‘𑐟𑑅𑐩𑐸𑑃𑐖𑑂𑐫𑐵𑐫𑑂 𑐧𑐶𑐫𑐵𑐐𑐸 𑐦𑐸𑐎𑑂𑐎 𑐧𑐔𑑄 𑐥𑐹𑐰𑑄𑐎𑐾𑐐𑐸 𑐖𑐸𑐂’

𑐄𑐡𑐾𑐣 𑐣𑑂𑐴𑐹𑐳𑐵𑐫𑑂𑐩𑐶𑐥𑐵𑐏𑐾𑑄

𑐢𑐬𑐵𑐣- 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑑂𑐴𑐹𑐩𑑂𑐴 𑐣𑐵𑐫𑑅 𑐎𑐠𑑄 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫 𑐀𑐟𑑂𑐫𑐢𑐶𑐎 𑐧𑐴𑐸𑐩𑐟 𑐴𑐫𑐵𑑅 𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐷𑐐𑐸 𑐡𑐸 𑑋 𑐩𑑂𑐴𑐷𑐐 𑐰𑐫𑑂𑐎𑑅𑐫𑐵 𑐥𑑂𑐬𑐟𑐶𑐳𑑂𑐥𑐬𑑂𑐢𑐵 𑐩𑐵𑐂𑐮𑐵𑐧𑐵𑐧𑐸 𑐡𑑂𑐫𑑅𑐮𑐵𑐮𑐶𑐳𑐾 𑐖𑐹𑐐𑐸 𑐏𑑅𑐳𑐵 𑐩𑑂𑐴𑐶𑐐𑑅 𑐳𑐸𑐠𑐫𑑂 𑐩𑐟𑐐𑐞𑐣𑐵𑐫𑐵 𑐮𑐶𑐔𑑂𑐰𑑅 𑐰𑑅𑐧𑐮𑐫𑑂 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐥𑐎𑑂𑐲𑐫𑑂 𑑓𑑑𑑓 𑐩𑐟 𑐰𑑅𑐐𑐸 𑐏𑑅𑐳𑐵 𑐰𑐫𑑂𑐎𑑅𑐫𑐵 𑐥𑑂𑐬𑐟𑐶𑐡𑑂𑐰𑐣𑑂𑐡𑑂𑐰𑐶 𑐩𑐵𑐂𑐮𑐵𑐧𑐵𑐧𑐸 𑐡𑑂𑐫𑑅𑐮𑐵𑐫𑐵 𑐥𑐎𑑂𑐲𑐫𑑂 𑑖𑑗 𑐩𑐟 𑐰𑑅𑐐𑐸 𑐏𑑅𑑋
𑐩𑐟𑐡𑐵𑐣𑐫𑑂 𑐩𑐸𑐎𑑂𑐎𑑄 𑑓𑑘𑑖 𑐨𑑀𑐚 𑐎𑐸𑐟𑐸𑑄 𑐰𑑄𑐐𑐸 𑐏𑑅 𑑋 𑐠𑑂𑐰 𑐮𑑂𑐫𑐵𑐏𑑄 𑐰𑐖𑑂𑐬𑐵𑐔𑐵𑐬𑑂𑐫 𑐦𑐸𑐎𑑂𑐎 𑐳𑑂𑐰𑐫𑐵𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐩𑐟 𑐎𑐫𑐵𑑅 𑐟𑑂𑐫𑐵𑑅𑐩𑑂𑐴 𑐄𑐩𑑂𑐩𑐾𑐡𑐰𑐵𑐬 𑐳𑐩𑐾𑐟 𑐖𑐸𑐫𑐵𑐡𑐷𑐐𑐸 𑐡𑐸 𑑋

𑐀𑐠𑐾 𑐴𑐾 𑐰𑐬𑐶𑐲𑑂𑐛 𑐄𑐥𑐵𑐢𑑂𑐫𑐎𑑂𑐲 𑐥𑐡𑐫𑑂 𑑒𑑓𑑕 𑐩𑐟 𑐎𑐫𑐵𑑅 𑐔𑐣𑑂𑐡𑑂𑐬𑐮𑐵𑐮 𑐬𑐵𑐖𑐨𑐞𑑂𑐜𑐵𑐬𑐷 𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐷𑐐𑐸 𑐡𑐸𑐳𑐵 𑐰𑐫𑑂𑐎𑑅𑐫𑐵 𑐥𑑂𑐬𑐟𑐶𑐡𑑂𑐰𑐣𑑂𑐡𑑂𑐰𑐶 𑐱𑑄𑐎𑐬𑐣𑐵𑐬𑐵𑐫𑐞 𑐱𑑂𑐬𑐾𑐲𑑂𑐛𑑄 𑑑𑑓𑑖 𑐩𑐟 𑐎𑐵𑑅𑐐𑐸 𑐡𑐸 𑑋 𑐩𑐶𑐳𑐵 𑐄𑐥𑐵𑐢𑑂𑐫𑐎𑑂𑐲𑐥𑐵𑐏𑐾 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶 𑐀𑐥𑑂𑐰𑑅 𑐎𑐫𑐵𑑅 𑐰𑐶𑐖𑐫𑐷 𑐖𑐸𑐫𑐵𑐡𑐷𑐐𑐸 𑐡𑐸𑐳𑐵 𑐐𑐞𑑂𑐜𑐎𑐷 𑐄𑐥𑐵𑐢𑑂𑐫𑐎𑑂𑐲𑐫𑑂 𑐴𑐬𑐶𑐎𑐸𑐩𑐵𑐬 𑐱𑑂𑐬𑐾𑐲𑑂𑐛, 𑐮𑐸𑐩𑑂𑐧𑐶𑐣𑐷 𑐥𑑂𑐬𑐡𑐾𑐱𑐫𑐵 𑐄𑐥𑐵𑐢𑑂𑐫𑐎𑑂𑐲𑐫𑑂 𑐣𑐬𑐾𑐱𑐎𑐸𑐩𑐵𑐬 𑐬𑐵𑐖𑐨𑐞𑑂𑐜𑐵𑐬𑐷 𑐰 𑑑 𑐣𑑄. 𑐥𑑂𑐬𑐡𑐾𑐱𑐫𑐵 𑐄𑐥𑐵𑐢𑑂𑐫𑐎𑑂𑐲𑐫𑑂 𑐀𑐣𑐶𑐮 𑐩𑐵𑐳𑑂𑐎𑐾 𑐰𑐶𑐖𑐫𑐷 𑐖𑐸𑐫𑐵𑐡𑐷𑐐𑐸 𑐡𑐸 𑑋 𑐄𑐥 𑐩𑐴𑐵𑐳𑐔𑐶𑐰 𑐥𑐡𑐫𑑂 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 𑐱𑑂𑐬𑐾𑐲𑑂𑐛 𑐟𑑂𑐫𑐵𑑅𑐐𑐸 𑐡𑐸𑐳𑐵 𑐏𑐸𑐮𑑂𑐮𑐵 𑐳𑐔𑐶𑐰 𑐥𑐡𑐫𑑂 𑐴𑐬𑐶𑐎𑐸𑐩𑐵𑐬 𑐱𑑂𑐬𑐾𑐲𑑂𑐛 𑐰 𑐖𑐷𑐰𑐾𑐱 𑐱𑐵𑐎𑑂𑐫 𑐟𑑂𑐫𑐵𑑅𑐐𑐸 𑐡𑐸 𑑋

𑐡𑐾𑐫𑑂 𑐡𑐧𑐹𑐫𑐵 𑐎𑐵𑐬𑑂𑐫𑐳𑐩𑐶𑐟𑐶𑐂 𑑔𑑕 𑐩𑑂𑐴 𑐡𑐸𑐖𑑅 𑐡𑐂𑐐𑐸 𑐏𑑅𑐳𑐵𑑄 𑐩𑐾𑐥𑐶𑑄 𑐡𑐸𑐖𑑅𑐟 𑐢𑐵𑑅𑐳𑐵 𑐀𑐗𑑄 𑐮𑑂𑐫𑐫𑐾𑐩𑐵𑑅𑐐𑐸 𑐡𑐸 𑑋 𑐣𑐶𑐬𑑂𑐰𑐵𑐔𑐶𑐟 𑐳𑐎𑐮𑐾𑑄 𑐡𑐸𑐖𑑅𑐟𑐫𑑂𑐟 𑐩𑑂𑐴𑐶𑐐𑑅 𑐴𑐾 𑐱𑐥𑐠 𑐐𑑂𑐬𑐴𑐞 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋 𑐟𑐬 𑐥𑑂𑐬𑐟𑐶𑐣𑐶𑐢𑐶𑐟 𑐳𑐎𑐮𑐾𑑄 𑐮𑐶𑐴𑐵𑑄 𑐰𑐣𑐾 𑐴𑐠𑐵𑐫𑑂 𑐔𑐵𑑅𑐐𑐸𑐮𑐶𑑄 𑐣𑐶𑐬𑑂𑐰𑐵𑐔𑐶𑐟 𑐡𑐸𑐖𑑅𑐥𑐶𑐣𑐶 𑐣𑑂𑐴𑐵𑐥𑐵𑑄𑐐𑐸 𑐩𑐸𑑃𑐖𑑂𑐫𑐵, 𑐧𑐢𑐵𑐃 𑐖𑑂𑐘𑐵𑐥𑐣 𑐰𑐵 𑐳𑐩𑐵𑐥𑐣 𑐁𑐡𑐶 𑐕𑐸𑑄 𑐴𑐾 𑐖𑑂𑐫𑐵𑐗𑑂𑐰𑑅 𑐩𑐖𑐸𑐮 𑑋
𑐣𑐶𑐬𑑂𑐰𑐵𑐔𑐶𑐟 𑐖𑐸𑐂𑐢𑐸𑑄𑐎𑐵𑑅 𑐣𑑂𑐴𑐹𑐩𑑂𑐴 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐠𑑅𑐟 𑐰𑐶𑐱𑑂𑐰𑐵𑐳 𑐫𑐵𑐣𑐵𑑅 𑐩𑐟 𑐧𑐶𑐫𑐵𑐡𑐷𑐥𑐶𑑄 𑐳𑐎𑐳𑐶𑐟𑑄 𑐳𑐸𑐨𑐵𑐫𑑂 𑐡𑐾𑐕𑐵𑐳𑐾𑑄 𑐰𑐫𑑂𑐎𑑅𑐥𑐶𑐣𑐶 𑐰𑐶𑐱𑑂𑐰𑐵𑐳𑐫𑑂 𑐁𑐑𑐵𑐟 𑐖𑐸𑐂𑐐𑐸 𑐕𑐸𑑄 𑐴𑐾 𑐖𑑂𑐫𑐵 𑐫𑐵𑐫𑐾 𑐩𑐏𑐸 𑐢𑐫𑐵𑐡𑐶𑐮 𑑋

‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐮𑐶𑐳𑐾 𑐧𑑅𑐔𑐵𑐴𑐵𑐎𑐮𑑄 𑐏𑑃 𑐮𑑂𑐴𑐵𑐳𑐾𑑄 𑐰𑐫𑑂𑐎𑐮𑑄 𑐟𑑅𑐩𑐸𑑃𑐖𑑂𑐫𑐵𑐫𑐵 𑐗𑑂𑐰𑐮𑐫𑑂 𑐠𑐩𑑂𑐴𑑄 𑐧𑐶𑐫𑐵𑐐𑐸 𑐧𑐔𑑄 𑐦𑐸𑐎𑑂𑐎𑑄 𑐥𑐵𑐮𑐣𑐵 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐡𑐾𑐫𑑂 𑐡𑐧𑐹𑐫𑐵𑐟 𑐣𑑂𑐴𑐹𑐐𑐸 𑐐𑐟𑐶 𑐧𑐷𑐐𑐸, 𑐡𑐾𑐫𑑂 𑐡𑐧𑐹𑐫𑐵 𑐮𑐵𑐐𑐶𑑄 𑐕𑐾𑑃 𑐡𑐣𑐾𑐐𑐸, 𑐡𑐾𑐫𑑂𑐣𑑂𑐫𑑄𑐎𑑄 𑐨𑐵𑐲𑐵 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐾𑐐𑐸, 𑐣𑐾𑐰𑐵𑑅𑐟𑐫𑑂 𑐰𑑂𑐫𑐵𑐰𑐴𑐵𑐬𑐶𑐎 𑐳𑐩𑐳𑑂𑐫𑐵𑐟 𑐖𑑂𑐫𑑄𑐎𑐵 𑐰𑐣𑐾𑐐𑐸 𑐠𑑅𑐥𑐶𑐣𑐶 𑐩𑐹 𑐁𑐖𑑂𑐖𑐸 𑐖𑐸𑐂𑐐𑐸 𑐏𑑃 𑐣𑑄 𑐎𑐣𑐵𑐡𑐶𑐮 𑑋