𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐱𑐶𑐮𑐵𑐥𑐟𑑂𑐬

𑐣𑐾𑐥𑐵𑐮𑐨𑐵𑐲𑐵 𑐣𑐾𑐥𑐵𑑅𑐫𑐵 𑐥𑐸𑐮𑐵𑑄𑐐𑐸 𑐨𑐵𑐫𑑂 𑐩𑐢𑑂𑐫𑐾 𑐕𑐐𑐹 𑐏𑑅 𑑋 𑐠𑐸𑐎𑐶𑐫𑐵 𑐕𑑂𑐫𑐮𑐵𑐧𑐸𑐮𑐵 𑐟𑐵𑑅 𑐃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐳𑐷𑐡𑐸𑑋 𑐣𑐾𑐥𑐵𑑅 𑐐𑐵𑐮𑐫𑑂 𑐮𑐸𑐫𑐵 𑐰𑑅𑐐𑐸 𑐠𑐷𑐠𑐷 𑐡𑐳𑑂𑐟𑐵𑐰𑐾𑐖𑐥𑐵𑐏𑐾𑑄 𑐠𑑂𑐰 𑐏𑑃 𑐳𑑂𑐥𑐲𑑂𑐚 𑐖𑐹 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐐𑐹 𑐣𑐶𑐐𑐹 𑐏𑑃𑐐𑑂𑐰𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐳𑑂𑐟𑐵𑐰𑐾𑐖𑐟 𑐮𑐵 𑐫𑐎𑑂𑐰 𑐥𑐸𑐮𑐵𑑄𑐐𑐸 𑐴𑐾 𑐮𑐸𑐫𑐵 𑐰𑑅𑐐𑐸 𑐡𑐸𑑋 𑐀𑐠𑐾 𑐏𑑅𑐳𑐵𑑄 𑐥𑐹𑐰𑑄𑐎 𑐰𑐵𑐎𑑂𑐫 𑐳𑐩𑐾𑐟 𑐡𑐸𑐠𑑂𑐫𑐵𑐎𑐵𑑅 𑐔𑑂𑐰𑐫𑐵𑐟𑑅𑐐𑐸 𑐡𑐳𑑂𑐟𑐵𑐰𑐾𑐖 𑐢𑐵𑑅𑐳𑐵 𑐫𑐮𑐫𑑂 𑐮𑐸𑐫𑐵 𑐰𑑅𑐐𑐸 𑐕𑐐𑐹 𑐟𑐵𑐜𑐥𑐟𑑂𑐬 𑐏𑑅 𑑋 𑐣𑐾𑐥𑐵𑐮 𑐳𑑄𑐰𑐟𑑂 𑑒𑑓𑑕 𑐫𑑂 𑐔𑑂𑐰𑐫𑐵𑐟𑑅𑐐𑐸 𑐄𑐐𑐸 𑐟𑐵𑐜𑐥𑐟𑑂𑐬𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐥𑐲𑑂𑐚 𑐥𑑂𑐬𑐫𑑀𑐐 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾 𑐡𑐸𑐐𑐸 𑐏𑑅 𑑋 𑐫𑐮 𑐄𑐎𑐸𑐴𑐵𑐮𑐫𑑂 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵𑐟𑑅𑐐𑐸 𑐄𑐐𑐸 𑐟𑐵𑐜𑐥𑐟𑑂𑐬 𑐁𑑅 𑐟𑐎 𑐮𑐸𑐫𑐵 𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐡𑐳𑑂𑐟𑐵𑐰𑐾𑐖 𑐏𑑅 𑑋

𑐠𑑂𑐰 𑐟𑐵𑐜𑐥𑐟𑑂𑐬 𑐢𑐸𑑄𑐎𑐵𑑅 𑐮𑑂𑐰𑐴𑑃𑐟𑐫𑑂 𑐴𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐥𑐲𑑂𑐚 𑐥𑑂𑐬𑐫𑑀𑐐 𑐫𑐵𑐣𑐵𑐟𑑅𑐐𑐸 𑐱𑐶𑐮𑐵𑐥𑐟𑑂𑐬 𑐢𑐵𑑅𑐳𑐵 𑐳𑐎𑑂𑐰𑐫𑑂 𑐮𑐸𑐫𑐵 𑐰𑑅𑐐𑐸 𑐏𑑅 𑑋 𑐟𑐟𑑂𑐎𑐵𑐮𑐷𑐣 𑐖𑐸𑐖𑐸𑐫𑐵 𑐣𑐵𑑄 𑐴𑐾 𑐳𑑂𑐥𑐲𑑂𑐚 𑐎𑐶𑐚𑐵𑐣 𑐫𑐵𑐣𑐵𑑅 𑐱𑐶𑐮𑐵𑐮𑐾𑐏𑐫𑐵 𑐬𑐸𑐥𑐫𑑂 𑐟𑐫𑐵𑐟𑑅𑐐𑐸 𑐠𑑂𑐰 𑐡𑐳𑑂𑐟𑐵𑐰𑐾𑐖𑐥𑐵𑐏𑐾𑑄 𑐄𑐐𑐸 𑐂𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐬𑐵𑐖𑑂𑐫𑑄 𑐳𑐬𑐎𑐵𑐬𑐷 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐕𑑂𑐫𑐮𑐾𑐢𑐸𑑄𑐎𑐹𑐐𑐸 𑐨𑐵𑐲𑐵 𑐏𑑅 𑐢𑐂𑐐𑐸 𑐣𑑄 𑐥𑐸𑐲𑑂𑐚𑐶 𑐫𑐵𑐂 𑑋

𑐣𑐾.𑐳𑑄. 𑑒𑑙𑑓 (𑐰𑐶.𑐳𑑄. 𑑑𑑒𑑒𑑙 𑐥𑐵𑐏𑐾) 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐟𑐫𑐵𑐟𑑅𑐐𑐸 𑐏𑑅 𑑋 𑐠𑑂𑐰 𑐩𑐸𑐎𑑂𑐎𑑄 𑐳𑑂𑐰𑐗𑑂𑐰𑑅𑐖𑐎 𑐡𑐸𑐐𑐸 𑐱𑐶𑐮𑐵𑐥𑐟𑑂𑐬 𑐏𑑅 𑑋 𑐳𑐎𑑂𑐰 𑐰𑐖𑑂𑐬𑐫𑑀𑐐𑐶𑐣𑐷 𑐡𑐾𑐐𑑅 (𑐔𑑂𑐰𑐫𑑂 𑐔𑑂𑐰𑑄𑐐𑐸) 𑐫𑐵 𑐣𑑂𑐴𑑂𑐫𑑅𑐣𑐾𑐳𑑄 𑐔𑑂𑐰𑑄𑐐𑐸 𑐕𑐐𑐹 𑐔𑐷𑐢𑑄𑐐𑐸 𑐳𑑂𑐟𑐩𑑂𑐨𑐫𑑂 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐟𑐫𑐵𑐟𑑅𑐐𑐸 𑐏𑑅 𑑋
𑐠𑐸𑐎𑐷 𑐔𑑂𑐰𑐫𑐵𑐟𑑅𑐐𑐸 𑐡𑐸 –
𑑑) 𑐰𑑄 𑐳𑑂𑐰𑐳 𑐐𑑂𑐰𑐮 𑐀𑐢𑐶𑐎 𑐳𑑄𑐰-
𑑒) 𑐟𑑂 𑐣𑑂𑐫𑐱𑐳𑑅 𑐬𑐐𑐸𑐥𑐟𑐶 𑐬𑐸𑐡-
𑑓) 𑐬𑐡𑐾𑐰 𑐬𑐵𑐖𑐵 𑐰𑐶𑐖𑑂𑐫𑐬𑐥𑐟𑑂𑐰𑑄
(𑐅𑑃 𑑋 𑐣𑐾.𑐳𑑄. 𑑒𑑙𑑓 𑐳 𑐬𑐑𑐸𑐥𑐟𑐶 𑐬𑐸𑐡𑑂𑐬𑐡𑐾𑐰 𑐬𑐵𑐖𑐵𑐫𑐵 𑐰𑐶𑐖𑐫𑐬𑐵𑐖𑑂𑐫𑐫𑑂 (𑐠𑑂𑐰 𑐟𑐫𑐵𑐟𑑅𑐐𑐸 𑐏𑑅) 𑑋

𑐂𑐟𑐶𑐴𑐵𑐳𑐎𑐵𑐬 𑐢𑐣𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐳𑑂𑐰𑐗𑑂𑐰𑑅 𑐖𑐎 𑐡𑐸𑐐𑐸 𑐀𑐨𑐶𑐮𑐾𑐏 𑐏𑑅𑐳𑐵𑑄 𑐟𑐟𑑂𑐎𑐵𑐮𑐷𑐣 𑐂𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐴𑐟𑑂𑐰𑐫𑐵𑐟 𑐄𑐖𑐵𑐐𑐬 𑐫𑐵𑐂 𑐠𑑂𑐰 𑐕𑐐𑐹 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐡𑐳𑑂𑐟𑐵𑐰𑐾𑐖 𑐖𑐹𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸𑑋 𑐠𑐸𑐎𑐶𑑄 𑐮𑐶𑐔𑑂𑐕𑐰𑐷𑐎𑐵𑐮𑐫𑐵 𑐕𑐸𑑄 𑐨𑐔𑐵 𑐩𑐴𑐟𑑂𑐰 𑐎𑐣𑐾𑐐𑐸 𑐫𑐵𑑅𑐳𑐵𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐬𑐵𑐖𑑂𑐫𑑄 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐳𑐩𑐾𑐟 𑐥𑑂𑐬𑐫𑑀𑐐 𑐱𑐸𑐬𑐸 𑐫𑐵𑑅𑐐𑐸 𑐣𑑂𑐴𑐵𑐥𑐵𑑄𑐐𑐸 𑐡𑐳𑑂𑐟𑐵𑐰𑐾𑐖𑐫𑐵 𑐬𑐸𑐥𑐫𑑂 𑐎𑐵𑐫𑐾𑐩𑐵𑑅𑐐𑐸 𑐏𑑃 𑐰𑐫𑑂 𑐎𑐮𑑄 𑐄𑐮𑑂𑐮𑐾𑐏 𑐫𑐵𑐣𑐵𑐡𑐷𑐐𑐸 𑐡𑐸𑑋

𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐫𑐵 𑐱𑐶𑐮𑐵𑐥𑐟𑑂𑐬𑐟 𑐳𑑄𑐳𑑂𑐎𑐺𑐟 𑐨𑐵𑐳𑑄 𑐔𑑂𑐰𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐧𑐮𑐾 𑐳𑑄𑐳𑑂𑐎𑐺𑐟 𑐨𑐵𑐫𑑂 𑐖𑐣𑐨𑐵𑐲𑐵𑐫𑐵 𑐬𑐸𑐥𑐫𑑂 𑐥𑑂𑐬𑐫𑑀𑐐𑐫𑑂 𑐩𑐡𑐸𑐳𑐵𑑄 𑐳𑐬𑐎𑐵𑐬𑑄 𑐳𑐵𑐬𑑂𑐰𑐖𑐣𑐶𑐎 𑐬𑐸𑐥𑑄 𑐥𑑂𑐬𑐫𑑀𑐐 𑐫𑐵𑐂𑐐𑐸 𑐨𑐵𑐫𑑂 𑐢𑐵𑑅𑐳𑐵 𑐳𑑄𑐳𑑂𑐎𑐺𑐟 𑐴𑐾 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐠𑑂𑐰 𑐱𑐶𑐮𑐵𑐥𑐟𑑂𑐬𑑄𑐣𑐶𑐳𑐾𑑄 𑐳𑑄𑐳𑑂𑐎𑐺𑐟 𑐫𑐵𑐎𑑅𑐔𑐶𑐫𑐵 𑐄𑐐𑐸 𑐕𑑂𑐫𑐮𑐵𑐧𑐸𑐮𑐵𑐫𑐵 𑐥𑐬𑐩𑑂𑐥𑐬𑐵 𑐟𑑀𑐜𑐾 𑐖𑐸𑐫𑐵𑑅 𑐣𑑂𑐴𑐹𑐐𑐸 𑐥𑐬𑐩𑑂𑐥𑐬𑐵 𑐱𑐸𑐬𑐸 𑐖𑐹𑐐𑐸 𑐏𑐣𑐾𑐡𑐸 𑑋

𑐳𑐎𑑂𑐰𑐫𑑂 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐣𑑂𑐴𑐵𑐥𑐵𑑄𑐏𑐸𑐳𑐷 𑐥𑐟𑑂𑐟𑐵 𑐮𑐐𑐾 𑐫𑐵𑐣𑐵𑐡𑐷𑐥𑐶𑑄 𑐣𑑄 𑐢𑐣𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐖𑐐𑐡𑐷𑐱𑐔𑐣𑑂𑐡𑑂𑐬 𑐬𑐾𑐐𑑂𑐩𑐷 𑐏𑑅 𑑋 𑐰𑐫𑑂𑐎𑑅𑐥𑐶𑑄𑐳𑑄 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐧𑐵𑐬𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 ‘𑐊𑐥𑐶𑐐𑑂𑐬𑐵𑐦𑐶𑐎 𑐳𑐬𑑂𑐨𑐾 𑐬𑐶𑐥𑑀𑐬𑑂𑐚’𑐫𑑂 𑐕𑐵𑐥𑐾 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐠𑑂𑐰 𑐱𑐶𑐮𑐵𑐥𑐟𑑂𑐬𑐥𑐵𑐏𑐾𑑄 𑐳𑐎𑑂𑐰𑐫𑐵 𑐢𑐵𑐬𑑂𑐩𑐶𑐎-𑐳𑐵𑑄𑐳𑑂𑐎𑐺𑐟𑐶𑐎 𑐂𑐟𑐶𑐴𑐵𑐳𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾 𑐦𑐂𑐐𑐸 𑐮𑐶𑐳𑐾𑑄 𑐮𑐶𑐔𑑂𑐕𑐰𑐷 𑐖𑐸𑐖𑐸𑐥𑐶𑐣𑐶 𑐰𑑄𑐱 𑐀𑐢𑑂𑐫𑐫𑐣 𑐫𑐵𑐫𑐾 𑐦𑐂𑐐𑐸 𑐏𑑃 𑐣𑑄 𑐰𑐖𑑂𑐬𑐵𑐔𑐵𑐬𑑂𑐫𑑄 𑐢𑐫𑐵𑐡𑐷𑐐𑐸 𑐡𑐸𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐠𑐸𑐎𑐶𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑑄 𑐁𑐏𑑅 𑐎𑐶𑐫𑐵𑑅 𑐔𑑂𑐰𑐫𑐵𑐟𑑅𑐐𑐸 𑐣𑑂𑐴𑐵𑐥𑐵𑑄𑐐𑐸 𑐱𑐶𑐮𑐵𑐥𑐟𑑂𑐬 𑐣𑑄 𑐠𑑂𑐰𑐴𑐾 𑐏𑑅 𑐢𑐫𑐵𑐡𑐷𑐐𑐸 𑐡𑐸 𑑋

𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐧𑑀𑐮𑐷𑐔𑐵𑐮𑐷𑐂 𑐖𑐎 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐠𑐣𑑄𑐣𑐶𑐳𑐾𑑄 𑐮𑐾𑐏𑐥𑐝 𑐳𑐩𑐾𑐟 𑐖𑐸𑐂𑐐𑐸 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐥𑑂𑐬𑐫𑑀𑐐 𑐫𑐵𑑅𑐐𑐸𑐮𑐶𑑄 𑐠𑑂𑐰 𑐨𑐵𑐲𑐵 𑐰𑐶𑐎𑐵𑐳𑐫𑐵 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐩𑑀𑐜 𑐳𑐩𑐾𑐟 𑐖𑐹𑐐𑐸 𑐏𑐣𑐾𑐡𑐸𑑋 𑐣𑑂𑐰𑐰𑐵𑐫𑐾𑐐𑐸𑐮𑐷 𑐖𑐎 𑐳𑐷𑐩𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐨𑐵𑐲𑐵 𑐖𑐧 𑐔𑑂𑐰𑐫𑐾𑐐𑐸𑐮𑐷 𑐣𑑄 𑐥𑑂𑐬𑐫𑑀𑐐 𑐖𑐸𑐂, 𑐰𑐫𑐵𑑄 𑐮𑐶𑐥𑐵 𑐄𑐐𑐸 𑐨𑐵𑐲𑐵𑑄 𑐄𑐣𑑂𑐣𑐟𑐶𑐫𑐵 𑐮𑑃𑐥𑐸 𑐖𑑂𑐰𑐣𑐷 𑑋 𑐣𑐾𑐥𑐵𑐮𑐨𑐵𑐲𑐵𑑄 𑐠𑐣𑑄𑐣𑐶𑐳𑐾𑑄 𑐴𑐾 𑐄𑐣𑑂𑐣𑐟𑐶𑐫𑐵 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐟𑑂𑐰𑐵𑐠𑑅 𑐐𑑅𑐐𑐸 𑐰𑐶𑐱𑑂𑐮𑐾𑐲𑐞 𑐨𑐵𑐲𑐵𑐰𑐶𑐡𑑂𑐟𑐫𑑂𑐳𑑄 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐂𑐟𑐶𑐳𑐎𑐵𑐬 𑐢𑐣𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐠𑑂𑐰 𑐱𑐶𑐮𑐵𑐥𑐟𑑂𑐬𑐫𑑂 𑐥𑑂𑐬𑐫𑑀𑐐 𑐖𑐸𑐫𑐵𑐔𑑂𑐰𑑄𑐐𑐸 𑐨𑐵𑐲𑐵𑑄 𑐣𑐾𑐥𑐵𑐮𑐨𑐵𑐲𑐵𑑄 ‘𑐬𑐥𑐵’ 𑐥𑑂𑐬𑐟𑑂𑐫𑐫𑐫𑐵 𑐧𑐵𑑄𑐮𑐵𑐎 𑐥𑑂𑐬𑐫𑑀𑐐 𑐫𑐵𑑅𑐐𑐸 𑐰 𑐠𑑂𑐰 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐥𑐎𑑂𑐲 𑐖𑐹𑐐𑐸 𑐏𑑃 𑐣𑑄 𑐄𑐮𑑂𑐮𑐾𑐏 𑐫𑐵𑐣𑐵𑐡𑐷𑐐𑐸 𑐡𑐸𑑋 𑐣𑐾𑐥𑐵𑐮𑐨𑐵𑐲𑐵𑑄 ‘𑐬𑐥𑐵’ 𑐥𑑂𑐬𑐟𑑂𑐫𑐫 𑐥𑑂𑐬𑐫𑑀𑐐 𑐫𑐵𑐫𑐾 𑐳𑐫𑐾𑐎𑐾𑐰𑑄 𑐳𑑄𑐳𑑂𑐎𑐺𑐟 𑐰 𑐩𑐾𑐩𑐾𑐐𑐸 𑐨𑐵𑐫𑑂 𑐫𑐵 𑐏𑑃𑐐𑑂𑐰𑑅 𑐳𑐩𑐾𑐟 𑐠𑑅𑐐𑐸 𑐨𑐵𑐲𑐵𑐫𑑂 𑐡𑐸𑐎𑐫𑐵𑑅 𑐥𑑂𑐬𑐫𑑀𑐐 𑐫𑐵𑐫𑐾𑐟 𑐳𑐎𑑂𑐲𑐩 𑐖𑐹𑐐𑐸 𑐏𑑃 𑐣𑑄 𑐰𑐖𑑂𑐬𑐵𑐔𑐵𑐬𑑂𑐫𑑄 𑐎𑐣𑐵𑐡𑐷𑐐𑐸 𑐡𑐸𑑋 𑐠𑐸𑐎𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐮𑐾𑐏𑑂𑐫 𑐥𑐬𑐩𑑂𑐥𑐬𑐵𑐫𑐵𑐟 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐎𑐾𑐟 𑐫𑐎𑑂𑐰 𑐴𑐾 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐣𑑄 𑐰𑐫𑑂𑐎𑑅𑐫𑐵 𑐡𑐵𑐰𑐷 𑐡𑐸𑑋 𑐠𑐸𑐎𑐷 𑐏𑐳 𑐣𑐾𑐥𑐵𑐮𑐷 𑐨𑐵𑐳𑑄 ‘𑐬𑐸𑐡𑑂𑐬𑐡𑐾𑐰𑐎𑑀 𑐰𑐶𑐖𑐫𑐬𑐵𑐖𑑂𑐫𑐩𑐵’ 𑐢𑐵𑐫𑐾𑐐𑐸 𑐮𑐵𑐐𑐶𑑄 ‘𑐰𑐶𑐖𑐫𑐬𑐥𑐟𑑂𑐰𑑄’ 𑐢𑐂𑐐𑐸 𑐏𑑃𑐐𑑂𑐰𑑅 𑐥𑑂𑐬𑐫𑑀𑐐 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐠𑑂𑐰 𑐱𑐧𑑂𑐡𑐫𑐵 𑐥𑑂𑐬𑐫𑑀𑐐𑑄 𑐣𑐾𑐥𑐵𑐮𑐨𑐵𑐲𑐵 𑐩𑐾𑐩𑐾𑐐𑐸 𑐨𑐵𑐫𑑂𑐫𑐵 𑐏𑑃𑐐𑑂𑐰𑑅 𑐳𑐩𑐾𑐟 𑐡𑐸𑐎𑐫𑐵𑑅 𑐥𑑂𑐬𑐫𑑀𑐐 𑐫𑐵𑐫𑐾𑐟 𑐳𑐎𑑂𑐲𑐩 𑐖𑐸𑐂𑐢𑐸𑑄𑐎𑐹𑐐𑐸 𑐏𑐣𑐾𑐡𑐸 𑑋 𑐮𑐶𑐳𑐾𑑄 𑐳𑑄𑐰𑐟𑑂𑐫𑐵 𑐀𑑄𑐎 𑐣𑑄 𑐁𑐏𑐮𑑄 𑐴𑐾 𑐔𑑂𑐰𑐫𑐵𑐟𑑅𑐐𑐸𑐮𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑑄𑐏𑑂𑐫𑐵𑐰𑑀𑐢𑐎 𑐱𑐧𑑂𑐡𑐰𑐶𑐢𑐶 𑐣𑑄 𑐠𑑂𑐰𑐴𑐾 𑐂𑐮𑐫𑑂 𑐣𑐶𑐱𑑂𑐔𑐶𑐟 𑐫𑐵𑐫𑐾𑐢𑐸𑑄𑐎𑐹𑐐𑐸 𑐏𑑃 𑐣𑑄 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐎𑐠𑑄 𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳𑐫𑑂 𑐠𑑂𑐰 𑐢𑐸𑑄𑐎𑐵𑑅 𑐣𑐾𑐥𑐵𑐮𑐨𑐵𑐲𑐵𑑄 𑐩𑐾𑐩𑐾𑐐𑐸 𑐱𑐶𑐮𑐵𑐥𑐟𑑂𑐬 𑐣𑑄 𑐟𑐫𑐾𑐐𑐸 𑐥𑐬𑐩𑑂𑐥𑐬𑐵 𑐱𑐸𑐬𑐸 𑐖𑐸𑐫𑐵 𑐰𑑄𑐐𑐸 𑐏𑐣𑐾𑐡𑐸𑑋 𑐐𑐸𑐮𑐶𑑄 𑐱𑐶𑐮𑐵𑐥𑐟𑑂𑐬𑐫𑑂 𑐢𑐵𑑅𑐳𑐵 𑐔𑑂𑐰𑐫𑑂𑐳𑑄 𑐳𑑂𑐎𑐺𑐟 𑐨𑐵𑐳𑑄 𑐕𑐸𑑄 𑐗𑑂𑐰𑑅 𑐔𑑂𑐰𑐫𑐾𑐢𑐸𑑄𑐎𑐵𑑅 𑐰𑐫𑐵𑑄 𑐮𑐶𑐥𑐵 𑐣𑐾𑐥𑐵𑐮𑐨𑐵𑐲𑐵𑑄 𑐣𑑄 𑐰𑐶𑐰𑐬𑐞 𑐔𑑂𑐰𑐫𑐾𑐐𑐸 𑐫𑐵𑐣𑐵𑐟𑑅𑐐𑐸 𑐣𑑄 𑐮𑐹𑐐𑐸 𑐡𑐸𑑋 𑐕𑐐𑐹 𑐴𑐾 𑐱𑐶𑐮𑐵𑐮𑐾𑐏𑐫𑑂 𑐣𑐶𑐐𑐹 𑐨𑐵𑐫𑑂 𑐥𑑂𑐬𑐫𑑀𑐐 𑐫𑐵𑐫𑐾𑐐𑐸 𑐔𑐮𑐣 𑐀𑐣 𑐰𑑅𑐐𑐸 𑐳𑐷𑐡𑐸 𑑋

𑐳𑐎𑑂𑐰𑐫𑐵 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐳𑐎𑑂𑐰 𑐡𑐾𑐫𑑂 𑐰 𑐖𑐸𑐖𑐸 𑐬𑐸𑐡𑑂𑐬𑐡𑐾𑐰𑐫𑐵 𑐂𑐟𑐶𑐴𑐵𑐳 𑐳𑐷𑐎𑐾𑐐𑐸 𑐮𑐵𑐐𑐶𑑄 𑐣𑑄 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐳𑐵𑐩𑐐𑑂𑐬𑐷 𑐖𑐹𑐐𑐸 𑐡𑐸𑑋 𑐀𑐠𑐾 𑐏𑑅𑐳𑐵𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐶𑐎𑐵𑐳𑐎𑑂𑐬𑐩𑐫𑐵 𑐳𑐰𑐵𑐮𑐫𑑂 𑐢𑐵𑑅𑐳𑐵 𑐠𑑂𑐰 𑐀𑐗 𑐟𑑅𑐢𑑄𑐐𑐸 𑐡𑐳𑑂𑐟𑐵𑐰𑐾𑐖 𑐏𑑅 𑑋 𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐖𑑂𑐰𑐮𑑄 𑐣𑑄 𑐏𑑅 𑑋 𑐠𑐸𑐎𑐶𑐫𑐵𑐟 𑐕𑐸𑑄 𑐣𑑄 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵 𑐟𑐫𑐾𑐩𑐵𑑅𑐐𑐸 𑐗𑐷 𑐳𑐎𑐳𑑂𑐫𑐵𑑄 𑐎𑐬𑑂𑐟𑐰𑑂𑐫 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐴𑐬𑐾𑐎 𑐥𑐸𑐳𑑂𑐟𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐰 𑐖𑐶𑐖𑑂𑐘𑐵𑐳𑐸𑐫𑐵 𑐮𑐵𑐐𑐶𑑄 𑐠𑑂𑐰 𑐕𑐐𑐹 𑐟𑑅𑐢𑑄𑐐𑐸 𑐳𑑂𑐬𑑀𑐟 𑐖𑐸𑐂𑐐𑐸 𑐏𑑃𑐫𑑂 𑐱𑑄𑐎𑐵 𑐩𑐡𑐸 𑑋

 

–𑐳𑐸𑐬𑐾𑐱 𑐩𑐵𑐣𑐣𑑂𑐢𑐬