𑐡𑐬𑐧𑐵𑐬 𑐴𑐵𑐃𑐳𑑂𑐎𑐹𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐩𑐹 𑐖𑑂𑐫𑐵 𑐎𑑂𑐰𑐔𑐵𑐮

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑖 𑐖𑐾𑐛 𑑑𑑐, 𑐱𑐸𑐎𑑂𑐬𑐧𑐵𑐬 𑑑𑑖:𑑐𑑗:𑑑𑑖

𑐣𑐾𑐥𑐵𑑅𑐫𑐵 𑐡𑐎𑐮𑐾 𑐥𑐸𑐮𑐵𑑄𑐐𑐸 𑐡𑐬𑐧𑐵𑐬 𑐴𑐵𑐃𑐳𑑂𑐎𑐹𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐩𑐹 𑐖𑑂𑐫𑐵 𑐎𑑂𑐰𑐔𑐵𑑅𑐐𑐸 𑐡𑐸 𑑋

𑐔𑐶𑐣𑐶𑐫𑐵𑑃 𑐳𑐬𑐎𑐵𑐬𑐫𑐵 𑐐𑑂𑐰𑐵𑐴𑐵𑐮𑐶𑑄 𑐳𑑂𑐎𑐹𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐩𑐹 𑐖𑑂𑐫𑐵 𑐎𑑂𑐰𑐔𑐵𑑅𑐐𑐸 𑐡𑐸 𑑋

𑐠𑑁𑑄 𑐱𑐸𑐎𑑂𑐬𑐰𑐵𑑅 𑐳𑑂𑐎𑐹𑐮 𑐥𑐬𑐶𑐳𑐬𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵 𑐣𑐶𑐟𑐶𑑄 𑐔𑐷𑐣𑐫𑐵 𑐬𑐵𑐖𑐡𑐹𑐟 𑐴𑐵𑐄 𑐫𑐵𑐣𑑂𑐕𑐷𑑄 𑑙 𑐩𑐴𑐶𑐣𑐵𑐫𑑂 𑐴𑐾 𑐳𑑂𑐎𑐹𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐩𑐹 𑐖𑑂𑐫𑐵 𑐎𑑂𑐰𑐔𑐵𑑅𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐔𑐷𑐣𑐫𑐵 𑐳𑐵𑑄𑐑𑐵𑐂 𑐎𑐣𑑂𑐳𑑂𑐚𑑂𑐬𑐎𑑂𑐰𑐳𑐣 𑐐𑑂𑐬𑐸𑐥𑑄 𑐔𑐶𑐣𑐶𑐫𑐵𑑃 𑐰 𑐣𑐾𑐥𑐵𑐮𑐷 𑐎𑐵𑐩𑐡𑐵𑐬𑐫𑐵 𑐐𑑂𑐰𑐵𑐴𑐵𑐮𑐶𑑄 𑐥𑐸𑐣𑑅𑐣𑐶𑐬𑑂𑐩𑐵𑐞 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐬𑐵𑐖𑐡𑐹𑐟 𑐫𑐵𑐣𑑂𑐕𑐷𑑄 𑐨𑐸𑐏𑐵𑐔𑑄 𑐡𑐸𑐣𑐵𑐰𑐫𑐾𑐢𑐸𑑄𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐳𑑄 𑐳𑑂𑐎𑐹𑐮𑐫𑑂 𑐧𑑂𑐰𑐣𑐾𑐩𑐏𑑄𑐐𑐸𑐮𑐶𑑄 𑐫𑐵𑐎𑐣𑑄 𑐴𑐾 𑐎𑐎𑑂𑐲𑐵 𑐎𑑀𑐠𑐵𑐫𑑂 𑐧𑑂𑐰𑐣𑐾𑐐𑐸 𑐮𑐎𑐳 𑐡𑐫𑐾𑐎𑐾𑐐𑐸 𑐣𑐶𑐟𑐶𑑄 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐡𑑂𑐬𑐸𑐟𑐐𑐟𑐶𑑄 𑐣𑑂𑐴𑑂𑐫𑑅𑐣𑐾 𑐫𑑄𑐎𑐵𑐐𑐸 𑐢𑐫𑐵𑐡𑐶𑐮 𑑋

𑐬𑐵𑐖𑐡𑐹𑐟 𑐫𑐵𑐣𑑂𑐕𑐷𑑄 𑐢𑐫𑐵𑐡𑐷, “𑐳𑑂𑐎𑐹𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑑐𑐵𑐫𑐵 𑐖𑑂𑐫𑐵 𑐫𑐵𑐎𑐣𑑄 𑐴𑐾 𑐎𑑂𑐰𑐔𑐵𑐫𑐾𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐳𑐸𑐬𑐎𑑂𑐲𑐶𑐟 𑐬𑐸𑐥𑑄 𑐧𑑂𑐰𑐣𑐾 𑐡𑐂𑐐𑐸 𑐮𑐎𑐳 𑐟𑐫𑐵𑐬 𑐖𑐸𑐂 𑑋 𑐳𑑂𑐎𑐹𑐮 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑐣𑐵𑑅 𑐣𑐾𑐥𑐵𑑅𑐫𑐵 𑐁𑐢𑐸𑐣𑐶𑐎 𑐱𑐶𑐎𑑂𑐲𑐵𑐫𑑂 𑐐𑑂𑐰𑐵𑐴𑐵𑐮𑐶 𑐖𑐸𑐂 𑑋”

𑐰𑐫𑑂𑐎𑐮𑑄 𑐔𑐷𑐣𑐫𑐵 𑐐𑑂𑐰𑐵𑐴𑐵𑐮𑐶 𑐣𑐾𑐥𑐵𑑅𑐫𑐵 𑐴𑐬𑐾𑐎 𑐎𑑂𑐲𑐾𑐟𑑂𑐬𑐫𑑂 𑐖𑐸𑐂𑐐𑐸 𑐢𑐵𑐳𑐾𑑄 𑐁𑐬𑑂𑐠𑐶𑐎 𑐰 𑐳𑐵𑐩𑐵𑐖𑐶𑐎 𑐎𑑂𑐲𑐾𑐟𑑂𑐬𑐫𑑂 𑐔𑐷𑐣𑐫𑐵 𑐣𑐶𑐬𑐣𑑂𑐟𑐬 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐬𑐵𑐲𑑂𑐚𑑂𑐬𑐶𑐫 𑐥𑐸𑐣𑑅𑐣𑐶𑐬𑑂𑐩𑐵𑐞 𑐥𑑂𑐬𑐵𑐢𑐶𑐎𑐬𑐞𑐫𑐵 𑐥𑑂𑐬𑐩𑐸𑐏 𑐎𑐵𑐬𑑂𑐫𑐎𑐵𑐬𑐷 𑐀𑐢𑐶𑐎𑐺𑐟 𑐳𑐸𑐱𑐷𑐮 𑐖𑑂𑐘𑐰𑐵𑐮𑐷𑑄 𑐔𑐷𑐴𑐵𑐎𑑅𑐐𑐸 𑐂𑐮𑐫𑑂 𑐴𑐾 𑐔𑐶𑐣𑐶𑐫𑐵𑑃 𑐎𑐩𑑂𑐥𑐣𑐷𑑄 𑐳𑑂𑐎𑐸𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐢𑐫𑐵𑐡𑐶𑐮 𑑋

𑐖𑑂𑐘𑐰𑐵𑐮𑐷𑐫𑐵 𑐎𑐠𑑄 𑐡𑐬𑐧𑐵𑐬 𑐴𑐵𑐃𑐳𑑂𑐎𑐸𑐮𑐮𑐶𑐳𑐾𑑄 𑐳𑐶𑐣𑑂𑐢𑐸𑐥𑐵𑐮𑑂𑐔𑑀𑐎𑐫𑑂 𑐣𑐶𑐐𑐹, 𑐬𑐳𑐸𑐰𑐵𑐫𑑂 𑐣𑐶𑐐𑐹 𑐰 𑐡𑑀𑐮𑐏𑐵𑐫𑑂 𑐣𑐶𑐐𑐹 𑐳𑑂𑐎𑐸𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞 𑐔𑐶𑐣𑐶𑐫𑐵𑑃 𑐳𑐬𑐎𑐵𑐬𑐫𑐵 𑐐𑑂𑐰𑐵𑐴𑐵𑐮𑐶𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐔𑐷𑐣𑑄 𑐨𑐸𑐏𑐵𑐫𑑂 𑐮𑐶𑐥𑐵 𑑒𑑕 𑐐𑐹 𑐥𑐬𑐶𑐫𑑀𑐖𑐣𑐵𑐩𑐢𑑂𑐫𑐾 𑑖 𑐐𑐹𑐫𑐵 𑐖𑑂𑐫𑐵 𑐎𑑂𑐰𑐔𑐵𑐫𑐾𑐎𑐾 𑐢𑐸𑑄𑐎𑐹𑐐𑐸 𑐡𑐸𑐳𑐵 𑑑𑑙 𑐐𑐹𑐫𑐵 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐎𑐹𑐮𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐴𑐾𑐩𑐔𑐣𑑂𑐡𑑂𑐬 𑐩𑐴𑐟𑑀𑑄 𑐥𑐸𑐣𑑅𑐣𑐶𑐬𑑂𑐩𑐵𑐞 𑐮𑐶𑐥𑐵 𑐳𑑂𑐎𑐸𑐮𑐫𑐵𑐟 𑐥𑐛𑐣𑐥𑐵𑐛𑐣𑐫𑑂 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐢𑐫𑐵𑐡𑐶𑐮 𑑋

𑐳𑑂𑐎𑐸𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞 𑐖𑐸𑐂𑐢𑐸𑑄𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐁𑑅 𑐥𑑂𑐬𑐡𑐬𑑂𑐱𑐣𑐷𑐩𑐵𑐬𑑂𑐐𑐫𑑂 𑐔𑑂𑐰𑑄𑐐𑐸 𑐧𑐵𑐮𑑂𑐩𑐷𑐎𑐷 𑐎𑑂𑐫𑐵𑐩𑑂𑐥𑐳𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐩𑐴𑐟𑑀𑑄 𑐢𑐫𑐵𑐡𑐷, “𑐨𑐸𑐏𑐵𑐫𑑂 𑐮𑐶𑐥𑐵 𑐳𑑂𑐎𑐸𑐮 𑐡𑐸𑐣𑐵𑑅 𑐥𑐛𑐣𑐥𑐵𑐛𑐣𑐫𑑂 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐁𑑅 𑐫𑐵𑐎𑐣𑑄 𑐴𑐾 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐎𑑂𑐰𑐔𑐵𑐫𑐾𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐴𑐵𑐎𑐣𑑄 𑐠𑑅𑐐𑐸 𑐴𑐾 𑐳𑑂𑐎𑐸𑐮𑐫𑑂 𑐧𑑂𑐰𑐣𑐾𑐏𑐣𑐷 𑑋”

𑑑𑑙𑑑𑑐 𑐫𑑂 𑐥𑐮𑐶𑐳𑑂𑐠𑐵 𑐖𑐹𑐐𑐸 𑐡𑐬𑐧𑐵𑐬 𑐳𑑂𑐎𑐸𑐮𑐫𑑂 𑐰𑑄𑐐𑐸 𑐧𑐶.𑐳𑑄. 𑑒𑑐𑑗𑑒 𑐧𑐿𑐱𑐵𑐏𑐫𑐵 𑐨𑐸𑐏𑐵𑐫𑑂𑐫𑐵 𑐴𑐸𑐣𑐶𑑄 𑐎𑑂𑐲𑐟𑐶 𑐖𑐹𑐐𑐸 𑐏𑑅 𑑋 𑐨𑐸𑐏𑐵𑐫𑑂 𑐮𑐶𑐥𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐥𑐶𑐣𑐾 𑐀𑐳𑑂𑐠𑐵𑐫𑐷 𑐚𑐴𑐬𑐵 𑐡𑐫𑐾𑐎𑐵𑑅 𑐧𑑂𑐰𑑄𑐎𑐹𑐐𑐸 𑐏𑑅 𑑋

𑐬𑐵𑐲𑑂𑐚𑑂𑐬𑐶𑐫 𑐥𑐸𑐣𑑅𑐣𑐶𑐬𑑂𑐩𑐵𑐞 𑐥𑑂𑐬𑐵𑐢𑐶𑐎𑐬𑐞 𑐎𑐾𑐣𑑂𑐡𑑂𑐬𑐷𑐫 𑐁𑐫𑑀𑐖𑐣𑐵 𑐎𑐵𑐬𑑂𑐫𑐵𑐣𑑂𑐰𑐫𑐣 𑐊𑐎𑐵𑐂 (𑐱𑐶𑐎𑑂𑐲𑐵) 𑐫𑐵 𑐥𑑂𑐬𑐩𑐸𑐏 𑐂𑐩𑐣𑐵𑐬𑐵𑐫𑐞 𑐱𑑂𑐬𑐾𑐲𑑂𑐛𑑄 𑑘𑑐 𑐎𑐬𑑀𑐜 𑐟𑐎𑐵 𑐮𑐐𑐵𑐣𑐷𑐂 𑐄𑐐𑐸 𑐳𑑂𑐎𑐸𑐮𑐫𑐵 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐱𑑂𑐬𑐾𑐲𑑂𑐛𑐫𑐵 𑐎𑐠𑑄 𑐰𑐂𑐐𑐸 𑐥𑐸𑐳𑐫𑑂 𑐔𑐶𑐣𑐶𑐫𑐵𑑃 𑐳𑐬𑐎𑐵𑐬𑑄 𑐮𑑅𑐮𑑂𑐴𑐵𑐂𑐐𑐸 𑐖𑐸𑐂 𑑋 𑐔𑐶𑐣𑐶𑐫𑐵𑑃 𑐎𑐩𑑂𑐥𑐣𑐷 𑐳𑑄𑐑𑐵𑐂 𑐣𑑄 𑐔𑐶𑐣𑐶𑐫𑐵𑑃 𑐴𑐮𑑄𑐖𑑂𑐰𑐮𑑄 𑐴𑐫𑐵𑑅 𑐴𑐾 𑐳𑑂𑐎𑐸𑐮 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑑅𑐐𑐸 𑐏𑑅 𑑋

𑐎𑐵𑐬𑑂𑐫𑐵𑐣𑑂𑐰𑐫𑐣 𑐊𑐎𑐵𑐂𑐫𑐵 𑐁𑐫𑑀𑐖𑐣𑐵 𑐄𑐥𑐥𑑂𑐬𑐩𑐸𑐏 𑐡𑐶𑐮𑐷𑐥 𑐱𑑄𑐏𑐬 𑐱𑑂𑐬𑐾𑐲𑑂𑐛𑑄 𑐀𑐥𑑂𑐥𑐵 𑐧𑐵𑐴𑐾𑐎 𑐦𑐸𑐎𑑂𑐎 𑐴𑐮𑑄𑐖𑑂𑐰𑐮𑑄 𑐔𑐷𑐣𑐥𑐵𑐏𑐾𑑄 𑐴𑐾 𑐴𑐫𑐵𑑅 𑐡𑐫𑐾𑐎𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐊𑐎𑐵𑐂 𑐣𑑄 𑐳𑑂𑐎𑐸𑐮𑐫𑐵 𑐣𑐶𑐟𑐶𑑄 𑐩𑐵𑑅𑐐𑐸 𑐴𑐮𑑄𑐖𑑂𑐰𑐮𑑄 𑐬𑐵𑐖𑐳𑑂𑐰 𑐕𑐹𑐚 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐎𑐵𑐩𑐡𑐵𑐬𑐥𑐶𑐣𑐶𑐐𑐸 𑐬𑐵𑐴𑐡𑐵𑐣𑐷 𑐁𑐰𑐾𑐡𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐣𑑂𑐴𑐵𑐥𑐵 𑐳𑑂𑐰𑑄𑐐𑐹 𑐟𑐮𑑂𑐮𑐵 𑐡𑐹𑐐𑐸 𑐡𑐬𑐧𑐵𑐬 𑐳𑑂𑐎𑐸𑐮 𑐁𑑅 𑐥𑑂𑐫𑑄𑐐𑐹 𑐟𑐮𑑂𑐮𑐵𑐫𑐵 𑑔𑑕 𑐐𑐹 𑐎𑑀𑐠𑐵 𑐡𑐂𑐐𑐸 𑐁𑐫𑑀𑐖𑐣𑐵 𑐄𑐥𑐥𑑂𑐬𑐩𑐸𑐏 𑐱𑑂𑐬𑐾𑐲𑑂𑐛𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐰𑐫𑑂𑐎𑑅𑐫𑐵 𑐎𑐠𑑄 𑐥𑐸𑐣𑑅𑐣𑐶𑐬𑑂𑐩𑐵𑐞𑐫𑐵 𑐖𑑂𑐫𑐵 𑐎𑑂𑐰𑐔𑐵𑑅𑐐𑐸𑐮𑐶𑑄 𑐁𑑅 𑐬𑑄𑐐𑐬𑑀𑐐𑐣, 𑐰𑐶𑐡𑑂𑐫𑐸𑐟 𑐮𑐶𑐳𑐾𑑄 𑐦𑐶𑐣𑐶𑐳𑐶𑐒𑐫𑐵 𑐖𑑂𑐫𑐵 𑐖𑐎 𑐮𑑂𑐫𑑄𑐡𑐣𑐷 𑑋

𑐰𑐩𑐢𑑂𑐫𑐾 𑑒𑑒 𑐐𑐹 𑐎𑐎𑑂𑐲𑐵 𑐎𑑀𑐠𑐵, 𑑑𑑔 𑐐𑐹 𑐎𑐩𑑂𑐥𑑂𑐫𑐸𑐚𑐬 , 𑐣𑐶𑐐𑐹 𑐥𑐸𑐳𑑂𑐟𑐎𑐵𑐮𑐫, 𑐕𑐐𑐹 𑐔𑐶𑐟𑑂𑐬𑐎𑐮𑐵, 𑐕𑐐𑐹 𑐱𑑂𑐬𑐰𑐞 𑐎𑐎𑑂𑐲, 𑐖𑑂𑐫𑐵𑐎𑐸𑐠𑐶𑐫𑐵 𑐣𑐶𑐟𑐶𑑄 𑐳𑑂𑐰𑑄𑐐𑐹 𑐎𑑀𑐠𑐵, 𑐴𑐮𑐫𑐵 𑐣𑐶𑐟𑐶𑑄 𑐕𑐐𑐹 𑐎𑑀𑐠𑐵 𑐰 𑐏𑐵𑐖𑐵𑐫𑐵 𑐣𑐶𑐟𑐶𑑄 𑐕𑐐𑐹 𑐎𑑀𑐠𑐵 𑐡𑐂𑐐𑐸 𑐖𑐹𑐐𑐸 𑐡𑐸 𑑋

𑐡𑐬𑐧𑐵𑐬 𑐳𑑂𑐎𑐸𑐮𑐫𑑂 𑐁𑑅 𑐨𑐵𑐣𑐸 𑐩𑐵𑐢𑑂𑐫𑐵𑐩𑐶𑐎 𑐰𑐶𑐡𑑂𑐫𑐵𑐮𑐫 𑐰 𑐳𑑄𑐳𑑂𑐎𑐺𑐟 𑐩𑐵𑐢𑑂𑐫𑐵𑐩𑐶𑐎 𑐰𑐶𑐡𑑂𑐫𑐵𑐮𑐫 𑐡𑐸 𑑋 𑐁𑑅 𑐨𑐵𑐣𑐸 𑐰𑐶𑐡𑑂𑐫𑐵𑐮𑐫𑐳 𑑑𑑖𑑕 𑐰 𑐳𑑄𑐳𑑂𑐎𑐺𑐟 𑐩𑐵.𑐰𑐶𑐂 𑑒𑑕𑑐 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐧𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋