𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑑄 “𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱” 𑐥𑐶𑐎𑐵𑐂𑐐𑐸

𑐣𑐾𑐰𑐵𑑅 𑐰𑐵𑐒𑐩𑐫 𑐏𑑂𑐫𑑅𑐫𑐵 𑐕𑐐𑐹 𑐥𑑂𑐬𑐵𑐖𑑂𑐘𑐶𑐎 𑐳𑑄𑐳𑑂𑐠𑐵 𑐎𑐠𑑄 𑐣𑐷𑐳𑑂𑐰𑐣𑐵𑐟𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐥𑐵𑐏𑐾𑑄 𑐣𑐾𑐰𑐵𑑅𑐟𑐫𑐐𑐸 𑐰𑐶𑐰𑐶𑐢 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐕𑐐𑐹 𑐟𑑅𑐢𑑄𑐐𑐸 “𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱” 𑐡𑐫𑐾𑐎𑐾𑐐𑐸 𑐐𑑂𑐰𑐳𑐵𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶𑐂 𑐟𑐫𑐵𑐬 𑐖𑐸𑐂𑐐𑐸 𑐄𑐐𑐸 𑐧𑐺𑐴𑐟 𑐖𑑂𑐘𑐵𑐣𑐎𑑀𑐱 𑐡𑐫𑐾𑐎𑐾𑐐𑐸 𑐏𑑃𑐫𑑂 𑐰𑐶𑐖𑑂𑐘𑐥𑐶𑑄 𑐰 𑐡𑐸𑐖𑑅𑐥𑐶𑐣𑐶𑐡𑐠𑐸𑐂 𑐕𑐐𑐹 𑐀𑐨𑐶𑐩𑐸𑐏𑐷𑐎𑐬𑐞 𑐖𑑂𑐫𑐵𑐗𑑂𑐰𑑅 𑐖𑐸𑐄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐧𑐵𑐏𑑄𑐔𑑂𑐰𑐩𑐶 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐫𑐵 𑐥𑐵𑐏𑐾𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐄𑐮𑐾𑐖𑑂𑐫𑐵 𑐖𑐸𑐄𑐐𑐸 𑐄𑐐𑐸 𑐀𑐨𑐶𑐩𑐸𑐏𑐷𑐎𑐬𑐞 𑐖𑑂𑐫𑐵𑐗𑑂𑐰𑐮𑐫𑑂 𑐂𑐟𑐶𑐴𑐵𑐳𑐰𑐶𑐡𑑂 𑐜𑐵. 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬𑑄 𑐖𑑂𑐘𑐵𑐣𑐎𑑀𑐲 𑐐𑐸𑐎𑐠𑑄 𑐣𑑂𑐴𑑂𑐫𑐵𑐎𑐾𑐐𑐸 𑐢𑐂𑐐𑐸 𑐏𑑃𑐫𑐵 𑐎𑐵𑐬𑑂𑐫𑐥𑐟𑑂𑐬 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅𑐳𑐵 𑐳𑐵𑐴𑐶𑐟𑑂𑐫 𑐳𑐩𑐵𑐮𑑀𑐔𑐎 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑑄 𑐣𑐾𑐥𑐵𑐮𑐨𑐵𑐲𑐵 𑐔𑑂𑐰𑐫𑐾𑐐𑐸 𑐕𑐸𑑄 𑐣𑐶𑐫𑐩𑐫𑐵 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵 𑐡𑐶𑐮 𑑋

𑐀𑐠𑐾𑐴𑐾𑐟𑐸𑑄 𑐊𑐎𑐾𑐜𑐾𑐩𑐷𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐥𑐬𑐶𑐫𑑀𑐖𑐣𑐵 𑐎𑐵𑐬𑑂𑐫𑐰𑐶𑐢𑐶 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐀𑐨𑐶𑐩𑐸𑐏𑐷𑐎𑐬𑐞 𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐜𑐵. 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫𑑄 𑐰𑑂𑐫𑐎𑑂𑐟𑐶 𑐩𑑂𑐴𑐳𑐷𑐎𑐵𑐫𑐵𑐟 𑐎𑐫𑐵 𑐠𑑅𑐐𑐸 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐴𑑂𑐫𑐧𑑂𑐰𑑅𑐐𑐸 𑐖𑑂𑐫𑐵𑐥𑑁𑐫𑐵𑐟 𑐎𑐫𑐵 𑐧𑐺𑐴𑐟 𑐳𑐴𑐮𑐴 𑐖𑐸𑐄𑐐𑐸 𑐀𑐨𑐶𑐩𑐸𑐏𑐷𑐎𑐬𑐞 𑐖𑑂𑐫𑐵𑐗𑑂𑐰𑑅 𑐢𑐸𑑄𑐎𑐵𑑅 𑐁𑑅 “𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱”𑐫𑐵 𑐟𑐫𑐵𑐬𑐷𑐂 𑐕𑐥𑐮𑐵𑑅 𑐀𑐗 𑐣𑑂𑐴𑑂𑐫𑐵𑑄𑐰𑑄𑐐𑐸 𑐡𑐸 𑐢𑐵𑐳𑐾𑑄 𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐣𑐵𑐫𑑅 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅𑐖𑐸𑑄 𑐠𑑂𑐰 𑐰𑐺𑐴𑐟 𑐀𑐨𑐶𑐫𑐵𑐣𑐫𑑂 𑐠𑑅𑐠𑑅𑐐𑐸𑐥𑐵𑐏𑐾𑑄 𑐦𑐹𑐔𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐟 𑐳𑐎𑐳𑐶𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋