𑐠𑑁𑑄 𑐧𑐳𑐣𑑂𑐟 𑐥𑐘𑑂𑐔𑐩𑐷

𑐩𑐵𑐑 𑐱𑐸𑐎𑑂𑐮 𑐥𑐘𑑂𑐔𑐩𑐷𑐫𑐵 𑐡𑐶𑑄 𑐣𑑂𑐫𑐵𑐫𑐾𑐎𑐷𑐐𑐸 ‘𑐱𑑂𑐬𑐷 𑐥𑐘𑑂𑐔𑐩𑐷’ 𑐥𑐬𑑂𑐰 𑐎𑐠𑑄 𑐠𑑁𑑄 𑐰𑐶𑐡𑑂𑐫𑐵𑐫𑐵 𑐀𑐢𑐶𑐲𑑂𑐛𑐵𑐟𑑂𑐬𑐷 𑐡𑐾𑐰𑐷 𑐳𑐬𑐳𑑂𑐰𑐟𑐷𑐫𑐵 𑐣𑐶𑐲𑑂𑐛𑐵𑐥𑐹𑐰𑐬𑑂𑐎 𑐥𑐹𑐖𑐵𑐁𑐖𑐵 𑐁𑐬𑐵𑐢𑐣𑐵 𑐫𑐵𑐣𑐵𑑅 𑐣𑑂𑐫𑐵𑐫𑐾𑐎𑐷𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋

𑐔𑐣𑑂𑐡𑑂𑐬𑐩𑐵𑐠𑐾𑑄 𑐐𑑀𑐬𑑀 𑐰𑐬𑑂𑐞 𑐖𑐹𑐩𑑂𑐴 𑐰 𑐮𑑂𑐴𑐵𑐟𑐫𑑂 𑐰𑐷𑐞𑐵 𑐰 𑐳𑐦𑐹 𑐖𑑂𑐰𑐣𑐵𑐔𑑂𑐰𑑄𑐩𑑂𑐴 𑐰𑐶𑐡𑑂𑐫𑐵𑐫𑐵 𑐡𑐾𑐰𑐷 𑐳𑐬𑐳𑑂𑐰𑐟𑐷𑐫𑐵𑐟 𑐨𑐎𑑂𑐟𑐖𑐣𑐥𑐶𑐣𑑂𑐳𑑄 𑐨𑐵𑐬𑐟𑐷, 𑐱𑐵𑐬𑐡𑐵, 𑐴𑑄𑐳𑐰𑐵𑐴𑐶𑐣𑐷, 𑐖𑐐𑐣𑑂𑐩𑐵𑐟𑐵, 𑐧𑐵𑐐𑐶𑐱𑑂𑐰𑐬𑐷, 𑐎𑑁𑐩𑐵𑐬𑐷, 𑐰𑐬𑐡𑐵𑐫𑐶𑐣𑐷, 𑐧𑐸𑐡𑑂𑐢𑐶𑐡𑐵𑐟𑑂𑐬𑐷, 𑐧𑑂𑐬𑐩𑑂𑐴𑐵𑐔𑐵𑐬𑐶𑐞𑐷, 𑐔𑐣𑑂𑐡𑑂𑐬𑐑𑐞𑑂𑐚𑐵 𑐰 𑐨𑐸𑐰𑐣𑐾𑐱𑑂𑐰𑐬𑐷𑐠𑐾𑑄 𑐖𑐵𑑅𑐐𑐸 𑐣𑐵𑐩𑑄 𑐥𑐸𑐖𑑂𑐫𑐵𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐶𑐡𑑂𑐫𑐵 𑐡𑐾𑐰𑐷 𑐖𑐹𑐐𑐸𑐮𑐶𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐳𑐵𑐴𑐶𑐟𑑂𑐫𑐎𑐵, 𑐎𑐮𑐵𑐎𑐵𑐬, 𑐥𑐟𑑂𑐬𑐎𑐵𑐬, 𑐱𑐶𑐎𑑂𑐲𑐎 𑐰 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐳𑑄 𑐠𑑅𑐠𑑅𑐐𑐸 𑐎𑐮𑐵 𑐳𑐵𑐢𑐣𑐵𑐫𑐵 𑐰𑐳𑑂𑐟𑐸 𑐎𑐮𑐩, 𑐎𑐵𑐥𑐷, 𑐎𑐸𑐔𑐷 𑐰 𑐰𑐵𑐡𑑂𑐫𑐫𑐣𑑂𑐟𑑂𑐬 𑐁𑐡𑐶𑐫𑐵𑐟 𑐳𑐬𑐳𑑂𑐰𑐟𑐷𑐫𑐵 𑐬𑐸𑐥𑑄 𑐥𑐹𑐖𑐵 𑐁𑐬𑐵𑐢𑐣𑐵 𑐫𑐵𑐫𑐾𑐐𑐸 𑐫𑐵𑐂 𑑋 𑐳𑐬𑐳𑑂𑐰𑐟𑐷𑐫𑐵𑐟 𑐟𑐵𑐣𑑂𑐟𑑂𑐬𑐶𑐎𑐥𑐶𑐣𑑂𑐳𑑄 𑐟𑐣𑑂𑐟𑑂𑐬 𑐳𑐶𑐡𑑂𑐢𑐶𑐫𑐵 𑐣𑐶𑐟𑐶𑑄 𑐟𑐵𑐬𑐵𑐡𑐾𑐰𑐷𑐫𑐵 𑐬𑐸𑐥𑑄 𑐩𑐵𑐣𑐾 𑐫𑐵𑐂 𑑋

𑐳𑐹𑐡𑑂𑐬𑑂𑐫𑑅 𑐄𑐟𑑂𑐟𑐬𑐥𑐵𑐏𑐾 𑐰𑐣𑐵𑑅 𑐡𑐶𑑄 𑐟𑐵𑑅𑐴𑐵𑐎 𑐖𑐸𑐂𑐐𑐸 𑐰 𑐧𑐳𑐣𑑂𑐟 𑐆𑐟𑐸 𑐥𑑂𑐬𑐵𑐬𑐩𑑂𑐨 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳𑐫𑐵 𑐮𑐶𑐳𑐾𑑄 𑐠𑑁𑑄𑐫𑐵 𑐡𑐶𑑄𑐫𑐵𑐟 𑐧𑐳𑐣𑑂𑐟 𑐥𑐘𑑂𑐔𑐩𑐷 𑐣𑑄 𑐢𑐵𑐫𑐾𑐐𑐸 𑐔𑐮𑐣 𑐡𑐸 𑑋

𑐆𑐐𑑂𑐰𑐾𑐡𑐫𑑂 𑐰𑐵𑐐𑑂𑐡𑐾𑐰𑐷𑐫𑐵 𑐣𑐵𑐩𑑄 𑐥𑑂𑐬𑐳𑐶𑐡𑑂𑐢𑐶 𑐎𑐵𑑅𑐩𑑂𑐴 𑐧𑑂𑐬𑐩𑑂𑐴𑐵𑐫𑐵 𑐀𑐬𑑂𑐢𑐵𑐒𑐶𑐐𑐣𑐷 𑐧𑑂𑐬𑐩𑑂𑐴𑐵𑐫𑐞𑐷𑐫𑐵 𑐥𑐹𑐖𑐵 𑐄𑐥𑐵𑐳𑐣𑐵𑑄 𑐦𑐸𑐎𑑂𑐎 𑐎𑐠𑑄𑐫𑐵 𑐖𑑂𑐘𑐵𑐣, 𑐳𑐶𑐡𑑂𑐢𑐶 𑐰 𑐳𑐡𑐧𑐸𑐡𑑂𑐢𑐶 𑐥𑑂𑐬𑐵𑐥𑑂𑐟 𑐖𑐸𑐂𑐐𑐸 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐠𑑂𑐰𑐴𑐾 𑐴𑐸𑐣𑐶𑑄 𑐳𑐬𑐳𑑂𑐰𑐟𑐷 𑐥𑐹𑐖𑐵𑐫𑐵𑐟 𑐟𑑅𑐢𑑄𑑄𑐐𑐸 𑐩𑐴𑐟𑑂𑐰 𑐧𑐶𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑁𑑄𑐫𑐵 𑐡𑐶𑑄 𑐳𑐬𑐳𑑂𑐰𑐟𑐷𑐫𑐵 𑐥𑐹𑐖𑐵 𑐫𑐵𑐣𑐵𑑅 𑐰𑐶𑐡𑑂𑐫𑐵 𑐥𑑂𑐬𑐵𑐬𑐩𑑂𑐨 𑐫𑐵𑑅𑐳𑐵 𑐳𑐬𑑂𑐰𑐳𑐶𑐡𑑂𑐢𑐶 𑐥𑑂𑐬𑐵𑐥𑑂𑐟 𑐖𑐸𑐂𑐐𑐸 𑐖𑐣 𑐰𑐶𑐱𑑂𑐰𑐵𑐳 𑐡𑐸 𑑋

𑐠𑑁𑑄𑐫𑐵 𑐡𑐶𑑄 𑐧𑑂𑐫𑐵𑐴𑐵, 𑐧𑑂𑐬𑐟𑐧𑐣𑑂𑐢, 𑐧𑐵𑑅𑐴𑑂𑐬𑐵 𑐟𑐂𑐐𑐸 𑐰 𑐂𑐴𑐷 𑑙𑐧𑐾𑐮𑐧𑐶𑐧𑐵𑐴𑑐 𑐠𑐾𑑄 𑐖𑐵𑑅𑐐𑐸 𑐳𑐵𑐩𑐵𑐖𑐶𑐎 𑐰 𑐢𑐵𑐬𑑂𑐩𑐶𑐎 𑐖𑑂𑐫𑐵 𑐫𑐵𑐫𑐾𑐟 𑐳𑐵𑐂𑐟 𑐳𑑂𑐰𑐫𑐾𑐩𑑂𑐰𑐵𑑅𑐐𑐸 𑐡𑐶𑑄 𑐎𑐠𑑄 𑐩𑐵𑐣𑑂𑐫𑐟𑐵 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐠𑐸𑐐𑐸 𑐡𑐶𑑄 𑐩𑐔𑐵𑐏𑐵𑐔𑐵𑐥𑐶𑐣𑑂𑐟 𑐱𑐶𑐎𑑂𑐲𑐵𑐬𑐩𑑂𑐨 𑐫𑐵𑐎𑐾𑐐𑐸 𑐰 𑐣𑑂𑐴𑐵𑐫𑑂, 𑐣𑑂𑐴𑐵𑐫𑑂𑐥𑑄 𑐥𑑂𑐰𑐵𑑄 𑐏𑐣𑐷𑐐𑐸 𑐣𑑄 𑐱𑐸𑐨 𑐎𑐠𑑄 𑐎𑐵𑐂𑐐𑐸 𑐏𑑅 𑑋

𑐳𑑂𑐰𑐣𑐶𑐐𑑅𑐫𑐵 𑐳𑑂𑐰𑐫𑐩𑑂𑐨𑐹, 𑐩𑐿𑐟𑐷𑐡𑐾𑐰𑐷 𑐰 𑐐𑐿𑐬𑐷𑐢𑐵𑐬𑐵𑐫𑑂 𑐔𑑂𑐰𑑄𑐐𑐸 𑐣𑐷𑐮 𑐳𑐬𑐳𑑂𑐰𑐟𑐷, 𑐫𑐮𑐫𑐵 𑐮𑐾𑐮𑐾 𑐮𑐶𑐳𑐾𑑄𑐫𑐵 𑐩𑐾𑐩𑐾𑐐𑐸 𑐖𑐶𑐮𑑂𑐮𑐵𑐫𑑂 𑐔𑑂𑐰𑑄𑐐𑐸 𑐳𑐬𑐳𑑂𑐰𑐟𑐷𑐫𑐵 𑐡𑐾𑐐𑐮𑐫𑑂 𑐠𑑁𑑄 𑐳𑐸𑐠𑑄𑐣𑐶𑐳𑐾𑑄 𑐴𑐾 𑐥𑐹𑐖𑐵𑐁𑐖𑐵 𑐫𑐵𑐫𑐾𑐟 𑐨𑐎𑑂𑐟𑐖𑐣𑐥𑐶𑐣𑐶𑐐𑐸 𑐨𑐷𑐜 𑐖𑐹𑐐𑐸 𑐏𑑅𑐳𑐵 𑐏𑐵𑐳 𑐫𑐵𑐣𑐵𑑅 𑐁𑐏𑑅 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐕𑐵𑐟𑑂𑐬𑐕𑐵𑐟𑑂𑐬𑐵𑐥𑐶𑐣𑐶𑐐𑐸 𑐴𑐸𑐮𑐩𑐸𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋