑐏𑑅 𑑋 𑐟𑐬 𑐰𑑂𑐫𑐰𑐴𑐵𑐬𑐫𑑂 𑐠𑑂𑐰 𑐳𑑂𑐰𑑄𑐐𑐹 𑐱𑐧𑑂𑐡 ‘𑐁𑐮𑑀𑐔𑐣𑐵’, ‘𑐳𑐩𑐵𑐮𑑀𑐔𑐣𑐵’, ‘𑐳𑐩𑐷𑐎𑑂𑐲𑐵’ 𑐥𑑂𑐬𑐫𑑀𑐐𑐫𑑂 𑐕𑐸𑑄𑐕𑐸𑑄 𑐎𑐠𑑄𑐫𑐵 𑐨𑐶𑐣𑑂𑐣𑐟𑐵 𑐏𑐣𑐾𑐡𑐸 𑑋 𑐐𑐠𑐾 – 𑐳𑐩𑐷𑐎𑑂𑐲𑐵–𑐰𑐿𑐛𑐎 𑐢𑐵𑐂, 𑐟𑐬 𑐁𑐮𑑀𑐔𑐣𑐵 𑐰𑐵 𑐳𑐩𑐵𑐮𑑀𑐔𑐣𑐵–𑐰𑐿𑐛𑐎 𑐢𑐵𑐂𑐩𑐏𑐸 𑑋 𑐀𑐠𑐾 𑐴𑐾 𑐁𑐟𑑂𑐩𑐵𑐮𑑀𑐔𑐣𑐵, 𑐁𑐟𑑂𑐩𑐳𑐩𑐷𑐎𑑂𑐲𑐵 𑐢𑐵𑐂, 𑐟𑐬 𑐁𑐟𑑂𑐩𑐳𑐩𑐵𑐮𑑀𑐔𑐣𑐵 𑐢𑐵𑐂𑐩𑐏𑐸 𑑋 𑐁𑐮𑑀𑐔𑑂𑐫 – 𑐰𑐶𑐲𑐫𑐰𑐳𑑂𑐟𑐸 𑐀𑐠𑐰𑐵 𑐁𑐮𑑀𑐔𑑂𑐫–𑐐𑑂𑐬𑐣𑑂𑐠 𑐰𑐵 𑐳𑐦𑐹 𑐢𑐵𑐂, 𑐟𑐬 𑐳𑐩𑐵𑐮𑑀𑐔𑑂𑐫 𑐰𑐶𑐲𑐫𑐰𑐳𑑂𑐟𑐸 𑐰𑐵 𑐳𑐩𑐵𑐮𑑀𑐔𑑂𑐫–𑐐𑑂𑐬𑐣𑑂𑐠 𑐰𑐵 𑐳𑐦𑐹 𑐢𑐵𑐂𑐩𑐏𑐸 𑑋 𑐀𑐠𑐾 𑐴𑐾 𑐳𑐩𑐷𑐎𑑂𑐲𑑂𑐫–𑐰𑐶𑐲𑐫𑐰𑐳𑑂𑐟𑐸 𑐰𑐵 𑐳𑐩𑐷𑐎𑑂𑐲𑑂𑐫–𑐐𑑂𑐬𑐣𑑂𑐠 𑐰𑐵 𑐳𑐦𑐹 𑐢𑐵𑐫𑐾𑐐𑐸 𑐄𑐮𑐶 𑐥𑑂𑐬𑐔𑐮𑐣 𑐩𑐡𑐸 𑑋 𑐠𑐠𑐾 𑐴𑐾 𑐧𑐖𑐾𑐚–𑐳𑐩𑐷𑐎𑑂𑐲𑐵𑐫𑐵𑐟 𑐧𑐖𑐾𑐚–𑐁𑐮𑑀𑐔𑐣𑐵 𑐰𑐵 𑐧𑐖𑐾𑐚–𑐳𑐩𑐵𑐮𑑀𑐔𑐣𑐵 𑐢𑐵𑐂𑐐𑐸 𑐥𑑂𑐬𑐔𑐮𑐣 𑐩𑐡𑐸 𑑋 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵 𑐔𑑂𑐰𑐂𑐩𑑂𑐴𑐾𑐳𑐶𑐟 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐎 𑐢𑐵𑐂, 𑐳𑐵𑐴𑐶𑐟𑑂𑐫𑐶𑐎 𑐳𑐩𑐵𑐮𑑀𑐔𑐎 𑐣𑑄 𑐢𑐵𑐂, 𑐀𑐠𑐾 𑐴𑐾 𑐳𑐵𑐴𑐶𑐟𑑂𑐫𑐶𑐎 𑐳𑐩𑐷𑐎𑑂𑐲𑐎 𑐣𑑄 𑐢𑐵𑐂 𑑋 ‘𑐳𑐩𑐷𑐎𑑂𑐲𑐎’ 𑐰𑐵 ‘𑐳𑐩𑐵𑐮𑑀𑐔𑐎’ 𑐢𑐵𑐫𑐾𑐧𑐮𑐫𑑂 𑐳𑑂𑐰𑐫𑐵𑑄 ‘𑐁𑐮𑑀𑐔𑐎’ 𑐢𑐵𑐫𑐾𑐧𑐮𑐫𑑂 𑐩𑐣𑐹𑐟𑐫𑑂𑐳𑑄 𑐨𑐟𑐷𑐔𑐵 𑐩𑐾𑐐𑐸 𑐴𑐾 𑐨𑐵𑐰𑑄 ‘𑐴𑐵𑐬𑐵𑑄𑐩𑑂𑐴’, ‘𑐎𑐔𑐎𑐔 𑐫𑐵𑐂𑐩𑑂𑐴’, ‘𑐰𑐵𑐡𑐰𑐶𑐰𑐵𑐡’ 𑐰𑐵 ‘𑐰𑐶𑐬𑑀𑐢 𑐫𑐵𑐣𑐵 𑐖𑐸𑐂𑐩𑑂𑐴’, ‘𑐀𑐣𑑂𑐫𑐵𑐫 𑐳𑐴𑐩𑐫𑐵𑐂𑐩𑑂𑐴’, ‘𑐡𑐺𑐝 𑐳𑑂𑐰𑐨𑐵𑐰𑐫𑐵𑐩𑑂𑐴 𑐩𑐣𑐹’, ‘𑐰𑐶𑐡𑑂𑐬𑑀𑐴𑐷 𑐩𑐣𑐹’, ‘𑐠𑑅𑐐𑐸 𑐳𑑂𑐰𑐟𑐣𑑂𑐟𑑂𑐬 𑐰𑐶𑐔𑐵𑐬𑐢𑐵𑐬𑐵𑐫𑑂 𑐎𑑂𑐰𑐵𑐟𑐸𑐩𑑂𑐴’ 𑐢𑐿𑐐𑐸 𑐩𑐣𑑀𑐨𑐵𑐰𑐣𑐵 𑐟𑐫𑐵𑑅 𑐠𑐸𑐂𑐎𑐷 𑑋 𑐄𑐎𑐶𑑄 𑐠𑐵𑐫𑑂𑐧𑐵𑐫𑑂 𑐳𑑂𑐰𑐫𑐵𑑅 𑐥𑑂𑐬𑐔𑐮𑐶𑐟 𑐥𑐬𑐩𑑂𑐥𑐬𑐵𑐎𑐠𑑄 𑐁𑐮𑑀𑐔𑐣𑐵, 𑐳𑐩𑐵𑐮𑑀𑐔𑐣𑐵 𑐰𑐵 𑐳𑐩𑐷𑐎𑑂𑐲𑐵 𑐱𑐧𑑂𑐡 𑐠𑑂𑐰 𑐎𑐵𑐬𑑂𑐫𑐥𑐟𑑂𑐬𑐫𑑂 𑐕𑑂𑐫𑐮𑐾𑐐𑐸 𑐖𑐸𑐂 𑑋

𑑓. 𑐳𑐵𑐴𑐶𑐟𑑂𑐫𑐫𑐵 𑐩𑐴𑐟𑑂𑐰

𑐳𑐵𑐴𑐶𑐟𑑂𑐫 𑐠𑐷𑐠𑐷 𑐃𑐫𑐵 𑐩𑐣𑐹𑐟𑐫𑑂𑐐𑐸 𑐳𑑂𑐠𑐶𑐟𑐶 𑐀𑐣𑐸𑐨𑐰 𑐰 𑐔𑐶𑐣𑑂𑐟𑐣𑐫𑐵 𑐁𑐮𑐾𑐏 𑐏𑑅 𑑋 𑐠𑐸𑐎𑐷 𑐩𑐣𑐹𑐟𑐫𑑂𑐐𑐸 𑐠𑐷𑐠𑐷 𑐖𑐷𑐰𑐣 𑐳𑑂𑐠𑐶𑐟𑐶, 𑐳𑐵𑑄𑐳𑑂𑐎𑐺𑐟𑐶𑐎 𑐄𑐥𑐮𑐧𑑂𑐢𑐶 𑐬𑐷𑐟𑐶𑐣𑐷𑐟𑐶𑐫𑐵 𑐩𑐹𑐮𑑂𑐫𑐵𑑄𑐎𑐣 𑐡𑐂 𑑋 𑐄𑐎𑐶𑑄 𑐳𑐵𑐴𑐶𑐟𑑂𑐫 𑐴𑐾 𑐕𑐸𑑄 𑐣𑑄 𑐬𑐵𑐲𑑂𑐚𑑂𑐬𑐫𑐵 𑐥𑑂𑐬𑐵𑐩𑐵𑐞𑐶𑐎 𑐂𑐟𑐶𑐴𑐵𑐳 𑐏𑑅 𑑋 𑐳𑐵𑐴𑐶𑐟𑑂𑐫𑑄 𑐥𑐬𑐩𑑂𑐥𑐬𑐵𑐫𑐵 𑐳𑑄𑐬𑐎𑑂𑐲𑐎 𑐰 𑐫𑐸𑐐𑐫𑐵 𑐥𑑂𑐬𑐟𑐶𑐰𑐶𑐩𑑂𑐧 𑐏𑑅 𑑋 𑐳𑐵𑐴𑐶𑐟𑑂𑐫 𑐧𑑂𑐰𑐩𑐶𑐥𑐶𑐣𑑂𑐟 𑐰𑑂𑐫𑐵𑐥𑐎 𑐔𑐾𑐟𑐣𑐵 𑐂𑐣𑐵𑑅 𑐧𑐶𑐫𑐵𑑅 𑐔𑐾𑐟𑐣𑐱𑐷𑐮 𑐫𑐵𑐣𑐵𑐧𑐶𑐂 𑑋 𑐳𑐵𑐴𑐶𑐟𑑂𑐫𑐫𑐵 𑐔𑐾𑐟𑐣𑐵 𑐴𑐾 𑐖𑐷𑐰𑐣𑐫𑐵 𑐔𑐾𑐟𑐣𑐵 𑐏𑑅 𑑋 𑐳𑐵𑐴𑐶𑐟𑑂𑐫𑐥𑐵𑐏𑐾𑑄 𑐴𑐾 𑐗𑐷𑐥𑐶𑑄 𑐖𑐷𑐰𑐣𑐫𑐵 𑐮𑐶𑐎𑑂𑐎 𑐮𑐵𑐂 𑑋 𑐗𑐷𑐳𑑄 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐫𑐵𑐂𑐐𑐸𑐫𑐵 𑐎𑐵𑐬𑐞 𑐠𑑂𑐰 𑐏𑑅 𑐎𑐶 𑐄𑐐𑐸𑐥𑐵𑐏𑐾𑑄 𑐗𑐷𑐳𑑄 𑐖𑐷𑐰𑐣𑐫𑐵 𑐖𑐚𑐶𑐮 𑐥𑐬𑐶𑐳𑑂𑐠𑐶𑐟𑐶𑐫𑐵 𑐣𑑄 𑐀𑐣𑐸𑐨𑐹𑐟 𑐖𑐸𑐂 𑑋 𑐳𑐵𑐴𑐶𑐟𑑂𑐫𑐎𑐵𑐬𑑄 𑐠𑑅𑐐𑐸 𑐖𑐷𑐰𑐣 𑐀𑐣𑐸𑐨𑐹𑐟𑐶𑐫𑐵 𑐴𑐾 𑐰𑑂𑐫𑐎𑑂𑐟 𑐫𑐵𑐂 𑑋 𑐰 𑐳𑑂𑐰𑐫𑑄 𑐖𑐷𑐰𑐣 𑐰 𑐖𑐐𑐟𑑂𑐫𑐵 𑐡𑑂𑐬𑐲𑑂𑐚𑐵 𑐖𑐸𑐂, 𑐠𑑅𑐩𑑂𑐴𑑄 𑐳𑑂𑐫𑐹𑐐𑐸 𑐏𑑃𑐫𑐵𑐟 𑐰𑑂𑐫𑐎𑑂𑐟 𑐫𑐵𑐂 𑑋 𑐄𑐎𑐶𑑄 𑐳𑐵𑐴𑐶𑐟𑑂𑐫 𑐳𑐩𑐵𑐖 𑐰 𑐡𑐾𑐱𑐫𑐵 𑐳𑐵𑐎𑑂𑐲𑐵𑐟 𑐥𑐬𑐶𑐔𑐫 𑐏𑑅 𑑋 𑐐𑐸𑐐𑐸 𑐡𑐾𑐱𑐫𑐵 𑐳𑐩𑐵𑐖 𑐰𑑂𑐫𑐰𑐳𑑂𑐠𑐵 𑐐𑐠𑐾 𑐔𑑂𑐰𑑄 𑐢𑐿𑐐𑐸 𑐳𑐶𑐂𑐎𑐾𑐟 𑐀𑐣𑐫𑐵𑐐𑐸 𑐳𑐵𑐴𑐶𑐟𑑂𑐫𑑄 𑐧𑐵𑑄𑐮𑐵𑐎 𑐎𑑂𑐫𑐣𑐷 𑑋 𑐳𑐩𑐵𑐖𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐎𑐺𑐟𑐶, 𑐰𑐶𑐳𑑄𑐐𑐟𑐶, 𑐱𑑀𑐲𑐞, 𑐨𑑂𑐬𑐲𑑂𑐚𑐵𑐔𑐵𑐬 𑐂𑐟𑑂𑐫𑐵𑐡𑐶𑐫𑐵 𑐔𑐶𑐟𑑂𑐬𑐞 𑐫𑐵𑐣𑐵𑑅 𑐖𑐣𑐟𑐵𑐫𑐵𑐟 𑐔𑐾𑐟𑐣𑐵 𑐧𑐶𑐂𑐟 𑐴𑐾 𑐳𑐵𑐴𑐶𑐟𑑂𑐫 𑐔𑑂𑐰𑐂𑐐𑐸 𑐏𑑅 𑑋 𑐳𑐵𑐴𑐶𑐟𑑂𑐫𑐫𑐵 𑐩𑐴𑐟𑑂𑐰 𑐰 𑐩𑐴𑐟𑑂𑐟𑐵𑐫𑐵 𑐧𑐵𑐬𑐾 𑐠𑐣 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐑𑐚𑐣𑐵 𑐣𑑂𑐴𑑂𑐫𑐠𑐣𑐾 –

𑐨𑐵𑐬𑐟𑐫𑐵 𑐂𑐟𑐶𑐴𑐵𑐳𑐫𑑂 𑐣𑐵𑐡𑐶𑐬 𑐱𑐵𑐴 𑐥𑐬𑑂𑐳𑐶𑐫𑐵𑐫𑐵 𑐱𑐵𑐳𑐎𑐫𑐵𑐟 𑐎𑐛𑑀𑐬𑐟𑐵𑐫𑐵 𑐩𑐹𑐬𑑂𑐟𑐶𑐎𑐠𑑄 𑐠𑐸𑐂𑐎𑐾𑐐𑐸 𑐫𑐵𑑅 𑑋 𑐢𑐵𑐂𑐐𑐸 𑐡𑐸 𑐎𑐶 𑐣𑐵𑐡𑐶𑐬 𑐱𑐵𑐴𑑄 𑐃.𑐳𑑄. 𑑑𑑗𑑓𑑙 𑐳 𑐡𑐶𑐮𑑂𑐮𑐷𑐂 𑐴𑐟𑐵𑑅 𑐫𑐵𑑅𑐧𑐮𑐫𑑂 𑐡𑐶𑐮𑑂𑐮𑐷𑐫𑐵 𑐧𑐵𑐡𑐱𑐵𑐴 𑐱𑐵𑐴 𑐀𑐮𑐩 𑐟𑐳𑐎𑑄 𑐐𑑂𑐫𑐵𑐟 𑑋 𑐣𑐵𑐡𑐶𑐬 𑐱𑐵𑐴𑑄 𑐟𑐮𑐰𑐵𑐬𑑄 𑐩𑐣𑐹𑐟𑐫𑑂𑐟 𑐥𑐵𑐥𑐵𑑄 𑐰𑑄𑐧𑐮𑐫𑑂 𑐡𑐶𑐮𑑂𑐮𑐷𑐂 𑐴𑐶𑐫𑐵 𑐏𑐸𑐳𑐶 𑐣𑑂𑐴𑑂𑐫𑐵𑐣𑐵𑐔𑑂𑐰𑐣 𑑋 𑐣𑐵𑐡𑐶𑐬 𑐱𑐵𑐴𑐫𑐵 𑐳𑐾𑐣𑐵𑐥𑐟𑐶 𑐣𑑄 𑐠𑑂𑐰 𑐎𑐵𑐞𑑂𑐜 𑐏𑐣𑐵𑑅 𑐔𑐎𑐶𑐟 𑐖𑐸𑐮 𑑋 𑐟𑐬 𑐣𑐵𑐡𑐶𑐬 𑐱𑐵𑐴𑐫𑐵 𑐄𑐐𑐸 𑐖𑑂𑐫𑐵 𑐡𑐶𑐎𑐾𑐟 𑐰𑐿𑐐𑐸 𑐰𑐶𑐬𑐸𑐡𑑂𑐢𑐫𑑂 𑐕𑐳𑑅 𑐣𑑂𑐰𑑄𑐰𑐵𑐂𑐥𑐶𑑄 𑐟𑐎𑑄 𑐳𑐸𑑄 𑐩𑐣𑑂𑐟 𑑋

𑐡𑐶𑐮𑑂𑐮𑐷𑐫𑐵 𑐧𑐵𑐡𑐱𑐵𑐴𑐫𑐵 𑐕𑐩𑑂𑐴 𑐩𑐣𑑂𑐟𑑂𑐬𑐷 𑐳𑐵𑐴𑐶𑐟𑑂𑐫𑐶𑐎 𑐖𑐸𑐫𑐵𑐔𑑂𑐰𑐣 𑑋 𑐰𑑄 𑐠𑑂𑐰 𑐴𑐟𑑂𑐫𑐵𑐎𑐵𑐞𑑂𑐜 𑐳𑐴𑐫𑐵𑐫𑐾 𑐩𑐦𑐸𑐟, 𑐀𑐮𑐾 𑐠𑑅𑐐𑐸 𑐖𑑂𑐫𑐵𑐣𑐫𑐵𑐟 𑐮𑑂𑐴𑐵𑐟𑐶𑐂 𑐟𑐫𑐵𑑅 𑐰𑑄 𑐣𑐵𑐡𑐶𑐬 𑐱𑐵𑐴𑐫𑐵𑐟 𑐠𑐸𑐎𑐠𑑄 𑐧𑐶𑐣𑑂𑐟𑐶 𑐫𑐵𑐟 – “𑐴𑐖𑐹𑐬𑐫𑐵𑐐𑐸 𑐥𑑂𑐬𑐾𑐩𑐫𑐵𑐐𑐸 𑐟𑐮𑐰𑐵𑐬𑑄 𑐁𑑅 𑐳𑐸𑑄 𑐣𑑄 𑐩𑐣𑐹𑐟 𑐮𑑂𑐫𑐣𑐷 𑐩𑐏𑐸𑐟 𑑋 𑐁𑑅 𑐮𑐵 𑐴𑐖𑐹𑐬𑐫𑐵 𑐮𑐵𑐐𑐶 𑐕𑐐𑐹 𑐴𑐾 𑐖𑐎 𑐄𑐥𑐵𑐫 𑐡𑐣𑐶 𑑋 𑐁𑑅 𑐴𑐖𑐹𑐬 𑐴𑐟𑑂𑐫𑐵 𑐫𑐵𑐫𑐾 𑐢𑐸𑑄𑐎𑐵𑑅 𑐴𑐵𑐎𑐣𑑄 𑐂𑐥𑐶𑑄 𑐦𑐸𑐎𑑂𑐎𑐳𑐶𑐟𑑄 𑐴𑐵𑐎𑐣𑑄 𑐩𑑂𑐰𑐵𑐎𑐵𑐡𑐶𑐳𑑃 𑐀𑐮𑐾 𑐴𑐵𑐎𑐣𑑄 𑐴𑐵𑐎𑐣𑑄 𑐴𑐟𑑂𑐫𑐵 𑐫𑐵𑐣𑐵𑐡𑐶𑐳𑑃 𑑋”
𑐠𑑂𑐰 𑐏𑑃𑐫𑐵 𑐥𑑂𑐬𑐨𑐵𑐰 𑐴𑐟𑑂𑐫𑐵𑐬𑐵 𑐣𑐵𑐡𑐶𑐬 𑐱𑐵𑐴𑐫𑐵𑐟 𑐠𑐸𑐮𑐶 𑐡𑐸𑐐𑑂𑐫𑑄𑐎 𑐮𑐵𑐟 𑐎𑐶 𑐰𑑄 𑐳𑑂𑐫𑐵𑐫𑐾𑐐𑐸 𑐖𑑂𑐫𑐵 𑐡𑐶𑐎𑐾𑐟 𑐟𑐸𑐬𑐸𑐣𑑂𑐟 𑐁𑐖𑑂𑐘𑐵 𑐧𑐶𑐮 𑐀𑐮𑐾 𑐴𑐟𑑂𑐫𑐵𑐎𑐵𑐞𑑂𑐜 𑐡𑐶𑐟 𑑋 𑐳𑐩𑐵𑐖 𑐳𑐬𑑂𑐰𑐣𑐵𑐱𑑄 𑐧𑐔𑐾 𑐖𑐸𑐮 𑑋 𑐠𑐸𑐎𑐠𑑄 𑐳𑐩𑐵𑐖𑐫𑐵 𑐬𑐎𑑂𑐲𑐵 𑐳𑐵𑐴𑐶𑐟𑑂𑐫𑑄 𑐫𑐵𑐟 𑑋 𑐠𑑂𑐰 𑐑𑐚𑐣𑐵𑑄 𑐳𑐩𑐵𑐖, 𑐬𑐵𑐲𑑂𑐚𑑂𑐬𑐫𑑂 𑐳𑐵𑐴𑐶𑐟𑑂𑐫𑐫𑐵 𑐐𑐸𑐮𑐶 𑐩𑐹, 𑐩𑐴𑐟𑑂𑐰 𑐰 𑐩𑐴𑐵𑐣𑑂𑐟𑐵 𑐫𑐔𑑂𑐔𑐸𑐎 𑐳𑐶𑐂𑐎𑐾𑐦𑐸 𑑋

𑑔. 𑐁𑐮𑑀𑐔𑐣𑐵𑐫𑐵 𑐩𑐴𑐟𑑂𑐰

𑐩𑐣𑐹𑐫𑐵 𑐖𑐷𑐰𑐣𑐫𑑂 𑐁𑐮𑑀𑐔𑐣𑐵𑐫𑐵 𑐫𑐎𑑂𑐎𑑀 𑐩𑐹 𑐡𑐸 𑑋 𑐃 𑐣𑐵𑐥𑐣𑐵𑐥𑑄 𑐖𑐷𑐰𑐣𑐱𑐿𑐮𑐷 𑐥𑐵𑐣𑐵𑐰𑐣𑐷 𑐠𑐾𑑄 𑐖𑐷𑐰𑐣𑐱𑐿𑐮𑐷𑐫𑐵 𑐣𑐵𑐥𑐣𑐵𑐥𑑄 𑐳𑐵𑐴𑐶𑐟𑑂𑐫𑐫𑐵 𑐳𑑂𑐰𑐬𑐸𑐥 𑐣𑑄 𑐴𑐶𑐮𑐵𑐰𑐣𑐷 𑑋 𑐣𑑂𑐴𑐵𑐥𑐵𑐫𑐵𑐐𑐸 𑐳𑐵𑐴𑐶𑐟𑑂𑐫 𑐰 𑐮𑐶𑐥𑐵𑐫𑐵𑐐𑐸 𑐳𑐵𑐴𑐶𑐟𑑂𑐫𑐫𑐵𑐐𑐸 𑐳𑑂𑐠𑐶𑐟𑐶 𑐥𑐵𑐂 𑑋 𑐠𑐸𑐎𑐶𑐫𑐵 𑐀𑐢𑑂𑐫𑐫𑐣 𑐁𑐮𑑀𑐔𑐣𑐵𑑄 𑐫𑐵𑐂 𑑋 𑐠𑑂𑐰 𑐏𑑃 𑐠𑐣 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐾 – “𑐎𑑂𑐰𑐏𑑄 𑐣𑑂𑐴𑐵𑐫𑑂𑐥𑑄 𑐫𑑄𑐎𑐮 𑐢𑐵𑐫𑐾𑐰𑑄, 𑐎𑑂𑐰𑑅𑐮𑐶𑐳𑐾 𑐧𑑂𑐰𑐵𑑃𑐫𑑂 𑐰𑐣𑐾𑐩𑐖𑑂𑐫𑐹, 𑐣𑑂𑐴𑐵𑐥𑐵 𑐠𑑅𑐐𑐸 𑐣𑑂𑐴𑐵𑐫𑑂𑐥𑑄 𑐣𑐶𑑄 𑐠𑐶𑐫𑐵𑑅 𑐳𑑂𑐰𑐫𑐾𑐩𑐵𑑅 𑑋” 𑐠𑑂𑐰 𑐢𑐵𑐥𑐹 𑐗𑐷𑐐𑐸 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐖𑐎 𑐩𑐏𑐸, 𑐣𑐾𑐥𑐵𑐮𑐷 𑐳𑐩𑐵𑐖𑐫𑑂 𑐣𑑂𑐫𑑄𑐎 𑐣𑑄 𑐳𑐩𑐵𑐖𑐫𑐵 𑐀𑐱𑐶𑐎𑑂𑐲𑐶𑐟, 𑐀𑐥𑐛𑐶𑐟 𑐐𑐬𑐶𑐧 𑐰𑐬𑑂𑐐𑑄𑐣𑐶𑐳𑐾𑑄 𑐰𑐶𑐡𑑂𑐰𑐵𑐣𑑂, 𑐀𑐟𑐶𑐰𑐶𑐡𑑂𑐰𑐵𑐣𑑂, 𑐧𑐸𑐡𑑂𑐢𑐶𑐖𑐷𑐰𑐷, 𑐥𑑂𑐬𑐵𑐢𑑂𑐫𑐵𑐥𑐎, 𑐟𑐟𑑅𑐢𑑄𑐥𑐶𑑄 𑐣𑐾𑐟𑐵 𑐳𑐎𑐳𑐶𑐣𑑄 𑐠𑑁𑑄𑐟𑐎𑑄 𑐩𑐡𑑂𑐡𑐶𑐎 𑐢𑐵𑐫𑐾𑐐𑐸 𑐴𑐾 𑐫𑐵𑐣𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐟𑐬 𑐠𑑂𑐰 𑐢𑐵𑐥𑐹 𑐐𑐸𑐮𑐶𑐟𑐎 𑐳𑐟𑑂𑐫 𑐥𑐵𑐫𑐕𑐶 𑐖𑐹 𑐠𑑂𑐰 𑐢𑐵𑑅𑐳𑐵 𑐠𑑁𑑄𑐟𑐎𑑄 𑐳𑐸𑐣𑐵𑑄 𑐳𑐸𑐣𑐵𑑄 𑐴𑐾 𑐧𑐶𑐔𑐵𑑅 𑐩𑐫𑐵𑑅𑐳𑐾 𑐳𑐎𑐳𑐶𑐣𑑄 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐴𑐾 𑐡𑐣𑐶 𑑋

𑐠𑑂𑐰 𑐢𑐵𑐥𑐹 𑐀𑐰𑐱𑑂𑐫 𑐣𑑄 𑐳𑐴𑐷 𑐮𑑃𑐥𑐸𑐂 𑐴𑐫𑐾𑐟 𑐩𑐣𑐹𑐟𑐫𑑂𑐟 𑐧𑑂𑐫𑐹𑐐𑐸 𑐳𑐮𑑂𑐮𑐵𑐴, 𑐄𑐥𑐵𑐫, 𑐱𑐶𑐎𑑂𑐲𑐵, 𑐁𑐮𑑀𑐔𑐣𑐵 𑐏𑑅 𑑋 𑐠𑑂𑐰 𑐨𑐶𑑄𑐐𑐸 𑐴𑐾 𑐰𑐶𑐔𑐵𑐬𑑄 𑐡𑐫𑐾𑐎𑐵𑑅𑐟𑑅𑐐𑐸 𑐕𑐸𑐣𑐵𑐏𑑃 𑐏𑐫𑐾𑐦𑐸, 𑐟𑐬 𑐠𑐸𑐎𑐶𑑄 𑐐𑐸𑐐𑐸 𑐳𑐣𑑂𑐡𑐾𑐱 𑐧𑐶𑐫𑐵𑐔𑑂𑐰𑐣, 𑐰 𑐢𑐵𑑅𑐳𑐵 𑐟𑐳𑐎𑑄 𑐐𑐮𑐟 𑐏𑑅, 𑐳𑐴𑐷 𑐳𑐸𑐗𑐵𑐰 𑐧𑐶𑐂𑐐𑐸 𑐳𑑂𑐰𑐫𑐵𑑄 𑐣𑑄 𑐩𑐹𑐬𑑂𑐏 𑐩𑐣𑐹𑐟𑐫𑑂𑐟 𑐗𑑄 𑐴𑐾 𑐩𑐹𑐬𑑂𑐏 𑐫𑐵𑐫𑐾𑐐𑐸 𑐎𑐸𑐟𑑅 𑐏𑐣𑐾𑐡𑐸 𑑋 𑐕𑐸 𑐗𑐷𑐐𑐸 𑐣𑑂𑐴𑐵𑐫𑑂𑐥𑑄 𑐎𑑂𑐰𑐏𑑄 𑐫𑑄𑐎𑐾 𑐦𑐂 ? 𑐫𑑄𑐎𑐾𑐐𑐸 𑐁𑑃𑐚 𑐫𑐵𑐂 ? 𑐠𑐠𑐾 𑐫𑐵𑐫𑐾𑐐𑐸 𑐰𑑄 𑐧𑐶𑐔𑐵𑑅 𑐟𑐎 𑐫𑐵𑐫𑐾𑐦𑐂𑐩𑐏𑐸 𑐢𑐵𑑅𑐳𑐵 𑐗𑐷𑐳𑑄 𑐠𑑂𑐰 𑐏𑑃𑐫𑑂 𑐕𑐸 𑐴𑐾 𑐧𑐶𑐔𑐵𑑅 𑐩𑐫𑐵𑑅𑐳𑐾 ‘𑐣𑑂𑐴𑐵𑐫𑑂𑐥𑑄 𑐕𑐎𑑅 𑐣𑐶𑑄 𑐠𑐶𑐫𑐵𑑅 𑐳𑑂𑐰𑐫𑐾𑐩𑐵𑑅’ 𑐢𑐵𑐫𑐾𑐐𑐸𑐫𑐵 𑐀𑐬𑑂𑐠 𑐕𑐸 𑐖𑐸𑐮 ? 𑐩𑐣𑐹𑐟𑐫𑑂𑐟 𑐔𑐾𑐟𑐣𑐵 𑐠𑐣𑐵𑐧𑐶𑐂𑐐𑐸 𑐖𑐸𑐮 𑐮𑐵𑐎𑐶 𑐩𑐹𑐬𑑂𑐏 𑐫𑐵𑐫𑐾𑐐𑐸 𑐖𑐸𑐮 ? 𑐀𑐠𑐾𑐳𑐵𑑄 𑐠𑐸𑐎𑐶𑐫𑐵 𑐀𑐨𑐶𑐥𑑂𑐬𑐵𑐫 𑐢𑐵𑑅𑐳𑐵 𑐫𑐠𑐵𑐬𑑂𑐠𑐰𑐵𑐡𑐷 𑐖𑑂𑐘𑐵𑐣𑐫𑐵 𑐴𑐾 𑐮𑐵𑐐𑐶 𑐏𑑅 𑑋

𑐠𑐸𑐎𑐠𑑄 𑐗𑐷𑐳𑑄 𑐗𑐷𑐐𑐸 𑐡𑐿𑐣𑐶𑐎 𑐖𑐷𑐰𑐣𑐫𑐵 𑐴𑐬𑐾𑐎 𑐏“𑐫𑑂 𑐎𑑂𑐰𑐠𑐷𑐎 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐟𑐵𑐬𑑂𑐎𑐶𑐎 𑐖𑐷𑐰𑐣 𑐴𑐣𑐾𑐐𑐸 𑐫𑐵𑐟 𑐢𑐵𑑅𑐳𑐵 𑐗𑐷𑐐𑐸 𑐖𑐷𑐰𑐣 𑐐𑐮𑐟 𑐝𑑄𑐐𑑄 𑐣𑑂𑐴𑑂𑐫𑐵𑐎𑐾𑐩𑐵𑐮𑐷 𑐩𑐏𑐸 𑑋 𑐠𑐖𑐵𑑅𑐐𑐸 𑐫𑐠𑐵𑐬𑑂𑐠𑐰𑐵𑐡𑐷 𑐳𑐴𑐷 𑐖𑑂𑐘𑐵𑐣 𑐳𑐴𑐷 𑐁𑐮𑑀𑐔𑐣𑐵 𑐖𑐎 𑐎𑐵𑐫𑐾𑐦𑐂 𑑋 𑐳𑐴𑐷 𑐁𑐮𑑀𑐔𑐣𑐵𑑄 𑐩𑐣𑐹𑐟𑐫𑑂𑐐𑐸 𑐖𑐶𑐣𑑂𑐡𑐐𑐷 𑐳𑐴𑐷𑐎𑐠𑑄 𑐣𑑂𑐴𑑂𑐫𑐵𑐎𑐾𑐟 𑐐𑑂𑐰𑐴𑐵𑐮𑐶 𑐫𑐵𑐂 𑐢𑐵𑑅𑐳𑐵 𑐐𑐮𑐟 𑐁𑐮𑑀𑐔𑐣𑐵𑑄 𑐩𑐣𑐹𑐟𑐫𑑂𑐟 𑐐𑐮𑐟 𑐮𑑃𑐫𑑂 𑐫𑑄𑐎𑐾𑐟 𑐥𑑂𑐬𑐾𑐬𑐶𑐟 𑐫𑐵𑐂 𑑋

𑐠𑑁𑑄 𑐣𑐷𑐕𑐐𑐹𑐐𑐸 𑐳𑐡𑐶𑐮𑐫𑑂 𑐠𑑂𑐫𑐣𑐵𑑅 𑐰𑐶𑐱𑑂𑐰𑐫𑑂 𑐖𑑂𑐘𑐵𑐣–𑐰𑐶𑐖𑑂𑐘𑐵𑐣𑐫𑐵 𑐰𑐶𑐎𑐵𑐳 𑐫𑐎𑑂𑐎𑑀 𑐔𑑂𑐰𑐖𑐵𑐫𑐾 𑐢𑐸𑑄𑐎𑐹𑐳𑐵𑑄 𑐀𑐣𑑂𑐢–𑐰𑐶𑐱𑑂𑐰𑐵𑐳, 𑐀𑐣𑑂𑐢–𑐬𑐷𑐟𑐶𑐬𑐶𑐰𑐵𑐖, 𑐀𑐣𑑂𑐢–𑐥𑐬𑐩𑑂𑐥𑐬𑐵, 𑐀𑐣𑑂𑐢–𑐳𑑄𑐳𑑂𑐎𑐵𑐬–𑐳𑑄𑐳𑑂𑐎𑐺𑐟𑐶𑐫𑐵 𑐀𑐣𑑂𑐢–𑐥𑑂𑐬𑐫𑑀𑐐 𑐁𑐡𑐶𑐥𑐵𑐏𑐾𑑄 𑐐𑑂𑐬𑐳𑑂𑐟 𑐗𑐷𑐐𑐸 𑐳𑐩𑐵𑐖 𑐢𑐵𑑅𑐳𑐵 𑐠𑑁𑑄𑐟𑐎 𑐠𑐸𑐎𑐶𑑄 𑐩𑐸𑐎𑑂𑐟 𑐖𑐸𑐂𑐦𑐸𑐐𑐸 𑐩𑐡𑐸𑐣𑐶 𑑋 𑐗𑐷𑐐𑐸 𑐩𑐣–𑐩𑐳𑑂𑐟𑐶𑐲𑑂𑐎𑐫𑑂 𑐰𑐶𑐖𑑂𑐘𑐵𑐣𑑄 𑐴𑐵𑐎𑐵𑐫𑐾 𑐩𑐦𑐸𑐣𑐶 𑑋 𑐰𑐶𑐖𑑂𑐘𑐵𑐣 𑐎𑐾𑐰𑐮 𑐥𑐶𑐣𑐾 𑐡𑑂𑐫𑐟𑐣𑐫𑑂 𑐖𑐎 𑐮𑑂𑐫𑐴𑐾𑑄 𑐥𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐰𑐶𑐖𑑂𑐘𑐵𑐣𑐫𑐵𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐴𑐾 𑐖𑐹𑐳𑐵𑑄 𑐰𑐿𑐎𑐾 𑐩𑐔𑐵𑐫𑐾𑐎 𑐀𑐣𑑂𑐢–𑐰𑑂𑐫𑐰𑐴𑐵𑐬 𑐳𑑄𑐳𑑂𑐎𑐵𑐬𑐐𑐟 𑐬𑐸𑐥𑑄 𑐠𑐵𑐣𑐵𑐔𑑂𑐰𑑄𑐐𑐸 𑐴𑐾 𑐡𑐣𑐶 𑑋 𑐐𑐧𑐮𑐾 𑐟𑐎 𑐗𑐷𑐐𑐸 𑐳𑑀𑐔𑐵𑐂 𑐗𑐷𑐐𑐸 𑐔𑐶𑐣𑑂𑐟𑐣 𑐰𑐶𑐖𑑂𑐘𑐵𑐣𑐩𑐸𑐏𑐷 𑐖𑐸𑐂𑐩𑐏𑐸𑐣𑐶, 𑐗𑐷𑐎𑐾 𑐏𑐵𑐳 𑐥𑐬𑐶𑐰𑐬𑑂𑐟𑐣 𑐰𑐂 𑐩𑐏𑐸𑐣𑐶 𑑋 𑐄𑐎𑐶𑑄 𑐥𑑂𑐬𑐐𑐟𑐶 𑐣𑑄 𑐖𑐸𑐂 𑐩𑐏𑐸𑐣𑐶 𑑋 𑐥𑑂𑐬𑐐𑐟𑐶𑐫𑐵 𑐮𑐵𑐐𑐶 𑐥𑐬𑐶𑐰𑐬𑑂𑐟𑐣𑐫𑐵 𑐀𑐣𑐶𑐰𑐵𑐬𑑂𑐫 𑐁𑐰𑐱𑑂𑐫𑐎𑐟𑐵 𑐡𑐸 𑑋 𑐗𑐷𑐎𑐾 𑐥𑐬𑐶𑐰𑐬𑑂𑐟𑐣 𑐩𑐰𑑅𑐣𑐶𑐐𑐸 𑐎𑐵𑐬𑐞𑑄 𑐴𑐾 𑐗𑐷 𑐥𑑂𑐬𑐐𑐟𑐶 𑐖𑐸𑐂𑐩𑐦𑐸𑐐𑐸 𑐏𑑅 𑑋 𑐥𑑂𑐬𑐐𑐟𑐶𑐫𑐵 𑐮𑑃𑐫𑑂 𑐣𑑂𑐴𑑂𑐫𑐵𑐰𑐣𑐾𑐟 𑐴𑐾 𑐗𑐷𑐟 𑐀𑐣𑐸𑐳𑐣𑑂𑐢𑐵𑐣 𑐰 𑐁𑐮𑑀𑐔𑐣𑐵𑐫𑐵 𑐁𑐰𑐱𑑂𑐫𑐎 𑐖𑐹𑐐𑐸 𑐏𑑅 𑑋 𑐳𑑂𑐰𑐳𑑂𑐠 𑐁𑐮𑑀𑐔𑐣𑐵𑐫𑑂 𑐠𑐖𑐵𑑅𑐐𑐸 𑐱𑐎𑑂𑐟𑐶 𑐡𑐸, 𑐐𑐸𑐎𑐶𑑄 𑐟𑐟𑑅𑐢𑑄𑐥𑐶𑑄 𑐣𑐾𑐟𑐵 𑐱𑐵𑐳𑐎𑐟𑐫𑑂𑐐𑐸 𑐴𑐟𑑂𑐫𑐵, 𑐴𑐶𑑄𑐳𑐵, 𑐫𑐸𑐡𑑂𑐢 𑐁𑐡𑐶 𑐟𑐎𑑄 𑐡𑐶𑐎𑐵𑑅 𑐱𑐵𑐣𑑂𑐟𑐶𑐫𑐵 𑐰𑐵𑐟𑐵𑐰𑐬𑐞 𑐎𑐵𑐫𑐩 𑐫𑐵𑐫𑐾𑐦𑐸 𑑋 𑐠𑐠𑐾 𑐴𑐾 𑐳𑐩𑐵𑐖𑐫𑑂 𑐰𑑂𑐫𑐵𑐥𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐎𑐺𑐟𑐶 𑐰𑐶𑐳𑑄𑐐𑐟𑐶𑐫𑐵𑐟 𑐳𑐵𑐴𑐶𑐟𑑂𑐫𑐫𑑂 𑐳𑐵𑐴𑐶𑐟𑑂𑐫𑐎𑐵𑐬𑑄 𑐔𑐶𑐟𑑂𑐬𑐞 𑐫𑐵𑐣𑐵𑐧𑐶𑐮 𑐢𑐵𑑅𑐳𑐵 𑐁𑐮𑑀𑐔𑐎𑑄 𑐠𑑂𑐰 𑐳𑐵𑐴𑐶𑐟𑑂𑐫 𑐧𑑅𑐎𑐫𑐵𑑅 𑐳𑐩𑐵𑐖𑐫𑐵 𑐛𑐐, 𑐦𑐚𑐵𑐴𑐵 𑐥𑑂𑐬𑐖𑐵𑐟𑐣𑑂𑐟𑑂𑐬 𑐥𑑂𑐬𑐐𑐟𑐶𑐱𑐷𑐮 𑐢𑐵𑑅𑐥𑐶𑑄 𑐣𑐾𑐟𑐵, 𑐎𑐵𑐬𑑂𑐫𑐎𑐬𑑂𑐟𑐵, 𑐎𑐰𑐶–𑐮𑐾𑐏𑐎, 𑐐𑐷𑐟𑐎𑐵𑐬, 𑐐𑐵𑐫𑐎 𑐦𑐸𑐎𑑂𑐎 𑐦𑐸𑐎𑑂𑐎𑐳𑐶𑐟 𑐥𑐵𑐛𑐎𑐫𑐵 𑐣𑑂𑐴𑑂𑐫𑑀𑐣𑐾 𑐴𑐫𑐵𑑅 𑐨𑐞𑑂𑐜𑐵𑐦𑑀𑐜 𑐫𑐵𑐣𑐵𑐧𑐶𑐂, 𑐳𑐱𑐎𑑂𑐟 𑐔𑐾𑐟𑐣𑐵 𑐠𑐣𑐵𑑅 𑐖𑐣𑐟𑐵𑐫𑐵𑐟 𑐔𑐾𑐟𑐣𑐱𑐷𑐮 𑐫𑐵𑐣𑐵𑐧𑐶𑐂 𑑋 𑐄𑐎𑐶𑑄 𑐣𑑄 𑐁𑐮𑑀𑐔𑐣𑐵𑐫𑐵 𑐩𑐴𑐟𑑂𑐰 𑐀𑐳𑐷𑐩𑐶𑐟 𑐡𑐸 𑑋

𑐁𑐮𑑀𑐔𑐣𑐵𑐫𑐵 𑐟𑐷𑐰𑑂𑐬𑐟𑐩 𑐬𑐸𑐥 𑐁𑐣𑑂𑐡𑑀𑐮𑐣 𑐏𑑅 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐀𑐩𑐾𑐬𑐶𑐎𑐵𑐫𑐵 𑐥𑐹𑐬𑑂𑐰𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥𑐫𑐵 𑐄𑐟𑑂𑐟𑐬𑑂𑐬𑐵𑐡𑑂𑐢 𑐎𑐵𑐮𑐫𑑂 𑐀𑐩𑐾𑐬𑐶𑐎𑐵𑐫𑑂 𑐴𑐵𑐎𑐸 𑐖𑐵𑐟𑐶𑐫𑐵 𑐕𑐩𑑂𑐴𑐾𑐳𑐶𑐟 𑐕𑐩𑑂𑐴 𑐀𑐩𑐾𑐬𑐶𑐎𑐷 𑐥𑑂𑐬𑐴𑐬𑐷𑑄 𑐥𑐸𑐮𑐶𑑄 𑐎𑑂𑐰𑐟𑑂𑐫𑐮𑐵 𑐣𑐶𑐬𑑂𑐩𑐩 𑐝𑑄𑐐𑑄 𑐳𑑂𑐫𑐵𑑅𑐐𑐸𑐫𑐵 𑐰𑐶𑐬𑐸𑐡𑑂𑐢𑐫𑑂 𑐰𑐶𑐱𑑂𑐰 𑐣𑑂𑐫𑑄𑐎 𑐖𑐹𑐐𑐸 𑐟𑐷𑐰𑑂𑐬𑐟𑐩 𑐁𑐮𑑀𑐔𑐣𑐵𑐎𑐠𑑄 𑐟𑐷𑐰𑑂𑐬 𑐁𑐣𑑂𑐡𑑀𑐮𑐣 𑐖𑐸𑐫𑐵𑑅 𑐀𑐣𑑂𑐟𑐟𑑅 𑐀𑐩𑐾𑐬𑐶𑐎𑐷 𑐥𑑂𑐬𑐴𑐬𑐷𑐟𑐳𑐾𑑄 𑐰 𑐬𑐵𑐲𑑂𑐚𑑂𑐬𑐥𑐟𑐶𑑄𑐟𑐎𑑄 𑐳𑐷𑐩𑑂𑐴𑐾𑐳𑐶𑐫𑐵 𑐎𑐵𑐫𑑂𑐫𑐵𑐎𑐾 𑐎𑑂𑐲𑐩𑐵 𑐦𑑂𑐰𑐣𑐾𑐩𑐵𑑅𑐐𑐸 𑐥𑐬𑐶𑐳𑑂𑐠𑐶𑐟𑐶 𑐰𑑅𑐐𑐸𑐫𑐵 𑐎𑐵𑐬𑐞 𑐣𑑄 𑐁𑐮𑑀𑐔𑐣𑐵𑐫𑐵 𑐀𑐡𑐩𑑂𑐫 𑐱𑐎𑑂𑐟𑐶𑑄 𑐫𑐵𑐣𑐵𑑅 𑐴𑐾 𑐏𑑅 𑑋 𑐄𑐎𑐶𑑄 𑐐𑐸𑐐𑐸 𑐳𑐩𑐵𑐖𑐫𑑂 𑐁𑐮𑑀𑐔𑐣𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐂𑐐𑐸 𑐥𑐬𑐩𑑂𑐥𑐬𑐵 𑐡𑐸, 𑐄𑐐𑐸 𑐳𑐩𑐵𑐖 𑐳𑑂𑐰𑐳𑑂𑐠 𑐳𑐣𑑂𑐟𑐸𑐮𑐶𑐟 𑐰 𑐰𑐶𑐎𑐵𑐳 𑐖𑐸𑐂, 𑐱𑐵𑐣𑑂𑐟𑐶 𑐡𑐂 𑑋

𑐧𑐸𑐡𑑂𑐢 𑐰𑐶𑐱𑑂𑐰𑐫𑑂 𑐴𑐾 𑐣𑑂𑐴𑐵𑐥𑐵𑑄𑐩𑑂𑐴 𑐕𑐩𑑂𑐴 𑐁𑐮𑑀𑐔𑐎 𑐏𑑅 𑑋 𑐧𑐸𑐡𑑂𑐢𑑄 𑐄𑐐𑐸 𑐂𑐮𑐫𑑂 𑐳𑐩𑐵𑐖𑐫𑑂 𑐥𑑂𑐬𑐔𑐮𑐶𑐟 𑐥𑐬𑐩𑑂𑐥𑐬𑐵𑐐𑐟 𑐖𑐣𑐰𑐶𑐬𑑀𑐢𑐷 𑐳𑐩𑐵𑐖𑐫𑐵 𑐥𑑂𑐬𑐵𑐔𑐷𑐣 𑐥𑐬𑐩𑑂𑐥𑐬𑐵𑐫𑐵 𑐰𑐶𑐡𑑂𑐬𑑀𑐴 𑐫𑐵𑐣𑐵𑑅 𑐳𑐩𑐵𑐖𑐫𑑂 𑐱𑐵𑐣𑑂𑐟𑐶 𑐳𑑂𑐠𑐵𑐥𑐣𑐵 𑐫𑐵𑐫𑐾𑐐𑐸 𑐟𑐵𑐟𑐸𑐣𑐵𑑅 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄 𑐢𑐬𑑂𑐩𑐫𑐵 𑐳𑑄𑐐𑐛𑐣 𑐣𑐷𑐳𑑂𑐰𑐣𑐵𑑅 𑐧𑐶𑐳𑑂𑐎𑑄 𑐴𑐾 𑐣𑑂𑐴𑐹𑐐𑐸 𑐳𑐩𑐵𑐖 𑐣𑐶𑐬𑑂𑐩𑐵𑐞 𑐫𑐵𑑅𑐩𑑂𑐴 𑐩𑐴𑐵𑐣𑑂 𑐎𑑂𑐬𑐵𑐣𑑂𑐟𑐶𑐎𑐵𑐬𑐷 𑐰𑑂𑐫𑐎𑑂𑐟𑐶 𑐏𑑅 𑑋

𑑕. 𑐳𑐵𑐴𑐶𑐟𑑂𑐫𑐫𑑂 𑐁𑐮𑑀𑐔𑐣𑐵𑐫𑐵 𑐩𑐴𑐟𑑂𑐰

𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳 𑐎𑐾𑐰𑐮 𑐁𑐮𑑀𑐔𑐣𑐵𑐫𑐵 𑐴𑐾 𑐖𑐎 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐩𑐏𑐸𑐳𑐾 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳𑐫𑐵 𑐮𑐵𑐐𑐶 𑐖𑐸𑐂𑐩𑐵𑑅, 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳 𑐎𑐾𑐰𑐮 𑐳𑐵𑐴𑐶𑐟𑑂𑐫𑐫𑐵 𑐮𑐵𑐐𑐶 𑐴𑐾 𑐖𑐎 𑐩𑐖𑐹𑐳𑐾 𑐳𑐩𑐵𑐖 𑐰 𑐡𑐾𑐱𑐫𑐵 𑐰𑐶𑐎𑐵𑐳𑐫𑐵 𑐮𑐵𑐐𑐶 𑐖𑐸𑐂𑐩𑐵𑑅 𑑋 𑐠𑐸𑐎𑐷 𑐴𑐾 𑐁𑐮𑑀𑐔𑐣𑐵𑐫𑐵 𑐳𑐵𑐬𑑂𑐠𑐎𑐟𑐵 𑐡𑐂 𑑋

𑐳𑐵𑐴𑐶𑐟𑑂𑐫𑐶𑐎 𑐬𑐔𑐣𑐵 𑐰 𑐁𑐮𑑀𑐔𑐣𑐵𑐫𑐵 𑐟𑐳𑐎𑑄 𑐎𑑂𑐰𑐵𑐟𑐸𑐐𑐸 𑐳𑑂𑐰𑐵𑐥𑐹 𑐡𑐸 𑑋 𑐳𑐵𑐴𑐶𑐟𑑂𑐫𑐶𑐎 𑐬𑐔𑐣𑐵 𑐏𑐸𑐳𑐶 𑐏𑑅𑐳𑐵 𑐁𑐮𑑀𑐔𑐣𑐵 𑐄𑐐𑐸 𑐏𑐸𑐳𑐶𑐫𑐵𑐟 𑐥𑐵𑐫𑐕𑐶𑐎𑐠𑑄 𑐣𑑂𑐴𑑂𑐫𑐵𑐎𑐾𑐟 𑐏𑐸𑐳𑐶𑐫𑐵 𑐖𑐰𑑄𑐏𑐰𑑄 𑐡𑐸𑐐𑐸 𑐎𑐶𑐣𑐵𑐬𑐵 (𑐳𑐶) 𑐏𑑅 𑑋 𑐏𑐸𑐳𑐶𑐫𑐵𑐟 𑐣𑑂𑐴𑑂𑐫𑐵𑐫𑐾 𑐡𑐫𑐾𑐰𑑄 𑐐𑐵𑑅 𑑋 𑐰𑐿𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐫𑐾𑐐𑐸 𑐏𑑅, 𑐣𑑂𑐴𑑂𑐫𑐵𑐠𑐾𑑄 𑐣𑑄 𑐣𑑂𑐴𑑂𑐫𑐵𑐣𑐵𑐰𑐣𑐷 𑑋 𑐟𑐬 𑐎𑐶𑐣𑐵𑐬𑐫𑐵𑐐𑐸 𑐟𑑅𑐢𑑄𑐐𑐸 𑐖𑐶𑐩𑑂𑐩𑐾𑐰𑐵𑐬𑐷, 𑐎𑐬𑑂𑐟𑐰𑑂𑐫, 𑐄𑐟𑑂𑐟𑐬𑐡𑐵𑐫𑐶𑐟𑑂𑐰 𑐡𑐸 𑐎𑐶 𑐏𑐸𑐳𑐶𑐫𑐵𑐐𑐸 𑐠𑑂𑐰 𑐳𑑂𑐰𑐔𑑂𑐕𑐣𑑂𑐡 𑐣𑑂𑐴𑑂𑐫𑐵𑐫𑐾𑐐𑐸 𑐥𑐴𑐮𑑄 𑐖𑐣𑐢𑐣 𑐫𑐎𑑂𑐎𑑀 𑐎𑑂𑐲𑐟𑐶 𑐖𑐸𑐂𑐦𑐸𑐐𑐸𑐮𑐶𑑄 𑐎𑐶𑐣𑐵𑐬𑐵𑑄 𑐏𑐸𑐳𑐶𑐫𑐵𑐟 𑐠𑑅𑐩𑑂𑐴𑑄 𑐢𑐿𑐠𑐾𑑄 𑐣𑑂𑐴𑑂𑐫𑐵𑐎𑐵𑑅 𑐢𑐣𑐖𑐣𑐫𑐵 𑐣𑑀𑐎𑑂𑐳𑐵𑐣𑑄 𑐧𑐔𑐾 𑐫𑐵𑐫𑐾𑐟 𑐣𑐶𑐫𑐣𑑂𑐟𑑂𑐬𑐞𑐫𑑂 𑐟𑐫𑐾𑐐𑐸 𑐦𑐎𑑂𑐎𑑀 𑐎𑐸𑐟𑑅 𑐫𑐵𑐂 𑑋 𑐠𑐸𑐎𑐠𑑄 𑐳𑑂𑐰𑐫𑐾𑐧𑐮𑐫𑑂 𑐳𑐩𑐵𑐖𑐫𑑂 𑐁𑐮𑑀𑐔𑐣𑐵𑐫𑐵 𑐩𑐴𑐟𑑂𑐟𑐵𑐫𑐵 𑐏𑑃 𑐫𑐎𑑂𑐎𑑀 𑐡𑐸𑐐𑐸 𑐳𑐶𑐂𑐡𑐸 𑑋 𑐳𑐵𑐴𑐶𑐟𑑂𑐫𑐫𑑂 𑐣𑑄 𑐁𑐮𑑀𑐔𑐣𑐵𑑄 𑐖𑐣–𑐳𑐩𑐵𑐖𑐫𑐵𑐟 𑐐𑐮𑐟 𑐮“𑐫𑑂 𑐫𑑄𑐎𑐷𑐐𑐸 𑐖𑐣–𑐰𑐶𑐬𑑀𑐢𑐷 𑐀𑐳𑑂𑐰𑐳𑑂𑐠 𑐳𑐵𑐴𑐶𑐟𑑂𑐫𑐫𑐵𑐟 𑐣𑐶𑐫𑐣𑑂𑐟𑑂𑐬𑐞𑐫𑑂 𑐟𑐫𑐵𑑅 𑐳𑑂𑐰𑐳𑑂𑐠 𑐖𑐣𑐴𑐶𑐟 𑐎𑐮𑑂𑐫𑐵𑐞𑐎𑐵𑐬𑐷 𑐳𑐵𑐴𑐶𑐟𑑂𑐫 𑐣𑐶𑐬𑑂𑐩𑐵𑐞𑐫𑐵 𑐮𑐵𑐐𑐶 𑐧𑐵𑑄𑐮𑐵𑑅𑐐𑐸 𑐮𑑂𑐰𑑅𑐐𑐸 𑐰𑐵𑐟𑐵𑐰𑐬𑐞 𑐡𑐫𑐾𑐎𑐾𑐐𑐸 𑐖𑑂𑐫𑐵𑐫𑑂 𑐟𑐶𑐧𑑅 𑐧𑐶𑐂 𑑋 𑐠𑐸𑐎𑐠𑑄 𑐕𑐩𑑂𑐴 𑐁𑐮𑑀𑐔𑐎𑐫𑐵 𑐄𑐟𑑂𑐟𑐬𑐡𑐵𑐫𑐶𑐟𑑂𑐰 𑐨𑐵𑐲𑐵–𑐳𑐵𑐴𑐶𑐟𑑂𑐫 𑐳𑐩𑐵𑐖𑐫𑑂, 𑐬𑐵𑐖𑐣𑐷𑐟𑐶, 𑐢𑐬𑑂𑐩, 𑐱𑐶𑐎𑑂𑐲𑐵, 𑐦𑐸𑐎𑑂𑐎 𑐎𑑂𑐲𑐾𑐟𑑂𑐬𑐫𑑂 𑐣𑑄 𑐟𑐳𑐎𑑄 𑐐𑐩𑑂𑐨𑐷𑐬 𑐗𑑂𑐫𑐵𑐟𑐸 𑐖𑐹 𑑋 𑐄𑐎𑐶𑑄 𑐣𑑂𑐴𑑂𑐫𑐵𑐐𑑂𑐐𑐸 𑐰𑐶𑐲𑐫𑐫𑐵 𑐀𑐢𑑂𑐫𑐫𑐣 𑐮𑐶𑐥𑐵 𑐄𑐐𑐸 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐩𑐹𑐮𑑂𑐫𑐵𑑄𑐎𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐕𑐐𑐹𑐎𑐠𑑄𑐫𑐵 𑐀𑐢𑑂𑐫𑐫𑐣 𑐥𑐡𑑂𑐢𑐟𑐶 𑐡𑐫𑐵𑐔𑑂𑐰𑐣𑐷, 𑐐𑐸𑐐𑐸 𑐁𑐮𑑀𑐔𑐣𑐵 𑐥𑐡𑑂𑐢𑐟𑐶 𑐏𑑅 𑑋 𑐠𑑂𑐰 𑐏𑑃𑐫𑐵𑐟 𑐥𑑂𑐬𑐵.𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐖𑐸𑑄 𑐠𑐠𑐾 𑐢𑐫𑐵𑐡𑐷𑐐𑐸 𑐡𑐸 – 𑐳𑐶𑐬𑑂𑐖𑐣𑐵 𑐰 𑐳𑐩𑐵𑐮𑑀𑐔𑐣𑐵𑐫𑐵 𑐳𑐩𑑂𑐧𑐣𑑂𑐢 𑐏𑐸𑐳𑐶𑐫𑐵 𑐮𑑅 𑐰 𑐑𑐵𑐚𑐫𑐵 𑐠𑐾𑑄 𑐏𑑅 𑑋 𑐏𑐸𑐳𑐶𑐫𑐵 𑐮𑑅 𑐴𑐾 𑐩𑐣𑑂𑐴𑑂𑐫𑐵𑑅𑐳𑐵 𑐑𑐵𑐚𑐫𑐵 𑐕𑐸𑑄 𑐩𑐟𑐮𑐧 𑐩𑐡𑐸, 𑐏𑐸𑐳𑐶 𑐡𑐫𑐵𑑅 𑐴𑐾 𑐑𑐵𑐚 𑐡𑐟, 𑐀𑐠𑐾 𑐴𑐾 𑐳𑐵𑐴𑐶𑐟𑑂𑐫 𑐰 𑐎𑐮𑐵 𑐡𑐸𑐐𑐸𑐮𑐶𑑄 𑐴𑐾 𑐖𑐎 𑐳𑐩𑐵𑐮𑑀𑐔𑐣𑐵 𑐥𑐶𑐡𑐣 𑑋 𑐴𑐵𑐣𑑄 𑐑𑐵𑐚 𑐩𑐡𑐸𑐳𑐵 𑐏𑐸𑐳𑐶 𑐩𑐏𑐸𑐠𑐾 𑐩𑐠𑐸𑐏𑐾 𑐣𑑂𑐴𑑂𑐫𑐵𑐫𑐾 𑐫𑑅 𑑋 𑐑𑐵𑐚𑑄 𑐏𑐸𑐳𑐶𑐫𑐵𑐟 𑐏𑑅𑐐𑐸 𑐮𑑃𑐫𑑂 𑐮𑐵𑐎𑐵𑑅 𑐟𑑅𑐠𑐾𑑄 𑐳𑐩𑐵𑐮𑑀𑐔𑐣𑐵𑑄 𑐳𑐵𑐴𑐶𑐟𑑂𑐫𑐫𑐵𑐟 𑐮𑑃𑐥𑐸 𑐮𑐶𑐎𑐵𑐟𑐂 𑑋 𑐧𑐬𑐸 𑐳𑐩𑐵𑐮𑑀𑐔𑐣𑐵 𑐳𑐶𑐬𑑂𑐖𑐣𑐵𑐫𑐵 𑐄𑐟𑑂𑐳𑐵𑐴𑐫𑐵𑐟 𑐀𑐥𑑂𑐰𑑅 𑐔𑐶𑐂𑐟 𑐳𑐣 𑐢𑐵𑐫𑐾𑐰 𑐏𑐸𑐳𑐶𑑄 𑐑𑐵𑐚 𑐟𑐕𑑂𑐫𑐵𑑅𑐠𑐾𑑄 𑐣𑐶𑐫𑐣𑑂𑐟𑑂𑐬𑐞 𑐔𑐧𑐸𑐣𑐵𑑅 𑐰𑐣𑐷 𑑋 (𑐱𑑂𑐬𑐾𑐲𑑂𑐛, 𑑑𑑐𑑘𑑘𑑅𑑑𑑗)

𑐫𑐡𑐸𑐣𑐵𑐠 𑐏𑐣𑐵𑐮𑐖𑐸𑑄 𑐣𑑄 𑐳𑐵𑐴𑐶𑐟𑑂𑐫 𑐰 𑐁𑐮𑑀𑐔𑐣𑐵 𑐧𑐵𑐬𑐾 𑐠𑐸𑐎𑐠𑑄 𑐢𑐫𑐵𑐡𑐶𑐮 – 𑐄𑐟𑑂𑐎𑐺𑐲𑑂𑐚 𑐳𑐵𑐴𑐶𑐟𑑂𑐫 𑐰 𑐰𑑂𑐫𑐵𑐥𑐎 𑐧𑑁𑐡𑑂𑐢𑐶𑐎 𑐰𑐬𑑂𑐐𑐫𑐵 𑐀𑐳𑑂𑐟𑐶𑐟𑑂𑐰 𑐴𑐾 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑐵𑐩𑐵𑐖𑐶𑐎 𑐁𑐢𑐵𑐬𑐱𑐶𑐮𑐵 𑐏𑑅 𑑋 𑐄𑐟𑑂𑐎𑐺𑐲𑑂𑐚 𑐳𑐵𑐴𑐶𑐟𑑂𑐫𑐫𑐵 𑐀𑐨𑐵𑐰𑐫𑑂 𑐁𑐮𑑀𑐔𑐣𑐵 𑐣𑐶𑐬𑐬𑑂𑐠𑐎 𑐖𑐸𑐂, 𑐁𑐮𑑀𑐔𑐣𑐵 𑐧𑑂𑐰𑐣𑐷𑐥𑐶𑑄 𑐰𑑂𑐫𑐵𑐥𑐎 𑐬𑐳𑐶𑐎 𑐰𑐬𑑂𑐐𑐫𑐵 𑐀𑐨𑐵𑐰𑐫𑑂 𑐁𑐮𑑀𑐔𑐣𑐵 𑐴𑐵𑐎𑐣𑑄 𑐀𑐬𑐞𑑂𑐫𑐬𑑀𑐡𑐣 𑐠𑐾𑑄 𑐖𑐸𑐂 𑑋 (𑐏𑐣𑐵𑐮, 𑐰𑐶.𑐳𑑄. 𑑒𑑐𑑓𑑔𑑅𑑓𑑐)

𑐳𑐵𑐴𑐶𑐟𑑂𑐫𑐫𑑂 𑐁𑐮𑑀𑐔𑐣𑐵𑐫𑐵 𑐩𑐴𑐟𑑂𑐰𑐫𑐵𑐟 𑐎𑐫𑐵𑑅 𑐳𑐣𑑂 𑑑𑑗𑑙𑑘𑐫𑑂 𑐣𑐵𑐂𑐮 𑐫𑐸𑐡𑑂𑐢𑐫𑑂 𑐖𑐹𑐐𑐸 𑐋𑐟𑐶𑐴𑐵𑐳𑐶𑐎 𑐰𑐵𑐳𑑂𑐟𑐰𑐶𑐎 𑐑𑐚𑐣𑐵𑐫𑐵 𑐕𑐥𑐸 𑐎𑐰𑐶𑐟𑐵 𑐠𑐣 𑐣𑑂𑐴𑑂𑐫𑐠𑐣𑐾 𑑋 𑐎𑑂𑐫𑐵𑐳𑐵𑐧𑐶𑐫𑐣𑑂𑐎𑐵 𑐢𑐿𑐐𑐸 𑐰𑐶𑐱𑑂𑐰 𑐥𑑂𑐬𑐳𑐶𑐡𑑂𑐢 𑐕𑐥𑐸 𑐀𑑄𑐐𑑂𑐬𑐾𑐖𑐷 𑐎𑐰𑐶𑐟𑐵 𑐏𑑅 𑑋 𑐠𑑂𑐰 𑐕𑐩𑑂𑐴 𑐩𑐔𑐵𑐫𑐵 𑐣𑐵𑑄 𑐏𑑅 𑑋 𑐠𑑂𑐰 𑐎𑐰𑐶𑐟𑐵𑐫𑐵 𑐎𑐰𑐫𑐶𑐟𑑂𑐬𑐷 Felicia Hemans (𑑑𑑗𑑓𑑓)𑐖𑐸𑑄 𑐔𑑂𑐰𑐫𑐵𑐡𑐷𑐐𑐸 𑐠𑑂𑐰 𑐎𑐰𑐶𑐟𑐵𑐫𑑂 𑐦𑑂𑐬𑐾𑐣𑑂𑐔 𑐣𑐵𑐨𑐷 𑐰 𑐧𑑂𑐬𑐶𑐚𑐶𑐳 𑐣𑐵𑐨𑐷 𑐡𑐠𑐸𑐂 𑐖𑐹𑐐𑐸 𑐳𑐵𑐩𑐸𑐡𑑂𑐬𑐶𑐎 𑐫𑐸𑐡𑑂𑐢𑐫𑐵 𑐔𑐶𑐟𑑂𑐬𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐦𑑂𑐬𑐾𑐣𑑂𑐔 𑐢𑑂𑐰𑐵𑑃𑐫𑑂𑐫𑐵 𑐖𑐴𑐵𑐖𑐫𑐵 𑐎𑑂𑐫𑐵𑐥𑐚𑐾𑐣𑐫𑐵 𑐎𑐵𑐫𑑂 𑐎𑑂𑐫𑐵𑐳𑐵𑐧𑐶𑐫𑐣𑑂𑐎𑐵 𑐏𑑅 𑑋 𑐳𑐣𑑂 𑑑𑑗𑑙𑑘𑐫𑑂 𑐖𑐹𑐐𑐸 𑐢𑐵𑐟𑑂𑐠𑐾𑑄𑐫𑐵𑐐𑐸 𑐠𑑂𑐰 𑐑𑐚𑐣𑐵𑐫𑑂 𑐁𑐢𑐵𑐬𑐶𑐟 𑐠𑑂𑐰 𑐎𑐰𑐶𑐟𑐵 𑐳𑐣𑑂 𑑑𑑘𑑒𑑖𑐳 𑐔𑑂𑐰𑐐𑐸 𑐏𑑅 𑑋 𑐄𑐐𑐸 𑐳𑐩𑐸𑐡𑑂𑐬𑐫𑐵 𑐫𑐸𑐡𑑂𑐢𑐫𑑂 𑐰𑑄𑐧𑐮𑐫𑑂 𑐧𑑁𑐩𑑂𑐴 𑐠𑑅 𑐎𑐵𑐫𑑂 𑐎𑑂𑐫𑐵𑐳𑐵𑐧𑐶𑐫𑐣𑑂𑐎𑐵𑐫𑐵𑐟 – 𑐖𑐶𑐐𑐸 𑐳𑑂𑐰𑐷𑐎𑐺𑐟𑐶 𑐩𑐎𑐵𑐫𑐾𑐎𑑄 𑐕 𑐠𑑂𑐰 𑐠𑐵𑐳𑑄 𑐐𑐣𑑄 𑐰𑐣𑐾𑐩𑐟𑐾 – 𑐢𑐎𑐵 𑐁𑐡𑐾𑐱 𑐧𑐶𑐫𑐵𑐟𑑅𑐐𑐸 𑐏𑑅 𑑋 𑐮𑐶𑐥𑐵 𑐫𑐸𑐡𑑂𑐢𑐫𑑂 𑐄𑐐𑐸 𑐖𑐴𑐵𑐖 𑐔𑑂𑐫𑐵𑐟, 𑐖𑐴𑐵𑐖𑐫𑐵 𑐩𑐶𑑄 𑐩𑐔𑐵𑐫𑐵𑐠𑐵𑐫𑑂 𑐣𑑂𑐴𑑂𑐫𑐵𑐣𑑂𑐴𑑂𑐫𑐵𑑄 𑐰𑐣 𑑋 𑐰 𑐩𑐔𑐵 𑐐𑑂𑐫𑐵𑐣𑐵𑑅 𑐔𑐶𑐮𑑂𑐮𑐵𑐫𑑂 𑐡𑐣𑐵𑑅 𑐠𑑅 𑐧𑑁𑐫𑐵𑐎𑐾 𑐄𑐖𑑄 𑐎𑐵𑐫𑐾𑐟 𑐢𑐵𑐮, – ‘𑐧𑐵𑑅 † 𑐖𑐶𑐟 𑐄𑐖𑑄 𑐧𑑂𑐫𑐸, 𑐖𑐶 𑐠𑐣𑑄 𑐧𑐶𑐳𑑂𑐫𑐹𑑄 𑐰𑐣𑐾 †’ 𑐟𑐬 𑐧𑑁𑐩𑑂𑐴𑐾𑐳𑐶𑐐𑐸 𑐕𑐸𑑄 𑐳𑑅 𑐩𑐰𑐮 𑑋 𑐩𑐔𑐵𑑄 𑐔𑐶𑐮𑑂𑐮𑐵𑐫𑑂 𑐔𑐶𑐮𑑂𑐮𑐵𑐫𑑂 𑐡𑐣𑐵𑑅 𑐄𑐖𑑄 𑐦𑑂𑐰𑐦𑑂𑐰𑑄 𑐠𑑅𑐐𑐸 𑐩𑐴𑐟𑑂𑐰𑐥𑐹𑐬𑑂𑐞 𑐖𑐶𑐣𑑂𑐡𑐐𑐷 𑐀𑐣 𑐴𑐾 𑐖𑐴𑐵𑐖𑐫𑑂 𑐦𑐸𑐎𑐮 𑑋

𑐠𑑂𑐰 𑐎𑐰𑐶𑐟𑐵𑐫𑑂 𑐎𑐰𑐶𑐖𑐸𑑄 𑐄𑐩𑑂𑐴 𑐩𑐔𑐵𑐫𑐵 𑐩𑐺𑐟𑑂𑐫𑐸𑐫𑐵𑐟 𑐟𑐳𑐎𑑄 𑐰𑐷𑐬𑐟𑐵𑐥𑐹𑐬𑑂𑐞 𑐩𑐺𑐟𑑂𑐫𑐸 𑐰𑐬𑐞𑐫𑐵𑐩𑑂𑐴 𑐩𑐔𑐵 𑐢𑐎𑐵𑑅 𑐀𑐟𑐶 𑐥𑑂𑐬𑐱𑑄𑐳𑐵 𑐫𑐵𑐣𑐵𑑅 𑐰 𑐩𑐔𑐵𑐠𑐾𑑄 𑐀𑐣𑐸𑐱𑐵𑐳𑐶𑐟𑐩𑑂𑐴 𑐁𑐖𑑂𑐘𑐵𑐎𑐵𑐬𑐷 𑐩𑐔𑐵 𑐩𑐾𑐥𑐶𑑄 𑐳𑐸𑑄 𑐴𑐾 𑐩𑐡𑐸 𑐢𑐎𑐵𑑅 𑐢𑐵𑑅𑐐𑐸𑐫𑐵𑐟 𑐮𑐶𑐥𑐵 𑐕𑐩𑑂𑐴 𑐄𑐐𑐸 𑐎𑐰𑐶𑐟𑐵𑐫𑐵 𑐁𑐮𑑀𑐔𑐎𑑄 ‘𑐰 𑐎𑑂𑐫𑐵𑐳𑐵𑐧𑐶𑐫𑐣𑑂𑐎𑐵 𑐩𑐔𑐵 𑐠𑐾𑑄 𑐩𑐹𑐬𑑂𑐏 𑐩𑐔𑐵 𑐳𑑄𑐳𑐵𑐬𑐫𑑂 𑐳𑐸𑑄 𑐴𑐾 𑐡𑐂𑐩𑐏𑐸’ 𑐢𑐎𑐵𑑅 𑐁𑐮𑑀𑐔𑐣𑐵 𑐫𑐵𑐟 𑑋 𑐠𑐸𑐎𑐶𑑄 𑐁𑐮𑑀𑐔𑐣𑐵 𑐢𑐿𑐐𑐸 𑐎𑐰𑐶𑐟𑐵𑐫𑐵𑐟 𑐳𑐴𑐷 𑐧𑐶𑐔𑐵𑐬 𑐧𑐶𑐂𑐩𑑂𑐴 𑐕𑐩𑑂𑐴 𑐣𑐶𑐬𑑂𑐡𑐾𑐱𑐎𑐎𑐠𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵𑐩𑑂𑐴 𑐕𑐩𑑂𑐴 𑐣𑐵𑑄𑐡𑑄𑐩𑑂𑐴 𑐣𑐶𑐧𑐣𑑂𑐢𑐎𑐵𑐬 𑐛𑐵𑐎𑐸𑐬𑐩𑐵𑐣 𑐱𑐵𑐎𑑂𑐫𑐖𑐸𑑄 𑐣𑑄 𑐠𑑂𑐰 𑐴𑐾 𑐎𑐰𑐶𑐟𑐵𑐫𑐵𑐟 𑐎𑐫𑐵𑑅 𑐀𑐣𑐸𑐱𑐵𑐳𑐣𑐫𑐵 𑐰𑐶𑐬𑐸𑐡𑑂𑐢𑐫𑑂 𑐣𑐵𑑄𑐐𑐸 𑐕𑐥𑐸 𑐣𑐶𑐧𑐣𑑂𑐢 𑐔𑑂𑐰𑐫𑐵𑐡𑐶𑐮 𑑋 𑐠𑑂𑐰 𑐣𑐶𑐧𑐣𑑂𑐢 𑐣𑐾.𑐳𑑄. 𑑑𑑐𑑙𑑐 𑐳 𑐥𑐶𑐡𑑄𑐐𑐸 𑐰𑐫𑑂𑐎𑑅𑐫𑐵𑐐𑐸 𑐦𑐸𑐟𑐶𑐦𑐵𑐟𑐶 𑐣𑐵𑑄𑐐𑐸 𑐳𑐦𑐹 𑐡𑐸𑐣𑐾 𑐡𑐸 𑑋 𑐠𑐸𑐐𑐸 𑐔𑑂𑐰𑐳𑐸𑐂 𑐰𑐫𑑂𑐎𑐮𑑄 𑐄𑐩𑑂𑐴 𑐎𑑂𑐫𑐵𑐳𑐵𑐧𑐶𑐫𑐣𑑂𑐎𑐵 𑐩𑐔𑐵𑐫𑐵𑐟 𑐳𑑄𑐳𑐵𑐬𑐫𑑂 𑐡𑐎𑐳𑐶𑐧𑐾 𑐟𑑅𑐢𑑄𑐩𑑂𑐴 𑐀𑐣𑐸𑐱𑐵𑐳𑐶𑐟 𑐩𑐔𑐵 𑐢𑐵𑐫𑐾𑐐𑐸 𑐥𑐮𑐾𑐳𑐵 𑐳𑑄𑐳𑐵𑐬𑐫𑑂 𑐡𑐎𑐳𑐶𑐧𑐾 𑐩𑐹𑐬𑑂𑐏 𑐩𑐔𑐵 𑐢𑐫𑐵𑐡𑐷𑐐𑐸 𑐡𑐸 𑑋

𑐛𑐵𑐎𑐸𑐬𑐩𑐵𑐣 𑐱𑐵𑐎𑑂𑐫𑐖𑐸𑐫𑐵𑐐𑐸 𑐠𑑂𑐰 ‘𑐀𑐣𑐸𑐱𑐵𑐳𑐣𑐫𑐵 𑐰𑐶𑐬𑐸𑐡𑑂𑐢𑐫𑑂’ 𑐣𑐵𑑄𑐐𑐸 𑐔𑑂𑐰𑐳𑐸𑐫𑐵 𑐟𑑅𑐢𑑄𑐐𑐸 𑐀𑐬𑑂𑐠 𑐰 𑐩𑐴𑐟𑑂𑐰 𑐡𑐸 𑑋 𑐡𑐾𑐱 𑐰 𑐖𑐣𑐟𑐵𑐫𑐵 𑐨𑐶𑑄𑐫𑐵 𑐮𑐵𑐐𑐶 𑐀𑐣𑐸𑐱𑐵𑐳𑐣𑐫𑐵 𑐰𑐶𑐬𑐸𑐡𑑂𑐢 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐰𑐶𑐱𑑂𑐰𑑄 𑐱𑐶𑐎𑑂𑐲𑐵 𑐧𑐶𑐫𑐵𑐔𑑂𑐰𑑄𑐐𑐸 𑐀𑐣𑐸𑐱𑐵𑐳𑐣𑐫𑐵 𑐥𑐵𑐮𑐣𑐵 𑐫𑐵𑐫𑐾𑐩𑐵𑑅𑐐𑐸 𑐥𑐸𑐮𑐵𑑄𑐐𑐸 𑐥𑐬𑐩𑑂𑐥𑐬𑐵𑐐𑐟 𑐩𑐹𑐮𑑂𑐫𑐩𑐵𑐣𑑂𑐫𑐟𑐵𑐫𑐵 𑐰𑐶𑐬𑐸𑐡𑑂𑐢𑐫𑑂 𑐣𑑄 𑐰𑐣𑐾𑐩𑐵𑐮𑐶𑐫𑑅 𑐢𑐿𑐐𑐸 𑐳𑐣𑑂𑐡𑐾𑐱𑐟𑐎𑑄 𑐠𑐸𑐐𑐸 𑐁𑐮𑑀𑐔𑐣𑐵𑑄 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐄𑐎𑐶𑑄 𑐀𑐣𑐸𑐱𑐵𑐳𑐣𑐫𑐵 𑐩𑐴𑐟𑑂𑐰𑐫𑐵 𑐧𑐵𑐬𑐾 𑐨𑐖𑐣 𑐫𑐵𑐫𑐵𑑄 𑐡𑐾𑐱𑐫𑐵 𑐰 𑐖𑐣𑐟𑐵𑐫𑐵 𑐳𑑂𑐠𑐶𑐟𑐶 𑐨𑐖𑑂𑐫𑑄𑐐𑐸𑐫𑐵 𑐠𑑂𑐰 𑐕𑐐𑐹 𑐟𑑅𑐢𑑄𑐐𑐸 𑐁𑐮𑑀𑐔𑐣𑐵 𑐏𑑅 𑑋 𑐠𑐸𑐎𑐠𑑄 𑐁𑐮𑑀𑐔𑐎𑐫𑐵 𑐳𑑂𑐰𑐳𑑂𑐠–𑐁𑐮𑑀𑐔𑐣𑐵𑑄 𑐐𑐮𑐟 𑐥𑐬𑐩𑑂𑐥𑐬𑐵𑐎𑐠𑑄 𑐖𑑂𑐘𑐵𑐣 𑐎𑐫𑐵𑐰𑐫𑐵𑑅𑐔𑑂𑐰𑑄𑐥𑐶𑑄𑐟 𑐳𑑂𑐰𑐳𑑂𑐠 𑐰𑐿𑐖𑑂𑐘𑐵𑐣𑐶𑐎 𑐰𑐶𑐔𑐵𑐬𑑄 𑐥𑑂𑐬𑐨𑐵𑐰𑐶𑐟 𑐫𑐵𑐫𑐾𑐐𑐸 𑐱𑐎𑑂𑐟𑐶 𑐧𑐶𑐂 𑑋 𑐄𑐎𑐶𑑄 𑐩𑐣𑐹𑐟𑐫𑑂𑐟 𑐳𑐩𑐵𑐖𑐫𑑂 𑐳𑑂𑐰𑐳𑑂𑐠–𑐥𑐬𑐶𑐰𑐬𑑂𑐟𑐣 𑐫𑐵𑐫𑐾𑐐𑐸 𑐏𑑃𑐫𑑂 𑐁𑐮𑑀𑐔𑐣𑐵𑑄 𑐟𑑅𑐢𑑄𑐐𑐸 𑐫𑑀𑐐𑐡𑐵𑐣 𑐧𑐶𑐂 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐩𑑂𑐴 𑐣𑐵𑑄𑐡𑑄𑐩𑑂𑐴 𑐁𑐮𑑀𑐔𑐎 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫𑐖𑐸𑑄 𑐢𑐫𑐵𑐡𑐷𑐐𑐸 𑐕𑐐𑐹 𑐥𑑂𑐬𑐳𑐶𑐡𑑂𑐢 𑐢𑐵𑐥𑐹 𑐠𑐣 𑐣𑑂𑐴𑑂𑐫𑐧𑑂𑐰𑐫𑐾 :

“𑐰𑐵𑐳𑑂𑐟𑐰𑐫𑑂 𑐳𑐵𑐴𑐶𑐟𑑂𑐫𑐫𑑂 𑐥𑐵𑐬𑐏𑐷 𑐀𑐬𑑂𑐠𑐵𑐟𑑂 𑐁𑐮𑑀𑐔𑐎𑐫𑐵 𑐖𑑂𑐫𑐵 𑐟𑑅𑐢𑑄, 𑐩𑐴𑐵𑐣𑑂 𑐰 𑐄𑐟𑑂𑐟𑐬𑐡𑐵𑐫𑐷𑐥𑐹𑐬𑑂𑐞 𑐏𑑅 𑑋 𑐰𑐫𑐵𑐎𑐾 𑐳𑐵𑐴𑐶𑐟𑑂𑐫𑐫𑐵 𑐱𑐎𑑂𑐟𑐶 𑐰 𑐄𑐥𑐵𑐡𑐾𑐫𑐟𑐵 𑐖𑐎 𑐥𑐬𑐶𑐔𑐵𑐮𑐣 𑐫𑐵𑐫𑐾𑐐𑐸 𑐖𑐎 𑐟𑐵𑐐𑐟 𑐡𑐂𑐐𑐸 𑐩𑐏𑐸, 𑐰𑐬𑐸 𑐫𑐸𑐐𑐫𑐵 𑐣𑐶𑐬𑑂𑐩𑐵𑐟𑐵, 𑐣𑐶𑐬𑑂𑐡𑐾𑐱𑐎 𑐰 𑐥𑐬𑐶𑐔𑐵𑐮𑐎 𑐣𑑄 𑐖𑐸𑐂𑐐𑐸 𑐱𑐎𑑂𑐟𑐶 𑐡𑐸 – 𑐠𑑂𑐰 𑐥𑐎𑑂𑐎𑐵 𑐏𑑅 𑑋” (𑐎𑐬𑑂𑐩𑐵𑐔𑐵𑐬𑑂𑐫, 𑐣𑐾.𑐳𑑄. 𑑑𑑑𑑐𑑐𑑅𑑑)

𑑖. 𑐰𑐶𑐱𑑂𑐰 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳–𑐳𑑂𑐠𑐶𑐟𑐶

𑐥𑐵𑐱𑑂𑐔𑐵𑐟𑑂𑐫 𑐳𑐵𑐴𑐶𑐟𑑂𑐫𑐫𑑂 𑐁𑐮𑑀𑐔𑐣𑐵𑐫𑐵 𑐳𑐸𑐬𑐸𑐰𑐵𑐟 𑐥𑑂𑐮𑐾𑐚𑑀 (𑑔𑑒𑑗–𑑓𑑔𑑗 𑐃.𑐥𑐹)𑐣𑐶𑐳𑐾𑑄 𑐖𑐹𑐐𑐸 𑐩𑐵𑐣𑑂𑐫𑐟𑐵 𑐡𑐸 𑐢𑐵𑑅𑐳𑐵 𑐥𑐹𑐬𑑂𑐰𑐷𑐫 𑐳𑐵𑐴𑐶𑐟𑑂𑐫𑐫𑑂 𑐃.𑐥𑐹. 𑐣𑑂𑐴𑐵𑐥𑐵𑑄𑐐𑐸 𑐳𑐡𑐷𑐫𑐵𑐩𑑂𑐴 𑐁𑐔𑐵𑐬𑑂𑐫 𑐨𑐬𑐟𑐩𑐸𑐣𑐶𑑄𑐣𑐶𑐳𑐾𑑄 𑐖𑐹𑐐𑐸 𑐩𑐵𑐣𑑂𑐫𑐟𑐵 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐴𑐶𑐣𑑂𑐡𑐷 𑐳𑐵𑐴𑐶𑐟𑑂𑐫𑐫𑑂 𑐁𑐮𑑀𑐔𑐣𑐵𑐫𑐵 𑐰𑐵𑐳𑑂𑐟𑐰𑐶𑐎 𑐥𑑂𑐬𑐵𑐬𑐩𑑂𑐨 𑐧𑐡𑐬𑐷𑐣𑐵𑐬𑐵𑐫𑐞 𑐔𑑁𑐢𑐬𑐷𑐫𑐵𑐐𑐸 𑐃.𑐳𑑄 𑑑𑑘𑑘𑑒𑐳 𑐔𑑂𑐰𑐫𑐵𑐟𑑅𑐐𑐸 𑐥𑑂𑐬𑐾𑐩𑐢𑐣𑐫𑐵𑐟 𑐩𑐵𑐣𑑂𑐫𑐟𑐵 𑐡𑐸𑐠𑐾𑑄 (𑐰𑐬𑑂𑐩𑐵, 𑐂.𑐳𑑄. 𑑑𑑙𑑘𑑕𑑅𑑙𑑗) 𑐣𑐾𑐥𑐵𑐮𑐫𑑂 𑐏𑐳–𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫𑐫𑐵 𑐣𑑂𑐴𑐵𑐥𑐵𑑄𑐩𑑂𑐴 𑐁𑐮𑑀𑐔𑐎𑐎𑐠𑑄 𑐩𑑀𑐟𑐶𑐬𑐵𑐩 𑐨𑐚𑑂𑐚𑐫𑐵𑐟 𑐣𑐵𑐮𑐵𑑅 𑐰𑐫𑑂𑐎𑐮𑑄 𑐔𑑂𑐰𑐫𑐵𑐡𑐷𑐐𑐸 𑐰𑐶.𑐳𑑄. 𑑑𑑙𑑔𑑘𑐫𑐵𑐐𑐸 𑐎𑐰𑐶 𑐨𑐵𑐣𑐸𑐨𑐎𑑂𑐟𑐵𑐔𑐵𑐬𑑂𑐫𑐎𑑀 𑐖𑐷𑐰𑐣 𑐔𑐬𑐶𑐟𑑂𑐬𑐫𑐵𑐟 𑐣𑐵𑐮𑐵𑑅𑐟𑑅𑐐𑐸 𑐡𑐸 𑑋 𑐠𑑁𑑄 𑐰𑐶𑐱𑑂𑐰𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐔𑐬𑐩 𑐰𑐶𑐎𑐳𑐶𑐟 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐸𑐐𑐸 𑐀𑐰𑐳𑑂𑐠𑐵𑐫𑑂 𑐰𑐶𑐱𑑂𑐰𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐟𑑅𑐐𑐹 𑐣𑐵𑐩𑑄 𑐏𑐣𑐾𑐡𑐫𑐾𑐢𑐸𑑄𑐎𑐹𑐐𑐸 𑐡𑐸, 𑐐𑐸𑐐𑐸 𑐠𑐠𑐾 𑐡𑐸 –

𑑑. 𑐥𑑂𑐬𑐨𑐵𑐰𑐵𑐟𑑂𑐩𑐎 𑐁𑐮𑑀𑐔𑐣𑐵 𑑒. 𑐰𑑂𑐫𑐵𑐏𑑂𑐫𑐵𑐟𑑂𑐩𑐎 𑐁𑐮𑑀𑐔𑐣𑐵 𑑓. 𑐱𑐵𑐳𑑂𑐟𑑂𑐬𑐷𑐫 𑐁𑐮𑑀𑐔𑐣𑐵 𑑔. 𑐩𑐣𑑀𑐰𑐿𑐖𑑂𑐘𑐵𑐣𑐶𑐎 𑐁𑐮𑑀𑐔𑐣𑐵 𑑕. 𑐋𑐟𑐶𑐴𑐵𑐳𑐶𑐎 𑐁𑐮𑑀𑐔𑐣𑐵 𑑖. 𑐩𑐵𑐬𑑂𑐎𑑂𑐳𑐰𑐵𑐡𑐷 𑐥𑑂𑐬𑐐𑐟𑐶𑐰𑐵𑐡𑐷 𑐁𑐮𑑀𑐔𑐣𑐵 𑑗. 𑐔𑐬𑐶𑐟𑑂𑐬𑐩𑐹𑐮𑐎 𑐁𑐮𑑀𑐔𑐣𑐵 𑑘. 𑐣𑐶𑐬𑑂𑐞𑐫𑐵𑐟𑑂𑐩𑐎 𑐁𑐮𑑀𑐔𑐣𑐵 𑑙. 𑐰𑐿𑐖𑑂𑐘𑐵𑐣𑐶𑐎 𑐁𑐮𑑀𑐔𑐣𑐵 𑑑𑑐. 𑐁𑐢𑑂𑐫𑐵𑐟𑑂𑐩𑐶𑐎 𑐁𑐮𑑀𑐔𑐣𑐵 𑑑𑑑. 𑐰𑐶𑐰𑐾𑐔𑐣𑐵𑐟𑑂𑐩𑐎 𑐁𑐮𑑀𑐔𑐣𑐵 𑑑𑑒. 𑐁𑐡𑐬𑑂𑐱𑐵𑐟𑑂𑐩𑐎 𑐁𑐮𑑀𑐔𑐣𑐵 𑑑𑑓. 𑐁𑐟𑑂𑐩𑐥𑑂𑐬𑐢𑐵𑐣 𑐁𑐮𑑀𑐔𑐣𑐵 𑑑𑑔. 𑐥𑑂𑐬𑐫𑑀𑐐𑐰𑐵𑐡𑐷 𑐁𑐮𑑀𑐔𑐣𑐵 𑑑𑑕. 𑐳𑐩𑐳𑐵𑐩𑐫𑐶𑐎 𑐁𑐮𑑀𑐔𑐣𑐵 𑑑𑑖. 𑐀𑐣𑐸𑐩𑐵𑐣𑐵𑐟𑑂𑐩𑐎 𑐁𑐮𑑀𑐔𑐣𑐵 𑑑𑑗. 𑐰𑑂𑐫𑐎𑑂𑐟𑐶𑐰𑐵𑐡𑐷 𑐁𑐮𑑀𑐔𑐣𑐵 𑑑𑑘. 𑐧𑐵𑐴𑑂𑐫𑐰𑐵𑐡𑐷 𑐁𑐮𑑀𑐔𑐣𑐵 𑑑𑑙. 𑐜𑐵𑐂𑐳𑑂𑐥𑑀𑐬𑐵 𑐁𑐮𑑀𑐔𑐣𑐵 𑑒𑑐. 𑐮𑐿𑐒𑑂𑐐𑐶𑐎 𑐁𑐮𑑀𑐔𑐣𑐵 𑑒𑑑. 𑐰𑐶𑐱𑑂𑐮𑐾𑐲𑐞𑐵𑐟𑑂𑐩𑐎 𑐁𑐮𑑀𑐔𑐣𑐵 𑑒𑑒. 𑐳𑑄𑐫𑑀𑐐𑐵𑐟𑑂𑐩𑐎 𑐁𑐮𑑀𑐔𑐣𑐵 𑑒𑑓. 𑐁𑐣𑑂𑐟𑐬𑐶𑐎 𑐁𑐮𑑀𑐔𑐣𑐵 𑑒𑑔. 𑐧𑐵𑐴𑑂𑐫𑐵𑐮𑑀𑐔𑐣𑐵 𑑒𑑕. 𑐡𑐵𑐬𑑂𑐱𑐣𑐶𑐎 𑐁𑐮𑑀𑐔𑐣𑐵 𑑒𑑖. 𑐣𑐿𑐟𑐶𑐎 𑐁𑐮𑑀𑐔𑐣𑐵 𑑒𑑗. 𑐳𑑁𑐣𑑂𑐡𑐬𑑂𑐫𑐵𑐟𑑂𑐩𑐎 𑐁𑐮𑑀𑐔𑐣𑐵 𑑒𑑘. 𑐋𑐣𑑂𑐡𑑂𑐬𑐶𑐎 𑐁𑐮𑑀𑐔𑐣𑐵 𑑒𑑙. 𑐀𑐰𑐶𑐔𑐮 𑐁𑐮𑑀𑐔𑐣𑐵 𑑓𑑐. 𑐐𑐡𑑂𑐫𑐵𑐟𑑂𑐩𑐎 𑐁𑐮𑑀𑐔𑐣𑐵 𑑓𑑑. 𑐥𑑂𑐬𑐵𑐬𑐸𑐥𑐵𑐟𑑂𑐩𑐎 𑐁𑐮𑑀𑐔𑐣𑐵 𑑓𑑒. 𑐳𑐵𑐩𑐵𑐖𑐶𑐎 𑐁𑐮𑑀𑐔𑐣𑐵 𑑓𑑓. 𑐳𑐵𑑄𑐳𑑂𑐎𑐺𑐟𑐶𑐎 𑐁𑐮𑑀𑐔𑐣𑐵 𑑓𑑔. 𑐴𑐬𑐶𑐟 𑐁𑐮𑑀𑐔𑐣𑐵 𑑓𑑕. 𑐥𑐬𑑂𑐫𑐵𑐰𑐬𑐞𑐷𑐫 𑐁𑐮𑑀𑐔𑐣𑐵 𑑓𑑖. 𑐰𑐶𑐱𑐸𑐡𑑂𑐢 𑐁𑐮𑑀𑐔𑐣𑐵 𑑓𑑗. 𑐥𑐵𑐛𑐎–𑐩𑐿𑐟𑑂𑐬𑐷 𑐁𑐮𑑀𑐔𑐣𑐵 𑑓𑑘. 𑐄𑐟𑑂𑐟𑐬𑐁𑐢𑐸𑐣𑐶𑐎 𑐁𑐮𑑀𑐔𑐣𑐵 𑑓𑑙. 𑐣𑐵𑐨𑐶𑐎𑐷𑐫 𑐁𑐮𑑀𑐔𑐣𑐵 𑑔𑑐. 𑐩𑐣𑑀𑐰𑐶𑐱𑑂𑐮𑐾𑐲𑐞𑐰𑐵𑐡𑐷 𑐁𑐮𑑀𑐔𑐣𑐵 𑑔𑑑. 𑐨𑐵𑐲𑐵𑐥𑐬𑐎 𑐟𑐠𑐵 𑐱𑐿𑐮𑐷𑐰𑐵𑐡𑐷 𑐁𑐮𑑀𑐔𑐣𑐵 𑑔𑑒. 𑐩𑐶𑐠𑐎𑐷𑐫 𑐁𑐮𑑀𑐔𑐣𑐵 𑑔𑑓. 𑐳𑑄𑐬𑐔𑐣𑐵𑐰𑐵𑐡𑐷 𑐁𑐮𑑀𑐔𑐣𑐵 𑑔𑑔. 𑐀𑐣𑑂𑐟𑐥𑐛𑐶𑐫𑐟𑐵 𑐁𑐮𑑀𑐔𑐣𑐵 𑑔𑑕. 𑐣𑐿𑐳𑐬𑑂𑐐𑐶𑐎 𑐁𑐮𑑀𑐔𑐣𑐵 𑑋

𑐰𑐶𑐱𑑂𑐰𑐫𑑂 𑐠𑑁𑑄 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐥𑑂𑐬𑐫𑑀𑐐 𑐰 𑐥𑑂𑐬𑐔𑐮𑐣𑐫𑑂 𑐠𑐸𑐎𑐠𑑄 𑐰𑑂𑐫𑐵𑐥𑐎𑐟𑐵 𑐰𑐫𑐵𑑅 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐔𑐬𑐩 𑐄𑐟𑑂𑐎𑐬𑑂𑐲𑐫𑑂 𑐠𑑂𑐫𑑄𑐎𑐵𑑅 𑐁𑐮𑑀𑐔𑐣𑐵𑐫𑐵 𑐩𑐺𑐟𑑂𑐫𑐸, 𑐖𑐹𑐐𑐸 𑐏“ 𑐟𑐎𑑄 𑐰𑐫𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐗𑐷𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐧𑐵𑐬𑐾 𑐀𑐢𑑂𑐫𑐫𑐣–𑐀𑐣𑐸𑐳𑐣𑑂𑐢𑐵𑐣 𑐫𑐵𑐫𑐾𑐩𑐵𑑅𑐐𑐸 𑐀𑐟𑑂𑐫𑐣𑑂𑐟 𑐁𑐰𑐱𑑂𑐫𑐎 𑐖𑐹 𑑋

𑑗. 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐥𑐹𑐬𑑂𑐰–𑐀𑐢𑑂𑐫𑐫𑐣

𑑗.𑑑) 𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐫𑐵𑐐𑐸 𑐰𑐶𑐔𑐵𑐬

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐥𑐺𑐲𑑂𑐛𑐨𑐹𑐩𑐶 𑐰 𑐰𑐶𑐎𑐵𑐳𑐫𑐵𑐟 𑐎𑐫𑐵𑑅 𑐀𑐣𑐸𑐳𑐣𑑂𑐢𑐵𑐣𑐰𑐶𑐡𑑂 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑐫𑐵𑐐𑐸 𑐠𑐣𑐶𑑄 𑑕𑑔 𑐡𑑃 𑐣𑑂𑐴𑑂𑐫𑑀 𑐣𑑅𑐮𑐶𑐳𑑂𑐰𑐣𑐵 (𑐁𑐮𑑀𑐔𑐣𑐵–𑐳𑑄𑐐𑑂𑐬𑐴 𑑑𑑐𑑘𑑗) 𑐳𑐦𑐹𑐫𑐵 𑐡𑐸𑐣𑐾𑐔𑑂𑐰𑑄𑐐𑐸 𑐳𑐦𑐹 𑐣𑑂𑐴𑑂𑐫𑐠𑐣𑐵 𑐱𑐷𑐬𑑂𑐲𑐎𑐫𑐵𑐐𑐸 𑐀𑐣𑐸𑐳𑐣𑑂𑐢𑐵𑐣𑐵𑐟𑑂𑐩𑐎 𑐥𑑂𑐬𑐧𑐣𑑂𑐢 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐮𑐵𑐐𑐶 𑐟𑐳𑑂𑐳𑐎𑑄 𑐣𑑂𑐴𑑂𑐫𑐠𑐣𑐾 𑐧𑐴𑑅𑐐𑐸 𑐩𑐹𑐮𑑂𑐫𑐰𑐵𑐣𑑂 𑐎𑐺𑐟𑐶 𑐏𑑅 𑑋 𑐠𑐸𑐎𑐷 𑐩𑐮𑑂𑐮𑐖𑐸𑐫𑐵𑐐𑐸 𑐡𑐸𑐎𑐸𑐮𑐸𑐐𑐸 𑐀𑐢𑑂𑐫𑐫𑐣𑐱𑐷𑐮𑐟𑐵, 𑐀𑐣𑐸𑐳𑐣𑑂𑐢𑐵𑐣 𑐖𑑂𑐫𑐵𑐫𑐵 𑐎𑑂𑐲𑐩𑐟𑐵, 𑐄𑐔𑑂𑐔 𑐧𑑁𑐡𑑂𑐢𑐶𑐎𑐟𑐵 𑐰 𑐰𑐫𑑂𑐎𑑅𑐫𑐵 𑐥𑑂𑐬𑐵𑐖𑑂𑐘𑐶𑐎 𑐰𑑂𑐫𑐎𑑂𑐟𑐶𑐟𑑂𑐰𑐫𑐵 𑐣𑐩𑐹𑐣𑐵𑐎𑐠𑑄 𑐧𑑂𑐰𑐫𑐾𑐦𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐔𑑂𑐰𑐳𑐸𑐂 𑐜𑐵.𑐩𑐮𑑂𑐮𑐖𑐸𑑄 𑐗𑐶𑑄𑐔𑑂𑐫𑐵𑐡𑑃𑐫𑐵 (𑑑𑑘) 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐣𑑂𑐴𑑂𑐫𑑀𑐫𑐵 𑐥𑐹𑐬𑑂𑐰𑐳𑑂𑐠𑐶𑐟𑐶 𑐧𑐵𑐬𑐾 𑐠𑐸𑐎𑐠𑑄 𑐢𑐫𑐵𑐡𑐷𑐐𑐸 𑐡𑐸 —

𑐳𑐵𑐴𑐶𑐟𑑂𑐫 𑐳𑐺𑐖𑐣𑐵 𑐩𑐖𑐸𑐂𑐎𑑄 𑐳𑐩𑐵𑐮𑑀𑐔𑐣𑐵𑐫𑐵 𑐳𑑂𑐰𑐟𑐣𑑂𑐟𑑂𑐬 𑐳𑐟𑑂𑐟𑐵 𑐡𑐫𑐾 𑐦𑐿𑐩𑐏𑐸 𑑋 𑐣𑐾𑐥𑐵𑐮𑐨𑐵𑐲𑐵 𑐰𑐵𑐒𑑂𑐩𑐫𑐫𑑂 𑐳𑐩𑐵𑐮𑑀𑐔𑐣𑐵, 𑐳𑐵𑐴𑐶𑐟𑑂𑐫 𑐡𑐬𑑂𑐱𑐣, 𑐎𑐵𑐰𑑂𑐫, 𑐬𑐳, 𑐢𑑂𑐰𑐣𑐶, 𑐀𑐮𑑄𑐎𑐵𑐬, 𑐣𑐵𑐚𑐎 𑐁𑐡𑐶𑐫𑐵 𑐔𑐬𑑂𑐔𑐵 𑐩𑐡𑐸𑐐𑐸𑐮𑐶𑑄 𑐣𑑄 𑐠𑑂𑐰 𑐳𑐶𑐡𑑂𑐢 𑐖𑐹𑐰𑐂 𑐎𑐶 𑐗𑐷𑐐𑐸 𑐨𑐵𑐲𑐵𑐫𑑂 𑐗𑐷 𑐁𑐖𑑂𑐖𑐸𑐥𑐶𑐣𑐶𑐐𑐸 𑐖𑑂𑐫𑐵 𑐬𑐔𑐣𑐵𑐟𑑂𑐩𑐎 𑐖𑐸𑐫𑐵𑑅 𑐣𑑄 𑐳𑐺𑐖𑐣𑐵 𑐥𑑂𑐬𑐢𑐵𑐣 𑐩𑐖𑐹, 𑐳𑐦𑐹 𑐟𑑅𑐐𑐸 𑐡𑐫𑐵𑑅 𑐣𑑄 𑐳𑐵𑐴𑐶𑐟𑑂𑐫 𑐩𑑂𑐴 𑐴𑐾 𑐖𑐎 𑐡𑐸, 𑐗𑐷 𑐁𑐖𑐸𑐥𑐶𑑄 𑐥𑑂𑐬𑐟𑐶𑐨𑐵𑐱𑐵𑐮𑐷 𑐖𑐸𑐫𑐵𑑅 𑐣𑑄 𑐰 𑐥𑑂𑐬𑐟𑐶𑐨𑐵 𑐠𑑅𑐐𑐸 𑐨𑐵𑐲𑐵𑐫𑑂 𑐁𑐥𑐵𑐮𑑄 𑐁𑐳𑐵𑐎𑐸𑐟𑐶𑐎𑐠𑑄 𑐖𑐎 𑐥𑐶𑐧𑑂𑐰𑐫𑐵𑐠𑐎𑐹𑐐𑐸 𑐡𑐸 𑑋 (𑐩𑐮𑑂𑐮, 𑑑𑑐𑑘𑑗𑑅𑑒𑑗)

𑐰𑐫𑑂𑐎𑐮𑑄 𑐣𑐾.𑐳𑑄. 𑑑𑑐𑑖𑑙 𑐧𑐕𑐮𑐵𑑄 ‘𑐢𑐬𑑂𑐩𑑀𑐡𑐫’ 𑐥𑐟𑑂𑐬𑐶𑐎𑐵𑐫𑑂 𑐥𑐶𑐡𑑄𑐐𑐸 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐫𑐵𑐐𑐸 ‘𑐢𑐬𑑂𑐩𑑀𑐡𑐫𑐫𑐵 𑐎𑐴𑐵𑐣𑐷𑐟’ 𑐣𑐵𑑄𑐐𑐸 𑐁𑐮𑑀𑐔𑐣𑐵–𑐔𑑂𑐰𑐳𑐸𑐫𑐵𑐟 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐡𑐎𑐳𑐶𑐧𑐾 𑐣𑑂𑐴𑐵𑐥𑐵𑑄𑐐𑐸 𑐁𑐮𑑀𑐔𑐣𑐵 𑐟𑐵𑐫𑐾𑐎𑐵 𑐠𑐸𑐎𑐶𑐫𑐵 𑐔𑑂𑐰𑐩𑐶 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑐳𑑂𑐰𑐫𑐵𑑄 𑐣𑑂𑐴𑑂𑐫𑑀 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐳𑐸𑑄 𑐁𑐮𑑀𑐔𑐎 𑐩𑐡𑐸𑐐𑐸 𑐰 𑐰𑐫𑑂𑐎𑑅 𑐴𑐾 𑐣𑑂𑐴𑐵𑐥𑐵𑑄𑐩𑑂𑐴 𑐁𑐮𑑀𑐔𑐎𑐫𑐵 𑐩𑐵𑐣𑑂𑐫𑐟𑐵 𑐧𑐶𑐫𑐵𑑅 𑐠𑑂𑐰 𑐴𑐾 𑐁𑐮𑑀𑐔𑐣𑐵 𑐔𑑂𑐰𑐳𑐸𑑄𑐣𑐶𑐳𑐾𑑄 𑑑𑑘 𑐡𑑃𑐟𑐎𑐫𑐵 𑐡𑐸𑐣𑐾 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐣𑐵𑑄 𑐕𑐸 𑐄𑐥𑐮𑐧𑑂𑐢𑐶 𑐥𑑂𑐬𑐵𑐥𑑂𑐟 𑐫𑐵𑐟 𑐢𑐿𑐐𑐸 𑐏“𑐫𑑂 𑐰𑐫𑑂𑐎𑐮𑑄 𑐠𑐸𑐎𑐠𑑄 𑐠𑑅𑐐𑐸 𑐢𑐵𑐥𑐹 𑐣𑑂𑐴𑑂𑐫𑐠𑐣𑐵𑐡𑐷𑐐𑐸 𑐡𑐸 –

𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐖𑐸𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑑂 𑐁𑐮𑑀𑐔𑐣𑐵𑐫𑐵 𑑑𑑘 𑐡𑑃𑐫𑐵 𑐧𑐵𑐏𑐣𑐫𑑂 𑐡𑐸𑐠𑑂𑐫𑐵𑑅𑐥𑐶𑑄 𑐁𑐮𑑀𑐔𑐎 𑐰 𑐮𑐾𑐏𑐎𑐟 𑐐𑐵𑐎𑑂𑐎𑑄 𑐡𑐸 𑑋 𑐟𑐬 𑐁𑐮𑑀𑐔𑐣𑐵𑐫𑐵𑐟 𑐕𑐐𑐹 𑐧𑑁𑐡𑑂𑐢𑐶𑐎 𑐳𑐵𑐢𑐣𑐵𑐫𑐵 (intellectual discipline) 𑐬𑐸𑐥𑐫𑑂 𑐰𑐵 𑐕𑐐𑐹 𑐄𑐟𑑂𑐟𑐬𑐡𑐵𑐫𑐶𑐟𑑂𑐰𑐥𑐹𑐬𑑂𑐞 𑐱𑐿𑐎𑑂𑐲𑐶𑐎 𑐔𑐶𑐣𑑂𑐟𑐣 (academic pursuit) 𑐫𑐵 𑐬𑐸𑐥𑐫𑑂 𑐣𑐷𑐫𑐵𑐣𑐵𑑅 𑐁𑐮𑑀𑐔𑐣𑐵 𑐔𑑂𑐰𑑅𑐥𑐶𑑄 𑐰𑑂𑐫𑐎𑑂𑐟𑐶𑐟 𑐩𑑂𑐴 𑐴𑐾 𑐖𑐎 𑐏𑐣𑐾𑐡𑐸 𑑋 (𑐩𑐮𑑂𑐮, 𑑑𑑐𑑘𑑗𑑅𑑑𑑓𑑘–𑑑𑑓𑑙)

𑐗𑐷𑐐𑐸 𑐨𑐵𑐲𑐵𑐫𑑂 𑐔𑑂𑐰𑐫𑐵𑐟𑑅𑐐𑐸 𑐁𑐥𑐵 𑐢𑐿𑐠𑐾𑑄 𑐁𑐮𑑀𑐔𑐣𑐵 𑐰𑑂𑐫𑐵𑐏𑑂𑐫𑐵–𑐥𑑂𑐬𑐢𑐵𑐣 𑐖𑐸𑐫𑐵𑑅 𑐕𑐐𑐹 𑐕𑐐𑐹 𑐎𑐺𑐟𑐶𑐫𑐵 𑐧𑐾𑐐𑑂𑐮𑐵 𑐧𑐾𑐐𑑂𑐮𑐿 𑐚𑐷𑐎𑐵–𑐚𑐶𑐥𑑂𑐥𑐞𑐷 𑐠𑐾𑑄 𑐖𑐹𑐐𑐸 𑐡𑐸 𑐐𑐸𑐎𑐶𑑄 𑐫𑐵𑐣𑐵𑑅 𑐢𑐵𑐟𑑂𑐠𑐾𑑄𑐫𑐵 𑐀𑐬𑑂𑐠𑐾 ‘𑐁𑐮𑑀𑐔𑐣𑐵’𑐫𑐵 𑐣𑐶𑐬𑑂𑐨𑐶𑐎 𑐰𑐶𑐎𑐵𑐳 𑐩𑐖𑐸𑐳𑐾 𑐚𑐷𑐎𑐵–𑐚𑐶𑐥𑑂𑐥𑐞𑐷 𑐰 𑐰𑑂𑐫𑐵𑐏𑑂𑐫𑐵𑐫𑐵 𑐳𑑂𑐟𑐬𑐾 𑐗𑐷𑐐𑐸 𑐁𑐮𑑀𑐔𑐣𑐵–𑐳𑐵𑐴𑐶𑐟𑑂𑐫 𑐠𑐶𑐎𑐶𑐠𑐶𑐎𑐶 𑐥𑐣𑐵 𑐔𑑂𑐰𑐣 𑐟𑐶𑐣𑐶 𑑋 𑐁𑐮𑑀𑐔𑐎 𑐎𑐰𑐶𑐫𑐵 𑐚𑐷𑐎𑐵𑐎𑐵𑐬 𑐩𑐏𑐸 𑑋 𑐐𑐸𑐐𑐸 𑐀𑐬𑑂𑐠𑐾 𑐁𑐮𑑀𑐔𑐣𑐵 𑐕𑐐𑐹 𑐥𑐺𑐲𑑂𑐛𑐨𑐹𑐩𑐷 𑐕𑐐𑐹 𑐎𑐺𑐟𑐶𑐫𑐵 𑐳𑐵𑐴𑐶𑐟𑑂𑐫𑐶𑐎 𑐩𑐹𑐮𑑂𑐫𑐵𑑄𑐎𑐣 𑐖𑑂𑐰𑐷𑐩𑐵𑑅𑐐𑐸 𑐏𑑅 𑐰 𑐀𑐬𑑂𑐠𑐾 𑐗𑐷𑐐𑐸 𑐳𑐵𑐴𑐶𑐟𑑂𑐫𑐫𑐵 𑐩𑐹𑐮𑑂𑐫𑐵𑑄𑐎𑐣 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐁𑐮𑑀𑐔𑐣𑐵 𑐐𑐵𑐎𑑄 𑐮𑐶𑐎𑐸𑐣𑐵 𑐔𑑂𑐰𑑄𑐐𑐸 𑐡𑐸 𑑋 𑐗𑐷𑐐𑐸 𑐳𑐵𑐴𑐶𑐟𑑂𑐫𑐾 𑐁𑐮𑑀𑐔𑐎𑑄 𑐥𑐵𑐬𑐏𑐶𑐫𑐵 𑐠𑐵𑐫𑑂 𑐎𑐵𑐫𑑂𑐐𑐸 𑐮𑑂𑐫𑑄 𑐴𑐾 𑐡𑐣𑐶 𑑋 𑐁𑑅𑐟𑐎 𑐁𑐮𑑀𑐔𑐎 𑐕𑐩𑑂𑐴 𑐳𑐴𑐺𑐡𑐫𑐷 𑐥𑐵𑐛𑐎 𑐖𑐸𑐫𑐵𑑅 𑐎𑐰𑐶 𑐰 𑐮𑐾𑐏𑐎𑐟𑐣𑐵𑐥 𑐔𑑂𑐰𑐣𑐵 𑐔𑑂𑐰𑐣 𑑋 𑐟𑐬 𑐰𑑄 𑐠𑑅𑐐𑐸 𑐳𑑅 𑐟𑐵𑐫𑑂𑐡𑐫𑑂𑐎 𑐮𑑅𑐫𑐵𑐟 𑐮𑑅 𑐡𑐸𑐬𑐸𑐫𑐵𑐟 𑐡𑐸𑐬𑐸 𑐢𑐎𑐵 𑐕𑐸𑐚𑑂𑐚𑐾 𑐫𑐵𑐣𑐵𑑅 𑐎𑑂𑐫𑐣𑐵 𑐧𑐷 𑐩𑐵𑐣𑐶 𑑋 (𑐩𑐮𑑂𑐮, 𑑑𑑐𑑘𑑗𑑅𑑑𑑔𑑒–𑑔𑑓)

𑑒𑑕 𑐡𑑃 𑐮𑐶𑐥𑐵 𑐣𑐾.𑐳𑑄. 𑑑𑑑𑑑𑑖 𑐠𑑂𑐫𑑄𑐎𑐵𑑅 ‘𑐥𑐮𑐶𑐳𑑂𑐠𑐵’ 𑐫𑐵𑐟 𑐧𑐶𑐫𑐵𑐡𑐷𑐐𑐸 𑐕𑐐𑐹 𑐀𑐣𑑂𑐟𑐬𑑂𑐰𑐵𑐬𑑂𑐟𑐵𑐫𑑂 𑐰𑐫𑑂𑐎𑐮𑑄 𑐠𑐸𑐎𑐠𑑄 𑐢𑐫𑐵𑐡𑐶𑐮 –

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐣𑑄 𑐗𑐶𑐗𑐵𑑄𑐩𑐗𑐵𑑄 𑐡𑐣𑐵𑐔𑑂𑐰𑑄𑐐𑐸 𑐢𑐵𑐫𑐾 𑐩𑐕𑐶𑑄𑐠𑐾𑑄 𑐔𑑂𑐰𑑄 𑑋 𑐀𑐮𑐾 𑐳𑐩𑐵𑐮𑑀𑐔𑐣𑐵 𑐣𑑄 𑐗𑐶𑐗𑐵𑑄𑐩𑐶𑐗𑐵𑑄 𑐡𑑄𑐐𑐸 𑐖𑐶𑑄 𑐩𑐴𑐳𑐹𑐳 𑐩𑐫𑐵𑐣𑐵 𑑋 𑐕𑐵𑐫𑑂𑐢𑐵𑑅𑐳𑐵 𑐫𑐎𑑂𑐰𑐳𑐶𑐫𑐵 𑐳𑐵𑐴𑐶𑐟𑑂𑐫𑐶𑐎 𑐎𑐺𑐟𑐶 𑐣𑑄 𑐥𑐶𑐴𑐵𑑃 𑐰𑐫𑐵𑐔𑑂𑐰𑑄𑐐𑐸𑐸 𑐡𑐸 𑑋 𑐄𑐥𑐣𑑂𑐫𑐵𑐳, 𑐣𑐵𑐚𑐎, 𑐎𑐰𑐶𑐟𑐵, 𑐎𑐴𑐵𑐣𑐷, 𑐣𑐶𑐧𑐣𑑂𑐢 𑐠𑑂𑐰 𑐦𑐸𑐎𑑂𑐎𑑄 𑐰𑐶𑐢𑐵𑐫𑑂 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐳𑑄, 𑐳𑐶𑐡𑑂𑐢𑐴𑐳𑑂𑐟 𑐮𑐾𑐏𑐎𑐥𑐶𑑄𑐳𑑄 𑐫𑐎𑑂𑐰 𑐎𑐺𑐟𑐶 𑐥𑐶𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐸𑐏𑑂𑐫 𑐕𑐸 𑐢𑐵𑐮 𑐢𑐵𑑅𑐳𑐵 𑐐𑐸𑐮𑐶 𑐎𑐺𑐟𑐶 𑐥𑐶𑐴𑐵“𑐰𑐮 𑐠𑐸𑐎𑐶𑐫𑐵 𑐔𑐬𑑂𑐔𑐵–𑐥𑐬𑐶𑐔𑐬𑑂𑐔𑐵 𑐫𑐵𑐫𑐾𑐐𑐸 𑐗𑐷𑐐𑐸 𑐳𑐩𑐵𑐖𑐫𑑂 𑐄𑐮𑐶 𑐔𑐮𑐣 𑐩𑐡𑐸 𑑋 𑐫𑐡𑐶 𑐐𑐣𑑄 𑐕𑐐𑐹 𑐩𑐾𑐐𑐸 𑐨𑐵𑐲𑐵 𑐰𑐵 𑐳𑐵𑐴𑐶𑐟𑑂𑐫𑐫𑑂 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐄𑐥𑐣𑑂𑐫𑐵𑐳 𑐰𑐵 𑐣𑑂𑐴𑐹𑐐𑐸 𑐄𑐥𑐣𑑂𑐫𑐵𑐳 𑐥𑐶𑐴𑐵𑑃 𑐰𑐮, 𑐣𑑂𑐴𑐹 𑐧𑐵𑐏𑑄 𑐥𑐶𑐴𑐵𑑃 𑐰𑐮, 𑐣𑐵𑐚𑐎 𑐥𑐶𑐴𑐵𑑃 𑐰𑐮 𑐰𑐵 𑐎𑐰𑐶𑐟𑐵 𑐳𑑄𑐐𑑂𑐬𑐴 𑐥𑐶𑐴𑐵𑑃 𑐰𑐮 𑐢𑐵𑑅𑐳𑐵 𑐄𑐎𑐶𑐫𑐵 𑐐𑐸𑐮𑐶 𑐔𑐬𑑂𑐔𑐵–𑐥𑐬𑐶𑐔𑐬𑑂𑐔𑐵 𑐰 𑐕𑐮𑐦𑐮 𑐖𑐸𑐂 𑐟𑐟𑑅𑐳𑐮𑑄 𑐰𑐵𑐡𑐰𑐶𑐰𑐵𑐡 𑐥𑐶𑐴𑐵𑑃 𑐰𑐂 𑐀𑐠𑐾 𑐔𑐬𑑂𑐔𑐵–𑐥𑐬𑐶𑐔𑐬𑑂𑐔𑐵 𑐫𑐵𑐫𑐾𑐐𑐸, 𑐳𑐦𑐹 𑐣𑑂𑐫𑐵𑐣𑐵𑑅 𑐄𑐎𑐶𑐫𑐵 𑐧𑐵𑐬𑐾 𑐕𑐮𑐦𑐮 𑐫𑐵𑐫𑐾𑐐𑐸, 𑐥𑐸𑐔𑑅 𑐥𑐸𑐔𑑅 𑐩𑐸𑐣𑐵𑑅 𑐎𑑂𑐫𑐧𑐫𑑂, 𑐬𑐾𑐲𑑂𑐚𑐸𑐬𑐵𑑃𑐫𑑂, 𑐎𑐦𑐶 𑐴𑐵𑐄𑐳𑐫𑑂, 𑐳𑑀𑐳𑐵𑐂𑐚𑐷 𑐰𑐵 𑐠𑐷𑐠𑐷 𑐳𑐩𑐹𑐴𑐮𑐫𑑂 𑐩𑐸𑐣𑐵𑑅 𑐠𑑂𑐰 𑐳𑐦𑐹, 𑐠𑐸𑐐𑐸 𑐩𑐸𑐣𑐵 𑐠𑐸𑐐𑐸 𑐎𑐵𑐬𑐞𑑄 𑐫𑑅, 𑐠𑐸𑐐𑐸 𑐎𑐵𑐬𑐞𑑄 𑐩𑐫𑑅, 𑐠𑑂𑐰 𑐳𑐦𑐹 𑐠𑐫𑑂 𑐖𑐸𑐫𑐵𑑅 𑐧𑐵𑑄𑐮𑐵𑑅 𑐠𑑂𑐰 𑐄𑐥𑐣𑑂𑐫𑐵𑐳, 𑐢𑐸𑐳𑑂𑐰𑐵𑑄𑐫𑐵 𑐄𑐥𑐣𑑂𑐫𑐵𑐳, 𑐠𑐫𑑂 𑐖𑐸𑐫𑐵𑑅 𑐧𑐵𑑄𑐩𑐮𑐵𑑅 𑐰𑐵 𑐥𑐹𑐬𑑂𑐞 𑐧𑐴𑐵𑐡𑐸𑐬 𑐰𑐿𑐡𑑂𑐫𑐫𑐵 𑐎𑐰𑐶𑐟𑐵 𑐠𑐫𑑂 𑐖𑐸𑐫𑐵𑑅 𑐧𑐵𑑄𑐮𑐵𑑅 𑐰𑐵 𑐡𑐶𑐣𑐾𑐱 𑐨𑐸𑐖𑐹𑐫𑐵 𑐣𑐵𑐚𑐎 𑐣𑑂𑐴𑐹𑐐𑐸 𑐎𑐶𑐳𑐶𑐩𑑄 𑐥𑑂𑐬𑐫𑑀𑐐 𑐖𑐹𑐐𑐸 𑐡𑐸 𑐰𑐵 𑐮𑐎𑑂𑐲𑑂𑐩𑐞 𑐬𑐵𑐖𑐰𑑄𑐱𑐷𑐫𑐵 𑐧𑐵𑐏𑑄 𑐠𑐥𑐵𑐫𑑂 𑐔𑑂𑐰𑑅 𑐧𑐵𑑄𑐮𑐵𑑅 𑐢𑐎𑐵𑑅 𑐢𑐿𑐐𑐸 𑐠𑑂𑐰 𑐔𑐬𑑂𑐔𑐵–𑐥𑐬𑐶𑐔𑐬𑑂𑐔𑐵 𑐫𑐵𑐫𑐾𑐐𑐸 𑐗𑐷 𑐄𑐮𑐶 𑐔𑐮𑐣 𑐩𑐡𑐸 𑑋 𑐰𑐵𑐳𑑂𑐟𑐰𑐫𑑂 𑐖𑐶𑑄 𑐳𑑂𑐰𑐫𑐾𑐧𑐮𑐾 𑐠𑑂𑐰 𑐥𑑂𑐬𑐎𑑂𑐬𑐶𑐫𑐵 𑐳𑐸𑐠𑐵𑑄𑐩𑐮𑐵𑐎𑑄 𑐳𑑂𑐰𑐳𑑂𑐠 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑐵 𑐰𑐶𑐎𑐵𑐳 𑐖𑐸𑐂𑐩𑐏𑐸 𑑋 (𑐩𑐮𑑂𑐮, 𑑑𑑑𑑑𑑖𑑅𑑓𑑘)

𑑗.𑑒) 𑐥𑑂𑐬𑐵.𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 (𑐣𑐾.𑐳𑑄. 𑑑𑑐𑑕𑑒–𑑑𑑑𑑔𑑑) – 𑐣𑐾.𑐳𑑄 𑑑𑑐𑑘𑑗 𑐳 𑐜𑐵. 𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑑄 𑐳𑐩𑑂𑐥𑐵𑐡𑐣 𑐫𑐵𑐣𑐵𑐡𑐷𑐐𑐸 𑐣𑑅𑐮𑐶𑐳𑑂𑐰𑐣𑐵 (𑑑𑑐𑑘𑑗) 𑐁𑐮𑑀𑐔𑐣𑐵 𑐳𑐦𑐹 𑐥𑐶𑐡𑑄𑐐𑐸 𑐡𑐔𑑂𑐕𑐶𑐮𑐶𑐥𑐵 𑐣𑐾.𑐳𑑄. 𑑑𑑐𑑘𑑘𑐳 𑐥𑑂𑐬𑐵.𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐖𑐸𑐫𑐵𑐐𑐸 𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟 (𑑑𑑐𑑘𑑘) 𑐔𑑂𑐰𑐳𑐵𑐥𑐵𑐳𑐵𑐥𑐵𑐏𑐾𑑄 𑐥𑐶𑐡𑐣 𑑋 𑐄𑐐𑐸 𑐳𑐦𑐸𑐮𑐶𑐂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫 𑐱𑐷𑐬𑑂𑐲𑐎𑐫𑐵𑐐𑐸 𑐕𑐐𑐹 𑐀𑐢𑑂𑐫𑐵𑐫𑐮𑐫𑑂 𑐥𑑂𑐬𑐵.𑐱𑑂𑐬𑐾𑐲𑑂𑐛𑐖𑐸𑑄 𑐢𑐫𑐵𑐡𑐷𑐐𑐸 𑐡𑐸 –

𑐁𑑅𑐟𑐎 𑐏𑐣𑐾𑐡𑐸𑐐𑐸 𑐟𑐠𑑂𑐫𑐵𑑄𑐎𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐮𑐾𑐏 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐫𑐵 𑐢𑐬𑑂𑐩𑑀𑐡𑐫𑐫𑐵 𑐎𑐴𑐵𑐣𑐷𑐟 𑐏𑑅 𑑋 (𑐱𑑂𑐬𑐾𑐲𑑂𑐛, 𑑑𑑐𑑘𑑘𑑅𑑑𑑗𑑓)

𑐠𑑁𑑄𑐳𑐶𑐎𑑄 𑐳𑐔𑑂𑐕𑐶𑐡𑑃 𑐩𑐫𑐵𑐎 𑐣𑑂𑐴𑑂𑐫𑑀 𑐗𑐶𑑄𑐐𑐸𑑄𑐐𑐹𑐐𑐸 𑐱𑐟𑐵𑐧𑑂𑐡𑐷𑐫𑐵 𑐡𑐠𑐸𑐥𑐵𑐏𑐾 𑐀𑑄𑐐𑑂𑐬𑐾𑐖𑐷 𑐳𑐵𑐴𑐶𑐟𑑂𑐫𑐫𑐵 𑐣𑐵𑑄𑐖𑐵𑑅𑐩𑑂𑐴 𑐎𑐰𑐶 𑐰 𑐳𑐩𑐵𑐮𑑀𑐔𑐎 𑐩𑑂𑐫𑐵𑐠𑐸 𑐁𑐬𑑂𑐣𑐮𑑂𑐜𑑄 𑐕𑐎𑑂𑐰𑑅 𑐢𑐵𑑅𑐐𑐸 𑐏𑑅 – “𑐫𑐹𑐬𑑀𑐥𑐫𑐵𑐟 𑐠𑑁𑑄 𑐡𑐎𑐮𑐾 𑐩𑐵𑑅𑐐𑐸 𑐰𑐳𑑂𑐟𑐸 𑐳𑐩𑐵𑐮𑑀𑐔𑐣𑐵 𑐏𑑅 𑐀𑐮𑐾 𑐠𑑂𑐰 𑐴𑐾 𑐰𑐳𑑂𑐟𑐸 𑐀𑑄𑐐𑑂𑐬𑐾𑐖𑐷 𑐳𑐵𑐴𑐶𑐟𑑂𑐫𑐫𑑂 𑐡𑐎𑐮𑐾 𑐩𑐡𑐸 𑑋” 𑐀𑑄𑐐𑑂𑐬𑐾𑐖𑐷 𑐳𑐵𑐴𑐶𑐟𑑂𑐫𑐧𑐵𑐬𑐾 𑐳𑐔𑑂𑐕𑐶𑐡“ 𑐣𑑂𑐴𑑂𑐫𑑀 𑐢𑐫𑐵𑐟𑑅𑐐𑐸 𑐠𑑂𑐰 𑐖𑑀𑐫𑐵 𑐳𑑂𑐠𑐶𑐟𑐶 𑐠𑑁𑑄𑐎𑐣𑑂𑐴𑐾 𑐣𑐾𑐥𑐵𑐮𑐫𑐵 𑐳𑐵𑐴𑐶𑐟𑑂𑐫𑐶𑐎 𑐎𑑂𑐲𑐾𑐟𑑂𑐬𑐫𑑂 𑐏𑐣𑐾𑐡𑐫𑐵𑐔𑑂𑐰𑐣 𑑋 𑐰𑐶𑐱𑑂𑐰𑐫𑑂 𑐣𑐶𑐳𑑅𑐡𑑃 𑐣𑑂𑐴𑑂𑐫𑑀𑐣𑐶𑐳𑐾𑑄 𑐖𑑂𑐘𑐵𑐣𑐫𑐵 𑐰𑐶𑐨𑐶𑐣𑑂𑐣 𑐰𑐶𑐲𑐫, 𑐡𑐬𑑂𑐱𑐣, 𑐂𑐟𑐶𑐴𑐵𑐳, 𑐎𑐮𑐵, 𑐳𑐵𑐴𑐶𑐟𑑂𑐫, 𑐰𑐶𑐖𑑂𑐘𑐵𑐣, 𑐦𑐸𑐎𑑂𑐎𑐮𑐶𑐳𑐾 𑐰𑐫𑐵𑐔𑑂𑐰𑑄𑐐𑐸 𑐣𑑂𑐴𑐹𑐐𑐸 𑐥𑑂𑐬𑐰𑐵𑐴, 𑐣𑑂𑐴𑑂𑐫𑐵𑐐𑑂𑐐𑐸 𑐰𑐳𑑂𑐟𑐸𑐫𑐵𑐟 𑐣𑑄 𑐐𑐠𑐾 𑐏𑑅 𑐀𑐠𑐾 𑐏𑑄𑐎𑐾𑐐𑐸 𑐎𑐸𑐟𑑅 𑐀𑐬𑑂𑐠𑐵𑐟𑑂 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐨𑐵𑐰𑐣𑐵 𑐗𑐷𑐐𑐸 𑐡𑐾𑐱𑐫𑑂 𑐧𑐵𑑄𑐮𑐵𑐎 𑐁𑑅𑐟𑐎 𑐣𑑄 𑐩𑐣𑑂𑐴𑑂𑐫𑐵𑑅𑐣𑐶 𑑋 𑐖𑑂𑐘𑐵𑐣𑐫𑐵𑐟 𑐢𑐵𑐟𑑂𑐠𑐾𑑄 𑐴𑐾 𑐣𑑂𑐴𑑂𑐫𑐵𑐎𑐾𑐐𑐸 𑐖𑐹𑐳𑐵 𑐣𑑂𑐴𑑂𑐫𑐵𑐐𑐸𑑄 𑐰𑐳𑑂𑐟𑐸 𑐰 𑐰𑐶𑐲𑐫𑐫𑐵𑐟 𑐳𑐩𑐵𑐮𑑀𑐔𑐣𑐵𑐫𑐵 𑐩𑐶𑐏𑐵𑑄 𑐳𑑂𑐰𑐫𑐾𑐩𑐵𑑅 𑑋 𑐗𑐷𑐠𑐵𑐫𑑂 𑐠𑑁𑑄𑐎𑐣𑑂𑐴𑐾 𑐣𑐾𑐥𑐵𑐮𑐫𑐵 𑐳𑐵𑐴𑐶𑐟𑑂𑐫 𑐰 𑐎𑐮𑐵𑐫𑐵 𑐎𑑂𑐲𑐾𑐟𑑂𑐬𑐫𑑂 𑐡𑐎𑐮𑐾 𑐰𑐶𑐎𑐵𑐳 𑐩𑐖𑐹𑐐𑐸 𑐥𑐎𑑂𑐲 𑐳𑐩𑐵𑐮𑑀𑐔𑐣𑐵 𑐏𑑅 𑑋 (𑐱𑑂𑐬𑐾𑐲𑑂𑐛, 𑑑𑑐𑑘𑑘𑑅𑑘)

𑐗𑐷𑐠𑐵𑐫𑑂 𑐠𑑁𑑄𑐎𑐣𑑂𑐴𑐾 𑐣𑐾𑐥𑐵𑐮𑐫𑐵 𑐳𑐵𑐴𑐶𑐟𑑂𑐫 𑐰 𑐎𑐮𑐵𑐫𑐵 𑐎𑑂𑐲𑐾𑐟𑑂𑐬𑐾 𑐡𑐎𑐮𑐾 𑐰𑐶𑐎𑐵𑐳 𑐩𑐖𑐹𑐐𑐸 𑐥𑐎𑑂𑐲 𑐳𑐩𑐵𑐮𑑀𑐔𑐣𑐵 𑐏𑑅 𑑋 𑐣𑐶𑐩𑑂𑐴 𑐥𑑂𑐫𑐩𑑂𑐴 𑐣𑐵𑑄𑐖𑐵𑑅𑐥𑐶𑑄 𑐳𑐩𑐵𑐮𑑀𑐔𑐎𑐥𑐶𑑄 𑐥𑐶𑐴𑐵𑑃 𑐰𑑀𑐐𑐸 𑐡𑐸, 𑐀𑐩𑐶𑐳𑑄 𑐳𑐸𑑄 𑐮𑐾𑐏𑐎 𑐰𑐵 𑐎𑐮𑐵𑐎𑐵𑐬𑐫𑐵𑐟 𑐐𑐸𑐎𑐠𑑄 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐧𑐶𑐮, 𑐕𑐸𑑄 𑐎𑐮𑐵𑐎𑐺𑐟𑐶 𑐐𑐸𑐮𑐶 𑐐𑑂𑐫𑑄 𑐢𑐫𑐵 𑐧𑐶𑐮 𑐄𑐎𑐶𑐫𑐵𑐟 𑐴𑐾 𑐳𑐵𑐴𑐶𑐟𑑂𑐫𑐶𑐎 𑐎𑑂𑐲𑐾𑐟𑑂𑐬𑐾 𑐩𑐵𑐣𑑂𑐫𑐟𑐵 𑐧𑐶𑐂 𑐩𑐵𑐮𑐵 𑐔𑑂𑐰𑐣 𑑋 (𑐱𑑂𑐬𑐾𑐲𑑂𑐛, 𑑑𑑐𑑘𑑘𑑅𑑘)

𑐠𑑁𑑄 𑐣𑑄 𑐣𑐷𑐳𑑂𑐰𑐡𑑃 𑐣𑑂𑐴𑑂𑐫𑑀 𑐰𑐫𑑂𑐎𑐮𑑄 𑐧𑐶𑐫𑐵𑐡𑐷𑐐𑐸 𑐧𑐶𑐔𑐵𑑅 𑐎𑐠𑑄 –

𑐗𑐷𑐐𑐸 𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫 𑐰𑐵 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐐𑐟𑐶𑐰𑐶𑐢𑐶𑐫𑐵 𑐣𑐷𑐳𑑂𑐰𑐣𑐾𑐐𑐸 𑐀𑐰𑐢𑐶𑐂 𑐥𑐶𑐴𑐵𑑃𑐰𑑅𑐐𑐸 𑐀𑐐𑑂𑐬𑐖 𑐳𑐩𑐵𑐮𑑀𑐔𑐎𑐥𑐶𑐳𑑄 𑐳𑐵𑐴𑐶𑐟𑑂𑐫𑐶𑐎 𑐖𑐐𑐟𑐫𑐵 𑐰 𑐳𑐩𑐵𑐮𑑀𑐔𑐎 𑐳𑐩𑐹𑐴𑐫𑐵 𑐳𑑂𑐰𑐫𑑄𑐳𑑂𑐦𑐹𑐬𑑂𑐟 𑐣𑐾𑐟𑐺𑐟𑑂𑐰 𑐎𑐵𑐫𑐾𑐩𑐦𑐸𑐐𑐸 𑐎𑐵𑐬𑐞𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐐𑐟𑐶𑐰𑐶𑐢𑐶 𑐕𑐐𑐹 𑐣𑐶𑐱𑑂𑐔𑐶𑐟 𑐥𑐬𑐩𑑂𑐥𑐬𑐵 𑐳𑑂𑐰𑐣𑐾𑐩𑐦𑐸𑐟 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐕𑐐𑐹 𑐰𑐵 𑐀𑐣𑐾𑐎 𑐳𑐩𑐵𑐮𑑀𑐔𑐣𑐵–𑐥𑑂𑐬𑐰𑐵𑐴 𑐣𑑄 𑐣𑐶𑐱𑑂𑐔𑐶𑐟 𑐬𑐸𑐥𑑄 𑐥𑐶𑐡𑐣𑐾 𑐩𑐦𑐸𑐟 𑑋 𑐢𑐵𑐟𑑂𑐠𑐾𑑄 𑐢𑐵𑐫𑐾𑐩𑐵𑑅𑐳𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐸𑑄 𑐣𑑄 𑐳𑐩𑐵𑐮𑑀𑐔𑐎𑐫𑐵 𑐳𑐩𑐵𑐮𑑀𑐔𑐣𑐵 𑐥𑐡𑑂𑐢𑐟𑐶 𑐠𑑂𑐰 𑐴𑐾 𑐢𑐎𑐵 𑐢𑐵𑐫𑐾 𑐩𑐕𑐶𑑄, 𑐢𑐵𑑅𑐳𑐵𑑄 𑐰𑐶𑐰𑐵𑐡 𑐩𑐸𑐎𑑂𑐟 𑐖𑐸𑐂𑐩𑐏𑐸 𑑋 (𑐱𑑂𑐬𑐾𑐲𑑂𑐛, 𑐣𑐾.𑐳𑑄. 𑑑𑑑𑑑𑑐𑑅𑑒𑑕)

𑐰𑑄𑐐𑐸 𑐗𑐞𑑂𑐜𑐿 𑐥𑑂𑐫𑑄𑐐𑐹 𑐡𑐱𑐎𑐫𑐵 𑐀𑐮𑐩𑐮𑑄 𑐕𑐐𑐹 𑐣𑐶𑐱𑑂𑐔𑐶𑐟 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐥𑑂𑐬𑐰𑐵𑐴 𑐰 𑐎𑑂𑐰𑐵𑐟𑐸𑐐𑐸 𑐳𑐩𑐵𑐮𑑀𑐔𑐣𑐵𑐫𑐵 𑐥𑐬𑐩𑑂𑐥𑐬𑐵 𑐣𑐶𑐳𑑂𑐰𑐣𑐾 𑐩𑐦𑐸𑐳𑐵𑑄 𑐠𑑁𑑄 𑐰𑑂𑐫𑐎𑑂𑐟𑐶𑐐𑐟 𑐳𑑂𑐰𑐵𑐥𑐹 𑐰 𑐩𑑀𑐴𑐫𑐵 𑐐𑐵𑐮𑑄 𑐳𑐩𑐵𑐮𑑀𑐔𑐣𑐵𑐫𑐵𑐟 𑐠𑐎𑐵𑐫𑐾 𑐦𑐂𑐐𑐸 𑐰𑐵𑐟𑐵𑐰𑐬𑐞 𑐰𑑅𑐐𑐸 𑐡𑐸 𑑋 𑐁𑐥𑐵𑐮𑑄 𑐮𑐾𑐏𑐎𑐥𑐶𑐣𑐶 𑐳𑐵𑐴𑐶𑐟𑑂𑐫𑐶𑐎 𑐳𑐵𑐢𑐣𑐵𑑄 𑐗𑐷𑐐𑐸 𑐨𑐵𑐲𑐵𑐫𑑂 𑐕𑐸𑑄 𑐨𑐟𑐶𑐳𑐵𑑄 𑐳𑐶𑐬𑑂𑐖𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫𑐶𑐎 𑐎𑐺𑐟𑐶 𑐩𑐸𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐰𑐶𑐨𑐶𑐣𑑂𑐣 𑐩𑐣𑐹𑐟𑐫𑑂𑐳𑑄 𑐠𑑅𑐠𑑅𑐐𑐸 𑐰𑐶𑐔𑐵𑐬 𑐰 𑐩𑐟 𑐡𑐫𑐾𑐎𑐾 𑐢𑐸𑑄𑐎𑐮 𑑋 𑐠𑐸𑐐𑐸 𑐢𑑂𑐬𑐸𑐰𑐷𑐎𑐬𑐞 𑐖𑐸𑐫𑐵𑐰𑑄𑐰𑐫𑐵𑐔𑑂𑐰𑑄𑐐𑐸 𑐳𑑂𑐠𑐶𑐟𑐶𑐂 𑐧𑐵𑑄𑐮𑐵𑐎 𑐮𑑃𑐥𑐸 𑐎𑑂𑐫𑐣𑐵𑑅 𑐣𑐾𑐟𑐺𑐟𑑂𑐰 𑐧𑐶𑐂𑐦𑐸𑐥𑐶𑑄 𑐳𑐩𑐵𑐮𑑀𑐔𑐎𑐥𑐶𑑄𑐳𑑄 𑐗𑐷𑐐𑐸 𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐎𑐥𑐶𑑄𑐟 𑐩𑐵𑐬𑑂𑐐𑐡𑐬𑑂𑐱𑐣 𑐧𑐶𑐂𑐐𑐸 𑐖𑐎 𑐩𑐏𑐸, 𑐮𑐾𑐏𑐎𑐥𑐶𑐣𑑂𑐟 𑐣𑑄 𑐠𑑅𑐐𑐸 𑐄𑐟𑑂𑐟𑐬𑐡𑐵𑐫𑐶𑐟𑑂𑐰𑐥𑑂𑐬𑐟𑐶 𑐳𑐔𑐾𑐟 𑐫𑐵𑐫𑐾𑐦𑐿𑐐𑐸 𑐳𑑂𑐠𑐶𑐟𑐶 𑐰𑑅𑐐𑐸 𑐡𑐸 𑑋 (𑐱𑑂𑐬𑐾𑐲𑑂𑐛, 𑐣𑐾.𑐳𑑄.𑑑𑑑𑑑𑑐𑑅𑑒𑑖)

𑑗.𑑓) 𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬 (𑐣𑐾.𑐳𑑄. )

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶𑐫𑐵 𑐀𑐢𑑂𑐫𑐫𑐣 𑐫𑐵𑐣𑐵𑐡𑐷𑐩𑑂𑐴 𑐩𑐾𑐩𑑂𑐴 𑐁𑐮𑑀𑐔𑐎 𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬𑐖𑐸 𑐏𑑅 𑑋 𑐠𑑂𑐰𑐫𑑂𑐎𑐮𑑄 𑐥𑐷𑐔𑑂𑐫𑐵𑐡𑑃 𑐣𑑂𑐴𑑂𑐫𑑀 𑐣𑐾.𑐳𑑄. 𑑑𑑐𑑙𑑓 𑐳 𑐥𑑂𑐬𑐎𑐵𑐱𑐶𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐣𑐵 : 𑐕𑐐𑐹 𑐰𑐶𑐰𑐾𑐔𑐣𑐵 𑐣𑐵𑑄𑐐𑐸 𑐔𑑂𑐰𑐳𑐸𑐂 𑐠𑑅𑐐𑐸 𑐰𑐶𑐔𑐵𑐬 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 –

𑑗.𑑓.𑑑) 𑐗𑐷𑐐𑐸 𑐨𑐵𑐲𑐵–𑐳𑐵𑐴𑐶𑐟𑑂𑐫𑐫𑑂 𑐐𑐵𑐎𑑂𑐎𑑄 𑐰𑐶𑐱𑐶𑐲𑑂𑐚 𑐳𑑂𑐠𑐵𑐣 𑐡𑐸𑐥𑐶𑑄 𑐁𑐮𑑀𑐔𑐎𑐟𑐫𑑂𑐐𑐸 𑐔𑑂𑐰𑐳𑐵𑐫𑑂 𑐣𑐵𑐥𑑄 𑐔𑑂𑐰𑐫𑑂 𑐣𑑂𑐴𑑂𑐫𑐠𑐣𑐵𑐐𑐸 𑐠𑐾𑑄𑐖𑐵𑑅𑐐𑐸 𑐕𑐐𑐹 𑐳𑐿𑐡𑑂𑐢𑐵𑐣𑑂𑐟𑐶𑐎 𑐰 𑐰𑐶𑐰𑐾𑐔𑐣𑐵𑐟𑑂𑐩𑐎 𑐣𑐶𑐬𑑂𑐡𑐶𑐲𑑂𑐚𑐟𑐵 𑐩𑐡𑐫𑐵𑐔𑑂𑐰𑐣 𑐢𑐵𑑅𑐳𑐵 𑐩𑐾𑐩𑐾𑐥𑐶𑐣𑐶𑐐𑐸 𑐔𑑂𑐰𑐳𑐵𑐫𑑂 𑐣𑑄 𑐐𑐵𑐎𑑂𑐎𑑄 𑐎𑑂𑐫𑐵𑐟𑐸 𑐥𑐴𑐫𑐵 𑐔𑐶𑑄 𑐮𑐸𑐫𑐵𑐰𑐂𑐐𑐸 𑐀𑐳𑑂𑐰𑐵𑐨𑐵𑐰𑐶𑐎 𑐩𑐏𑐸 𑑋 𑐐𑐠𑐾 𑐎𑐶 𑐐𑐸𑐐𑐸𑑄 𑐎𑐺𑐟𑐶𑐫𑐵 𑐰𑐶𑐱𑑂𑐮𑐾𑐲𑐞 𑐫𑐵𑐫𑐾𑐐𑐸 𑐥𑑂𑐬𑐳𑑄𑐐𑐫𑑂 𑐩𑐹–𑐬𑐔𑐣𑐵𑐫𑑂 𑐴𑐾 𑐩𑐡𑐸𑐐𑐸 𑐏𑑃𑐗𑑀 𑐄𑐡𑐺𑐟 𑐫𑐵𑐣𑐵 𑐄𑐡𑐵𑐴𑐬𑐞 𑐧𑐶𑐂𑐐𑐸, 𑐕𑐐𑐹 𑐴𑐾 𑐮𑐾𑐏𑐫𑐵 𑐕𑐐𑐹 𑐥𑑄𑐎𑑂𑐟𑐶𑐫𑐵 𑐡𑐸𑐣𑐾𑐔𑑂𑐰𑑄𑐐𑐸 𑐣𑐶𑐗𑑀 𑐏𑑃𑐫𑑂 𑐣𑑄 𑐰𑐶𑐬𑑀𑐢𑐵𑐨𑐵𑐳 𑐏𑐣𑐾𑐡𑐂𑐐𑐸, 𑐩𑐹–𑐬𑐔𑐣𑐵𑐫𑐵 𑐳𑑂𑐥𑐲𑑂𑐚 𑐖𑐹𑐐𑐸 𑐀𑐬𑑂𑐠𑐫𑐵𑐟 𑐴𑐾 𑐀𑐣𑐬𑑂𑐠 𑐫𑐵𑐣𑐵 𑐰𑐶𑐱𑑂𑐮𑐾𑐲𑐞 (?) 𑐫𑐵𑐫𑐾𑐐𑐸 𑐁𑐡𑐶 𑐗𑐷 𑐁𑐮𑑀𑐔𑐎𑐟𑐳𑐾𑑄 𑐁𑐮𑑀𑐔𑐣𑐵𑐫𑐵𑐟 𑐣𑐷 𑐫𑐵𑐣𑐵 𑐩𑐳𑑂𑐰𑑅𑐐𑐸 𑐰𑐵 𑐂𑐩𑐶𑐎𑐾 𑐧𑑁𑐡𑑂𑐢𑐶𑐎 𑐳𑐖𑐐𑐟𑐵 𑐩𑐰𑐣𑐶𑐐𑐸𑐫𑐵 𑐔𑐶𑑄 𑐏𑑅 𑑋

𑑗.𑑓.𑑒) 𑐁𑐮𑑀𑐔𑐣𑐵𑐫𑐵 𑐩𑐾𑐐𑐸 𑐳𑐩𑐳𑑂𑐫𑐵 𑐏𑑅 𑐧𑑁𑐡𑑂𑐢𑐶𑐎 𑐣𑐶𑐬𑐥𑐾𑐎𑑂𑐲𑐟𑐵 𑐰 𑐣𑐶𑐬𑑂𑐨𑐶𑐎𑐟𑐵𑐫𑐵 𑐀𑐨𑐵𑐰 𑑋 𑐠𑐸𑐎𑐶𑐫𑐵 𑐎𑐵𑐬𑐞 𑐎𑐰𑐶–𑐮𑐾𑐏𑐎 𑐰 𑐁𑐮𑑀𑐔𑐎 𑐖𑑀𑐮𑐶𑑄𑐖𑑀 𑐖𑐸𑐫𑐵𑐔𑑂𑐰𑑄𑐐𑐸, 𑐀𑐮𑐾 𑐗𑐷𑐐𑐸 𑐳𑐵𑐴𑐶𑐟𑑂𑐫𑐶𑐎 𑐐𑐟𑐶𑐰𑐶𑐢𑐶𑐫𑐵 𑐳𑐷𑐩𑐶𑐟 𑐳𑑂𑐠𑐵𑐣𑐷𑐫𑐟𑐵𑑄 𑐫𑐵𑐣𑐵𑑅 𑐗𑐷 𑐡𑐠𑐸𑐂 𑐡𑐫𑐵𑐔𑑂𑐰𑑄𑐐𑐸 𑐣𑐶𑐎𑐚𑐟𑐩 𑐰𑐿𑐫𑐎𑑂𑐟𑐶𑐎 𑐳𑐩𑑂𑐥𑐬𑑂𑐎 𑐣𑑄 𑐏𑑅 𑐢𑐿𑐐𑐸 𑐐𑐸𑐮𑐶𑐳𑑂𑐫𑐵𑑄 𑐰𑐶𑐔𑐵𑐬 𑐡𑐸 𑑋 𑐱𑐵𑐫𑐡 𑐠𑑂𑐰𑐴𑐾 𑐎𑐵𑐬𑐞𑑄 𑐣𑑄 𑐖𑐸𑐂 𑐐𑐸𑐮𑐶𑐳𑑂𑐫𑐵𑑄 𑐠𑑅 𑐢𑐵𑐟𑑂𑐠𑐾𑑄𑐫𑐵 𑐣𑐵𑑄 𑐳𑐸𑐔𑐸𑐎𑐵𑑅 𑐩𑐾𑐐𑐸 𑐴𑐾 𑐣𑐵𑑄 𑐕𑐸𑐣𑐵𑑅 𑐳𑐸𑐮𑐵–𑐳𑐸𑐮𑐵 𑐫𑐵𑐂𑐐𑐸 𑐁𑐮𑑀𑐔𑐣𑐵𑐫𑐵 𑐣𑑄 𑐥𑐬𑐩𑑂𑐥𑐬𑐵 𑐏𑐣𑐾𑐡𑐸𑐐𑐸 (𑐠𑐖𑐵𑑅𑐐𑐸 𑐔𑐴𑑅𑐥𑐴𑑅 𑐗𑐷𑐐𑐸 𑐨𑐵𑐲𑐵𑐫𑑂 𑐳𑑂𑐰𑐫𑐵𑑄 𑐣𑐾𑐥𑐵𑐮𑐷𑐂 𑐁𑐥𑐵𑑅 𑐏𑐣𑐾𑐡𑐸) 𑑋

𑑗.𑑓.𑑓) 𑐟𑐬 𑐗𑐷 𑐐𑐸𑐮𑐶𑑄 𑐁𑐮𑑀𑐔𑐎𑐟𑐳𑐾𑑄 𑐣𑑂𑐴𑐵𑐥𑐵𑐫𑐵 𑐴𑐾 𑐥𑐸𑐮𑐵𑑄 𑐩𑐶𑐏𑐵𑑄 𑐳𑑂𑐰𑐫𑐾𑐐𑐸 𑐧𑐵𑐣𑐷𑑄 𑐫𑐵𑐣𑐵𑑅 𑐗𑐷 𑐐𑐸𑐮𑐶 𑐣𑐮𑐶 𑐁𑐮𑑀𑐔𑐎𑐟𑐳𑐾𑑄 𑐫𑐵𑐐𑐸 𑐣𑐶𑐬𑑂𑐨𑐶𑐎 𑐁𑐮𑑀𑐔𑐣𑐵𑐟𑑂𑐩𑐎 𑐎𑐸𑐟𑑅𑐫𑐵𑐟 𑐣𑑄 ‘𑐟𑐸𑐟𑐶 𑐖𑑂𑐰𑐣𑐵 𑐳𑐵𑐮𑐾𑐐𑐸’ 𑐥𑑂𑐬𑐫𑐵𑐳 𑐴𑐾 𑐖𑐎 𑐏𑐣𑐵𑐔𑑂𑐰𑐣 𑑋 𑐠𑐖𑐵𑑅𑐐𑐸 𑐡𑐺𑐲𑑂𑐚𑐶𑐎𑑀𑐞 𑐁𑐮𑑀𑐔𑐣𑐵𑐫𑐵𑐟 𑐣𑑂𑐴𑑂𑐫𑐵𑐧𑐮𑐾𑑄 ‘𑐴𑑃𑐫𑑂 𑐎𑐵𑐫𑐾 𑐮𑐵 𑐏𑑂𑐫𑐾“ 𑐎𑐵𑐫𑐾 𑐮𑐵’ 𑐳𑑂𑐠𑐶𑐟𑐶𑐂 𑐴𑐾 𑐖𑐎 𑐎𑐸𑐣𑐵𑐟𑐫𑐾𑐐𑐸 𑐡𑐸𑐬𑐵𑐐𑑂𑐬𑐴 𑐏𑑅 𑑋 (𑐔𑐶𑐟𑑂𑐬𑐎𑐵𑐬, 𑑑𑑐𑑙𑑓𑑅𑑒𑑖–𑑒𑑗)

𑑗.𑑔) 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶𑐫𑐵 𑐧𑐵𑐬𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐟𑐳𑐎𑑄 𑐔𑑂𑐰𑐖𑐵𑑅𑐥𑐶𑑄 𑐁𑐮𑑀𑐔𑐎𑐥𑐶𑑄𑐳𑑄 𑐠𑑅𑐠𑑅𑐐𑐸 𑐡𑐺𑐲𑑂𑐚𑐶𑐎𑑀𑐞𑐎𑐠𑑄 𑐰𑐶𑐳𑑂𑐟𑐺𑐟 𑐀𑐢𑑂𑐫𑐫𑐣 𑐫𑐵𑐣𑐵𑐡𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑂𑐰 𑐧𑐵𑐬𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐎 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫𑐖𑐸𑐫𑐵𑐐𑐸 𑐳𑑂𑐰𑐷𑐔𑑂𑐫𑐵𑐡“ (𑑓𑑘 𑐰𑐬𑑂𑐲) 𑐣𑑂𑐴𑑂𑐫𑑀𑐫𑐵𑐐𑐸 𑐰𑐶𑐔𑐵𑐬 𑐠𑐠𑐾 𑐡𑐸 –

𑐁𑐮𑑀𑐔𑐣𑐵 𑐫𑐵𑐂𑐥𑐶𑑄𑐳𑑄 𑐁𑐮𑑀𑐔𑐣𑐵 𑐫𑐵𑐣𑐵𑐩𑐧𑑂𑐫𑐹𑐐𑐸𑐮𑐶𑑄 𑐳𑐵𑐴𑐶𑐟𑑂𑐫 𑐩𑐣𑑄𑐟𑐸𑐣𑐵 𑐠𑐾𑑄 𑐧𑑂𑐰𑐮𑐣𑐾 𑐩𑐦𑐂𑐔𑑂𑐰𑐣 𑐀𑐮𑐾 𑐥𑑂𑐬𑐟𑐶𑐨𑐵𑐡𑐸𑐥𑐶𑑄 𑐔𑑂𑐰𑐩𑐶𑐟𑐳𑐾𑑄 𑐣𑑄 𑐦𑐸𑐐𑐸 𑐔𑐵𑑅𑐐𑐸 𑐫𑑀𑐐𑐡𑐵𑐣 𑐧𑐶𑐂𑐟 𑐩𑐣 𑐴𑑂𑐰𑐫𑐾𑐎𑐵 𑐔𑑂𑐰𑐣𑐾𑐩𑐦𑐂𑐔𑑂𑐰𑐣 𑐢𑐿𑐐𑐸 𑐏𑑃 𑐕𑐸𑑄 𑐃 𑐣𑑂𑐴𑑂𑐫𑑀𑐣𑐶𑐳𑐾𑑄 𑐟𑐵𑐫𑐾𑐡𑐂𑐰𑐂𑐔𑑂𑐰𑑄𑐐𑐸 𑐏𑑅 𑑋 𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐁𑑅 𑐣𑑂𑐴𑐵𑐥𑐵𑐳𑐶𑐫𑐵𑑄 𑐀𑐥𑑂𑐰𑑅 𑐴𑐾 𑐔𑑂𑐰𑐩𑐶𑐟 𑐡𑐫𑐾𑐢𑐸𑑄𑐎𑐹𑐐𑐸, 𑐥𑐟𑑂𑐬𑐥𑐟𑑂𑐬𑐶𑐎𑐵𑐟 𑐣𑑄 𑐟𑑅𑐐𑐸 𑐩𑐕𑐶 𑐥𑐶𑐴𑐵𑑃 𑐰𑐫𑐾𑐢𑐸𑑄𑐎𑐹𑐐𑐸, 𑐀𑐮𑐾 𑐄𑐔𑑂𑐔 𑐱𑐶𑐎𑑂𑐲𑐵 𑐳𑐩𑐾𑐟𑑄 𑐠𑑂𑐰 𑐨𑐵𑐲𑐵𑐫𑑂 𑐎𑐵𑐫𑐾𑐡𑐫𑐾 𑐢𑐸𑑄𑐎𑐹𑐐𑐸 𑐖𑐸𑐫𑐵𑑅 𑐥𑐶𑐴𑐵𑑃 𑐰𑑅𑐐𑐸 𑐬𑐔𑐣𑐵 𑐰𑐶𑐱𑐾𑐲𑐫𑐵𑐐𑐸 𑐔𑐬𑑂𑐔𑐵–𑐥𑐬𑐶𑐔𑐬𑑂𑐔𑐵 𑐫𑐵𑐫𑐾𑐐𑐸 𑐀𑐰𑐳𑐬 𑐫𑐠𑐾𑐲𑑂𑐚 𑐡𑐫𑐾𑐢𑐸𑑄𑐎𑐹𑐐𑐸 𑐂𑐮𑐫𑑂 𑐣𑑄 𑐠𑐠𑐾 𑐐𑐸𑐣𑐸𑐐𑐸𑐣𑐸𑑄 𑐣𑐸𑐐𑑅𑐏𑑃 𑐐𑑂𑐰𑐵𑐣𑐵𑐔𑑂𑐰𑐣𑐾𑐩𑐵𑑅𑐐𑐸 𑐳𑑂𑐠𑐶𑐟𑐶 𑐕𑐵𑐫𑑂 𑐮𑑂𑐫𑐣𑐵𑐔𑑂𑐰𑐣 𑐀𑐮𑐾 𑐠𑐸𑐎𑐶𑐫𑐵𑐐𑐸 𑐍𑐔𑐶𑐟𑑂𑐫 𑐕𑐸 𑐧𑐶𑐔𑐵𑑅 𑐫𑐵𑐫𑐾 𑐧𑐴𑐖𑐹 𑑋 (𑐎𑐬𑑂𑐩𑐵𑐔𑐵𑐬𑑂𑐫, 𑐣𑐾.𑐳𑑄. 𑑑𑑑𑑐𑑕𑑅𑑑)

𑐮𑐶𑐥𑐵 𑐰𑐫𑑂𑐎𑐮𑑄 𑐠𑑁𑑄 𑐣𑑄 𑐳𑑂𑐰𑐷𑐣𑐶𑐡“ 𑐣𑑂𑐴𑑂𑐫𑑀 ‘𑐏𑐾𑐮𑐸𑐂𑐟𑐵𑑅’𑐫𑐵𑐟 𑐧𑐶𑐫𑐵𑐡𑐷𑐐𑐸 𑐕𑐐𑐹 𑐀𑐣𑑂𑐟𑐬𑑂𑐰𑐵𑐬𑑂𑐟𑐵𑐫𑑂 𑐠𑐠𑐾 𑐢𑐫𑐵𑐡𑐷𑐐𑐸 𑐡𑐸 –
𑐳𑐩𑐵𑐮𑑀𑐔𑐣𑐵 𑐢𑐫𑐵𑐐𑐸 𑐳𑐵𑐴𑐶𑐟𑑂𑐫 𑐧𑑂𑐰𑐮𑐣 𑐢𑐵𑐫𑐾𑐰𑑄 𑐧𑑂𑐰𑐮𑐣𑐷𑐐𑐸 𑐏𑑅 𑑋 𑐳𑐵𑐴𑐶𑐟𑑂𑐫 𑐧𑑂𑐰𑐩𑐮𑑄𑐎𑑄 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵 𑐧𑑂𑐰𑐮𑐣𑐷𑐐𑐸 𑐩𑐏𑐸 𑑋 𑐠𑑂𑐰 𑐮𑑂𑐫𑐵𑐏𑑄 𑐳𑐵𑐴𑐶𑐟𑑂𑐫 𑐣𑑂𑐴𑐵𑐥𑐵 𑐳𑑂𑐰𑐫𑐵𑑄 𑐫𑐎𑑂𑐎𑑀 𑐧𑑂𑐰𑐮𑐣𑐾 𑐢𑐸𑑄𑐎𑐮 𑑋 𑐫𑐎𑑂𑐎𑑀 𑐩𑐴𑐵𑐬𑐠𑐷𑐟𑐳𑐾𑑄 𑐖𑐷𑐰𑐣 𑐥𑐵𑐣𑐵 𑐡𑐶𑐰𑑄𑐐𑐟 𑐣𑑄 𑐖𑐸𑐫𑐵𑑅 𑐰𑐣𑐾 𑐢𑐸𑑄𑐎𑐮 𑑋 𑐄𑐎𑐶𑐫𑐵 𑐮𑑂𑐫𑐵𑐏𑑄 𑐳𑐩𑐵𑐮𑑀𑐔𑐣𑐵 𑐣𑑄 𑐠𑐴𑐵𑑃 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐀𑐣𑐾𑐎 𑐮𑐾𑐏𑐎𑐫𑐵𑐟 𑐥𑑂𑐬𑐟𑐶𑐳𑑂𑐠𑐵𑐥𑐶𑐟 𑐫𑐵𑐣𑐵𑑅 𑐡𑐶𑐱𑐵𑐧𑑀𑐢 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐏𑑃 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐚𑐶𑐥𑑂𑐥𑐞𑐷 𑐖𑐎 𑐩𑐏𑐸 𑐳𑐩𑐵𑐮𑑀𑐔𑐎𑐟𑐫𑑂𑐐𑐸 𑐡𑐶𑐣𑐵𑐣𑐸𑐡𑐶𑐣 𑐖𑐸𑐫𑐵𑐰𑐫𑐵𑐔𑑂𑐰𑑄𑐐𑐸 𑐳𑑄𑐏𑑂𑐫𑐵𑐟𑑂𑐩𑐎 𑐰𑐺𑐡𑑂𑐢𑐶𑑄 𑐣𑑄 𑐳𑑂𑐥𑐲𑑂𑐚 𑐫𑐵𑑅 𑑋 𑐠𑐸𑐎𑐶𑐫𑐵𑐐𑐸 𑐄𑐥𑐮𑐧𑑂𑐢𑐶 𑐏𑑅, 𑐰𑐶𑐨𑐶𑐣𑑂𑐣 𑐮𑐾𑐏𑐎𑐟𑐫𑑂𑐟 𑐣𑑂𑐴𑑂𑐫𑑀𑐣𑐾 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐷𑐠𑐷 𑐎𑐺𑐟𑐶𑐫𑐵𑐐𑐸 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐳𑐵𑐴𑐶𑐟𑑂𑐫𑐫𑑂 𑐐𑐟𑐶 𑐴𑐫𑐾𑐐𑐸 𑐥𑐬𑐶𑐥𑐵𑐚𑐷 𑐣𑑂𑐴𑑂𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐕𑐐𑐹 𑐩𑐔𑐵𑑅 𑐩𑐐𑐵𑑅𑐐𑐸 𑐠𑐾𑑄 𑐕𑐟𑐵 𑐖𑐶𑐟 𑐕𑐸 𑐟𑐵𑐫𑐵𑐔𑑂𑐰𑑄𑐐𑐸 𑐡𑐸 𑐢𑐵𑑅𑐳𑐵 𑐠𑑂𑐰 𑐥𑐬𑐶𑐥𑐵𑐚𑐷 𑐏𑐵𑐮𑐶 𑐟𑑂𑐰𑐵𑐔𑑂𑐔𑐟𑐶𑐔𑑂𑐔 𑐚𑐶𑐥𑑂𑐥𑐞𑐷 𑐫𑐵𑐫𑐾𑐠𑐾𑑄 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐥𑐹𑐰𑑄𑐎 𑐋𑐟𑐶𑐴𑐵𑐳𑐶𑐎 𑐳𑐵𑐩𑐵𑐖𑐶𑐎 𑐰 𑐁𑐬𑑂𑐠𑐶𑐎 𑐥𑐺𑐲𑑂𑐛𑐨𑐹𑐩𑐷 𑐎𑐺𑐟𑐶𑐎𑐵𑐬𑐫𑐵𑐐𑐸 𑐥𑐵𑐬𑐶𑐰𑐵𑐬𑐶𑐎 𑐰 𑐳𑐵𑐩𑐵𑐖𑐶𑐎 𑐥𑐺𑐲𑑂𑐛𑐨𑐹𑐩𑐶𑐂, 𑐠𑑂𑐰 𑐎𑐺𑐟𑐶𑐫𑐵𑐟 𑐰 𑐣𑑂𑐴𑑂𑐫𑑀𑐫𑐵𑐐𑐸 𑐩𑐾𑐩𑐾𑐐𑐸 𑐎𑐺𑐟𑐶𑐟 𑐮𑑂𑐰𑐵𑐎𑐵𑑅 𑐩𑐹𑐮𑑂𑐫 𑐰𑐵 𑐰𑐶𑐔𑐵𑐬 𑐥𑑂𑐬𑐟𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐩𑐰𑑅𑐣𑐶 𑑋 𑐀𑐮𑐾 𑐰 𑐳𑐩𑐵𑐮𑑀𑐔𑐣𑐵𑐫𑐵 𑐁𑐢𑐵𑐬 𑐕𑐸, 𑐰 𑐕𑐵𑐫𑑂 𑐐𑐸𑐐𑐸 𑐎𑐶𑐳𑐶𑐩𑑄 𑐟𑐬𑑂𑐎𑐳𑑄𑐐𑐟 𑐖𑐹, 𑐄𑐎𑐶𑐫𑐵𑐐𑐸 𑐥𑐸𑐲𑑂𑐚𑐶 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐹𑐐𑐸 𑐏𑐣𑐾 𑐩𑐡𑐸𑐣𑐶 𑑋 𑐀𑐠𑐾 𑐖𑐹𑐐𑐸 𑐱𑐵𑐫𑐡 𑐄𑐮𑐶𑐐𑑂𑐫𑑄𑐎 𑐳𑐵𑐴𑐶𑐟𑑂𑐫 𑐧𑑂𑐰𑐮𑐣𑐾 𑐩𑐢𑐸𑑄𑐎𑐹𑐐𑐣𑐶𑐐𑐸 𑐖𑐸𑐫𑐵𑑅 𑐣𑑄 𑐖𑐸𑐂𑐦𑐸 𑑋 𑐣𑐟𑑂𑐬𑐳𑐵, 𑐳𑐩𑐵𑐮𑑀𑐔𑐣𑐵𑐫𑐵𑐟 𑐔𑐶𑐎𑐶𑐟𑑂𑐳𑐎𑑄 𑐫𑐵𑐂𑐐𑐸 𑐣𑐶𑐡𑐵𑐣𑐮𑐶𑐳𑐾 𑐮𑐣𑐾𑐐𑐸 𑐖𑐹𑐳𑐵 𑐳𑐩𑐵𑐮𑑀𑐔𑐣𑐵𑐫𑐵𑐟 𑐜𑐵𑐎𑑂𑐚𑐬𑑄 𑐳𑑂𑐚𑐾𑐠𑐾𑐳𑑂𑐎𑑀𑐥 𑐁𑐡𑐶 𑐫𑐣𑑂𑐟𑑂𑐬 𑐰𑐶𑐱𑐾𑐲𑑄 𑐥𑐬𑐷𑐎𑑂𑐲𑐵 𑐫𑐵𑐣𑐵𑑅 𑐣𑐶𑐬𑐷𑐎𑑂𑐲𑐞 𑐫𑐵𑐂𑐐𑐸 𑐰𑐶𑐢𑐶𑐮𑐶𑐳𑐾 𑐟𑐸𑐮𑐣𑐵 𑐫𑐵𑐫𑐾 𑐩𑐵𑐳𑑂𑐟𑐶𑐰𑑅 𑑋 𑐕𑐐𑐹 𑐥𑐡𑑂𑐢𑐟𑐶 𑐡𑐸 – 𑐔𑐶𑐎𑐶𑐟𑑂𑐳𑐎𑑄 𑐣𑐵𑐜𑐷 𑐖𑑂𑐰𑐣𑐵𑑅 𑐳𑑂𑐚𑐾𑐠𑐾𑐳𑑂𑐎𑑀𑐥 𑐟𑐫𑐵𑑅 𑐠𑑅𑐩𑑂𑐴𑑄 𑐠𑑅𑐩𑑂𑐴𑑄 𑐠𑐹𑐠𑐾 𑐟𑐵𑑅𑐠𑐾𑑄 𑐖𑐎 𑐠𑐠𑐾 𑐏𑑅 𑐢𑐎𑐵 𑐢𑐫𑐵 𑐕𑑂𑐰𑐫𑐵 𑐠𑐾𑑄 𑐫𑐟𑑂𑐠𑐾 𑐰𑐵𑐳𑑅 𑐫𑐵𑐫𑐾𑐐𑐸 𑑋 𑐩𑐾𑐐𑐸 𑐥𑐡𑑂𑐢𑐟𑐶 𑐡𑐸 – 𑐰 𑐣𑐵𑐜𑐷𑑄 𑐎𑑂𑐫𑐣𑐵𑐔𑑂𑐰𑑄𑐐𑐸 𑐥𑑂𑐬𑐎𑐺𑐟𑐶 𑐰 𑐳𑑂𑐚𑐾𑐠𑐾𑐳𑑂𑐎𑑀𑐥𑑄 𑐎𑐣𑐵𑐔𑑂𑐰𑑄𑐐𑐸 𑐥𑑂𑐬𑐎𑐺𑐟𑐶, 𑐐𑑂𑐬𑐵𑐦𑐫𑑂 𑐡𑐺𑐱𑑂𑐫𑑄 𑐬𑐸𑐥𑑄 𑐳𑐎𑐳𑐶𑐐𑐸𑑄 𑐩𑐶𑐏𑐵𑐫𑑂 𑐴𑐫𑐵𑐧𑐶𑐂𑐐𑐸 𑑋 𑐣𑑂𑐴𑐵𑐥𑐵 𑐢𑐫𑐵𑐐𑐸 𑐥𑐡𑑂𑐢𑐟𑐶𑑄 𑐔𑐶𑐎𑐶𑐟𑑂𑐳𑐎 𑐖𑐎 Convince 𑐖𑐹𑐐𑐸 𑐏𑐣𑐾 𑐡𑐫𑐵𑐔𑑂𑐰𑐣𑐷 𑑋 𑐮𑐶𑐥𑐵 𑐢𑐫𑐵𑐐𑐸 𑐥𑐡𑑂𑐢𑐟𑐶𑑄 𑐰𑐶𑐬𑐵𑐩𑐷𑐫𑐵𑐟 𑐣𑑄 Convince 𑐫𑐵𑐎𑐵𑐔𑑂𑐰𑐣𑐷 𑑋 𑐄𑐎𑐶𑑄 𑐫𑐵𑐣𑐵𑑅 𑐔𑐶𑐎𑐶𑐟𑑂𑐳𑐎𑑄 𑐫𑐵𑐂𑐐𑐸 𑐰𑐵𑐳𑑅 𑐄𑐥𑐔𑐵𑐬𑐫𑑂 𑐰𑐶𑐬𑐵𑐩𑐷𑐫𑐵𑐐𑐸 𑐣𑑄 co-operation 𑐡𑐫𑐵𑐔𑑂𑐰𑐣𑐷 𑑋 𑐗𑐷𑐠𑐵𑐫𑑂 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑑂 𑐠𑑂𑐰 𑐥𑐡𑑂𑐢𑐟𑐶 𑐣𑑂𑐴𑑂𑐫𑐵𑐩𑐰𑑅𑐣𑐶𑐐𑐸 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐶𑑄 𑐳𑑂𑐰𑐫𑐾, 𑐁𑑅𑐫𑐵𑐐𑐸 𑐖𑐩𑐵𑐣𑐵𑐫𑑂 𑐣𑑂𑐴𑐵𑐥𑐵𑑄 𑐢𑐫𑐵𑐐𑐸 𑐥𑐡𑑂𑐢𑐟𑐶 𑐳𑑂𑐰𑐫𑐵𑑄 𑐠𑑂𑐰 𑐮𑐶𑐥𑐵 𑐢𑐫𑐵𑐐𑐸 𑐥𑐡𑑂𑐢𑐟𑐶𑐫𑐵𑐐𑐸 𑐥𑑂𑐬𑐰𑐬𑑂𑐡𑑂𑐢𑐣 𑐖𑐸𑐂𑐩𑐵𑑅 𑐮𑐵 𑐠𑐾 𑐔𑑂𑐰𑑄 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐮𑐾𑐏𑐎, 𑐥𑐵𑐛𑐎 𑐰 𑐳𑐩𑐵𑐮𑑀𑐔𑐎 𑐳𑑂𑐰𑐩𑑂𑐴𑐳𑐶𑐟 𑐠𑑅𑐠𑑅𑐐𑐸 𑐳𑑂𑐠𑐶𑐟𑐶 𑐀𑐰𑐳𑑂𑐠𑐶𑐟𑐶 𑐧𑑀𑐢 𑐖𑐸𑐫𑐵𑑅 𑐳𑑂𑐰𑐩𑑂𑐴𑐳𑐶𑐐𑐸 𑐳𑐴𑐮𑐴𑐣𑑄 𑐳𑐵𑐴𑐶𑐟𑑂𑐫 𑐧𑑂𑐰𑐮𑐣𑐵𑑅 𑐰𑐣𑐷 𑐮𑐵 𑐢𑐫𑐵 𑐠𑐾𑑄 𑐔𑑂𑐰𑑄 𑑋 𑐠𑐸𑐎𑐶𑑄 𑐎𑐺𑐟𑐶 𑐰𑐶𑐱𑐾𑐲𑐫𑐵𑐐𑐸 𑐮𑐾𑐏𑐎 𑐰𑐶𑐱𑐾𑐲𑐫𑐵𑐐𑐸 𑐰𑐵𑐳𑑂𑐟𑐰𑐶𑐎 𑐬𑐸𑐥 𑐥𑑂𑐬𑐳𑑂𑐟𑐸𑐟 𑐖𑐸𑐫𑐵𑑅 𑐖𑐷𑐰𑐣 𑐣𑑂𑐴𑑂𑐫𑐵𑐎𑐾𑐟 𑐣𑑄 𑐐𑑂𑐰𑐴𑐵𑐮𑐶 𑐖𑐹𑐰𑐣𑐷 𑑋 (𑐏𑐾𑐮𑐸𑐂𑐟𑐵𑑅, 𑑑𑑑𑑐𑑙𑑅𑑑𑑐𑑙–𑑑𑑑𑑐)

𑑗.𑑕) 𑐖𑐣𑐎𑐮𑐵𑐮 𑐰𑐿𑐡𑑂𑐫 (𑐣𑐾.𑐳𑑄. 𑑑𑑐𑑕𑑔)

𑐠𑑁𑑄 𑐣𑑄 𑐣𑐷𑐳𑑂𑐰𑐡𑑃 𑐣𑑂𑐴𑑂𑐫𑑀 𑐠𑑂𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵 𑐣𑐵𑑄𑐫𑐵𑐐𑐸 𑐀𑐣𑐸𑐳𑐣𑑂𑐢𑐵𑐣𑐵𑐟𑑂𑐩𑐎 𑐔𑑂𑐰𑐳𑐸𑐂 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑐵 𑐄𑐟𑑂𑐥𑐟𑑂𑐟𑐶 𑐰𑐶𑐎𑐵𑐳𑐎𑑂𑐬𑐩𑐫𑑂 𑐏𑐣𑐾𑐡𑐸𑐐𑐸 𑐳𑐩𑐳𑑂𑐫𑐵𑐫𑐵𑐟 𑐎𑐫𑐵𑑅 𑐠𑑅𑐐𑐸 𑐢𑐵𑐬𑐞𑐵 𑐠𑐸𑐎𑐠𑑄 𑐧𑑂𑐰𑐫𑐵𑐡𑐷𑐐𑐸 𑐡𑐸 –

𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑑂 𑐀𑐗 𑐣𑑄 𑐳𑐿𑐡𑑂𑐢𑐵𑐣𑑂𑐟𑐶𑐎 𑐥𑐎𑑂𑐲𑐫𑐵 𑐐𑐴𑐣 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐱𑐵𑐳𑑂𑐟𑑂𑐬𑐵𑐬𑑂𑐠 𑐰 𑐔𑐶𑐣𑑂𑐟𑐣 𑐩𑐣𑐣 𑐫𑐵𑐣𑐵𑐟𑑅𑐐𑐸 𑐎𑐺𑐟𑐶𑐳𑐶𑐧𑐾𑑄 𑐬𑐔𑐣𑐵𑐫𑐵 𑐩𑐵𑐟𑑂𑐬𑐵 𑐐𑐸𑐐𑐸𑑄 𑐎𑐺𑐟𑐶 𑐬𑐔𑐣𑐵𑐫𑐵 𑐐𑐸𑐐𑐸𑑄 𑐁𑑄𑐱𑐶𑐎 𑐥𑐎𑑂𑐲𑐫𑐵 𑐰𑑂𑐫𑐵𑐰𑐴𑐵𑐬𑐶𑐎 𑐳𑐩𑐵𑐮𑑀𑐔𑐣𑐵 𑐔𑑂𑐰𑐳𑐸𑐫𑐵 𑐧𑑀𑐗 𑐀𑐥𑑂𑐰𑐫𑐵𑑅 𑐳𑐩𑐐𑑂𑐬𑐟𑑅 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵 𑐀𑐳𑐣𑑂𑐟𑐸𑐮𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐀𑐣𑐸𑐨𑐰 𑐖𑐹 𑑋 𑐠𑐸𑐏𑐾𑐬𑐶𑐏𑐾 𑐡𑐸𑐳𑑂𑐰𑑅𑐗𑐵𑐂𑐥𑐶𑑄 𑐣𑑂𑐴𑐹𑐣𑑂𑐴𑐹𑐥𑐶𑑄 𑐥𑑂𑐬𑐵𑐢𑑂𑐫𑐵𑐥𑐎 𑐰 𑐳𑐩𑐵𑐮𑑀𑐔𑐎𑐥𑐶𑑄𑐳𑑄 𑐢𑑂𑐫𑐵𑐣 𑐧𑐶𑐂𑐐𑐸 𑐰 𑐐𑐴𑐣 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋 (𑐰𑐿𑐡𑑂𑐫, 𑑑𑑑𑑑𑑙𑑅𑑒𑑓)

𑑗.𑑖) 𑐂𑐣𑑂𑐡𑑂𑐬 𑐩𑐵𑐮𑐷 (𑐣𑐾.𑐳𑑄.𑑑𑑐𑑖𑑕–𑑑𑑑𑑔𑑑)

𑐣𑐷𑐳𑑂𑐰𑐡𑑃 𑐣𑑂𑐴𑑂𑐫𑑀 ‘𑐥𑐮𑐶𑐳𑑂𑐠𑐵’ 𑐥𑐟𑑂𑐬𑐶𑐎𑐵𑐫𑑂 𑐥𑐶𑐡𑑄𑐐𑐸 𑐠𑑂𑐰𑐫𑑂𑐎𑑅𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰 𑐳𑐩𑐵𑐮𑑀𑐔𑐎𑐥𑐶𑑄 𑐣𑐵𑑄𑐐𑐸 𑐔𑑂𑐰𑐳𑐸𑐂 𑐔𑑂𑐰𑐫𑐵𑐡𑐷𑐐𑐸 𑐰𑐫𑑂𑐎𑑅𑐫𑐵 𑐰𑐶𑐔𑐵𑐬 𑐠𑐸𑐎𑐠𑑄 𑐡𑐸 –

𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑑄 𑐠𑑅𑐐𑐸 𑐧𑐵𑑄 𑐎𑑂𑐫𑐹𑐐𑐸 𑐠𑑂𑐫𑑄𑐩𑐠𑑂𑐫𑑄 𑐣𑑂𑐴𑐫𑑂𑐐𑐹 𑐡𑐱𑐎 𑐥𑐸𑐮𑐾 𑐢𑐸𑑄𑐎𑐮 𑑋 𑐠𑑂𑐰 𑐀𑐰𑐢𑐷 𑐡𑐸𑐣𑐾 𑐁𑐥𑐵𑐮𑑄 𑐳𑐩𑐵𑐮𑑀𑐔𑐎𑐥𑐶𑑄 𑐏𑐣𑐾𑐡𑐫𑐾𑐎𑐾 𑐰𑐫𑐾 𑐢𑐸𑑄𑐎𑐮 𑑋 𑐟𑐬 𑐣𑐶𑐬𑐣𑑂𑐟𑐬𑐟𑐵, 𑐀𑐢𑑂𑐫𑐫𑐣𑐱𑐷𑐮𑐟𑐵 𑐰 𑐳𑑄𑐫𑐩𑐫𑐵 𑐀𑐨𑐵𑐰𑑄 𑐫𑐵𑐣𑐵 𑐁𑐥𑐵𑐮𑑄 𑐳𑐩𑐵𑐮𑑀𑐔𑐎𑐟 𑐠𑑅𑐐𑐸 𑐏𑑂𑐫𑐮𑑄 𑐟𑐵𑐥𑐵𑐣𑐵𑑅 𑐰𑐣𑐾 𑐣𑑄 𑐢𑐸𑑄𑐎𑐮 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫 𑐠𑑅𑐐𑐸 𑐧𑐵𑑄 𑐎𑑂𑐫𑐹𑐐𑐸 𑐠𑑂𑐫𑑄𑐩𑐠𑑂𑐫𑑄 𑐣𑑂𑐴𑐫𑑂𑐐𑐹 𑐡𑐱𑐎 𑐥𑐸𑐮𑐾 𑐢𑐸𑑄𑐎𑐮 𑑋 𑐟𑐬 𑐣𑐶𑐬𑐣𑑂𑐟𑐬𑐟𑐵, 𑐀𑐢𑑂𑐫𑐫𑐣𑐱𑐷𑐮𑐟𑐵 𑐰 𑐳𑑄𑐫𑐩𑐫𑐵 𑐀𑐨𑐵𑐰𑑄 𑐫𑐵𑐣𑐵𑑅 𑐁𑐥𑐵𑐮𑑄 𑐳𑐩𑐵𑐮𑑀𑐔𑐎𑐟 𑐠𑑅𑐐𑐸 𑐏𑑂𑐫𑐮𑑄 𑐟𑐵𑐥𑐵𑐣𑐵 𑐰𑐣𑐾 𑐣𑑄 𑐢𑐸𑑄𑐎𑐮 𑑋 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑑂 𑐖𑐎 𑐔𑑂𑐰𑐣𑐵𑑅 𑐠𑑅𑐐𑐸 𑐥𑑂𑐬𑐟𑐶𑐨𑐵 𑐥𑑂𑐬𑐏𑐬𑐶𑐟 𑐫𑐵𑐣𑐵𑐰𑐫𑐵𑐔𑑂𑐰𑑄𑐥𑐶𑑄 𑐳𑐩𑐵𑐮𑑀𑐔𑐎𑐥𑐶𑑄 𑐩𑐢𑑂𑐫𑐾 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷, 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫, 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛, 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑐥𑑂𑐬𑐰𑐺𑐟𑑂𑐟𑐶 𑐥𑑂𑐬𑐩𑐸𑐏 𑐬𑐸𑐥𑑄 𑐣𑐵𑑄 𑐎𑐵𑐫𑐾 𑐧𑐴𑑅𑐖𑐹 𑑋 𑐀𑐠𑐾 𑐴𑐾 𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫𑐫𑐵𑐟 𑐣𑑄 𑐎𑐵𑐫𑐾 𑐖𑑂𑐫𑐹 𑑋 𑐜𑐵.𑐰𑐿𑐡𑑂𑐫 𑐀𑐣𑐸𑐳𑐣𑑂𑐢𑐵𑐣𑐥𑐵𑐏𑐾𑑄 𑐥𑑂𑐬𑐟𑐶𑐰𑐡𑑂𑐢 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑑄 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐥𑐬𑐩𑑂𑐥𑐬𑐵𑐐𑐟 𑐰𑐶𑐨𑐵𑐖𑐣 𑐫𑐵𑐣𑐵𑑅 𑐥𑑂𑐫𑑄𑐐𑐹𑐐𑐸 𑐥𑐸𑐔𑑅𑐫𑐵 𑐬𑐸𑐥𑐫𑑂 𑐣𑐶𑐬𑐸𑐥𑐞 𑐫𑐵𑐥𑐶𑑄 𑐳𑐩𑐵𑐮𑑀𑐔𑐎𑐥𑐶𑑄 𑐩𑐢𑑂𑐫𑐾 𑐂𑐣𑑂𑐡𑑂𑐬 𑐩𑐵𑐮𑐷 𑐕𑐩𑑂𑐴 𑐟𑑂𑐰𑑅𑐟𑐵𑑅 𑐩𑐾𑐥𑐶𑑄𑐎𑐾 𑐄𑐮𑐶 𑐣𑐶𑐬𑐣𑑂𑐟𑐬𑐟𑐵 𑐏𑐣𑐾𑐩𑐡𑐸 𑑋 𑐠𑑂𑐰𑐫𑐵 𑐮𑐶𑐥𑐵 𑐏𑐣𑐾 𑐡𑐸𑐥𑐶𑑄 𑐳𑐩𑐵𑐮𑑀𑐔𑐎𑐟 𑐩𑐢𑑂𑐫𑐾 𑐣𑐬𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣, 𑐜𑐵.𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬, 𑐖𑐣𑐎 𑐣𑐾𑐰𑐵𑑅 𑐁𑐡𑐶 𑐏𑑅 𑑋 𑐠𑐸𑐩𑐶𑐎𑐾 𑐥𑑂𑐬𑐵𑐢𑑂𑐫𑐵𑐥𑐎𑐷𑐫 𑐁𑐐𑑂𑐬𑐴 𑐄𑐥𑑂𑐰𑑅 𑐏𑐣𑐾𑐡𑐸 𑐀𑐮𑐾 𑐥𑐵𑐛𑑂𑐫𑐎𑑂𑐬𑐩 𑐡𑐸𑐣𑐾 𑐮𑐵𑑅𑐐𑐸 𑐎𑐺𑐟𑐶𑐂 𑐳𑐩𑐵𑐮𑑀𑐔𑐣𑐵 𑐔𑑂𑐰𑐫𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐰𑐬𑑂𑐐𑐫𑐵𑐐𑐸 𑐄𑐥𑐫𑑀𑐐𑐶𑐟𑐵𑐫𑑂 𑐄𑐥𑑂𑐰𑑅 𑐏𑐣𑐾𑐡𑐸 𑐀𑐮𑐾 𑐥𑐵𑐛𑑂𑐫𑐎𑑂𑐬𑐩 𑐡𑐸𑐣𑐾 𑐮𑐵𑑅𑐐𑐸 𑐎𑐺𑐟𑐶𑐂 𑐳𑐩𑐵𑐮𑑀𑐔𑐣𑐵 𑐔𑑂𑐰𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐰𑐬𑑂𑐐𑐫𑐵𑐐𑐸 𑐄𑐥𑐫𑑀𑐐𑐶𑐟𑐵𑐫𑑂 𑐄𑐥𑑂𑐰𑑅 𑐎𑑂𑐰𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐮𑑂𑐮 𑐎𑐾.𑐳𑐸𑐣𑑂𑐡𑐬 𑐳𑐩𑐵𑐮𑑀𑐔𑐎𑐫𑐵 𑐬𑐸𑐥𑐫𑑂 𑐥𑑂𑐬𑐟𑐶𑐳𑑂𑐠𑐵𑐥𑐶𑐟 𑐖𑐹𑐳𑐵𑑄 𑐠𑑁𑑄𑐎𑐣𑑂𑐴𑐾 𑐠𑑂𑐰 𑐏𑑂𑐫𑐮𑑄 𑐟𑐵𑐥𑐵𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰𑑂𑐫𑐵𑐰𑐴𑐵𑐬𑐶𑐎 𑐳𑑂𑐟𑐬𑑄 𑐫𑐠𑐵𑐬𑑂𑐠𑐫𑑂 𑐀𑐰𑐟𑐬𑐞 𑐖𑐹𑐐𑐸 𑐡𑐸 𑑋 𑐳𑐩𑐵𑐖𑐱𑐵𑐳𑑂𑐟𑑂𑐬𑐷𑐫 𑐥𑐡𑑂𑐢𑐟𑐶𑐫𑐵 𑐳𑐩𑐵𑐮𑑀𑐔𑐣𑐵 𑐩𑐸𑐏𑐬𑐶𑐟 𑐖𑐸𑐫𑐵𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐳𑐩𑐵𑐮𑑀𑐔𑐣𑐵 𑐎𑑂𑐲𑐾𑐟𑑂𑐬𑐫𑑂 𑐕𑐐𑐹 𑐁𑐨𑐵𑐳 𑐮𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐮𑐸𑐫𑐵𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐎𑐣𑑂𑐴𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫 𑐐𑑂𑐫𑐳𑐸𑐐𑑂𑐫𑐣𑐵𑑅 𑐢𑐶𑐳𑐶𑐩𑐶𑐳𑐶 𑐢𑐵𑐫𑐵𑑅 𑐰𑐣𑐾𑐦𑐿 𑐢𑐿𑐐𑐸 𑐨𑐮𑐳𑐵 𑐎𑐵𑐫𑐾𑐦𑐸 𑑋 (𑐩𑐵𑐮𑐷, 𑐣𑐾.𑐳𑑄. 𑑑𑑑𑑑𑑙𑑅𑑔𑑙)

𑑗.𑑗) 𑐥𑑂𑐬𑐵.𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬 (𑐣𑐾.𑐳𑑄. 𑑑𑑐𑑗𑑒) –

𑐣𑐷𑐣𑐶𑐡𑑃 𑐣𑑂𑐴𑑂𑐫𑑀 𑐥𑐶𑐡𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳 (𑐣𑐾.𑐳𑑄.𑑑𑑑𑑒𑑐) 𑐳𑐦𑐹 𑐔𑑂𑐰𑐫𑐵𑐡𑐷𑐩𑑂𑐴 𑐠𑑂𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵 𑐕𑐐𑐹 𑐱𑐷𑐬𑑂𑐲𑐎𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐳𑑂𑐠𑐶𑐟𑐶 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 –

𑐳𑐩𑐵𑐮𑑀𑐔𑐣𑐵 𑐰𑐶𑐎𑐵𑐳𑐫𑐵 𑐱𑐸𑐬𑐸𑐫𑐵 𑐟𑐸𑐮𑐣𑐵𑐫𑑂 𑐠𑑁𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐿𑐡𑑂𑐢𑐵𑐣𑑂𑐟𑐶𑐎 𑐟𑐠𑐵 𑐰𑑂𑐫𑐵𑐰𑐴𑐵𑐬𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐣𑐶𑐐𑐹 𑐥𑐎𑑂𑐲𑐫𑑂 𑐣𑑄 𑐮𑑂𑐴𑐵𑑅 𑐣𑑂𑐴𑑂𑐫𑐵𑐎𑐷𑐥𑐶𑑄 𑐳𑐩𑐵𑐮𑑀𑐔𑐎𑐟 𑐥𑐶𑐡𑐣𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐟𑐬 𑐀𑐠𑐾 𑐏𑐫𑐵𑑅 𑐣𑑄 𑐰𑑂𑐫𑐵𑐰𑐴𑐵𑐬𑐶𑐎 𑐳𑐩𑐵𑐮𑑀𑐔𑐣𑐵𑐫𑑂 𑐐𑐸𑐮𑐶𑐳𑐶𑐣𑑄 𑐮𑑂𑐴𑐵𑑅 𑐣𑑂𑐴𑑂𑐫𑐵𑐎𑐾𑐐𑐸 𑐫𑐵𑑅𑐐𑐸 𑐡𑐸, 𑐄𑐮𑐶 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑑂 𑐫𑐵𑑅𑐐𑐸 𑐩𑐡𑐸 𑑋 𑐀𑐗 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑑂 𑐣𑑄 𑐁𑐢𑐸𑐣𑐶𑐎 𑐥𑐵𑐱𑑂𑐔𑐵𑐟𑑂𑐫 𑐳𑐩𑐵𑐮𑑀𑐔𑐣𑐵 𑐥𑐡𑑂𑐢𑐟𑐶𑐳𑐩𑑂𑐧𑐣𑑂𑐢𑐷 𑐀𑐢𑑂𑐫𑐫𑐣 𑐔𑐶𑐣𑑂𑐟𑐣 𑐫𑐵𑐣𑐵𑑅 𑐔𑑂𑐰𑐂𑐥𑐶𑑄 𑐳𑐩𑐵𑐮𑑀𑐔𑐎𑐟 𑐟𑐳𑐎𑑄 𑐴𑐾 𑐩𑑂𑐴𑑀 𑐢𑐵𑐫𑐾𑐩𑐵𑑅 𑑋 𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟 𑐥𑐎𑑂𑐲 𑐎𑐩𑐖𑑀𑐬 𑐴𑐾 𑐟𑐶𑐣𑐶 𑑋 𑐦𑐮𑐟𑑅 𑐳𑐩𑐵𑐮𑑀𑐔𑐣𑐵𑐫𑐵 𑐳𑐿𑐡𑑂𑐢𑐵𑐣𑑂𑐟𑐶𑐎𑐥𑐎𑑂𑐲 𑐎𑐩𑐖𑑀𑐬 𑐴𑐾 𑐟𑐶𑐣𑐶 𑑋 𑐦𑐮𑐟𑑅 𑐳𑐩𑐵𑐮𑑀𑐔𑐣𑐵𑐫𑐵 𑐳𑐿𑐡𑑂𑐢𑐵𑐣𑑂𑐟𑐶𑐎 𑐖𑑂𑐘𑐵𑐣 𑐟𑐠𑐵 𑐰𑐶𑐰𑐶𑐢 𑐥𑑂𑐬𑐰𑐵𑐴 𑐥𑑂𑐬𑐰𑐺𑐟𑑂𑐟𑐶𑐫𑐵 𑐀𑐢𑑂𑐫𑐫𑐣 𑐰𑐶𑐱𑑂𑐮𑐾𑐲𑐞 𑐫𑐵𑐣𑐵𑐟𑑅𑐐𑐸 𑐳𑐦𑐹𑐫𑐵 𑐬𑐔𑐣𑐵 𑐫𑐵𑐣𑐵𑑅 𑐠𑑁𑑄 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐁𑐢𑐵𑐬𑐨𑐹𑐩𑐶 𑐟𑐫𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐐𑐸𑐐𑐸 𑐖𑐸𑐂𑐩𑐵𑑅𑐐𑐸 𑐏𑑅, 𑐰 𑐠𑑁𑑄𑐟𑐎 𑐣𑑄 𑐧𑐵𑑄𑐮𑐵𑐎 𑐖𑐸𑐂𑐦𑐸𑐐𑐸 𑐩𑐡𑐸𑐣𑐶 𑑋 𑐀𑐠𑐾 𑐀‍𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐏𑑂𑐫𑐮𑐫𑑂 𑐰𑑂𑐫𑐵𑐰𑐴𑐵𑐬𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐮𑑂𑐫𑐵𑑅 𑐀𑐥𑑂𑐰𑑅 𑐏𑐣𑐾𑐡𑐸𑐳𑐵𑑄, 𑐠𑐸𑐎𑐷 𑐣𑑄 𑐳𑐣𑑂𑐟𑑀𑐲 𑐎𑐵𑐫𑐾𑐐𑐸 𑐳𑑂𑐠𑐶𑐟𑐶 𑐩𑐡𑐸𑐣𑐶 𑑋 𑐕𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬𑐫𑐵 𑐩𑐸𑐎𑑄 𑐎𑐺𑐟𑐶 𑐰𑐵 𑐕𑐐𑐹 𑐳𑐵𑐴𑐶𑐟𑑂𑐫𑐶𑐎 𑐰𑐶𑐢𑐵𑐫𑐵 𑐰𑐿𑐱𑐶𑐲𑑂𑐚𑑂𑐫 𑐰𑐵 𑐳𑐵𑐴𑐶𑐟𑑂𑐫𑐫𑑂 𑐕𑐐𑐹 𑐥𑑂𑐬𑐰𑐺𑐟𑑂𑐟𑐶𑐫𑐵𑐟 𑐎𑐫𑐵𑑅 𑐥𑐹𑐰𑑄𑐎 𑐀𑐢𑑂𑐫𑐫𑐣 𑐰 𑐀𑐣𑐸𑐱𑐷𑐮𑐣 𑐫𑐵𑐣𑐵𑐟𑑅𑐐𑐸 𑐳𑐩𑐵𑐮𑑀𑐔𑐣𑐵 𑐟𑐳𑐎𑑄 𑐴𑐾 𑐩𑑂𑐴𑑀 𑐖𑐎 𑐡𑐸 𑑋 𑐠𑐸𑐎𑐶𑐫𑐵 𑐠𑐵𑐳𑐫𑑂 𑐕𑐐𑐹 𑐳𑐦𑐹, 𑐕𑐥𑐸 𑐥𑑂𑐫𑐵𑐏𑑄, 𑐀𑐗 𑐕𑐥𑐸 𑐧𑐵𑐏𑑄 𑐰𑐵 𑐣𑐶𑐧𑐣𑑂𑐢𑐫𑐵 𑐟𑐎𑑄 𑐳𑐩𑐵𑐮𑑀𑐔𑐣𑐵 𑐔𑑂𑐰𑐫𑐾𑐐𑐸 𑐥𑑂𑐬𑐰𑐺𑐟𑑂𑐟𑐶 𑐀𑐥𑑂𑐰𑑅 𑐡𑐸 𑑋 𑐀𑐗 𑐠𑐖𑑂𑐫𑐵𑑅𑐐𑐸 𑐳𑐩𑐵𑐮𑑀𑐔𑐣𑐵𑐫𑑂 𑐣𑑄 𑐳𑐩𑐵𑐮𑑀𑐔𑐎𑐫𑐵𑐟 𑐮𑐵𑑅𑐐𑐸 𑐣𑐶𑐟𑐵 𑐥𑑂𑐫𑐟𑐵 𑐥𑑂𑐬𑐨𑐵𑐰 𑐧𑑂𑐰𑐫𑐵𑑅 𑐎𑐬 𑐩𑐾𑐟𑐾 𑐫𑐵𑐫𑐾𑐐𑐸 𑐟𑐎𑑄 𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐠𑐸𑐎𑐠𑑄 𑐐𑐸𑐐𑐸 𑐀𑐬𑑂𑐠𑐫𑑂 𑐳𑐩𑐵𑐮𑑀𑐔𑐣𑐵, 𑐕𑐐𑐹 𑐥𑐺𑐲𑑂𑐛𑐨𑐹𑐩𑐶𑐂 𑐕𑐐𑐹 𑐎𑐺𑐟𑐶𑐫𑐵 𑐳𑐵𑐴𑐶𑐟𑑂𑐫𑐶𑐎 𑐩𑐹𑐮𑑂𑐫𑐵𑑄𑐎𑐣 𑐖𑐸𑐂𑐩𑐵𑑅𑐐𑐸 𑐏𑑅 𑐰 𑐀𑐬𑑂𑐠𑐫𑑂 𑐗𑐷𑐐𑐸 𑐳𑐩𑐵𑐮𑑀𑐔𑐣𑐵 𑐣𑑂𑐴𑑂𑐫𑐖𑑂𑐫𑐵𑐫𑐾 𑐦𑐸𑐐𑐸 𑐩𑐡𑐸𑐣𑐶 𑑋

𑐠𑑁𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐫𑑂 𑐰𑐶𑐰𑐶𑐢 𑐎𑐠𑑄𑐫𑐵 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐥𑐡𑑂𑐢𑐟𑐶𑐫𑐵𑐐𑐸 𑐥𑑂𑐬𑐫𑑀𑐐 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑐳𑐵𑑄 𑐠𑑅𑐐𑐸 𑐴𑐾 𑐀𑐮𑐐𑑂𑐐 𑐳𑐩𑐵𑐮𑑀𑐔𑐣𑐵𑐟𑑂𑐩𑐎 𑐥𑐡𑑂𑐢𑐟𑐶 𑐢𑐵𑑅𑐳𑐵 𑐧𑑂𑐰𑐮𑑄𑐎𑐾 𑐦𑐸𑐐𑐸 𑐩𑐡𑐸𑐣𑐶 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐫𑑂 𑐣𑑄 𑐥𑑂𑐬𑐐𑐟𑐶𑐰𑐵𑐡𑐷 𑐳𑐩𑐵𑐮𑑀𑐔𑐣𑐵𑐫𑐵𑐟 𑐰𑑂𑐫𑐵𑐥𑐎 𑐫𑐵𑐫𑐾𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵𑑄 𑐠𑑂𑐰 𑐣𑑄 𑐕𑐐𑐹 𑐥𑑂𑐬𑐫𑑀𑐐𑐫𑐵 𑐬𑐸𑐥𑐫𑑂 𑐟𑐶𑐣𑐶, 𑐥𑑂𑐬𑐰𑐵𑐴𑐫𑐵 𑐬𑐸𑐥𑐫𑑂 𑐣𑑂𑐴𑑂𑐫𑐵𑐫𑐾𑐦𑐸𑐐𑐸 𑐩𑐡𑐸𑐣𑐶 𑑋 𑐣𑐾𑐥𑐵𑐮𑐨𑐵𑐲𑐵 𑐰𑐶𑐢𑐵 𑐄𑐥𑐣𑑂𑐫𑐵𑐳, 𑐎𑐰𑐶𑐟𑐵, 𑐣𑐵𑐚𑐎 𑐁𑐡𑐶 𑐎𑑂𑐲𑐾𑐟𑑂𑐬𑐫𑑂 𑐰𑐶𑐱𑑂𑐰 𑐳𑐵𑐴𑐶𑐟𑑂𑐫𑐫𑑂 𑐥𑐶𑐡𑑄𑐐𑐸 𑐀𑐟𑑂𑐫𑐵𑐢𑐸𑐣𑐶𑐎 𑐥𑑂𑐬𑐰𑐺𑐟𑑂𑐟𑐶, 𑐥𑑂𑐬𑐰𑐵𑐴 𑐐𑐸𑐮𑐶 𑐡𑐸𑑂𑐬𑐟 𑐬𑐸𑐥𑑄 𑐡𑐸𑐴𑐵𑑃 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐄𑐮𑐶 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑑂 𑐡𑐸𑐴𑐵𑑃 𑐰𑐫𑐾𑐦𑐸𑐐𑐸 𑐩𑐡𑐸𑐣𑐶, 𑐳𑐩𑐵𑐖𑐱𑐵𑐳𑑂𑐟𑑂𑐬𑐷𑐫 𑐥𑐡𑑂𑐢𑐟𑐶𑐫𑐵 𑐳𑐩𑐵𑐮𑑀𑐔𑐣𑐵, 𑐱𑐿𑐮𑐷 𑐰𑐿𑐖𑑂𑐘𑐵𑐣𑐶𑐎 𑐳𑐩𑐵𑐮𑑀𑐔𑐣𑐵𑐟 𑐐𑐸𑐐𑐸 𑐠𑑁𑑄 𑐁𑐢𑐸𑐣𑐶𑐎 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑐫𑑂 𑐏𑐣𑐾𑐡𑐸𑐐𑐸 𑐏𑑅 𑐠𑑂𑐰𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐫𑑂 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐮𑑂𑐫𑑄 𑐴𑐾 𑐡𑐣𑐶 𑑋

𑐟𑐬 𑐠𑐠𑐾 𑐳𑐩𑐵𑐮𑑀𑐔𑐣𑐵 𑐎𑑂𑐲𑐾𑐟𑑂𑐬𑐫𑑂 𑐁𑐥𑐵𑐮𑑄 𑐎𑐩𑐶 𑐎𑐩𑐖𑑀𑐬𑐷 𑐠𑑁𑑄 𑐣𑑄 𑐮𑑂𑐫𑐣𑐵𑑅 𑐴𑐾 𑐔𑑂𑐰𑑄𑐐𑐸 𑐡𑐣𑐶 𑐳𑐵𑑄 𑐠𑑂𑐰 𑐰𑐶𑐢𑐵𑐫𑑂 𑐁𑐥𑐵𑐮𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐧𑑁𑐡𑑂𑐢𑐶𑐎 𑐰𑐬𑑂𑐐𑐫𑐵 𑐩𑐣 𑐎𑑂𑐰𑐳𑐵𑑅𑐐𑐸, 𑐳𑐵𑐴𑐶𑐟𑑂𑐫𑐫𑐵 𑐰𑐶𑐰𑐶𑐢 𑐰𑐶𑐢𑐵𑐫𑑂 𑐁𑐥𑐵𑐮𑑄 𑐣𑑂𑐴𑐹𑐣𑑂𑐴𑐹𑐐𑐸 𑐳𑐺𑐖𑐣𑐵𑐟𑑂𑐩𑐎 𑐎𑐺𑐟𑐶 𑐥𑐶𑐡𑑄𑐐𑐸, 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐣𑐵𑐥𑑄 𑐳𑐩𑐵𑐮𑑀𑐔𑐣𑐵 𑐠𑑁𑑄 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐮𑑀𑐎𑐥𑑂𑐬𑐶𑐫 𑐟𑐠𑐵 𑐥𑑂𑐬𑐟𑐶𑐲𑑂𑐛𑐶𑐟 𑐰𑐶𑐢𑐵𑐫𑐵 𑐬𑐸𑐥𑐫𑑂 𑐩𑐵𑐣𑑂𑐫𑐟𑐵 𑐥𑑂𑐬𑐵𑐥𑑂𑐟 𑐫𑐵𑑅𑐐𑐸, 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐧𑐵𑑄𑐮𑐵𑑅𑐐𑐸 𑐮𑐎𑑂𑐲𑐞 𑐏𑑅 𑐢𑐎𑐵𑑅 𑐩𑐢𑐵𑐳𑐾𑑄 𑐩𑐐𑐵𑑅 𑑋 (𑐟𑐸𑐮𑐵𑐢𑐬, 𑐣𑐾.𑐳𑑄. 𑑑𑑑𑑒𑑐𑑅𑑒𑑗𑑖)

𑑗.𑑘) 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬 (𑐣𑐾.𑐳𑑄. 𑑑𑑐𑑗𑑔)

𑐠𑑁𑑄 𑐣𑑄 𑐣𑐷𑐣𑐶𑐡𑑃 𑐣𑑂𑐴𑑂𑐫𑑀 ‘𑐣𑐾𑐥𑐵𑐮 𑐳𑑄𑐳𑑂𑐎𑐺𑐟𑐶’ 𑐮𑐫𑑂𑐥𑐟𑐶𑐂 𑐥𑐶𑐡𑑄𑐐𑐸 𑐰𑐫𑑂𑐎𑑅𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐣𑐵𑑄𑐐𑐸 𑐔𑑂𑐰𑐳𑐸𑐂 𑐧𑐶𑐔𑐵𑑅 𑐠𑐠𑐾 𑐡𑐸 –

𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐎𑑂𑐲𑐾𑐟𑑂𑐬𑐫𑑂 ‘𑐳𑐩𑐵𑐮𑑀𑐔𑐣𑐵 𑐳𑐶𑐡𑑂𑐢𑐵𑐣𑑂𑐟’ 𑐢𑐸𑑄𑐎𑐵𑑅 𑐩𑐴𑐟𑑂𑐰𑐥𑐹𑐬𑑂𑐞 𑐳𑐦𑐹 ‘𑐳𑑂𑐰𑑄𑐐𑑅𑐐𑐸 𑐩𑐶𑐏𑐵’ 𑐰 ‘𑐳𑑁𑐣𑑂𑐡𑐬𑑂𑐫 𑐡𑐬𑑂𑐱𑐣’ 𑐏𑑅 𑑋 𑐄𑐎𑐠𑑄 𑐠𑑂𑐰 𑐣𑐶𑐐𑐹 𑐳𑐦𑐹𑐫𑐵 𑐥𑑂𑐬𑐎𑐵𑐱𑐣𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐫𑐵 𑐳𑐿𑐡𑑂𑐢𑐵𑐣𑑂𑐟𑐶𑐎 𑐮𑐵𑐐𑐵 𑐫𑐎𑑂𑐰𑑄 𑐔𑐎𑑄𑐎𑐵 𑐧𑑂𑐫𑐹𑐐𑐸 𑐡𑐸, 𑐫𑐎𑑂𑐰 𑐟𑑅𑐧𑑂𑐫𑐵 𑐰 𑐟𑐵𑑅𑐴𑐵𑐎𑑅 𑐫𑐵𑐣𑐵𑐧𑑂𑐫𑐹𑐐𑐸 𑐡𑐸 𑑋 𑐠𑐠𑐾 𑐏𑐫𑐵𑑅 𑐣𑑄 𑐳𑐵𑐴𑐶𑐟𑑂𑐫𑐫𑐵 𑐩𑐾𑐩𑐾𑐐𑐸 𑐰𑐶𑐢𑐵𑐫𑐵 𑐟𑐸𑐮𑐣𑐵𑐫𑑂 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑑂 𑐀𑐗 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑑂 𑐳𑐣𑑂𑐟𑑀𑐲 𑐖𑐸𑐂𑐐𑐸 𑐳𑑂𑐠𑐶𑐟𑐶 𑐠𑑁𑑄 𑐣𑑄 𑐩𑐡𑐸𑐣𑐶 𑑋 𑐠𑑂𑐰 𑐏𑑃 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵𑐫𑐵 𑐥𑑂𑐬𑐰𑐾𑐱 𑐖𑐹𑐐𑐸 𑐠𑑁𑑄 𑑕𑑐 𑐡𑑃 𑐥𑐸𑐮𑐾 𑐢𑐸𑑄𑐎𑐵𑑅 𑐣𑑄 𑐥𑐟𑐶𑑄𑐔𑐵 𑐮𑑂𑐫𑐵𑑅 𑐏𑐵𑐫𑐾𑐟 𑐟𑐎𑑂𑐰𑑅 𑐴𑐾 𑐩𑐐𑐵𑑅𑐐𑐸 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐳𑐦𑐹 𑐥𑑂𑐬𑐎𑐵𑐱𑐣𑑄 𑐥𑑂𑐬𑐲𑑂𑐚 𑐫𑐵𑑅 𑑋 𑐄𑐎𑐶𑑄 𑐣𑑄 𑐳𑐵𑐴𑐶𑐟𑑂𑐫𑐶𑐎 𑐳𑐶𑐡𑑂𑐢𑐵𑐣𑑂𑐟𑐎𑐠𑑄 ‘𑐳𑐩𑐵𑐮𑑀𑐔𑐣𑐵 𑐳𑐶𑐡𑑂𑐢𑐵𑐣𑑂𑐟’, ‘𑐳𑐵𑐴𑐶𑐟𑑂𑐫𑐫𑐵 𑐟𑐶𑐳𑐵’, ‘𑐬𑐳 𑐩𑐘𑑂𑐖𑐬𑐷’, ‘𑐳𑑂𑐰𑑄𑐐𑑅𑐐𑐸 𑐩𑐶𑐏𑐵’ 𑐰 ‘𑐳𑑁𑐣𑑂𑐡𑐬𑑂𑐫 𑐡𑐬𑑂𑐱𑐣’ 𑐣𑑂𑐫𑐵𑐐𑐹 𑐖𑐎 𑐳𑐩𑐵𑐮𑑀𑐔𑐣𑐵𑐫𑐵 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐦𑐹𑐎𑐠𑑄 𑐎𑐵𑐫𑐾𑐕𑐶𑑄 𑑋 𑐠𑑂𑐰 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐰𑐳𑑂𑐟𑐸𑐐𑐟 𑐳𑑂𑐠𑐶𑐟𑐶 𑐏𑑅 𑑋 𑐠𑐸𑐎𑐶𑐂 𑐗𑐷 𑐠𑑁𑑄 𑐐𑐸𑐮𑐶 𑐟𑐎 𑐳𑐣𑑂𑐟𑑀𑐲 𑐖𑐸𑐂𑐠𑐵𑐫𑑂 𑐡𑐸, 𑐧𑐶𑐔𑐵𑑅 𑐫𑐵𑐫𑐾𑐧𑐴𑑅𑐖𑐹 𑑋 𑐠𑑁𑑄 𑐰𑐫𑐵𑑅 𑐣𑑄 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑑂 𑐠𑑂𑐰 𑐡𑐸𑐬𑑂𑐰𑐮𑐟𑐵𑐫𑐵 𑐳𑑂𑐠𑐶𑐟𑐶𑑄 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸𑐫𑐵 𑐩𑐹 𑐴𑐸𑐣𑐶𑑄 𑐢𑐫𑐵𑐐𑐸 𑐥𑑂𑐬𑐎𑐵𑐱𑐣 𑐳𑑄𑐳𑑂𑐠𑐵𑐫𑐵 𑐱𑐹𑐣𑑂𑐫𑐟𑐵, 𑐥𑐟𑑂𑐬–𑐥𑐟𑑂𑐬𑐶𑐎𑐵𑐫𑐵 𑐥𑑂𑐬𑐎𑐵𑐱𑐣𑐫𑑂 𑐬𑐶𑐎𑑂𑐟𑐟𑐵𑐫𑐵 𑐣𑐵𑐥𑑄 𑐳𑐩𑐵𑐮𑑀𑐔𑐣𑐵 𑐎𑑂𑐲𑐾𑐟𑑂𑐬𑐫𑑂 𑐳𑑄𑐮𑐐𑑂𑐣 𑐔𑑂𑐰𑐩𑐶𑐥𑐶𑑄𑐎𑐾 𑐡𑐫𑐾𑐩𑐵𑑅𑐐𑐸 𑐀𑐢𑑂𑐫𑐫𑐣𑐱𑐷𑐮𑐟𑐵, 𑐱𑐿𑐎𑑂𑐲𑐶𑐎 𑐔𑐶𑐣𑑂𑐟𑐣, 𑐳𑐩𑐵𑐮𑑀𑐔𑐣𑐵𑐫𑐵𑐟 𑐣𑐷𑐫𑐵𑐣𑐵𑑅 𑐣𑑂𑐴𑑂𑐫𑐵𑐎𑐾𑐐𑐸 𑐧𑑁𑐡𑑂𑐢𑐶𑐎 𑐳𑐵𑐢𑐣𑐵𑐫𑐵 𑐥𑑂𑐬𑐟𑐶𑐧𑐡𑑂𑐢𑐟𑐵 𑐰 𑐢𑐿𑐬𑑂𑐫𑐟𑐵𑐫𑐵 𑐩𑑂𑐴𑑀𑐟𑐶 𑐣𑑄 𑐏𑑅 𑑋 𑐠𑐸𑐎𑐶𑐫𑐵 𑐀𑐣𑑂𑐟 𑐖𑐸𑐫𑐵𑑅 𑐰𑑄𑐮𑐶𑐳𑐾 𑐰𑑂𑐫𑐵𑐰𑐴𑐵𑐬𑐶𑐎𑐫𑐵 𑐣𑐵𑐥𑑄 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵 𑐳𑐺𑐖𑐣𑐵𑐫𑐵 𑐰𑐵𑐟𑐵𑐰𑐬𑐞 𑐡𑐫𑐵𑐰𑐂 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐗𑐸𑐮𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣𑐖𑐸𑐫𑐵𑐟 ‘𑐎𑐵𑐰𑑂𑐫𑐫𑐵 𑐳𑑂𑐰𑐨𑐵𑐰’ 𑐥𑐶𑐠𑐣𑐾𑐟 𑐥𑑂𑐬𑐾𑐬𑐶𑐟 𑐫𑐵𑑅𑐐𑐸 𑐳𑑂𑐠𑐶𑐟𑐶 𑐰 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐖𑐸𑐫𑐵𑐟 ‘𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟’ 𑐔𑑂𑐰𑐫𑐾𑐟 𑐥𑑂𑐬𑐾𑐬𑐶𑐟 𑐫𑐵𑑅𑐐𑐸 𑐠𑐾𑑄𑐖𑐵𑑅𑐐𑐸 𑐳𑑂𑐠𑐶𑐟𑐶𑐫𑐵 𑐳𑐺𑐖𑐣𑐵𑑄 𑐴𑐾 𑐣𑑂𑐴𑐹𑐣𑑂𑐴𑐹𑐐𑐸 𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟𑐟 𑐥𑐶𑐡𑐣𑐷, 𑐎𑐵𑐰𑑂𑐫𑐱𑐵𑐳𑑂𑐟𑑂𑐬𑐟 𑐥𑐶𑐡𑐣𑐷 𑑋 𑐰 𑐂𑐮𑐫𑑂 𑐖𑐎 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵𑐫𑐵 𑐏𑑂𑐫𑑅 𑐥𑐹𑐰𑑄𑐎 𑐔𑐎𑐣𑐷𑐐𑐸 𑐣𑐶𑐱𑑂𑐔𑐶𑐟 𑐏𑑅 𑑋 𑐠𑑁𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐰𑐵𑑅𑐔𑐵𑐫𑐾𑐎𑐾 𑐴𑐠𑐵𑐫𑐾𑐐𑐸 𑐕𑐐𑐹 𑐏𑑃 𑐠𑑂𑐰 𑐏𑑅 𑑋 (𑐟𑐵𑐩𑑂𑐬𑐵𑐎𑐵𑐬, 𑑑𑑑𑑒𑑐𑑅?)

𑑗.𑑙)

𑑘) 𑐣𑐾𑐥𑐵𑐮𑐨𑐵𑐲𑐵–𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐎𑐥𑐶𑑄 – 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐎𑐥𑐶𑑄𑐳𑑄 𑐠𑑁𑑄𑐟𑐎𑐫𑐵 𑐡𑐸𑐣𑐾 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐂𑐟𑐶𑐴𑐵𑐳 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐗𑑂𑐰𑐮𑐫𑑂 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄𑐢𑐮𑑅 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 –

𑑘.𑑑) 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮

𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑐫𑐵𑐐𑐸 ‘𑐗𑐷𑐐𑐸 𑐳𑐵𑐴𑐶𑐟𑑂𑐫 𑐰 𑐁𑐮𑑀𑐔𑐣𑐵’ 𑐣𑐵𑑄𑐐𑐸 𑐀𑐣𑐸𑐳𑐣𑑂𑐢𑐵𑐣𑐩𑐹𑐮𑐎 𑐔𑑂𑐰𑐳𑐸𑐂 𑐰𑐫𑑂𑐎𑐮𑑄 𑐢𑐬𑑂𑐩𑑀𑐡𑐫 (𑐣𑐾.𑐳𑑄.𑑑𑑐𑑖𑑙) 𑐥𑐟𑑂𑐬𑐶𑐎𑐵𑐫𑑂 𑐥𑐶𑐡𑑄𑐐𑐸 𑐢𑐬𑑂𑐩𑑀𑐡𑐫𑐫𑐵 𑐎𑐴𑐵𑐣𑐷𑐟𑐫𑐵 𑐔𑑂𑐰𑐩𑐶 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐖𑐸𑐣𑐶𑐳𑐾𑑄 𑐔𑑂𑐫𑐵𑐩𑑂𑐴 (𑑘) 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄 𑐡𑐎𑐳𑐶𑐧𑐾 𑐣𑑂𑐴𑐵𑐥𑐵𑑄 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 –

𑑑. 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑑒. 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑑓. 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑑔. 𑐬𑐵𑐩𑐴𑐬𑐶 𑐖𑑀𑐱𑐷 𑑕. 𑐥𑑂𑐬𑑀.𑐳𑐹𑐬𑑂𑐫𑐧𑐴𑐵𑐡𑐸𑐬 𑐱𑐵𑐎𑑂𑐫 𑑖. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 𑑗. 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷 𑑘. 𑐳𑐶𑐡𑑂𑐢𑐶𑐔𑐬𑐞 𑐱𑑂𑐬𑐾𑐲𑑂𑐛 𑑋

𑐰𑐫𑑂𑐎𑐮𑑄 𑐣𑐾.𑐳𑑄.𑑑𑑐𑑘𑑗𑐳 𑐣𑐾𑐥𑐵𑐮𑐨𑐵𑐲𑐵𑐫𑑂 𑐁𑐮𑑀𑐔𑐣𑐵 𑐔𑑂𑐰𑐳𑐸𑐂 𑐀𑐬𑑂𑐠𑐵𑐟𑑂 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷𑐖𑐸𑐫𑐵𑐐𑐸 𑑑𑑐𑑖𑑙 𑐫𑐵𑐐𑐸 𑐁𑐮𑑀𑐔𑐣𑐵 𑐢𑐬𑑂𑐩𑑀𑐡𑐫𑐫𑐵 𑐎𑐴𑐵𑐣𑐷𑐟 𑐥𑐶𑐡𑑄𑐐𑐸 𑑑𑑘 𑐡𑑃 𑐮𑐶𑐥𑐵 𑐣𑐷𑐩𑑂𑐴 (𑑒𑑐) 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄 𑐠𑐸𑐎𑐠𑑄 𑐧𑐶𑐫𑐵𑐡𑐶𑐮 –

𑑑. 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑑒. 𑐬𑐵𑐩𑐴𑐬𑐶 𑐖𑑀𑐱𑐷 𑑓. 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑑔. 𑐬𑐵𑐖𑐾𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫 𑑕. 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑑖. 𑐥𑐹𑐬𑑂𑐞𑐎𑐵𑐖𑐷 𑐟𑐵𑐩𑑂𑐬𑐵𑐎𑐵𑐬 𑑗. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 𑑘. 𑐳𑐹𑐬𑑂𑐫𑐧𑐴𑐵𑐡𑐸𑐬 𑐱𑐵𑐎𑑂𑐫 𑑙. 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷 𑑑𑑐. 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑑑𑑑. 𑐖𑐣𑐎𑐮𑐵𑐮 𑐰𑐿𑐡𑑂𑐫 𑑑𑑒. 𑐳𑐸𑐣𑑂𑐡𑐬𑐎𑐺𑐲𑑂𑐞 𑐖𑑀𑐱𑐷 𑑑𑑓. 𑐗𑐸𑐮𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣 𑑑𑑔. 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫 𑑑𑑕. 𑐁𑐱𑐵𑐬𑐵𑐩 𑐱𑐵𑐎𑑂𑐫 𑑑𑑖. 𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬 𑑑𑑗. 𑐱𑑄𑐎𑐬 𑐱𑑂𑐬𑐾𑐲𑑂𑐛 𑑑𑑘. 𑐥𑐸𑐲𑑂𑐥 𑐔𑐶𑐟𑑂𑐬𑐎𑐵𑐬 𑑑𑑙. 𑐂𑐣𑑂𑐡𑑂𑐬 𑐩𑐵𑐮𑐷 𑑒𑑐. 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬 𑑋

𑑘.𑑒) 𑐥𑑂𑐬𑑀.𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛

𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑐫𑐵𑐐𑐸 𑑑𑑐𑑘𑑗𑐳 𑐥𑐶𑐡𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑑂 𑐁𑐮𑑀𑐔𑐣𑐵 𑐣𑐵𑑄𑐫𑐵𑐐𑐸 𑐀𑐣𑐸𑐳𑐣𑑂𑐢𑐵𑐣𑐩𑐹𑐮𑐎 𑐔𑑂𑐰𑐳𑐸 𑐥𑐶𑐡𑑄𑐐𑐸 𑐡𑐕𑐶𑐮𑐶𑐥𑐵 𑐥𑐶𑐡𑑄𑐐𑐸 𑐥𑑂𑐬𑑀. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫 𑐣𑐵𑑄𑐐𑐸 𑐳𑑂𑐰𑐳𑐸𑐂 𑐗𑐶𑑄𑐳𑑂𑐰𑐩𑑂𑐴 (𑑑𑑓) 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄 𑐠𑐸𑐎𑐠𑑄 𑐧𑐶𑐫𑐵𑐡𑐶𑐮 –

𑑑. 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑑒. 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑑓. 𑐔𑐶𑐟𑑂𑐟𑐢𑐬 ‘𑐴𑑂𑐡𑐫’ 𑑔. 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑑕. 𑐳𑐶𑐡𑑂𑐢𑐶𑐔𑐬𑐞 𑐱𑑂𑐬𑐾𑐲𑑂𑐛 𑑖. 𑐖𑐣𑐎𑐮𑐵𑐮 𑐰𑐿𑐡𑑂𑐫 𑑗. 𑐁𑐱𑐵𑐬𑐵𑐩 𑐱𑐵𑐎𑑂𑐫 𑑘. 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫 𑑙.𑐗𑐸𑐮𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣 𑑑𑑐. 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑑑𑑑. 𑐳𑐹𑐬𑑂𑐫𑐧𑐴𑐵𑐡𑐸𑐬 𑐱𑐵𑐎𑑂𑐫 𑑑𑑒. 𑐬𑐵𑐩𑐴𑐬𑐶 𑐖𑑀𑐱𑐷 𑑑𑑓. 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷 𑑋

𑑘.𑑓) 𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫

𑐰𑐫𑑂𑐎𑑅𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵 𑐱𑐷𑐬𑑂𑐲𑐎𑐫𑐵𑐐𑐸 𑐀𑐣𑐸𑐳𑐣𑑂𑐢𑐵𑐣𑐵𑐟𑑂𑐩𑐎 𑐔𑑂𑐰𑐳𑐸𑐂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐁𑐮𑑀𑐔𑐣𑐵𑐫𑐵 𑐂𑐟𑐶𑐴𑐵𑐳 𑐥𑑂𑐬𑐵𑐬𑐩𑑂𑐨𑐶𑐎 𑐎𑐵𑐮𑑄𑐣𑐶𑐳𑐾𑑄 𑐣𑑂𑐴𑑂𑐫𑐠𑐣𑐵𑑅 𑐣𑐷𑐐𑐸𑐩𑑂𑐴 (𑑒𑑙) 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄 𑐠𑐸𑐎𑐠𑑄 𑐣𑑂𑐴𑑂𑐫𑐠𑐣𑐵𑐡𑐶𑐮 –

𑑑. 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑑒. 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑑓. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 𑑔. 𑐔𑐶𑐟𑑂𑐟𑐢𑐬 ‘𑐴𑑂𑐡𑐫’ 𑑕. 𑐏𑐜𑑂𑐐𑐩𑐵𑐣 𑐩𑐮𑑂𑐮 𑑖. 𑐛𑐵𑐎𑐸𑐬𑐮𑐵𑐮 𑐩𑐵𑐣𑐣𑑂𑐢𑐬 𑑗. 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑑘. 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅 (𑑑𑑐𑑓𑑗–𑑑𑑑𑑑𑑑) 𑑙. 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑑑𑑐. 𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫 𑑑𑑑. 𑐂𑐣𑑂𑐡𑑂𑐬 𑐩𑐵𑐮𑐷 𑑑𑑒. 𑐣𑐬𑑂𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣 𑑑𑑓. 𑐗𑐸𑐮𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣 𑑑𑑔. 𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬 𑑑𑑕. 𑐮𑐎𑑂𑐲𑑂𑐩𑐷𑐨𑐎𑑂𑐟 𑐖𑑀𑐱𑐷 𑑑𑑖. 𑐁𑐱𑐵𑐬𑐵𑐩 𑐱𑐵𑐎𑑂𑐫 𑑑𑑗. 𑐦𑐞𑐷𑐣𑑂𑐡𑑂𑐬𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫 𑑑𑑘. 𑐱𑐵𑐣𑑂𑐟𑐴𑐬𑑂𑐲 𑐰𑐖𑑂𑐬𑐵𑐔𑐵𑐬𑑂𑐫 𑑑𑑙. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬 𑑒𑑐. 𑐎𑐵𑐱𑐷𑐣𑐵𑐠 𑐟𑐩𑑀𑐚 𑑒𑑑. 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫 𑑒𑑒. 𑐜𑐵.𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫 𑑒𑑓. 𑐥𑐹𑐬𑑂𑐞 𑐰𑐿𑐡𑑂𑐫 𑑒𑑔. 𑐧𑐸𑐡𑑂𑐢 𑐳𑐵𑐫𑑂𑐩𑐶 𑑒𑑕. 𑐜𑐵.𑐳𑐸𑐣𑑂𑐡𑐬𑐎𑐺𑐲𑑂𑐞 𑐖𑑀𑐱𑐷 𑑒𑑖. 𑐥𑑂𑐬𑑀.𑐳𑐸𑐬𑑂𑐫𑐧𑐴𑐵𑐡𑐸𑐬 𑐱𑐵𑐎𑑂𑐫 𑑒𑑗. 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫 𑑒𑑘. 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷 𑑒𑑙. 𑐜𑐵.𑐎𑐾𑐱𑐰𑐩𑐵𑐣 𑐱𑐵𑐎𑑂𑐫 𑑋

𑑘.𑑔) 𑐂𑐣𑑂𑐡𑑂𑐬 𑐩𑐵𑐮𑐷

𑐣𑐾.𑐳𑑄. 𑑑𑑑𑑑𑑙 𑐠𑑂𑐫𑑄𑐎𑐵𑑅 𑐰𑐫𑑂𑐎𑑅 𑐂𑐣𑑂𑐡𑑂𑐬 𑐩𑐵𑐮𑐷𑐖𑐸𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐣𑑂𑐴𑑂𑐫𑐧𑑂𑐰𑐫𑐵𑑅 (𑑕𑑕) 𑐩𑑂𑐴 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 –

𑑑. 𑐢𑐬𑑂𑐩𑐁𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑑒. 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑑓. 𑐬𑐵𑐩𑐴𑐬𑐶 𑐖𑑀𑐱𑐷 𑑔. 𑐬𑐵𑐖𑐾𑐣𑑂𑐡𑑂𑐬𑐩𑐵𑐣 𑐱𑑂𑐬𑐾𑐲𑑂𑐛 𑑕. 𑐥𑐹𑐬𑑂𑐞𑐎𑐵𑐖𑐷 𑐟𑐵𑐩𑑂𑐬𑐵𑐎𑐵𑐬 𑑖. 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑑗. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 𑑘. 𑐁𑐱𑐵𑐬𑐵𑐩 𑐱𑐵𑐎𑑂𑐫 𑑙. 𑐥𑑂𑐬𑑀.𑐳𑐸𑐬𑑂𑐫𑐧𑐴𑐵𑐡𑐸𑐬 𑐱𑐵𑐎𑑂𑐫 𑑑𑑐. 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷 𑑑𑑑. 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑑑𑑒. 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑑑𑑓. 𑐢𑐸𑐳𑑂𑐰𑐵𑑄 𑐳𑐵𑐫𑑂𑐩𑐶 𑑑𑑔. 𑐔𑐶𑐟𑑂𑐟𑐢𑐬 ‘𑐴𑑂𑐡𑐫’ 𑑑𑑕. 𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫 𑑑𑑖. 𑐗𑐸𑐮𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣 𑑑𑑗. 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫 𑑑𑑘. 𑐜𑐵.𑐳𑐸𑐣𑑂𑐡𑐬𑐎𑐺𑐲𑑂𑐞 𑐖𑑀𑐱𑐷 𑑑𑑙. 𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬 𑑒𑑐. 𑐜𑐵.𑐩𑑀𑐴𑐣 𑐴𑐶𑐩𑐵𑑄𑐱𑐸 𑐠𑐵𑐥𑐵 𑑒𑑑. 𑐂𑐣𑑂𑐡𑑂𑐬 𑐩𑐵𑐮𑐷 𑑒𑑒. 𑐣𑐬𑑂𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣 𑑒𑑓. 𑐮𑐎𑑂𑐲𑑂𑐩𑐷𑐨𑐎𑑂𑐟 𑐖𑑀𑐱𑐷 𑑒𑑔. 𑐏𑐜𑑂𑐐𑐩𑐵𑐣 𑐱𑑂𑐬𑐾𑐲𑑂𑐛 𑑒𑑕. 𑐀𑐥𑐬𑑂𑐞𑐵 𑐥𑑂𑐬𑐢𑐵𑐣 𑑒𑑖. 𑐨𑐐𑐰𑐵𑐣𑐬𑐟𑑂𑐣 𑐟𑐸𑐮𑐵𑐢𑐬 𑑒𑑗 𑐎𑐵𑐱𑐷𑐣𑐵𑐠 𑐟𑐩𑑀𑐚 𑑒𑑘. 𑐬𑐾𑐰𑐟𑐷 𑐬𑐩𑐵𑐣𑐣𑑂𑐡 𑐱𑑂𑐬𑐾𑐲𑑂𑐛 𑑒𑑙. 𑐱𑐵𑐣𑑂𑐟𑐴𑐬𑑂𑐲 𑐰𑐖𑑂𑐬𑐵𑐔𑐵𑐬𑑂𑐫 𑑓𑑐. 𑐜𑐵.𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫 𑑓𑑑. 𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷 𑑓𑑒. 𑐦𑐞𑐷𑐣𑑂𑐡𑑂𑐬𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫 𑑓𑑓. 𑐬𑐵𑐩𑐨𑐎𑑂𑐟 𑐱𑑂𑐬𑐾𑐲𑑂𑐛 𑑓𑑔. 𑐨𑐹𑐩𑐴𑐾𑐱 𑐖𑑀𑐱𑐷 𑑓𑑕. 𑐩𑐣𑐩𑑀𑐴𑐣 𑐱𑑂𑐬𑐾𑐲𑑂𑐛 𑑓𑑖. 𑐬𑐵𑐩𑐮𑑀𑐔𑐣 𑐗𑐵 𑑓𑑗. 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬 𑑓𑑘. 𑐖𑐣𑐎 𑐣𑐾𑐰𑐵𑑅 𑑓𑑙. 𑐩𑐡𑐣𑐳𑐾𑐣 𑐰𑐖𑑂𑐬𑐵𑐔𑐵𑐬𑑂𑐫 𑑔𑑐. 𑐥𑐹𑐬𑑂𑐞 𑐰𑐿𑐡𑑂𑐫 𑑔𑑑. 𑐧𑐸𑐡𑑂𑐢 𑐳𑐵𑐫𑑂𑐩𑐶 𑑔𑑒. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬 𑑔𑑓. 𑐀𑐩𑐺𑐟𑐬𑐟𑑂𑐣 𑐟𑐸𑐮𑐵𑐢𑐬 𑑔𑑔. 𑐜𑐵.𑐎𑐾𑐱𑐰𑐩𑐵𑐣 𑐱𑐵𑐎𑑂𑐫 𑑔𑑕. 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫 𑑔𑑖. 𑐐𑑀𑐰𑐬𑑂𑐡𑑂𑐢𑐣 𑐱𑐬𑑂𑐩𑐵 𑑔𑑗. 𑐬𑐰𑐷𑐣𑑂𑐡𑑂𑐬 𑐬𑐵𑐖𑐎𑐬𑑂𑐞𑐶𑐎𑐵𑐬 𑑔𑑘. 𑐩𑐣𑑀𑐬𑐩𑐵 𑐟𑐸𑐮𑐵𑐢𑐬 𑑔𑑙. 𑐰𑐶𑐖𑐫𑐱𑑄𑐎𑐬 𑐩𑐮𑑂𑐮 𑐡𑐵𑐬𑐸𑐞 𑑕𑑐. 𑐥𑐹𑐬𑑂𑐞 𑐩𑐸𑐣𑐎𑐬𑑂𑐩𑐷 𑑕𑑑. 𑐫𑑀𑐐𑐾𑐱 𑐬𑐵𑐖 𑑕𑑒. 𑐰.𑐁.𑐎𑐣𑐎𑐡𑑂𑐰𑐷𑐥 𑑕𑑓. 𑐰𑐶𑐣𑑀𑐡𑐬𑐵𑐖 𑐱𑐬𑑂𑐩𑐵 𑑕𑑔. 𑐱𑐬𑐵𑐩 𑐣𑐾𑐰𑐵𑑅 𑑕𑑕. 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬 𑑋

𑐰𑐶.𑐳𑑄.𑑒𑑐𑑖𑑐𑐳 𑐳𑐩𑐎𑐵𑐮𑐷𑐣 𑐳𑐵𑐴𑐶𑐟𑑂𑐫𑐫𑑂 𑐏𑐳–𑐣𑐾𑐥𑐵𑐮𑐷 𑐨𑐵𑐲𑐵𑑄 𑐔𑑂𑐰𑐫𑐵𑐡𑐷𑐐𑐸 𑐰𑐫𑑂𑐎𑑅𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐬 𑐳𑐩𑐵𑐮𑑀𑐔𑐎𑐴𑐬𑐹 𑐣𑐵𑑄𑐐𑐸 𑐔𑑂𑐰𑐳𑐸𑐂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐎𑐥𑐶𑐣𑐶𑐐𑐸 𑐮𑑂𑐫𑐵𑑅 𑐏𑐸𑐂𑐩𑑂𑐴 (𑑖𑑐) 𑐣𑑂𑐴𑑂𑐫𑐧𑑂𑐰𑐫𑐵𑑅 𑐴𑐵𑐎𑐣𑑄 𑐩𑐾𑐥𑐶𑑄 𑐏𑐸𑐩𑑂𑐴 𑐣𑑄 𑐟𑐣𑐵𑑅 𑐏𑐸𑐂𑐏𑐸𑐩𑑂𑐴 (𑑖𑑖) 𑐎𑑂𑐫𑐣𑐵𑐡𑐶𑐮 𑑋 (𑐩𑐵𑐮𑐷, 𑐰𑐶.𑐳𑑄.𑑒𑑐𑑖𑑐𑑅𑑑𑑐𑑓𑑒–𑑑𑑐𑑔𑑒)

𑑘.𑑕) 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬

𑐣𑐾.𑐳𑑄. 𑑑𑑑𑑒𑑐𑐳 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳 𑐳𑐦𑐹 𑐔𑑂𑐰𑐫𑐵𑐡𑐷𑐩𑑂𑐴 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑐖𑐸𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵 𑐣𑐵𑑄𑐐𑐸 𑐀𑐢𑑂𑐫𑐵𑐫𑐳 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄 𑐠𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 –

𑑑. 𑐢𑐬𑑂𑐩𑐁𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑑒. 𑐰𑐿𑐎𑐸𑐞𑑂𑐛𑐥𑑂𑐬𑐳𑐵𑐡 𑐮𑐵𑐎𑑁𑐮 𑑓. 𑐔𑐶𑐟𑑂𑐟𑐢𑐬 ‘𑐴𑑂𑐡𑐫’ 𑑔. 𑐏𑐜𑑂𑐐𑐩𑐵𑐣 𑐩𑐮𑑂𑐮 𑑕. 𑐛𑐵𑐎𑐸𑐬𑐮𑐵𑐮 𑐩𑐵𑐣𑐣𑑂𑐢𑐬 𑑖. 𑐳𑐶𑐡𑑂𑐢𑐶𑐔𑐬𑐞 𑐱𑑂𑐬𑐾𑐲𑑂𑐛 𑑗. 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷 𑑘. 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅 𑑙. 𑐥𑐹𑐬𑑂𑐞𑐎𑐵𑐖𑐷 𑐟𑐵𑐩𑑂𑐬𑐵𑐎𑐵𑐬 𑑑𑑐. 𑐮𑐎𑑂𑐲𑑂𑐩𑐷𑐨𑐎𑑂𑐟 𑐖𑑀𑐱𑐷 𑑑𑑑. 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫 𑑑𑑒. 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑑑𑑓. 𑐥𑑂𑐬𑑀.𑐳𑐸𑐬𑑂𑐫𑐧𑐴𑐵𑐡𑐸𑐬 𑐱𑐵𑐎𑑂𑐫 𑑑𑑔. 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑑑𑑕. 𑐬𑐵𑐩𑐴𑐬𑐶 𑐖𑑀𑐱𑐷 𑑑𑑖. 𑐁𑐱𑐵𑐬𑐵𑐩 𑐱𑐵𑐎𑑂𑐫 𑑑𑑗. 𑐗𑐸𑐮𑐾𑐣𑑂𑐡𑑂𑐬𑐩𑐵𑐣 𑐥𑑂𑐬𑐢𑐵𑐣 𑑑𑑘. 𑐢𑐸𑐳𑑂𑐰𑐵𑑄 𑐳𑐵𑐫𑑂𑐩𑐶 𑑑𑑙. 𑐦𑐞𑐷𑐣𑑂𑐡𑑂𑐬𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫 𑑒𑑐. 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷 𑑒𑑑. 𑐬𑐾𑐰𑐟𑐷 𑐬𑐩𑐞𑐵𑐣𑐣𑑂𑐡 𑐳𑑂𑐫𑐳𑑂𑐫𑑅 𑑒𑑒. 𑐥𑑂𑐬𑑀. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 𑑒𑑓.𑐜𑐵.𑐖𑐣𑐎𑐮𑐵𑐮 𑐰𑐿𑐡𑑂𑐫 𑑒𑑔. 𑐜𑐵.𑐳𑐸𑐣𑑂𑐡𑐬𑐎𑐺𑐲𑑂𑐞 𑐖𑑀𑐱𑐷 𑑒𑑕. 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮 𑑒𑑖. 𑐜𑐵.𑐩𑑀𑐴𑐣 𑐴𑐶𑐩𑐵𑑄𑐱𑐸 𑐠𑐵𑐥𑐵 𑑒𑑗. 𑐱𑐵𑐣𑑂𑐟𑐴𑐬𑑂𑐲 𑐰𑐖𑑂𑐬𑐵𑐔𑐵𑐬𑑂𑐫 𑑒𑑘. 𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷 𑑒𑑙. 𑐥𑐸𑐲𑑂𑐥𑐧𑐴𑐵𑐡𑐸𑐬 𑐔𑐶𑐟𑑂𑐬𑐎𑐵𑐬 𑑓𑑐. 𑐏𑐜𑑂𑐐𑐩𑐵𑐣 𑐱𑑂𑐬𑐾𑐲𑑂𑐛 𑑓𑑑. 𑐥𑐹𑐬𑑂𑐞 𑐰𑐿𑐡𑑂𑐫 𑑓𑑒. 𑐣𑐬𑑂𑐩𑐡𑐾𑐱𑑂𑐰𑐬𑐩𑐵𑐣 𑐥𑑂𑐬𑐢𑐵𑐣 𑑓𑑓. 𑐖𑐣𑐎 𑐣𑐾𑐰𑐵𑑅 𑑓𑑔. 𑐂𑐣𑑂𑐡𑑂𑐬 𑐩𑐵𑐮𑐷 𑑓𑑕. 𑐎𑐵𑐱𑐷𑐣𑐵𑐠 𑐟𑐩𑑀𑐚 𑑓𑑖. 𑐬𑐵𑐩𑐮𑑀𑐔𑐣 𑐗𑐵 𑑓𑑗. 𑐬𑐵𑐩𑐨𑐎𑑂𑐟 𑐱𑑂𑐬𑐾𑐲𑑂𑐛 𑑓𑑘. 𑐖𑐐𑐡𑐷𑐱 𑐔𑐶𑐟𑑂𑐬𑐎𑐵𑐬 𑑓𑑙. 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬 𑑔𑑐. 𑐩𑐣𑐩𑑀𑐴𑐣 𑐱𑑂𑐬𑐾𑐲𑑂𑐛 𑑔𑑑. 𑐐𑑀𑐰𑐬𑑂𑐡𑑂𑐢𑐣 𑐱𑐬𑑂𑐩𑐵 𑑔𑑒.𑐜𑐵.𑐎𑐾𑐱𑐰𑐩𑐵𑐣 𑐱𑐵𑐎𑑂𑐫 𑑔𑑓. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬 𑑔𑑔. 𑐩𑐣𑑀𑐬𑐩𑐵 𑐟𑐸𑐮𑐵𑐢𑐬 𑑔𑑕. 𑐜𑐵.𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫 𑑔𑑖. 𑐩𑐡𑐣𑐳𑐾𑐣 𑐰𑐖𑑂𑐬𑐵𑐔𑐵𑐬𑑂𑐫 𑑔𑑗. 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬 𑑔𑑘. 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫 𑑔𑑙. 𑐥𑑂𑐬𑐾𑐩𑐴𑐷𑐬𑐵 𑐟𑐸𑐮𑐵𑐢𑐬 𑑕𑑐. 𑐌𑐩𑐎𑐵𑐬𑐾𑐱𑑂𑐰𑐬 𑐱𑑂𑐬𑐾𑐲𑑂𑐛 𑑕𑑑) 𑐟𑐸𑐫𑐸𑐧𑐴𑐵𑐡𑐸𑐬 𑐩𑐴𑐬𑑂𑐖𑐣 𑑕𑑒) 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴 𑑕𑑓) 𑐎𑐺𑐲𑑂𑐞𑐵 𑐰𑐿𑐡𑑂𑐫 𑑕𑑔) 𑐖𑑂𑐰𑐵𑐮𑐵 𑐟𑐸𑐮𑐵𑐢𑐬 𑑋

𑐰𑐫𑑂𑐎𑐮𑑄 𑐩𑐾𑐩𑐾𑐥𑐶𑑄 𑐳𑑂𑐰𑐷𑐏𑐸𑐩𑑂𑐴 (𑑓𑑖) 𑐳𑐶𑐐𑐸 𑐣𑐵𑑄 𑐣𑑄 𑐠𑐸𑐎𑐠𑑄 𑐧𑐶𑐫𑐵𑐡𑐷𑐐𑐸 𑐡𑐸 –

𑐬𑐵𑐖𑐾𑐣𑑂𑐡𑑂𑐬𑐩𑐵𑐣 𑐱𑑂𑐬𑐾𑐲𑑂𑐛, 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷, 𑐥𑐹𑐬𑑂𑐞𑐡𑐵𑐳 𑐱𑑂𑐬𑐾𑐲𑑂𑐛, 𑐳𑐹𑐬𑑂𑐫𑐧𑐴𑐵𑐡𑐸𑐬 𑐥𑐶𑐰𑐵𑑅, 𑐰𑐶.𑐁𑐬 𑐎𑐳𑐵𑑅, 𑐨𑐹𑐰𑐣𑐮𑐵𑐮 𑐥𑑂𑐬𑐢𑐵𑐣, 𑐳𑑂𑐰𑐫𑐩𑑂𑐨𑐹𑐮𑐵𑐮 𑐱𑑂𑐬𑐾𑐲𑑂𑐛, 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐲𑑂𑐛, 𑐥𑐸𑐞𑑂𑐫𑐬𑐟𑑂𑐣 𑐧𑐖𑑂𑐬𑐵𑐔𑐵𑐬𑑂𑐫, 𑐴𑐶𑐟𑐎𑐬𑐰𑐷𑐬𑐳𑐶𑑄𑐴 𑐎𑐳𑐵𑑅, 𑐬𑐩𑐾𑐱 𑐩𑐢𑐸, 𑐧.𑐁 𑐎𑐣𑐎𑐡𑑂𑐰𑐷𑐥, 𑐫𑑀𑐐𑐶 𑐰𑐶𑐎𑐵𑐳𑐵𑐣𑐣𑑂𑐡, 𑐱𑑄𑐎𑐬 𑐱𑑂𑐬𑐾𑐲𑑂𑐛, 𑐩𑑄𑐐𑐮𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐀𑐬𑑂𑐥𑐞𑐵 𑐥𑑂𑐬𑐢𑐵𑐣, 𑐧𑐶𑐩𑐮𑐵 𑐩𑐵𑐣𑐣𑑂𑐢𑐬, 𑐩𑐴𑐾𑐱 𑐖𑑀𑐱𑐷, 𑐩𑐵𑐢𑐰𑐮𑐵𑐮 𑐥𑑂𑐬𑐢𑐵𑐣, 𑐣𑐣𑑂𑐡𑐩𑐵𑐫𑐵 𑐣𑐎𑐬𑑂𑐩𑐶, 𑐱𑑂𑐬𑐷𑐮𑐎𑑂𑐲𑑂𑐩𑐷, 𑐧𑐵𑐮𑐐𑑀𑐥𑐵𑐮 𑐱𑑂𑐬𑐾𑐲𑑂𑐛, 𑐬𑐰𑐶𑐣𑑂𑐡𑑂𑐬 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐜𑐵.𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐰𑐶𑐖𑐫𑐬𑐟𑑂𑐣 𑐧𑐖𑑂𑐬𑐵𑐔𑐵𑐬𑑂𑐫, 𑐀𑐱𑑀𑐎 𑐱𑑂𑐬𑐾𑐲𑑂𑐛, 𑐰𑐶𑐖𑐫 𑐱𑑄𑐎𑐬 𑐩𑐮𑑂𑐮 𑐡𑐵𑐬𑐸𑐞, 𑐥𑐹𑐬𑑂𑐞 𑐩𑐸𑐣𑐎𑐬𑑂𑐩𑐷, 𑐫𑑀𑐐𑐾𑐱 𑐬𑐵𑐖, 𑐰𑐶𑐣𑑀𑐡𑐬𑐵𑐖 𑐱𑐬𑑂𑐩𑐵, 𑐱𑐬𑐵𑐩 𑐣𑐾𑐰𑐵𑑅, 𑐱𑐵𑐣𑑂𑐟𑐬𑐵𑐖 𑐱𑐵𑐎𑑂𑐫, 𑐧𑐸𑐡𑑂𑐢 𑐳𑐵𑐫𑑂𑐩𑐶, 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟 𑐁𑐡𑐶 𑑋

𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶𑐫𑐵𑐟 𑐎𑐫𑐵𑑅 𑐣𑐷𑐡𑑃 𑐣𑑂𑐴𑑂𑐫𑑀𑐟𑐎𑑄 𑐠𑑅𑐠𑑅𑐐𑐸 𑐧𑐶𑐔𑐵𑐬 𑐥𑑂𑐰𑑄𑐎𑐵𑑅𑐡𑐷𑐥𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐶𑐨𑐶𑐣𑑂𑐣 𑐁𑐮𑑀𑐔𑐎𑐥𑐶𑐣𑐶𑐐𑐸 𑐠𑐷𑐠𑐷 𑐰𑐶𑐔𑐵𑐬𑐫𑐵𑐟 𑐀𑐢𑑂𑐫𑐫𑐣 𑐫𑐵𑐫𑐾𑐧𑐮𑐫𑑂 𑐩𑐹𑐮𑐟𑑅 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶𑐥𑑂𑐬𑐟𑐶 𑐰𑐫𑑂𑐎𑑅𑐥𑐶𑑄 𑐳𑐸𑐫𑐵𑐎𑐾𑑄 𑐳𑐣𑑂𑐟𑐸𑐲𑑂𑐚𑐶 𑐩𑐡𑐸𑐐𑐸 𑐏𑐣𑐾𑐡𑐸𑐳𑐵𑑄 𑐐𑐸𑐮𑐶𑑄𑐳𑐶𑐐𑐸 𑐰𑐶𑐔𑐵𑐬𑐫𑑂 𑐢𑐵𑑅𑐳𑐵 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐫𑐵 𑐮𑐎𑑂𑐲𑐞 𑐏𑐣𑐾𑐡𑐫𑐾𑐢𑐸𑑄𑐎𑐹𑐐𑐸 𑐧𑐶𑐔𑐵𑑅 𑐡𑐸 𑑋

𑑙) 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐥𑐸𑐣𑐬𑑂𑐀𑐢𑑂𑐫𑐫𑐣

𑐰𑑂𑐫𑐎𑑂𑐟𑐶𑐫𑐵 𑐳𑐩𑐳𑑂𑐫𑐵, 𑐥𑐬𑐶𑐰𑐵𑐬𑐫𑐵 𑐳𑐩𑐳𑑂𑐫𑐵, 𑐳𑐵𑐩𑐵𑐖𑐶𑐎 𑐏𑐮𑑅𑐥𑐸𑐔𑑅𑐫𑐵 𑐳𑐩𑐳𑑂𑐫𑐵𑑄𑐣𑐶𑐳𑐾𑑄 𑐬𑐵𑐲𑑂𑐚𑑂𑐬𑐶𑐫–𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐩𑐳𑑂𑐫𑐵 𑐁𑐡𑐶 𑐦𑐸𑐎𑑂𑐎 𑐳𑐩𑐳𑑂𑐫𑐵𑐫𑐵 𑐳𑐩𑐵𑐢𑐵𑐣 𑐳𑑂𑐰𑐳𑑂𑐠–𑐁𑐮𑑀𑐔𑐣𑐵𑐥𑐵𑐏𑐾𑑄 𑐖𑐎 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐠𑐎𑐵𑐫𑐾𑐐𑐸 𑐏𑑃𑐫𑑂 𑐁𑐮𑑀𑐔𑐣𑐵𑐫𑐵 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐡𑐸𑐐𑐸 𑐖𑐹𑐐𑐸𑐮𑐶𑑄 𑐠𑑁𑑄 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳 𑐕𑐐𑐹 𑐟𑑅𑐢𑑄𑐐𑐸 𑐩𑐖𑐶𑐩𑐐𑐵𑑅𑐐𑐸 𑐳𑐵𑐢𑐣 𑐀𑐠𑐰𑐵 𑐩𑐵𑐢𑑂𑐫𑐩 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐡𑐶 𑐁𑐮𑑀𑐔𑐣𑐵𑑄 𑐧𑐵𑑄𑐮𑐵𑐎 𑐖𑑂𑐫𑐵 𑐫𑐵𑐫𑐾𑐦𑐟 𑐢𑐵𑑅𑐳𑐵 𑐳𑑄𑐑–𑐳𑑄𑐳𑑂𑐠𑐵𑐫𑑂 𑐣𑐶𑐬𑑄𑐎𑐸𑐱 𑐣𑐾𑐟𑐺𑐟𑑂𑐰𑐫𑐵 𑐳𑑂𑐰𑐾𑐔𑑂𑐕𑐵𑐔𑐵𑐬𑐶𑐟𑐵𑐫𑐵 𑐣𑐶𑐫𑐣𑑂𑐟𑑂𑐬𑐞 𑐴𑐫𑐾𑐦𑐸, 𑐐𑐟𑐶𑐴𑐷𑐣, 𑐡𑐶𑐱𑐵𑐴𑐷𑐣 𑐳𑑄𑐑–𑐳𑑄𑐳𑑂𑐠𑐵 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐥𑐬𑐩𑑂𑐥𑐬𑐵𑐎𑐠𑑄 𑐧𑐵𑑄𑐮𑐵𑐎 𑐣𑑂𑐴𑑂𑐫𑐵𑐎𑐵𑑅 𑐰𑐶𑐎𑐵𑐳 𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐫𑐵𑐫𑐾𑐐𑐸 𑐳𑑂𑐠𑐶𑐟𑐶 𑐴𑐫𑐾𑐦𑐸 𑑋 𑐣𑐾𑐰𑐵𑑅𑐟𑐫𑑂𑐐𑐸 𑐳𑑄𑐑–𑐳𑑄𑐳𑑂𑐠𑐵𑐟 𑐀𑐥𑑂𑐰𑑅 𑐡𑐫𑐵𑑅 𑐣𑑄 𑐠𑑁𑑄 𑐐𑐸𑐐𑐸𑑄 𑐣𑑄 𑐧𑐵𑑄𑐮𑐵𑐎 𑐣𑑂𑐴𑑂𑐫𑐵𑐎𑐾 𑐩𑐦𑐸𑐐𑐸𑐫𑐵 𑐩𑐹𑐮 𑐎𑐵𑐬𑐞 𑐁𑐮𑑀𑐔𑐣𑐵𑑄 𑐥𑐵𑐫𑑂𑐕𑐶 𑐐𑐟𑐶 𑐎𑐵𑐫𑐾𑐩𑐦𑐸𑐐𑐸𑐮𑐶𑑄 𑐏𑑅 𑑋 𑐁𑐮𑑀𑐔𑐣𑐵𑐫𑐵 𑐡𑐩 𑐩𑐐𑐵𑐟𑐎𑐶 𑐣𑑄 𑐳𑑄𑐑–𑐳𑑄𑐳𑑂𑐠𑐵𑐟 𑐩𑐵𑑅𑐠𑐾𑐎𑐠𑑄 𑐣𑑂𑐴𑑂𑐫𑐵𑐫𑐾 𑐩𑐦𑐫𑐵𑑅 𑐡𑐶𑐣𑐵𑐔𑑂𑐰𑐣𑐷𑐐𑐸 𑐏𑑅 𑑋

𑐗𑐷𑐐𑐸 𑐣𑐾𑐰𑐵𑑅 𑐳𑐩𑐵𑐖 𑐠𑑁𑑄𑐟𑐎𑑄 𑐥𑐬𑐩𑑂𑐥𑐬𑐵𑐰𑐵𑐡𑐷 𑐳𑐩𑐵𑐖𑐥𑐵𑐏𑐾𑑄 𑐥𑐹𑐬𑑂𑐞𑐬𑐸𑐥𑑄 𑐩𑐸𑐎𑑂𑐟 𑐖𑐸𑐂 𑐩𑐦𑐸𑐣𑐶 𑑋 𑐠𑑁𑑄𑐟𑐎𑑄 𑐗𑐷 𑐣𑐾𑐰𑐵𑑅𑐟𑐫𑑂𑐎𑐾 𑐥𑑂𑐬𑐐𑐟𑐶𑐱𑐷𑐮 𑐁𑐢𑐸𑐣𑐶𑐎 𑐰𑐿𑐖𑑂𑐘𑐵𑐣𑐶𑐎 𑐰𑐶𑐔𑐵𑐬𑐢𑐵𑐬𑐵 𑐣𑑂𑐴𑑂𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐩𑐡𑐸 𑑋 𑐄𑐎𑐶𑑄 𑐗𑐷 𑐣𑐾𑐰𑐵𑑅𑐟𑐫𑑂𑐎𑐾 𑐟𑑅𑐢𑑄𑐐𑐸 𑐄𑐡𑑂𑐡𑐾𑐱𑑂𑐫 𑐮𑐎𑑂𑐲𑑂𑐫 𑐢𑐿𑐐𑐸 𑐩𑐡𑐸𑐐𑐸𑐮𑐶𑑄 𑐴𑐾 𑐗𑐷𑐐𑐸 𑐣𑐾𑐰𑐵𑑅𑐬𑐵𑐖𑑂𑐫 𑐎𑐟𑑅𑐫𑐵𑐐𑐸 𑐮𑑂𑐴𑐵𑐟𑐷 𑐮𑐵𑑅𑐰𑐣 𑑋 𑐠𑑁𑑄 𑐖𑐹𑐧𑐮𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐀𑐳𑑂𑐟𑐶𑐟𑑂𑐰𑐫𑐵 𑐴𑐾 𑐳𑐰𑐵𑐮 𑐰𑐫𑐾 𑐢𑐸𑑄𑐎𑐮 𑑋 𑐟𑐬 𑐡𑐸𑑅𑐏𑐫𑐵 𑐏𑑃 , 𑐠𑑁𑑄𑐟𑐎𑑄 𑐰 𑐴𑐾 𑐥𑐸𑐮𑐵𑑄𑐐𑐸 𑐥𑐬𑐩𑑂𑐥𑐬𑐵𑐰𑐵𑐡𑐷 𑐔𑐶𑐣𑑂𑐟𑐣 𑐰𑐶𑐔𑐵𑐬 𑐟𑐶𑐣𑐶 𑑋 𑐥𑐸𑐬𑐵𑐟𑐣𑐰𑐵𑐡𑐷 𑐣𑐾𑐰𑐵𑑅𑐥𑐡𑑂𑐢𑐟𑐶𑐥𑑂𑐬𑐟𑐶 𑐑𑐺𑐞𑐵𑐫𑐵 𑐨𑐵𑐰 𑐩𑐡𑐸𑐣𑐶 𑐀𑐮𑐾 𑐥𑑂𑐬𑐐𑐟𑐶𑐱𑐷𑐮 𑐰𑐶𑐔𑐵𑐬 𑐨𑐵𑐰𑐣𑐵𑐥𑑂𑐬𑐟𑐶 𑐏𑐵𑐳 𑐁𑐎𑐺𑐲𑑂𑐚 𑐖𑐹𑐐𑐸 𑐩𑐡𑐸𑐣𑐶 𑑋 𑐄𑐎𑐶𑑄 𑐗𑐷𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐣𑑄 𑐳𑐵𑐩𑐵𑐖𑐶𑐎 𑐥𑐬𑐶𑐰𑐬𑑂𑐟𑐣𑐎𑐵𑐬𑐷 𑐰𑐶𑐔𑐵𑐬𑐢𑐵𑐬𑐵𑐫𑐵 𑐁𑐮𑑀𑐔𑐣𑐵𑐫𑐵 𑐕𑐵𑐥 𑐏𑐣𑐾 𑐩𑐡𑐸𑐣𑐶 𑑋 𑐐𑐸𑐮𑐶 𑐣𑑄 𑐳𑐩𑐵𑐖𑐫𑑂 𑐎𑑂𑐬𑐶𑐫𑐵𑐎𑐮𑐵𑐥 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐰 𑐦𑐸𑐎𑑂𑐎 𑐳𑐵𑐩𑐵𑐖𑐶𑐎 𑐥𑐬𑐶𑐰𑐬𑑂𑐟𑐣𑐫𑐵𑐟 𑐳𑑂𑐰𑐫𑐵 𑐫𑐠𑐵𑐳𑑂𑐠𑐶𑐟𑐶𑐰𑐵𑐡𑐷𑐫𑐵 𑐄𑐡𑑂𑐡𑐾𑐱𑑂𑐫𑑄 𑐥𑑂𑐬𑐾𑐬𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑁𑑄 𑐣𑐾𑐥𑐵𑑅𑐫𑐵 𑐬𑐵𑐲𑑂𑐚𑑂𑐬𑐶𑐫 𑐥𑐬𑐶𑐢𑐶𑐫𑐵 𑐰𑐶𑐨𑐶𑐣𑑂𑐣 𑐡𑐺𑐱𑑂𑐫𑐫𑑂 𑐣𑑄 𑐣𑐾𑐰𑐵𑑅 𑐣𑐾𑐟𑐵𑐟𑐫𑑂𑐐𑐸 𑐄𑐥𑐳𑑂𑐠𑐶𑐟𑐶 𑐱𑐹𑐣𑑂𑐫 𑐥𑑂𑐬𑐵𑐫𑑅 𑐖𑐸𑐂𑐢𑐸𑑄𑐎𑐮 𑑋 𑐠𑑂𑐰 𑐢𑐿𑐐𑐸 𑐣𑐾𑐰𑐵𑑅𑐟𑐫𑑂𑐳𑑄 𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑑂 𑐕𑐸𑑄 𑐥𑑂𑐬𑐟𑐶𑐎𑑂𑐬𑐶𑐫𑐵 𑐮𑐵𑐎𑐾 𑐩𑐦𑐸, 𑐀𑐠𑐾 𑐢𑐿𑐐𑐸 𑐗𑐷 𑐣𑐾𑐰𑐵𑑅𑐟𑐫𑑂𑐐𑐸 𑐧𑑁𑐡𑑂𑐢𑐶𑐎𑐳𑑂𑐟𑐬 𑐩𑐾𑐐𑐸 𑐖𑐵𑐟𑐶𑐫𑐵𑐥𑐶𑑄 𑐳𑑂𑐰𑐫𑐵𑑄 𑐣𑑄 𑐎𑑂𑐰𑐫𑑂 𑐴𑐾 𑐮𑐵𑑅𑐐𑐸𑐫𑐵 𑐥𑑂𑐬𑐩𑐵𑐞 𑐏𑑅 𑑋 𑐠𑐸𑐎𑐶𑐫𑐵 𑐎𑐵𑐬𑐞 𑐗𑐷𑐐𑐸 𑐳𑐩𑐵𑐖𑐫𑑂 𑐁𑐮𑑀𑐔𑐣𑐵 𑐥𑑂𑐬𑐟𑑂𑐫𑐵𑐮𑑀𑐔𑐣𑐵–𑐁𑐟𑑂𑐩𑐵𑐮𑑀𑐔𑐣𑐵𑐫𑐵 𑐥𑐬𑐩𑑂𑐥𑐬𑐵 𑐟𑐳𑐎𑑄 𑐴𑐾 𑐩𑐐𑐵𑑅𑐐𑐸 𑐏𑐣𑐾𑐡𑐸 𑑋 𑐄𑐎𑐶𑑄 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑑂 𑐣𑑄 𑐎𑐩𑐖𑑀𑐬 𑐴𑐾 𑐏𑐣𑐾𑐡𑐸𑐐𑐸 𑐏𑑅 𑑋

𑐁𑐮𑑀𑐔𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫𑐫𑐵 𑐣𑐶𑐩𑑂𑐟𑐶𑑄 𑐳𑐶𑐬𑑂𑐖𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫𑐫𑐵𑐟 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐩𑐵𑐟𑑂𑐬𑐵 𑐳𑐔𑐾𑐲𑑂𑐚 𑐧𑑁𑐡𑑂𑐢𑐶𑐎 𑐳𑐩𑐵𑐖𑐫𑐵 𑐁𑐰𑐱𑑂𑐫𑐎𑐟𑐵 𑐖𑐹 𑑋 𑐕𑐵𑐫𑑂𑐢𑐵𑑅𑐳𑐵, 𑐳𑐶𑐬𑑂𑐖𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫𑐫𑑂 𑐧𑐸𑐡𑑂𑐢𑐶 𑐰 𑐥𑑂𑐬𑐟𑐶𑐨𑐵𑐫𑐵 𑐳𑐣𑑂𑐟𑐸𑐮𑐣 𑐡𑐂, 𑐳𑐏𑐾 𑐠𑑂𑐰 𑐳𑐵𑐴𑐶𑐟𑑂𑐫𑐫𑑂 𑐧𑐸𑐡𑑂𑐢𑐶 𑐳𑑂𑐰𑐫𑐵𑑄 𑐣𑑄 𑐥𑑂𑐬𑐟𑐶𑐨𑐵𑐫𑐵 𑐰𑐶𑐱𑐾𑐲 𑐠𑐵𑐫𑑂 𑐡𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐥𑑂𑐫𑐵𑐏𑑄, 𑐩𑑂𑐫𑐾, 𑐎𑐰𑐶𑐟𑐵 𑐠𑐖𑐵𑑅𑐐𑐸 𑐳𑐶𑐬𑑂𑐖𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫𑐫𑐵 𑐔𑑂𑐰𑐩𑐶𑐥𑐶𑑄𑐳𑑄 𑐧𑑁𑐡𑑂𑐢𑐶𑐎 𑐰𑐬𑑂𑐐 𑐩𑑂𑐴𑑀 𑐖𑐹𑐐𑐸 𑐳𑐩𑐵𑐖𑐫𑑂 𑐀𑐠𑐰𑐵 𑐫𑐸𑐐𑐫𑑂 𑐣𑑄 𑐠𑑅𑐐𑐸 𑐥𑑂𑐬𑐟𑐶𑐨𑐵𑐫𑐵 𑐥𑑂𑐬𑐨𑐵𑐰 𑐮𑐵𑐎𑐾 𑐦𑐸, 𑐦𑐫𑐵𑐔𑑂𑐰𑑄𑐐𑐸 𑐣𑑄 𑐡𑐸 𑑋 𑐀𑐠𑐾 𑐴𑐾 𑐀𑐱𑐶𑐎𑑂𑐲𑐶𑐟 𑐩𑐣𑐹𑐟𑐫𑑂𑐳𑑄 𑐣𑑄 𑐎𑐰𑐶𑐟𑐵, 𑐩𑑂𑐫𑐾, 𑐥𑑂𑐫𑐵𑐏𑑄𑐥𑐵𑐏𑐾𑑄 𑐁𑐣𑐣𑑂𑐡 𑐎𑐵𑐫𑐾 𑐦𑐸 𑑋 𑐟𑐬 𑐁𑐮𑑀𑐔𑐣𑐵𑐫𑐵 𑐎𑑂𑐲𑐾𑐟𑑂𑐬 𑐠𑐸𑐮𑐶 𑐟𑐧𑑂𑐫𑐵 𑐩𑐖𑐹 𑑋 𑐳𑐩𑐵𑐖𑐫𑐵 𑐧𑑁𑐡𑑂𑐢𑐶𑐎 𑐰𑐬𑑂𑐐𑐫𑑂 𑐖𑐎 𑐠𑑂𑐰 𑐳𑐷𑐩𑐶𑐟 𑐖𑐹 𑑋 𑐳𑐩𑐵𑐖𑐫𑐵 𑐳𑐷𑐩𑐶𑐟 𑐧𑑁𑐡𑑂𑐢𑐶𑐎 𑐰𑐬𑑂𑐐𑐫𑐵 𑐣𑐶𑐩𑑂𑐟𑐶𑑄 𑐰 𑐳𑑂𑐰𑐫𑐵𑑄 𑐣𑑄 𑐗𑑄 𑐳𑐷𑐩𑐶𑐟 𑐮𑑂𑐫𑐵𑐏𑐫𑑂 𑐧𑑁𑐡𑑂𑐢𑐶𑐎 𑐰𑑂𑐫𑐎𑑂𑐟𑐶𑐟𑐫𑑂𑐳𑑄 𑐫𑐵𑑅𑐐𑐸 𑐳𑐩𑐵𑐖 𑐰 𑐳𑐵𑐴𑐶𑐟𑑂𑐫𑐫𑐵 𑐔𑐬𑑂𑐔𑐵 𑐁𑐮𑑀𑐔𑐣 𑐏𑑅 𑑋 𑐧𑑁𑐡𑑂𑐢𑐶𑐎 𑐰𑐬𑑂𑐐 𑐥𑑂𑐬𑐱𑐳𑑂𑐟 𑐰 𑐳𑐎𑑂𑐬𑐶𑐫 𑐩𑐖𑐹𑐐𑐸 𑐳𑐩𑐵𑐖𑐫𑑂 𑐣 𑐳𑐵𑐩𑐵𑐖𑐶𑐎, 𑐣 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐴𑐾 𑐰𑐶𑐎𑐵𑐳 𑐖𑐸𑐂 𑑋 (𑐏𑐣𑐵𑐮, 𑐰𑐶.𑐳𑑄. 𑑒𑑐𑑓𑑔𑑅𑑓𑑐)

𑐠𑐠𑐾 𑐠𑐷𑐠𑐷 𑐂𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐣𑐵𑐫𑐵 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐎𑑂𑐬𑐩 𑐣𑑂𑐴𑑂𑐫𑐠𑐣𑐵𑐡𑐷𑐥𑐶𑑄 𑐠𑐷𑐠𑐷 𑐁𑐮𑑀𑐔𑐎𑐥𑐶𑑄𑐳𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄𑐢𑐮𑑅 𑐳𑑂𑐰𑐫𑐾𑐧𑐮𑐫𑑂 𑐃 𑐣𑑂𑐴𑑂𑐫𑐵𑐣𑐵𑑅𑐰𑑅𑐮𑐶𑐳𑐾 𑐁𑐮𑑀𑐔𑐎𑐥𑐶𑐣𑐶𑐐𑐸 𑐮𑑂𑐫𑐵𑑅 𑐣𑑄 𑐀𑐥𑑂𑐰𑐫𑐵𑐰𑑅𑐐𑐸𑐮𑐶𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳 𑐖𑐸 𑐴𑐾 𑐩𑐖𑐹𑐐𑐸 𑐳𑑂𑐠𑐶𑐟𑐶 𑐩𑐡𑐸 𑐢𑐿𑐐𑐸 𑐏“ 𑐧𑐵𑑄𑐮𑐵𑐎 𑐳𑐶𑐂𑐡𑐸 𑑋 𑐰𑐫𑑂𑐎𑑅𑐥𑐶𑑄𑐳𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐫𑑂 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵, 𑐰𑐶𑐎𑐵𑐳𑐫𑐵 𑐳𑐩𑑂𑐨𑐵𑐰𑐣𑐵𑐫𑐵 𑐮𑐶𑐳𑐾𑑄 𑐰𑐶𑐎𑐵𑐳𑐎𑑂𑐬𑐩 𑐣𑑄 𑐏𑑄𑐎𑐵𑐡𑐷𑐐𑐸 𑐡𑐸 𑑋 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑑄 𑐮𑐵 𑐠𑐣 𑐟𑐎 𑐣𑑄 𑐢𑐫𑐵𑐡𑐷𑐐𑐸 𑐡𑐸 —

𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐎𑑂𑐲𑐾𑐟𑑂𑐬𑐫𑑂 𑐳𑐵𑐴𑐶𑐟𑑂𑐫 𑐠𑐷𑐠𑐷 𑐰𑐵𑐡, 𑐥𑑂𑐬𑐰𑐺𑐟𑑂𑐟𑐶, 𑐚𑑂𑐬𑐾𑐣𑑂𑐜, 𑐩𑐸𑐨𑐩𑐾𑐣𑑂𑐚 𑐰𑐫𑐾–𑐰𑐣𑐷𑐐𑐸 𑐠𑑂𑐰 𑐥𑑂𑐬𑐎𑐺𑐫𑐵 𑐖𑐸𑐫𑐵𑐣𑑂𑐟𑐸𑑄 𑐔𑑂𑐰𑑄𑐐𑐸 𑐡𑐸 𑑋 𑐐𑐸𑐐𑐸 𑐂𑐮𑐫𑑂 𑐳𑐣𑑂 𑑑𑑙𑑕𑑐 𑐥𑐵𑐏𑐾 𑐥𑑂𑐬𑐐𑐟𑐶𑐰𑐵𑐡 𑐢𑐿𑐐𑐸 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐳𑐵𑐴𑐶𑐟𑑂𑐫𑐶𑐎 𑐩𑐸𑐨𑐩𑐾𑐣𑑂𑐚, 𑐰𑐫𑐵 𑐣𑑂𑐴𑑂𑐫𑑀 𑐰 𑐖𑑅𑐏𑑅 𑐩𑐣𑑀𑐰𑐶𑐖𑑂𑐘𑐵𑐣, 𑐩𑐣𑑀𑐰𑐶𑐱𑑂𑐮𑐾𑐲𑐞𑐰𑐵𑐡 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞, 𑐀𑐣𑑄 𑐳𑐣𑑂 𑑑𑑙𑑕𑑐 𑐠𑐸𑐏𑐾 𑐰𑐫𑐵𑑅 𑐀𑐳𑑂𑐟𑐶𑐟𑑂𑐰𑐰𑐵𑐡 𑐟𑐳𑐎𑑄 𑐥𑑂𑐬𑐔𑐮𑐣𑐫𑑂 𑐰𑐮 𑑋 𑐁𑑅 𑐠𑑁𑑄𑐎𑐣𑑂𑐴𑐫𑑂 𑐥𑑀𑐲𑑂𑐚–𑐩𑑀𑐜𑐣𑐶𑐖𑑂𑐩, 𑐥𑑀𑐲𑑂𑐚–𑐳𑑂𑐚𑑂𑐬𑐎𑑂𑐔𑐮𑐶𑐖𑑂𑐩 𑐢𑐎𑐵𑑅 𑐰𑐶𑐨𑐶𑐣𑑂𑐣 𑐎𑐶𑐳𑐶𑐩𑐫𑐵𑐐𑐸 𑐩𑐸𑐨𑐩𑐾𑐣𑑂𑐚, 𑐚𑑂𑐬𑐾𑐣𑑂𑐜𑐟 𑐰𑐿𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐚𑑂𑐬𑐾𑐣𑑂𑐜 𑐗𑐷𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐣𑑄 𑐡𑐸𑐴𑐵𑑄𑐰𑑅𑐐𑐸 𑐡𑐸 𑑋 … 𑐖𑐶𑑄 𑐐𑐣 𑐟𑐎 𑐏𑐣𑐵 𑐣𑐾𑐥𑐵𑐮𑐨𑐵𑐲𑐵𑐫𑑂 𑐠𑑂𑐰 𑐄𑐥𑐩𑐴𑐵𑐡𑑂𑐰𑐷𑐥𑐫𑑂 𑐰𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐰𑐵𑐡 𑐚𑑂𑐬𑐾𑐣𑑂𑐜 𑐥𑑂𑐬𑐎𑐺𑐟𑐶𑑄 𑐀𑐎𑑂𑐲𑐸𑐞𑑂𑐞 𑐣𑑄 𑐩𑐏𑐸 𑐄𑐎𑐶𑑄 𑐥𑑂𑐬𑐨𑐵𑐰𑐶𑐟 𑐖𑐹𑐐𑐸 𑐡𑐸 𑑋 𑐗𑐷 𑐥𑐹𑐬𑑂𑐞 𑐧𑐴𑐵𑐡𑐸𑐬 𑐰𑐿𑐡𑑂𑐫𑐖𑐸𑐫𑐵 𑐎𑐰𑐶𑐟𑐵 𑐧𑑂𑐰𑐣 𑐢𑐵𑑅𑐳𑐵 𑐳𑑂𑐥𑐲𑑂𑐚 𑐖𑐸𑐂 𑑋 𑐗𑐷𑐐𑐸 𑐎𑐰𑐶𑐟𑐵 𑐣𑑄 𑐰𑐵𑐳𑑂𑐟𑐰𑐫𑑂 𑐠𑑂𑐰 𑐄𑐥𑐩𑐴𑐵𑐡𑑂𑐰𑐷𑐥𑐫𑐵 𑐕𑐸𑑄 𑐴𑐾 𑐨𑐵𑐫𑑂𑐫𑐵𑐐𑐸 𑐎𑐰𑐶𑐟𑐵 𑐳𑑂𑐰𑐫𑐵𑑄 𑐩𑑂𑐴𑑀 𑐩𑐖𑐹 𑑋 (𑐩𑐮𑑂𑐮, 𑑑𑑑𑑑𑑖𑑅𑑓𑑙)

𑐟𑐬 𑐠𑑁𑑄 𑐣𑑄 𑐳𑑂𑐰𑐡𑑃 𑐣𑑂𑐴𑐫𑑀 𑐣𑐾.𑐳𑑄. 𑑑𑑑𑑓𑑘𑐳 𑐥𑐶𑐡𑑄𑐐𑐸 𑐥𑑂𑐬𑐵.𑐣𑐬𑑂𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣𑐖𑐸𑐫𑐵𑐐𑐸 𑐥𑐵𑐱𑑂𑐔𑐵𑐟𑑂𑐫–𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟 𑐳𑐦𑐹𑐫𑐵 𑐨𑐹𑐩𑐶𑐎𑐵𑐫𑑂 𑐊𑐎𑐾𑐡𑐾𑐩𑐷𑐫𑐵 𑐳𑐡𑐳𑑂𑐫–𑐳𑐔𑐶𑐰 𑐰 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐎 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑐖𑐸𑑄 𑐠𑐠𑐾 𑐢𑐫𑐵𑐡𑐶𑐮 –

𑐣𑐾𑐥𑐵𑐮𑐨𑐵𑐲𑐵 𑐰𑐵𑐒𑑂𑐩𑐫𑐫𑐵 𑐰𑐬𑑂𑐟𑐩𑐵𑐣 𑐂𑐮𑐫𑑂 𑐡𑐎𑐮𑐾 𑐢𑐶𑐳𑐶𑐩𑐮𑐵𑑅𑐐𑐸 𑐰𑐶𑐢𑐵 𑐢𑐿𑐐𑐸 𑐴𑐾 𑐳𑐩𑐵𑐮𑑀𑐔𑐣𑐵 𑐏𑑅 𑑋 𑐄𑐎𑐶𑐳𑐣𑑄 𑐥𑐵𑐱𑑂𑐔𑐵𑐟𑑂𑐫 𑐖𑐐𑐟𑐫𑑂 𑐧𑐾𑐟𑑀𑐬𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐣𑑅𑐮𑐶 𑐳𑐵𑐴𑐶𑐟𑑂𑐫𑐶𑐎 𑐢𑐵𑐬𑐫𑐵 𑐀𑐢𑑂𑐫𑐫𑐟𑐵 𑐀𑐮𑐾 𑐄𑐎𑐶𑐫𑐵 𑐖𑑂𑐘𑐵𑐣 𑐗𑐷𑐐𑐸 𑐏𑑂𑐫𑐮𑐫𑑂 𑐂𑐣𑐵𑐧𑐷𑐐𑐸 𑐄𑐡𑐵𑐟𑑂𑐟 𑐨𑐹𑐩𑐶𑐎𑐵𑐫𑑂 𑐄𑐥𑐳𑑂𑐠𑐶𑐟𑐶 𑐱𑐹𑐣𑑂𑐫 𑐥𑑂𑐬𑐵𑐫𑑅 𑑋 (𑐩𑐮𑑂𑐮, 𑑑𑑑𑑓𑑘𑑅𑐨𑐹𑐩𑐶𑐎𑐵)

𑐥𑑂𑐬𑐾𑐩𑐱𑐵𑐣𑑂𑐟𑐶𑐖𑐸𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄𑐢𑐮𑑅 𑐳𑑂𑐰𑐫𑐾𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐎𑐥𑐶𑑄 𑐠𑑁𑑄 𑐠𑑂𑐫𑑄𑐩𑐠𑑂𑐫𑑄 𑐳𑐔𑑂𑐕𑐶𑐩𑑂𑐴 (𑑑𑑐𑑐) 𑐠𑑂𑐫𑑄𑐐𑐸 𑐡𑐸 𑑋 𑐠𑑂𑐰 𑐮𑑂𑐫𑐵𑐏𑑄 𑐕𑐩𑑂𑐴𑐕𑐩𑑂𑐴𑐳𑐶𑐣𑑄 𑐕𑐥𑐸𑐕𑐥𑐸 𑐖𑐎 𑐁𑐮𑑀𑐔𑐣𑐵 𑐔𑑂𑐰𑑅𑐐𑐸 𑐖𑐹𑐳𑐵𑑄 𑐳𑐔𑑂𑐕𑐶𑐥𑐸 𑐁𑐮𑑀𑐔𑐣𑐵 𑐡𑐫𑐾𑐢𑐸𑑄𑐎𑐮, 𑐣𑐶𑐥𑐸𑐣𑐶𑐥𑐸 𑐁𑐮𑑀𑐔𑐣𑐵 𑐔𑑂𑐰𑑅𑐐𑐸 𑐖𑐹𑐳𑐵𑑄 𑐣𑐶𑐳𑑅𑐥𑐸 𑐁𑐮𑑀𑐔𑐣𑐵 𑐏𑐵𑐫𑐾𑐢𑐸𑑄𑐎𑐮 𑑋 𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐧𑐵𑑄𑐮𑐵𑐫𑐾 𑐩𑐵𑑅𑐐𑐸 𑐏𑑅 𑑋 𑐟𑐬 𑐫𑐠𑐵𑐬𑑂𑐠𑐫𑑂 𑐠𑐠𑐾 𑐩𑐖𑐸𑐮 𑑋 𑐢𑐵𑐟𑑂𑐠𑐾𑑄𑐫𑐵𑐐𑐸 𑐁𑐮𑑀𑐔𑐣𑐵 𑐢𑐵𑐫𑐾𑐧𑐴𑐐𑐸 𑐰 𑐢𑐵𑐟𑑂𑐠𑐾𑑄 𑐁𑐮𑑀𑐔𑐎 𑐢𑐵𑐫𑐾 𑐧𑐴𑐥𑐶𑑄 𑐐𑑂𑐰𑑅𑐩𑑂𑐴 𑐡𑐸, 𑐠𑑂𑐰 𑐣𑑄 𑐀𑐢𑑂𑐫𑐫𑐣 𑐫𑐵𑐫𑐾 𑐴𑐾 𑐮𑑂𑐫𑑄𑐡𑐣𑐶 𑑋 𑐮𑑃𑐫𑑂 𑐢𑑂𑐰𑑅𑐡𑐸𑐥𑐶𑑄 𑐳𑐎𑐳𑐶𑐟𑑄 𑐁𑐮𑑀𑐔𑐎 𑐢𑐵𑐫𑐾𑐐𑐸 𑐴𑐔𑐸𑐰𑐵 𑐥𑑂𑐬𑐰𑐺𑐟𑑂𑐟𑐶𑐖𑐎 𑐖𑐸𑐂 𑑋 𑐣𑑂𑐴𑑂𑐫𑐵𑐠𑐾𑑄 𑐔𑑂𑐰𑐫𑐵𑐟𑑅𑐐𑐸 𑐎𑐰𑐶𑐟𑐵 𑐖𑐸𑐂𑐩𑐏𑐸𑐠𑐾𑑄 𑐣𑑂𑐴𑑂𑐫𑐵𑐠𑐾𑑄 𑐔𑑂𑐰𑐫𑐵𑐟𑑅𑐐𑐸 𑐁𑐮𑑀𑐔𑐣𑐵 𑐣𑑄 𑐖𑐸𑐂𑐩𑐏𑐸 𑑋 𑐎𑐰𑐶𑐟𑐵, 𑐄𑐥𑐣𑑂𑐫𑐵𑐳, 𑐧𑐵𑐏𑑄, 𑐣𑐶𑐧𑐣𑑂𑐢𑐫𑐵 𑐩𑐵𑐥𑐡𑐞𑑂𑐜 𑐡𑐸 𑐠𑐾𑑄 𑐁𑐮𑑀𑐔𑐣𑐵𑐫𑐵 𑐣𑑄 𑐩𑐵𑐥𑐡𑐞𑑂𑐜 𑐡𑐸 𑑋 𑐎𑐾𑐰𑐮 𑐰𑐶𑐰𑐬𑐞𑑄 𑐟𑐠𑑂𑐫𑐵𑑄𑐎 𑐂𑐟𑐶𑐴𑐵𑐳𑐫𑐵𑐟 𑐁𑐮𑑀𑐔𑐣𑐵 𑐢𑐵𑐫𑐾𑐦𑐂𑐩𑐏𑐸 𑑋 𑐁𑐮𑑀𑐔𑐣𑐵 𑐟𑐠𑑂𑐫𑐵𑑄𑐎 𑐥𑐸𑐔𑑅 𑐩𑐏𑐸, 𑐁𑐮𑑀𑐔𑐣𑐵, 𑐰𑑂𑐫𑐵𑐏𑑂𑐫𑐵, 𑐰𑐶𑐰𑐾𑐔𑐣𑐵 𑐰 𑐟𑐸𑐮𑐣𑐵𑐫𑐵 𑐮𑐶𑐢𑑄𑐳𑐵𑐫𑑂 𑐖𑐸𑐂𑐐𑐸 𑐩𑐹𑐮𑑂𑐫𑐵𑑄𑐎𑐣 𑐏𑑅 𑑋 (𑐩𑐮𑑂𑐮, 𑑑𑑐𑑘𑑗𑑅𑑑𑑐𑑑) 𑐄𑐎𑐶𑑄 𑐳𑐸𑑄 𑐁𑐮𑑀𑐔𑐎𑐫𑐵 𑐣𑑄 𑐩𑐵𑐥𑐡𑐞𑑂𑐜 𑐡𑐸 𑑋 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑑄 𑐢𑐫𑐵𑐡𑐷𑐐𑐸 𑐥𑑂𑐬𑐳𑑄𑐐 𑐠𑐣 𑐣𑑂𑐴𑑂𑐫𑐧𑑂𑐰𑐫𑐾𑐕𑐶𑑄 —

“𑐏𑐵𑐳 𑐫𑐵𑐣𑐵𑑅 𑐩𑐴𑐵𑐎𑐰𑐶 𑐔𑐶𑐟𑑂𑐟𑐢𑐬 ‘𑐴𑑂𑐡𑐫’𑐫𑐵𑐐𑐸 𑐥𑑂𑐬𑐨𑐵𑐰 𑐰 𑐀𑐣𑑄 𑐮𑐶𑐥𑐵 𑐳𑐣𑑂 𑑑𑑙𑑕𑑙 𑐣𑐶𑐳𑐾𑑄 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅𑐖𑐸 𑐣𑐵𑐥 𑐖𑐶𑑄 𑐰𑑂𑐫𑐎𑑂𑐟𑐶𑐐𑐟 𑐬𑐸𑐥𑑄 𑐩𑑂𑐴𑐳𑑂𑐫𑐹𑐐𑐸 𑐏𑑅 𑑋 𑐰𑐫𑐵 𑐣𑑂𑐴𑑂𑐫𑑀 𑐰𑑂𑐫𑐎𑑂𑐟𑐶𑐐𑐟 𑐥𑐬𑐶𑐔𑐫 𑐩𑐡𑐸𑐳𑐵𑑄 𑐰𑐫𑑂𑐎𑑅𑐥𑐶𑐣𑐶𑐐𑐸 𑐎𑐺𑐟𑐶𑐥𑐵𑐏𑐾𑑄 𑐥𑐬𑐶𑐔𑐶𑐟 𑐖𑐸𑐫𑐵𑑅 𑐄𑐎𑐶𑐫𑐵 𑐥𑑂𑐬𑐨𑐵𑐰𑑄 𑐴𑐾 𑐖𑐶𑑄 𑐐𑐸𑐮𑐶 𑐣𑑄 𑐔𑑂𑐰𑐫𑐵 𑐰 𑐳𑐩𑐵𑐮𑑀𑐔𑐣𑐵 𑐏𑑅 𑐢𑐎𑐵 𑐖𑐶𑑄 𑐡𑐵𑐰𑐷 𑐫𑐵𑐣𑐵𑐐𑐸 𑐩𑐡𑐸 𑑋 … 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵 𑐖𑐶𑑄 𑐰𑐵𑐳𑑂𑐟𑐰𑐫𑑂 𑐣𑐷𑐫𑐵𑐣𑐵𑑅 𑐮𑑂𑐴𑐵𑑅𑐟𑐫𑐵𑐐𑐸 𑐩𑐡𑐸𑐣𑐶 𑐠𑐾𑑄 𑐔𑑂𑐰𑑄 𑑋” (𑐩𑐮𑑂𑐮, 𑑑𑑑𑑑𑑖𑑅𑑓𑑗)

𑐔𑑂𑐰𑐫𑑂 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐁𑐮𑑀𑐔𑐎𑐥𑐶𑐣𑐶𑐐𑐸 𑐰𑐶𑐔𑐵𑐬 𑐀𑐢𑑂𑐫𑐫𑐣 𑐫𑐵𑐫𑐾𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐎𑐥𑐶𑐣𑐶𑐐𑐸 𑐣𑐵𑑄𑐢𑐮𑐏𑐫𑑂 𑐁𑑅𑐟𑐎 𑐣𑑄 𑐊𑐎𑐬𑐸𑐥𑐟𑐵 𑐩𑐰𑑅𑐣𑐶𑐐𑐸, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑑄𑐩𑑂𑐴 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐎𑐫𑐵 𑐏𑑃𑐫𑑂 𑐩𑐟𑐨𑐾𑐡 𑐡𑐣𑐶𑐐𑐸, 𑐠𑑁𑑄𑐟𑐎𑐫𑐵 𑐡𑐸𑐣𑐾 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐵𑐴𑐶𑐟𑑂𑐫𑐫𑑂 𑐐𑑂𑐰𑑅𑐩𑑂𑐴 𑐁𑐮𑑀𑐔𑐎 𑐡𑐸 𑐢𑐿𑐐𑐸 𑐏“𑐫𑑂 𑐣𑐶𑐱𑑂𑐔𑐶𑐟 𑐩𑐖𑐹𑐣𑐶𑐐𑐸, 𑐁𑐮𑑀𑐔𑐎𑐥𑐶𑐣𑐶𑐐𑐸 𑐁𑐮𑑀𑐔𑐣𑐵𑐫𑐵 𑐢𑐵𑐬𑐵𑐫𑐵 𑐧𑐵𑐬𑐾 𑐀𑐢𑑂𑐫𑐫𑐣 𑐩𑐖𑐹𑐣𑐶𑐐𑐸, 𑐰𑐶𑐱𑑂𑐰𑐫𑑂 𑐏𑐣𑐾𑐡𑐸𑐐𑐸 𑐰𑐶𑐨𑐶𑐣𑑂𑐣 𑐰𑐵𑐡𑐫𑐵 𑐡𑐺𑐲𑑂𑐚𑐶𑑄 𑐀𑐢𑑂𑐫𑐫𑐣 𑐩𑐖𑐹𑐣𑐶𑐐𑐸, 𑐀𑐩𑐸𑐎 𑐳𑐵𑐴𑐶𑐟𑑂𑐫 𑐥𑑂𑐬𑐐𑐟𑐶𑐰𑐵𑐡𑐷 𑐰𑐵 𑐥𑑂𑐬𑐐𑐟𑐶𑐱𑐷𑐮 𑐖𑐹 𑐢𑐵𑐫𑐾𑐐𑐸 𑐧𑐵𑐴𑐾𑐎 𑐩𑐾𑐩𑐾𑐐𑐸 𑐰𑐵𑐡𑐫𑐵 𑐡𑐺𑐲𑑂𑐚𑐶𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐩𑐖𑐹𑐣𑐶𑐐𑐸, 𑐰𑐶𑐱𑑂𑐰𑐫𑑂 𑐰𑑅𑐐𑐸 𑐁𑐮𑑀𑐔𑐣𑐵𑐫𑐵 𑐠𑐷𑐠𑐷 𑐥𑑂𑐬𑐎𑐵𑐬𑐫𑐵 𑐡𑐺𑐲𑑂𑐚𑐶𑑄 𑐀𑐢𑑂𑐫𑐫𑐣 𑐩𑐖𑐹𑐣𑐶𑐐𑐸, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐋𑐟𑐶𑐴𑐵𑐳𑐶𑐎 𑐰𑐶𑐎𑐵𑐳𑐎𑑂𑐬𑐩𑐫𑐵 𑐂𑐟𑐶𑐴𑐵𑐳 𑐁𑑅𑐟𑐎𑑄 𑐟𑐫𑐵𑐬 𑐩𑐖𑐹𑐣𑐶𑐐𑐸, 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑑂 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐎𑐩𑐷𑐎𑐩𑐖𑑀𑐬𑐷 𑐏𑑅 𑑋

𑐮𑐶𑐏𑑃

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐂𑐟𑐶𑐴𑐵𑐳 𑐠𑑁𑑄 𑐣𑑄 𑑗𑑒 𑐡𑑃 𑐡𑐫𑐾𑐢𑐸𑑄𑐎𑐵𑑅 𑐣𑑄 𑐠𑐸𑐎𑐶𑐫𑐵 𑐰𑐶𑐎𑐵𑐳 𑐧𑐵𑑄𑐮𑐵𑐎 𑐖𑐸𑐂𑐩𑐦𑐸𑐐𑐸 𑐏𑑃 𑐳𑐎𑐳𑐶𑐣𑑄 𑐳𑑂𑐰𑐷𑐎𑐵𑐬 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋
𑑒𑑐𑑗𑑒 𑐳𑐵𑐮𑐫𑐵𑐐𑐸 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐎𑐠𑑄 𑐣𑐾𑐥𑐵𑑅𑐫𑐵 𑐦𑐸𑐎𑑂𑐎 𑐨𑐵𑐲𑐵𑐟 𑐬𑐵𑐲𑑂𑐚𑑂𑐬𑐨𑐵𑐲𑐵 𑐢𑐎𑐵 𑐳𑑄𑐰𑑀𑐢𑐣 𑐖𑐸𑐫𑐵𑐔𑑂𑐰𑑄𑐳𑐵𑑄 𑐬𑐵𑐖𑑂𑐫 𑐢𑐵𑑅𑐳𑐵 𑐏𑐳–𑐣𑐾𑐥𑐵𑐮𑐷 𑐨𑐵𑐲𑐵𑐫𑐵𑐟 𑐖𑐎 𑐬𑐵𑐖𑑂𑐫𑐨𑐵𑐲𑐵 𑐣𑐵𑐮𑐵 𑐠𑑂𑐰 𑐕𑐐𑐹 𑐨𑐵𑐲𑐵𑐫𑐵 𑐮𑐵𑐐𑐶 𑐬𑐵𑐖𑑂𑐫𑑄 𑐩𑐵𑐎𑑂𑐎𑑀 𑐁𑐬𑑂𑐠𑐶𑐎 𑐨𑐵𑐬 𑐦𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐴𑐾 𑐏𑐳–𑐣𑐾𑐥𑐵𑐮𑐷𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵𑐫𑐵 𑐟𑐷𑐰𑑂𑐬 𑐰𑐶𑐎𑐵𑐳 𑐖𑐹𑐐𑐸 𑐏𑑅 𑑋 𑐠𑐸𑐎𑐶𑑄 𑐕𑐸 𑐥𑐸𑐲𑑂𑐚𑐶 𑐖𑐹 𑐢𑐵𑑅𑐳𑐵 𑐡𑐾𑐱𑐫𑐵 𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳𑐫𑑂 𑐬𑐵𑐖𑑂𑐫𑐫𑐵 𑐟𑑅𑐢𑑄𑐐𑐸 𑐮𑑂𑐴𑐵𑑅 𑐡𑐸 𑑋 𑐬𑐵𑐖𑑂𑐫 𑐴𑐾 𑐳𑐎𑐟𑐵𑑄 𑐏𑑅 𑑋 𑐩𑐮𑑂𑐮𑐎𑐵𑐮𑐫𑑂 𑐡𑐾𑐱𑐨𑐵𑐲𑐵, 𑐬𑐵𑐲𑑂𑐚𑑂𑐬𑐨𑐵𑐲𑐵 𑐖𑐸𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐠𑑁𑑄 𑐐𑐟𑐶𑐥𑐟𑐶 𑐩𑐡𑐫𑐵𑑅 𑐠𑐸𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐐𑐸𑐫𑐵 𑐎𑐵𑐬𑐞 𑐣𑑄 𑐬𑐵𑐖𑑂𑐫𑐫𑐵 𑐴𑐾 𑐳𑐰𑐵𑐮𑐫𑐵 𑐏𑑃 𑐏𑑅 𑑋

𑐣𑐾𑐥𑐵𑐮𑐫𑑂 𑐠𑑁𑑄 𑐳𑑄𑐑𑐷𑐫 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐐𑐞𑐟𑐣𑑂𑐟𑑂𑐬𑐫𑐵 𑐰𑑂𑐫𑐰𑐳𑑂𑐠𑐵𑐫𑐵 𑐂𑐮𑐫𑑂 𑐟𑐎𑑄 𑐬𑐵𑐖𑑂𑐫𑑄 𑐣𑐾𑐥𑐵𑑅𑐫𑐵 𑐦𑐸𑐎𑑂𑐎𑑄 𑐨𑐵𑐲𑐵𑐟𑐫𑑂𑐟 𑐳𑑄𑐰𑐶𑐢𑐵𑐣𑐫𑑂 𑐖𑐎 𑐬𑐵𑐲𑑂𑐚𑑂𑐬𑐨𑐵𑐲𑐵 𑐢𑐫𑐵𑑅 𑐰𑑂𑐫𑐰𑐴𑐵𑐬𑐫𑑂 𑐏𑐳–𑐣𑐾𑐥𑐵𑐮𑐷 𑐨𑐵𑐲𑐵 𑐳𑐬𑐴 𑐐𑐣 𑐴𑐾 𑐳𑐩𑐵𑐣 𑐀𑐢𑐶𑐎𑐵𑐬 𑐩𑐧𑑂𑐫𑐹𑐳𑐾 𑐧𑐾𑐰𑐵𑐳𑑂𑐟𑐵 𑐫𑐵𑐣𑐵𑐟𑑅𑐐𑐸 𑐴𑐾 𑐡𑐸 𑑋 𑐬𑐵𑐖𑑂𑐫𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐣𑑄 𑐣𑐾𑐥𑐵𑐮𑐷𑐫𑐵𑐟 𑐠𑐾𑑄 𑐴𑐾 𑐩𑐵𑑅𑐎𑐠𑑄 𑐥𑑂𑐬𑐾𑐬𑐶𑐟 𑐫𑐵𑐣𑐵𑑅 𑐄𑐎𑐠𑑄 𑐴𑐾 𑐰𑐵𑐟𑐵𑐰𑐬𑐞 𑐡𑐫𑐾𑐎𑐵𑐧𑐶𑐮 𑐢𑐵𑑅𑐳𑐵 𑐔𑑂𑐰𑐫𑑂 𑐣𑑂𑐴𑑂𑐫𑐧𑑂𑐰𑐫𑐵𑐐𑐸 𑐳𑐩𑐳𑑂𑐫𑐵𑐫𑐵 𑐳𑐩𑐵𑐢𑐵𑐣𑐫𑐵 𑐮𑐶𑐳𑑂𑐳𑐾𑑄 𑐣𑐾𑐰𑐵𑑅𑐟𑐫𑑂𑐎𑐾 𑐣𑐾𑐰𑐵𑑅 𑐨𑐵𑐰𑐣𑐵𑐫𑐵 𑐖𑐵𑐐𑐬𑐞 𑐰 𑐣𑐾𑐥𑐵𑐮𑐫𑑂 𑐖𑐵𑐟𑐷𑐫 𑐊𑐎𑐟𑐵 𑐎𑐵𑐫𑐩 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐟𑑅𑐢𑑄𑐐𑐸 𑐟𑐶𑐧𑑅 𑐐𑑂𑐰𑐴𑐵𑐮𑐶 𑐖𑐸𑐫𑐵𑑅 𑐬𑐵𑐲𑑂𑐚𑑂𑐬𑐶𑐫 𑐊𑐎𑐟𑐵 𑐟𑐎𑑄 𑐧𑐮𑑂𑐮𑐵𑐂𑐐𑐸 𑐏𑑅 𑑋 𑐄𑐎𑐶𑑄 𑐢𑐵𑐫𑐾𑐦𑐸, 𑐬𑐵𑐖𑑂𑐫𑐫𑐵 𑐐𑐮𑐟 𑐣𑐷𑐟𑐶𑐫𑐵 𑐎𑐵𑐬𑐞𑑄 𑐣𑐾𑐥𑐵𑐮𑐫𑑂 𑐟𑐩𑐵𑐩 𑐳𑐩𑐳𑑂𑐫𑐵𑐫𑐵 𑐮𑐶𑐳𑑂𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐠𑐸𑐎𑐶𑐫𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐫𑑂 𑐣𑑄 𑐧𑐵𑐢𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐡𑐾𑐱𑐫𑑂 𑐬𑐵𑐖𑑂𑐫𑐫𑐵 𑐨𑐶𑑄𑐐𑐸 𑐣𑐷𑐟𑐶 𑐰 𑐄𑐎𑐠𑑄 𑐖𑑂𑐫𑐵 𑐖𑐸𑐂𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋

𑐠𑑅𑐐𑐸 𑐳𑐦𑐹 𑐀𑐠𑐰𑐵 𑐎𑐺𑐟𑐶𑐫𑐵 𑐧𑐵𑐬𑐾 𑐳𑐩𑐵𑐮𑑀𑐔𑐣𑐵 𑐔𑑂𑐰𑐫𑐵𑐩𑐧𑑂𑐫𑐹 𑐢𑐿𑐐𑐸 𑐔𑑂𑐰𑐩𑐶𑐥𑐶𑐣𑐶𑐐𑐸 𑐀𑐥𑑂𑐰𑑅𑐳𑐶𑐐𑐸 𑐡𑐸𑑅𑐏𑐩𑐣 𑐡𑐸 𑑋 𑐠𑐸𑐎𑐶𑐫𑐵 𑐥𑑂𑐬𑐟𑐶𑐣𑐶𑐢𑐶 𑐥𑑂𑐬𑐳𑐒𑑂𑐐𑐎𑐠𑑄 𑐡𑐔𑑂𑐕𑐶𑐣𑑂𑐴𑑂𑐫𑑀 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐥𑑂𑐬𑐎𑐵𑐱𑐣𑐫𑑂 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐖𑐸𑐫𑐵𑐐𑐸 𑐧𑐵𑐏𑑄 𑐳𑐦𑐹 𑐰 𑐠𑑂𑐰 𑐔𑑂𑐰𑐩𑐶𑐫𑐵𑐐𑐸 𑐮𑑂𑐴𑐵𑑅𑐔𑐶𑑄 𑐳𑐩𑐵𑐮𑑀𑐔𑐣𑐵–𑐳𑐦𑐹𑐫𑐵 𑐰𑐶𑐩𑑀𑐔𑐣 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐖𑐸𑐫𑐵𑐐𑐸 𑐮𑑂𑐴𑐵𑐟𑑄 𑐫𑐮𑐫𑑂 𑐰𑐫𑑂𑐎𑑅𑐫𑐵𑐐𑐸 𑐴𑐾 𑐕𑐾𑑃𑐫𑑂 𑐰𑐶𑐩𑑀𑐔𑐣 𑐖𑐹𑐐𑐸 𑐡𑐶𑑄𑐏𑐸𑐣𑑂𑐴𑐸 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐖𑐸𑑄 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐧𑐮𑐫𑑂 𑐢𑐫𑐵𑐡𑐷𑐐𑐸 𑐏𑑃 𑐠𑐣 𑐣𑑂𑐴𑑂𑐫𑐠𑐣𑐾 𑐧𑐴𑑅𑐖𑐹 𑑋 𑐰𑐫𑑂𑐎𑐮𑑄 – “𑐖𑐶𑑄 𑐟𑑅𑐐𑐹𑐩𑐔𑑂𑐕𑐶 𑐧𑐵𑐏𑑄–𑐳𑐦𑐹 𑐔𑑂𑐰𑐫𑐵𑑅 𑐥𑐶𑐎𑐵𑐫𑐾 𑐢𑐸𑐣 𑑋 𑐟𑐬 𑐖𑐶𑐐𑐸 𑐧𑐵𑐏𑑄–𑐳𑐦𑐹𑐫𑐵 𑐁𑐮𑑀𑐔𑐣𑐵 𑐧𑑂𑐰𑐣𑐾 𑐩𑐏𑐣𑐵𑑅 𑐖𑐶𑐐𑐸 𑐧𑐵𑐏𑑄 𑐐𑐠𑐾 𑐔𑑂𑐰𑑄 𑐳𑐶𑐂𑐎𑐾 𑐩𑐦𑐫𑐵𑐔𑑂𑐰𑐣 𑑋” 𑐢𑐎𑐵 𑐡𑐸𑑅𑐏𑐫𑐵 𑐏“ 𑐥𑑂𑐰𑑄𑐎𑐵𑑅 𑐁𑐮𑑀𑐔𑐣𑐵𑐫𑐵 𑐮𑐵𑐐𑐶 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐠𑑂𑐰 𑐡𑐸𑑅𑐏𑐫𑐵 𑐏𑑃 𑐰𑐫𑑂𑐎𑑅𑐫𑐵𑐐𑐸 𑐖𑐎 𑐰𑐶𑐱𑐾𑐲 𑐏𑑃 𑐩𑐏𑐸, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐶𑐬𑑂𑐖𑐣𑐵𑐟𑑂𑐩𑐎 𑐳𑐵𑐴𑐶𑐟𑑂𑐫 𑐔𑑂𑐰𑐂𑐥𑐶𑑄 𑐳𑐎𑐳𑐶𑐐𑐸𑑄 𑐳𑐩𑐳𑑂𑐫𑐵 𑐏𑑅 𑑋 𑐟𑐬 𑐁𑐮𑑀𑐔𑐣𑐵 𑐕𑐵𑐫𑑂 𑐩𑐔𑑂𑐰𑐮 ? 𑐢𑐿𑐐𑐸 𑐣𑑂𑐴𑑂𑐫𑐳𑑅𑐫𑐵 𑐮𑐶𑐳𑑅 𑐧𑐵𑑄𑐮𑐵𑐎 𑐀𑐣𑐸𑐳𑐣𑑂𑐢𑐵𑐣𑐥𑐹𑐬𑑂𑐰𑐎 𑐖𑐹𑐐𑐸 𑐩𑐡𑐸 𑑋 𑐁𑐮𑑀𑐔𑐣𑐵 𑐔𑑂𑐰𑐫𑐾𑐟 𑐁𑐮𑑀𑐔𑑂𑐫 𑐳𑐦𑐹 𑐧𑑂𑐰𑐣𑐾𑐩𑐵𑐮, 𑐳𑐦𑐹 𑐧𑑂𑐰𑐣𑐾𑐟 𑐣𑑂𑐫𑐵𑐫𑐾 𑐩𑐵𑐮, 𑐎𑐺𑐟𑐶 𑐧𑑂𑐰𑐣𑐾𑐟 𑐣𑑄 𑐡𑐸𑐐𑑂𑐫𑑄𑐎 𑐴𑐾 𑐧𑑂𑐰𑐣𑐾𑐩𑐵𑐮 𑑋 𑐀𑐮𑐾 𑐔𑑂𑐰𑐫𑐾𑐐𑐸 𑐣𑑄 𑐡𑐸𑐐𑑂𑐫𑑄𑐎 𑐴𑐾 𑐔𑑂𑐰𑐫𑐾𑐩𑐵𑐮 𑑋 𑐠𑐠𑐾 𑐕𑐐𑐹 𑐖𑐎 𑐳𑐦𑐹𑐫𑐵 𑐁𑐮𑑀𑐔𑐣𑐵 𑐔𑑂𑐰𑐫𑐾𑐟 𑐣𑑄 𑐟𑐳𑐎𑑄 𑐎𑐲𑑂𑐚𑐳𑐵𑐢𑑂𑐫 𑐖𑐹 𑐢𑐵𑑅𑐳𑐵 𑐳𑐵𑐴𑐶𑐟𑑂𑐫𑐶𑐎 𑐰𑐶𑐢𑐵𑐫𑐵 𑐴𑐾 𑐁𑐮𑑀𑐔𑐣𑐵 𑐔𑑂𑐰𑐫𑐾𑐟 𑐀𑐮𑐾 𑐁𑐮𑑀𑐔𑐣𑐵𑐫𑐵 𑐴𑐾 𑐳𑐩𑐐𑑂𑐬 𑐋𑐟𑐶𑐴𑐵𑐳𑐶𑐎 𑐰𑐶𑐎𑐵𑐳𑐎𑑂𑐬𑐩 𑐔𑑂𑐰𑐫𑐾𑐟 𑐐𑐸𑐮𑐶 𑐎𑐲𑑂𑐚𑐳𑐵𑐢𑑂𑐫 𑐖𑐸𑐂 𑐠𑑂𑐰 𑐣𑑄 𑐠𑐸𑐂𑐎𑐾 𑐩𑐵𑑅𑐐𑐸 𑐡𑐸 𑑋 𑐔𑑂𑐰𑐫𑐾𑐟 𑐃 𑐴𑐾 𑐫𑐎𑑂𑐎𑑀 𑐩𑐵𑑅, 𑐫𑐎𑑂𑐎𑑀 𑐳𑐦𑐹 𑐳𑑂𑐰𑐫𑐾𑐩𑐵𑑅 𑑋 𑐀𑐮𑐾 𑐠𑐸𑐮𑐶𑐩𑐔𑑂𑐕𑐶 𑐃 𑐧𑐶𑐫𑐵 𑐔𑑂𑐰𑐫𑐵𑑄 𑐁𑐮𑑀𑐔𑐎𑐫𑐵𑐟 𑐡𑐿𑐐𑐸 𑐕𑐸 ? 𑐥𑑂𑐬𑐱𑑄𑐳𑐵 𑐫𑐵𑑅𑐳𑐵 𑐔𑑂𑐰𑐩𑐶 𑐮𑐫𑑂𑐟𑐵𑐂𑐐𑐸 𑐀𑐮𑐾 𑐎𑐸𑐏𑐶𑐣𑐾𑐐𑐸 𑐫𑐵𑑅𑐳𑐵 𑐟𑑄𑐔𑐵𑐂𑐐𑐸 𑐗𑐷𑐐𑐸 𑐳𑐩𑐵𑐖𑐫𑐵 𑐩𑐣𑐹𑐟𑐫𑑂𑐐𑐸 𑐳𑑂𑐰𑐨𑐵𑐰𑐫𑑂 𑐥𑐬𑐶𑐰𑐬𑑂𑐟𑐣 𑐩𑐰𑑅𑐣𑐶 𑑋 𑐠𑐖𑐵𑑅𑐐𑐸 𑐳𑐩𑐵𑐖𑐫𑑂 𑐡𑑅𑐳𑐵 𑐎𑐾𑐰𑐮 𑐁𑐮𑑀𑐔𑐎/𑐳𑐩𑐵𑐮𑑀𑐔𑐎 𑐢𑐎𑐵𑑅 𑐳𑐩𑐵𑐖𑐫𑑂 𑐳𑐵𑐩𑐵𑐖𑐶𑐎 𑐳𑑂𑐟𑐬𑐥𑐵𑐏𑐾𑑄 𑐩𑐵𑐣𑐥𑐡𑐰𑐷 𑐕𑐐𑐹 𑐡𑐂 𑑋 𑐀𑐮𑐾 𑐳𑐷𑐢𑐸𑑄𑐎𑐵𑑅 𑐥𑐟𑑂𑐬𑐶𑐎𑐵𑐫𑑂 𑐕𑐎𑐹 𑐳𑐩𑐵𑐔𑐵𑐬 𑐥𑐶𑐴𑐵𑑃 𑐰𑐂 𑑋 𑐰𑐿𑐐𑐸 𑐩𑐸𑐎𑑂𑐎𑑄 𑐎𑐺𑐟𑐶𑐫𑐵 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐸𑑄 𑐳𑑄𑐳𑑂𑐠𑐵𑑄 𑐕𑐸𑑄 𑐎𑐵𑐬𑑂𑐫𑐎𑑂𑐬𑐩 𑐫𑐵𑐂 ? 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷, 𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮, 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫, 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣 𑐰𑐵 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐥𑐶𑐣𑐶𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐕𑐸𑑄 𑐳𑑄𑐑𑐳𑑄𑐳𑑂𑐠𑐵𑐥𑐵𑐏𑐾𑑄 𑐕𑐸𑑄 𑐡𑐸𑐐𑑂𑐫𑑄𑐐𑐸 𑐖𑑂𑐫𑐵𑐏𑑃 𑐖𑐹𑐐𑐸 𑐩𑐡𑐸 𑑋 ‘𑐮𑐸𑐩𑐣𑑂𑐟𑐶 𑐥𑑁’ 𑐳𑐦𑐹𑐟𑐎𑑄 𑐥𑐶𑐎𑐵𑑅𑐐𑐸 𑐩𑐡𑐸 𑑋 𑐳𑐸𑐫𑐵𑐐𑐸 𑐐𑐸𑐞𑐫𑐵𑐟 𑐎𑐫𑐵𑑅 𑐮𑐸𑐩𑑄𑐎𑐾𑐐𑐸 𑐳𑑄𑐳𑑂𑐎𑐵𑐬 𑐎𑑂𑐫𑑄𑐐𑐸 𑐩𑐡𑐸 𑑋 𑐱𑑂𑐬𑐷𑐎𑐺𑐲𑑂𑐞‘𑐀𑐞𑐸’, 𑐬𑐵𑐩𑐱𑐾𑐏𑐬, 𑐧𑐸𑐡𑑂𑐢 𑐳𑐵𑐫𑑂𑐩𑐶, 𑐥𑐹𑐬𑑂𑐞 𑐰𑐿𑐡𑑂𑐫 𑐠𑐖𑐵𑑅𑐥𑐶𑑄 𑐩𑐴𑐵𑐣𑑂 𑐳𑐵𑐴𑐶𑐟𑑂𑐫𑐶𑐎 𑐰𑑂𑐫𑐎𑑂𑐟𑐶𑐟𑑂𑐰 𑐟𑐬 𑐩𑐵𑐟𑑂𑐬 𑐔𑐷𑐢𑑄𑐐𑐸 𑐍𑐥𑐔𑐵𑐬𑐶𑐎 𑐕𑐐𑐹 𑐎𑐵𑐬𑑂𑐫𑐎𑑂𑐬𑐩𑐫𑑂 𑐳𑐷𑐩𑐶𑐟 𑐖𑐸𑐫𑐵𑑅 𑐧𑐶𑐔𑐵𑑅 𑐴𑐵𑐫𑐾𑐎𑐮 𑑋 𑐰𑐫𑑂𑐎𑑅𑐥𑐶𑑄𑐠𑐾𑑄 𑐖𑐵𑑅𑐥𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐄𑐔𑑂𑐔𑐳𑑂𑐟𑐬𑐫𑐵 𑐁𑐮𑑀𑐔𑐎 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑐣𑑂𑐟 𑐴𑐾 𑐠𑐸𑐎𑐠𑑄 𑐀𑐣𑑂𑐫𑐵𑐫 𑐖𑐸𑐫𑐵𑐔𑑂𑐰𑐣 𑐢𑐵𑑅𑐳𑐵 𑐩𑐾𑐥𑐶𑑄 𑐨𑐵𑐬𑐵𑐨𑐸𑐬𑐸 𑐮𑐾𑐏𑐎–𑐁𑐮𑑀𑐔𑐎𑐟𑐫𑑂𑐟 𑐳𑐸𑐣𑐵𑑄 𑐖𑐎 𑐮𑐸𑐩𑑄𑐎𑐷 ? 𑐠𑐠𑐾 𑐠𑑅𑐐𑐸 𑐴𑐾 𑐩𑐶𑐏𑐵𑑄 𑐏𑑄𑐎𑐏𑑄𑐎 𑐠𑐠𑐾 𑐎𑐰𑐶, 𑐮𑐾𑐏𑐎–𑐁𑐮𑑀𑐔𑐎𑐥𑐶𑐣𑑂𑐟 𑐀𑐣𑑂𑐫𑐵𑐫 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐷𑐧𑐮𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵 𑐔𑑂𑐰𑐫𑐾𑐐𑐸 𑐖𑑂𑐫𑐵𑐫𑑂 𑐳𑐩𑐬𑑂𑐥𑐶𑐟 𑐖𑐸𑐫𑐵𑑅 𑐖𑐷𑐰𑐣 𑐥𑐵𑐂𑐥𑐶𑑄 𑐳𑐸 𑐡𑐂 ? 𑐀𑐮𑐾 𑐮𑐵𑐖𑑂𑐫𑐵𑐎𑐠𑑄 𑐔𑑂𑐰𑐂𑐥𑐶𑑄 𑐁𑐮𑑀𑐔𑐎𑐟 𑐧𑐵𑐴𑐾𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐴𑐾 𑐟𑐵𑐟𑐸𑐣𑐵𑑅 𑐳𑐩𑐬𑑂𑐥𑐶𑐟 𑐨𑐵𑐰𑐣𑐵𑑄 𑐖𑐷𑐰𑐣 𑐥𑐵𑐂𑐥𑐶𑑄 𑐳𑐸 𑐩𑐴𑐵𑐣𑑂 𑐁𑐮𑑀𑐔𑐎𑐫𑐵 𑐖𑐣𑑂𑐩 𑐖𑐸𑐂 ?

𑐣𑐾𑐥𑐵𑐮𑐫𑑂 𑐡𑐎𑐳𑐶𑐧𑐾 𑐰𑐶𑐎𑐵𑐳 𑐖𑐹𑐐𑐸 𑐨𑐵𑐲𑐵, 𑐳𑐵𑐴𑐶𑐟𑑂𑐫 𑐢𑐿𑐐𑐸 𑐏𑐳–𑐣𑐾𑐥𑐵𑐮𑐷 𑐀𑐩𑐹𑐮𑑂𑐫 𑐳𑐵𑐴𑐶𑐟𑑂𑐫 𑐏𑑅 𑑋 𑐀𑐠𑐾 𑐴𑐾 𑐏𑐳 𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫–𑐁𑐮𑑀𑐔𑐣𑐵 𑐣𑑄 𑐏𑑅 𑑋 𑐟𑐬 𑐠𑐸𑐎𑐶𑐫𑐵 𑐟𑐸𑐮𑐣𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐰 𑐁𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶 𑐟𑐳𑐎𑑄 𑐡𑐫𑐣𑐷𑐫 𑐖𑐹 𑑋 𑐠𑐸𑐎𑐶𑐫𑐵 𑐎𑐵𑐬𑐞 𑐏𑐳–𑐣𑐾𑐥𑐵𑐮𑐷 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐫𑐵 𑐮𑐵𑐐𑐶 𑐁𑐬𑑂𑐠𑐶𑐎 𑐥𑐎𑑂𑐲𑐫𑐵 𑐮𑐶𑐳𑑂𑐳𑐾𑑄 𑐩𑐵𑐎𑑂𑐰𑐢𑐵𑐎𑑂𑐰𑐫𑐵 𑐖𑐶𑐩𑑂𑐩𑐾𑐰𑐵𑐬𑐷 𑐬𑐵𑐖𑑂𑐫–𑐰𑑂𑐫𑐰𑐳𑑂𑐠𑐵 𑐡𑐸, 𑐬𑐵𑐖𑑂𑐫𑑄 𑐳𑑄𑐬𑐎𑑂𑐲𑐶𑐟 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑐾𑐥𑐵𑐮 𑐊𑐎𑐾𑐜𑐾𑐩𑐷 𑐡𑐸 𑑋 𑐠𑑂𑐰 𑐊𑐎𑐾𑐜𑐾𑐩𑐷𑐂 𑐎𑐰𑐶–𑐮𑐾𑐏𑐎𑐥𑐶𑐣𑑂𑐟 𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑑅 𑐩𑑀𑐴𑐶𑐟 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐄𑐎𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐮𑐾𑐏𑐎𑐥𑐶𑑄 𑐬𑐟𑑂𑐣𑐢𑑂𑐰𑐖 𑐖𑑀𑐱𑐷, 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷, 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴 𑐥𑑂𑐬𑐢𑐵𑐣, 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑐁𑐡𑐶𑐥𑐶𑑄 𑐠𑑂𑐰 𑐳𑑄𑐳𑑂𑐠𑐵𑐫𑑂 𑐡𑐸𑐴𑐵𑑃 𑐰𑐣𑐵𑑅 𑐏𑐳–𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫𑐫𑐵 𑐳𑐾𑐰𑐵𑑅 𑐫𑐵𑐣𑐵𑐡𑐶𑐮 𑑋 𑐀𑐠𑐾 𑐴𑐾 𑐳𑐵𑐗𑐵 𑐥𑑂𑐬𑐎𑐵𑐱𑐣 𑐡𑐸 𑑋 𑐠𑐠𑐾 𑐴𑐾 𑐳𑑂𑐎𑐹𑐮–𑐎𑑂𑐫𑐵𑐩𑑂𑐥𑐳𑐫𑑂, 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐧𑑂𑐰𑑄𑐣𑐾𑐐𑐸–𑐧𑑂𑐰𑑄𑐎𑐾𑐐𑐸 𑐧𑐵𑑄𑐮𑐵𑑅𑐐𑐸 𑐰𑐵𑐟𑐵𑐰𑐬𑐞 𑐡𑐸, 𑐰𑐶𑐡𑑂𑐫𑐵𑐬𑑂𑐠𑐷𑐟 𑐥𑐵𑐛𑐎𑐟 𑐩𑐵𑐎𑑂𑐰 𑐡𑐸, 𑐱𑐶𑐎𑑂𑐲𑐎 𑐥𑑂𑐬𑐵𑐢𑑂𑐫𑐵𑐥𑐎𑐟 𑐩𑐵𑐎𑑂𑐰 𑐡𑐸, 𑐁𑐮𑑀𑐔𑐣𑐵 𑐔𑑂𑐰𑐫𑐾𑐐𑐸 𑐥𑐾𑐱𑐵𑐐𑐟 𑐰𑐺𑐟𑑂𑐟𑐶 𑐡𑐸 𑑋 𑐄𑐎𑐶𑑄 𑐏𑐳–𑐣𑐾𑐥𑐵𑐮𑐷 𑐨𑐵𑐲𑐵–𑐳𑐵𑐴𑐶𑐟𑑂𑐫𑐫𑐵 𑐳𑐩𑐳𑑂𑐫𑐵𑐫𑐵 𑐥𑑂𑐬𑐎𑐺𑐟𑐶 𑐰 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐳𑐩𑐳𑑂𑐫𑐵𑐫𑐵 𑐥𑑂𑐬𑐎𑐺𑐟𑐶 𑐄𑐟𑑂𑐠𑐾𑑄 𑐩𑐏𑐸 𑑋 𑐏𑐳–𑐣𑐾𑐥𑐵𑐮𑐷𑐫𑐵 𑐳𑐩𑐳𑑂𑐫𑐵 𑐄𑐐𑐸 𑐨𑐵𑐲𑐵𑑄 𑐏𑑃 𑐩𑐮𑑂𑐴𑐵𑐂𑐐𑐸, 𑐄𑐐𑐸 𑐨𑐵𑐲𑐵𑑄 𑐳𑐵𑐴𑐶𑐟𑑂𑐫 𑐩𑐔𑑂𑐰𑐂𑐐𑐸, 𑐄𑐐𑐸 𑐨𑐵𑐲𑐵𑑄 𑐁𑐮𑑀𑐔𑐣𑐵 𑐩𑐔𑑂𑐰𑐂𑐐𑐸 𑐄𑐐𑐸 𑐨𑐵𑐲𑐵𑐫𑐵 𑐳𑐩𑐳𑑂𑐫𑐵 𑐩𑐏𑐸, 𑐟𑐬 𑐣𑐾𑐥𑐵𑐮𑐨𑐵𑐲𑐵𑐫𑑂 𑐢𑐵𑑅𑐳𑐵 𑐠𑑂𑐰 𑐴𑐾 𑐐𑑂𑐫𑐵𑐣𑐵𑐥𑐸𑐐𑐸 𑐮𑑂𑐰𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐨𑐵𑐰𑐣𑐵 𑐴𑐾 𑐟𑐣𑐵𑐰𑐣𑐵𑑄𑐔𑑂𑐰𑑄𑐐𑐸, 𑐣𑐾𑐥𑐵𑐮𑐨𑐵𑐲𑐵𑑄 𑐏𑑃 𑐮𑑂𑐴𑐵𑐫𑐾𑐐𑐸 𑐟𑑂𑐰𑑅𑐟𑐵𑐰𑐣𑐵𑐔𑑂𑐰𑑄𑐐𑐸, 𑐳𑑂𑐎𑐹𑐮–𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐷𑐥𑐶𑑄 𑐩𑐡𑐫𑐵𑐰𑑄𑐐𑐸, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑐎𑐟 𑐩𑐡𑐫𑐵𑐰𑑄𑐐𑐸, 𑐁𑐮𑑀𑐔𑐣𑐵 𑐔𑑂𑐰𑐂𑐥𑐶𑑄 𑐩𑐡𑐫𑐵𑐰𑑄𑐐𑐸 𑐳𑑂𑐠𑐶𑐟𑐶 𑐀𑐥𑑂𑐰𑐫𑐵𑑅𑐰𑑅𑐐𑐸 𑐡𑐸 𑑋 𑐟𑐬 𑐠𑑂𑐰 𑐧𑐵𑐬𑐾 𑐳𑐬𑐎𑐵𑐬𑐫𑑂 𑐡𑐸𑐥𑐶𑑄 𑐰𑐵 𑐩𑐡𑐸𑐥𑐶𑑄 𑐳𑐸𑑄 𑐣𑑄 𑐣𑐾𑐰𑐵𑑅𑐟𑐫𑑂𑐐𑐸 𑐖𑐶𑐩𑑂𑐩𑐾𑐰𑐵𑐬𑐷 𑐩𑐎𑐵𑑅𑐐𑐸 𑐳𑑂𑐠𑐶𑐟𑐶 𑐡𑐸 𑑋

𑐠𑑁𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵 𑐔𑑂𑐰𑑅𑐳𑐵𑑄, 𑐄𑐐𑐸 𑐁𑐮𑑀𑐔𑐣𑐵 𑐥𑐟𑑂𑐬𑐶𑐎𑐵𑐫𑑂 𑐥𑐶𑐴𑐵“ 𑐰𑑅𑐳𑐵𑑄 𑐄𑐎𑐶𑐫𑐵 𑐥𑐵𑐛𑐎𑐟 𑐟𑐳𑐎𑑄 𑐩𑑂𑐴𑑀𑐖𑐎 𑐡𑐸 𑐀𑐮𑐾 𑐁𑐮𑑀𑐔𑐎 𑐠𑑅𑐩𑑂𑐴𑑄 𑐠𑐠𑐾 𑐗𑐳𑐸𑐎𑐵𑑅 𑐟𑐫𑐵𑑅 𑐢𑐵𑐫𑐾𑐩𑐵𑑅𑐐𑐸 𑐧𑐵𑐢𑑂𑐫𑐟𑐵 𑐡𑐸 – “𑐖𑐶𑑄 𑐴𑐾 𑐁𑐮𑑀𑐔𑐣𑐵 𑐔𑑂𑐰𑐫𑑂, 𑐖𑐶𑑄 𑐴𑐾 𑐖𑐎 𑐧𑑂𑐰𑐣𑐾𑐎𑐵† 𑐩𑐾𑐥𑐶𑐳𑑄 𑐩𑐧𑑂𑐰𑑄𑐳𑐵𑑄, 𑐁𑑅 𑐕𑐸𑐫𑐵𑐫𑑂 †” 𑐟𑐬 𑐠𑑁𑑄𑐫𑐵 𑐩𑐹𑐏𑑃 𑐮𑐵 𑐣𑐾𑐥𑐵𑐮𑐨𑐵𑐲𑐵–𑐳𑐵𑐴𑐶𑐟𑑂𑐫𑐫𑐵 𑐁𑐮𑑀𑐔𑐣𑐵 𑐩𑐧𑑂𑐰𑑄𑐐𑐸 𑐖𑐎 𑐩𑐏𑐸, 𑐣𑐾𑐥𑐵𑐮𑐨𑐵𑐲𑐵𑑄 𑐏𑑃 𑐮𑑂𑐴𑐵𑐫𑐾𑐐𑐸𑐟𑐎𑑄 𑐫𑐵𑐣𑐵𑐩𑐴𑑅𑐐𑐸 𑐠𑑁𑑄𑐫𑐵 𑐡𑐎𑐳𑐶𑐧𑐾 𑐟𑑅𑐢𑑄𑐐𑐸 𑐐𑑂𑐫𑐵𑐣𑐵𑐥𑐸𑐐𑐸 𑐮𑑂𑐰𑐫𑑂 𑐏𑑅 † 𑐀𑐮𑐾 𑐧𑑂𑐰𑐩𑐶𑐥𑐶𑑄 𑐩𑐡𑐸𑐐𑐸 𑐠𑐖𑐵𑑅𑐐𑐸 𑐂𑐮𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳 𑐫𑐵𑐫𑐾𑐩𑐵𑐮, 𑐗𑐷𑐐𑐸 𑐨𑐵𑐲𑐵–𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳 𑐫𑐵𑐫𑐾𑐩𑐵𑐮, 𑐗𑐷𑐐𑐸 𑐳𑐩𑐵𑐖𑐫𑐵𑐟 𑐣𑑂𑐴𑑂𑐫𑑀𑐣𑐾 𑐣𑑂𑐴𑑂𑐫𑐵𑐎𑐾𑐩𑐵𑐮 𑐢𑐎𑐵: 𑐢𑐵𑐫𑐾𑐰𑑄 𑐠𑑂𑐰 𑐦𑐸𑐎𑑂𑐎 𑐫𑐵𑐄𑑃𑐎 𑐀𑑅𑐥𑐸𑐎 𑐖𑑂𑐫𑐣𑐷𑐐𑐸 𑐏𑑃 𑐩𑐏𑐸 𑑋 𑐠𑑂𑐰 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐫𑐵 𑐣𑑂𑐴𑑂𑐫𑑀𑐣𑐾 𑐡𑐸𑐐𑐸 𑐟𑑅𑐢𑑄𑐐𑐸 𑐳𑐩𑐳𑑂𑐫𑐵 𑐏𑑅 𑑋

𑐠𑑂𑐰 𑐏𑑃𑐫𑑂 𑐜𑐵.𑐎𑐩𑐮𑐥𑑂𑐬𑐎𑐵𑐱 𑐩𑐮𑑂𑐮𑐖𑐸𑐫𑐵𑐐𑐸 𑐁𑐮𑑀𑐔𑐣𑐵𑐟𑑂𑐩𑐎 𑐢𑐵𑐥𑐹 𑐠𑐣 𑐠𑑁𑑄 𑐟𑐎𑑄 𑐳𑐵𑐣𑑂𑐡𑐬𑑂𑐨𑐶𑐎 𑐖𑐹𑐣𑐶 –

𑐔𑐫𑑂𑐐𑐸𑐮𑐶𑑄 𑐩𑐮𑑂𑐫𑐵𑐎 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐑–𑐳𑑄𑐳𑑂𑐠𑐵 𑐏𑐮𑑅 𑐥𑐸𑐔𑑅 𑐡𑐸𑐳𑐵𑑄 𑐕𑐐𑐹 𑐩𑑄𑐎𑐵𑑅 𑐎𑐵𑐬𑑂𑐫𑐎𑑂𑐬𑐩 𑐩𑐡𑐸𑐐𑐸 𑐠𑑁𑑄𑐫𑐵 𑐰𑐶𑐜𑐩𑑂𑐧𑐣𑐵 𑐢𑐵𑐫𑐾 𑐩𑐵𑑅 𑑋 𑐰𑐴𑐾 𑐰𑐴𑐾 𑐰𑐵 𑐰𑐠𑐾𑑄 𑐰𑐠𑐾𑑄 𑐁𑐖𑐸 𑐡𑐫𑐵 𑐣𑑄 𑐰𑐴𑐾 𑐰𑐴𑐾 𑐩𑐣𑐹𑐟 𑐣𑐾𑐟𑐺𑐟𑑂𑐰𑐫𑐵 𑐮𑐵𑐐𑐶 𑐥𑑂𑐬𑐟𑐶𑐳𑑂𑐥𑐬𑑂𑐢𑐵, 𑐟𑐬 𑐖𑑂𑐫𑐵 𑐫𑐵𑐣𑐵𑑅 𑐎𑑂𑐫𑐣𑐾 𑐩𑐦𑐸𑐐𑐸 𑐰𑐶𑐰𑐱𑐟𑐵, 𑐎𑐵𑐬𑑂𑐫𑐎𑑂𑐬𑐩, 𑐎𑐵𑐬𑑂𑐫𑐮𑐎𑑂𑐲𑑂𑐫 𑐰 𑐎𑐵𑐬𑑂𑐫𑐣𑐷𑐟𑐶𑐫𑐵 𑐳𑐬𑑂𑐰𑐠𑐵 𑐀𑐨𑐵𑐰, 𑐣𑐾𑐟𑐺𑐟𑑂𑐰𑐫𑐵 𑐳𑑄𑐎𑐚, 𑐠𑐰𑑄𑐠𑐰𑐫𑑂 𑐰𑐶𑐱𑑂𑐰𑐵𑐳𑐫𑐵 𑐳𑑄𑐎𑐚, 𑐡𑐮𑐐𑐟 𑐬𑐵𑐖𑐣𑐷𑐟𑐶𑐫𑐵 𑐎𑐸𑐥𑑂𑐬𑐨𑐵𑐰 𑐁𑐡𑐶 𑐫𑐵𑐣𑐵𑑅 𑐩𑑂𑐴𑐶𑐐𑑅 𑐕𑐐𑐹 𑐣𑐶𑐐𑐹 𑐳𑑄𑐳𑑂𑐠𑐵𑑄 𑐫𑐵𑑅𑐐𑐸𑐮𑐶𑑄 𑐣𑑄 𑐠𑑁𑑄 𑐗𑐷𑐳𑑄 𑐨𑐵𑐲𑐵 𑐏𑑂𑐫𑐮𑐫𑑂 𑐫𑐵𑐫𑐾 𑐩𑐦𑐸𑐐𑐸 𑐀𑐖𑐹𑐔𑐵𑐫𑐾 𑐩𑐵𑑅𑐐𑐸 𑐳𑑂𑐠𑐶𑐟𑐶𑐂 𑐠𑑁𑑄 𑐗𑐷 𑐦𑐸𑐎𑑂𑐎 𑐰𑐵𑐟𑐵𑐴𑐵𑑃 𑐡𑐣𑐵𑑅 𑐳𑑂𑐰𑐫𑐵𑐔𑑂𑐰𑐣𑐵 𑑋 (𑐩𑐮𑑂𑐮, 𑐣𑐾.𑐳𑑄. 𑑑𑑑𑑑𑑖𑑅𑑓) 𑑋

𑐳𑐵𑐴𑐶𑐟𑑂𑐫–𑐁𑐮𑑀𑐔𑐣𑐵𑐫𑐵 𑐁𑐣𑑂𑐡𑑀𑐮𑐣 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐣𑑂𑐡𑑀𑐮𑐣 𑐣𑐵𑐥𑐣𑐵𑐥𑑄 𑐣𑑂𑐴𑑂𑐫𑐵𑐂𑐐𑐸 𑐏𑑅 𑑋 𑐨𑐵𑐲𑐵–𑐁𑐣𑑂𑐡𑑀𑐮𑐣 𑐱𑐶𑐠𑐶𑐮 𑐖𑐹𑐐𑐸 𑐂𑐮𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐣𑑂𑐡𑑀𑐮𑐣𑐖𑐎 𑐧𑐵𑑄𑐮𑐵𑐂𑐐𑐸 𑐳𑑂𑐠𑐶𑐟𑐶 𑐩𑐡𑐸 𑑋 𑐠𑑂𑐰 𑐦𑐸𑐎𑑂𑐎 𑐳𑐵𑐩𑐵𑐖𑐶𑐎, 𑐬𑐵𑐖𑐣𑐾𑐟𑐶𑐎, 𑐁𑐬𑑂𑐠𑐶𑐎, 𑐱𑐿𑐎𑑂𑐲𑐶𑐎, 𑐨𑐵𑐲𑐶𑐎 𑐁𑐡𑐶 𑐰𑐵𑐟𑐵𑐰𑐬𑐞𑐫𑐵 𑐎𑐵𑐬𑐞 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐵𑐴𑐶𑐟𑑂𑐫𑐶𑐎 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳 𑐖𑐸𑐂𑐟 𑐟𑐳𑐎𑑄 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐀𑐣𑐸𑐨𑐰, 𑐀𑐣𑐸𑐨𑐹𑐟𑐶 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐎𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐁𑐮𑑀𑐔𑐣𑐵𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐬𑐵𑐖𑐣𑐿𑐟𑐶𑐎 𑐰𑐵𑐟𑐵𑐰𑐬𑐞 𑐡𑐫𑐾𑐩𑐵𑐮 𑐀𑐮𑐾 𑐰𑐶𑐡𑑂𑐫𑐵𑐮𑐫, 𑐩𑐴𑐵𑐰𑐶𑐡𑑂𑐫𑐵𑐮𑐫 𑐰 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐐𑐸–𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐧𑐵𑑄𑐮𑐵𑐎 𑐖𑐸𑐂𑐩𑐵𑐮 𑑋 𑐣𑐾𑐰𑐵𑑅𑐟𑐫𑑂𑐐𑐸 𑐩𑐹 𑐧𑐳𑑂𑐟𑐷 𑐢𑐿𑐐𑐸 𑐳𑑂𑐰𑐣𑐶𑐐𑑅 𑐏𑑅 𑑋 𑐠𑐸𑐎𑐷 𑐣𑑄 𑐡𑐎𑐳𑐶𑐧𑐾 𑐟𑑅𑐢𑑄𑐐𑐸 𑐠𑐵𑐫𑑂 𑐫𑐾𑑃 𑐏𑑅 𑑋 𑐫𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐡𑐎𑐳𑐶𑐧𑐾 𑐀𑐥𑑂𑐰𑑅 𑐎𑑂𑐫𑐵𑐩𑑂𑐥𑐳 𑐡𑐸 𑐟𑐬 𑐠𑐣 𑐡𑐸𑐣𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐖𑐧𑐬𑐖𑐳𑑂𑐟𑐎𑐠𑑄 𑐖𑐎 𑐕𑐐𑐹 𑐣𑐶𑐐𑐹 𑐎𑑂𑐫𑐵𑐩𑑂𑐥𑐳𑐫𑑂 𑐕𑐩𑑂𑐴 𑐣𑐶𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐖𑐎 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵 𑐊𑐩.𑐊.𑐫𑐵 𑐰𑑂𑐫𑐰𑐳𑑂𑐠𑐵 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐧𑐵𑐴𑐾𑐎 𑐠𑐣 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐩𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵𑐐𑐸 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐔𑐵𑐫𑐾𑐎𑐾 𑐩𑐵𑑅𑐐𑐸 𑐠𑑁𑑄𑐫𑐵 𑐳𑑂𑐠𑐶𑐟𑐶𑐂 𑐣𑑄 𑐠𑑂𑐰 𑐏𑑃𑐫𑑂 𑐳𑐸𑐫𑐵𑑄 𑐰𑐵𑐳𑑂𑐟𑐵 𑐩𑐡𑐸𑐐𑐸 𑐡𑐸𑑅𑐏𑐫𑐵 𑐏𑑃 𑐏𑑅 𑑋 𑐳𑑂𑐎𑐹𑐮𑐳𑑂𑐎𑐹𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐐𑐸–𑐧𑑂𑐰𑑄𑐎𑐾𑐐𑐸 𑐀𑐣𑐶𑐰𑐵𑐬𑑂𑐫𑐟𑐵𑐫𑐵 𑐮𑐵𑐐𑐸 𑐖𑐹 𑐠𑐾𑑄, 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐖𑐵𑐐𑐬𑐞 𑐴𑐫𑐾𑐐𑐸 𑐖𑑂𑐫𑐵𑐫𑑂 𑐣𑑂𑐴𑑂𑐫𑐔𑑂𑐫𑐹𑐐𑐸 𑐏𑐣𑐾𑐩𑐡𑐸 𑑋 𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑑂 𑐊𑐩.𑐊. 𑐔𑐵𑐫𑐾𑐎𑐾𑐟 𑐩𑐾𑐫𑐬 𑐨𑐵𑐖𑐸𑑄 𑐁𑐬𑑂𑐠𑐶𑐎 𑐥𑐎𑑂𑐲𑐫𑐵 𑐖𑐶𑐩𑑂𑐩𑐾𑐰𑐵𑐬𑐷 𑐎𑐵𑐫𑐾𑐐𑐸 𑐎𑐰𑐸𑐮 𑐫𑐵𑐣𑐵𑑅 𑐣𑑄 𑐁𑑅𑐟𑐎𑑄 𑐠𑑂𑐰 𑐏𑑃𑐫𑑂 𑐣𑐶𑐬𑑂𑐞𑐫 𑐧𑐶𑐂𑐐𑐸 𑐖𑑂𑐫𑐵 𑐩𑐖𑐹𑐐𑐸 𑐠𑐣 𑐣𑑂𑐴𑑂𑐫𑐠𑐣𑐾𑐧𑐴:𑐖𑐹 𑑋

𑐄𑐎𑐶𑑄 𑐁𑐮𑑀𑐔𑐣𑐵 𑐩𑐔𑑂𑐰𑑅𑐐𑐸 𑐩𑐹𑐮 𑐳𑐩𑐳𑑂𑐫𑐵𑐫𑐵 𑐩𑐹𑐮 𑐎𑐵𑐬𑐞 𑐁𑐮𑑀𑐔𑐣𑐵 𑐔𑑂𑐰𑐫𑐾𑐟 𑐩𑐵𑑅𑐐𑐸 𑐰𑐵𑐟𑐵𑐰𑐬𑐞𑐫𑐵 𑐀𑐨𑐵𑐰 𑐏𑑅 𑑋 𑐫𑐡𑐶 𑐬𑐵𑐖𑐣𑐿𑐟𑐶𑐎 𑐮𑐐𑐵𑐫𑐟 𑐳𑐵𑐩𑐵𑐖𑐶𑐎, 𑐳𑐵𑑃𑐳𑑂𑐎𑐺𑐟𑐶𑐎, 𑐱𑐿𑐎𑑂𑐲𑐶𑐎, 𑐁𑐬𑑂𑐠𑐶𑐎, 𑐨𑐵𑐲𑐶𑐎 𑐰𑐵𑐟𑐵𑐰𑐬𑐞 𑐧𑐵𑑄𑐮𑐵𑐟 𑐢𑐵𑑅𑐳𑐵 𑐡𑐾𑐱𑐫𑑂 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐐𑐞𑐟𑐣𑑂𑐟𑑂𑐬𑐫𑐵 𑐰𑑂𑐫𑐰𑐳𑑂𑐠𑐵 𑐰𑑅𑐐𑐸 𑐣𑑄 𑐁𑐨𑐵𑐳 𑐖𑐸𑐂 𑑋

𑐎𑐺𑐟𑐖𑑂𑐘𑐟𑐵

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷 𑐡𑐸𑐣𑐾 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵𑐫𑐵 𑐎𑐰𑑅𑐫𑐵 𑐰𑑂𑐫𑐰𑐳𑑂𑐠𑐵 𑐡𑐸𑐳𑐵𑑄 𑐳𑐩𑐵𑐮𑑀𑐔𑐣𑐵 𑐐𑑀𑐲𑑂𑐛𑐷𑐫𑐵 𑐮𑐵𑐐𑐶 𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵𑐳𑐩𑑂𑐧𑐣𑑂𑐢𑐷 𑐎𑐵𑐬𑑂𑐫𑐥𑐟𑑂𑐬 𑐟𑐫𑐵𑐬 𑐫𑐵𑐫𑐾𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐶𑐎 𑐳𑐩𑐵𑐮𑑀𑐔𑐎𑐎𑐠𑑄 𑐣𑐵𑑄𑐡𑑄𑐥𑐶𑑄 𑐳𑐎𑐮𑐳𑐶𑐟 𑐂𑐣𑐵𑐥 𑐫𑐵𑐣𑐵𑑅 𑐣𑑄 𑐳𑐸𑑄 𑐣𑑄 𑐳𑐩𑐵𑐮𑑀𑐔𑐎𑐥𑐶𑑄 𑐠𑑂𑐰 𑐖𑑂𑐫𑐵𑐫𑑂 𑐟𑐫𑐵𑐬 𑐩𑐖𑐹𑐫𑐵𑑅 𑐳𑐩𑐵𑐮𑑀𑐔𑐣𑐵𑐳𑐩𑑂𑐧𑐣𑑂𑐢𑐷 𑐐𑑀𑐲𑑂𑐛𑐷 𑐫𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸 𑐳𑑂𑐠𑐶𑐟𑐶𑐂 𑐠𑐸𑐐𑐸 𑐊𑐎𑐾𑐜𑐾𑐩𑐷𑐫𑐵 𑐳𑐩𑐵𑐮𑑀𑐔𑐣𑐵 𑐎𑐰𑑅𑐫𑐵 𑐳𑑄𑐫𑑀𑐖𑐎 𑐖𑐶 𑐠𑑅 𑐴𑐾 𑐖𑐸𑐫𑐵𑑅 𑐣𑑄 𑐠𑑅𑐩𑑂𑐴𑐾𑐳𑐶𑐣𑑄 𑐴𑐾 𑐔𑑂𑐰𑐫𑐾𑐩𑐵𑑅𑐐𑐸 𑐊𑐎𑐾𑐜𑐾𑐩𑐷𑐫𑐵 𑐎𑐵𑐬𑑂𑐫𑐳𑐩𑐶𑐟𑐶𑐫𑐵 𑐣𑐶𑐬𑑂𑐞𑐫𑐎𑐠𑑄 𑐠𑑂𑐰 𑐖𑐶𑐩𑑂𑐩𑐾𑐰𑐵𑐬𑐷 𑐖𑐶𑑄 𑐠𑑅𑐫𑐵𑐟 𑐴𑐾 𑐮𑐵𑑅𑐰𑑅𑐎𑐠𑑄 𑐠𑑂𑐰 𑐎𑐵𑐬𑑂𑐫𑐥𑐟𑑂𑐬 𑐔𑑂𑐰𑐫𑐵𑑅 𑐠𑑁𑑄 𑐠𑐣 𑐣𑑂𑐴𑑂𑐫𑐧𑑂𑐰𑐫𑐵𑐐𑐸 𑐖𑐸𑐮 𑑋 𑐠𑑂𑐰 𑐖𑐶𑐩𑑂𑐩𑐾𑐰𑐵𑐬𑐷 𑐖𑐶𑐐𑐸 𑐮𑐵𑐐𑐶 𑐟𑑅𑐢𑑄𑐐𑐸 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐀𑐰𑐳𑐬 𑐟𑐵𑐫𑐵 𑑋 𑐄𑐎𑐶𑑄 𑐠𑑂𑐰 𑐀𑐰𑐳𑐬𑐫𑐵 𑐮𑐵𑐐𑐶 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐎𑐵𑐬𑑂𑐫𑐳𑐩𑐶𑐟𑐶𑐥𑑂𑐬𑐟𑐶 𑐎𑐺𑐟𑐖𑑂𑐘𑐟𑐵 𑐥𑑂𑐬𑐎𑐚 𑐫𑐵𑐣𑐵𑐔𑑂𑐰𑐣𑐵 𑑋 𑐳𑑂𑐰𑐳𑑂𑐠 𑐁𑐮𑑀𑐔𑐣𑐵𑐫𑐵 𑐮𑐵𑐐𑐶 𑐡𑐸𑐣𑐸𑐐𑐮𑑄 𑐂𑐣𑐵𑐥 𑐫𑐵𑐣𑐵𑐔𑑂𑐰𑐣𑐵 𑑋

𑐳𑐣𑑂𑐡𑐬𑑂𑐨–𑐖𑑂𑐰𑐮𑑄

𑐎𑐬𑑂𑐩𑐵𑐔𑐵𑐬𑑂𑐫, 𑐩𑐵𑐢𑐰𑐮𑐵𑐮, 𑐖𑐶𑐐𑐸 𑐩𑐶𑐏𑐵𑐫𑑂 𑐳𑐵𑐴𑐶𑐟𑑂𑐫𑐫𑐵𑐐𑐸 𑐕𑐸𑑄, 𑐫𑐾𑑃 : 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡𑑂 𑐣𑐾.𑐳𑑄. 𑑑𑑑𑑐𑑐 𑑋

𑐏𑑃 𑐳𑐵𑐴𑐶𑐟𑑂𑐫𑐫𑐵𑐐𑐸, 𑐳𑐵𑐴𑐶𑐟𑑂𑐫𑐫𑐵𑐐𑐸 𑐏“𑐫𑑂, 𑐫𑐾𑑃 : 𑐑𑐣𑐱𑑂𑐫𑐵𑐩 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐣𑐾.𑐳𑑄. 𑑑𑑑𑑐𑑕 𑑋

‘𑐀𑐣𑑂𑐟𑐬𑑂𑐰𑐵𑐬𑑂𑐟𑐵’ 𑐏𑐾𑐮𑐸𑐂𑐟𑐵𑑅, 𑐣𑐾.𑐳𑑄.𑑑𑑑𑑐𑑙𑑅𑑑𑑐𑑕–𑑑𑑑𑑓 𑑋

𑐏𑐣𑐵𑐮, 𑐫𑐡𑐸𑐣𑐵𑐠, 𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫𑐩𑐵 𑐁𑐮𑑀𑐔𑐣𑐵𑐎𑑀 𑐀𑐰𑐳𑑂𑐠𑐵, 𑐊𑐎 𑐡𑐺𑐲𑑂𑐚𑐶𑐎𑑀𑐞, 𑐳𑐵𑐴𑐶𑐟𑑂𑐫𑐶𑐎 𑐔𑐬𑑂𑐔𑐵 𑐎𑐵𑐛𑐩𑐵𑐜𑑁𑑄 : 𑐳𑐵𑐗𑐵 𑐥𑑂𑐬𑐎𑐵𑐱𑐣 𑑋

𑐔𑐶𑐟𑑂𑐬𑐎𑐵𑐬, 𑐖𑐐𑐡𑐷𑐱, ‘𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐮𑑀𑐔𑐣𑐵 : 𑐕𑐐𑐹 𑐰𑐶𑐰𑐾𑐔𑐣𑐵’, 𑐳𑐶𑐟𑐸, 𑑙𑑅𑑕𑑓(𑐣𑐾.𑐳𑑄.𑑑𑑐𑑙𑑓) 𑐥𑑁 𑑑𑑖–𑑒𑑙 𑑋

𑐖𑑀𑐱𑐷, 𑐐𑐶𑐬𑐶𑐖𑐵𑐥𑑂𑐬𑐳𑐵𑐡, 𑐐𑐶𑐬𑐶𑐖𑐵𑐥𑑂𑐬𑐳𑐵𑐡𑐫𑐵 𑐳𑐩𑐵𑐮𑑀𑐔𑐣𑐵, 𑐏𑑂𑐰𑐥 : 𑐎𑐸𑐟𑑅 𑐥𑐶𑐎𑐵𑐎, 𑐣𑐾.𑐳𑑄.𑑑𑑑𑑔𑑑 𑑋

𑐖𑑀𑐱𑐷, 𑐬𑐟𑑂𑐣𑐢𑑂𑐰𑐖, 𑐳𑐵𑐴𑐶𑐟𑑂𑐫𑐫𑐵 𑐳𑐸𑐮𑐔𑑄, 𑐫𑐾𑑃 : 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡𑑂, 𑐣𑐾.𑐳𑑄.𑑑𑑐𑑗𑑒 𑑋

𑐁𑐬𑐟𑐷, 𑐫𑐮 : 𑐎𑐷𑐬𑑂𑐟𑐶 𑐳𑐦𑐹 𑐎𑐸𑐠𑐶, 𑐣𑐾.𑐳𑑄. 𑑑𑑑𑑐𑑗 𑑋

‘𑐢𑐬𑑂𑐩𑑀𑐡𑐫𑐫𑐵 𑐎𑐴𑐵𑐣𑐷𑐟’, 𑐢𑐬𑑂𑐩𑑀𑐡𑐫, 𑐣𑐾.𑐳𑑄. 𑑑𑑐𑑖𑑙 …. 𑑋

𑐟𑐵𑐩𑑂𑐬𑐵𑐎𑐵𑐬, 𑐥𑐹𑐬𑑂𑐞, ‘𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐿𑐡𑑂𑐢𑐵𑐣𑑂𑐟𑐶𑐎 𑐳𑐩𑐵𑐮𑑀𑐔𑐣𑐵𑐫𑐵 𑐳𑑂𑐠𑐶𑐟𑐶’, 𑐣𑐾𑐥𑐵𑐮 𑐳𑑄𑐳𑑂𑐎𑐺𑐟𑐶 𑐮𑐫𑑂 𑐥𑑁, (𑐣𑐾.𑐳𑑄. 𑑑𑑑𑑒𑑐𑑅 ?)

𑐟𑐸𑐮𑐵𑐢𑐬, 𑐥𑑂𑐬𑐾𑐩𑐱𑐵𑐣𑑂𑐟𑐶, 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳, 𑐫𑐾𑑃 : 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷, 𑐣𑐾.𑐳𑑄. 𑑑𑑑𑑒𑑐 𑑋

𑐥𑑂𑐬𑐢𑐵𑐣, 𑐎𑐺𑐲𑑂𑐞𑐔𑐣𑑂𑐡𑑂𑐬𑐳𑐶𑑄𑐴, 𑐥𑐮𑐵𑑅𑐔𑐶𑑄 𑐮𑐶𑐣𑐵, 𑐎𑐶𑐥𑐹 : 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷, 𑐣𑐾.𑐳𑑄. 𑑑𑑑𑑑𑑖 𑑋

𑐥𑑂𑐬𑐢𑐵𑐣, 𑐣𑐬𑑂𑐩𑐡𑐾𑐱𑑂𑐰𑐬, 𑐥𑐵𑐱𑑂𑐔𑐵𑐟𑑂𑐫 𑐳𑐩𑐵𑐮𑑀𑐔𑐣𑐵–𑐳𑐶𑐡𑑂𑐢𑐵𑐣𑑂𑐟, 𑐎𑐶𑐥𑐹 : 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷, 𑐣𑐾.𑐳𑑄. 𑑑𑑑𑑓𑑘 𑑋

𑐩𑐮𑑂𑐮 𑐎𑐩𑐮𑐥𑑂𑐬𑐎𑐵𑐱, 𑐳𑐶𑑃𑐎𑑅𑐩𑐶𑐫𑐵 𑐳𑑂𑐰𑐵𑐣𑐾, (𑐫𑐾𑑃 : 𑐔𑑂𑐰𑐳𑐵𑐥𑐵𑐳𑐵, 𑐣𑐾.𑐳𑑄.𑑑𑑐𑑙𑑘)

‘𑐀𑐣𑑂𑐟𑐬𑑂𑐰𑐵𑐬𑑂𑐟𑐵’ : 𑐥𑐮𑐶𑐳𑑂𑐠𑐵, 𑑔𑑅𑑔 (𑐣𑐾.𑐳𑑄. 𑑑𑑑𑑑𑑖) 𑐥𑑁 𑑓𑑓–𑑔𑑖 𑑋

‘𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐔𑐵𑐬𑐥𑑂𑐬𑐳𑐵𑐬𑐫𑐵 𑐳𑐩𑐳𑑂𑐫𑐵 𑐕𑐥𑐸𑐮𑐸’, 𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐔𑐵𑐬𑐥𑑂𑐬𑐳𑐵𑐬𑐫𑐵 𑐳𑐩𑐳𑑂𑐫𑐵 𑐰 𑐎𑐵𑐬𑑂𑐫𑐫𑑀𑐖𑐣𑐵, 𑐰𑐶𑐔𑐵𑐬 𑐐𑑀𑐲𑑂𑐛𑐷, 𑐣𑐾.𑐳𑑄. 𑑑𑑑𑑑𑑖 𑐫𑑃𑐠𑐵𑐠𑑂𑐰 𑑑𑑐, 𑐣𑐵𑐬𑐵𑐫𑐞𑐑𑐵𑐚, 𑐔𑐶𑐟𑐰𑐣 𑑋

𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, ‘𑐨𑐹𑐩𑐶𑐎𑐵’, 𑐥𑐵𑐱𑑂𑐔𑐵𑐟𑑂𑐫 𑐳𑐩𑐵𑐮𑑀𑐔𑐣𑐵 𑐳𑐶𑐡𑑂𑐢𑐵𑐣𑑂𑐟, 𑐎𑐶𑐥𑐹 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷, 𑐣𑐾.𑐳𑑄. 𑑑𑑑𑑓𑑘 𑑋

𑐩𑐵𑐮𑐷, 𑐂𑐣𑑂𑐡𑑂𑐬 ‘𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐰 𑐳𑐩𑐵𑐮𑑀𑐔𑐎𑐥𑐶𑑄’, 𑐥𑐮𑐶𑐳𑑂𑐠𑐵, 𑐡𑑃 𑑗𑑅𑑗 (𑐣𑐾.𑐳𑑄. 𑑑𑑑𑑑𑑙), 𑐥𑑁 𑑓𑑙–𑑔𑑙 𑑋

‘𑐣𑐾𑐥𑐵𑐮𑐨𑐵𑐲𑐵 𑐳𑐩𑐵𑐮𑑀𑐔𑐣𑐵 𑐬 𑐳𑐩𑐵𑐮𑑀𑐔𑐎𑐴𑐬𑐹’, 𑐳𑐩𑐎𑐵𑐮𑐷𑐣 𑐳𑐵𑐴𑐶𑐟𑑂𑐫, 𑑑𑑓𑑅𑑔 (𑑒𑑐𑑖𑑐) 𑐥𑑁 𑑑𑑓𑑒–𑑑𑑔𑑒 𑑋

𑐰𑐖𑑂𑐬𑐵𑐔𑐵𑐬𑑂𑐫, 𑐔𑐣𑑂𑐡𑑂𑐬𑐩𑐵𑐣, 𑐳𑐶𑐬𑑂𑐖𑐣𑐵𑐫𑐵 𑐰𑐶𑐰𑐾𑐔𑐣𑐵, 𑐎𑐶𑐥𑐹 : 𑐖𑐣𑐔𑐾𑐟𑐣𑐵 𑐥𑑂𑐬𑐎𑐵𑐱𑐣, 𑐣𑐾.𑐳𑑄. 𑑑𑑑𑑑𑑗 𑑋

𑐰𑐬𑑂𑐩𑐵 𑐢𑐷𑐬𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐰 𑐩𑐾𑐩𑐾𑐥𑐶𑑄, 𑐴𑐶𑐣𑑂𑐡𑐷 𑐳𑐵𑐴𑐶𑐟𑑂𑐫 𑐎𑑀𑐱 (𑐨𑐵𑐐 𑑑), 𑐰𑐵𑐬𑐵𑐞𑐳𑐷 : 𑐖𑑂𑐘𑐵𑐣𑐩𑐞𑑂𑐜𑐮 𑐮𑐶𑐩𑐶𑐚𑐾𑐜 (𑐟𑐺𑐟𑐷𑐫 𑐳𑑄𑐳𑑂𑐎𑐬𑐞), 𑑑𑑙𑑘𑑕, 𑐥𑑁 𑑙𑑗 𑑋

𑐰𑐿𑐡𑑂𑐫, 𑐖𑐣𑐎𑐮𑐵𑐮, ‘𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑐩𑐵𑐮𑑀𑐔𑐣𑐵 𑐰𑐶𑐢𑐵’, 𑐏𑐾𑐮𑐸𑐂𑐟𑐵𑑅 𑑒𑑐𑑅𑑒𑑐 (𑐣𑐾.𑐳𑑄.𑑑𑑑𑑑𑑙) 𑐥𑑁 𑑙–𑑒𑑓 𑑋

𑐳𑐟𑑂𑐫𑐳𑐟𑐷𑐫𑐵 𑐰𑐶𑐰𑐾𑐔𑐣𑐵, 𑐎𑐵𑐣𑑂𑐟𑐶𑐥𑐸𑐬 : 𑐔𑑂𑐰𑐳𑐵𑐥𑐵𑐳𑐵, 𑐣𑐾.𑐳𑑄. 𑑑𑑐𑑘𑑗 𑑋

𑐱𑑂𑐬𑐾𑐲𑑂𑐛, 𑐩𑐵𑐞𑐶𑐎𑐮𑐵𑐮, 𑐳𑐩𑐵𑐮𑑀𑐔𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟 (𑐫𑐾𑑃 , 𑐔𑑂𑐰𑐳𑐵𑐥𑐵𑐳𑐵, 𑐣𑐾.𑐳𑑄. 𑑑𑑐𑑘𑑘)

“𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐳𑐵𑐴𑐶𑐟𑑂𑐫𑐫𑐵 𑐥𑐬𑐩𑑂𑐥𑐬𑐵 𑐰𑐶𑐎𑐵𑐳𑐫𑐵 𑐳𑑂𑐠𑐶𑐟𑐶’, 𑐣𑐾𑐥𑐵𑐮𑐨𑐵𑐲𑐵 𑐰 𑐠𑑂𑐰𑐫𑐵 𑐳𑐵𑐴𑐶𑐟𑑂𑐫 𑐰𑐶𑐨𑐵𑐐𑐷𑐫 𑐐𑑀𑐲𑑂𑐛𑐷, (𑐫𑐾𑑃 , 𑐮𑐵𑐎𑑁𑐮 𑐥𑐶𑐠𑐣𑐵, 𑐣𑐾.𑐳𑑄. 𑑑𑑑𑑑𑑐), 𑐥𑑁 𑑑𑑕–𑑒𑑘 𑑋

𑐱𑐵𑐎𑑂𑐫, 𑐛𑐵𑐎𑐸𑐬𑐩𑐵𑐣, 𑐦𑐸𑐟𑐶𑐦𑐵𑐟𑐶, 𑐮𑐮𑐶𑐟𑐥𑐸𑐬 : 𑐁𑐱𑐵 𑐥𑐸𑐳𑑂𑐟𑐎 𑐨𑐞𑑂𑐜𑐵𑐬, 𑐣𑐾.𑐳𑑄. 𑑑𑑐𑑙𑑐 𑑋

𑐳𑐵𑑅𑐩𑐶, 𑐨𑐬𑐟(𑐳𑑄), 𑐧𑐵𑐏𑑄 𑐳𑐩𑐵𑐮𑑀𑐔𑐣𑐵, 𑐫𑐾𑑃 : 𑐥𑐮𑑂𑐥𑐳𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅, 𑐣𑐾.𑐳𑑄.𑑑𑑐𑑙𑑕 𑑋