𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑑄 𑐧𑑂𑐫𑐹𑐐𑐸 𑐏𑑂𑐫𑐵𑐔𑑂𑐰𑑅

𑐠𑑂𑐰 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬 𑐱𑐧𑑂𑐡 𑐰 𑐱𑐧𑑂𑐡 𑐣𑐵𑐥𑐫𑐵 𑐁𑐔𑐬𑐞, 𑐐𑐾𑐳𑑂𑐔𑐬 𑐣𑐾𑐥𑐵𑐮𑐷 𑐳𑐩𑐵𑐖𑐫𑑂 𑐣𑑂𑐫𑑄𑐎𑑄 𑐣𑑂𑐫𑑄, 𑐣𑑂𑐫𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰 𑐕𑐐𑐹 𑐁𑐡𑐬, 𑐳𑐟𑑂𑐎𑐵𑐬 𑐳𑐡𑑂 𑐨𑐵𑐰𑐫𑐵 𑐥𑑂𑐬𑐟𑐷𑐎 𑐱𑐧𑑂𑐡 𑐰 𑐁𑐔𑐬𑐞 𑐏𑑅 𑑋 𑐱𑐧𑑂𑐡𑐫𑐵 𑐣𑐵𑐥𑐣𑐵𑐥𑑄 𑐐𑐸𑐮𑐶𑑄𑐳𑐶𑐣𑑄 𑐖𑑂𑐰𑐖𑐮𑐥𑐵 𑐫𑐵𑐣𑐵𑑅 𑐮𑑂𑐴𑐵𑑅 𑐮𑑂𑐰𑐵𑐎𑐵𑑅, 𑐐𑐸𑐮𑐶𑐳𑐶𑐣𑑄 𑐕𑑂𑐫𑑄 𑐎𑑂𑐰𑐕𑐸𑐣𑐵𑑅, 𑐐𑐸𑐮𑐶𑐳𑐶𑐣𑑄 𑐮𑐵 𑐕𑑂𑐫𑑄 𑐖𑐎 𑐩𑐏𑐸, 𑐧𑐵𑐩𑑂𑐴 𑐟𑐎 𑐎𑑂𑐰𑐕𑐸𑐣𑐵𑑅 𑐥𑑂𑐬𑐎𑐚 𑐫𑐵𑐫𑐾𑐐𑐸 𑐫𑐵𑐂 𑑋 𑐠𑑂𑐰 𑐕𑐐𑐹 𑐏𑐵𑐳 𑐫𑐵𑐣𑐵𑑅 𑐠𑑅 𑐳𑑂𑐰𑐫𑐵𑑄 𑐔𑑂𑐰𑐫𑑂 𑐔𑑂𑐰𑑄𑐩𑑂𑐴𑐾𑐳𑐶𑐟 𑐧𑐶𑐂𑐐𑐸 𑐳𑐩𑑂𑐩𑐵𑐣 𑐏𑑅 𑑋 𑐰 𑐣𑐵𑐟𑐵𑐎𑐸𑐟𑐵𑐫𑐵 𑐣𑑄 𑐖𑐸𑐂𑐦𑐸, 𑐩𑐵𑐣–𑐳𑐩𑑂𑐩𑐵𑐣𑐫𑐵 𑐣𑑄 𑐖𑐸𑐂𑐦𑐸, 𑐨𑐵𑐂-𑐨𑐵𑐟𑐺𑐟𑑂𑐰 𑐰 𑐩𑐶𑐟𑑂𑐬𑐟𑐵𑐫𑐵 𑐣𑑄 𑐖𑐸𑐂𑐦𑐸 𑑋

𑐠𑑂𑐰 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑐫𑐵 𑐔𑐮𑐣 𑐰𑐵 𑐰𑑂𑐫𑐰𑐴𑐵𑐬 𑐐𑐧𑐮𑐫𑑂𑐣𑐶𑐳𑐾𑑄 𑐖𑐸𑐮 𑐢𑐫𑐵𑐐𑐸 𑐮𑐵 𑐖𑐶𑑄 𑐩𑐳𑑂𑐫𑐸, 𑐢𑐵𑐫𑐾𑐩𑐦𑐸 𑑋 𑐀𑐫𑑂𑐳𑐵𑑄𑐟𑐧𑐶 𑐩𑐵𑐣𑐰 𑐳𑐨𑑂𑐫𑐟𑐵 𑐮𑐶𑐄𑐮𑐶𑐄 𑐰𑐶𑐎𑐵𑐳 𑐖𑐹𑐐𑐸 𑐖𑐸𑐂 𑐢𑐎𑐵𑑅 𑐢𑐵𑐫𑐾𑐦𑐸 𑑋 𑐴𑐵𑐣𑑄 𑐩𑐵𑐣𑐰 𑐳𑐩𑐵𑐖𑐫𑑂 𑐩𑐵𑐣𑐰 𑐩𑐵𑐟𑑂𑐬𑑄 𑐐𑑂𑐬𑐴𑐞 𑐫𑐵𑐣𑐵𑐔𑑂𑐰𑑄𑐐𑐸 𑐠𑐷𑐠𑐷 𑐢𑐬𑑂𑐩𑐱𑐵𑐳𑑂𑐟𑑂𑐬, 𑐳𑑄𑐳𑑂𑐎𑐺𑐟𑐶𑐂 𑐣𑑄 𑐠𑐸𑐎𑐶𑐫𑐵 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐩𑐵𑐣𑐰 𑐰 𑐡𑐾𑐰𑐷𑐡𑐾𑐰𑐟𑐵𑐫𑐵 𑐱𑑂𑐬𑐺𑐲𑑂𑐚𑐶𑐣𑐶𑐳𑐾𑑄 𑐔𑐮𑐣𑐔𑐮𑑂𑐟𑐷𑐂 𑐰𑑅𑐐𑐸 𑐢𑐎𑐵𑑅 𑐢𑐵𑐫𑐾𑐦𑐸 𑑋 𑐐𑐠𑐾𑐎𑐶 𑑉𑐣𑐩𑑅 𑐧𑑂𑐬𑐩𑑂𑐴𑐵𑐫, 𑑉𑐣𑐩𑑅 𑐳𑐾𑐰𑐵𑐫, 𑑉𑐣𑐩𑑅 𑐧𑐵𑐳𑐸𑐡𑐾𑐰𑐵𑐫 𑐁𑐡𑐶 𑐴𑐶𑐣𑑂𑐡𑐹 𑐢𑐬𑑂𑐩𑐫𑑂 𑐠𑐷𑐠𑐷 𑐡𑑂𑐫𑑅𑐡𑑂𑐫𑑅𑐟𑐫𑑂𑐟 𑐣𑐩𑑅 𑐣𑐩𑑅 𑐢𑐎𑐵𑑅 𑐣𑐩𑐳𑑂𑐎𑐵𑐬 𑐫𑐵𑐫𑐾𑐐𑐸 𑐔𑐮𑐣 𑐁𑑅𑐟𑐎𑑄 𑐡𑐸𑑋 𑐀𑐠𑐾 𑐟𑐸𑑄 𑐧𑑁𑐡𑑂𑐢 𑐢𑐬𑑂𑐩𑐫𑑂 𑐣𑑄 𑑉𑐣𑐩𑑅 𑐧𑐸𑐡𑑂𑐢𑐵𑐫, 𑑉𑐣𑐩𑑅 𑐳𑑄𑐑𑐵𑐫, 𑑉𑐣𑐩𑑅 𑐢𑐬𑑂𑐩𑐵𑐫 𑐢𑐎𑐵𑑅 𑐥𑐵𑐛 𑐫𑐵𑐫𑐾𑐐𑐸 𑐔𑐮𑐣 𑐡𑐸𑑋 𑐀𑐠𑐾𑐟𑐸𑑄 𑐩𑐾𑐩𑐾𑐐𑐸 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶𑐂 𑐣𑑄 𑐠𑑂𑐰 𑐣𑐩𑑅–𑐣𑐩𑐳𑑂𑐎𑐵𑐬𑐫𑐵 𑐡𑐫𑐾𑐩𑐵𑑅 𑐢𑐂𑐐𑐸 𑐖𑐶𑐐𑐸 𑐳𑑀𑐔 𑐡𑐸 𑑋

𑐃 𑐎𑐠𑑄 𑐴𑐮𑐶𑐩𑐫𑑂 𑐮𑐸𑐫𑐵𑐰𑑅𑐐𑐸 𑐣𑑂𑐫𑐣𑐵𑐰𑑅𑐐𑐸 𑐠𑑂𑐰 𑐎𑑀𑐬𑑀𑐣𑐵 𑑑𑑙 𑐫𑐵 𑐎𑐵𑐬𑐞𑑄 𑐠𑑂𑐰 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑐫𑐵 𑐔𑐮𑐣 𑐀𑐗 𑐰𑑂𑐫𑐵𑐥𑐎 𑐖𑐸𑐫𑐵𑐧𑑂𑐫𑐹𑐐𑐸 𑐡𑐸𑑋 𑐩𑐴𑐟𑑂𑐰 𑐀𑐥𑑂𑐰𑑅 𑐡𑐫𑐵𑐰𑑅𑐐𑐸 𑐡𑐸𑑋 𑐎𑑀𑐬𑑀𑐣𑐵 𑑑𑑙 𑐕𑐏𑐾 𑐮𑐵 𑐠𑐷 𑐩𑐟𑑂𑐫𑑅𑐐𑐸 𑐮𑑂𑐰𑐫𑐾 𑐠𑐾𑑄 𑐖𑐸𑐮 𑑋 𑐎𑑀𑐬𑑀𑐣𑐵 𑐮𑑂𑐰𑐐𑐶𑐫𑐵𑐟 𑐠𑐶𑐮𑐎𑐶 𑐠𑑅𑐟 𑐣𑑄 𑐥𑐸𑐣𑐶 𑐢𑐎𑐵𑑅 𑐐𑑂𑐫𑐵𑐣𑐵𑑅 𑐩𑑂𑐴𑐫𑑂 𑐩𑐠𑑂𑐫𑐸𑐳𑐾 𑐟𑐵𑐥𑐵𑐎𑑂𑐎 𑐔𑑂𑐰𑐣𑐾𑐩𑐵𑑅𑐐𑐸 𑐖𑐸𑐮 𑑋 𑐟𑐵𑐥𑐵𑐎𑑂𑐎 𑐔𑑂𑐰𑐣𑐵𑑅 𑐴𑐾 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬 𑐫𑐵𑐫𑐾𑐩𑐵𑑅𑐐𑐸 𑐢𑐵𑐫𑐾𑐩𑐵𑑅𑐐𑐸 𑐰𑐫𑐵𑐧𑐶𑐄𑐐𑐸 𑐡𑐸𑑋 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐐𑐸𑐜𑐩𑐬𑑂𑐣𑐶𑐒𑑂𑐐 𑐫𑐵𑐂𑐥𑐶𑑄 𑐥𑐱𑑂𑐔𑐶𑐩𑐵 𑐰𑐶𑐡𑐾𑐱𑐷𑐟𑐫𑑂𑐳𑑄 𑐣𑑄 𑐄𑐩𑐶𑐐𑐸 𑐡𑐾𑐱𑐫𑑂 𑐟𑐎 𑐎𑑀𑐬𑐵𑐣𑐵 𑑑𑑙 𑐏𑐣𑐵𑑅 𑐐𑑂𑐫𑐵𑐣𑐵𑑅 𑐠𑑁𑑄𑐎𑐣𑑂𑐴𑐫𑑂 𑐟𑐵𑐥𑐵𑐎𑑂𑐎 𑐔𑑂𑐰𑐣𑐵𑑅 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬 𑐴𑐾 𑐫𑐵𑐂𑐐𑐸 𑐖𑐸𑐫𑐵𑐰𑐮 𑑋 𑐁𑑅 𑐠𑐣 𑐠𑑂𑐰 𑐔𑑂𑐰𑐳𑐸𑐂 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑐫𑐵 𑐠𑐸𑐮𑐶𑐩𑐕𑐶 𑐏𑑃 𑐮𑑂𑐴𑐵𑐣𑐵𑐔𑑂𑐰𑐣𑐵𑐐𑐸𑐫𑐵 𑐎𑐵𑐬𑐞 𑐖𑐶𑐟𑑅 𑐠𑑂𑐰𑐴𑐾 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑑄 𑐫𑐵𑐣𑐵𑑅, 𑐥𑐬𑐾 𑐖𑐹𑐐𑐸 𑐕𑐐𑐹 𑐣𑐶𑐐𑐸 𑐖𑑂𑐫𑐵 𑐩𑐕𑐶𑐣𑐵 𑐧𑑂𑐫𑐹𑐐𑐸 𑐎𑐵𑐬𑐞𑑄 𑐏𑑅 𑑋 𑐖𑐶𑑄 𑐐𑐧𑐮𑐾𑑄 𑐣𑑄 𑐧𑐶𑐔𑐵𑑅 𑐟𑐎𑑄 𑐩𑐫𑐵𑐣𑐵 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑐫𑐵 𑐎𑐵𑐬𑐞𑑄 𑐖𑐶𑐟𑑅 𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵 𑐰𑐂 𑐢𑐎𑐵𑑅 𑑋 𑐳𑐬𑐎𑐵𑐬𑐷 𑐖𑐵𑐐𑐶𑐬, 𑐰 𑐣𑑄 𑐖𑐸𑐖𑐸𑐫𑐵 𑐥𑐵𑐮𑐫𑑂, 𑐥𑐘𑑂𑐔𑐵𑐫𑐟𑐫𑐵 𑐂𑐮𑐫𑑂 𑑋 𑐱𑐎𑑂𑐟𑐶 𑐨𑐎𑑂𑐟𑐶 𑐩𑐡𑐸𑐥𑐶𑑄 𑐬𑐵𑐲𑑂𑐚𑑂𑐬𑐳𑐾𑐰𑐎𑐟 𑐳𑐬𑐎𑐵𑐬𑑄 𑐐𑐣 𑐢𑐵𑐮 𑐐𑐣 𑐴𑐸𑑃 𑐢𑐵𑐮 𑐴𑐵𑐎𑐶𑐩𑐫𑐵 𑐣𑑂𑐴𑑂𑐫𑑅𑐣𑐾 𑐕𑑂𑐫𑑄 𑐎𑑂𑐰𑐕𑐸𑐎𑐵𑑅 𑐱𑐶𑐬𑑀𑐥𑐬 𑐫𑐵𑐣𑐵𑑅 𑐰𑐣𑐾𑐩𑐵𑑅𑐐𑐸 𑐃 𑑋 𑐰𑐴𑐾 𑐎𑐠𑑄 𑐖𑐶 𑐣𑑄 𑐰𑐣𑐵 𑑋 𑐢𑐵𑑅𑐢𑐵𑑅𑐧𑐮𑐫𑑂 𑐢𑐵𑑅𑐢𑐵𑑅𑐠𑐵𑐫𑑂 𑐠𑐷𑐠𑐷 𑐥𑐴𑐵𑐜, 𑐥𑐬𑑂𑐰𑐟, 𑐟𑐬𑐵𑐃, 𑐩𑐢𑐾𑐱 𑑋 𑐠𑑂𑐰𑐴𑐾 𑐳𑐶𑐮𑐳𑐶𑐮𑐵𑐫𑑂 𑐕𑐐𑐹 𑐂𑐮𑐫𑑂 𑐖𑐶 𑐕𑐐𑐹 𑐥𑐴𑐵𑐜𑐷 𑐖𑐶𑐮𑑂𑐮𑐵𑐫𑑂 𑐳𑑂𑐰𑐵𑐳𑑂𑐠𑑂𑐫𑐎𑑅𑐩𑐶 𑐎𑐠𑑄 𑐰𑐣𑐵 𑑋 𑐥𑐶𑐣𑐾 𑐖𑐶𑐮𑑂𑐮𑐵𑐫𑑂 𑐳𑑂𑐰𑐵𑐳𑑂𑐠𑑂𑐫𑐎𑑅𑐩𑐶𑐟𑐫𑑂 𑐨𑐔𑐵 𑐩𑐵𑐣𑐩𑐬𑑂𑐫𑐵𑐡𑐵 𑐡𑐂𑐐𑐸 𑐳𑑂𑐰𑐵𑐨𑐵𑐰𑐶𑐎, 𑐣𑐵𑐥𑐮𑐵𑐟𑐎𑐶 𑐳𑐎𑐳𑐶𑐣𑑄 𑐣𑐩𑐳𑑂𑐟𑐾–𑐣𑐩𑐳𑑂𑐎𑐵𑐬 𑐫𑐵𑐂 𑑋 𑐖𑐶𑑄 𑐐𑐸𑐧𑐮𑐾𑑄 𑐮𑑂𑐴𑐵𑑅 𑐖𑐎 𑐳𑑄𑐎𑐵𑑅, 𑐐𑐸𑐧𑐮𑐾𑑄 𑐩𑑂𑐴𑐸𑐟𑐸 𑐖𑐎 𑐳𑑄𑐎𑐵𑑅 𑐮𑐶𑐳𑑅 𑐧𑐷𑐐𑐸 𑐫𑐵𑐣𑐵𑐔𑑂𑐰𑐣𑐵𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐱𑐵𑐫𑐡 𑐃 𑐎𑐠𑑄 𑐧𑐵𑐫𑑂 𑐩𑐣𑐹𑐎𑐠𑑄 𑐀𑐥𑑂𑐰𑑅𑐳𑐶𑐣𑑄 𑐀𑐠𑐾𑐴𑐾 𑐫𑐵𑐂, 𑐫𑐵𑐂𑐐𑐸 𑐏𑑅, 𑐫𑐵𑐣𑐵𑐔𑑂𑐰𑐣𑐷 𑑋

𑐀𑐣 𑐖𑐶 𑐔𑑂𑐰𑐣𑐵𑐠𑐵𑐳𑐫𑑂 𑐧𑑂𑐬𑐶𑐚𑐶𑐳 𑐐𑑀𑐬𑑂𑐏𑐵 𑐳𑐾𑐣𑐵𑐫𑐵 𑐳𑑂𑐰𑐵𑐳𑑂𑐠𑑂𑐫 𑐄𑐥𑐔𑐵𑐬𑐫𑐵 𑐮𑐵𑐐𑐶 𑐣𑑄 𑐕𑐐𑐹 𑐳𑑂𑐰𑐵𑐳𑑂𑐠𑑂𑐫 𑐳𑑄𑐳𑑂𑐠𑐵 𑐡𑐸𑑋 𑐐𑑀𑐬𑑂𑐏𑐵𑐮𑐶 𑐳𑐾𑐣𑐵𑐫𑐵 𑐣𑐶𑐰𑐺𑐟𑑂𑐟 𑐳𑐾𑐣𑐵𑐟𑐫𑑂𑐟 𑐰 𑐳𑐾𑐣𑐵𑐫𑐵 𑐥𑐬𑐶𑐰𑐵𑐬𑐟𑐫𑑂𑐟 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵 𑐧𑐷𑐐𑐸𑑋 𑐰 𑐳𑑄𑐳𑑂𑐠𑐵𑐫𑐵 𑐥𑑂𑐬𑐩𑐸𑐏 𑐕𑐩𑑂𑐴 𑐐𑑀𑐬𑑂𑐏𑐵𑐮𑐷 𑐳𑐾𑐣𑐵 𑐧𑑂𑐬𑐶𑐚𑐶𑐳𑐫𑐵 𑐴𑐾 𑐣𑐶𑐰𑐺𑐟𑑂𑐟 𑐩𑐾𑐖𑐬 𑐢𑐣𑐧𑐴𑐵𑐡𑐸𑐬 𑐬𑐵𑐃 𑑋 𑐳𑐎𑐳𑐶𑐣𑑄 𑐰𑐫𑐵𑐟 𑐩𑐾𑐖𑐬 𑐳𑐵𑐴𑐾𑐧, 𑐬𑐵𑐂𑐳𑐵𑐴𑐾𑐧, 𑐬𑐵𑐂𑐳𑐬 𑐢𑐎𑐵𑑅 𑐳𑐩𑑂𑐧𑑀𑐢𑐣 𑐫𑐵𑐂 𑑋 𑐖𑐶𑑄 𑐣𑑄 𑐩𑐾𑐖𑐬 𑐳𑐵𑐴𑐾𑐧 𑐴𑐾 𑐢𑐵𑐫𑐾𑐐𑐸𑑋 𑐕𑐠𑐵𑐫𑑂 𑐔𑑂𑐰𑑄𑐳𑐾𑐮𑐶𑑄 𑐰𑑄 𑐣𑑄 𑐎𑐬𑑂𑐩𑐔𑐵𑐬𑐷-𑐎𑐬𑑂𑐩𑐔𑐵𑐬𑐷 𑐖𑐸𑐳𑐾𑐮𑐶𑑄 𑐩𑐶𑐟𑑂𑐬𑐟𑐵 𑐡𑐂𑐐𑐸 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐖𑐸𑐮, 𑐣𑐵𑐥 𑐮𑐵𑐂𑐧𑐮𑐫𑑂 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬𑐫𑐵 𑐁𑐡𑐵𑐣 𑐥𑑂𑐬𑐡𑐵𑐣 𑐖𑐸𑐂𑐐𑐸 𑐴𑐾 𑐖𑐸𑐮 𑑋 𑐏𑐵𑐳 𑐫𑐵𑐣𑐵𑑅 𑐰𑐫𑑂𑐎𑑅𑐫𑐵𑐟 𑐣𑐵𑐥𑐮𑐵𑐟𑐎𑐶 𑐣𑑂𑐴𑐵𑐥𑐵𑑄 𑐰𑐫𑑂𑐎𑐮𑑄 𑐴𑐾 𑐖𑐶𑐟𑑅 𑐣𑐩𑐳𑑂𑐎𑐵𑐬 𑐫𑐵𑐂 𑑋 𑐰𑐫𑑂𑐎𑑅𑐫𑐵 𑐣𑐩𑐳𑑂𑐎𑐵𑐬 𑐳𑐵𑐩𑐵𑐣𑑂𑐫 𑐎𑐠𑑄 𑐖𑐎 𑐖𑐸𑐂𑐩𑐏𑐸𑑋 𑐣𑐶𑐥𑐵 𑐮𑑂𑐴𑐵𑑅 𑐮𑑂𑐰𑐵𑐎𑐵𑑅, 𑐖𑑂𑐰𑐖𑐮𑐥𑐵 𑐫𑐵𑐣𑐵𑑅 𑐕𑑂𑐫𑑄 𑐖𑐎 𑐩𑐏𑐸 𑐧𑐕𑐶 𑐩𑑂𑐴 𑐣𑐵𑐥𑑄 𑐎𑑂𑐰𑐕𑐸𑐣𑐵𑑅 𑐢𑐣𑐸𑐲𑑂𑐚𑑄𑐎𑐵𑐬 𑐣𑐩𑐳𑑂𑐟𑐾 𑐫𑐵𑐂 𑑋 𑐱𑐵𑐫𑐡 𑐳𑐿𑐣𑐶𑐎 𑐏𑑂𑐫𑐮𑐫𑑂 𑐣𑐩𑐳𑑂𑐎𑐵𑐬 𑐀𑐠𑐾𑐴𑐾 𑐫𑐵𑐂𑐐𑐸 𑐖𑐸𑐂 𑑋 𑐮𑐶𑐳𑐮𑐫𑑂 𑐖𑐶𑑄 𑐐𑐸𑐧𑐮𑐫𑑂 𑐐𑐸𑐧𑐮𑐫𑑂 𑐕𑐸 𑐕𑐸 𑐎𑐠𑑄𑐫𑐵 𑐣𑐩𑐳𑑂𑐎𑐵𑐬 𑐫𑐵𑐂, 𑐰 𑐖𑐶𑑄 𑐴𑐾 𑐧𑐵𑑄𑐮𑐵𑐎 𑐢𑐵𑐫𑐾𑐩𑐦𑐸, 𑐩𑐳𑑂𑐫𑐸𑑋 𑐠𑑂𑐰 𑐔𑐮𑐣 𑐣𑑂𑐴𑑂𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐖𑐸𑐮 𑑋 𑐣𑐶𑐩𑑂𑐴𑐾𑐳𑐶𑐫𑐵 𑐕𑐸𑑄 𑐏𑑃 𑐣𑑄 𑐖𑐹𑐐𑐸 𑐩𑐏𑐸 𑑋

𑐕𑐣𑑂𑐴𑐸 𑐮𑑃𑐫𑑂 𑐢𑑂𑐰𑐡𑐸𑐎𑑂𑐎 𑐣𑐵𑐥𑐮𑐵𑑅𑐧𑐮𑐫𑑂 𑐰𑑄 𑐖𑐶𑐟𑑅 𑐰 𑐴𑐾 𑐎𑐠𑑄𑐫𑐵 𑐣𑑂𑐴𑐵𑐥𑐵 𑐠𑐾𑑄 𑐢𑐣𑐸𑐲𑑂𑐚𑑄𑐎𑐵𑐬 𑐣𑐩𑐳𑑂𑐟𑐾 𑐫𑐵𑐟 𑑋 𑐮𑐶𑐳𑐮𑐫𑑂 𑐖𑐶 𑐕𑐸 𑐣𑐩𑐳𑑂𑐎𑐵𑐬𑐫𑐵𑐟 𑐖𑐶𑑄 𑐢𑐵𑐫𑐾𑐩𑐦𑐸 𑑋 𑐁𑐎𑐵𑐗𑐵𑐎𑐵𑑄 𑐰𑑄 𑐚𑑂𑐫𑐵𑐥𑑂𑐥 𑐖𑐶𑐐𑐸 𑐣𑐶𑐥𑐵 𑐮𑑂𑐴𑐵𑑅 𑐖𑑂𑐰𑐣, 𑐀𑐮𑐾 𑐟𑑄 𑐥𑐶𑐎𑐫𑐵𑑅 𑐢𑐵𑐮- ‘𑐕 𑐐𑐥𑐵𑐫𑑂 𑐢𑑄𑐩𑑂𑐴 𑐜𑐵𑐎𑑂𑐚𑐬 ? 𑐣𑑂𑐴𑑂𑐫𑐵𑐧𑐮𑐾𑑄 𑐖𑐶𑐐𑐸 𑐣𑐩𑐳𑑂𑐎𑐵𑐬𑐫𑐵 𑐮𑐶𑐳𑑅 𑐥𑐟𑐶𑑄 𑐕𑐥𑐟𑐶𑑄 𑐢𑐳𑑂𑐰𑐵𑐎𑐵𑑅 𑐧𑐷𑐩𑑂𑐴 ? 𑐥𑐟𑐶𑑄 𑐢𑐳𑑂𑐰𑐵𑐎𑐵𑑅 𑐡𑐾𑐏𑐵 𑐖𑐵𑐫𑐾𑐐𑐵 𑐢𑐵𑐂𑐩𑑂𑐴 𑑋’ 𑐰 𑐂𑐮𑐫𑑂 𑐰𑑄 𑐀𑐫𑑂𑐮𑐵𑑅 𑐟𑑂𑐰𑐣𑐵𑐟𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐖𑐶𑐟𑑅 𑐖𑑂𑐰𑐣𑐵𑑅 𑐟𑑂𑐰𑑅𑐟𑐹𑐐𑐸 𑐴𑐾 𑐩𑐏𑐸𑑋 𑐧𑑂𑐰 𑐧𑐶𑐫𑐵𑑄𑐟𑐸𑑄 𑐔𑑂𑐰𑐣 𑑋 𑐮𑑃𑐫𑑂 𑐩𑐣𑐹 𑐩𑐸𑐣 𑑋 𑐖𑐵𑐟𑑂𑐬𑐵 𑐠𑐾𑑄 𑐖𑐸𑐮 𑑋 𑐖𑐶𑑄 𑐠𑑅𑐟 𑐳𑑄𑐫𑐩 𑐫𑐵𑐣𑐵 𑑋 𑐩𑐵𑐦𑐶 𑐣𑑄 𑐦𑑂𑐰𑐣𑐵 𑑋 𑐴𑐵𑐣𑑄 𑐀𑐠𑐾 𑐫𑐵𑐫𑐾 𑐩𑐏𑐸 𑐢𑐫𑐵, 𑐰 𑐮𑐵 𑐩𑐵𑐣𑐫𑑂 𑐩𑐖𑐹 𑑋 𑐴𑐵𑐮𑐵 𑐴𑐾 𑐔𑑂𑐰𑐣 𑑋 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐟𑑂𑐰𑑅𑐟𑐹𑐐𑐸 𑐴𑐾 𑐩𑐏𑐸𑑋 𑐩𑐵𑐡𑐎 𑐥𑐡𑐵𑐬𑑂𑐠 𑐳𑐾𑐰𑐣 𑐫𑐵𑐟 𑐎𑐶 𑐰 𑐩𑐾𑐖𑐬𑐫𑐵 𑐀𑐖𑑂𑐫𑐵𑑅𑐐𑐸 𑐧𑐵𑐣𑐶 𑐀𑐣 𑐔𑑂𑐰𑑄𑐥𑐶𑑄 𑐳𑐎𑐳𑐶𑐣𑑄 𑐳𑑂𑐫𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐀𑐮𑐾 𑐀𑐣 𑐩𑐸𑐣𑐵𑐔𑑂𑐰𑑄𑐥𑐶𑑄 𑐥𑐵𑐳𑐵𑐥𑐶𑑄𑐳𑑄 𑐖𑐶𑐟𑑅 𑐰𑐣𑐵𑐥 𑐧𑐵𑐫𑐾𑐎𑐵𑑅 𑐕𑐏𑐾 𑐧𑑂𑐰𑐣𑐵𑐫𑑄𑐎𑐮 𑑋 𑐰𑐫𑐵𑐟 𑐣𑑄 𑐕𑐏𑐾 𑐕𑑂𑐰𑐮 𑑋 𑐖𑐶 𑐰 𑐣𑐵𑐥 𑐧𑐵𑐫𑐵𑑅 𑐀𑐦𑐶𑐳𑐫𑑂 𑐰𑐣𑐎𑐶 𑐀𑐦𑐶𑐳𑐫𑑂 𑐟𑐎𑑄 𑐰𑐂 𑐢𑐵𑑅𑐐𑐸𑐮𑐶𑑄 𑐀𑐦𑐶𑐳𑐫𑑂 𑐩𑐰𑑄𑐳𑐾 𑐕𑐩𑑂𑐴 𑐥𑐵𑐳𑐵𑐫𑐵 𑐕𑐾𑑃𑐫𑑂 𑐰𑐣𑐵 𑑋 𑐰𑐫𑐵𑐟 𑐩𑐵𑐡𑐎 𑐥𑐡𑐵𑐬𑑂𑐠𑑄 𑐩𑐟𑑂𑐰𑑅𑐟𑐹𑐟𑐮𑐾 𑐴𑑀𑐳 𑐴𑐾 𑐡𑐂𑐩𑐏𑐸 𑐴𑑄 𑑋

𑐀𑐠𑐾 𑐖𑐸𑐫𑐵𑑅 𑐏𑑅 𑐮𑐵 𑐰 𑐮𑐵 𑐖𑐶𑐟𑑅 𑐩𑐵𑐟𑑂𑐟𑐸𑐩𑐵𑐮𑐵𑑅 𑐖𑐶 𑐔𑑂𑐰𑑄𑐔𑑂𑐰𑐣𑐵𑐐𑐸 𑐥𑐵𑐳𑐵𑐫𑐵 𑐕𑐾𑑃𑐫𑑂 𑐟𑐎 𑐠𑑂𑐫𑑄𑐎𑑅 𑐰𑐮 𑑋 𑐬𑐵𑐃𑐟𑐫𑑂 𑐟𑑄 𑐫𑐵𑐎𑐣𑑄 𑐮𑐣𑐷 𑐩𑐏𑐸 𑐢𑐵𑐂 𑑋 𑐕𑐐𑐹 𑐣𑐶𑐐𑐹 𑐂𑐣𑑂𑐔 𑐑𑐵𑑅 𑐫𑐵𑐣𑐵𑑅 𑐮𑑂𑐰𑐵𑐫𑐾𑐐𑐸 𑐮𑐵 𑐂𑐩𑐶 𑐏𑑂𑐫𑐵𑑅 𑐢𑐎𑐵𑑅 𑐢𑐵𑐂𑐐𑐸 𑐣𑑂𑐫𑐣𑐵 𑐟𑐫𑐵𑐐𑐸𑑋 𑐴𑐵𑐣𑑄 𑐀𑐣 𑐩𑐣𑐹 𑐩𑐸𑐣 𑑋 𑐳𑐎𑐮𑐾𑑄 𑐩𑐶𑐮𑐫𑑂 𑐖𑐸𑐫𑐵𑑅 𑐖𑐶𑐩𑐶𑐟 𑐩𑐶𑐮𑐾 𑐫𑐵𑐟 𑑋 𑐏𑐵𑐳 𑐫𑐵𑐣𑐵𑑅 𑐩𑐾𑐖𑐬 𑐳𑐵𑐴𑐾𑐧𑐫𑐵𑐟 𑐁𑐰𑑄𑐮𑐶 𑐖𑐶𑐥𑐶𑑄 𑐣𑐶𑐩𑑂𑐴 𑐧𑐬𑐵𑐧𑐬 𑐟𑑅𑐢𑑄 𑐔𑐷𑐢𑑄 𑐩𑐏𑐸 𑐢𑐎𑐵𑑅 𑐢𑐵𑐮 𑑋 𑐁𑐰𑑄𑐮𑐶𑑄 𑐣𑐵𑐥𑐮𑐵𑐟𑐎𑐶 𑐣𑐩𑐳𑑂𑐟𑐾 𑐣𑐩𑐳𑑂𑐎𑐵𑐬 𑐫𑐵𑐫𑐾𑐐𑐸 𑐩𑐏𑐸𑑋 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐐𑐸𑐜𑐩𑐬𑑂𑐣𑐶𑐧 𑐫𑐵𑐫𑐾𑐐𑐸 𑑋 𑐠𑑂𑐰 𑐏𑑃 𑐰𑐫𑐵𑐟 𑐣𑑄 𑐱𑐵𑐫𑐡 𑐫𑐮 𑐩𑐏𑐵 𑑋 𑐴𑐵𑐣𑑄 𑐕𑐎𑑅 𑐖𑐶 𑐣𑐵𑐥 𑐮𑑂𑐴𑐵𑑅 𑐮𑑂𑐰𑐵𑐎𑐵𑑅 𑐥𑐶𑐴𑐵𑑄 𑐰𑐣 𑑋 𑐀𑐮𑐾 𑐖𑐶 𑐣𑑄 𑐀𑐦𑐶𑐳𑐫𑑂 𑐰𑐣𑐵 𑑋 𑐀𑐫𑑂𑐮𑐵𑐏𑑄 𑐟𑑂𑐰𑑅𑐟𑐾 𑐢𑐸𑑄𑐎𑐵𑑅 𑐱𑐵𑐫𑐡 𑐖𑐶 𑐣𑐵𑐥 𑐫𑐵𑐣𑐵𑐐𑐸 𑐰𑑂𑐫𑐰𑐴𑐵𑐬 𑐮𑐸𑐩𑐣𑐵𑑅 𑐰𑐫𑐵𑐟 𑐥𑐱𑑂𑐔𑐵𑐟𑐵𑐥 𑐖𑐸𑐮 𑐏𑑅 𑐮𑐵, 𑐎𑐣𑑂𑐴𑐫𑑂 𑐎𑐸𑐣𑑂𑐴𑐸 𑐖𑐶𑐠𑐵𑐫𑑂 𑐰𑐫𑐵 𑐩𑐵𑐦𑐷 𑐦𑑂𑐰𑑄𑐰𑐮 𑑋

NepalBhasa

Source : NepalBhasaTimes