𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑃𑐩𑐶𑐥𑐶𑑄 𑐀𑐥𑑂𑐰𑐫𑐾𑐎𑐾𑐟 𑐡𑐾𑐫𑑂 𑐡𑐧𑐹𑐫𑐵𑐟 𑐖𑑂𑐘𑐵𑐥𑐣 𑐥𑑁

𑐫𑐾𑑃(𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵𑐟 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐧𑑂𑐰𑑃𑐩𑐶𑐥𑐶𑑄 𑐀𑐥𑑂𑐰𑐫𑐾𑐎𑐾𑐟 𑐩𑐵𑐐 𑐫𑐵𑐳𑐾𑑄 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷 𑐫𑐸𑐣𑐶𑐫𑐣𑑄 𑐠𑐣𑐫𑐵 𑐥𑑂𑐬𑐡𑐬𑑂𑐱𑐣𑐷 𑐩𑐵𑐬𑑂𑐐𑐫𑑂 𑐔𑑂𑐰𑑄𑐐𑐸 𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳 𑐰 𑐧𑐵𑐐𑐧𑐖𑐵𑐬𑐫𑑂 𑐔𑑂𑐰𑑄𑐐𑐸 𑐥𑐡𑑂𑐩𑐎𑐣𑑂𑐫𑐵 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐫𑐵𑑅 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐧𑑂𑐰𑑃𑐩𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐾𑐎𑐾𑐟 𑐩𑐵𑐐 𑐫𑐵𑐳𑐾𑑄 𑐡𑐾𑐫𑑂 𑐡𑐧𑐹𑐫𑐵𑐟 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐫𑐸𑐣𑐶𑐫𑐣𑑄 𑐎𑑂𑐫𑐵𑐩𑑂𑐥𑐳𑐫𑑂 𑐧𑐷𑐊 𑐟𑐐𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐶𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐩𑐡𑐫𑐵𑑅 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸𑐮𑐶𑑄 𑐧𑑂𑐰𑑃𑐩𑐶𑐥𑐶𑑄 𑐀𑐥𑑂𑐰𑐫𑐾𑐎𑐾𑐟 𑐩𑐵𑐐 𑐫𑐵𑐳𑐾𑑄 𑐡𑐾𑐫𑑂 𑐡𑐧𑐹𑐫𑐵𑐟 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐡𑐾𑐫𑑂 𑐡𑐧𑐹𑐫𑐵 𑐣𑑂𑐴𑐹𑐐𑐸 𑐣𑐾𑐟𑐺𑐟𑑂𑐰𑐫𑐵 𑐎𑐵𑐬𑑂𑐫𑐎𑐵𑐮 𑐳𑐸𑐠𑐵𑑄 𑐮𑐵𑐫𑐾𑐩𑐵𑑅 𑐢𑐂𑐐𑐸 𑐎𑐵𑐩𑐣𑐵 𑐫𑐵𑐳𑐾𑑄 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐩𑐶𑐳𑐵 𑐣𑑂𑐰𑐎𑐸 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶𑐫𑐵𑐟 𑐨𑐶𑑄𑐟𑐸𑐣𑐵 𑐧𑐷𑐐𑐸 𑐗𑑂𑐰𑐮𑐫𑑂 𑐧𑐷𑐊 𑐟𑐐𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑐣𑐶𑐥𑐶𑐣𑐶𑐐𑐸 𑐮𑑂𑐫𑐵𑑅 𑐀𑐥𑑂𑐰𑐫𑐾𑐎𑐾𑐟 𑐩𑐵𑐐 𑐫𑐵𑐳𑐾𑑄 𑐫𑐸𑐣𑐶𑐫𑐣𑐫𑐵 𑐣𑐵𑐫𑑅 𑐬𑐶𑐡𑐾𑐣 𑐩𑐴𑐬𑑂𑐖𑐣, 𑐡𑐸𑐖𑑅 𑐩𑐣𑐶𑐲 𑐎𑐸𑐩𑐵𑐬 ‘𑐩𑐵𑐣𑐰’𑐳𑐴𑐶𑐟𑐫𑐵 𑐥𑐸𑐔𑐮𑑄 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

‘𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷 𑐫𑐸𑐣𑐶𑐫𑐣 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐩𑑄𑐎𑐵𑑅 𑐳𑑄𑐐𑐛𑐣 𑐖𑐸𑐐𑐸 𑐰 𑐳𑑄𑐐𑐛𑐣𑐫𑐵 𑐩𑐹 𑐁𑐖𑑂𑐖𑐸 𑐢𑐂𑐐𑐸 𑐴𑐾 𑐣𑐾𑐰𑐵𑑅 𑐧𑑂𑐰𑑃𑐩𑐶𑐥𑐶𑑄𑐟 𑐣𑐾𑐰𑐵𑑅 𑐴𑐎 𑐀𑐢𑐶𑐎𑐵𑐬 𑐧𑐵𑐬𑐾 𑐳𑐔𑐾𑐟𑐣𑐵 𑐠𑐣𑐵𑑅 𑐳𑑄𑐐𑐛𑐶𑐟 𑐫𑐵𑐫𑐾𑐐𑐸 𑐣𑐵𑐥𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐏𑑅 𑑋 𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐰 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶𑐫𑐵 𑐣𑐶𑑄𑐟𑐶𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐳𑑄𑐐𑐛𑐣𑐫𑐵 𑐄𑐡𑑂𑐡𑐾𑐱𑑂𑐫 𑐖𑐹𑐐𑐸’ 𑐳𑑄𑐐𑐛𑐣𑑄 𑐮𑑅𑐮𑑂𑐴𑐵𑑅𑐐𑐸 𑐰𑐶𑐖𑑂𑐘𑐥𑑂𑐟𑐷𑐂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐬𑐟𑑂𑐣𑐬𑐵𑐖𑑂𑐫, 𑐥𑐡𑑂𑐩𑐎𑐣𑑂𑐫𑐵𑐮𑐶𑐳𑐾𑑄 𑐫𑐮𑐫𑐵 𑐥𑐵𑐚𑐣 𑐳𑑄𑐫𑐸𑐎𑑂𑐟 𑐎𑑂𑐫𑐵𑐩𑑂𑐥𑐳𑐫𑑂 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐣𑐷𑐟𑐶 𑐣𑐶𑐫𑐩𑐎𑐠𑑄 𑐗𑐶𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐡𑐟 𑐢𑐵𑑅𑐳𑐵 𑐖𑐎 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐀𑐢𑑂𑐫𑐫𑐣 𑐫𑐵𑐎𑐾 𑐦𑐂𑐐𑐸 𑐖𑐹𑐐𑐸𑐮𑐶𑑄 𑐠𑑂𑐰 𑐴𑐾 𑐩𑐴𑐶𑐣𑐵𑐫𑐵 𑐡𑐸𑐣𑐾 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐎𑐾𑐐𑐸 𑐮𑑂𑐫𑐵𑐏𑑄 𑐰𑐶𑐡𑑂𑐫𑐵𑐬𑑂𑐠𑐷 𑐨𑐬𑑂𑐣𑐵 𑐀𑐨𑐶𑐫𑐵𑐣𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐫𑐸𑐣𑐶𑐫𑐣𑑄 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋