𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐷𑐥𑐶𑑄 𑐱𑐶𑐎𑑂𑐲𑐎 𑐩𑐵𑐐

𑐫𑐾𑑃 -𑐫𑐾𑑃 𑐩𑐴𑐵–𑐣𑐐𑐬𑐥𑐵𑐮𑐶𑐎𑐵𑑄 𑐧𑑂𑐰𑑄𑐎𑐾𑐟𑑂𑐫𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑐱𑐶𑐎𑑂𑐲𑐎 𑐩𑐵𑐐 𑐫𑐵𑑅𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐬𑐵𑐲𑑂𑐚𑑂𑐬𑐶𑐫 𑐣𑑂𑐴𑐶𑐥𑑁 𑐐𑑀𑐬𑐏𑐵𑐥𑐟𑑂𑐬𑐫𑑂 𑐰𑐶𑐖𑑂𑐘𑐵𑐥𑐣 𑐥𑑂𑐬𑐎𑐵𑐱𑐶𑐟 𑐫𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐷𑐥𑐶𑑄 𑑑𑑗𑑒 𑐩𑑂𑐴 𑐱𑐶𑐎𑑂𑐲𑐎 𑐩𑐵𑐐 𑐫𑐵𑑅𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐀𑐣𑑂𑐟𑐬𑑂𑐐𑐟 𑐮𑐵𑑅𑐐𑐸 𑐦𑐸𑐎𑑂𑐎 𑐴𑐾 𑐣𑐶𑐖𑐷 𑐰 𑐳𑐵𑐬𑑂𑐰𑐖𑐣𑐶𑐎 𑐳𑑂𑐎𑐸𑐮𑐫𑑂 𑐫𑐾𑑃 𑐩𑐣𑐥𑐵𑑄 𑐠𑐸𑐐𑐸𑐳𑐷 𑐎𑐎𑑂𑐲𑐵 𑑑 𑐣𑐶𑐳𑐾𑑄 𑑘 𑐟𑐎 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 ‘𑐫𑐾𑑃 𑐡𑐾𑐫𑑂 𑐩𑑂𑐴𑐳𑐷𑐎𑐾’ 𑐣𑐵𑐩𑑄 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐄𑐎𑐶𑐫𑐵 𑐮𑐵𑐐𑐶𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐳𑐦𑐹 𑐳𑐩𑐾𑐟 𑐕𑐵𑐥𑐾 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋

𑐄𑐐𑐸 𑐥𑐵𑐛𑑂𑐫𑐳𑐦𑐹 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑐱𑐶𑐎𑑂𑐲𑐎𑐫𑐵 𑐰𑑂𑐫𑐰𑐳𑑂𑐠𑐵 𑐣𑑄 𑐫𑐾𑑃 𑐩𑐣𑐥𑐵𑑄 𑐴𑐾 𑐫𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐄𑐎𑐶𑐫𑐵 𑐮𑐵𑐐𑐶𑑄 𑐠𑑂𑐰 𑐳𑐸𑐔𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾 𑐮𑐵𑑅𑐐𑐸 𑐦𑐸𑐎𑑂𑐎𑑄 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐸𑐮𑐫𑑂 𑐫𑐾𑑃 𑐩𑐣𑐥𑐵𑑄 𑐴𑐾 𑐱𑐶𑐎𑑂𑐲𑐎 𑐕𑑂𑐰𑐫𑐾𑐐𑐸 𑐣𑐶𑐬𑑂𑐞𑐫 𑐩𑐣𑐥𑐵𑑄 𑐫𑐵𑑅𑐐𑐸 𑐏𑑅 𑑋 𑐣𑐶𑐖𑐷 𑐳𑑂𑐎𑐸𑐮𑐫𑑂 𑐢𑐵𑑅𑐳𑐵 𑐳𑑂𑐎𑐸𑐮 𑐠𑑅𑐥𑐶𑑄𑐳𑑄 𑐴𑐾 𑐱𑐶𑐎𑑂𑐲𑐎𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅 𑐢𑐵𑑅𑐐𑐸 𑐡𑐸 𑑋

𑐳𑐸𑐔𑐣𑐫𑑂 𑐢𑐫𑐵𑐟𑑅 𑐎𑐠𑑄 𑐠𑑂𑐰 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑐣𑐾𑐥𑐵𑐮𑐨𑐵𑐲𑐵𑑄 𑐏𑑃 𑐮𑑂𑐴𑐵𑐫𑐾 𑐳𑑅𑐥𑐶𑑄, 𑐔𑑂𑐰𑐫𑐾 𑐧𑑂𑐰𑐣𑐾 𑐳𑑅𑐥𑐶𑑄 𑐱𑐶𑐎𑑂𑐲𑐎 𑐎𑐵𑐫𑐾𑐐𑐸 𑐐𑑂𑐰𑐳𑐵𑑅 𑐫𑐾𑑃 𑐩𑐣𑐥𑐵𑑄 𑐟𑐫𑐵𑐟𑑅𑐐𑐸 𑐡𑐸 𑑋 𑐣𑐵𑐥𑑄 𑐣𑐾𑐥𑐵𑐮𑐨𑐵𑐲𑐵 𑐴𑐾 𑐰𑐶𑐲𑐫 𑐎𑐫𑐵𑑅 𑐧𑑂𑐰𑐣𑐵𑐟𑑅𑐥𑐶𑑄 𑐰 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑑄𑐎𑐾𑐐𑐸 𑐀𑐣𑐸𑐨𑐰 𑐡𑐸𑐥𑐶𑑄𑐟 𑐄𑐩𑐾𑐬𑐫𑐵 𑐴𑐡𑐧𑐣𑑂𑐡𑐷 𑐩𑐟𑐫𑐾𑐐𑐸 𑐏𑑃 𑐳𑐩𑐾𑐟 𑐳𑐸𑐔𑐣𑐫𑑂 𑐢𑐫𑐵𑐟𑑅𑐐𑐸 𑐡𑐸 𑑋
𑐫𑐾𑑃 𑐩𑐣𑐥𑐵𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫 𑐫𑐵𑐫𑐾𑐰𑑄 𑐣𑑂𑐴𑐵𑐥𑐵 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐔𑐮𑐣 𑐩𑐡𑐸𑐐𑐸 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐸𑐮𑐟𑐫𑑂𑐳𑑄 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑐣𑐵 𑐴𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐐𑐸𑐮𑐶𑐏𑐾 𑐣𑐶𑐖𑐷 𑐳𑑂𑐎𑐸𑐮𑐟𑐫𑑂𑐳𑑄 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐡𑐸 𑑋

𑐫𑐾𑑃 𑐩𑐣𑐥𑐵𑑄 𑐠𑑂𑐰 𑐣𑐶𑐬𑑂𑐞𑐫 𑐫𑐵𑐫𑐾𑐰𑑄 𑐳𑑂𑐰𑐣𑐶𑐐𑑅𑐫𑐵 𑐎𑐶𑐥𑐹 𑐣𑐥𑐵, 𑐨𑑂𑐰𑑃𑐟 𑐣𑐥𑐵 𑐮𑐐𑐵𑐫𑐟 𑐠𑐷𑐠𑐷 𑐣𑐥𑐵𑐟𑐫𑑂𑐳𑑄 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫 𑐫𑐵𑐣𑐵 𑐴𑑅𑐐𑐸 𑐡𑐸 𑑋