𑐟𑑀𑐏𑐵 𑐣𑐥𑐵𑐥𑐵𑐏𑐾𑑄 𑐧𑑂𑐰𑐣𑐾𑐎𑐸𑐠𑐶, 𑐰𑐶𑐡𑑂𑐫𑐵𑐬𑑂𑐠𑐷 𑐰 𑐱𑐶𑐎𑑂𑐲𑐎𑐫𑐵𑐟 𑐳𑐩𑑂𑐩𑐵𑐣

𑐟𑑀𑐏𑐵 𑐣𑐐𑐬𑐥𑐵𑐮𑐶𑐎𑐵𑑄 𑐣𑐐𑐬 𑐡𑐸𑐣𑐾𑐫𑐵 𑐄𑐟𑑂𑐎𑐺𑐲𑑂𑐚 𑐧𑑂𑐰𑐣𑐾𑐎𑐸𑐠𑐶, 𑐰𑐶𑐡𑑂𑐫𑐵𑐬𑑂𑐠𑐷 𑐰 𑐱𑐶𑐎𑑂𑐲𑐎𑐫𑐵𑐟 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐡𑐸 𑑋 𑐣𑐐𑐬𑐥𑐵𑐮𑐶𑐎𑐵𑑄 𑑕𑑘 𑐎𑑂𑐰𑑅𑐐𑐸 𑐬𑐵𑐲𑑂𑐚𑑂𑐬𑐶𑐫 𑐧𑐵𑐮 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐄𑐐𑐸 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐫𑑂 𑐣𑐷𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷, 𑑔𑑑 𑐩𑑂𑐴 𑐱𑐶𑐎𑑂𑐲𑐎 𑐰 𑑑𑑒 𑐐𑐹 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐣𑐐𑐬 𑐰 𑐡𑐳𑐶𑐥𑑁𑐮𑐶𑐳𑐾𑑄 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋 𑐣𑐐𑐬𑐥𑐵𑐮𑐶𑐎𑐵𑑄 𑐟𑐐𑐶𑑄 𑑑𑑐 𑐰 𑑑𑑒 𑐫𑑂 𑐄𑐟𑑂𑐎𑐺𑐲𑑂𑐚 𑐮𑐶𑐔𑑂𑐰𑑅 𑐴𑐫𑐾𑐟 𑐟𑐵𑑅𑐮𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐣𑐵𑐥𑑄 𑐱𑐶𑐎𑑂𑐲𑐎 𑐰 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋 𑐳𑐩𑑂𑐩𑐵𑐣𑐶𑐟 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐩𑑂𑐴𑐟𑐶𑑄 𑑑𑑒,𑑕𑑐𑑐÷– 𑐟𑐎𑐵 𑐡𑐵𑑄 𑐰 𑐡𑐳𑐶𑐥𑑁𑐮𑐶𑐳𑐾𑑄 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐄𑐟𑑂𑐎𑐺𑐲𑑂𑐚 𑐱𑐶𑐎𑑂𑐲𑐎𑐫𑐵𑐟 𑐩𑑂𑐴𑐟𑐶𑑄 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐰 𑐡𑐳𑐶𑐥𑑁 𑐰𑑂 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐟𑑀𑐏𑐵 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐥𑑂𑐬𑐎𑐵𑐱 𑐀𑐢𑐶𑐎𑐵𑐬𑐷𑑄 𑐱𑐶𑐎𑑂𑐲𑐵𑐫𑐵 𑐐𑐸𑐞𑐳𑑂𑐟𑐬 𑐠𑐎𑐵𑐫𑐾𑐟 𑐰𑐶𑐡𑑂𑐫𑐵𑐬𑑂𑐠𑐷, 𑐱𑐶𑐎𑑂𑐲𑐎 𑐰 𑐧𑑂𑐰𑐣𑐾𑐎𑐸𑐠𑐶𑐫𑐵 𑐄𑐟𑐶𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐡𑐂 𑐢𑐵𑐳𑐾𑑄 𑐐𑐸𑐞𑐳𑑂𑐟𑐬 𑐀𑐥𑑂𑐰𑐫𑐾𑐎𑐾𑐟 𑐴𑐾 𑐠𑐸𑐎𑐠𑑄 𑐳𑐩𑑂𑐩𑐵𑐣 𑐫𑐵𑐣𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐟𑑀𑐏𑐵 𑐣𑐐𑐬 𑐡𑐸𑐣𑐾𑐫𑐵 𑐧𑑂𑐰𑐣𑐾𑐎𑐸𑐠𑐶𑑄 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐩𑐾𑐩𑐾𑐐𑐸 𑐧𑑂𑐰𑐣𑐾𑐎𑐸𑐠𑐶𑑄 𑐳𑑂𑐰𑐫𑐵𑑄 𑐣𑑄 𑐧𑐵𑑄𑐮𑐵𑑅𑐐𑐸 𑐮𑐶𑐔𑑂𑐰𑑅 𑐴𑐫𑐾 𑐦𑐫𑐾𑐩𑐵 𑐢𑐵𑐳𑐾𑑄 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐳𑐎𑐳𑐶𑐣𑑄 𑐩𑐾𑐴𑐣𑐟 𑐫𑐵𑐫𑐾𑐩𑐵𑑅 𑐢𑐫𑐵𑐡𑐶𑐮 𑑋

𑐣𑐐𑐬𑐥𑐵𑐮𑐶𑐎𑐵 𑐱𑐶𑐎𑑂𑐲𑐵 𑐱𑐵𑐏𑐵 𑐥𑑂𑐬𑐩𑐸𑐏 𑐧𑐵𑐧𑐸𑐬𑐵𑐩 𑐐𑑁𑐟𑐩𑑄 𑐣𑐐𑐬 𑐡𑐸𑐣𑐾𑐫𑐵 𑐧𑑂𑐰𑐣𑐾𑐎𑐸𑐠𑐶𑐫𑐵 𑐱𑐶𑐎𑑂𑐲𑐵𑐫𑐵 𑐐𑐸𑐞𑐳𑑂𑐟𑐬 𑐀𑐥𑑂𑐰𑐫𑐾𑐎𑐾 𑐥𑐸𑐬𑐳𑑂𑐎𑐵𑐬 𑐰 𑐳𑐩𑑂𑐩𑐵𑐣𑐫𑐵 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐵𑐎𑐵𑐐𑐸 𑐏𑑅 𑐢𑐵𑐳𑐾𑑄 𑐠𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑐮𑑄 𑐰𑐂𑐐𑐸 𑐡𑐶𑐣𑐫𑑂 𑐱𑐶𑐎𑑂𑐲𑐞 𑐳𑐶𑐎𑐵𑐂 𑐰 𑐎𑑂𑐬𑐶𑐫𑐵𑐎𑐮𑐵𑐥𑐫𑐵𑐟 𑐣𑑂𑐴𑑂𑐫𑐵𑑅 𑐰𑐣𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐐𑐬 𑐥𑑂𑐬𑐩𑐸𑐏 𑐀𑐢𑐶𑐎𑐵𑐬𑐷, 𑐄𑐥𑐥𑑂𑐬𑐩𑐸𑐏 𑐩𑐸𑐬𑐵𑐬𑐷 𑐟𑐵𑐩𑐵𑐒, 𑐱𑐶𑐎𑑂𑐲𑐵 𑐰𑐶𑐎𑐵𑐳 𑐳𑐩𑐣𑑂𑐰𑐫 𑐂𑐎𑐵𑐂𑐫𑐵 𑐥𑑂𑐬𑐩𑐸𑐏 𑐣𑐣𑑂𑐡𑐮𑐵𑐮 𑐥𑑁𑐜𑐾𑐮𑑄 𑐥𑐸𑐬𑐳𑑂𑐎𑐵𑐬 𑐰 𑐥𑑂𑐬𑐩𑐵𑐞 𑐥𑐟𑑂𑐬 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑑋