𑐣𑐾𑐥𑐵𑐮𑐨𑐵𑐲𑐵 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐾𑐟 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐷 𑐖𑐸𑐮

𑐗𑐷𑐐𑐸 𑐳𑑄𑐰𑐵𑐡𑐡𑐵𑐟𑐵
𑐫𑐾𑑃, 𑐥𑑀𑐴𑐾𑐮𑐵𑐠𑑂𑐰 𑐟𑐺𑐟𑐶𑐫𑐵 𑑑𑑑𑑔𑑐 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾 𑐮𑐵𑑅𑐐𑐸 𑐡𑐎𑑂𑐰 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐣𑑂𑐴𑐹𑐐𑐸 𑐎𑐠𑑄𑐫𑐵 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐾𑐟 𑐱𑐣𑐶𑐧𑐵𑐬 𑐠𑐣 𑐖𑐐𑐟 𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐂 𑐕𑐐𑐹 𑐎𑐵𑐬𑑂𑐫𑐱𑐵𑐮𑐵 𑐐𑑀𑐲𑑂𑐛𑐷 𑐖𑐸𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐳𑐾𑑄 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫 𑐩𑑀𑐴𑐣 𑐖𑑀𑐱𑐷𑑄 𑐣𑐾𑐰𑐵𑑅𑐟 𑐎𑐮𑐵, 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐂 𑐟𑑅𑐩𑐶 𑐖𑐸𑐫𑐵𑑅 𑐣𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐟𑑂𑐰𑑅𑐟𑐵 𑐟𑑂𑐰𑑅𑐟𑐵 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐕𑐸𑑄 𑐃 𑐮𑐶𑐥𑐵 𑐣𑐾𑐥𑐵𑐮𑐨𑐵𑐲𑐵 𑐢𑐂𑐐𑐸 𑐣𑑄 𑐳𑑄𑐳𑑂𑐎𑐺𑐟 𑐰𑐵 𑐥𑐵𑐮𑐶 𑐠𑐾𑑄 𑐴𑐾 𑐩𑐺𑐟 𑐨𑐵𑐲𑐵 𑐖𑐸𑐂𑐐𑐸 𑐳𑑄𑐨𑐵𑐰𑐣𑐵 𑐡𑐫𑐵𑐰𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐎𑐸𑐟𑑅𑐫𑐵𑐟 𑐔𑑂𑐰𑐕𑐵𑐳𑐾𑑄 𑐗𑐷𑐐𑐸𑐥𑐵𑐏𑐾𑑄 𑐣𑑄 𑐩𑐵𑑅𑐐𑐸 𑐐𑑂𑐰𑐴𑐵𑐮𑐶 𑐫𑐵𑐫𑐾𑐟 𑐡𑐎𑑂𑐰𑐳𑐶𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐩𑑀𑐟𑐶𑐬𑐵𑐖 𑐏𑐣𑐵𑐮𑑄 𑐣𑐾𑐰𑐵𑑅𑐨𑐵𑐫𑑂 𑐢𑐂𑐐𑐸 𑐬𑐵𑐲𑑂𑐚𑑂𑐬𑐫𑐵 𑐴𑐾 𑐳𑐩𑑂𑐥𑐡𑐵 𑐖𑐹𑐐𑐸𑐮𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐠𑐸𑐐𑐸 𑐨𑐵𑐫𑑂𑐫𑐵𑐟 𑐠𑐣𑐫𑐵 𑐡𑐎𑑂𑐰 𑐧𑑂𑐰𑐣𑐾𑐎𑐸𑐠𑐶𑐂 𑐟𑐫𑐾𑐎𑐾𑐟 𑐐𑑂𑐰𑐴𑐵𑐮𑐶 𑐫𑐵𑐫𑐾𑐟 𑐟𑐫𑐵𑐬 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐠𑐣 𑐁𑑅 𑐩𑐵𑑄𑐧𑑁𑐥𑐶𑑄 𑐠𑑅 𑐩𑐳𑑂𑐟𑐫𑑂𑐟 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂 𑐮𑑂𑐴𑐵𑐎𑐵𑑅 𑐐𑐬𑑂𑐰 𑐫𑐵𑐣𑐵𑐔𑑂𑐰𑑄𑐐𑐸 𑐀𑐮𑐾 𑐩𑐳𑑂𑐟𑐫𑑂𑐳𑑄 𑐩𑐵𑑄𑐨𑐵𑐫𑑂 𑐮𑑂𑐴𑐵𑐟𑐎𑐶 𑐩𑐕𑐵𑐮𑐷𑐐𑐸 𑐎𑐚𑐸 𑐫𑐠𑐵𑐬𑑂𑐠𑐫𑐵𑐟 𑐎𑐸𑐮𑐵𑑅 𑐠𑑅𑐐𑐸 𑐨𑐵𑐳𑐫𑑂 𑐐𑐬𑑂𑐰 𑐫𑐵𑐫𑐾𑐟 𑐣𑐾𑐰𑐵𑑅𑐟𑐫𑑂𑐟 𑐳𑐮𑑂𑐮𑐵𑐴 𑐧𑐶𑐫𑐵𑐡𑐶𑐮 𑑋

𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐎𑐠𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐫𑐾𑑃𑐫𑐵 𑐡𑐎𑑂𑐰 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐎𑐠𑑄 𑐄𑐎𑐶𑐫𑐵𑐟 𑐧𑐴 𑐧𑐶𑐂𑐟 𑐕𑐐𑐹 𑐣𑐶𑐳𑐾𑑄 𑐔𑑂𑐫𑐵𑐐𑐸 𑐟𑐐𑐶𑑄 𑐟𑐎 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐣𑑂𑐴𑐹𑐐𑐸 𑐎𑐠𑑄𑐫𑐵 𑐥𑐵𑐛𑑂𑐫𑐎𑑂𑐬𑐩𑐫𑐵 𑐰𑐶𑐎𑐵𑐳 𑐫𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸𑐮𑐶𑑄 𑐄𑐎𑐠𑑄𑐫𑐵 𑐐𑑀𑐲𑑂𑐛𑐷𑐫𑐵𑐣𑐵𑑅 𑐐𑐸𑐐𑐸 𑐐𑐸𑐐𑐸 𑐰𑐶𑐲𑐫 𑐐𑑂𑐰𑑅𑐐𑐸𑐐𑐸 𑐟𑐐𑐶𑐩𑐫𑑂 𑐧𑑂𑐰𑑄𑐎𑐾𑐩𑐵𑐮𑐷 𑐢𑐎𑐵𑑅 𑐎𑑂𑐰𑑅𑐕𑐶𑐂𑐟 𑐄𑐐𑐸 𑐐𑑀𑐲𑑂𑐛𑐷 𑐫𑐵𑑅𑐐𑐸 𑐁𑐫𑑀𑐖𑐎𑑄 𑐢𑐵𑑅𑐐𑐸 𑐡𑐸 𑑋

𑐬𑐵𑐖𑐾𑐣
𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐵𑐩𑐶 𑐐𑐸𑐠𑐶𑐫𑐵 𑐀𑐢𑑂𑐫𑐎𑑂𑐲 𑐧𑐬𑐸𑐞 𑐰𑐿𑐡𑑂𑐫𑑄 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐡𑐎𑑂𑐰 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐀𑐰𑐳𑐬 𑐰𑑅𑐐𑐸𑐫𑐵𑐟 𑐋𑐟𑐶𑐴𑐵𑐳𑐶𑐎 𑐢𑐵𑐳𑐾𑑄 𑐄𑐎𑐶𑐫𑐵𑐟 𑐳𑐦𑐮 𑐫𑐵𑐫𑐾𑐟 𑐡𑐎𑑂𑐰𑑄 𑐕𑐥𑑃 𑐖𑐸𑐫𑐵𑑅 𑐠𑑅𑐠𑑅𑐐𑐸 𑐏𑑂𑐫𑐮𑑄 𑐐𑑂𑐰𑐴𑐵𑐮𑐶 𑐫𑐵𑐫𑐾𑐟 𑐂𑐣𑐵𑐥 𑐣𑑄 𑐫𑐵𑐣𑐵𑐡𑐶𑐮 𑑋

𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐡𑐸𑐖𑑅 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐠𑐸𑐎𑐶𑐫𑐵 𑐄𑐡𑑂𑐡𑐾𑐱𑑂𑐫 𑐎𑐣𑐾𑐐𑐸 𑐗𑑂𑐰𑐮𑐫𑑂 𑐫𑐵𑐎𑐣𑑄 𑐴𑐾 𑐠𑑂𑐰 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐩𑐵𑑅𑐐𑐸 𑐖𑐸𑐫𑐵𑑅 𑐠𑐸𑐎𑐶𑐂 𑐕𑐸 𑐕𑐸 𑐰𑐶𑐲𑐫 𑐡𑐸𑐠𑑂𑐫𑐵𑐎𑐾𑐩𑐵𑐮𑐷 𑐄𑐎𑐶𑐫𑐵𑐟 𑐡𑐎𑑂𑐰𑐳𑑂𑐫𑐵𑑄 𑐳𑐮𑑂𑐮𑐵𑐴 𑐰 𑐳𑐸𑐗𑐵𑐰 𑐧𑐶𑐫𑐵𑑅 𑐥𑐵𑐛𑑂𑐫𑐎𑑂𑐬𑐩𑐫𑐵 𑐕𑐐𑐹 𑐩𑐹𑐬𑑂𑐟 𑐬𑐸𑐥 𑐧𑐶𑐂𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

rzm