𑐟𑑂𑐬𑐶𑐰𑐶 𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑑀𑐴 : 𑐳𑐎𑐸𑐣 𑐩𑐴𑐬𑑂𑐖𑐣𑐫𑐵𑐟 𑐥𑑂𑐫𑑄𑐐𑐹 𑐥𑐡𑐎 𑐬𑑀𑐴𑐣 𑐧𑑂𑐫𑐘𑑂𑐖𑐣𑐎𑐵𑐬𑐫𑐵𑐟 𑐳𑑂𑐰𑑄𑐐𑐹 𑐥𑐡𑐎

𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐩𑑄𑐳𑐷𑐬 𑑒𑑓 𑐐𑐟𑐾 𑐖𑐸𑐂𑐐𑐸 𑑔𑑘 𑐎𑑂𑐰𑑅𑐐𑐸 𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑑀𑐴𑐳 𑐕𑐩𑑂𑐴 𑐴𑐾 𑐳𑐬𑑂𑐰𑑀𑐎𑐺𑐲𑑂𑐚 𑐰𑐶𑐡𑑂𑐫𑐵𑐬𑑂𑐠𑐷 𑐠𑐷𑐠𑐷 𑐥𑑂𑐫𑑄𑐐𑐹 𑐰 𑐕𑐩𑑂𑐴𑐾𑐳𑑂𑐫𑐵𑑄 𑐳𑑂𑐰𑑄𑐐𑐹 𑐥𑐡𑐎𑐥𑐵𑐏𑐾𑑄 𑐰𑐶𑐨𑐹𑐲𑐶𑐟 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋

𑐟𑑂𑐬𑐶𑐰𑐶𑑄 𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑑀𑐴𑐳 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴 𑑒𑑐𑑗𑑖 𑐳𑐵𑐮𑐫𑐵 𑐰𑐶𑐨𑐹𑐲𑐶𑐟 𑐖𑐸𑐂𑐐𑐸 𑐳𑐬𑑂𑐰𑑀𑐟𑑂𑐎𑐺𑐲𑑂𑐚 𑐰𑐶𑐡𑑂𑐫𑐵𑐬𑑂𑐠𑐷 𑐢𑐮𑑅 𑐎𑐠𑑄 𑐥𑐸𑐳𑑂𑐟𑐎𑐵𑐮𑐫 𑐰 𑐳𑐹𑐔𑐣𑐵 𑐰𑐶𑐖𑑂𑐘𑐵𑐣 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐎𑑂𑐫𑐵𑐩𑑂𑐥𑐳, 𑐎𑐶𑐥𑐹𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐳𑐎𑐸𑐸𑐣 𑐩𑐴𑐬𑑂𑐖𑐣𑑄 𑑔.𑑐𑑐 𑐳𑐷𑐖𑐷𑐥𑐷𑐊 𑐎𑐵𑑅𑐐𑐸 𑐏𑑅 𑑋

𑐰𑐶𑐡𑑂𑐫𑐵𑐬𑑂𑐠𑐷 𑐩𑐴𑐬𑑂𑐖𑐣𑐫𑐵𑐟 𑐳𑐎𑐟𑐵𑑄 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐴𑐮𑐫𑑂 𑐥𑑂𑐬𑐠𑐩 𑐱𑑂𑐬𑐾𑐞𑐷𑐂 𑐣𑑂𑐴𑐵𑐥 𑐖𑐹𑐐𑐸 𑐖𑐹𑐐𑐸𑐮𑐶𑑄 𑐔𑐵𑐣𑑂𑐳𑐮𑐬 𑐥𑐡𑐎, 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐥𑑂𑐬𑐵𑐢𑑂𑐫𑐵𑐥𑐎 𑐳𑑄𑐑 𑐳𑑂𑐰𑐬𑑂𑐞 𑐥𑐡𑐎, 𑐬𑐵𑐩𑐥𑑂𑐬𑐳𑐵𑐡 𑐩𑐵𑐣𑐣𑑂𑐢𑐬 𑐳𑑂𑐰𑐬𑑂𑐞 𑐥𑐡𑐎 𑐰 𑐬𑐵𑐩𑐥𑑂𑐬𑐳𑐵𑐡 𑐩𑐵𑐣𑐣𑑂𑐢𑐬 𑐳𑑂𑐰𑐬𑑂𑐞 𑐥𑐡𑐎 𑐮𑑅𑐮𑑂𑐴𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐢𑐮𑑅 𑐎𑐠𑑄 𑐩𑐾𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐬𑑀𑐴𑐣 𑐰𑑂𑐫𑐘𑑂𑐖𑐣𑐎𑐵𑐬 𑐳𑑂𑐰𑑄𑐐𑐹 𑐥𑐡𑐎𑑄 𑐰𑐶𑐨𑐹𑐲𑐶𑐟 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐀𑐬𑑂𑐠𑐱𑐵𑐳𑑂𑐟𑑂𑐬 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐, 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐎𑑂𑐫𑐵𑐩𑑂𑐥𑐳, 𑐎𑐶𑐥𑐹𑐫𑐵 𑐬𑑀𑐴𑐣 𑐰𑑂𑐫𑐘𑑂𑐖𑐣𑐎𑐵𑐬𑐫𑐵𑐟 𑐊𑐩𑐊 𑐀𑐬𑑂𑐠𑐱𑐵𑐳𑑂𑐟𑑂𑐬 𑐰𑐶𑐲𑐫𑐳 𑑓.𑑘𑑕 𑐳𑐷𑐖𑐷𑐥𑐷𑐊 𑐎𑐵𑑅𑐐𑐸𑐮𑐶𑑄 𑐟𑐵𑐬𑐵𑐥𑐡 𑐔𑑁𑐢𑐬𑐷 𑐥𑐡𑐎, 𑐏𑐐𑐾𑐣𑑂𑐡𑑂𑐬𑐩𑐵𑐣 𑐳𑐶𑑄 𑐥𑑂𑐬𑐢𑐵𑐣 𑐥𑐡𑐎, 𑐔𑐣𑑂𑐡𑑂𑐬𑐬𑐵𑐖 𑐝𑐸𑑄𑐐𑐾𑐮 𑐳𑑂𑐩𑐺𑐟𑐶 𑐥𑐸𑐬𑐳𑑂𑐎𑐵𑐬 𑐮𑑅𑐮𑑂𑐴𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐀𑐠𑐾𑐴𑐾, 𑐬𑐟𑑂𑐣𑐬𑐵𑐖𑑂𑐫 𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳, 𑐥𑑂𑐬𑐡𑐬𑑂𑐱𑐣𑐷𑐩𑐵𑐬𑑂𑐐𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐬𑐰𑐶𑐣𑐵 𑐑𑐶𑐩𑐶𑐬𑐾𑐫𑐵𑐟 𑐊𑐩𑐊 𑐬𑐵𑐖𑐣𑐷𑐟𑐶 𑐱𑐵𑐳𑑂𑐟𑑂𑐬 𑐰𑐶𑐲𑐫𑐳 𑐣𑑂𑐴𑐵𑐥 𑐮𑐵𑑅𑐐𑐸𑐮𑐶𑑄 𑐮𑐮𑐶𑐟 𑐔𑐣𑑂𑐡 𑐥𑐸𑐬𑐳𑑂𑐎𑐵𑐬 𑐰 𑐰𑐜𑐵𑐎𑐵𑐖𑐷 𑐩𑐬𑐶𑐔𑐩𑐵𑐣 𑐳𑐶𑑄𑐴 𑐥𑐡𑐎 𑐮𑑅𑐮𑑂𑐴𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑑀𑐴𑐳 𑐳𑑂𑐣𑐵𑐟𑐎 𑐟𑐴𑐫𑐵 𑐄𑐟𑑂𑐎𑐺𑐲𑑂𑐚 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐮𑑅𑐮𑑂𑐴𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐥𑐡𑐎 𑐔𑐣𑑂𑐡𑑂𑐬𑐎𑐮𑐵 𑐬𑐵𑐣𑐵 𑐥𑐎𑑂𑐮𑐶𑐴𑐰𑐵 𑐎𑑂𑐫𑐵𑐩𑑂𑐥𑐳, 𑐥𑐎𑑂𑐮𑐶𑐴𑐰𑐵𑐫𑐵𑐟 𑐮𑑅𑐮𑑂𑐴𑐵𑐫𑐾𑐐𑐸 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑑔𑑘 𑐎𑑂𑐰𑑅𑐐𑐸  𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑐵𑑀𑐴𑐳 𑑒𑑐𑑗𑑕, 𑑒𑑐𑑗𑑖, 𑑒𑑐𑑗𑑗 𑐳𑐵𑐮𑐫𑐵 𑐊𑐩𑐦𑐷𑐮, 𑐳𑑂𑐣𑐵𑐟𑐎𑑀𑐟𑑂𑐟𑐬 𑐰 𑐳𑑂𑐣𑐵𑐟𑐎 𑐟𑐴𑐫𑐵 𑐳𑐬𑑂𑐰𑑀𑐎𑐺𑐲𑑂𑐚 𑑒𑑑 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐠𑐷𑐠𑐷 𑐥𑐡𑐎𑑄 𑐰𑐶𑐨𑐹𑐲𑐶𑐟 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋

𑐳𑐵𑐬𑑂𑐰𑐖𑐣𑐶𑐎 𑐰𑐶𑐡𑑂𑐫𑐵𑐬𑑂𑐠𑐷 𑐣𑐵𑐩𑐵𑐰𑐮𑐷𑐂 𑐣𑑂𑐴𑑂𑐫𑐠𑐣𑐵𑐟𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐧𑐵𑐴𑐾𑐎 𑐩𑐾𑐩𑐾𑐥𑐶𑑄 𑐳𑐸𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐳𑑄 𑐡𑐷𑐎𑑂𑐲𑐵𑐣𑑂𑐟 𑐥𑐡𑐎 𑐰 𑐥𑐸𑐬𑐳𑑂𑐎𑐵𑐬 𑐎𑐵𑐫𑐾𑐩𑐵𑑅𑐐𑐸 𑐁𑐢𑐵𑐬 𑐡𑐸𑐳𑐵 𑐩𑑄𑐳𑐷𑐬 𑑑𑑕 𑐐𑐟𑐾𑐡𑐸𑐣𑐾 𑐳𑐥𑑂𑐬𑐩𑐵𑐞 𑐟𑑂𑐬𑐶𑐰𑐶 𑐥𑐬𑐷𑐎𑑂𑐲𑐵 𑐣𑐶𑐫𑐣𑑂𑐟𑑂𑐬𑐞 𑐖𑑂𑐫𑐵𑐎𑐸𑐠𑐶 𑐧𑐮𑑂𑐏𑐸𑐂 𑐳𑑂𑐰𑐵𑐥𑐹 𑐟𑐫𑐵𑑅 𑐡𑐵𑐧𑐷 𑐰𑐶𑐬𑑀𑐢 𑐫𑐵𑐫𑐾𑐐𑐸 𑐥𑐬𑐷𑐎𑑂𑐲𑐵 𑐣𑐶𑐫𑐣𑑂𑐟𑑂𑐬𑐞 𑐎𑐵𑐬𑑂𑐫𑐵𑐮𑐫 (𑐥𑐣𑐶𑐎𑐵𑑄) 𑐳𑐹𑐔𑐶𑐟 𑐫𑐵𑑅𑐐𑐸 𑐡𑐸 𑑋

𑐡𑐷𑐎𑑂𑐲𑐵𑐣𑑂𑐟 𑐥𑐡𑐎 𑐰 𑐥𑐸𑐬𑐳𑑂𑐎𑐵𑐬 𑐎𑐵𑐂𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐳𑑄 𑐩𑑄𑐳𑐷𑐬 𑑑𑑘 𑐐𑐟𑐾𑐡𑐸𑐣𑐾 𑐠𑑅𑐩𑑂𑐴𑐾𑐳𑑂𑐫𑐵𑑄 𑐎𑐵𑑅𑐐𑐸 𑐳𑐎𑑂𑐎𑐮 𑐚𑑂𑐬𑐵𑐣𑑂𑐳𑐎𑑂𑐬𑐶𑐥𑑂𑐚 𑐰 𑐣𑐵𑐐𑐬𑐶𑐎𑐟𑐵𑐫𑐵 𑐦𑑀𑐚𑑀𑐎𑐥𑐷 𑐮𑐶𑐳𑐾𑑄 𑐄𑐐𑐸 𑐥𑐣𑐶𑐎𑐵, 𑐧𑐮𑑂𑐏𑐸𑐂 𑐳𑑂𑐰𑐵𑐥𑐹 𑐟𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋

News