𑐠𑐸𑐐𑐸𑐳𑐷 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐨𑐵𑐬𑑂𑐰𑐵𑐔𑑀𑐫𑑂

𑐏𑑂𑐰𑐥 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)- 𑐡𑑃𑐫𑑂𑐡𑐳𑑄 𑐩𑑀𑐴𑐣𑐶𑐫𑐵 𑐂𑐮𑐫𑑂 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐠𑐸𑐐𑐸𑐳𑐷 𑐨𑐵𑐬𑑂𑐰𑐵𑐔𑑀𑐫𑑂 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑐸𑐐𑐸𑐳𑐷 𑐖𑐸𑐂𑐐𑐸 𑐥𑐷𑐣𑐶𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑 𑐫𑐵 𑐨𑐵𑐬𑑂𑐰𑐵𑐔𑑀𑐫𑑂 𑐫𑐵𑐫𑐾𑐐𑐸 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋

𑐰𑐂𑐐𑐸 𑐎𑑁𑐮𑐵𑐠𑑂𑐰 𑐡𑑂𑐰𑐵𑐡𑐱𑐶 𑐰 𑐟𑑂𑐬𑐫𑑀𑐡𑐱𑐶 (𑐀𑐳𑑀𑐖 𑑒𑑑 𑐰 𑑒𑑒) 𑐣𑐶𑐣𑑂𑐴𑐸𑐫𑑄𑐎𑑄 𑐟𑑅𑐩𑐸𑑃𑐖𑑂𑐫𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐨𑐵𑐬𑑂𑐰𑐵𑐔𑑀𑐫𑐵 𑐩𑐶𑐣𑐶𑐧𑐳 𑐥𑐵𑐬𑑂𑐎𑐫𑑂 𑐖𑐸𑐂𑐐𑐸 𑐣𑐶𑐣𑑂𑐴𑐸𑐫𑑄𑐎𑑄𑐫𑐵 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐟𑐵𑑅𑐮𑐵𑐎𑐾𑐟 𑑑 𑐰𑐜𑐵𑐀𑐢𑑂𑐫𑐎𑑂𑐲 𑐱𑑂𑐫𑐵𑐩𑐎𑐺𑐲𑑂𑐞 𑐏𑐟𑑂𑐬𑐷𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐥𑐷𑐣𑐶𑐩𑑂𑐴 𑐡𑐸𑐖𑑅 𑐡𑐸𑐠𑑂𑐫𑐵𑑅𑐐𑐸 𑐥𑐷𑐣𑐶𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐐𑑂𑐰𑐳𑐵𑑅 𑐏𑐮𑑅 𑐣𑑄 𑐣𑐷𑐳𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵𑐫𑐵 𑐣𑐵𑐫𑑅 𑐁𑐱𑐵𑐎𑐸𑐩𑐵𑐬 𑐔𑐶𑐎𑑄𑐧𑑄𑐖𑐵𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐔𑑂𑐰𑑄𑐐𑐸 𑐩𑐸𑑃𑐖𑑂𑐫𑐵𑑄 𑐠𑐸𑐐𑐸𑐳𑐷𑐫𑐵 𑐟𑑅𑐩𑐸𑑃𑐖𑑂𑐫𑐵 𑐨𑐵𑐬𑑂𑐰𑐵𑐔𑑀𑐫𑑂 𑐫𑐵𑐫𑐾𑐐𑐸 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐣 𑐣𑑄 𑐄𑐐𑐸 𑐠𑐵𑐳𑐫𑑂 𑐟𑑅𑐩𑐸𑑃𑐖𑑂𑐫𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑂𑐰𑐫𑐵𑑄 𑐣𑑂𑐴𑑂𑐫𑑅 𑐖𑐹𑐐𑐸 𑐟𑑅𑐩𑐸𑑃𑐖𑑂𑐫𑐵𑐫𑑂 𑐰𑐬𑐶𑐲𑑂𑐛 𑐳𑐩𑐵𑐮𑑀𑐔𑐎 𑐮𑐶𑐳𑐾𑑄 𑐬𑐵𑐖𑐣𑐷𑐟𑐶𑐎 𑐔𑐶𑐣𑑂𑐟𑐎 𑐥𑑂𑐬𑐵. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐫𑐵𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐩𑐸𑑃𑐖𑑂𑐫𑐵𑐫𑑂 𑐣𑐰𑐵𑐳𑐾𑑄 𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐥𑐵𑐬𑑂𑐚𑐷𑐫𑐵 𑐳𑐔𑐶𑐰 𑐥𑐾𑑂𑐬𑐩 𑐳𑐸𑐰𑐵𑐮𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐖𑑂𑐫𑐵 𑐫𑐵𑐣𑐵𑑅 𑐣𑐂𑐥𑐶𑑄 𑐰𑐬𑑂𑐐𑐫𑐵 𑐏𑑅 𑐢𑐵𑐳𑐾𑑄 𑐟𑑅𑐩𑐸𑑃𑐖𑑂𑐫𑐵𑑄 𑐖𑐣𑐳𑐬𑑀𑐎𑐵𑐬 𑐡𑐸𑐐𑐸 𑐬𑐵𑐲𑑂𑐚𑑂𑐬𑐶𑐫 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐰𑐶𑐲𑐫 𑐄𑐟𑑂𑐠𑐵𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐣𑐾𑐩𑐎𑐶𑐥𑐵𑐫𑐵 𑐎𑐾𑐣𑑂𑐡𑑂𑐬𑐷𑐫 𑐡𑐸𑐖𑑅𑐮𑐶𑐳𑐾𑑄 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐳𑐬𑑀𑐖𑐬𑐵𑐖 𑐐𑑀𑐳𑐵𑐂𑑃 𑐟𑑅𑐩𑐸𑑃𑐖𑑂𑐫𑐵𑑄 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐵𑐴𑐶𑐟𑑂𑐫𑐥𑐾𑑂𑐬𑐩𑐷𑐟𑐫𑑂𑐟 𑐕𑐐𑐹 𑐠𑐵𑐳𑐫𑑂 𑐴𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋 𑐣𑐾𑐩𑐎𑐶𑐥𑐵 𑐏𑑂𑐰𑐥 𑐣𑐐𑐬 𑐎𑐩𑐶𑐚𑐷𑐫𑐵 𑐀𑐢𑑂𑐫𑐎𑑂𑐲 𑐣𑐵𑐬𑐵𑐫𑐞𑐧𑐴𑐵𑐡𑐸𑐬 𑐳𑐸𑐰𑐵𑐮𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐬𑐵𑐖𑐣𑐷𑐟𑐶𑐎 𑐳𑑄𑐑𑐬𑑂𑐲𑐫𑐵 𑐡𑐧𑐹 𑐖𑐹𑐐𑐸 𑐰𑐶𑐔𑐵𑑅 𑐟𑐫𑐵𑐡𑐷𑐐𑐸 𑐏𑑅 𑑋