𑐣𑐐𑐬𑐎𑑀𑐚𑐫𑑂 𑐖𑐶𑐐𑐸 𑐎𑑂𑐰𑐵𑑅𑐣𑐵𑐏𑑄 𑐩𑐶𑑄𑐣𑑅𑐐𑐸 𑐕𑐾𑑃

𑐔𑐵𑐣𑑂𑐴𑐳𑐶𑐫𑐵 𑑑𑑅𑑓𑑐 𑐟𑐵𑑅 𑐖𑐸𑐂𑐢𑐸𑑄𑐎𑐮 𑑋 𑐫𑐵𑐄𑑃𑐎 𑐡𑑂𑐫𑐣𑐾 𑐩𑐣 𑐡𑐫𑐵𑑄 𑐣𑑄 𑐣𑑂𑐴𑑂𑐫𑑅 𑐰𑑅𑐐𑐸 𑐩𑐏𑐸 𑑋 𑐩𑐶𑐏𑐵 𑐢𑑂𑐰𑐵𑐏𑐵 𑐠𑐾𑑄 𑐔𑐵𑑅 𑑋 𑐄𑐎𑐶𑐳𑐣𑑄 𑐟𑐵𑑄𑐣𑑂𑐰𑑅𑐐𑐸 𑐄𑐮𑐶 𑐴𑐾 𑑋 𑐗𑑂𑐫𑐵𑑅 𑐣𑑄 𑐔𑐵𑑅, 𑐥𑑄𑐏𑐵 𑐣𑑄 𑐴𑐸𑐣𑐸𑐣𑐸𑐣𑐸 𑐳𑑅 𑐰𑑅 𑑋 𑐥𑐟𑑂𑐟𑐶𑑄 𑐣𑑂𑐫𑐵𑐂 𑐢𑐎𑐵𑑅 𑐗𑐸𑐮𑐾 𑐡𑐸𑐣𑐾 𑐖𑐶, 𑐀𑐫𑑂𑐣𑑄 𑐣𑑂𑐴𑑂𑐫𑑅 𑐰𑑅𑐐𑐸 𑐴𑐾 𑐩𑐏𑐸 𑑋 𑐏𑐵𑐟𑐵𑑄 𑐎𑐸𑐴𑐵𑑄 𑐰𑐫𑐵, 𑐗𑑂𑐫𑐵𑐮𑑄 𑐥𑐶𑐣𑐾 𑐳𑑂𑐰𑐫𑐵 𑑋 𑐔𑐵𑐣𑑂𑐴𑐫𑑂 𑐏𑐶𑐄𑑃𑐐𑐸 𑐧𑐵𑐴𑐾𑐎𑑄 𑐕𑐸 𑐴𑐾 𑐏𑐣𑐾 𑐡𑐂 𑐢𑐎𑐵𑑅 𑑋 𑐩𑐶𑐏𑐵𑑄 𑐣𑑂𑐴𑑂𑐫𑐵𑐫𑐾 𑐡𑐸𑐠𑐵𑐫𑑂 𑐟𑐎 𑐏𑐶𑐄𑑃𑐳𑐾 𑑋

𑐰𑐵 𑐣𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐣𑑄 𑐐𑐣𑑄 𑐕𑐾𑑃𑐫𑑂 𑐎𑑂𑐰𑐠𑐵𑐫𑑂 𑐥𑐶𑐮𑐶𑐥𑐶𑐮𑐶 𑐩𑐟 𑐔𑑂𑐫𑐵𑑅 𑑋 𑐳𑐎𑐮𑐾𑑄 𑐫𑐵𑐄𑑃𑐎 𑐳𑐮 𑐩𑐶𑐫𑐵𑑅 𑐡𑑂𑐫𑐣𑐵𑐔𑑂𑐰𑑄 𑐠𑐾𑑄 ! 𑐖𑐶 𑐢𑐵𑑅𑐳𑐵 𑐡𑑂𑐫𑐣𑐾 𑐴𑐾 𑐦𑐸𑐐𑐸 𑐩𑐡𑐸 𑑋 𑐃𑐮𑐶𑐳𑐾𑑄𑑄 𑐖𑐶𑐐𑐸 𑐰𑐶𑐔𑐵𑑅 𑐣𑑄 𑐣𑐵𑐥𑐣𑐵𑐥𑑄 𑐔𑐵𑑅𑐴𑐶𑐮𑐵𑐔𑑂𑐰𑐣, 𑐐𑐣𑑄 𑐩𑐠𑑂𑐫𑐣𑐷𑐎𑐠𑑄 𑑋 𑐡𑑂𑐫𑐣𑐾𑐐𑐸 𑐎𑐸𑐟𑑅 𑐫𑐵𑐣𑐵𑑅 𑐀𑐗𑑄 𑐣𑑂𑐴𑑂𑐫𑑅 𑐰𑐫𑐾𑐎𑐾 𑐴𑐾 𑐦𑐸𑐐𑐸 𑐩𑐏𑐸 𑑋 𑐗𑐣𑑂 𑐣𑑂𑐴𑑂𑐫𑐥𑐸𑐂 𑐥𑐸𑐮𑐵𑑄𑐐𑐸 𑐏𑑃𑐟 𑐳𑑂𑐰𑐔𑐵𑐣𑐵 𑐰𑐫𑐵𑐔𑑂𑐰𑐣 𑑋 𑐁𑐏𑐶𑐬𑐫𑑂 𑐥𑑂𑐫𑐟𑐵𑑅 𑐃 𑐖𑐸𑐮 𑑋

𑐫𑐵𑐫𑐾𑐩𑐵𑑅𑐐𑐸 𑐎𑐬𑑂𑐩 𑐫𑐵𑐣𑐵, 𑐏𑑂𑐰𑐵𑑅 𑐳𑐶𑐮𑐵 𑑋 𑐮𑑅 𑐕𑐐𑐹 𑐐𑐶𑐮𑐵𑐳 𑐡𑐫𑐾𑐎𑐵𑑅 𑐴𑐬𑑂𑐮𑐶𑐎𑑂𑐳 𑐡𑐫𑐾𑐎𑐵𑑅 𑐟𑑂𑐰𑐣𑐵 𑑋 𑑗𑑅𑑓𑑐 𑐟𑐵𑑅 𑐂𑐮𑐫𑑂 𑐏𑑂𑐰𑐥𑐫𑐵 𑐳𑐹𑐬𑑂𑐫𑐰𑐶𑐣𑐵𑐫𑐎 𑐠𑑂𑐫𑑄𑐎𑐾𑐩𑐵𑐣𑐶 𑑋 𑐥𑐵𑐳𑐵 𑐬𑐵𑐖𑐾𑐣𑐫𑐵𑐟 𑐣𑐵𑐥𑑄 𑐰𑐣𑐾𑐟 𑐟𑑂𑐬𑐶𑐥𑐸𑐬𑐾𑐱𑑂𑐰𑐬𑐫𑑂 𑐥𑐶𑐫𑐵𑐔𑑂𑐰𑐣𑐾𑐟 𑐢𑐫𑐵𑐐𑐸 𑑋 𑐄𑐎𑐶𑑄 𑐩𑑀𑐧𑐵𑐂𑐮𑐫𑑂 𑐑𑐣𑑂𑐚𑐷 𑐣𑑂𑐫𑐵𑐫𑐾𑐎𑐵 𑐕𑑂𑐰𑐫𑐵 𑑋 𑐟𑐥𑑂𑐫𑑄𑐎 𑐳𑐹𑐬𑑂𑐫𑐰𑐶𑐣𑐵𑐫𑐎 𑐠𑑂𑐫𑑄𑐎𑑅 𑐰𑐣𑐾𑐐𑐸 𑐁𑐱𑑄 𑐠𑑅𑐟 𑐩𑐵𑑅𑐐𑐸 𑐳𑐵𑐩𑐵𑐣 𑐖𑑂𑐰𑐣𑐵𑑅 𑐳𑑀𑐮𑑂𑐚𑐷 𑐩𑑀𑐜𑐫𑑂 𑐳𑐵𑐗𑐵 𑐧𑐳 𑐥𑐶𑐫𑐵𑐔𑑂𑐰𑐣𑐵 𑑋

𑐰 𑐰𑑅𑐐𑐸 𑐡𑐶𑐄𑐐𑐸 𑐩𑐏𑐸𑐣𑐶 𑑋 𑐳𑑀𑐮𑑂𑐚𑐷𑑄 𑐥𑐵𑐳𑐵𑐫𑐵𑐟 𑐦𑑀𑐣 𑐫𑐵𑐣𑐵𑐐𑐸 𑐰 𑐮𑐵 𑐟𑑂𑐬𑐶𑐥𑐸𑐬𑐾𑐱𑑂𑐰𑐬 𑐠𑑂𑐫𑐣𑐾 𑐢𑐸𑑄𑐎𑐮 𑑋𑐣𑐶𑐣𑑂𑐴𑐸𑐟𑐎 𑐡𑐶𑐥𑐵𑑅 𑐴𑐾 𑐩𑐎𑐵𑐳𑐾 𑐰𑑅𑐐𑐸 𑐰𑐵𑑄 𑐧𑐵𑐐𑐩𑐟𑐶𑑄 𑐣𑑄 𑐠𑑅𑐐𑐸 𑐎𑑂𑐫𑐣𑐾 𑐦𑐎𑑂𑐰 𑐱𑐎𑑂𑐟𑐶 𑐎𑑂𑐫𑐣𑐵𑐔𑑂𑐰𑐣 𑑋 𑐩𑐾𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐠𑑂𑐰 𑐬𑐵𑐖𑐢𑐵𑐣𑐷, 𑐟𑐬 𑐠𑐣𑐫𑐵 𑐑𑐵𑑅 𑐳𑐸𑐣𑐵𑑄 𑐳𑐶𑐄 𑑋 𑐕𑐾𑑃𑐏𑐵𑐕𑐾𑑃𑐏𑐵𑐫𑑂 𑐮𑑅 𑐡𑐸𑐴𑐵𑑄 𑐰𑐫𑐵𑑅 𑐧𑐾𑐴𑐵𑐮 𑑋 𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐡𑐎𑑂𑐰 𑐠𑐣 𑐴𑐾 𑐔𑑂𑐰𑑄 𑐰𑐫𑐾𑐩𑐵𑑅𑐐𑐸 𑑋

𑐀𑐮𑐾 𑐏𑐸𑐳𑐶𑐫𑐵 𑐮𑑃 𑐥𑐣𑐵𑑅 𑐕𑐾𑑃 𑐡𑐣𑐵 𑐴𑐳𑐾𑑄𑐮𑐶 𑐰𑑄 𑐖𑐎 𑐐𑐸𑐮𑐶 𑐳𑐴 𑐫𑐵𑐣𑐵𑑅 𑐔𑑂𑐰𑐣𑐷 𑑋 𑐎𑑂𑐫𑐣𑐵𑐧𑐶𑐮 𑐰𑑄 𑐣𑑄 𑐠𑑅𑐐𑐸 𑐱𑐎𑑂𑐟𑐶 𑑋 𑐣𑐶𑐣𑑂𑐴𑐸 𑐟𑐎 𑐰𑑅𑐐𑐸 𑐰𑐵 𑐄𑐎𑐶𑐳𑐣𑑄 𑐱𑐣𑐶𑐰𑐵𑑅 𑐖𑐹𑐐𑐸𑐮𑐶𑑄 𑐮𑑃𑐫𑑂 𑐩𑐣𑐹𑐖𑐎 𑐩𑐏𑐸 𑐳𑐰𑐵𑐬𑐷 𑐳𑐵𑐢𑐣 𑐣𑑄 𑐄𑐳𑑂𑐟 𑐖𑐹 𑐩𑐡𑐸 𑑋 𑐳𑐵𑐗𑐵 𑐧𑐳 𑐥𑐶𑐫𑐵𑐔𑑂𑐰𑐣𑐵𑐩𑑂𑐴 𑐖𑐶 𑐑𑑁𑐕𑐶 𑐟𑐎 𑐣𑑄 𑐩𑐰𑐫𑐾𑐰𑑄 𑐩𑐾𑐐𑐸 𑐴𑐾 𑐧𑐳 𑐐𑐫𑐵𑑅 𑐟𑐶𑑄𑐏𑑂𑐫𑑅 𑐟𑑂𑐰𑐥𑐸𑐣𑐵𑑅 𑐡𑐫𑐾𑐎𑐵𑐟𑑅𑐐𑐸 𑐑𑐵𑐬𑐵𑑄𑐑𑐸𑐬𑑄 𑐧𑐳𑐥𑐵𑐬𑑂𑐎𑐫𑑂 𑐠𑑂𑐫𑑄𑐎𑐵 𑑋

𑐬𑐵𑐖𑐾𑐣, 𑐡𑐶𑐧𑑂𑐫𑐵 𑐟𑐵𑐩𑑂𑐬𑐵𑐎𑐵𑐬 𑐰 𑐰𑐶𑐩𑐮𑐥𑑂𑐬𑐨𑐵 𑐣𑑄 𑐣𑐵𑐥𑐮𑐵𑐟 𑑋 𑐥𑑂𑐫𑐩𑑂𑐴𑑄 𑐕𑐐𑑅 𑐧𑐳𑐫𑑂 𑐔𑑂𑐰𑐣𑐵𑑅 𑐏𑑂𑐰𑐥𑐥𑐵𑐏𑐾 𑐳𑑂𑐰𑐫𑐵𑑅 𑐰𑐣 𑑋 𑑘 𑐟𑐵𑑅 𑐂𑐮𑐫𑑂 𑐳𑐹𑐬𑑂𑐫𑐰𑐶𑐣𑐵𑐫𑐎 𑐠𑑂𑐫𑐣 𑑋 𑐖𑐶𑐥𑐶𑑄 𑐠𑑂𑐫𑑄𑐐𑐸 𑐎𑐺𑐲𑑂𑐞𑐨𑐎𑑂𑐟 𑐧𑑀𑐜𑐾𑐫𑐵𑐟 𑐖𑐵𑐣𑐎𑐵𑐬𑐷 𑐧𑐶𑐫𑐵 𑑋 𑐥𑐮𑐏𑑄 𑐩𑐵𑐞𑐶𑐎 𑐄𑐬𑐵𑐫 𑐡𑐵𑐖𑐸 𑐠𑑂𑐫𑑄𑐎𑑅 𑐰𑐮 𑑋 𑐧𑐳𑐫𑑂 𑐠𑐴𑐵𑑄 𑐰𑐣𑐵, 𑐳𑐎𑐮𑐾𑑄 𑐩𑐠𑑂𑐫𑑄𑐣𑐶 𑐏𑐣𑐷, 𑐡𑐸𑐥𑐶𑑄 𑐳𑐎𑐮𑐾𑑄 𑐩𑑂𑐴𑐳𑐶𑐄𑐥𑐶𑑄 𑐴𑐾 𑐖𑐎 𑑋

𑐳𑐎𑐳𑐶𑐟𑑄 𑐖𑑂𑐰𑐖𑑂𑐰𑐮𑐥𑐵 𑐫𑐵𑐳𑐾𑑄 𑐠𑑅𑐐𑐸 𑐠𑐵𑐫𑑂 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵 𑑋 𑐧𑐳𑐫𑑂 𑐡𑐸𑐥𑐶𑑄 𑐳𑐎𑐮𑐾𑑄 𑐏𑑂𑐫𑐵𑑅 𑐫𑐵𑐫𑐾 𑐩𑑂𑐰𑐵𑑅𑐥𑐶𑑄 𑐖𑐹𑐳𑐵𑑄 𑐟𑐶𑑄 𑐢𑐵𑑅𑐮𑐎𑐶 𑐟𑐵𑑄 𑐢𑐵𑐂𑐥𑐶𑑄 𑐴𑐾 ! 𑐣𑑂𑐴𑐶𑐮𑐾𑐟 𑐟𑑂𑐰𑐴𑑅 𑐖𑐎 𑐩𑐵𑑅 𑑋 𑐏𑐶𑐔𑐵𑑅 𑐣𑑂𑐴𑐶𑐥𑑂𑐫𑑄 𑐖𑐎 𑐳𑑄𑐎𑐹𑐳𑐵𑑄 𑐣𑑂𑐴𑐶𑐮𑐷𑐥𑐶𑑄 𑐢𑐵𑑅𑐠𑐾𑑄 𑑋 𑐄𑐎𑐶𑐳𑐣𑑄 𑐣𑑂𑐴𑐶𑐮𑐾𑐟 𑐟𑑂𑐰𑐴𑑅 𑐡𑐫𑐾𑐎 𑐩𑐴𑐾𑐱𑐩𑐵𑐣 𑐡𑐵𑐖𑐸𑑄 𑐩𑑂𑐴𑐸𑐟𑐸𑐂 𑐮𑑅 𑐟𑐂𑐐𑐸𑐸, 𑐮𑑂𑐴𑑂𑐰𑐂𑐐𑐸 𑑋 𑐠𑑂𑐰 𑐎𑑂𑐬𑐩 𑐣𑐶𑐎𑑂𑐰𑑅 𑐥𑑂𑐫𑐎𑑂𑐰𑑅 𑐖𑐸𑐮 𑑋 𑐕𑐐𑐹 𑐟𑑂𑐰𑐴𑑅 𑐡𑐟, 𑐀𑐮𑐾 𑐕𑐸 𑐖𑐶𑐄𑐐𑐸 𑐣𑑄 𑐢𑐵𑐮, 𑐩𑐢𑐵𑐫𑐾𑐩𑐵𑑅𑐐𑐸 𑐣𑑄 𑐢𑐵𑐮 𑑋

𑐳𑐎𑐮𑐾𑑄 𑐴𑑂𑐰𑐵𑐬𑑂𑐬𑐬 𑐣𑑂𑐴𑐶𑐮 𑑋 𑐳𑐎𑐮𑐾𑑄 𑐣𑐵𑐥𑑄 𑐰𑐣𑐾𑐐𑐸𑐫𑐵 𑐩𑐖𑑂𑐖𑐵 𑐴𑐾 𑐏𑑅 𑐠𑑂𑐰 𑑋𑐣𑑂𑐴𑐶𑐕𑐶𑐫𑑄𑐎𑑄 𑐖𑐸𑐂𑐐𑐸 𑐕𑐐𑐹 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐣𑐐𑐬𑐎𑑀𑐚 𑐰𑐣𑐾𑐟𑑂𑐫𑐣𑐵𑐥𑐶𑑄 𑐖𑐶𑐥𑐶𑑄 𑑋 𑐏𑑂𑐰𑐥𑐫𑐵 𑐫𑐵𑐟𑐵𑐖𑑅𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑐸𑐕𑐾𑐨𑐎𑑂𑐟 𑐎𑐰𑐵𑑄𑐫𑐵 ‘𑐎𑑂𑐰𑐵𑑅𑐣𑐵𑐏𑑄 𑐩𑐶𑑄 𑐣𑑅𑐐𑐸 𑐕𑐾𑑃’ 𑐧𑐵𑐏𑑄 𑐳𑐦𑐹 𑐥𑐶𑐟𑐧𑑂𑐰𑐖𑑂𑐫𑐵 𑐰 𑐔𑐶𑐧𑐵𑐏𑑄 𑐧𑐵𑐬𑐾 𑐐𑑀𑐲𑑂𑐛𑐶 𑐖𑑂𑐫𑐵𑐗𑑂𑐰𑑅 𑑋 𑐣𑑂𑐴𑐵𑐥𑐵 𑐣𑑄 𑐄𑐎𑐠𑑄 𑐖𑑂𑐫𑐵𑐗𑑂𑐰𑑅 𑐖𑐹𑐳𑐵𑑄 𑐖𑐶𑑄 𑐣𑑂𑐴𑐵𑐥𑐵𑑄𑐏𑐸𑐳𑐷 𑐧𑑂𑐰𑐟𑐶 𑐎𑐫𑐵𑐔𑑂𑐰𑐣𑐵𑐐𑐸 𑑋

𑐣𑐐𑐬𑐎𑑀𑐚 𑐩𑐠𑑂𑐫𑑄𑐐𑐸 𑐣𑑄 𑐟𑑅𑐡𑑃 𑐴𑐾 𑐡𑐟 𑑋 𑐣𑐶𑐣𑑂𑐴𑐸𑐟𑐎 𑐰𑐵 𑐰𑑅𑐐𑐸𑐮𑐶𑑄 𑐰𑐫𑐾𑐢𑐵𑑅𑐥𑐶𑑄 𑐣𑑄 𑐩𑐠𑑂𑐫𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐧𑐳𑐫𑑂 𑐩𑐸𑐎𑑂𑐎𑑄 𑑒𑑙 𑐩𑑂𑐴 𑐖𑐎 𑑋 𑐬𑐵𑐖𑐾𑐣𑑂𑐡𑑂𑐬 𑐬𑑄𑐖𑐶𑐟 𑐰 𑐀𑐩𑐷𑐬𑐩𑐿𑐫𑐵𑑄 𑐳𑑂𑐎𑐸𑐚𑐬𑑄 𑐰𑐂𑐐𑐸 𑐖𑐸𑐂𑐰𑑄 𑐧𑐳 𑐣𑑂𑐴𑑂𑐫𑐵𑐟 𑑋 𑐣𑑂𑐫𑐵𑐡𑑃 𑐏𑐸𑐡𑑃 𑐣𑑂𑐴𑑂𑐫𑑅 𑐣𑐐𑐬𑐎𑑀𑐚𑐫𑐵 𑐮𑐩𑐸𑐣𑑂𑐟𑐶𑑄 𑐖𑐶𑐟𑑅 𑐑𑐫𑑂𑐥𑐹 𑐰𑐮 𑑋 𑐠𑑁𑑄 𑐖𑐶 𑐎𑑂𑐫𑐵𑐩𑐬𑐵 𑐖𑑂𑐰𑐣𑐵 𑐩𑐰𑑃𑐳𑐾 𑐮𑐎𑐳 𑐧𑐵𑑄𑐮𑐵𑑅𑐳𑐵 𑐩𑑀𑐧𑐵𑐂𑐮 𑐖𑐶𑐣𑑂𑐡𑐵𑐰𑐵𑐡 𑐢𑐎𑐵𑑅 𑐰𑐣𑐵𑐩𑑂𑐴 𑑋